ILUẸMHIN 23
Be Mhan Rẹ Gbẹn Ebe Zedu Ọle Yẹ?
Otu ne gbẹn ebe bhi U.S.A.
South Korea
Armenia
Burundi
Sri Lanka
Nin mhan rẹ lu eka nin mhan ha sabọ lu bhi ilọmhọn itẹmhọn Osẹnobulua bhi ‘agba-ẹbho, urolo bi ẹbho rebhe,’ ọle zẹ mhan gbẹn ebe bhi urolo nọn sẹbhi 700. (Revelation 14:6) Be mhan rẹ sabọ lu ọnin iwẹnna nọn khua nan yẹ? Esali Jehova ne gbẹn ebe bhi otọ agbọn rebhe, bi ene zedu ebe nan gbẹn ne sẹbhi 3,300, ele rẹkpa mhan rẹ lu ọnan.
Urolo ebo arẹ ka gbẹn ọnin ebe. Otu Ne Sun Oga gbẹloghe iwẹnna ọsi otu ne mhọn obọ bhi ebe nan gbẹn, ne ribhi Bẹtẹ nọn kpọnọn nẹ. Enin otu ne mhọn obọ bhi ebe nan gbẹn nan, ele gbẹloghe iwẹnna nin ene gbẹn ebe lu bhi Bẹtẹ nọn nẹ bi Bẹtẹ eso. Ọnan zẹle nin ebe nin mhan gbẹn da yẹẹ ẹbho rebhe rẹ atie.
Aje Ebe nan gbẹn ji ene zedu ọle. Aki fẹ ebe nan gbẹn ghe fo aki je ọle ji ene zedu ọle bhi ijan ikikẹ bhi ọnin otọ nan, nele da zedu ọle yẹ tie ọle fẹghe. Ele situa nele rẹ guanọ ọta nọn khẹke nọn ha sabọ rẹ ẹmhọn-ata nan gbẹn bhi urolo ebo dagbare nọnsẹn bhi urolo nele zedu ọle.—Ecclesiastes 12:10.
Kọnputa ri ọnin iwẹnna kẹ. Aida sabọ mun kọnputa ọbhi ihe ọsi eria. Arẹmiẹn iriọ, kọnputa ri iwenna kẹ, ranmhude ọle sabọ guanọ otọ ẹmhọn. Esali Jehova lu emhin bhi ẹkẹ kọnputa nan rẹ gbẹn ebe bhi urolo ikikẹ na tiọle Multilanguage Electronic Publishing System (MEPS). Ọnin emhin nan rẹkpa ele rẹ ha gbẹn ebe bhi urolo ne bunbun, nele rẹ ha lu iwẹnna edudu bi nele rẹ ha mhanmhan ebe nan ri masini gbẹn.
Bezẹle nin mhan da sẹyẹ situa rẹ ha gbẹn ebe, arẹmiẹn ẹbho ne zẹ enin urolo ibun? Ranmhude iho nọnsi Jehova nọn nin ‘ọrebhe rẹ dọ min umiẹnfan bi nele rẹ ha mhọn ilẹmhin ẹmhọn-ata nọnsọlẹ.’—1 Timothy 2:3, 4.
Barẹ gbẹn ebe nọnsẹ mhan dagbare yẹ?
Bezẹle nin mhan da zedu ebe nin mhan gbẹn diọ bhi urolo kikẹ?