ILUẸMHIN 6

Re Ebezẹle Uwẹ Tie IBaibo Man Nọnsẹn

John 10:33-36

EBI UWẸ HA LU: Uwẹ ha tie iBaibo fo, ọkhẹke nin uwẹ re otọ ọle man nọnsẹn, ọkuẹsẹ uwẹ diọ bhi ọbhebhe. Ji ene uwẹ ne talọ lẹn ebi Baibo nin uwẹ tiele bi ọta nin uwẹ ta rẹ diẹn kugbe yẹ.

EBI A RẸ LU ỌLE YẸ:

Zẹ ikpọta kpataki egbe dagbare. Ahamiẹn uwẹ tie iBaibo fo, ọkhẹke nin uwẹ zẹ ikpọta kpataki egbe dagbare bhi ẹkẹ eji uwẹ tiele. Uwẹ dẹ sabọ lu ọnan sade uwẹ kie sounun bhi ene ikpọta kpataki, la uwẹ nọọn ene uwẹ ne talọ inọnta, nọn ha re ele zẹ ene ikpọta kpataki ne ribhi eji bha tiele egbe dagbare.

Ahamiẹn uwẹ noo uwedẹ ọbhebhe rẹ kie ta ebi a gbẹn ọbhi eji uwẹ tiele bhi iBaibo, jamiẹn ghe ene uwẹ ne talọ sẹyẹ lẹn ghe, ẹkẹ eji uwẹ tiele uwẹ da sẹyẹ talọ.
Re otọ emhin kpataki nọn ribhi eji uwẹ tiele man nọnsẹn. Ahamiẹn uwẹ ka sounun bhi ebezẹle nin uwẹ da ha ho nin uwe tie iBaibo uwẹ kuẹ tie ọle, ji ene uwẹ ne talọ daghe ọle ghe, ikpọta kpataki ne ribhi eji uwẹ tiele gene diẹn mun ebezẹle nin uwẹ da tie ọle.

Ahamiẹn uwẹ sẹyẹ zilo nyan eji uwẹ tiele bhi Baibo, sẹyẹ wo tuje ọne iBaibo a. Uwẹ ha lu iriọ, ene uwẹ ne talọ ki sẹyẹ tuje ọsi ele a. Bhiriọ ele ki ha daghe ebi eji uwẹ tiele rẹ diẹn mun ọta nin uwẹ ta yẹ.
Re otọ eji uwẹ tiele man bhi uwedẹ nọn lẹkhẹ. Ọiyi emhin rebhe ne ribhi eji uwẹ tiele bhi Baibo uwẹ ha talọ nyan. Hẹi talọ nyan emhin ne bha rẹtẹ uhọnmhọn-emhin kpataki nọn zẹle nin uwẹ da tie ọle. Uwẹ ha lẹn emhin nin ene uwẹ ne talọ lẹn khẹ rẹji ọne uhọnmhọn-ọta, uwẹ ki sabọ lẹn emhin ne khẹke nin uwẹ ha ne dagbare, nọn ha rẹkpa uwẹ rẹ re otọ eji uwẹ tiele man nọnsẹn bhi uwedẹ nọn ha rẹ mun ẹbho ẹlo kore.