Ọta Ẹkhokho Nọn Yẹẹ Mhan rẹ Lẹn

Ọria soso sẹ ta ọta ẹkhokho man uwẹ ghe?—a IBaibo ta ọta ẹkhokho kpataki natiọle ‘ọta ẹkhokho nọn khiale.’ Ọnin ọta ẹkhokho khiale, ranmhude obọ Osẹnobulua ọ nan vae. Ẹbho bha ka lẹn otọle khẹ, ọnan zẹle nan da atiọle ọta ẹkhokho. Enin ehi bhọ guanọ nele yẹ lẹn otọle. Uwẹ yẹ ho nuwẹ lẹn otọle?—

Ẹghe nin ọhẹnhẹn Osẹnobulua da man okpea bi okhuo. Ada ha tiele Adamu bi Ivi. Osẹnobulua da ne ele ọbhi ogba nọn mhọn-ose nọn ribhi Idẹn. Sade ele ka Osẹnobulua ehọ, ele bi imọn nesele arẹ sabọ ri ọnin otọ nan rebhe kiẹn eje mhọn-ose bii ọnin ogba nin. Ele arẹ sabọ nyẹn unyẹnmhin ighegheghe bhi ọnin ogba nin. Uwẹ yere ebi Adamu bi Ivi lu?—

Adamu bi Ivi bha ka Osẹnobulua ehọ, ọnan zẹle nin mhan ida nyẹn bhi otọ-ọfure ẹlẹnan. Osẹnobulua yọle ghe, ọle dẹ ri ọnin otọ nan kiẹn eje mhọn-ose. Bhi ọnin otọ nin, ọrebhe ki nyẹn bhi ighegheghe bhi ẹkẹ eghọnghọn. Bọ arẹ lu ọnan yẹ? Ẹbho bha rẹ ka lẹn otọle, ọnan zẹle nọn da hayi ọta ẹkhokho.

Ẹghe nin iJesu rẹ ha ribhi ọnin agbọn nan, ọda man ẹbho ẹmhọn ọnin ọta ẹkhokho. Ọyọle ẹmhọn Agbejele nọnsi Osẹnobulua nọn. Ọda yẹ taman ele nele ha nan erọnmhọn nọn nin Agbejele vae. Ọnan Agbejele da re ọnin otọ nan kiẹn otọ ọfure nọn mhọn-ose.

Uwẹ ibe ghọnghọn nuwẹ rẹ lẹn ọnin ọta ẹkhokho nan?— Yere ghe ene ka iJehova ehọ, ele ọkpa da nyẹn bhi otọ ọfure nọn vade. IBaibo tẹmhọn ikpea bi ikhuo ne bunbun ne ka iJehova ehọ. Uwẹ ho nuwẹ luẹ ẹmhọn ele?— Ji mhan luẹ okha ọsi eso bhi ẹwẹ ele, bi ebi mhan arẹ diabi ele yẹ.