Ilẹta Nin Otu Nọn Sun Oga Gbẹn Re

Ibhio Mhan Ne Daan Mhan:

Ranmhude mhan hoẹmhọn Osẹnobulua yẹ hoẹmhọn ẹbho, ọle zẹle nin mhan da dagbare dọ ha ‘re ẹbho kiẹn edibo bhi agbaẹbho rebhe, yẹ re amẹn nin ele.’ (Mat. 28:19, 20; Mak 12:28-31) Ahoẹmhọn-egbe ọsaje manman mhọn ahu. Ahamiẹn mhan mhọn oyẹẹ ọsaje, mhan dẹ sabọ rẹkpa ẹbho ne “muegbe rẹ miẹn iẹnlẹn ọsi ighegheghe.”—Iwẹnna 13:48.

Ẹghe nin ikhẹ, ebi mhan ha taman eria nin mhan miẹn bhi inẹbho, bi ebi mhan ha rẹ re ebe nin ele yẹ, ọle hi emhin nọn wo rẹtẹ mhan. Sokpan, ejayenan nian, ọkhẹke nin mhan luẹ ebi mhan ha rẹ manman sabọ ha ne ẹbho zilo nọnsẹn yẹ. Mhan guanọ nin mhan re oyẹẹ man ẹbho. Uwedẹ ọkpa nin mhan ha rẹ lu ọnan hi, nin mhan rẹ ne ele ha zilo ẹmhọn emhin nọn ha ti ele bhọ. Nin mhan rẹ sabọ lu ọnan, mhan dẹ gbẹlokotọ nin mhan da sabọ lẹn emhin ne rẹtẹ eria kẹkẹ, bi uhọnmhọn-ọta nọn ha ti ele bhọ, bhiriọ, mhan ki sabọ fi ebi mhan ha rẹ ne ele zilo denọ beji ọ rẹ khẹke. Be ọne ebe nan ha rẹ sabọ rẹkpa mhan rẹ lu ọnan yẹ?

Iluẹmhin 12, ele ribhi ọne ebe nan. Ene iluẹmhin tẹmhọn ikpẹ esili kẹkẹ ne khẹke nin mhan ha mhọnlẹn, beji mhan ha da sabọ re oyẹẹ man ẹbho, yẹ re ele kiẹn edibo. Ene iluẹmhin kẹkẹ tẹmhọn ikpẹ esili nin Jesu, la ọria ọbhebhe bhi ore nin ọhẹnhẹn rẹman bhi iwẹnna itẹmhọn Osẹnobulua. Ebi mhan ho nin mhan lu hi, nin mhan guanọ uwedẹ nin mhan ha rẹ re oyẹẹ man ẹbho, ọ iyi nin mhan rẹ gheghe dọ ha taman ele emhin nin mhan luẹ ọbhi uhọnmhọn. Arẹmiẹn ọkhẹke nin mhan ha re ene ikpẹ rebhe nan tẹmhọnlẹn bhi ọne ebe nan man bhi iwẹnna itẹmhọn Osẹnobulua, mhan dẹ zilo nyan ebi ikpẹ eso ha rẹ manman rẹkpa mhan yẹ sade mhan miẹn ọria bhi ọsọhẹnhẹn, sade mhan fikie bu ọne ọria re, la, sade mhan munhẹn ha man ọlẹn Baibo.

Beji uwẹ ha rẹ ha luẹ ene uhọnmhọn-ọta kẹkẹ ne ribhi ọne ebe nan, ria eria nyan ebi uwẹ ha rẹ sabọ re ene ikpẹ nan man yẹ, sade uwẹ tẹmhọn Osẹnobulua man ẹbho ne ribhi idunmhun nin uwẹ da nyẹnlẹn. Dọnmhegbe nin uwẹ rẹ manman hoẹmhọn Jehova bi ẹbho. Oyẹẹ nọn sẹ inian, ọle hi ebe ha rẹkpa uwẹ rẹ re ẹbho kiẹn edibo, ọ iyi ebi uwẹ guẹ ebi a rẹ tẹmhọn Osẹnobulua sẹ yẹ.

Ọ wo manman ti mhan bhọ ghe, mhan mhọn ọne isẹhoa rẹ deba bha ha lu ọne iwẹnna nan. (Zeph. 3:9) Mhan bhii nin Jehova manman nan erọnmhọn nin bha, beji bha ha rẹ ha re oyẹẹ man ẹbho, yẹ re ele kiẹn edibo.