ARẸMAN NIN JỌNI MIẸN

1 Osẹnobulua hi ọnọn re ene emhin nan man Jesu Kristi, nin ọle re ọle man edibo nesọle, beji ele ha da lẹn emhin ne da kẹ sunu. Jesu da je ẹhi nọnsọle, nin ọle dọ re ene emhin nan man Jọni nin odibo nọnsọle. Ọle da re ene emhin nan man Jọni bọsi ebhohiẹ. 2 Jọni da sọsali ọbhi ọta nin Osẹnobulua tale, bi ọta nin Jesu Kristi tale. Ehe, ọle da sọsali ọbhi emhin rebhe nan rẹman ọlẹn. 3 Eghọnghọn hi ọsi ọne ọria nọn tie ọne ọta akhasẹ nan dagbare. Eghọnghọn yẹ hi ọsi ẹbho ne họn ọne ọta akhasẹ nan, yẹ re obọ rẹkhan emhin nan gbẹn ọbhọ, ranmhude, ọne ẹghe nan rẹyi sire.

4 Imẹn nin Jọni gbẹn ọne ebe nan ji ene agbotu ihinlọn ne ribhi otọ Esia:

Mẹn bhii nin Osẹnobulua bi ene ẹlinmhin ihinlọn ne ribhi odalo ojukhuo nọnsọle manman mhọn ifuẹkẹ da bha, yẹ re ọfure nin bha. “Osẹnobulua hi ọnọn ribhọ khẹ, ọle hi ọnọn ribhọ nian, ọle hi ọnọn da yẹ ha ribhọ.” 5 Mẹn yẹ bhii nin Jesu Kristi manman mhọn ifuẹkẹ da bha, yẹ re ọfure nin bha. Ọle hi “ọne Ọsali Nan Gbaẹkẹ Ọle,” ọle hi “ọria ọhẹnhẹn nọn riọ kpanọ bhi uu.” Ọle yẹ hi “Ojie ọsi ene ijie ne ribhi ọne otọ nan.”

Ọle wo hoẹmhọn mhan. Ọle da re aranlẹn nọnsọle rẹ fan mhan fia bhi obọ olukhọ. 6 Ọle da rẹ mhan kiẹn ijie bi ohẹn beji mhan ha da ha ga Osẹnobulua nọnsọle, nọn yẹ yi Aba ọle. Uyi bi ahu, ọle hi ọsi Jesu rẹ sẹbhi ighegheghe. Isẹ.

7 Ghọle! Ọle vade bhi adudu amẹn. Ọrebhe dẹ daghe ọle, rẹ sẹbhi ene re opolo ha ọle. Ulin-uwa rebhe ne ribhi ọne otọ nan ki ha lu akhiẹ ranmhude ọle. Ehe, iriọ ọ da rẹ sunu. Isẹ.

8 Osẹnobulua nin Jehova* da yọle: “Imẹn hi ọne Afa bi Omẹga.* Imẹn hi ọnọn ka ribhọ khẹ, ọnọn ribhọ nian, bi ọnọn da yẹ ha ribhọ. Imẹn hi ọnọn mhọn ahu nẹ.”

9 Obhio bha imẹn nin Jọni khin. Imẹn bi bha ko ha ziẹngbe ekpokpo beji mhan rẹ rẹkhan Jesu. Imhan ha yẹ ko gbẹloghe bhi ọne ejele. Agbaẹbho nin amẹn nẹga natiọle Patmọs ọle mẹn ye. Ranmhude nin mẹn rẹ ha tẹmhọn Osẹnobulua bi ẹmhọn Jesu, ọle zẹle nan da mun mẹn vae bhi enan. 10 Ẹlinmhin nọn khiale da munhẹn ha noo mẹn. Ọ da rẹkpa mẹn rẹ daghe emhin ne ha sunu bhi ukpẹdẹ ọsi Ebeanlẹn mhan. Mẹn da họn ukpurulu nọn deziẹn reso bhi ikeke imẹn. Ọne ukpurulu da diabe uromhin ọsi akala. 11 Ọ da yọle: “Gbẹn ebi uwẹ daghe ọbhi ebe nan khili, uwẹ ha je ọle ji ene agbotu ihinlọn nan: agbotu nọn ribhi Ẹfẹsọs, ọnọn ribhi Smaina, ọnọn ribhi Pagamọn, ọnọn ribhi Tayataira, ọnọn ribhi Sadis, ọnọn ribhi Filadefia bi ọnọn ribhi Laodesia.”

12 Ẹghe nin mẹn rẹ fiorọ nin mẹn daghe ọnọn ne imẹn talọ, mẹn da daghe emhin ihinlọn nan mun orukpa iọ. Igolu a rẹ lu ele. 13 Bhi ẹwẹ ene emhin nan, mẹn da daghe ọria nọn diabe ọmọn nọnsi okpea. Ọle da yọ ukpọn nọn de sotọ. Ọle da re ugbakun nọn bhia-bhia nan re igolu lu rẹ gbanọ udu nọnsọle. 14 Rẹ deba ọnin, uhọnmhọn bi eto nọnsọle da wo manman ha fua bii ilọn ọsi ohuan, sẹyẹ, ẹlo nọnsọle da diabe eranlẹn. 15 Oẹ nọnsọle da ha fi wanlan-wanlan bii oze ọsaje nọn ribhi eranlẹn, sẹyẹ, ukpurulu nọnsọle da diabe uromhin ọsi amẹn nọn bunbun. 16 Ahiẹnhiẹn ihinlọn da ha ribhi obera nọnsọle. Agbada nọn tantan nan fan* bhi obọ veva da yo dagbare bhi unun nọnsọle. Sẹyẹ, ẹlo nọnsọle da ha fi wanlan-wanlan bọsi ovuẹnlẹn nọn manman zẹ. 17 Ẹghe nin mẹn rẹ daghe ọle, mẹn da de yẹ kuọlọ ọle bhi oẹ.

Ọle da re obera nọnsọle nyan mẹn yẹ yọle: “Hẹi ji ofẹn mun uwẹ. Imẹn hi ọne Ọhẹnhẹn bi ọne Ọkike. 18 Imẹn yẹ hi ọnọn nyẹnlẹn. Imẹn ka rẹ yu, sokpan, ghọle! Mẹn nyẹnlẹn nian bhi ighegheghe, isanhan ọsi uu bi ọsi Idin* ne imẹn. 19 Gbẹn ene emhin nan ọbhi otọ, emhin nin uwẹ daghe, emhin ne sunu nian, bi emhin ne ha sunu sade enan gbera. 20 Emhin ẹkhokho, ọle ene ahiẹnhiẹn ihinlọn nin uwẹ daghe bhi obera nọnsẹmhẹn khin. Emhin ẹkhokho, ọle ene emhin ihinlọn nan mun orukpa ọi nan re igolu lu yẹ khin. Ebi ele mundia nan khọnan: Ene ahiẹnhiẹn ihinlọn, mundia nin ene ẹhi ọsi ene agbotu ihinlọn. Ene emhin ihinlọn nan mun orukpa ọi, mundia nin ene agbotu ihinlọn.

2 “Ọnan hi ebi uwẹ ha gbẹn ji ọne ẹhi nọn ribhi agbotu ọsi Ẹfẹsọs: Ọnọn ne ene ahiẹnhiẹn ihinlọn mhọn bhi obera nọnsọle, nọn yẹ ribhi ẹwẹ ene emhin ihinlọn nan re igolu lu nan mun orukpa ọi yọle nin mẹn ta ọnan man uwẹ: 2 ‘Mẹn lẹn emhin nin uwẹ lu, ẹsọn kẹkẹ nin uwẹ miẹn, bi emhin nin uwẹ ziẹngbe ọle. Mẹn yẹ lẹn ghe uwẹ ire otọ nin ẹbho ne lu emhin ebe. Uwẹ dọnmhẹn eria ne yọle ghe, edibo nesẹmhẹn ele khin, uwẹ ha dọnmhẹn ele, uwẹ ki kere ghe ohoghe ele bhale, ghe, ele iyi edibo nesẹmhẹn. 3 Uwẹ yẹ wo ha ziẹngbe. Uwẹ da yẹ wo rẹtẹ ranmhude elin nọnsẹmhẹn, uwẹ bha ji egbe lọ ẹ. 4 Ọkpakinọn, emhin ribhọ nin uwẹ lu nọn bha yẹẹ mẹn. Uwẹ iyẹ re oyẹẹ man beji uwẹ ka rẹ re oyẹẹ man khẹ.

5 “‘Bhiriọ, yere eji uwẹ ka rẹ ha ye ọkuẹsẹ uwẹ de, uwẹ ha fidenọ yẹ munhẹn ha lu ene emhin nin uwẹ ka rẹ ha lu khẹ. Ahamiẹn uwẹ bha lu iriọ, imẹn ki bu ẹ re yẹ mun orukpa* nọnsẹ kie. Sokpan, uwẹ ha lu iriọ, imẹn ida mun ọne orukpa kie. 6 Ọrẹyiriọ, emhin ọbhebhe ribhọ nin uwẹ lu nọn ti mẹn bhọ. Ene emhin nin Usun ọsi Nikoleọs lu sọnnọn uwẹ, beji ọ yẹ rẹ sọnnọn imẹn. 7 Bha ji ọria nọn mhọn ehọ re ehọ ọbhi ebi ọne ẹlinmhin taman ene agbotu: Ọria nọn khọn miotọ, mẹn ki re otọ nanlẹn rẹ le bhi ikpẹ ọsi oran ọsi iẹnlẹn, nọn ribhi ogba ọfubhegbe nọnsi Osẹnobulua.’

8 “Ọnan hi ebi uwẹ ha gbẹn ji ọne ẹhi nọn ribhi agbotu ọsi Smaina: ‘Ọne Ọhẹnhẹn bi ọne Ọkike,’ nọn ka rẹ yu, sokpan, nọn kie dọ ha nyẹnlẹn, yọle nin mẹn ta ọnan man ẹn: 9 ‘Mẹn lẹn ọnọghọ nin uwẹ kuẹlo da, mẹn yẹ lẹn ghe, uwẹ bha miẹn rẹ lu, ọkpakinọn, uwẹ wo manman fe. Mẹn yẹ lẹn ebi ẹbho eso ne tie egbe ele ibhokhan Ju rẹ ha re unun ji uwẹ yẹ. Sokpan ele bhọ iyi ibhokhan Ju, ibhokhan Esu ele khin. 10 Hẹi ji ene emhin nin uwẹ ha kẹ loya ọle re ofẹn ha mun uwẹ. Ghọle! Ojuu dẹ wo ha muno eso bhi ẹwẹ bha fi ọbhi ighan, beji ọle ha da manman dọnmhẹn ibha. Sẹyẹ bha dẹ miẹn ekpokpo bhi ikpẹdẹ igbe. Sokpan, bha mun urẹọbhọ nọnsẹbha mhọnlẹn rẹ sẹbhi ukpẹdẹ uu. Bha ha lu iriọ, mẹn ki mun ukparu ọsi iẹnlẹn nin bha. 11 Bha ji ọria nọn mhọn ehọ re ehọ ọbhi ebi ọne ẹlinmhin taman ene agbotu: Ọria nọn khọn miotọ, uu nin ọzeva ida sabọ lu ọle emhin soso.’

12 “Ọnan hi ebi uwẹ ha gbẹn ji ọne ẹhi nọn ribhi agbotu ọsi Pagamọn: Ọne ọria nọn mhọn agbada nọn tantan, nan fan bhi obọ veva yọle nin mẹn ta ọnan man ẹn: 13 ‘Mẹn lẹn eji uwẹ da nyẹnlẹn. Mẹn lẹnmhin ghe, enin ojukhuo ọsi Esu ye. Ọrẹyiriọ, uwẹ yẹ wo sun rẹkhan mẹn, uwẹ da wo ha mhọn urẹọbhọ da mẹn, uwẹ bhọ bha fikekegbe imẹn ẹghe nan rẹ gbe Antipas nin ọguọmhandia nọnsẹmhẹn an bhi eji bha ye, nin Esu da nyẹnlẹn.

14 “‘Ọkpakinọn, emhin eso ribhọ nin uwẹ lu nọn bha yẹẹ mẹn. Ẹbho eso ribhi eji uwẹ ye ne lu rẹkhan iman-emhin ọsi Belam. Belam hi ọnọn man Belak ebi ọle ha rẹ re ibhokhan Izrẹl lu olukhọ da Osẹnobulua yẹ. Ọle da si ele ọbhọ nin ele le ebale nan rẹ ze nin ẹbọ, yẹ ha gboghẹ.* 15 Rẹ deba ọnin, ẹbho eso ne re obọ rẹkhan iman-emhin ọsi usun ọsi Nikoleọs yẹ ribhi eji uwẹ ye. 16 Bhiriọ fidenọ. Ahamiẹn uwẹ bha fidenọ, mẹn ki jẹje vae bhi eji uwẹ ye, yẹ re agbada nọn tantan nọn yo dagbare bhi unun nọnsẹmhẹn rẹ khọn ele.

17 “‘Ji ọria nọn mhọn ehọ re ehọ ọbhi ebi ọne ẹlinmhin taman ene agbotu: Mẹn dẹ re bhi mana nan ne he nin ọne ọria nọn khọn miotọ. Mẹn ki yẹ re udo nọn fua nanlẹn. Elin ọsọgbọn a gbẹn bhi ọne udo nan. Gbera ọne ọria nan re ọne udo nan, ọria ọbhebhe iribhọ nọn lẹn elin nan gbẹn ọbhi ọne udo.’

18 “Ọnan ebi uwẹ ha gbẹn ji ọne ẹhi nọn ribhi agbotu ọsi Tayataira: Ọmọn nọnsi Osẹnobulua, nin ẹlo nọnsọle diabe eranlẹn, nin oẹ nọnsọle diabe oze ọsaje, yọle nin mẹn ta ọnan man ẹn: 19 ‘Mẹn lẹn emhin nin uwẹ lu. Mẹn lẹn oyẹẹ bi urẹọbhọ nin uwẹ rẹman. Mẹn yẹ daghe iwẹnna oga nin uwẹ lu, bi ọnọghọ kẹkẹ nin uwẹ ziẹngbe ọle. Ene emhin nin uwẹ lu nian, ele bun nẹ ene uwẹ ka lu.

20 “‘Ọkpakinọn, emhin ribhọ nin uwẹ lu nọn iyẹẹ mẹn. Uwẹ re otọ nin ọne okhuo natiọle Jezibẹl, nọn tie egbe ọle akhasẹ. Ọle re iman-emhin nesọle rẹ hiẹ eguọmhandia nesẹmhẹn, beji ele ha da ha gboghẹ,* yẹ le ebale nan rẹ ze nin ẹbọ. 21 Mẹn da re ẹghe nanlẹn rẹ fidenọ, ọkpakinọn, ọle bha muegbe nin ọle rẹ fidenọ, yẹ re obọ sibhi oghẹ* re. 22 Ghọle! Mẹn dẹ mun emianmhẹn gbe ọle. Sẹyẹ, ahamiẹn ene deba ọle ha gboghẹ bha fidenọ, mẹn ki si ọkakale nọn khua ji ele. 23 Mẹn dẹ noo emianmhẹn oya rẹ gbono imọn nesọle a, beji a da miẹn ghe, ọrebhe bhi ene agbotu ki lẹn ghe, imẹn hi ọnọn fẹ ọkhọle bi otọ ẹkẹ ọsi ẹbho ghe. Beji ọdeọde bhi ẹwẹ bha rẹ lu emhin, iriọ imẹn ha rẹ re ihaosa nanlẹn.

24 “‘Ọkpakinọn, ibha nekẹle bhi Tayataira bha lu rẹkhan ene iman-emhin nan, sẹyẹ, ibha bha luẹ “emhin ne dinmhin ọsi Esu”: Mẹn ho nin bha lẹn ghe, imẹn ida khun ihẹ ọbhebhe mun nin bha. 25 Ọrẹyiriọ, bha sẹyẹ wo ha lu emhin esili nin bha lu ọkuẹsẹ imẹn vae. 26 Ọria nọn khọn miotọ yẹ lu rẹkhan uwedẹ nesẹmhẹn rẹ sẹbhi ọkpẹnlẹn, mẹn ki re ahu nanlẹn rẹ gbẹloghe ene agbaẹbho, 27 beji ọne Aba rẹ re ahu nin mẹn. Sẹyẹ, ọle ki re ukpokpo ẹlọnmhọn rẹ re oya nin ene ẹbho le. Ọle ki dunmhun ele a bọsi akhe. 28 Mẹn dẹ re ahiẹnhiẹn nọn bhala ọsewewiẹ nanlẹn. 29 Ji ọria nọn mhọn ehọ re ehọ ọbhi ebi ọne ẹlinmhin taman ene agbotu.’

3 “Ọnan hi ebi uwẹ ha gbẹn ji ọne ẹhi nọn ribhi agbotu ọsi Sadis: Ọnọn mhọn ẹlinmhin ihinlọn nọnsi Osẹnobulua, nọn yẹ mhọn ene ahiẹnhiẹn ihinlọn yọle nin mẹn ta ọnan man ẹn: ‘Mẹn lẹn emhin nin uwẹ lu. Ẹbho ghe ẹ bii ọria nọn nyẹnlẹn, sokpan, ẹmhọanta nọn ribhọ, ọle hi ghe, uwẹ yulu. 2 Gbẹlokotọ, uwẹ ha yẹ ziẹn ene emhin ne yu ghọghọ. Ranmhude, ẹsọn nin Osẹnobulua nọnsẹmhẹn mun nin uwẹ, uwẹ bha sẹ miẹn ọlẹn sotọ. 3 Bhiriọ, wo ha yere ebi a re nin uwẹ bi ọta nin uwẹ họnlẹn, wo yẹ ha re obọ rẹkhan ọlẹn, uwẹ ha fidenọ. Ahamiẹn uwẹ bha riọ bhi owe, uwẹ ida lẹn ẹghe nin mẹn ha rẹ vae, mẹn ki bu ẹ re bọsi oyi.

4 “‘Ọrẹyiriọ, ikpeta ẹbho eso yẹ ribhi Sadis ne bha re itọn bhi ukpọn nọnsele. Ele dẹ yọ ukpọn nọn fua yẹ ha rẹkhan mẹn, ranmhude ele sẹle. 5 Ọria nọn khọn miotọ, ọle ki mun ukpọn nọn fua yọ. Mẹn ida gbo elin nọnsọle sibhi ebe ọsi iẹnlẹn re. Mẹn ki rẹman ghe mẹn lẹn ọlẹn bhi isira Aba mẹn bi ẹhi nesọle. 6 Bha ji ọnọn mhọn ehọ re ehọ bhi ebi ọne ẹlinmhin taman ene agbotu.’

7 “Ọnan hi ebi uwẹ ha gbẹn ji ọne ẹhi nọn ribhi agbotu ọsi Filadefia: Ọne ọria nọn khiale nọn yi ọria ẹmhọanta, nọn re isanhan ọsi Devid mhọn, ọle je ọne uhọnmhunje nan re. Ọle ha tuje odẹ a, ọria isabọ khue ọle. Ọle ha khue ọle, ọria isabọ tuje ọle a. Ọle yọle nin mẹn ta ene ẹmhọn nan man ẹn: 8 ‘Mẹn lẹn emhin nin uwẹ lu. Ghọle! Mẹn tuje odẹ a nin uwẹ, ọria soso ida sabọ khue ọle. Mẹn lẹnmhin ghe, uwẹ mhọn obhi ahu khere, uwẹ da yẹ re obọ rẹkhan ọta nọnsẹmhẹn. Uwẹ bha fikekegbe mẹn.* 9 Ghọle! Mẹn dẹ lu ọle, nin ibhokhan Esu ne bha ohoghe ghe ibhokhan Ju ele khin, dọ debhẹre nin uwẹ. Mẹn ki yẹ lu ọle nin ele lẹn ghe, imẹn hoẹmhọn ẹn. 10 Ranmhude uwẹ lu rẹkhan ebi uwẹ họnlẹn rẹji ebi mẹn rẹ ziẹngbe yẹ,* mẹn dẹ yẹ gbega uwẹ bhi ẹghe edọnmhẹn. Bhi ọne ẹghe nin, mẹn ki dọnmhẹn ọrebhe ne ribhi ọne otọ agbọn nan rebhe. 11 Mẹn dẹ kẹ vae. Bha wo mun ebi bha mhọnlẹn mhọn nọnsẹn, beji a da miẹn ghe, ọria bha miẹn ibha ukparu ojie nọnsẹbha.

12 “‘Ọria nọn khọn miotọ, mẹn ki re ọle kiẹn ikazi bhi uwa oga ọsi Osẹnobulua nọnsẹmhẹn. Ọle ida kie sibhi ẹkẹ ọle re. Sẹyẹ, mẹn ki gbẹn elin ọsi Osẹnobulua nọnsẹmhẹn ọle bhi ukẹhae. Mẹn ki gbẹn elin ọsi agbaẹbho nọnsi Osẹnobulua nọnsẹmhẹn ọbhọ. Ọne agbaẹbho nin hi Jerusalẹm ọsọgbọn, nọn nabhi okhun vae. Osẹnobulua nọnsẹmhẹn nyan ọlẹn. Mẹn ki yẹ gbẹn elin ọsọgbọn nọnsẹmhẹn ọbhi ukẹhae nọnsọle. 13 Bha ji ọria nọn mhọn ehọ re ehọ ọbhi ebi ọne ẹlinmhin taman ene agbotu.’

14 “Ọnan hi ebi uwẹ ha gbẹn ji ọne ẹhi nọn ribhi agbotu ọsi Laodesia: Ọne ọria natiọle Isẹ, nọn yi ọsali nan gbaẹkẹ ọle, nọn yẹ yi ọria ọhẹnhẹn nin Osẹnobulua manlẹn, yọle nin mẹn ta ọnan man ẹn: 15 ‘Mẹn lẹn emhin nin uwẹ lu, uwẹ bha fuọfuọ, uwẹ bha ghan. Ọ ha rẹ ha mhẹn sade uwẹ fuọfuọ la sade uwẹ ghan. 16 Beji a miẹn ghe uwẹ diabe amẹn nọn bẹbẹ, uwẹ bha ghan, uwẹ bha fuọfuọ, imẹn dẹ jẹ uwẹ kua. 17 Uwẹ wo ha yọle, “Mẹn manman fe. Mẹn wo manman mhọn afe bi ua, bhiriọ imẹn iyẹ guanọ emhin soso.” Ọkpakinọn, uwẹ bha lẹn ghe, ọruẹlo nọn banọn an uwẹ khin, ghe, uwẹ imhọn ọkpa mhọn eva. Uwẹ bha yẹ lẹn ghe, ọria nin oya gbe uwẹ khin, ghe, uwẹ sẹ ọnan ha tọhan ọlẹn. 18 Dọ dẹ igolu nan re eranlẹn lu bhi obọ mẹn, beji uwẹ ha da fe. Uwẹ ha yẹ dọ dẹ ukpọn nọn fua bhi obọ imẹn, nin uwẹ ne yọ rẹ gue eban nọnsẹ, nin ẹkhọle hẹi yẹ lo ẹ. Yẹ dẹ ikhunmhun ẹlo bhi obọ imẹn nin uwẹ re bhi ẹlo beji uwẹ ha da ha daghe.

19 “‘Ene imẹn hoẹmhọnlẹn, ele mẹn re adia nan, ele mẹn yẹ gbe sibhi esankan re. Bhiriọ, bha fidenọ, bha ha yẹ re ohubhudu man. 20 Ghọle! Mẹn ribhi ununro, mẹn so obọ bhi odẹ. Ọria nọn hi ki rẹ khin nọn họn urulu nọnsẹmhẹn, yẹ tuje odẹ a nin mẹn, mẹn ki na ọle bhi uwa. Imẹn bi ọle ki ko le ebale emuan. 21 Ọria nọn khọn miotọ, mẹn ki ji ọle da deba mẹn dotua bhi uke ojukhuo nọnsẹmhẹn, beji imẹn rẹ deba Aba imẹn dotua bhi uke ojukhuo nọnsọle, ranmhude nin mẹn rẹ khọn miotọ. 22 Bha ji ọria nọn mhọn ehọ re ehọ bhi ebi ọne ẹlinmhin taman ene agbotu.’”

4 Ene emhin nan ki sunu fo, ghọle! Mẹn da daghe odẹ nọn tuje a bhi okhun. Urulu ọhẹnhẹn nin mẹn họnlẹn da diabe urolomhin ọsi akala. Ọne urulu da taman imẹn yọle: “Vae bhi enan, nin mẹn re emhin eso ne ha kẹ sunu man ẹn.” 2 Ẹlinmhin nọnsi Osẹnobulua da wo re osukpa munhẹn ha noo mẹn. Mẹn da daghe ojukhuo bhi okhun. Ọria da ha ribhi uke ọne ojukhuo. 3 Ọnọn dotua bhi uke ọne ojukhuo da ha fi wanlan-wanlan bii udo natiọle jaspa,* bi udo natiọle sadiọs.* Ele da nẹga ọne ojukhuo. Ọne ele da diabe udo natiọle ẹmẹrad.*

4 Ojukhuo enẹn nyan uje* da nẹga ọne ojukhuo. Mẹn da daghe ewanlẹn enẹn nyan uje* dotua bhi ene ojukhuo. Ele da mun ukpọn nọn fua yọ. Ukparu ojie nan re igolu lu da ha ri ele bhi uhọnmhọn. 5 Anyan da ha nyan re bhi ọne ojukhuo, avan da ha de bhi enin. Mẹn da yẹ họn usomhin kẹkẹ na enin dagbare. Orukpa ihinlọn da ha bhala bhi odalo ọne ojukhuo. Ene orukpa mundia nin ẹlinmhin ihinlọn nọnsi Osẹnobulua. 6 Emhin nọn diabe okpẹdẹ nọn sẹn an, da ha ribhi odalo ọne ojukhuo. Ọne emhin nan da gbanọn an bii ughegbe.

Emhin enẹn ne nyẹnlẹn da ha ribhi adesẹ, bhi eji ọne ojukhuo ye, ele da yẹ nẹga ọle. Ene emhin enẹn nan da ha mhọn ẹlo bhi egbe rebhe. 7 Ọne ọhẹnhẹn bhi ene emhin ne nyẹnlẹn, da diabe oduman, ọne ọzeva da diabe ẹmena, ọne ọzea da ha mhọn ẹlo ọsi ọria, ọne ọzenẹn da diabe oghohọn.* 8 Ọdeọde bhi ene emhin enẹn nan da ha mhọn igẹn ehan. Ẹlo da vuọn igẹn nọnsele rebhe. Ẹghe rebhe, asọn bi odanmhẹn, ele ki wo ha so yọle: “Ikhiale, ikhiale, ikhiale hi ọsi Jehova* nin Osẹnobulua nọn mhọn ahu nẹ. Ọle hi ọnọn ka ribhọ, ọle hi ọnọn ribhọ nian, ọle hi ọnọn da yẹ ha ribhọ.”

9 Ẹghe nọn hi ki rẹ khin nin ene emhin ne nyẹnlẹn rẹ re uyi, ọghọ bi ekhuẹnmhẹn ji Onọn dotua bhi uke ọne ojukhuo, ọnin hi, Ọnọn nyẹnlẹn bhi ighegheghe, 10 ene ewanlẹn enẹn nyan uje* ki debhẹre ha ga Ọnọn nyẹnlẹn bhi ighegheghe, nọn dotua bhi uke okhun ọne ojukhuo. Ele ki ne ukparu nọnsele sotọ bhi odalo ọne ojukhuo yẹ ha yọle: 11 “Jehova* nin Osẹnobulua nọnsẹmhan, uwẹ uyi, ọghọ bi ahu khẹke. Ranmhude, uwẹ hi ọnọn man emhin rebhe. Sẹyẹ, ranmhude iho nọnsẹ, ọle zẹle nin ene emhin nan rebhe da ha ribhọ.”

5 Mẹn da daghe ebe nan khili bhi obera ọsi Ọnọn dotua bhi ọne ojukhuo. A da gbẹn emhin ọbhi obọ veva bhi ọne ebe, yẹ re emhin* ihinlọn khue ọle. 2 Mẹn da daghe ẹhi nọn wolo. Ọle da ha so yọle: “Họla sẹle nọn ha fanọn ene emhin sibhi ọne ebe re yẹ taan ọlẹn an?” 3 Ọkpakinọn, a bha miẹn ọria soso bhi okhun, la bhi ọne otọ nan, la bhi ẹkẹ otọ nọn sabọ taan ọne ebe a, yẹ fẹ ebi a gbẹn ọbhọ. 4 Mẹn da wo ha viẹ, ranmhude, a bha miẹn ọria soso nọn sẹ ọnọn ha tuje ọne ebe a, yẹ fẹ ebi a gbẹn ọbhọ. 5 Ọkpa bhi ene ewanlẹn da ki taman imẹn yọle: “Hẹi yẹ viẹ. Ghọle! Ọne oduman nọn na bhi ulin-uwa ọsi Juda vae, nọn yi iniẹn ọsi Devid khọn miotọ. Ọle sẹle nin ọle rẹ fanọn ene emhin ihinlọn an, yẹ taan ọne ebe a.”

6 Mẹn da daghe ohuan nọn mundia bhi adesẹ ọne ojukhuo bi bhi ẹwẹ emhin enẹn ne nyẹnlẹn. Ọ da diabe ghe, a re ọle zọese. Ọne ohuan da ha mhọn ikhuan ihinlọn bi ẹlo ihinlọn. Ene ẹlo mundia nin ẹlinmhin ihinlọn nesi Osẹnobulua nan je ha khian otọ agbọn rebhe. 7 Ọle da wo jẹje bu Ọnọn dotua bhi uke ọne ojukhuo dọ miẹn ọlẹn ọne ebe. 8 Ẹghe nin ọne ohuan rẹ miẹn ọlẹn ọne ebe, ene emhin enẹn ne nyẹnlẹn bi ene ewanlẹn enẹn nyan uje* da debhẹre nanlẹn. Ọdeọde bhi ẹwẹ ele da mun afan* mhọnlẹn, bi ukpamanku nan re igolu lu nin emhin nọn vin-ohin ye. (Ọne emhin nọn vin-ohin mundia nin erọnmhọn ọsi ene khiale.) 9 Ele da ha so illo ọsọgbọn. Ele da yọle: “Uwẹ hi ọnọn sẹle nọn rẹ re ọne ebe yẹ fanọn ene emhin nan rẹ khue ọle sibhọ re. Ranmhude, a gbe uwẹ a, sẹyẹ, aranlẹn nọnsẹ, ọle uwẹ rẹ dẹ ẹbho bhi ulin-uwa kẹkẹ, urolo kẹkẹ bi agbaẹbho kẹkẹ. Uwẹ da dẹ ele nin Osẹnobulua. 10 Uwẹ da re ele kiẹn ijie bi ohẹn nin Osẹnobulua. Ele dẹ gbẹloghe ọne otọ nan.”

11 Mẹn da daghe ẹhi ne bunbun nẹga ọne ojukhuo bi ene emhin enẹn ne nyẹnlẹn bi ene ewanlẹn. Ene ẹhi da wo manman ha bun.* Mẹn da yẹ họn ukpurulu nọnsele. 12 Ele da si urulu okhun ha yọle: “Ọne Ohuan nan gbe a, ọle hi ọne ahu, afe, ẹwanlẹn, ẹtin, ọghọ, uyi, bi ogẹn khẹke.”

13 Mẹn da họn ghe, emhin ne nyẹnlẹn rebhe ne ribhi okhun, uke ọne otọ nan, ẹkẹ otọ, ọne okpẹdẹ bi emhin nekẹle rebhe, da ha yọle: “Ọnọn dotua bhi uke okhun ọne ojukhuo bi ọne Ohuan, ele ogẹn, ọghọ, uyi, bi ahu khẹke rẹ sẹbhi ighegheghe.” 14 Ene emhin enẹn ne nyẹnlẹn da ha yọle: “Isẹ!” Sẹyẹ, ene ewanlẹn da ne iguẹ sotọ ha ga Osẹnobulua.

6 Mẹn da daghe ẹghe nin ọne Ohuan rẹ fan ọkpa bhi ene emhin nan rẹ khue ọne ebe a. Mẹn da yẹ họn ukpurulu ọsi ọkpa bhi ene emhin enẹn ne nyẹnlẹn. Ọle da reso bọsi avan. Ọle da yọle: “Dagbare!” 2 Ghọle! mẹn da daghe akasi* nọn fua. Ọnọn dotua bhi uke okhun ọlẹn da re uhẹn mhọn; a da mun ukparu ojie nanlẹn. Ọle da dagbare dọ ha khọn eghian ọlẹn miotọ.

3 Ọle ki fan ọne emhin nin ọzeva sibhi ọne ebe re, mẹn da họn ọne emhin nọn nyẹnlẹn nin ọzeva yọle: “Dagbare!” 4 Akasi nọn gian da dagbare. A da re udede agbada nin ọnọn hẹn ọlẹn, yẹ re otọ nanlẹn rẹ re ọfure sibhi ọne otọ nan re, beji a ha da miẹn ẹbho ki ha gbono egbe ele a.

5 Ẹghe nin ọle ki rẹ fan emhin nin ọzea sibhi ọne ebe re, mẹn da họn emhin nọn nyẹnlẹn nin ọzea yọle: “Dagbare!” Osukpa, mẹn da daghe akasi nọn bhihi. Ọnọn hẹn ọlẹn da ne ebi a rẹ mhaan emhin mhọn bhi obọ. 6 Mẹn da họn ukpurulu bhi ẹwẹ ene emhin enẹn ne nyẹnlẹn, nọn yọle: “Dinariọs* ọkpa a ha rẹ khiẹn ukpu* wit ọkpa, sẹyẹ, dinariọs ọkpa a ha rẹ khiẹn ukpu bali ea. Bha fẹkẹ noo ọne abhi oliv bi ọne anyọn.”

7 Ẹghe nin ọle rẹ fan emhin nin ọzenẹn sibhi ọne ebe re, mẹn da họn ukpurulu ọsi emhin nọn nyẹnlẹn nin ọzenẹn yọle: “Dagbare!” 8 Osukpa mẹn da daghe akasi nọn fua bhuriẹ-bhuriẹ. A da ha tie ọnọn dotua bhi uke ọle, Uu. Idin* da rẹkhan ọlẹn bhi ikeke. A da wa ọne otọ nan diọbhi ijanlẹn enẹn, yẹ mun obọ ọkpa ele bhi obọ, beji ele ha da noo agbada nọn tantan, ukhunmhun, emianmhẹn-oya, bi elanmhẹn ẹwẹ ne ribhi ọne otọ nan rẹ gbono ẹbho a.

9 Ọle ki fan emhin nọnzi isẹn sibhi ọne ebe re, mẹn da daghe ukhuo-izọese, iẹnlẹn* ọsi ẹbho nan gbono a da ha ribhi otọ ọle. Ranmhude nin ele rẹ re obọ rẹkhan ọta nọnsi Osẹnobulua yẹ ha tẹmhọn ọlẹn, ọle zẹle nin a da gbono ele a. 10 Ele da ha so yọle: “Ebeanlẹn Nọn Ke Okhun Nẹ, uwẹ hi ọnọn khiale, uwẹ yẹ hi Osẹ ọsi ẹmhọanta. Be ọ ha bue sẹ yẹ, ọkuẹsẹ uwẹ dọ bhuohiẹn ene ribhi agbọn, yẹ re oya nin ẹbho ne gbono mhan an?” 11 A da mun ukpọn nọn fua nin ọdeọde bhi ẹwẹ ele. A da taman ele nin ele mundia khere sẹbhi ẹghe nin usun nọnsele ha rẹ gba, ranmhude, a dẹ kẹ gbono ibhio ele a nin ele ko yi igbọn, beji a rẹ gbono ele a.

12 Ẹghe nin ọle rẹ fan emhin nọnzi ehan sibhi ọne ebe re, otọ da mun lueghe. Ovuẹn da bhihi a bii ukpọn akhiẹ nan re ilọn ẹbhe lu. Uki da ha gian bii aranlẹn. 13 Ahiẹnhiẹn ne ribhi okhun da denọ kua, beji ikpẹ fig ne bha sẹ wo rẹ denọ kua bhi eran fig sade ukpahoho fi. 14 A da khi okhun re sibhi otọ re, beji a rẹ khi ebe. A da vuno ene oke rebhe bi ene otọ nin amẹn nẹga sibhi eji ele ye re. 15 Ene ijie rebhe ne ribhi ọne otọ nan, ene ribhi ihe nọn khua, ekakulo, ene fele, ene wolo, ene igbọn bi ene iyi igbọn, da dọ nẹko bhi ẹkẹ uhio nọn ribhi udo, bi otọ oke kẹkẹ. 16 Ele da ha taman ene oke, bi ene udede udo yọle: “Bha degue mhan, beji a ha da miẹn ghe, Ọnọn dotua bhi uke ojukhuo bha daghe mhan, bi nin ohu ọsi ọne Ohuan hẹi sẹ imhan bhi egbe. 17 Ukpẹdẹ ohu nọnsele vae, họla ha sabọ miuhọnmhọn?”

7 Ene emhin nan ki sunu fo, mẹn da daghe ẹhi enẹn ne mundia bhi obọ nenẹn ọsi ọne otọ nan. Ele da mun ahoho nọn fi re bhi obọ nenẹn ọsi ọne otọ nan mhọnlẹn, beji a da miẹn ahoho bha fi ọbhi ọne otọ nan, ọne okpẹdẹ, la eran soso. 2 Mẹn da daghe ẹhi ọbhebhe, ọle da ha nabhi obọ nin oẹnlẹn da hẹnre dagbare. Ọle da re emhin nin Osẹnobulua nọn nyẹnlẹn rẹ re iyaman nin ẹbho mhọnlẹn. Ọle da sotie ene ẹhi enẹn nan je nin ele dọ dunmhun ọne otọ nan an bi ọne okpẹdẹ. 3 Ọle da taman ele yọle: “Bha hẹi sẹ dunmhun ọne otọ nan an, la ọne okpẹdẹ, la ene eran. Bha mundia fo nin mhan ka re iyaman bhi ukẹhae ọsi eguọmhandia nesi Osẹnobulua nọnsẹmhan.”

4 Mẹn da họn ghe, itue uli enẹn nyan egbọ eva nyan iyisẹn,* ele a re iyaman nan. Ulin-uwa ọsi ibhokhan Izrẹl ene ẹbho na vae:

9 Ọne emhin nan ki sunu fo, ghọle! mẹn da daghe usun ẹbho ne bunbun, nin ọria soso bha sabọ ka. Agbaẹbho kẹkẹ bi ulin-uwa kẹkẹ ne ribhi otọ ọne agbọn nan rebhe ele na vae. Urolo kẹkẹ ele yẹ zẹ. Ele da muno ukpọn nọn fua yọ, yẹ mundia bhi odalo ọne ojukhuo bi odalo ọne Ohuan. Ele da ne ikpilanmhẹn mhọn bhi obọ. 10 Ele da ha so yọle: “Osẹnobulua nọnsẹmhan nọn dotua bhi uke ọne ojukhuo, bi ọne Ohuan, ele re umiẹnfan nin mhan.”

11 Ene ẹhi rebhe, ene ewanlẹn, bi ene emhin enẹn ne nyẹnlẹn da mundia nẹga ọne ojukhuo. Ele da debhẹre bhi odalo ọne ojukhuo yẹ ha ga Osẹnobulua. 12 Ele da ha yọle: “Isẹ! Ogẹn, uyi, ẹwanlẹn, ekhuẹnmhẹn, ọghọ, ahu, bi ẹtin hi ọsi Osẹnobulua nọnsẹmhan rẹ sẹbhi ighegheghe. Isẹ.”

13 Ọkpa bhi ene ewanlẹn da ki nọọn mẹn yọle: “Uwẹ be lẹn ene ẹbho nan ne muno ukpọn nọn fua yọ? Uwẹ be lẹn eji ele na vae?” 14 Mẹn da jẹje wanniẹn ọlẹn yọle: “Heye ebeanlẹn mẹn, uwẹ hi ọnọn ha taman imẹn.” Ọle da ki taman imẹn yọle: “Enan hi ene ẹbho ne miuhọnmhọn bhi ekpokpo nọn khua. Ele re aranlẹn ọsi ọne ohuan rẹ họ ukpọn nọnsele fua. 15 Ọnin zẹle nin ele da mundia bhi odalo ojukhuo nọnsi Osẹnobulua, yẹ ha re oga nọn khiale ji ọle bhi asọn bi odanmhẹn bhi uwa oga nọnsọle. Ọnọn dotua bhi uke ọne ojukhuo dẹ taan ibọkpọ nọnsọle a nyan ele. 16 A iyẹ da miẹn ele bha miẹn ebale le, la nan miẹn ele bha miẹn amẹn wọn. Ovuẹnlẹn iyẹ da ha to mun ele, la nọn wawa ele egbe a. 17 Ranmhude, ọne ohuan nọn ribhi adesẹ ọne ojukhuo dẹ sun ele, ọle ki dia ele diọbhi eji amẹn ọsi iẹnlẹn ye. Sẹyẹ, Osẹnobulua ki gbo amẹn-eviẹ sibhi ẹlo nọnsele re.”

8 Ọle ki fan ọne emhin nọnzi ihinlọn nan rẹ khue ọne ebe a, ijerebhe da fi ahiẹ a bhi okhun, bhi ebe sẹbhi ihuẹnlo ọgban.* 2 Mẹn da daghe ẹhi ihinlọn ne mundia bhi odalo Osẹnobulua. A da ne akala ihinlọn nin ele.

3 Mẹn da daghe ẹhi ọbhebhe. Ọle da vae dọ mundia bhi egbegbe ukhuo-izọese. Ọle da mun ukpamanku nan re igolu lu nan rẹ tuẹ emhin nọn vin-ohin an mhọnlẹn. A da mun emhin nọn bunbun nọn vin-ohin nanlẹn, nin ọle rẹ zọese bhi ukhuo-izọese nan re igolu lu, nọn ribhi odalo ọne ojukhuo. Sẹyẹ, bhi ọne ẹghe nan, Osẹnobulua da ha kaehọ erọnmhọn ọsi eria ne khiale. 4 Ighogho ọsi ọne emhin nọn vin-ohin, nọn ribhi obọ ọsi ọne ẹhi bi erọnmhọn ọsi eria ne khiale, da wo ha hẹ diọbhi eji Osẹnobulua ye. 5 Osukpa, ọne ẹhi da mun ọne ukpamanku nan rẹ tuẹ emhin nọn vin-ohin, yẹ gua bhi eranlẹn nọn ribhi ukhuo-izọese ọbhọ. Ọle da mun ọlẹn fi re bhi ọne otọ nan. Ghọle! avan da ha de, anyan da ha nyan, otọ da mun vẹ a, a da yẹ ha họn urolo kẹkẹ. 6 Ene ẹhi ihinlọn ne ne akala ihinlọn mhọn, da muegbe nin ele rẹ khue ene akala.

7 Ẹhi nin ọhẹnhẹn da khue akala nọnsọle. Ghọle! esia bi eranlẹn nin aranlẹn deba, da rọ nyan ọne otọ nan. A da wa ọne otọ nan diọbhi ijanlẹn ea, obọ ọkpa bhọ da tuẹ a. Sẹyẹ, a da wa eran ne ribhi ọne otọ nan diọbhi obọ ea, obọ ọkpa bhọ da tuẹ a. Ene ebe bi ilunmhun rebhe da tuẹ a sẹsẹsẹ.

8 Ẹhi nọnzi eva da khue akala nọnsọle. Ẹghenin, a da mun emhin nọn diabe udede oke nin eranlẹn da ha to fi fiọbhi ẹkẹ okpẹdẹ. Ọne okpẹdẹ da wa yi ea, obọ ọkpa bhọ da kiẹn aranlẹn. 9 Emhin ne nyẹnlẹn ne ribhi obọ ọkpa bhi ọne okpẹdẹ da yuno. Sẹyẹ, obọ ọkpa bhi okọ* ne ribhi ọne okpẹdẹ da ruẹ.

10 Ẹhi nọnzi ea da khue akala nọnsọle. Ẹghenin, udede ahiẹnhiẹn nọn wo ha bhala bii orukpa da na okhun de re. Ọ da de ọbhi obọ ọkpa bhi ene ẹdẹ, bi eji ene ẹdẹ da jẹre.* 11 Elin ọsi ọne ahiẹnhiẹn hi Oriala.* Obọ ọkpa bhi ọne amẹn da ha riala. Ẹbho ne bunbun ne wọn bhi ọne amẹn da yuno, ranmhude nin ọne amẹn rẹ ha riala.

12 Ẹhi nọnzi enẹn da khue akala nọnsọle. Ẹghenin, emhin da de gbe obọ ọkpa bhi ovuẹn,* bhi obọ ọkpa bhi uki* bi obọ ọkpa bhi ene ahiẹnhiẹn.* Ọne obọ ọkpa bhọ da so ebiuki a. Bhirio, ẹfua bha ha ribhi obọ ọkpa bhi asọn,* bi bhi obọ ọkpa bhi odanmhẹn.*

13 Mẹn da daghe oghohọn* nọn ha tin bhi adesẹ okhun. Ọ da si urulu okhun ha yọle: “Ọkhọbhegbe, ọkhọbhegbe, ọkhọbhegbe hi ọsi ẹbho ne nyẹnlẹn bhi ọne otọ nan, ranmhude emhin nọn ha sunu, sade ẹhi ea ne kẹre khue akala nọnsele!”

9 Ẹhi nọnzi isẹn da khue akala nọnsọle. Mẹn da daghe ahiẹnhiẹn nabhi okhun de fiọbhi ọne otọ nan. A da re isanhan ọsi ọne uhio nọn imhọn ọkpẹnlẹn nanlẹn. 2 Ọle da tuje ọne uhio nọn imhọn ọkpẹnlẹn an. Ighogho da zẹ dagbare bhi ẹkẹ ọle bọsi ighogho nọn zẹ bhi eji eranlẹn da manman to. Ọne ighogho da re ovuẹn so ebiuki a. Ọ da yẹ re okhun bhihi a. 3 Iriso da vẹ dagbare bhi ẹkẹ ọne ighogho. Ele da vae bhi ọne otọ nan. A da re ahu nin ele bọsi ahu nin ene akpin mhọnlẹn. 4 A da taman ele nin ele hẹi riia eran bi iri ne ribhi ọne otọ nan an. Ẹbho ne imhọn iyaman nọnsi Osẹnobulua bhi uke ẹhae, ele ọkpa ele ha kuan.

5 A bha ji ene iriso da gbono ele a. Sokpan, a da re ahu nin ene iriso rẹ re oya nin ele le bhi uki isẹn. Oya nin ele le, da diabe oya nin ọria miẹn bhi egbe, sade akpin sa ọle. 6 Bhi ọne ẹghe nin, ẹbho ki ha guanọ nin ele yu, ọkpakinọn, ele ida miẹn uu. Ele ki ha guanọ uu, ọkpakinọn uu ki ha nẹ nin ele.

7 Inian ene iriso diabe akasi* nan rẹ yo okhọn. Emhin nọn diabe ukparu ojie nan re igolu lu da ha ri ele bhi uke uhọnmhọn. Ẹlo nọnsele da diabe ẹlo ọsi okpea. 8 Eto nọnsele da naa bọsi eto ọsi okhuo, akọn nọnsele da yẹ diabe ọsi oduman. 9 Emhin nin ele rẹ gue udu da diabe ugue nan re ẹlọnmhọn lu. Ele ha gbe igẹn nọnsele, ọ ki ha rolo bọsi awenẹwenẹ ne khian okhọn. 10 Ele da ha mhọn ukpẹrunmhun nọn diabe ukpẹrunmhun nin akpin rẹ sa ọria. Ukpẹrunmhun nọnsele, ọle ahu nan re nin ele ye nin ele rẹ re oya nin ẹbho le, rẹ nabhi uki isẹn. 11 Ele da ha mhọn ojie nọn re ele khian. Ọne ojie hi ẹhi ọsi ọne uhio nọn imhọn ọkpẹnlẹn. Abadọn* hi elin nọnsọle bhi urolo Hibru, a da ha tiọle Apoliọn* bhi urolo Grik.

12 Ọkhọbhegbe nin ọhẹnhẹn gbera. Ghọle! ọ yẹ kẹ ọkhọbhegbe eva ne ha yẹ sunu sade ene emhin nan ki gbera.

13 Ẹhi nọnzi ehan da khue akala nọnsọle. Mẹn da họn ukpurulu bhi ẹwẹ ikhuan ne ribhi ukhuo-izọese nan re igolu lu, ọne ukhuo-izọese nọn ribhi odalo Osẹnobulua. 14 Ọne ukpurulu da taman ọne ẹhi nọnzi ehan nọn khue ọne akala yọle: “Bha fan ene ẹhi enẹn nan mun gba bhi ẹdẹ Yufretis fia.” 15 A da gene fan ene ẹhi enẹn fia, nin ele dọ gbono obọ ọkpa* bhi ẹbho ne ribhi ọne otọ nan an. Ọne uriagogo nan, ọne ukpẹdẹ nan, ọne uki nan, bi ọne ukpe nan, ọle Osẹnobulua mun ele egbe ọbhi otọ khẹ.

16 Mẹn da họn eka ẹbho ne deba ọne usun eyokhọnlẹn ne hẹn akasi. Itue ẹbo iyisẹn eva* nọn. 17 Inian ene ẹbho nin mẹn daghe bhi ọne imianlo bi akasi nin ele ha hẹn dia: Awegbe nin ele rẹ gue udu, da ha mhọn obọ nọn gian, obọ nọn bhala bi obọ nọn mhọn alo nọn blu. Uhọnmhọn ọsi ene akasi da diabe ọsi oduman. Eranlẹn bi ighogho bi sọfọ da yẹ ha si ele bhi unun re. 18 Ọne eranlẹn bi ọne ighogho bi ọne sọfọ nọn ha si ele bhi unun re, da gbono obọ ọkpa* bhi ẹbho ne ha ribhi ọne otọ nan an. 19 Unun ọsi ene akasi bi ukpẹrunmhun nọnsele, ọle ahu nọnsele ye. Ukpẹrunmhun nọnsele da diabe ẹnyẹn. Ọ da ha mhọn uhọnmhọn ọsi ẹnyẹn. Ene Ukpẹrunmhun nan ele rẹ kuan ẹbho.

20 Ọkpakinọn, ene ẹbho nekẹle ne bha miẹn ene oya nan bhi egbe, bha re obọ sibhi emhin ebe nin ele lu re. Ele da sẹyẹ ha ga ẹlinmhin-ebe. Ele da yẹ ha ga ẹbọ nin ele re igolu, isiliva, oze, udo, bi eran rẹ lu—ene ẹbọ ne idaghe, ne ihọn ẹmhọn, ne iyẹ khian. 21 Ele bha re obọ sibhi ugbele re, ele bha re obọ sibhi ilọnmhọn ikpẹbo re, ele bha re obọ sibhi oghẹ* re, ele bha yẹ re obọ sibhi oyi re.

10 Mẹn da daghe ẹhi ọbhebhe nọn wolo na bhi okhun vade, ọle da re adudu amẹn rẹ hin egbe. Ele da nẹga ọle bhi uke uhọnmhọn, ẹlo nọnsọle da diabe ovuẹn, oẹ nọnsọle da diabe ikazi. Ọne oẹ da yẹ diabe emhin nin eranlẹn da to. 2 Ọle da re obhi ebe khere nan taan mhọn bhi obọ. Ọle da re ọe nọn ribhi obera ọbhi uke okpẹdẹ, yẹ re ọe nọn ribhi agobọ bhi uke ọne otọ nan. 3 Ọle da manman reso beji oduman rẹ reso. Ẹghe nin ọle rẹ reso, ene avan ihinlọn da talọ dagbare.

4 Ẹghe nin ene avan ihinlọn rẹ talọ, mẹn da rẹ ha ho nin mẹn gbẹn ẹmhọn nin ele ta ọbhi otọ. Ọkpakinọn, urulu da na bhi okhun taman imẹn yọle: “Hẹi ji ọria soso họn ebi ene avan ihinlọn tale, sẹyẹ, hẹi gbẹn ọlẹn ọbhi otọ.” 5 Ọne ẹhi nin mẹn daghe, nọn re ọe ọkpa bhi okpẹdẹ yẹ re ọnọnkẹle ọbhi otọ, da niẹn obọ obera diọbhi okhun. 6 Ọle da re Ọnọn nyẹnlẹn bhi ẹdẹdẹmhẹndẹ, nọn man otọ bi okhun bi okpẹdẹ bi emhin rebhe ne ribhọ, rẹ ve ihẹn. Ọle da yọle: “Ọ iyẹ da bue gbe. 7 Ọkpakinọn, bhi ọne ẹghe nin ẹhi nọnzi ihinlọn ha rẹ ha họ nọn khue akala nọnsọle, ọta ẹkhokho nọnsi Osẹnobulua ki munsẹ. Ọne ọta ẹkhokho nan hi ọta nọn mhẹn nin ọle taman eguọmhandia nesọle nin ene akhasẹ.”

8 Ọne urulu da gbo na bhi okhun taman imẹn yọle: “Bu ọne ẹhi nọn re oẹ ọkpa bhi uke ẹdẹ, yẹ re oẹ ọnọnkẹle bhi uke otọ, uwẹ ha miẹn ọlẹn ọne ebe nọn ri ọle bhi obọ.” 9 Mẹn da gene bu ọne ẹhi. Mẹn da taman ọlẹn nọn re ọne obhi ebe mẹn. Ọle da taman imẹn yọle: “Miẹn, uwẹ ha le ọle. Ọ dẹ ha mhẹn uwẹ bhi unun bii amẹnlọn, ọkpakinọn, ọ dẹ riia uwẹ ẹkẹ a.” 10 Mẹn da miẹn ọne ẹhi ọne obhi ebe yẹ le ọle. Ọ da wo ha mhẹn mẹn bhi unun bii amẹnlọn, ọkpakinọn, mẹn ki le ọle fo, ọ da riia mẹn ẹkẹ a. 11 Ele da taman imẹn yọle: “Uwẹ dẹ yẹ kha akhasẹ rẹji ebe ha sunu ji ẹbho kẹkẹ, agbaẹbho kẹke, ijie ne bunbun, bi ẹbho ne zẹ urolo kẹkẹ.”

11 A da re ukpokpo nan rẹ mhaan emhin nin mẹn, yẹ taman imẹn yọle: “Kpanọ ha khian dọ mhaan uwa oga nọnsi Osẹnobulua bi ukhuo-izọese nọn ribhọ, bi ẹbho ne ga bhi ọne uwa oga. 2 Ọkpakinọn, hẹi mhaan azagba ọsi ọne uwa oga. Zẹ enin obọ, ranmhude a mun enin nin ene agbaẹbho. Ele dẹ re idia nunu ọne agbaẹbho nọn khiale rẹ na bhi uki eva nyan egbọ eva.* 3 Mẹn dẹ je esali eva nesẹmhẹn, ne muno ikpọn akhiẹ yọ rẹ kha akhasẹ. Ele ki kha akhasẹ rẹ na bhi ikpẹdẹ egbọ ea nyan iyisẹn eva nyan uli.”* 4 Ebi ene esali eva mundia nan hi, ene eran oliv eva, bi ene ebi a mun orukpa ọi eva. Ele mundia bhi odalo Ebeanlẹn ọsi ọne agbọn rebhe.

5 Ahamiẹn, eghian ele ho ne kuan ele, eranlẹn ki na bhi unun nọnsele dagbare yẹ tuẹ ele a. Iriọ ọria nọn hi ki rẹ khin nọn ho nọn kuan ele ha rẹ yu. 6 Ele mhọn ahu nin ele rẹ khue okhun, beji a da miẹn amẹn bha rọ bhi ene ikpẹdẹ nin ele ha rẹ ha kha akhasẹ. Ele yẹ mhọn ahu nin ele rẹ re amẹn kiẹn aranlẹn, yẹ mun oya kẹkẹ gbe ọne otọ nan, beji ọ rẹ ghọn ele.

7 Ele ha ki kha akhasẹ fo, ọne elanmhẹn ẹwẹ nọn dagbare bhi ẹkẹ ọne uhio nọn imhọn ọkpẹnlẹn ki ne ele khọn. Ọ ki khọn ele miotọ yẹ gbono ele a. 8 Ekuegbe nọnsele ki ha ribhi ughe bhi ọne agbaẹbho nọn khua nan rẹ khọkhọ Sodọm bi Ijipt, bhi eji a da yẹ khan Ebeanlẹn nọnsele ọbhi oran. 9 Ekuegbe nọnsele ki ha ribhi otọ bhi ikpẹdẹ ea bi ukhiọmhẹn. Ẹbho ne na bhi agbaẹbho kẹkẹ bi ulin-uwa kẹkẹ vae, ne yẹ zẹ urolo kẹkẹ ki ha ghe ene ekuegbe bhi enin. Ele ida ji a da re ele tọ. 10 Ẹbho ne ribhi ọne otọ nan da wo ha ghọnghọn, ranmhude, ene esali eva yu. Ele da ha dujie yẹ re emhin lu ẹsele nin egbe, ranmhude, uhọnmhunje ọsi ene akhasẹ eva rẹ wo ha tọn ele bhi egbe.

11 Ikpẹdẹ ea bi ukhiọmhẹn ki gbera, Osẹnobulua da kie re iẹnlẹn nin ene akhasẹ. Ele da kpanọ mundia. Ofẹn da wo ha mun ọrebhe ne daghe ele. 12 Ukpuru da na bhi okhun taman ele yọle: “Bha vae bhi enan.” Ele da nabhi adudu amẹn ha khian okhun. Eghian ele da ha ghe ele beji ele rẹ khian. 13 Bhi ọne ẹghe nin, otọ da mun vẹ a, obọ ọkpa bhi igbe bhi ọne agbaẹbho da dunmhun sotọ. Itue uli ihinlọn* da yu bhi ẹghe nin otọ rẹ mun vẹ a. Ofẹn da wo ha mun ẹbho ne miuhọnmhọn. Ele da ha re uyi ji Osẹnobulua nọn ribhi okhun.

14 Ọkhọbhegbe nọnzi eva sunu fo. Ghọle! Ọkhọbhegbe nọnzi ea dẹ kẹ sunu.

15 Ẹhi nọnzi ihinlọn da khue akala nọnsọle. Mẹn da họn urulu ne ha rolo bhi okhun. Ele da ha yọle: “Ejele ọsi ọne agbọn nan kiẹn Ejele ọsi Ebeanlẹn mhan, bi ọsi Kristi nọnsọle, ọle dẹ gbẹloghe rẹ sẹbhi ighegheghe.”

16 Ene ewanlẹn enẹn nyan uje ne dotua bhi ojukhuo nọnsele bhi odalo Osẹnobulua, da debhẹre ha ga Osẹnobulua. 17 Ele da ha yọle: “Osẹnobulua nin Jehova,* uwẹ hi ọnọn mhọn ahu nẹ, uwẹ ọnọn ka ribhọ khẹ, uwẹ hi ọnọn yẹ ribhọ nian. Mhan khuẹnmhẹn uwẹ, ranmhude, uwẹ munhẹn ha noo ahu nọn khua nọnsẹ rẹ gbẹloghe. 18 Ọkpakinọn, ẹkẹ da ha khọ ene agbaẹbho. Uwẹ da yẹ re ohu nọnsẹ man. Ọne ẹghe da yẹ sẹ nin uwẹ rẹ bhuohiẹn ene yu, yẹ re ihaosa nin ene akhasẹ nin eguọmhandia nesẹ, ene khiale, bi ene mun ofẹn elin nọnsẹ, ọ rẹ yi obhokhan la ọwanlẹn. Ọne ẹghe da yẹ sẹ, nin uwẹ rẹ fuẹn eria ne riia ọne otọ nan an.”

19 Uwa oga nọnsi Osẹnobulua bhi okhun da tuje a. A da daghe ẹkpẹti akovẹn bhi ẹkẹ ọle. Anyan da ha nyan, avan da ha de, otọ da ha mun vẹ a, udede esia da ha de, a da yẹ ha họn ukpuru kẹkẹ.

12 Mẹn da daghe arẹman nọn khua bhi okhun. Mẹn da daghe okhuo ọkpa nọn re ovuẹn hin egbe. Uki da ha ribhi odotọ oẹ nọnsọle. Ukparu ojie nin ahiẹnhiẹn igbeva ye da ha ri ọle bhi uhọnmhọn. 2 Ọne okhuo da ha hanmhan. Ọle da wo ha so, ranmhude, ẹghe sẹ ọle nin ọle ha rẹ biẹ.

3 Ghọle! mẹn da daghe arẹman ọbhebhe bhi okhun. Mẹn da daghe udede ẹnyẹn nọn mhọn uhọnmhọn ihinlọn, bi ikhuan igbe. Ukparu ojie ihinlọn da ha ribhi uhọnmhọn nesọle. 4 Ọne ẹnyẹn da re ukpẹrunmhun nọnsọle rẹ koko obọ ọkpa* bhi ahiẹnhiẹn ne ribhi okhun vae bhi ọne otọ nan. Ọle da mundia bhi odalo ọne okhuo nọn hanmhan, ha khẹ nin ọne okhuo biẹ, beji ọle ha da gbe ọne ọmọn le sade a biẹ ọle.

5 Ọne okhuo da bie ọmokpea. Ọne ọmọn hi ọnọn ha re ukpokpo ọsi ẹlọnmhọn rẹ sun ene agbaẹbho. A da mun ọne ọmọn kpanọ bu Osẹnobulua bhi ojukhuo nọnsọle. 6 Ọne okhuo da nẹgbe diọbhi ẹkẹ ojẹgbo, bhi eji Osẹnobulua mhanmhan khẹ ọle. Bhi enin, a da re ebale nanlẹn le bhi ikpẹdẹ egbọ ea nyan iyisẹn eva nyan uli.*

7 Okhọn da de bhi okhun: Maikẹ* bi ẹhi nesọle da ne ọne ẹnyẹn nọn khua khọnlẹn. Ọne ẹnyẹn bi ẹhi nesọle da ne ele gbegbe. 8 Ọkpakinọn, Maikẹ da khọn ele miotọ.* A bha yẹ ji ele da debhi okhun an. 9 A da ki sua ọne ẹnyẹn nọn khua vae bhi ọne otọ nan. Ọle hi ọne ẹnyẹn nin ọhẹnhẹn, natiọle Esu, nan yẹ tiọle Ojuu. Ọle hi ọnọn hiẹ ẹbho ne ribhi ọne otọ agbọn nan rebhe. A da sua ọle vae bhi ọne otọ nan, yẹ sua ẹhi nesọle rẹkhan ọlẹn. 10 Mẹn da họn ukpuru reso bhi okhun yọle:

“Ghọle, Osẹnobulua miẹn ẹbho fan. Ọle re ahu nọnsọle man, yẹ mun Ejele nọnsọle gbọ. Kristi nin ọle zẹle yẹ munhẹn ha noo ahu nọnsọle, ranmhude, a sua ọne ọria nọn riia ibhio mhan elin an fia. Ọle hi onọn riia ele elin an bhi odalo Osẹnobulua asọn bi odanmhẹn. 11 Ele da re aranlẹn ọsi ọne ohuan, bi ọta nọnsi Osẹnobulua nin ele ha wewe rẹ khọn ọlẹn miotọ. Iẹnlẹn nọnsele bhọ bha dan ele. Ele da muegbe nin ele rẹ yu. 12 Ranmhude ọnan, bha ha ghọnghọn, ibha ne ribhi okhun! Ọkhọbhegbe hi ọsi ọne otọ nan, bi ọne okpẹdẹ, ranmhude, Ojuu bu bha re. Ẹkẹ manman khọ ọle, ranmhude, ọle lẹnmhin ghe, obhi ẹghe khere, ọle ki kẹ ọle re.”

13 Ọne ẹnyẹn nọn khua ki kere ghe, a sua ọle vae bhi ọne otọ nan, ọle da munhẹn ha kpokpo ọne okhuo nọn biẹ ọne ọmokpea. 14 Ọkpakinọn, a da ne igẹn eva ọsi udede oghohọn* nin ọne okhuo, beji ọle ha da re ọle tin ha khian eji ọle dia bhi ẹkẹ ojẹgbo. Bhi enin, a da re ebale nanlẹn le bhi uriẹghe ea bi ukhiọnmhẹn.* Ọne ẹnyẹn ida sabọ daghe ọle bhi enin.

15 Ọne ẹnyẹn da kpa amẹn kua bhi unun. Ọne amẹn da bunbun bii amẹn nọn ribhi ẹdẹ. Ọle da ho nin ọle re ọne amẹn gbe ọne okhuo ruẹ. 16 Ọkpakinọn, otọ da hinmhin ọne okhuo. Otọ da tuje unun an yẹ wọn ọne amẹn nin ọne ẹnyẹn nọn khua kpa kua bhi unun. 17 Bhiriọ, ẹkẹ ọne okhuo da wo ha khọ ọne ẹnyẹn nọn khua. Ọle da dọ ha ne imọn nekẹle ọsi ọne okhuo khọnlẹn. Ene imọn nan hi ene re obọ rẹkhan uhi nesi Osẹnobulua, ele hi ene yẹ sọsali nin Jesu.

13 Ọne ẹnyẹn nọn khua da mundia bhi uke ekẹn nọn ribhi egbegbe okpẹdẹ.

Mẹn da daghe elanmhẹn ẹwẹ na bhi ẹkẹ okpẹdẹ dagbare. Ọne elanmhẹn da ha mhọn uhọnmhọn ihinlọn bi ikhuan igbe. Ukparu ojie da ha ribhi ene ikhuan kẹkẹ. Elin kẹkẹ nan rẹ re unun ji Osẹnobulua da ha ri ọle bhi uke uhọnmhọn. 2 Ọne elanmhẹn nin mẹn daghe da diabe elanmhẹn natiọle eberia,* ọe nesọle da diabe ọsi elanmhẹn natiọle biẹ, unun nọnsọle da diabe unun ọsi oduman. Ọne ẹnyẹn nọn khua, ọle re ahu bi ojukhuo bi ihe nọn khua nin ọne elanmhẹn ẹwẹ.

3 Mẹn da daghe ọle ghe, ọ diabe a manman kuan ọlẹn bhi ọkpa bhi ene uhọnmhọn. Ọkpakinọn, eji a da kuan ọlẹn da fu ọle re. Ẹbho rebhe ne ribhi ọne agbọn nan da rẹkhan ọne elanmhẹn ẹwẹ, ele da ha gẹn ọlẹn. 4 Ele da ha ga ọne ẹnyẹn nọn khua, ranmhude, ọle re ahu nin ọne elanmhẹn ẹwẹ. Ele da yẹ ha ga ọne elanmhẹn ẹwẹ, ele da ha yọle: “Họ bhọ sẹ bii ọne elanmhẹn ẹwẹ? Họ bhọ la sabọ nanlẹn khọnlẹn?” 5 A da re unun nanlẹn rẹ ha dẹgbọ, yẹ rẹ ha re unun ji Osẹnobulua. A da yẹ re otọ nanlẹn nin ọle rẹ re uki eva nyan egbọ eva* rẹ lu ebe ghọn ọlẹn. 6 Ọle da taan unun nọnsọle a rẹ ha re unun ji Osẹnobulua. Ọle da ha re unun ji elin nọnsọle, bi eji ọle dia. Ọle da yẹ ha re unun ji ene ribhi okhun. 7 A da re otọ nanlẹn rẹ mun okhọn bu ene khiale, yẹ khọn ele miotọ. A da yẹ re ahu nanlẹn rẹ le ọba nyan ẹbho rebhe, ulin-uwa rebhe, agbaẹbho rebhe bi ene zẹ urolo kẹkẹ. 8 Ẹbho rebhe ne nyẹnlẹn bhi ọne otọ nan dẹ ha ga ọle. Rẹ na bhi ẹghe umunhẹn ọsi ọne agbọn nan, a bha sẹ ka miẹn ẹghe nan rẹ gbẹn elin ọsi ene ẹbho nan ọbhi ebe ọsi iẹnlẹn ọsi ọne Ohuan nan gbe a.

9 Ji ọria nọn mhọn ehọ kaehọ. 10 Ahamiẹn ọria ribhọ nan ha mun khue, a dẹ mun ọlẹn khue. Ahamiẹn ọria re agbada gbe ọria a,* a ki yẹ re agbada gbe ọle a. Enan ọ da khẹke nin ene khiale mhọn iziẹngbe yẹ re urẹọbhọ man.

11 Mẹn da daghe elanmhẹn ẹwẹ ọbhebhe. Ọ da ha dagbare bhi ẹkẹ otọ. Ọ da ha mhọn ikhuan eva ne diabe ọsi ohuan. Ọkpakinọn, ọ da ha talọ bii ọne ẹnyẹn nọn khua. 12 Ahu nin elanmhẹn ẹwẹ nin ọhẹnhẹn ha mhọnlẹn ọle sẹ yẹ ha mhọnlẹn. Ọle da ha re ọne ahu nan man bhi odalo elanmhẹn ẹwẹ nin ọhẹnhẹn. Ọle da lu ọle nin ọrebhe bhi ọne otọ nan ha ga elanmhẹn ẹwẹ nin ọhẹnhẹn, nin itẹ nọnsọle rie. 13 Ọle da wo ha lu emhin ọnyunun an. Bhi isira ẹbho, ọle da ha lu ọle nin eranlẹn na okhun ha vae bhi ọne otọ nan.

14 Ranmhude, a re otọ nanlẹn rẹ ha lu emhin ọhan-ilo bhi isira ọne elanmhẹn ẹwẹ, ọle da wo ha hiẹ ẹbho ne ribhi ọne otọ nan. Ọle da ha taman ẹbho ne nyẹnlẹn bhi ọne otọ nan, nin ele man amanzẹ nin ọne elanmhẹn ẹwẹ nan re agbada hian, ọkpakinọn, eji a da hianlẹn ki rie nian. 15 A da re otọ nanlẹn rẹ re ohiẹnhiẹn* nin amanzẹ ọsi ọne elanmhẹn ẹwẹ, beji ọne amanzẹ ha da sabọ ha talọ, yẹ gbono ẹbho ne bha ka ga ọle a.

16 Ọle da gbuhi yọle nan re iyaman ọbhi obera ọsi ẹbho la uke ẹhae nọnsele—ọ ha rẹ ha yi obhokhan la ọwanlẹn, ọ ha rẹ ha yi ene fele la ene bha fe, ọ ha rẹ ha yi igbọn la ene iyi igbọn. 17 Ọle da yẹ yọle ghe, ọria nọn bha re iyaman ọsi ọne elanmhẹn ẹwẹ, la elin ọlẹn, la nọmba ọsi elin ọlẹn, ọ ida sabọ khiẹn emhin, la dẹ emhin. 18 Bha ji ọria nọn mhọn ilẹn-otọ-emhin lolo nọmba ọsi ọne elanmhẹn ẹwẹ. Nọmba nin eria noo nọn. Ehan nyan egbọ ea nyan iyisẹn ehan* hi ọne nọmba. Ọria nọn mhọn ẹwanlẹn ọkpa ha sabọ lẹn otọ ebi ọnan mundia nan.

14 Ghọle! Mẹn da daghe ọne ohuan. Ọle da mundia bhi uke oke ọsi Zaiyọn. Itue uli bhi ijanlẹn enẹn nyan egbọ eva nyan iyisẹn* da ha ribhi eji ọle ye. A da gbẹn elin nọnsọle bi ọsi Aba ọle bhi uke ẹhae nọnsele. 2 Mẹn da họn usomhin bhi okhun nọn diabe amẹn nọn siẹn, bi avan nọn manman ha de. Ọne usomhin da yẹ diabe ọsi ẹbho ne ha so illo, ne ne afan* mhọnlẹn rẹ ha khue emhin. 3 Ele da ha so illo, ọne illo da diabe illo ọsọgbọn. Ele da ha so ọle bhi odalo ọne ojukhuo, ene emhin enẹn ne nyẹnlẹn, bi bhi odalo ene ewanlẹn. Gbera ene itue uli enẹn nyan egbọ eva nyan iyisẹn* nan dẹ bhi ọne otọ nan, ọria ọbhebhe iribhọ nọn sabọ so ọne illo. 4 Ene eria nan bha riia egbe a, bhi ọsi ẹmhọanta, ele bha sẹ ne ikhuo nowẹ. Ele wo ha rẹkhan ọne ohuan diọbhi eji ọ hi ki rẹ diọ. Ọne agbọn nan a da dẹ ele bọsi emekọnọn ọhẹnhẹn nan rẹ zọese nin Osẹnobulua bi ọne Ohuan. 5 Ele ibha ohoghe, bhi ọsi ẹmhọanta, ele wo kpekhia sẹsẹsẹ.

6 Mẹn da daghe ẹhi ọbhebhe nọn tin bhi ideghedeghe. Ọle da ha mhọn uhọnmhunje ọsi ighegheghe nin ọle ha wewe man ẹbho ne nyẹnlẹn bhi ọne otọ nan, bhi agbaẹbho nọn hi ki rẹ khin, ulin-uwa nọn hi ki rẹ khin, bi urolo nọn hi ki rẹ khin. 7 Ọle da si urulu okhun ha yọle: “Bha mun ofẹn Osẹnobulua, bha ha yẹ re uyi nanlẹn, ranmhude, ọne ẹghe nin ọle ha rẹ bhuohiẹn ọne agbọn nan sẹle. Bhiriọ, bha ga Ọnọn man okhun, ọne otọ nan, ọne okpẹdẹ, bi eje kẹkẹ nin ẹdẹ da jẹ re.”

8 Ẹhi ọbhebhe da rẹkhan ọne ọhẹnhẹn, ọle da ha yọle: “Ọ dele! Babilọn Nọn Khua dele. Ọle hi ọnọn re ene agbaẹbho rebhe da bhi anyọn nọnsọle, nọn re ele ha gboghẹ!”*

9 Ẹhi ọbhebhe, ọne ọzea, da rẹkhan ele. Ọle da si urulu okhun ha yọle: “Ọria soso ha ga ọne elanmhẹn ẹwẹ, bi amanzẹ nọnsọle, la ọle ka nan re iyaman ọle bhi uke ẹhae la bhi obọ, 10 ọle ki yẹ wọn bhi anyọn nọnsi Osẹnobulua. Ọne anyọn nin hi ohu nọnsi Osẹnobulua, nin ọle sa ọbhi ukpu ọsi ohu nọnsọle. A bha re emhin soso gua ọne anyọn. Sẹyẹ, ọle ki re eranlẹn bi sọfọ rẹ re oya nin ọne ọria le, bhi isira ene ẹhi ne khiale, bi bhi isira ọne Ohuan. 11 Ighogho nọn da ha sibhi ọne eranlẹn re nan rẹ re oya nin ele le, ki ha hẹ diọbhi okhun rẹ sẹbhi ighegheghe. Sẹyẹ, asọn bi odanmhẹn, egbe ida fu ele re, ranmhude, ele ene ga ọne elanmhẹn ẹwẹ bi amanzẹ nọnsọle, yẹ ka nan re iyaman ọsi elin nọnsọle bhi egbe nọnsele. 12 Bhi ọne ẹghe nan, ọ dẹ khẹke nin ene khiale mhọn iziẹngbe. Ene khiale nan hi ene re obọ rẹkhan uhi nọnsi Osẹnobulua, yẹ mun urẹọbhọ nin ele mhọn da Jesu mhọn nọnsẹn.”

13 Mẹn da họn ukpurulu bhi okhun nọn yọle, “Gbẹn ọne ẹmhọn nan bhi otọ: Eghọnghọn hi ọsi edibo ọsi Ebeanlẹn mhan ne yulu rẹ na bhi ọne ẹghe nan rẹ ha khian. Ehe, iriọ ọne ẹlinmhin tale. Ji ele koahua bhi ẹsọn nin ele ha miẹn, ranmhude, a bha ye emhin esili nin ele lu a.”

14 Mẹn da ki daghe adudu amẹn nọn fua. Ọria nọn dotua bhi uke ọle da diabe ọmọn nọnsi okpea. ọle da mun ukparu ojie nan re igolu lu ọle bhi uhọnmhọn, yẹ re ọghale nan rẹ hian izẹ mhọn bhi obọ.

15 Ẹhi ọbhebhe da dagbare bhi ẹkẹ uwa oga. Ọle da si urulu okhun ha ne ọnọn dotua bhi uke adudu amẹn talọ. Ọle da taman ọlẹn yọle: “Re ọghale nọnsẹ, uwẹ ha munhẹn ha khuan emhin ugbo, ranmhude, emekọnọn ne ribhi ọne agbọn nan bholo. Ẹghe sẹ nan rẹ rọ ọle.” 16 Ọnọn dotua bhi uke ọne adudu amẹn da re ọghale nọnsọle nabhi ọne otọ nan, yẹ rọ emekọnọn ne ribhi ọne otọ nan.

17 Ẹhi ọbhebhe da yẹ na ẹkẹ uwa oga nọn ribhi okhun dagbare. Ọle da yẹ re ọghale nọn manman mun mhọn bhi obọ.

18 Ẹhi ọbhebhe da nabhi ukhuo-izọese dagbare. Ọle da ha mhọn ahu nin ọle rẹ noo eranlẹn. Ọle da si urulu okhun rẹ ha ne ẹhi nọn re ọghale nọn mun mhọnlẹn ha talọ. Ọle da yọle: “Re ọghale nọnsẹ nọn mun, uwẹ ha dọ re ọle rọ ikperan anyọn ne ribhi ọne otọ nan, ranmhude, ene ikpẹ bholo.” 19 Ọne ẹhi da re ọghale nọnsọle, yẹ re ọle rọ ene ikperan anyọn ne ribhi ọne otọ nan. Ọle ki rọ ọle fo, ọle da biri ọle bhi udede okọ nan rẹ lu anyọn, nọn mundia nin ohu nọnsi Osẹnobulua. 20 A da re akasi rẹ nunu ene ikperan anyọn bhi ọne okọ nan rẹ lu anyọn, nọn ribhi ikeke ogbe ọsi ọne agbaẹbho. Aranlẹn nọn dagbare bhi ọne ikperan anyọn da vuọn sẹbhi egbe unun ọsi ene akasi.* Eji ọne aranlẹn na ologho sẹ da ree sẹbhi imaili enẹn nyan egbọ isinlin.*

15 Mẹn da daghe arẹman ọbhebhe bhi okhun. Ọne arẹman da wo ha yi okpemhin bi emhin ọhan-ilo. Ẹhi ihinlọn da muno ọkhọbhegbe ihinlọn mhọnlẹn. Ene ọkhọbhegbe nan hi ọkhọbhegbe nọn kike, ranmhude, ele Osẹnobulua ha noo kike rẹ re ohu nọnsọle man.

2 Mẹn da daghe okpẹdẹ nọn diabe ughegbe. Eranlẹn da ha ribhọ. Ẹbho ne sabọ khọn ọne elanmhẹn ẹwẹ, amanzẹ nọnsọle, bi nọmba ọsi elin nọnsọle miotọ, da mundia sikẹ ọne okpẹdẹ ọsi ughegbe. Ele da muno afan* ọsi Osẹnobulua mhọnlẹn. 3 Ele da ha so illo ọsi ọne Ohuan, bi illo ọsi Mozis nin ọguọmhandia nọnsi Osẹnobulua. Ele da ha yọle:

“Osẹnobulua nin Jehova,* uwẹ hi Osẹ nọn mhọn ahu nẹ. Emhin ọhan-ilo bi emhin ọnyunun an iwẹnna obọ nesẹ khin. Ẹmhọanta bi ikhiale uwẹ rẹ lu emhin, uwẹ hi Ojie ọsi itẹbitẹ. 4 Jehova,* ọria soso iribhọ nọn ida mun ofẹn uwẹ, yẹ gẹn elin nọnsẹ, ranmhude, uwẹ ọkpa hi ọnọn mhọn asun-rẹkhan. Ene agbaẹbho rebhe dẹ bu uwẹ re dọ ha ga ẹ, ranmhude, uwẹ re uhi nọn gbale nọnsẹ man ele.”

5 Ene emhin nan ki sunu fo, mẹn da daghe a tuje eje khia nẹ a bhi uwa oga* nọn ribhi okhun. 6 Ene ẹhi ihinlọn ne muno ọkhọbhegbe ihinlọn mhọn, da dagbare bhi eje khia nẹ bhi ọne uwa oga. Ele da mun ukpọn linẹn nọn mhọn-ose a nọn manman ha fua yọ, yẹ re emhin nan re igolu lu rẹ gbanọ udu nọnsele. 7 Ọkpa bhi ene emhin enẹn ne nyẹnlẹn, da muno ukpamanku ihinlọn nan re igolu lu nin ene ẹhi ihinlọn. Ohu nọnsi Osẹnobulua nọn nyẹnlẹn bhi ẹdẹdẹmhẹndẹ ọle ribhi ẹkẹ ọle. 8 Ighogho da vuọn ọne uwa oga, ranmhude uyi nọnsi Osẹnobulua bi ahu nọnsọle nọn vuọn ọlẹn. Ọria soso bha sabọ nabhi ẹkẹ ọle. Ene ẹhi ihinlọn ne muno ọkhọbhegbe ihinlọn mhọn, dẹ lu iwẹnna nọnsele fo, ọkuẹsẹ ọria sabọ nabhọ.

16 Mẹn da họn ukpurulu nọn na bhi ẹkẹ ọne uwa oga so dagbare. Ọ da taman ene ẹhi ihinlọn yọle: “Bha ha khian, bha dọ biri ohu nọnsi Osẹnobulua, ne ribhi ene ukpamanku ihinlọn nyan ọne otọ nan.”

2 Ẹhi nin ọhẹnhẹn da kpanọ dọ biri ọkhọbhegbe nọn ribhi ukpamanku nọnsọle nyan ọne otọ nan. Bhiriọ, itẹ da vẹ kua bhi egbe ọsi ene ẹbho ne mhọn iyaman ọsi ọne elanmhẹn ẹwẹ, ne yẹ ha ga amanzẹ nọnsọle.

3 Ẹhi nọnzi eva da dọ biri ọkhọbhegbe nọn ribhi ukpamanku nọnsọle ọbhi okpẹdẹ. Ọne okpẹdẹ da kiẹn aranlẹn bii aranlẹn ọsi ọria nan gbe a. Bhiriọ, emhin ne nyẹnlẹn rebhe ne ribhi ọne okpẹdẹ da yuno.

4 Ẹhi nọnzi ea da biri ọkhọbhegbe nọn ribhi ukpamanku nọnsọle ọbhi ẹkẹ ẹdẹ, bi ije kẹkẹ nin ẹdẹ da jẹre. Amẹn nọn ribhi enin da kiẹn aranlẹn. 5 Ọne ẹhi nan mun ene ẹdẹ ọle bhi obọ da yọle: “Osẹnobulua nọn mhọn asun-rẹkhan uwẹ khin, uwẹ hi Ọnọn ka ribhọ khẹ, bi Ọnọn ribhọ nian. Ene ohiẹn nan nin uwẹ bhulu rẹman ghe, uwẹ wo khia. 6 Ele hi ene giẹn aranlẹn ọsi ene akhasẹ bi ene khiale kua. Ọnan zẹle nin uwẹ da yẹ re aranlẹn nin ele wọn. Ọnin mhẹn ele bhi egbe.” 7 Mẹn da họn ukpurulu na bhi ọne ojukhuo yọle: “Osẹnobulua nin Jehova,* gene-gene uwẹ hi ọnọn mhọn ahu nẹ. Uwedẹ nọn gbale bi uwedẹ ẹmhọanta uwẹ rẹ bhuohiẹn.”

8 Ẹhi nọnzi enẹn da biri ọkhọbhegbe nọn ribhi ukpamanku nọnsọle ọbhi ovuẹn. Bhiriọ, a da re ahu nin ọne ovuẹn rẹ ha ghan bii eranlẹn. Ọ da ha wawa ẹbho egbe a. 9 Ọne ovuẹn nọn manman ha ghan, da wawa ene ẹbho egbe a. Ọrẹyiriọ, ele da ha re unun ji Osẹnobulua, nọn ha noo ene ọkhọbhegbe nan rẹ re oya nin ele. Ele bha fidenọ yẹ re uyi ji ọle.

10 Ẹhi nọnzi isẹn da biri ọkhọbhegbe nọn ribhi ukpamanku nọnsọle ọbhi uke ojukhuo ọsi ọne elanmhẹn ẹwẹ. Bhiriọ, ejele ọsi ọne elanmhẹn ẹwẹ da so ebiuki a. Ene ẹbho da munhẹn ha re akọn gbe akọn, ranmhude ọbalọ nin ele ye. 11 Ele da ha re unun ji Osẹnobulua nọn ribhi okhun, ranmhude ọbalọ nin ele ye bi itẹ nọn vuọn ele egbe. Ele bha ka re obọ sibhi emhin ebe re.

12 Ẹhi nọnzi ehan da biri ọkhọbhegbe nọn ribhi ukpamanku nọnsọle ọbhi ẹdẹ Yufretis. Ọne ẹdẹ da ka, beji a ha da miẹn ghe, ene ijie ne na bhi obọ ọsi isti* vade ki miẹn eji ele ha na.

13 Mẹn da daghe ikpọta ea ne bha khia* ne diabe akilẹ. Unun ọsi ọne udede ẹnyẹn, unun ọsi ọne elanmhẹn ẹwẹ, bi unun ọsi ọne akhasẹ ohoghe ele na dagbare. 14 Obọ ẹlinmhin-ebe ene ọta nan na vae, ene ọta da ha lu emhin ọhan-ilo. Ele da dọ koko ijie ne ribhi ọne otọ agbọn nan rebhe khẹ okhọnlẹn nan ha khọn bhi ukpẹdẹ nọn khua ọsi Osẹnobulua nin Osẹ nọn mhọn Ahu nẹ.

15 “Ghọle! mẹn vade bọsi oyi. Eghọnghọn hi ọsi ọne ọria nọn wo ha babegbe, nọn yẹ re ukpọn nọnsọle ya nọnsẹn, nan hẹi miẹn ọle le. Ranmhude a ha miẹn ọle le, ọle ki re eban-eban ha khian, ẹbho ki ha ghe ọle, sẹyẹ, ẹkhọle ki ha lo ọle.”

16 Ene ọta ne bha khia, da koko ene ijie vae bhi eji a tiọle Amagẹdọn* bhi urolo Hibru.

17 Ẹhi nin ọzihinlọn da biri ọkhọbhegbe nọn ribhi ukpamanku nọnsọle ọbhi ahoho. Mẹn da ki họn ukpurulu bhi uke ọne ojukhuo nọn ribhi uwa oga. Ọ da yọle: “Ọ sha fo!” 18 Bhi ọne ẹghe nan, anyan da ha nyan,* avan da ha de. Sẹyẹ, mẹn da họn urulu kẹkẹ. Otọ da manman mun vẹ a. Otọ bha sẹ ka re inian munvẹa khẹ rẹ na bhi ẹghe nin eria rẹ munhẹn ha nyẹnlẹn bhi ọne otọ nan, a bha sẹ ka miẹn egbe ọnan khẹ. 19 Ọne agbaẹbho nọn khua da wa yi ea, ene agbaẹbho kẹkẹ da dunmhun an. Osẹnobulua da ye ẹmhọn Babilọn Nọn Khua re. Ọle da muegbe nin ọle rẹ mun ukpu ọsi ohu nọnsọle nanlẹn wọn. 20 Rẹ deba ọnin, a bha yẹ miẹn ene agbaẹbho nin ẹdẹ nẹga, a bha yẹ miẹn ene oke. 21 Udede esia ne khua sẹbhi talẹnt ọkpa,* da nabhi okhun denọ nyan ene ẹbho. Ene ẹbho da ha re unun ji Osẹnobulua, ranmhude ọbalọ nin ọne esia si ji ele. Ọne ọbalọ khọ gbe.

17 Ọkpa bhi ene ẹhi ihinlọn ne muno ene ukpamanku ihinlọn mhọn, da bu mẹn re yẹ taman imẹn yọle: “Vae, nin mẹn dọ rẹman ẹn oya nan ha re nin ọne agbilẹ nọn khua, nọn dotua bhi uke amẹn ne bunbun. 2 Ọle ene ijie ne ribhi ọne otọ nan deba ha gboghẹ.* Sẹyẹ, ẹbho ne nyẹnlẹn bhi ọne otọ nan da yẹ ji anyọn ọsi oghẹ* nọnsọle ha mun ele.”

3 Ọle da re ahu ọsi ẹlinmhin nọn khiale re mẹn ha khian ẹkẹ ojẹgbo. Bhi enin, mẹn da daghe okhuo ọkpa nọn dotua bhi uke elanmhẹn ẹwẹ nọn gian. Ọne elanmhẹn ẹwẹ da ha mhọn uhọnmhọn ihinlọn bi ikhuanlẹn igbe. Elin nan rẹ re unun ji Osẹnobulua da vuọn ọle egbe. 4 Ukpọn nọn mhọn alo ipọpo* bi ukpọn nọn gian, ọle ọne okhuo muno yọ. Ọle da re igolu, udo ne ghanlẹn, bi ileghe rẹ te egbe. Ọle da mun ukpu nan re igolu lu mhọn bhi obọ. Emhin ne sọnnọn bi ilọnmhọn oghẹ* nesọle, ele ribhi ẹkẹ ọne ukpu. 5 A da gben elin nin ẹbho bha lẹn otọ ọle bhi ukẹhae nọnsọle. Ọne elin hi “Babilọn Nọn Khua, inẹn ene agbilẹ, bi emhin ne sọnnọn ne ribhi ọne otọ nan.” 6 Mẹn da daghe ọle ghe, ọne okhuo da aranlẹn ọsi ene khiale bi aranlẹn ọsi esali nesi Jesu, ọ wo manman da ọle gbe egbe.

Ẹghe nin mẹn rẹ daghe ọne okhuo, ilo da wo han mẹn. 7 Ọne ẹhi da taman imẹn yọle: “Hẹi ji ọ han uwẹ ilo. Mẹn dẹ taman uwẹ emhin nin ẹbho bha lẹn otọle rẹji ọne okhuo nan, bi elanmhẹn ẹwẹ nọn mun ọlẹn, nọn mhọn uhọnmhọn ihinlọn bi ikhuanlẹn igbe: 8 Ọne elanmhẹn ẹwẹ nin uwẹ daghe ka rẹ ha ribhọ, akizẹbue ọ bha yẹ ha ribhọ. Sokpan, ọ dẹ kẹ na ọne uhio nọn imhọn ọkpẹnlẹn dagbare. Ẹghenin a ki fuẹn ọlẹn an. Ẹbho ne nyẹnlẹn bhi ọne otọ nan—nan bha gbẹn elin nọnsele ọbhi ebe ọsi iẹnlẹn rẹ na bhi ẹghe umunhẹn ọsi ọne agbọn nan ha vade—dẹ daghe ebi ọne elanmhẹn ẹwẹ ka rẹ ha ribhọ yẹ, ebi ọ bha yẹ rẹ ha ribhọ yẹ, bi ebi ọ ha kie rẹ zegbere yẹ. Ọnan ki re ilo han ele.

9 “Ọria nọn mhọn ẹwanlẹn ọkpa ha sabọ lẹn ebi ene emhin nan mundia nan: Ene uhọnmhọn ihinlọn, mundia nin oke ihinlọn nin ọne okhuo da dotua. 10 Ijie ihinlọn, ele ribhọ: Isẹn siegbe kie, ọkpa ribhọ nian, ọnọnkẹle bha sẹ vae. Ọle ha vae, ọle dẹ ha ribhọ bhi obhi ẹghe khere. 11 Ọne elanmhẹn ẹwẹ nọn ka rẹ ha ribhọ khẹ, nọn iyẹ ribhọ, ojie nọnzi elẹnlẹn nọn. Ẹwẹ ene ijie ihinlọn ọle na vae. A dẹ fuẹn ọlẹn an.

12 “Ene ikhuan igbe nin uwẹ daghe, mundia nin ijie igbe nan bha sẹ mun ejele nan. Ọkpakinọn, a da re ahu nin ele, nin ele rẹ deba ọne elanmhẹn ẹwẹ gbẹloghe bọsi ojie bhi uriagogo ọkpa. 13 Emhin ọkpa ene ijie nan mhọn bhi ọkhọle. Ranmhude ọnan, ele da mun ahu nọnsele, bi ugbẹloghe nọnsele bhi obọ ọsi ọne elanmhẹn ẹwẹ. 14 Ele dẹ ne ọne Ohuan khọnlẹn. Ọkpakinọn, ranmhude ọne ohuan hi Ojie nọn nẹ ojie, bi Ebeanlẹn nọn nẹ ebeanlẹn, ọle ki khọn ele miotọ. Sẹyẹ, ene Osẹnobulua zẹle, ne sun rẹkhan ọlẹn ki deba ọle lu iriọ.”

15 Ọne ẹhi da taman imẹn yọle: “Ene amẹn nin uwẹ daghe, nin ọne agbilẹ da dotua, mundia nin usun ẹbho, agbaẹbho kẹkẹ, bi ẹbho ne zẹ urolo kẹkẹ. 16 Ọne elanmhẹn ẹwẹ bi ene ikhuan igbe nin uwẹ daghe, dẹ he ọne agbilẹ. Ele ki banọn ọlẹn an, yẹ zanzan ọlẹn an. Ele ki le efun nọnsọle yẹ re eranlẹn tuẹ ọle a sẹsẹsẹ. 17 Osẹnobulua re ọle ele bhi ọkhọle, nin ele rẹ lu ebi ọle guanọ. Ọnin bhọ yẹ hi emhin ọkpa nin ele mhọn bhi ọkhọle, nọn re ele mun ugbẹloghe nọnsele ọbhi obọ ọsi ọne elanmhẹn ẹwẹ, rẹ sẹbhi ẹghe nin ọta nọnsi Osẹnobulua ha rẹ munsẹ. 18 Ọne okhuo nin uwẹ daghe mundia nin ọne agbaẹbho nọn khua nọn gbẹloghe ene ijie ne ribhi ọne otọ nan.”

18 Ene emhin nan ki sunu fo, mẹn da daghe ẹhi ọbhebhe na bhi okhun vade. Ọle da wo manman ha mhọn ahu. Sẹyẹ, otọ rebhe da ha bhala ranmhude uyi nọn rẹkhan ọlẹn. 2 Ọle da re urulu nọn deziẹn rẹso yọle: “Ọ dele! Babilọn Nọn Khua dele! Ọ kiẹn eji ẹlinmhin-ebe bi ẹlinmhin ne bha khia* da nyẹnlẹn. Afianmhẹn ne sọnnọn ẹbho bi afianmhẹn ne bha khia, ele ki nyẹnlẹn bhọ! 3 Ranmhude uwedẹ nin anyọn ọsi igboghẹ* nọnsọle rẹ mun ọria, ene agbaẹbho rebhe deba ọle gboghẹ. Ene ijie ne ribhi ọne otọ nan da yẹ deba ọle gboghẹ. Sẹyẹ, ene do ẹki* da fe ranmhude, emhin ne ghanlẹn ọle dẹ.”

4 Mẹn da họn ukpuru ọbhebhe na okhun yọle: “Ẹbho nesẹmhẹn, ahamiẹn ibha bha họ nin bha deba ọle gha bhi olukhọ nọnsọle, yẹ miẹn ọkhọbhegbe nin ọle ha miẹn bhi egbe, bha sibhi eji ọle ye re. 5 Osẹnobulua dẹ bhuohiẹn ọlẹn bhi emhin ebe rebhe nin ọle lu, ranmhude olukhọ nọnsọle bun gbe. 6 A dẹ lu ọle ebi ọle lu ẹbho le. Ehe, a dẹ lu ọle le igba eva. Ukpu nin ọle rẹ sa anyọn nin ẹbho, ọle a ha rẹ sa nanlẹn igba eva. 7 Beji ọle rẹ manman ha mhọn uyi, yẹ ha fuẹn bhi ẹkẹ afe bi ua, iriọ a yẹ rẹ re akhiẹ bi oya nanlẹn. Ranmhude, ọle wo ha tale bhi ọkhọle nọnsọle yọle: ‘Esọn mẹn khin, mẹn iyi okhuo nọn imhọn ọdọ. Mẹn ida lu akhiẹ ghee.’ 8 Ọnin zẹle ukpẹdẹ ọkpa ọkhọbhegbe nọn bu ọle vade ha rẹ sunu. Uu, akhiẹ, bi ohanmhẹn ki bu ọle re. Sẹyẹ, a ki re eranlẹn tuẹ ọle a sẹsẹsẹ, ranmhude, Osẹnobulua nin Jehova* nọn bhuohiẹn ọlẹn wo manman wo.

9 “Ene ijie ne ribhi ọne otọ nan, ne deba ọle gboghẹ,* yẹ fuẹn bhi ẹkẹ afe bi ua nọnsọle, dẹ ha lu akhiẹ, yẹ viẹ ọle, sade ele daghe ighogho nọn zẹ bhi eranlẹn nan rẹ tuẹ ọle a. 10 Ele ki gban egbe fia, ranmhude ofẹn mun ele nan hẹi re oya nan re nanlẹn nin ele. Ele ki na enin ha yọle: ‘Ọnan khọ gbe, ọnan khọ gbe, eo, Babilọn Non Khua nọn yi agbaẹbho nọn deziẹn, osukpa a rẹ wo bhuohiẹn uwẹ nian!’

11 “Sẹyẹ, ene do ẹki bhi ọne otọ nan da ha lu akhiẹ, ele da ha viẹ ọle. Ranmhude, ọria soso iyẹ ribhọ nọn ha ne ele de emhin nin ele khiẹn. 12 Ene emhin nan hi emhin nin ele khiẹn, igolu, isiliva, udo ne ghanlẹn, ikpileghe, ukpọn linẹn ọsaje, ukpọn nọn mhọn alo ipọpo,* olu, ukpọn nọn gian, emhin rebhe nan re eran nọn vin-ohin lu, emhin rebhe nan re akọn-eni lu, emhin rebhe nan re eran nọn ghanlẹn lu, emhin rebhe nan re oze lu, emhin rebhe nan re ẹlọnmhọn lu, bi emhin rebhe nan re udo natiọle mabo lu. 13 Ene emhin nan yẹ deba emhin ne ele khiẹn: Sinamọn, emhin nọn vin-ohin nan miẹn bhi India,* emhin nan tuẹ a nọn vin-ohin, abhii nọn vin-ohin, frankisẹns, anyọn, abhii oliv, ẹlubọ nan rẹ lu ibrẹd, wit, ẹmena, ohuan, akasi, awẹnẹwẹnẹ, igbọn, bi eria. 14 A miẹn uwẹ emhin esili ne yẹẹ ẹ. Sẹyẹ, ene ebale ne mhẹn bhi unun rebhe, bi emhin ne mhẹn an, ba uwẹ ku. Uwẹ iyẹ da miẹn ele.

15 “Ene eria ne khiẹn ene emhin nan, ne rẹ ha khuan igho bhi obọ ọle, ki gban egbe fia. Ranmhude, ofẹn mun ele, nan hẹi re oya nan rẹ nanlẹn nin ele. Ele ki ha lu akhiẹ yẹ ha viẹ ọle. 16 Ele ki ha yọle: ‘Eo, uwẹ nin agbaẹbho nọn khua, uwẹ nọn mun ukpọn linẹn ọsaje yọ, yẹ mun ukpọn nọn mhọn alo ipọpo* bi ukpọn nọn gian yọ, uwẹ nọn re igolu nọn ghanlẹn, udo ne ghanlẹn, bi ikpileghe rẹ te egbe, ebe sunu ji uwẹ khọ gbe, ọ khọ gbe. 17 Ranmhude, osukpa ẹfe bi ua nọnsẹ rẹ wo fo sẹsẹsẹ!’

“Ene ewanlẹn ne re emhin khian bhi ẹkẹ okọ, ẹbho ne gua okọ, ẹbho rebhe ne wẹnna bhi ẹkẹ okọ, bi ẹbho ne nabhi okọ yo ije kẹkẹ dọ ha do ẹki, da gban egbe fia. 18 Ele da ha so, beji ele ha ghe ighogho nọn ha zẹ dagbare bhi eranlẹn nan rẹ tuẹ ọle a. Ele da yọle: ‘Agbaẹbho ọbhebhe iribhọ nan ha rẹ khọkhọ agbaẹbho nọn khua nan.’ 19 Ele da ha bi ẹbubu bhi uhọnmhọn yẹ so. Ele da ha lu akhiẹ yẹ viẹ, ele da yọle: ‘Eo, ọne agbaẹbho nọn khua, uwẹ nọn re ọrebhe ne mhọn okọ bhi okpẹdẹ rẹ kiẹn ene fele, ebe sunu ji uwẹ khọ gbe, ọ khọ gbe. Ranmhude, a wo re osukpa re uwẹ obọ sotọ!’

20 “Ibha ne ribhi okhun, bha ha ghọnghọn ranmhude ebe sunu ji ọle. Ibha ne khiale, ene etuegbe bi ene akhasẹ, bha sẹyẹ ha ghọnghọn. Ranmhude emhin nin ọle lu bha le, ọle zẹle nin Osẹnobulua da re oya nanlẹn.”

21 Ẹhi ọkpa nọn manman wo da mun udede udo nọn diabe udo nan rẹ nọ emhin, ọ da mun fi fiọbhi ẹkẹ okpẹdẹ, yẹ yọle: “Inian a ha rẹ re osukpa khuẹ Babilọn nin agbaẹbho nọn khua lo. A iyẹ da kie miẹn ọlẹn. 22 A iyẹ da kie họn ukpuru ọsi eria ne so illo bhi ọne agbaẹbho, ne ne afan* mhọn rẹ ha khue emhin. A iyẹ da họn urulu ọsi eria ne fi ufele. A iyẹ da họn urulu ọsi ẹbho ne khue akala, la ukpuru ọsi ọria nọn hi ki rẹ khin nọn so illo. A iyẹ da kie miẹn eria ne lu iwẹnna obọ bhi ọne agbaẹbho, a bhọ iyẹ da kie họn uromhin ọsi ọria nọn nọ emhin bhi uke udo. 23 A iyẹ da kie re orukpa ru bhi ọne agbaẹbho ghee. A iyẹ da họn ukpurulu ọsi ọdafẹn bi ọsi obhiaha bhi ọne agbaẹbho, ranmhude, ẹbho nesọle ne do ẹki, ele hi okperia ne ribhi ọne otọ nan. Ọle da yẹ re ilọnmhọn ikpẹbo nesọle rẹ hiẹ agbaẹbho rebhe. 24 Ehe, ọle hi ọnọn gbono ene akhasẹ bi eria ne khiale a. Sẹyẹ, aranlẹn ọsi ọrebhe nan gbono a bhi ọne otọ nan ri ọle bhi obọ.”

19 Ene emhin nan ki sunu fo, mẹn da họn ukpurulu nọn diabe urulu ọsi ẹbho ne bunbun bhi okhun. Ele da ha yọle: “Bha gẹn Jah!* Obọ Osẹnobulua nọnsẹmhan umiẹnfan na vae. Ọle uyi bi ahu khẹke, 2 ranmhude uwedẹ ẹmhọanta bi uwedẹ nọn gbale ọle rẹ bhuohiẹn. Ọle bhuohiẹn gbe ọne agbilẹ nọn khua, nọn re ilọnmhọn oghẹ* nọnsọle rẹ riia ọne otọ nan an. Ọle yẹ re oya nanlẹn, ranmhude eguọmhandia nesọle nin ọne agbilẹ gbono a.” 3 Bhi ọne ẹghe nin tee, ele da gbo kie yọle: “Bha gẹn Jah!* Ighogho nọn zẹ si ọle bhi egbe re, da ha hẹ diọbhi okhun rẹ sẹbhi ighegheghe.”

4 Ene ewanlẹn enẹn nyan uje* bi ene emhin enẹn ne nyẹnlẹn, da debhẹre ha ga Osẹnobulua nọn dotua bhi uke ojukhuo. Ele da ha yọle: “Isẹ! Bha gẹn Jah!”*

5 Mẹn da họn urulu bhi uke ojukhuo nọn yọle: “Bha wo ha gẹn Osẹnobulua nọnsẹmhan, ibha nin eguọmhandia nesọle, ne yẹ mun ofẹn ọlẹn. Ibha rebhe ha gẹn ọlẹn, ke obhokhan ke ọwanlẹn.”

6 Mẹn da yẹ họn urulu ọsi ẹbho ne bunbun, ọ da ha rolo bii amẹn nọn siẹn bi avan nọn de. Ele da ha yọle: “Bha gẹn Jah,* ranmhude, Jehova* nin Osẹnobulua nọnsẹmhan, nin Osẹ nọn mhọn ahu nẹ, munhẹn ha gbẹloghe! 7 Bha ji mhan wo manman ha ghọnghọn. Bha ji mhan re uyi ji ọle, ranmhude, ẹghe sẹ nin ọne Ohuan ha rẹ re okhuo, ọne okhuo ọle muegbe fo. 8 Ehe, a re otọ nanlẹn rẹ yọ ukpọn linẹn ọsaje nọn fua, nọn wo manman khiakhia. Ọne ukpọn linẹn mundia nin emhin esili nin ene khiale lu.”

9 Ọle da taman imẹn yọle, “Gbẹn ene ẹmhọn nan ọbhi otọ: Eghọnghọn hi ọsi ene a tie vae ne dọ le ebale bhi iluemhin ọsi ibọdọ bi ireokhuo ọsi ọne ohuan.” Ọle da yẹ taman imẹn yọle: “Ẹmhọanta ene ẹmhọn nan khin, ranmhude obọ Osẹnobulua e na vae.” 10 Ọle ki ta ọnan man mẹn, mẹn da diguẹ bhi odalo ọle nin mẹn ga ọle. Ọkpakinọn, ọle da taman imẹn yọle: “Mhọn ẹwanlẹn, hẹi lu emhin nọn sẹ iriọ! Igbọn mẹn khin bii uwẹ, bi ibhio uwẹ ne sọsali nin Jesu. Osẹnobulua uwẹ ha ga. Ẹmhọn Jesu zẹ nan da kha akhasẹ.”

11 Mẹn da daghe ọle ghe okhun tuje a. Mẹn da daghe akasi nọn fua. A da ha tie ọria nọn dotua bhọ Ẹmhọanta, bi Ọne A Gbaẹkẹ Ọle. Ọle da ha bhuohiẹn nọn gbale yẹ khọn okhọn nọn khiale. 12 Ẹlo nesọle da ha gian bii eranlẹn. Ukparu ojie ne bunbun da ha ri ọle bhi uhọnmhọn. A da gbẹn elin ọle bhi egbe, ọle ọkpa lẹn ọne elin nan. 13 Aranlẹn da ha ribhi ukpọn nin ọle yọ ke okhun, a da ha tiọle Ọta Nọnsi Osẹnobulua. 14 Eyokulo ne ribhi okhun da yẹ hẹn akasi ne fua rẹkhan ọlẹn. Ele da yọ ukpọn linẹn ọsaje nọn fua, nọn yẹ khiakhia. 15 Agbada nọn tantan nọn yẹ manman mun da yo dagbare bhi unun nọnsọle. Ọne agbada ọle ha rẹ khọn ene agbaẹbho. Ọle ki yẹ re ukpokpo ọsi ẹlọnmhọn rẹ ha dia ele. Rẹ deba ọnin, ọle nunu ikperan anyọn bhi okọ ọsi okpohu nọnsi Osẹnobulua Nọn Mhọn Ahu Nẹ. 16 A da gbẹn elin bhi ukpọn nin ọle yọ ke okhun bhi egbegbe etagha nọnsọle. Ọne elin hi Ojie nọn nẹ ojie bi Ebeanlẹn nọn nẹ ebeanlẹn.

17 Mẹn da yẹ daghe ẹhi ọkpa nọn mundia bhi ẹkẹ ovuẹn. Ọle da si urulu okhun rẹ tatie ene afianmhẹn rebhe ne tin bhi okhun.* Ọle da yọle: “Bha vae, bha dọ le ebale bhi ilebale nọn khua nọnsi Osẹnobulua. 18 Bha vae dọ le efun egbe ọsi ene ijie, bi ene ọkakulo, bi ene ikpea ne wolo. Bha vae dọ le efun egbe ọsi akasi bi ene rẹ ha hẹn ele. Bha vae dọ le efun egbe ọsi igbọn, bi ene nyan egbe ele. Bha vae dọ le efun egbe ọsi ẹbho rebhe, ọ ha rẹ ha yi ọdafẹn la obhiogue.”

19 Mẹn da daghe ọne elanmhẹn ẹwẹ, bi ene ijie ne ribhi ọne otọ nan, bi eyokulo nesele. Ele da sikoko. Ele da muegbe nin ele rẹ ne ọnọn hẹn ọne akasi bi eyokulo nesọle khọnlẹn. 20 Ọnọn hẹn ọne akasi da mun ọne elanmhẹn ẹwẹ bi ọne akhasẹ ohoghe. Ọne akhasẹ ohoghe, ọle re emhin ọhan-ilo nin ọle lu bhi odalo ọne elanmhẹn ẹwẹ rẹ hiẹ ẹbho rebhe ne ga amanzẹ ọsi ọne elanmhẹn ẹwẹ, bi ẹbho ne miẹn iyaman nọnsọle ọbhi egbe. Beji ọne elanmhẹn ẹwẹ bi ọne akhasẹ ohoghe sẹyẹ nyẹnlẹn, ọnọn hẹn ọne akasi da mun ele veva fiọbhi ọne odighi eranlẹn nọn manman to. 21 Ọnọn hẹn ọne akasi da re agbada nọn tantan, nọn yo dagbare bhi unun nọnsọle rẹ gbono ẹbho ne kẹre a. Ene afianmhẹn da dọ le efun-egbe nọnsele.

20 Mẹn da daghe ẹhi ọkpa nabhi okhun vade. Ọle da mun udede ighan mhọn bhi obọ, yẹ re isanhan ọsi ọne uhio nọn imhọn ọkpẹnlẹn mhọn. 2 Ọle da piẹn ọne ẹnyẹn nọn khua mun, ọne ẹnyẹn nin ẹdẹlẹ natiọle Ojuu bi Esu. Ọle da re ọne ighan gba ọle, yẹ mun ọlẹn khue bhi ikpe uli.* 3 Ọle da mun ọlẹn fiọbhi ẹkẹ ọne uhio nọn imhọn ọkpẹnlẹn. Ọle da khue ọne uhio yẹ lan ọlẹn, beji a da miẹn ọne ẹnyẹn nọn khua bha sabọ hiẹ ene agbaẹbho bhi ẹkẹ ene ikpe uli* nin. Ene ikpe uli ha ki sotọ, a ki gbo fan ọlẹn fia bhi obhi ẹghe khere.

4 Mẹn da daghe ojukhuo ne bunbun, ẹbho da dotua bhọ, a da re ahu nin ele rẹ ha bhuohiẹn. Ehe, mẹn da daghe eria nan gbono a, ranmhude nin ele rẹ ha tẹmhọn Osẹnobulua yẹ sọsali nin Jesu. Mẹn da yẹ daghe eria ne bha ga ọne elanmhẹn ẹwẹ bi amanzẹ nọnsọle. Ene ẹbho nan bha ka nan re iyaman ọsi ọne elanmhẹn ẹwẹ ele bhi uke ẹhae la bhi obọ. Ele da riọ kpanọ dọ ha nyẹnlẹn. Ele da deba Kristi gbẹloghe bhi ikpe uli.* 5 Ọne ariọkpanọ nan hi ariọkpanọ nin ọhẹnhẹn. (Ene ikpe uli sotọ fo, a kuẹ riọ eria nekẹle ne yu kpanọ bhi uu.) 6 Eghọnghọn bi ikhiale hi ọsi ene riọ kpanọ bhi ẹghe ariọkpanọ nin ọhẹnhẹn. Uu nọnzi eva imhọn ahu bhi egbe nọnsele. Ele dẹ ha yi ohẹn nesi Osẹnobulua bi ọsi Kristi, ele ki deba Kristi gbẹloghe bhi ikpe uli.*

7 Ene ikpe uli* ha wo gba, a ki fan Esu fia bhi ighan. 8 Ọle ki dọ hiẹ ene agbaẹbho ne ribhi obọ nenẹn ọsi ọne otọ nan. Ene ẹbho nan hi Gọgi bi Megọgi. Ọle ki si ele koko nin ele dọ khọnlẹn. Ẹbho nin ọle ha sikoko ki bunbun bọsi ekẹn nọn ribhi egbẹdẹ. 9 Ele ki vẹ nabhi otọ agbọn rebhe. Ele ki nẹga agọ ọsi ene khiale, bi ọne agbaẹbho nin Osẹnobulua hoẹmhọnlẹn. Ọkpakinọn, eranlẹn ki na okhun vae dọ tuẹ ele a. 10 A ki mun ọne Ojuu nọn ha hiẹ ele fiọbhi ọne odighi eranlẹn nọn manman to. Ọne elanmhẹn ẹwẹ bi ọne akhasẹ ohoghe ribhi enin fo. Ele ki ha loya* asọn bi odanmhẹn rẹ sẹbhi ighegheghe.

11 Mẹn da daghe udede ojukhuo nọn fua, mẹn da yẹ daghe ọnọn dotua bhọ. Otọ bi okhun da nẹ sibhi odalo ọle re, a bha yẹ miẹn ele. 12 Mẹn da daghe ene yulu, ene ọdafẹn bi ene ibhioguele. Ele da mundia bhi odalo ọne ojukhuo. A da tuje ebe ne bunbun an. Ọkpakinọn, a da tuje ebe ọbhebhe a, ọne ebe nan hi ebe ọsi iẹnlẹn. A da re ẹmhọn nan gbẹn ọbhi ene ebe rẹ bhuohiẹn ẹbho ne yu, beji ele rẹ lu emhin. 13 Ene yu ne ribhi ẹkẹ okpẹdẹ da riọ kpanọ, ene uu gbe bi ene ribhi Idin da yẹ riọ kpanọ. A da bhuohiẹn ele kẹkẹ beji ele rẹ lu emhin. 14 A da mun Idin bi uu fiọbhi ọne odighi eranlẹn. Ọne odighi eranlẹn mundia nin uu nin ọzeva. 15 A da yẹ muno ẹbho rebhe nan bha gbẹn elin nọnsele ọbhi ebe ọsi iẹnlẹn fiọbhi ọne odighi eranlẹn.

21 Mẹn da daghe okhun ọsọgbọn bi otọ ọsọgbọn. Okhun nọn ka ha ribhọ khẹ, bi otọ nọn ka ha ribhọ khẹ da siegbe kie, sẹyẹ, okpẹdẹ bha yẹ ha ribhọ. 2 Mẹn da yẹ daghe ọne agbaẹbho nọn khiale natiọle Jerusalẹm ọsọgbọn. Ọ da ha na bhi obọ Osẹnobulua vade bhi okhun. A da mun ọle egbe bọsi obhiaha nọn khian isi ọdọ. 3 Mẹn da họn ukpurulu na bhi uke okhun ọne ojukhuo yọle: “Ghọle! ibọkpọ nọnsi Osẹnobulua ribhi ẹwẹ eria. Osẹnobulua ki deba ele ha nyẹnlẹn, ele ki dọ ha yi ẹbho nesọle. Osẹnobulua tobọle ki ne ele dia. 4 Ọle ki gbo amẹn eviẹ si ele bhi ẹlo re. Uu iyẹ da ha ribhọ, ọbalọ iyẹ da ha ribhọ, a iyẹ da ha lu akhiẹ, a iyẹ da ha họn ukpurulu eviẹ. Emhin nan ka miẹn khẹ ki siegbe kie.”

5 Ọnọn dotua bhi uke okhun ọne ojukhuo da yọle: “Ghọle! Mẹn re emhin rebhe kiẹn ọsọgbọn.” Ọ da yẹ yọle: “Gbẹn ọnan bhi otọ, ranmhude, ẹmhọanta nọn, sẹyẹ, ẹmhọn nan ha sabọ mun udu nyan ele khin.” 6 Ọle da taman imẹn yọle: “Ene emhin nan munsẹ! Imẹn hi ọne Afa bi ọne Omẹga.* Imẹn hi umunhẹn bi ọkpẹnlẹn. Ọria nọn hi ki rẹ khin nin ohanmhẹn amẹn gbe, mẹn dẹ re amẹn ọsi iẹnlẹn nanlẹn wọn bhi ọsọhẹ. 7 Ọria nọn hi ki rẹ khin nọn khọn miotọ, ọle ki le ene emhin nan bhi uku. Mẹn ki ha yi Osẹnobulua nọnsọle, ọle ki ha yi ọmọn nọnsẹmhẹn. 8 Ọkpakinọn, eria nin ofẹn mun, eria ne imhọn urẹọbhọ, eria ne bha khia, eria ne gbugbele, eria ne gboghẹ,* eria ne lu ilọnmhọn ikpẹbo, eria ne ga ẹbọ, bi eria ne bha ohoghe, dẹ ke egbe ele re bhi ọne odighi eranlẹn nọn manman to. Ọne odighi eranlẹn mundia nin uu nọnzi eva.”

9 Ọkpa bhi ene ẹhi ihinlọn nọn mun ukpamanku nọnzi ihinlọn mhọn, nin ọkhọbhegbe nọn kike ye, da bu mẹn re yẹ taman imẹn yọle: “Vae, mẹn dẹ re ọne obhiaha man uwẹ, nọn yi amhẹn ọsi ọne Ohuan.” 10 Ọle da noo ahu ọsi ọne ẹlinmhin rẹ re mẹn kpanọ ha khian uke oke nọn manman yoyo. Bhi enin, ọle da re ọne agbaẹbho nọn khiale man mẹn, nọn yi Jerusalẹm. Ọne agbaẹbho da na obọ Osẹnobulua ha vade bhi okhun. 11 Ọ da ha mhọn uyi nọnsi Osẹnobulua. Ọ da ha fi wanlan-wanlan bii udo nọn ki sẹ ghan nẹ. Ọ da gbanọn an, yẹ ha fi wanlan-wanlan bọsi udo natiọle jaspa.* 12 Ọ da ha mhọn udede ogbe nọn manman yoyo. Ọne ogbe da ha mhọn igeti igbeva, sẹyẹ ẹhi ọkpa-ọkpa da debhi ene igeti igbeva nan an. A da gbẹn elin ọsi ulin-uwa igbeva ọsi ibhokhan Izrẹl ọbhi ene igeti. 13 Igeti ea da ha ribhi obọ ọsi nọt,* igeti ea da ha ribhi obọ ọsi saot,* igeti ea da ha ribhi obọ nin ovuẹnlẹn da hẹnre, igeti ea da ha ribhi obọ nin ovuẹnlẹn da defia. 14 Ogbe ọsi ọne agbaẹbho da ha mhọn udo igbeva nan rẹ gbe ọne ayotọ. A da gbẹn elin igbeva ọsi ene etuegbe igbeva ọsi ọne Ohuan bhi ene udo.

15 Ọne ọria nọn ha ne imẹn talọ, da re ukpokpo mhọnlẹn, nan re igolu lu, nin ọle re ọle mhaan ọne agbaẹbho, ogbe ọsi ọne agbaẹbho bi ene igeti. 16 Abọkpa ọne agbaẹbho tan sẹ bhi obọ nenẹn. Abọkpa utanmhin ọsi ogbe ọsi ọne agbaẹbho bi ubhiamhin nọnsọle khin. Ọle da re ọne ukpokpo rẹ mhaan ọne agbaẹbho, ọ da ha yi ifiti ihinlọn nyan iyisẹn ehan.* Abọkpa utanmhin, ubhiamhin, bi uyomhin ọsi ọne agbaẹbho khin. 17 Ọle da yẹ mhaan ogbe ọsi ọne Agbaẹbho, ọ da ha yi kiubit enẹn nyan egbọ eva nyan iyisẹn.* Uwedẹ nin eria rẹ mhaan emhin, ọle ọne ẹhi rẹ mhaan ọlẹn. 18 Udo natiọle jaspa, ọle a rẹ lu ọne egbuwa. Igolu nọn kpe a sẹsẹsẹ bọsi ughegbe, ọle a rẹ bọn ọne agbaẹbho. 19 Udo ne ghanlẹn, ele a rẹ gbe ayotọ ọsi ọne ogbe: Udo nin ọhẹnhẹn hi jaspa, ọzeva hi safaya, ọzea hi kasidoni, ọzenẹn hi ẹmẹrad, 20 ọzisẹn hi sadọnis, ọzehan hi sadiọs, ọzihinlọn hi krisolait, ọzelẹnlẹn hi bẹri, ọzisinlin hi topaz, ọzigbe hi krisoprez, ọzugbolọ hi hayasint, ọzigbeva hi amẹtist. 21 Ikpileghe igbeva a rẹ lu ene igeti ne ribhi ọne agbaẹbho. Ukpileghe ọkpa, ọle ribhi ene igeti kẹkẹ, sẹyẹ, igolu ọsaje ọle a rẹ lu ukhuo nọn ribhi ọne agbaẹbho. Ọne igolu da gbanọn an bii ughegbe.

22 Mẹn bha daghe uwa oga bhi ọne agbaẹbho. Osẹnobulua nin Jehova* nin Osẹ Nọn Mhọn Ahu Nẹ, bi ọne Ohuan, ele hi uwa oga nọn ribhọ. 23 Ọne agbaẹbho bha miẹn ebi ọ re ẹfua ọsi ovuẹnlẹn bi uki lu, ranmhude uyi nọnsi Osẹnobulua, ọle bhala nyan ọlẹn, sẹyẹ, ọne Ohuan ọle hi ukpa ọsi ọne agbaẹbho. 24 Ẹfua ọsi ọne agbaẹbho dẹ re ene agbaẹbho kẹkẹ ha daghe uwedẹ. Sẹyẹ, ene ijie ne ribhi ọne otọ nan ki mun uyi nọnsele re bhi ọne agbaẹbho. 25 A ida ha khue ene igeti ọsi ọne agbaẹbho hiehie, ranmhude, ebiuki ida ha so bhi ọne agbaẹbho. 26 Ele ki re uyi bi ekpẹn ọsi ene agbaẹbho re bhi ẹkẹ ọle. 27 Emhin nọn hi ki rẹ khin nọn bha khia ida sabọ nabhi ẹkẹ ọne agbaẹbho. Sẹyẹ, ọria nọn hi ki rẹ khin nọn lu ebe sọnnọn, nọn yẹ bha ohoghe ida sabọ nabhọ. Ẹbho nan gbẹn elin ele ọbhi ebe ọsi iẹnlẹn ọkpa ha sabọ nabhọ. Ọne Ohuan nyan ọne ebe.

22 Ọle da re ẹdẹ nọn mhọn amẹn ọsi iẹnlẹn man mẹn. Ọne ẹdẹ da wo sẹn an. Uke ojukhuo ọsi Osẹnobulua bi ọsi ọne Ohuan ọ da ha nẹ re. 2 Ọ da ha nẹ diọbhi adesẹ ukhuo ọsi ọne agbaẹbho. Eran ọsi iẹnlẹn da ha ribhi obọ veva ọsi ọne ẹdẹ. Igba igbeva ene eran mọn ukpe-ukpe. Sẹyẹ, a da noo ebe ọsi ene eran rẹ re egbe daan ẹbho ne ribhi ene agbaẹbho.

3 Osẹnobulua ida fi ọne agbaẹbho unun. Ọkpakinọn, ojukhuo nọnsọle bi ọsi ọne Ohuan ki ha ribhi enin. Eguọmhandia nesọle ki ha re oga nọn khiale ji ọle. 4 Ele ki daghe ẹlo nọnsọle, sẹyẹ elin nọnsọle ki ha ribhi uke ẹhae nọnsele. 5 Rẹ deba ọnin, a iyẹ da miẹn asọn bhi enin. Ele ida ha mhọn ebi ele re ẹfua ọsi orukpa la ovuẹn lu. Osẹnobulua nin Jehova* dẹ re ẹfua nin ele. Sẹyẹ ele ki ha gbẹloghe bọsi ijie rẹ sẹbhi ighegheghe.

6 Ọne ẹhi da taman imẹn yọle: “Ẹmhọn nan ha sabọ mun udu nyan, ele khọnan, ẹmhọanta ele khin. Ehe, Osẹnobulua nin Jehova* nọn taman ene akhasẹ ebi ele ha ta, ọle je ẹhi nọnsọle, nọn dọ re ene emhin ne ha kẹ sunu man igbọn nesọle. 7 Ghọle! Mẹn vade, mẹn ida riia ẹghe a. Eghọnghọn hi ọsi ọne ọria nọn wo ha re obọ rẹkhan ọta akhasẹ nan gbẹn bhi ọne ebe nan.”

8 Imẹn nin Jọni hi ọne a ta ene ẹmhọn nan man, imẹn yẹ hi ọnọn daghe ene emhin nan. Ẹghe nin mẹn rẹ họn ene emhin nan yẹ daghe ele, mẹn da debhẹre bhi odalo ọne ẹhi nọn ha re ene emhin nan man mẹn. Mẹn da ho nin mẹn ga ọle. 9 Ọkpakinọn, ọle da taman imẹn yọle: “Mhọn ẹwanlẹn! Hẹi dọnmhẹn ọlẹn! Igbọn mẹn khin bii uwẹ, bi ibhio ẹ nin ene akhasẹ, bi ene re obọ rẹkhan ẹmhọn nan gbẹn bhi ọne ebe nan. Ga Osẹnobulua.”

10 Ọle da yẹ taman imẹn yọle: “Hẹi re ọne ọta akhasẹ nan gbẹn ọbhi ọne ebe nan he, ranmhude, ọne ẹghe nan rẹyi sire. 11 Ji ọria nọn lu emhin ebe wo kaka obọ bhọ, ọnọn nyẹnlẹn inyẹnlẹn okan wo situa bhọ. Ọkpakinọn, ji ọria nọn lu emhin esili wo ha lu emhin esili, ọnọn nyẹnlẹn iẹnlẹn nọn khiale ha yẹ wọ ha lu iriọ.

12 “‘Ghọle! Mẹn vade, mẹn ida riia ẹghe a. Elele nin mẹn ha re nin ọdeọde ne imẹn. Mẹn dẹ ha ọdeọde osa, beji ọle rẹ wẹnna. 13 Imẹn hi ọne Afa bi Omẹga,* ọne ọhẹnhẹn bi ọne ọkike. Imẹn hi umunhẹn bi ọkpẹnlẹn. 14 Eghọnghọn hi ọsi ẹbho ne họ ukpọn nọnsele, ranmhude, a dẹ re otọ nin ele rẹ le bhi eran ọsi iẹnlẹn. Sẹyẹ, a ki ji ele da na bhi ene igeti gbera nabhi ẹkẹ ọne agbaẹbho. 15 Ọkpakinọn, a ida ji eria ne bha khia* da nabhi ẹkẹ ọne agbaẹbho. Sẹyẹ, a ida ji eria ne lu ilọnmhọn ikpẹbo, ene gboghẹ, ene gbugbele, ene ga ẹbọ bi ọrebhe nin ohoghe ti ele bhọ, ne yẹ bha ohoghe da nabhọ.’

16 “‘Imẹn nin Jesu, imẹn je ẹhi nọnsẹmhẹn nọn dọ ta ene ẹmhọn nan man bha, ranmhude ọmhẹn ọsi ene agbotu. Imẹn hi iniẹn ọsi Devid, bi ọmọn nọnsọle. Imẹn hi ọne ahiẹnhiẹn nọn bhala ọsewewiẹ’”

17 Ọne ẹlinmhin bi ọne obhiaha da ha tie ẹbho yọle, “Bha vae!” Ọria nọn hi ki rẹ khin nọn họn ene ẹmhọn nan yẹ yọle. “Bha vae!” Ji ọria nọn ki rẹ khin nin amẹn ghọn vae, nin ele dọ wọn amẹn ọsi iẹnlẹn ọsọhẹ.

18 “Mẹn taman ọrebhe ne họn ẹmhọn nan gbẹn ọbhi ọne ebe nan: Ahamiẹn ọria soso ne ba ẹmhọn nan gbẹn ọbhi ọne ebe nan, Osẹnobulua dẹ re oya ne ribhi ọne ebe nan nanlẹn. 19 Ahamiẹn ọria soso ne sibhi ẹmhọn nan gbẹn ọbhi ọne ebe nan re, Osẹnobulua ida ji ọle da miẹn emhin esili nan tẹmhọnlẹn bhi ene ebe nan. Ọnin hi, Osẹnobulua ida ji ọle da nabhi ọne agbaẹbho nọn khiale, yẹ le ikpẹ ọsi eran ọsi iẹnlẹn.

20 “Ọnọn sọsali ọbhi ene emhin nan yọle, ‘Imẹn vade, imẹn ida riia ẹghe a.’”

“Isẹ! Huẹan vae, Jesu nin Ebeanlẹn mhan.”

21 Mẹn bhii nin Jesu nin Ebeanlẹn mhan manman mhọn ifuẹkẹ da ene khiale.