Ofẹn Bha ha Mun IDevidi

Bebhọ uwẹ lu yẹ sade ofẹn muẹn?— Asabọ miẹn uwẹ ki nẹ bui aba ẹ la inẹn. Ọkpa kinọn, ọria ọbhebhe ribhọ nọn ha sabọ yẹ miẹnkpa ẹ. Ọle mhọn ahu gbera ọrebhe. Uwẹ lẹn ọbhọ la?— IJehova nọn. Ji mhan tẹmhọn usẹn-ọbhokhan ọso bhi Baibo natiọle iDevidi. Ofẹn bha mun ọlẹn, ranmhude ọlẹ lẹn ghe iJehova dẹ wo ha miẹnkpa ọle.

Nanbhi egbe ọbhokhan rẹ ha vade, ene biẹ iDevid man ọle nọn hoẹmhọn iJehova. Ọnan zẹle nin iDevidi bha da mun ofẹn arẹ miẹn ebe ri ofẹn mun kẹkẹ sunu jọle. Ọlẹ lẹnmhin ghe Ọmọẹ ọle iJehova khin, ọdẹ miẹnkpa le. Ẹdẹ ọkpa nin Devidi ha ri ohuan kọn, oduma da dọ mun ọkpa bhọ. Uwẹ lẹn ebi Devidi lu yẹ? Ọda khu rẹkhan ọnin oduma, ọda ri obobọ gbọlea! Ẹdẹ ọbhebhe, elanmhẹn ẹwẹ natiọle Biẹ da yẹ dọ mun bhọ, iDevidi da yẹ gbọlea! Ọbhọ uwẹ riale ọmiẹnkpa iDevidi?— IJehova nọn.

Ẹdẹ ọbhebhe, iDevidi da sẹyẹ manman ri izebhudu man. Ibhokhin Izrẹl bi ibhokhin Filistin da ha khọnlẹn. Ọkpa bhi ibhokhin Filistin da ha yi eguanlan! IGolayati atiọle. Ọda ha runun ji Jehova. Ọda yọle nin ọkpa bhi ibhokhin Izrẹl gbudu vae dọ nan lẹn khọn. Abha miẹn ọnọn gbudu yo? IDevidi ki họn, ọda yi Golayati: ‘I dẹ niẹn khọn, iJehova dẹ miẹnkpa mhẹn rẹ gbe ẹ fiọ bhi otọ.’ Uwẹ riale izebhudu iDevidi rẹ man?— Ehe. Uwẹ guanọ nuwẹ lẹn ebe ki sunu?

IDevidi da ri katapọti nọnsọle bi ikpido isẹn rẹ ha khian dọ khọn ọnin eguanlan nan. IGolayati ki miẹn usẹn-ọbhokhan iDevidi khin, ọda ha jọle. IDevidi da yọle: ‘Uwẹ mun agbada bu mhẹn vade, elin nọnsi Jehova mhẹn rẹ bu ẹ vade.’ Iriọ ọki rẹ re ukpudo bhi katapọti, runẹ bu iGolayati, ọda niẹn ọlẹn fiọle. Ọni udo da degbi Golayati bhi ukẹhai! Golayati da yu! Oriri da gbe kuẹ ibhokhin Filistin, ele da nẹgbe. Bebhọ ọbhokhan bii Devidi rẹ sabọ gbe eguanlan fiọ bhi otọ yẹ?— IJehova miẹnkpa ọle. IJehova mhọn ahu gbera ọnin eguanlan nin!

Bebhọ uwẹ ki miẹn luẹ bhi ọkha ọsi Devidi?— IJehova mhọn ahu gbera ọrebhe. Ọmọẹ nọnsẹ ọle khin. Ẹghe ọbhebhe, ahamiẹn ofẹn muẹn, yere ghe iJehova dẹ miẹnkpa ẹ rẹ ha mhọn izebhudu.