EBE ỌHẸNHẸN NỌNSI JỌNI

1 Ẹmhọn ọne ọta nọn re iẹnlẹn nin mhan, ọle mhan gbẹn ji bha. Rẹ na bhi ẹghe umunhẹn ọle rẹ ha ribhọ. Mhan da họn ẹmhọn ọlẹn, yẹ re ẹlo mhan daghe ọle. Mhan da yẹ re obọ mhan so ọle. 2 (Bhi ọsi ẹmhọanta, a da re ọne iẹnlẹn man mhan. Mhan da dọ lẹn ọne iẹnlẹn ọsi ighegheghe nọn na obọ ọsi ọne Aba vae. Ọnan hi ẹmhọn nin mhan wewe, nin mhan yẹ sọsali ọi.) 3 Ebi mhan re ẹlo mhan daghe, nin mhan yẹ re ehọ mhan họn, ọle mhan taman ibha, beji bha ha da kugbe deba mhan, beji mhan rẹ kugbe deba ọne Aba bi Jesu Kristi nin Ọmọn nọnsọle. 4 Mhan da gbẹn ene ẹmhọn nan ji bha beji mhan ha da manman ha ghọnghọn.

5 Ọne uhọnmhunje nin mhan họn bhi unun nọnsọle, nin mhan yẹ ha wewe man bha, ọle khọnan: Ẹfua Osẹnobulua khin, ebiuki iri ọle bhi egbe hiehie. 6 Mhan ha yọle ghe, “Ibo nọnsi Osẹnobulua mhan ye,” nin mhan da yẹ ha khian bhi ebiuki, ohoghe mhan bhale, mhan bha nyẹnlẹn rẹkhan uwedẹ ọsi ẹmhọanta. 7 Sokpan, ahamiẹn mhan khian bhi ẹfua, beji ọle rẹ ribhi ẹfua, mhan rebhe ki kugbe. Sẹyẹ, aranlẹn nọnsi Jesu nin Ọmọn nọnsọle ki kpe imhan khia bhi olukhọ.

8 Mhan ha yọle ghe, “Mhan imhọn olukhọ bhi egbe,” egbe mhan mhan gheghe hiẹ, ẹmhọanta iri mhan bhi unun. 9 Mhan ha re olukhọ nọnsẹmhan ka man Osẹnobulua, ọle dẹ rẹhunmhan imhan, yẹ kpe imhan khia bhi olukhọ rebhe, ranmhude, Osẹ nọn khiale nan ha sabọ mun udu nyan ọle khin. 10 Mhan ha yọle, “Mhan bha sẹ lu olukhọ ghee,” mhan ki re Osẹnobulua kiẹn ọbhahoghe, sẹyẹ, ọnin ki rẹman ghe imhan bha rẹọ bhi ọta nọnsọle.

2 Imọn nesẹmhẹn, ranmhude mẹn bha guanọ nin bha lu emhin ebe, ọle zẹle nin mẹn da ha gbẹn ene ẹmhọn nan ji bha. Aharẹmiẹn ọria soso bhi ẹwẹ bha lu emhin ebe, mhan mhọn ọnọn ha rẹkpa mhan bhi eji ọne Aba ye. Ọle hi Jesu Kristi, ọnọn khiale. 2 Ọle hi ọnọn zọese bhi olukhọ nọnsẹmhan, beji mhan ha da kie sabọ deba Osẹnobulua ha mhọn ikolu. Ọne agbọn nan rebhe ọle zọese nan, ọ iyi mhan ọkpa. 3 Ahamiẹn mhan wo ha re obọ rẹkhan uhi nesọle, mhan ki rẹman ghe mhan lẹn ọlẹn. 4 Ọria ha yọle: “Mẹn lẹn Jesu,” nin ọle bha da re obọ rẹkhan uhi nesọle, ọbhahoghe ọle khin, ẹmhọanta iri ọle bhi unun. 5 Ọkpakinọn, ọria nọn re obọ rẹkhan uhi nesọle, ọle hi ọnọn gene hoẹmhọn Osẹnobulua. Ọnan mhan ha rẹ lẹn ghe ibo nọnsọle mhan gene ye. 6 Ọkhẹke nin ọria nọn hi ki rẹ khin nọn yọle ibo nọnsi Osẹnobulua ọle ye ha nyẹnlẹn beji Jesu rẹ nyẹnlẹn.

7 Ibhio mẹn nin mẹn hoẹmhọnlẹn, ọ iyi uhi ọsọgbọn mẹn gbe nin bha. Uhi nan ka gbe nin bha rẹ na otọ ha de nọn. Ọne ọta nin bha ka họn khẹ, ọle hi ọne uhi nan gbe nin bha. 8 Ọrẹyiriọ, uhi ọsọgbọn nọn. Jesu da re obọ rẹkhan ọne uhi nin, bha da yẹ re obọ rẹkhan ọlẹn. Ejayenan nian, ebiuki siegbe kie, ọne ẹfua ọsaje munhẹn ha bhala.

9 Ọria ha yọle ọle ribhi ẹfua, nin ọle bha da hoẹmhọn obhio ọle, ebiuki ọle sẹyẹ ye. 10 Ọria nọn hoẹmhọn obhio ọle, ọle ribhi ẹfua, emhin iribhọ nọn ha re ọle dere.* 11 Ebiuki ọria nọn bha hoẹmhọn obhio ọle ye. Ẹkẹ ebiuki ọle da khian. Ọle bha lẹn eji ọle khian, ranmhude, ebiuki so ọle bhi ẹlo.

12 Ene ibhokhan, a re emhin ebe nesẹbha hunmhan ibha, ranmhude elin nọnsọle. Ọnan zẹle nin mẹn da gbẹn ọne ebe nan ji bha. 13 Ene aba, mẹn gbẹn ọne ebe nan ji bha, ranmhude bha dọ lẹn ọnọn ha ribhọ rẹ na bhi ẹghe umunhẹn ha de. Ene usẹn, mẹn gbẹn ọne ebe nan ji bha, ranmhude bha khọn ọne ọria ọbe miotọ. Ene ibhokhan, mẹn gbẹn ọne ebe nan ji bha, ranmhude bha dọ lẹn ọne Aba. 14 Ene aba, mẹn gbẹn ọne ebe nan ji bha, ranmhude bha dọ lẹn ọnọn ha ribhọ rẹ na bhi ẹghe umunhẹn ha de. Ene usẹn, mẹn gbẹn ọne ebe nan ji bha, ranmhude eria ne ziẹnlẹn bha khin. Ibha rẹọ bhi ọta nọnsi Osẹnobulua, yẹ khọn ọne ọria ọbe miotọ.

15 Bha hẹi hoẹmhọn ọne agbọn nan, la emhin ne ribhi ọne agbọn nan. Ọria ha hoẹmhọn ọne agbọn nan, ọle bha hoẹmhọn ọne Aba; 16 ranmhude emhin rebhe ne ribhi ọne agbọn nan, emhin bọsi, emhin nin egbe guanọ, emhin ne yẹẹ ẹlo rẹ daghe, bi nin ọria rẹ ha re emhin nin ọle mhọn rẹ dẹgbọ, bha na bhi obọ ọne Aba vae, obọ ọne agbọn nan ọ na vae. 17 Rẹ deba ọnin, ọne agbọn nan bi emhin ne ribhọ re egbe rie, ọkpakinọn, ọria nọn lu iho nọnsi Osẹnobulua dẹ ha ribhọ rẹ sẹbhi ighegheghe.

18 Ene ibhokhan, uriagogo nọn kike mhan ki ye, sẹyẹ, beji bha ka họn khẹ, oghian Kristi dẹ zegbere. Bhi ejayenan nian, eghian Kristi ne bunbun bhọ zegbere fo. Ọnan mhan rẹ lẹn ghe uriagogo nọn kike mhan ki ye. 19 Ẹwẹ mhan ele rẹ ha ye. Ele da sibhi ẹwẹ mhan re, ranmhude ele bha deba usun nọnsẹmhan. Sade usun nọnsẹmhan ele ye nọn, ele ha rẹ sẹyẹ ha ribhi ẹwẹ mhan. Ebi ele lu da rẹman ghe, ọ iyi ọrebhe ribhi usun mhan. 20 Osẹnobulua nọn khiale re ẹlinmhin nọn khiale rẹ zẹ ibha, sẹyẹ, ibha rebhe mhọn ilẹnmhin. 21 Ọ iyi ranmhude ibha bha lẹn ẹmhọanta zẹle nin mẹn da gbẹn ọne ebe nan ji bha. Sokpan, ranmhude bha lẹn ẹmhọanta, bi ranmhude ẹmhọanta bi ohoghe imhọn ọne ele ko yẹ, ọle zẹle nin mẹn da gbẹn ọlẹn ji bha.

22 Ọria nọn yọle ghe, Jesu iyi Kristi, ọle hi ọbhahoghe, ọle yẹ hi oghian Kristi, ranmhude, ọle he ọne Aba bi ọne Ọmọn. 23 Ọria nọn hi ki rẹ khin nọn yọle ghe, ọle bha lẹn ọne Ọmọn, ọne Aba ki he ọle. Ọkpakinọn, ọria ha yọle ghe ọle lẹn ọne Ọmọn, ọne Aba ki yẹ miẹn ọlẹn ọbhi egbe. 24 Bhi ọsẹbha, ibhio mẹn, bha wo lu rẹkhan ọne ọta nin bha họnlẹn rẹ na otọ ha de. Bha ha lu iriọ, bha ki kugbe deba ọne Ọmọn, ọne Aba ki yẹ kugbe deba bha. 25 Rẹ deba ọnin, ọle tobọle yọle ghe, ọle dẹ re iẹnlẹn ọsi ighegheghe nin mhan.

26 Ranmhude ẹbho ne guanọ ne hiẹ bha, ọle zẹle nin mẹn da gbẹn ọne ebe nan ji bha. 27 Bhi ọsẹbha, ọne ẹlinmhin nin ọle rẹ zẹ ibha ne ibha dia. Ọ bha khẹke nin ọria soso ha man bha emhin; ọne ẹlinmhin nin ọle rẹ zẹ ibha, ọle ki man bha emhin rebhe. Ẹmhọanta ọne ẹlinmhin ta, ọ ibha ohoghe. Bha sẹyẹ kugbe deba ọle, beji ọne ẹlinmhin yọle nin bha lu. 28 Bhiriọ, imọn nesẹmhẹn, bha wo kugbe deba ọle, beji a ha da miẹn ghe, ẹghe nin ọle ha rẹ re egbe man, ẹkhọle ida ha lo bha nin bha rẹ talọ. Sẹyẹ, bhi ẹghe nin ọle ha rẹ vae,* ẹkhọle ida ha lo bha nin bha rẹ mundia bhi odalo ọle. 29 Ibha ha lẹn ghe ọle khiale, bha ki yẹ lẹn ghe, imọn nesọle ọle ene khiale rebhe khin.

3 Sẹ ghe ebi ọne Aba rẹ hoẹmhọn mhan yẹ! Ọle da lu ọle nan ha tie mhan imọn nesọle. Imọn nesi Osẹnobulua mhan ki khin. Ọle zẹle nin ọne agbọn nan bha da lẹn mhan, ranmhude, ele bha yẹ lẹn ọlẹn. 2 Ibhio mẹn nin mẹn hoẹmhọnlẹn, imọn nesi Osẹnobulua mhan ki khin. Ọkpakinọn, mhan bha sẹ lẹn ebi mhan ha dia yẹ. Mhan lẹnmhin ghe, ẹghe nin ọle ha rẹ zegbere, mhan dẹ diabe ọle, ranmhude, mhan dẹ daghe ọle beji ọle dia tee. 3 Ọrebhe ne mhọn ọne ikhuaẹloghe nan ki kpe egbe nọnsele khia beji ọle rẹ khia.

4 Ọrebhe ne wo ha lu olukhọ, eria ne gbuhi a ele khin. Ọria nọn gbuhia, ọle hi ọria nọn lu olukhọ. 5 Sẹyẹ, bha lẹnmhin ghe, ọle vae dọ re olukhọ nọnsẹmhan kie. Olukhọ iri ọle bhi egbe. 6 Ọria nọn deba ọle muobọ ida ha lu olukhọ. Ọria nọn lu olukhọ bha miẹn ọlẹn la lẹn ọlẹn. 7 Imọn nesẹmhẹn, bha hẹi ji ọria soso hiẹ bha. Ọria nọn hi ki rẹ khin nọn lu emhin ne gbale, ọle hi ọnọn khiale beji ọle yẹ rẹ khia. 8 Ọria nọn wo ha lu emhin ebe, Ojuu ọle re egbe khọkhọ. Ranmhude, rẹ na otọ ha de, ọle Ojuu rẹ ha lu emhin ebe. Ọnan bhọ zẹle nin Ọmọn nọnsi Osẹnobulua da vae, nin ọle dọ riia iwẹnna nọnsi Ojuu a.

9 Ọrebhe nin Osẹnobulua rẹ kiẹn imọn nesọle ilu olukhọ, ranmhude, ikpẹ nọnsi Osẹnobulua ne ele. Ọria nọn sẹ iriọ ida ha lu olukhọ, ranmhude, ọle kiẹn ọmọn nọnsi Osẹnobulua. 10 Ọnan hi ikikẹ nọn ribhi ẹwẹ imọn nesi Osẹnobulua bi imọn nesi Ojuu: Ọria nọn hi ki rẹ khin nọn ilu emhin nọn gbale, nọn bha yẹ hoẹmhọn obhio ọle, ọmọn nọnsi Ojuu ọle khin, ọ iyi ọmọn nọnsi Osẹnobulua. 11 Ọnan hi uhi nan ka gbe nin bha rẹ na otọ ha de, ghe nin bha hoẹmhọn egbe. 12 Bha hẹi diabe Keni, nin ọmọn nọnsi Ojuu, nọn gbe obhio ọle a. Be ọle bhọ gbe ọle a ba? Ranmhude, emhin nin obhio ọle lu mhẹnmhin, ọkpakinọn, ebi ọle lu bha ha mhẹn.

13 Ibhio mẹn, bha hẹi ji ọ han bha ilo ghe ọne agbọn nan he ibha. 14 Mhan ka rẹ yu, ọkpakinọn, mhan dọ miẹn iẹnlẹn, ranmhude, mhan hoẹmhọn ibhio mhan. Ọria nọn bha hoẹmhọn obhio ọle bha sẹ miẹn iẹnlẹn. 15 Ọria nọn hi ki rẹ khin nọn bha hoẹmhọn obhio ọle, ọgbugbele ọle khin. Bha lẹnmhin ghe, ọgbugbele soso iribhọ nọn ha miẹn iẹnlẹn ọsi ighegheghe. 16 Ebi Jesu lu rẹkpa mhan rẹ lẹn ebi oyẹẹ khin. Ọle da yu nin mhan. Bhiriọ, ọ yẹ khẹke nin mhan muegbe nin mhan rẹ yu nin ibhio mhan. 17 Ahamiẹn uwẹ daghe obhio ẹ nọn bha miẹn rẹ lu, nin uwẹ bha da ka rẹkpa ọle arẹmiẹn uwẹ mhọn emhin, be uwẹ ha rẹ tale yẹ ghe uwẹ hoẹmhọn Osẹnobulua? 18 Imọn nesẹmhẹn, bha hẹi ji oyẹẹ nin mhan mhọn ha yi ọsi ikpunun. Sokpan, bha ji mhan re ẹkẹata bi emhin nin mhan lu rẹ ha re ọle man.

19 Ọnan mhan ha rẹ lẹn ghe mhan mhọn ẹmhọanta, sẹyẹ, mhan ki sabọ taman egbe mhan ghe Osẹnobulua hoẹmhọn mhan. 20 Aharẹmiẹn ọkhọle nọnsẹmhan gbe imhan asan bhi emhin nọn hi ki rẹ khin, mhan lẹnmhin ghe, Osẹnobulua lẹn emhin rebhe, sẹyẹ, ọle kpọnọ gbera ọkhọle nọnsẹmhan. 21 Ibhio mẹn nin mẹn hoẹmhọnlẹn, ahamiẹn ọkhọle nọnsẹmhan bha gbe imhan asan, mhan ki wo sabọ ha ne Osẹnobulua talọ, ofẹn ida mun mhan. 22 Sẹyẹ, ebi ọ hi ki rẹ khin nin imhan bhii ọle le, ọle ki rẹ nin imhan, ranmhude, mhan wo re obọ rẹkhan uhi nesọle yẹ ha lu ebe ti ọle bhọ. 23 Ọnan hi uhi nin ọle gbe nin mhan, ghe, nin mhan mhọn urẹọbhọ da Jesu Kristi nin Ọmọn nọnsọle, yẹ hoẹmhọn ibo mhan beji ọle taman imhan. 24 Ọria nọn re obọ rẹkhan uhi nesọle ki deba ọle ha muobọ. Ọle ki yẹ kugbe deba ọne ọria. Ẹlinmhin nin ọle re nin mhan rẹkpa mhan rẹ lẹn ghe, ọle deba mhan.

4 Ibhio mẹn nin mẹn hoẹmhọnlẹn, bha hẹi wo ha rẹọ bhi ọta rebhe nan yọle ghe, obọ Osẹnobulua ọ na vae. Bha ka ha fẹ ọne ẹmhọn ghe, nin bha rẹ lẹn si obọ Osẹnobulua ọ gene na vae. Ranmhude akhasẹ ne bunbun zegbere bhi ọne agbọn nan.

2 Ọnan bha ha rẹ lẹn si obọ Osẹnobulua ọne ọta na vae: Ọne ọta ha rẹman ghe, Jesu Kristi gene vae bhi ọne otọ nan bọsi ọria, obọ Osẹnobulua ọ na vae. 3 Ọkpakinọn, ahamiẹn ọne ọta bha rẹman ghe, Jesu vae bhi ọne otọ nan bọsi ọria, ọ iyi obọ Osẹnobulua ọ na vae. Ọnan hi ọne ọta nin bha họn ghe, oghian Kristi nọn ha zegbere dẹ ha ta, ejayenan nian, ọ munhẹn ha tale fo.

4 Imọn nesẹmhẹn, ibo nọnsi Osẹnobulua bha ye. Sẹyẹ, bha khọn ene akhasẹ ohoghe miotọ, ranmhude, ọnọn deba bha, ọle kpọnọ nẹ ọnọn deba ọne agbọn nan. 5 Ibo ọsi ọne agbọn nan ele ye; ọle zẹle nin ele da ta ọta nin ọne agbọn nan ta, ọle yẹ zẹ nin ọne agbọn nan da ka ele ehọ. 6 Ibo ọsi Osẹnobulua mhan ye. Ọnọn hi ki rẹ khin nọn dọ lẹn Osẹnobulua ki ka mhan ehọ. Ọnọn iribhi ibo nọnsi Osẹnobulua ida ka mhan ehọ. Inian mhan rẹ lẹn ikikẹ nọn ribhi uhọnmhunje ọsi ẹmhọanta bi uhọnmhunje ọsi ohoghe.

7 Ibhio, bha ji mhan wo ha re oyẹẹ man egbe, ranmhude obọ Osẹnobulua oyẹẹ na vae. Ọnọn hi ki rẹ khin nọn re oyẹẹ man, ọmọn nọnsi Osẹnobulua ọle khin, ọle lẹn Osẹnobulua. 8 Ọria nọn hi ki rẹ khin nọn ire oyẹẹ man bha lẹn Osẹnobulua, ranmhude, Osẹnobulua hi oyẹẹ. 9 Inian Osẹnobulua rẹ rẹman ghe ọle hoẹmhọn mhan: Ọle da je ukpọmọn ọkpa nọnsọle re bhi ọne agbọn nan, beji mhan ha da sabọ na bhi obọ ọle miẹn iẹnlẹn. 10 Osẹnobulua da je ọmọn nọnsọle nọn dọ yu ọbhi olukhọ nọnsẹmhan, beji mhan bi ọle ha da kie sabọ ha yi imọẹ. Ranmhude ọle hoẹmhọn mhan zẹle nin ọle da lu ọnan, ọ iyi ranmhude mhan hoẹmhọn ọlẹn.

11 Ibhio, beji a miẹn inian Osẹnobulua rẹ hoẹmhọn mhan, ọkhẹke nin mhan hoẹmhọn ibhio mhan. 12 Ọria soso bha sẹ ka daghe Osẹnobulua khẹ. Ahamiẹn mhan hoẹmhọn ibhio mhan, Osẹnobulua ki ne imhan dia, sẹyẹ, mhan ki manman ha re oyẹẹ nọnsọle man nọnsẹn. 13 Ẹlinmhin nọnsọle nin ọle re nin imhan, ọle rẹ mhan lẹn ghe, ibo nọnsọle mhan ye, sẹyẹ, ghe ọle ne imhan dia. 14 Rẹ deba ọnin, imhan tobọmhan daghe ọle, yẹ sọsali bhọ ghe, ọne Aba je Ọmọn nọnsọle re nọn dọ miẹn ọne agbọn nan fan. 15 Ọnọn hi ki rẹ khin nọn re ọkhọle rebhe tale dagbare ghe, Ọmọn nọnsi Osẹnobulua Jesu khin, ọne ọria ki ha ribhi ibo nọnsi Osẹnobulua, Osẹnobulua ki deba ọle. 16 Mhan dọ luẹ kere ghe, Osẹnobulua hoẹmhọn mhan, mhan yẹ rẹọbhọ.

Osẹnobulua hi oyẹẹ, ọnọn hi ki rẹ khin nọn wo ha re oyẹẹ man ki ha ribhi ibo nọnsi Osẹnobulua, Osẹnobulua ki yẹ deba ọle. 17 Ahamiẹn mhan re oyẹẹ man bhi uwedẹ nọn gbale, mhan ki miẹn unun rẹ talọ bhi ukpẹdẹ ibhuohiẹn, ranmhude, beji Jesu dia, iriọ mhan yẹ dia bhi ọne agbọn nan. 18 Ofẹn imun ọria nọn mhọn oyẹẹ. Ọria nọn mhọn oyẹẹ nọn gbale ki re ofẹn sibhi ọkhọle re, ranmhude, ofẹn mun ọria mhọnlẹn. Bhi ọsi ẹmhọanta, ọria nin ofẹn mun isẹ mhọn oyẹẹ nọn gbale. 19 Ranmhude Osẹnobulua ka hoẹmhọn mhan, ọle zẹle nin mhan da yẹ re oyẹẹ man.

20 Ọria ha yọle, ‘Ọle hoẹmhọn Osẹnobulua,’ nin ọle bha da hoẹmhọn obhio ọle, ọbhahoghe ọle khin. Ranmhude, ọria nọn bha hoẹmhọn obhio ọle nin ọle daghe, ida sabọ hoẹmhọn Osẹnobulua nin ọle bha daghe. 21 Ọnan hi ọne uhi nan gbe nin mhan, ghe, ọkhẹke nin ọria nọn hoẹmhọn Osẹnobulua sẹyẹ hoẹmhọn obhio ọle.

5 Ọnọn hi ki rẹ khin nọn rẹọbhọ ghe Jesu hi Kristi, kiẹn ọmọn nọnsi Osẹnobulua. Ọnọn hi ki rẹ khin nọn hoẹmhọn ọne Aba ki yẹ hoẹmhọn imọn nesọle. 2 Mhan ha hoẹmhọn Osẹnobulua yẹ ha re obọ rẹkhan uhi nesọle, mhan ki rẹman ghe, mhan hoẹmhọn imọn nesi Osẹnobulua. 3 Ọnan hi ebi a re ọle ta nan rẹ hoẹmhọn Osẹnobulua: mhan ki re obọ rẹkhan uhi nesọle. Uhi nesọle bha nọghọ gbe nan rẹ re obọ rẹkhan. 4 Ọria nin Osẹnobulua rẹ kiẹn ọmọn nọnsọle khọn ọne agbọn nan miotọ. Urẹọbhọ nọnsẹmhan mhan rẹ khọn ọne agbọn nan miotọ.

5 Họla ha sabọ khọn ọne agbọn nan miotọ? Ọria nọn rẹọbhọ ghe Jesu Kristi hi Ọmọn nọnsi Osẹnobulua. 6 Amẹn bi aranlẹn Jesu Kristi rẹ vae, ọ iyi amẹn ọkpa ọle rẹ vae, amẹn bi aranlẹn ọle rẹ vae. Ẹlinmhin nọn khiale yẹ wo sọsali ọbhi ọnan, ranmhude, ẹmhọanta ọne ẹlinmhin khin. 7 Emhin ea ribhọ ne sọsali nanlẹn: 8 ọne ẹlinmhin, ọne amẹn, bi ọne aranlẹn; ene emhin ea nan ta unun ọkpa.

9 Ahamiẹn mhan rẹọ bhi ebi eria tale, eka-eka ki hi ebi Osẹnobulua tale. Ọle bhọ hi ọnọn sọsali nin Ọmọn nọnsọle. 10 Ọria nọn mhọn urẹọbhọ da Ọmọn nọnsi Osẹnobulua rẹman ghe, ọle rẹọ bhi ebi Osẹnobulua tale. Ọria nọn imhọn urẹọbhọ da Osẹnobulua re ọle kiẹn ọbhahoghe, ranmhude, ọne ọria bha rẹọ bhi ebi Osẹnobulua tale rẹji Ọmọn nọnsọle. 11 Ọnan hi ọnọn ọsali, ghe, Osẹnobulua re iẹnlẹn ighegheghe nin mhan, rẹ na obọ Ọmọn nọnsọle mhan da miẹn ọne iẹnlẹn nan. 12 Ọria nọn hi ki rẹ khin nọn rẹkhan ọne ọmọn dẹ miẹn ọne iẹnlẹn; ọnọn hi ki rẹ khin nọn bha rẹkhan ọmọn nọnsi Osẹnobulua ida miẹn ọne iẹnlẹn.

13 Mẹn guanọ nin bha lẹn ghe, ibha ne mhọn urẹọbhọ da Ọmọn nọnsi Osẹnobulua mhọn iẹnlẹn ọsi ighegheghe. Ọle zẹle nin mẹn da gbẹn ọne emhin nan ji bha. 14 Ọnan hi iruduba nin mhan mhọn da Osẹnobulua, ghe, mhan ha bhii ọle emhin nọn hi ki rẹ khin nọn diẹn mun iho nọnsọle, ọle dẹ ka mhan ehọ. 15 Mhan ha rẹọbhọ ghe, ọle ka mhan ehọ, sade mhan nọọn ọle emhin nọn hi ki rẹ khin, mhan ki yẹ rẹọbhọ ghe, ọle dẹ lu emhin nin mhan bhii ọle le nin mhan.

16 Ahamiẹn ọria daghe obhio ọle lu olukhọ nọn ida si uu ji ọle, ọle ki bhii nanlẹn, Osẹnobulua ki re iẹnlẹn nin ọne ọria. Ehe, ọle dẹ re iẹnlẹn nin eria ne bha lu olukhọ nọn ha si uu ji ele. Olukhọ ribhọ nọn si uu re. Mẹn bha yọle, nin ọle bhii ọbhi olukhọ nọn sẹ iriọ. 17 Olukhọ emhin ebe rebhe khin, ọrẹyiriọ, olukhọ ribhọ ne isi uu ji ọria.

18 Mhan lẹnmhin ghe, ọria nin Osẹnobulua rẹ kiẹn ọmọn nọnsọle ida ha lu olukhọ, ranmhude, Ọmọn nọnsi Osẹnobulua* gbega ọle. Sẹyẹ, ọne ọria ebe* imhọn ahu bhi egbe ọle. 19 Mhan lẹnmhin ghe, Osẹnobulua nyan mhan, ọkpakinọn, ọne ọria ọbe,* ọle re ọne agbọn nan khian. 20 Mhan lẹnmhin ghe Ọmọn nọnsi Osẹnobulua vae, ọle da re ẹwanlẹn nin mhan beji mhan ha da sabọ lẹn Osẹnobulua ọsi ẹmhọanta. Rẹ na obọ Ọmọn nọnsọle nin Jesu Kristi, mhan kugbe deba ọle. Ọle hi Osẹnobulua ọsi ẹmhọanta. Obọ ọle iẹnlẹn ọsi ighegheghe na vae. 21 Imọn nesẹmhẹn, bha re egbe nẹ bhi igẹbọ.