EBE ỌZEVA NỌNSI PITA

1 Imẹn nin Saimọn Pita gbẹn ọne ebe nan. Ọguọmhandia bi odibo nọnsi Jesu Kristi mẹn khin. Eria ne rẹọ bhi iman-emhin ọsi ẹmhọanta nin mhan yẹ rẹọ, ele mẹn gbẹn ọlẹn je. Ene iman-emhin nan wo manman ghan. Ikhiale nọnsi Osẹnobulua bi ọsi Jesu Kristi nin Ọmiẹnmhanfan rẹkpa mhan rebhe rẹ ha mhọn ọne urẹọbhọ nan.

2 Mẹn bhii nin ilẹnmhin nọn gbale nọnsi Osẹnobulua, bi ọsi Jesu Kristi nin Ebeanlẹn mhan rẹkpa bha rẹ manman ha mhọn ọfure, yẹ manman miẹn ifuẹkẹ nọn khua bhi obọ Osẹnobulua. 3 Osẹnobulua ne emhin rebhe ne ha rẹkpa mhan rẹ ha re iẹnlẹn nọnsẹmhan ga ọle rẹ lu ẹsele nin mhan. Ahu nọnsọle, ọle rẹ lu ọnan. Ene emhin nan da sabọ sẹ mhan obọ, ranmhude mhan dọ lẹn Osẹnobulua nọn tie mhan. Umhẹnmhin nọnsọle bi uyi nin ọle ha miẹn bhọ re ọle tie mhan. 4 Ranmhude ọnan, ọle da re emhin ne mhẹn an nin ọle vele rẹ lu ẹsele nin mhan, beji a ha da miẹn mhan ki ha mhọn egbe ọsi ẹlinmhin bọsi ọle,* ranmhude, mhan re egbe nẹ bhi emhin ne imhẹn nin ẹbho lu bhi ọne agbọn nan. Emhin ne imhẹn nin egbe guanọ ọle si ẹbho bhi ene emhin ebe nan.

5 Ọnan zẹle rẹ deba urẹọbhọ nin bha mhọnlẹn, ọkhẹke nin bha manman dọnmhegbe rẹ ha yi eria ne mhẹn. Rẹ deba ọnin, bha ki dọnmhegbe rẹ ha mhọn ilẹnmhin. 6 Rẹ deba ilẹnmhin, bha ki ha mun egbe ọbhi ibẹẹ. Rẹ deba imuegbe-bhi-ibẹẹ, bha ki ha mhọn iziẹngbe. Rẹ deba iziẹngbe, bha ki wo re ọkhọle rebhe ha ga Osẹnobulua.* 7 Rẹ deba oga nọnsẹbha, bha ki ha mhọn ẹkẹ-ẹjẹjẹ da ibhio bha. Rẹ deba ẹkẹ-ẹjẹjẹ nin bha mhọn da ibhio bha, bha ki ha mhọn oyẹẹ. 8 Ahamiẹn bha mhọn ene ikpẹ nan, sẹyẹ, bha wo manman ha re ele man, ilẹnmhin nọn gbale ọsi Jesu Kristi nin bha mhọnlẹn ki rẹkpa bha rẹ wo ha lu re alo. Bha ki yẹ wo ha sasa.

9 Ahamiẹn ọria imhọn ene ikpẹ nan, ọruẹlo ọle khin. Ọne ọria gue ẹlo nọnsọle nin ọle hẹi daghe ẹfua. Ọle yele a ebi a rẹ kpe ọle khia yẹ bhi olukhọ nin ọle lu bhi ẹghe nọn gbera. 10 Ibhio, beji a miẹn ghe Osẹnobulua tie bha yẹ zẹ ibha, bha manman wẹnna kaka beji a ha da miẹn ghe, emhin nọn zẹle nin ọle da tie bha sẹ ibha obọ. Ahamiẹn bha wo dọnmhegbe rẹ ha mhọn ene ikpẹ nan, bha ida de. 11 Bhi ọsi ẹmhọanta, ahamiẹn bha lu ene emhin nan, Osẹnobulua ki manman nan erọnmhọn nin bha, ye re otọ nin bha rẹ nabhi Agbejele nọnsi Jesu Kristi nin Ebeanlẹn mhan, nọn yẹ yi Ọmiẹnmhanfan. Ọne Ejele dẹ tọ sẹbhi ighegheghe.

12 Ọnan zẹle nin mẹn da wo guanọ nin mẹn ha ye bha ene emhin nan re, arẹmiẹn bha ka lẹn ele, yẹ manman rẹọ bhi ọne ẹmhọanta nin bha luẹle. 13 Beji mẹn sẹyẹ ribhi ọne ibọkpọ nan, mẹn riale emhin nọn khẹke nọn nin mẹn rẹ wo ha ye bha egbe re, 14 ranmhude mẹn lẹnmhin ghe mẹn dẹ kẹ sibhi ọne ibọkpọ nan re. Jesu Kristi nin Ebeanlẹn mhan bhọ yẹ re ọnan man mẹn. 15 Mẹn dẹ wo ha dọnmhegbe nin mẹn rẹ ha ye bha ene emhin nan re, beji a ha da miẹn, mẹn ha ki kpanọ fo, bha ki sabọ tobọbha ha ye ele re.

16 Ẹmhọn nin mhan taman bha rẹji ahu nọnsi Jesu Kristi nin Ebeanlẹn mhan, bi ebi ọle ha rẹ zegbere* yẹ bha ha yi okha ohoghe. Ọ iyi mhan tobọmhan mhanmhanlẹn. Sokpan, mhan re ẹlo mhan daghe uyi nọnsọle. 17 Osẹnobulua nin Aba mhan, ọle re uyi bi ọghọ nanlẹn. Ọnan da sunu bhi ẹghe nin Osẹnobulua nin Osẹ nọn manman mhọn uyi rẹ ta ene ẹmhọn nan man ọlẹn. Ọle da yọle: “Ọmọn nọnsẹmhẹn khọnan, nin imẹn hoẹmhọnlẹn, nin imẹn yẹ re obọ nan.” 18 Mhan re ehọ nesẹmhan họn ene ẹmhọn nan nin ukpuru nabhi okhun ta, bhi ẹghe nin mhan rẹ deba ọle ha ribhi uke oke nọn khiale.

19 Ọnan zẹle nin mhan da wo manman rẹọbhọ ghe ọta akhasẹ rebhe nesi Osẹnobulua dẹ munsẹ. Bha wo lu nọnsẹn nin bha rẹ ha ria ẹmhọn ọne ọta akhasẹ. Bha ji ọle ha bhaa bhi ẹkẹ ọkhọle nọnsẹbha, beji ukpa rẹ bhaa bhi ẹkẹ ebiuki. Bha wo ji ọle ha yi iriọ, rẹ sẹbhi ẹghe nin ẹdẹ ha rẹ we, bi ẹghe nin ọne ahiẹnhiẹn nọn bhala ọsewewiẹ ha rẹ zegbere. 20 Bha ka lẹn ghe ọta akhasẹ soso iribhi Ebenọnkhiale nin ọria tobọle ta. 21 Ọ iyi obọ eria akhasẹ na vae, Osẹnobulua hi ọnọn noo eria rẹ kha akhasẹ. Ẹlinmhin nọn khiale nọnsọle ọle rẹ dia ele.

2 Ọkpakinọn, akhasẹ ohoghe da yẹ ha ribhi ẹwẹ ele. Iriọ ẹbho ne man iman-emhin ohoghe ha yẹ rẹ ha ribhi ẹwẹ bha. Ene ẹbho nan ki fẹkẹ ha man emhin ne ha si iwaegbea re, bi emhin ne ha wẹghẹ urẹọbhọ nọnsẹbha a. Ele bhọ ki he Ebeanlẹn mhan nọn dẹ ele kiere. Iriọ ele ha rẹ si ugbekhuelo ji egbe ele. 2 Ẹbho ne bunbun ki rẹkhan ele, yẹ ha lu ilọnmhọn okan* nin ele lu. Ranmhude uwedẹ nin ele rẹ lu emhin, ẹbho ki ha re unun ji uwedẹ oga ọsi ẹmhọanta. 3 Sẹyẹ, ele ki ha re ọta ohoghe rẹ hiẹ bha ranmhude ẹlobhiamhin nọnsele. Ọkpakinọn, a mhanmhan ibhuohiẹn nọnsele fo, ọ ida riia ẹghe a, ọ dẹ kẹ bu ele re.

4 Osẹnobulua bhọ bha zẹ ene ẹhi ne lu khọlọ obọ. Ọle da re oya nin ele. Ọle da muno ele fiọbhi Tatarọs.* Ọle da mun ele fiọbhi ighan* bhi ẹkẹ ebiuki. Ele khẹ ibhuohiẹn nọnsele. 5 Sẹyẹ, ọle bha zẹ eria ne lu khọ bhi ẹghe ẹdẹlẹ obọ. Ọle da re oya nin ele. Ọkpakinọn, ẹghe nin ọle rẹ re okpamẹn rẹ fuẹn ẹbho ne imhẹn an, ọle da gbega Noa nọn wo ha taman ẹbho uwedẹ nọn gbale nọnsi Osẹnobulua. Ọle da yẹ gbega itue ihinlọn ebhebhe. 6 Osẹnobulua da yẹ bhuohiẹn gbe agbaẹbho ọsi Sodọm bi Gomora. Ọle da re eranlẹn rẹ fuẹn ele a sẹsẹsẹ. Ọle da re ọnan rẹman ebe ha sunu ji eria ne imhẹn bhi ẹghe odalo. 7 Ọkpakinọn, ọle da miẹn Lọt fan. Lọt wo ha lu emhin nọn gbale. Ẹki okan* nin ene ẹbho ha do da wo manman ha sọnnọn ọlẹn. 8 Ẹghe nin Lọt rẹ ha nyẹnlẹn bhi ẹwẹ ibhokhan Sodọm bi Gomora, ukpẹdẹ-ukpẹdẹ ọle rẹ wo ha kiẹ egbe, ranmhude emhin oya nin ọle ha re ẹlo daghe, bi ọta oya nin ọle ha họn. 9 Bhiriọ, Jehova* lẹn ebi ọle ha rẹ miẹn ẹbho ne ga ọle fan yẹ bhi ekpokpo. Bhi obọ nọnkẹle, ọle zẹ eria ne imhẹn obọ khẹ ẹghe nin ọle ha rẹ fuẹn ele a bhi ukpẹdẹ ibhuohiẹn, 10 manman nọn, ẹbho ne mun ẹbho riia a, bi ẹbho ne imun ekpẹn nin ene ribhi ihe.

Ofẹn imun ele, ebe ghọn ele ele lu. Ofẹn bhọ imun ele rẹ ha re unun ji ene Osẹnobulua re uyi nan. 11 A bhọ rẹ miẹn ghe, ene ẹhi mhọn ahu nẹ ele, ene ẹhi bha re unun ji ele. Ele bha lu ọnan, ranmhude, ele mun ekpẹn nin Jehova.* 12 Bhi obọ nọnkẹle, ene ikpea nan wo ha talọ sankan-sankan bhi ẹmhọn nin ele bha lẹn otọ ọle. Ele diabe elanmhẹn ne iwanlan, nan gheghe biẹ beji a ha da miẹn ele mun yẹ gbono ele a. Uwedẹ nin ele rẹ lu emhin dẹ si ugbekhuelo ji ele. 13 Uwedẹ nọn imhẹn nin ele rẹ lu emhin dẹ si ikuan-egbe ji ele.

Ọ wo yẹẹ ele rẹ ha sọnyẹnmhẹn, yẹ lu ebe ghọn ele. Ele bhọ ki ha lu ene emhin nan bhi odanmhẹn. Itọn bi abhiolo ele khin. Ọ manman wo yẹẹ ele rẹ ha re iman-emhin ohoghe rẹ hiẹ ẹbho, beji ele rẹ deba bha le ebale. 14 Oghẹ ọkpa ri ele bhi ẹlo. Ele isabọ re obọ sibhi emhin ebe re. Ele ki ha hiẹ ẹbho ne bha deziẹn. Ene ikpea nan manman mhọn ẹlobhọ. Eria nan fi ele unun ele khin. 15 Ele sibhi ọne uwedẹ nọn diale re. Ele bibi khian. Ele re egbe khọkhọ Belam nin ọmọn nọnsi Biọ, nọn lu emhin ebe ranmhude elele nin ọle ha miẹn bhọ. 16 A da re adia nanlẹn nin ọle rẹ gbobọrauhi nọnsi Osẹnobulua. Arẹmiẹn elanmhẹn isabọ talọ, elanmhẹn nan rẹ hẹ ihẹ da re urulu ọsi ọria rẹ nanlẹn talọ. Ọne elanmhẹn bha ji ọne akhasẹ da lu emhin uhuki nin ọle rẹ ha khian dọ lu.

17 Ene eria nan diabe ẹdẹ nin amẹn da ka, bi okhun nọn rẹ hore, nin ahoho hoho kua. Ẹkpa-ebiuki nọn ki sẹ so ebiuki a nẹ, ọle a ha muno ele fiọ. 18 Ele ki ha ta okpọta, ọkpakinọn, elele iribhi emhin nin ele ta. Ele ki ha do ẹki okan,* yẹ re emhin nin egbe guanọ ha yẹẹ ẹbho. Inian ele rẹ hiẹ ẹbho. Ele ki yẹ re ele fikie dọ ha lu emhin ebe nin ele da ka re obọ kie. 19 Ele taman ene ẹbho nan ghe, ele dẹ sabọ ha lu emhin bọsi eria ne nyan egbe ele. Ọkpakinọn, igbọn ọsi emhin ebe ele tobele bhọ khin. Ọria nọn hi ki rẹ khin nọn ji ọria ọbhebhe ha dia ọle, igbọn ọsi ọne ọria nin ọle khin.* 20 Ilẹnmhin nọn gbale nọnsi Jesu Kristi nin Ebeanlẹn mhan, nọn yẹ yi Ọmiẹnmhanfan rẹkpa ele rẹ re obọ sibhi emhin ne imhẹn nin ọne agbọn nan lu re. Ahamiẹn ene ẹbho nan kie fikie dọ ha lu ene emhin nin ele da ka re obọ kie, yẹ ji ene emhin nan ha dia ele, idia nin ele ha ki ha ye dẹ khọ gbera ọne ele ka ha ye. 21 Sade ele bha dọ lẹn uwedẹ ọsi ikhiale hiehie, ọle ha rẹ mhẹn ele bhi egbe nẹ. Ọle ha rẹ mhẹn gbera ghe ele lẹn ọne uwedẹ fo yẹ van obọ sibhọre dọ ha gbobọrauhi, uhi ne khiale nan ne nin ele. 22 Ọne itan nan da munsẹ bhi egbe ele: “Ọne awa fikie dọ ha le ekpa nin ọle kpa, ọne une nan khọ a kie dọ ha fuẹn bhi oro.”*

3 Ibhio mẹn nin mẹn hoẹmhọnlẹn, ebe nọnzi eva khọnan nin mẹn gbẹn ji bha. Beji mẹn ka lu bhi ebe nin ọhẹnhẹn, mẹn ho nin mẹn re ọne ebe nan rẹ ye bha emhin eso re, beji a ha da miẹn bha ki sabọ ha ria eria nyan ene emhin nan nọnsẹn. 2 Mẹn guanọ nin bha yere ẹmhọn nin ene akhasẹ ne khiale ka ta bhi otọ. Mẹn yẹ guanọ nin bha yere uhi nin Ebeanlẹn imhan nin Ọmiẹnmhanfan gbe nin bha, rẹ na obọ ene ukọ nan je bu bha. 3 Emhin ọhẹnhẹn nin mẹn ho nin bha lẹn, ọle hi ghe, bhi ẹghe ọkike, ẹbho ne re emhin zọojiẹ dẹ ha rẹ bha zọojie. Ele ki ha lu ebe ghọn ele. 4 Ele ki ha yọle: “Ọnọn yọle ọle dẹ vae* ki bho nian? Rẹ na bhi ẹghe ọsi aba mhan nin ẹdẹlẹ rẹ dọ sẹbhi ọne ẹghe nan, emhin soso bha fidenọ. Beji emhin dia rẹ na otọ ha de, ọle ọ sẹyẹ ye.”

5 Ele bha ho nin ele yere ghe, otọ bi okhun ka ha ribhọ bhi ẹghe nọn gbera. Ọne otọ da na bhi ẹkẹ amẹn zegbere, ọ da ha ribhi adesẹ amẹn. Ọta nọnsi Osẹnobulua re ene emhin nan ha ribhọ. 6 Ene emhin nin, ele a rẹ fuẹn ọne agbọn nin an, bhi ẹghe nin okpamẹn rẹ rọ. 7 Osẹnobulua yẹ yọle ghe, otọ bi okhun nọn ribhọ nian, ọle dẹ re eranlẹn tuẹ ele a. Ọle zẹ ele obọ khẹ ukpẹdẹ ibhuohiẹn, bhi ẹghe nin ọle ha rẹ fuẹn eria ne imhẹn an.

8 Ibhio mẹn ne dan mẹn, ọkhẹke nin bha lẹn sẹbhọ ghe, ikpe uli bhi ẹlo nọnsẹmhan, ọle hi ukpẹdẹ ọkpa bhi ẹlo nọnsi Jehova.* Sẹyẹ, ukpẹdẹ ọkpa bhi ẹlo nọnsọle, ọle hi ikpe uli bhi ẹlo nọnsẹmhan. 9 Ẹbho eso riale ghe Jehova* riia ẹghe a nin ọle rẹ mun ive nọnsọle sẹ. Ọkpakinọn, ọ iyi iriọ, iziẹngbe ọle mhọn da bha, ranmhude, ọle guanọ nin ẹbho rebhe fidenọ. Ọle bha guanọ nin ọria soso miẹn ugbekhuelo. 10 Ukpẹdẹ nọnsi Jehova* dẹ re osukpa vae, beji oyi rẹ na ọria bhi uwa. Ọne ukpẹdẹ nin, okhun ki siegbe kie. Ọ ki ha so beji ọ rẹ siegbe kie. Emhin ne ribhọ ki manman ha ghan, e ki nianlan an. Ọne otọ nan bi emhin ne ribhọ ki yẹ to a.*

11 Beji a miẹn ghe, inian a ha rẹ fuẹn ene emhin nan an, bha manman ha ria ẹmhọn unan ọria nọn khẹke nin bha ha khin. Bha ha yi eria ne nyẹn iẹnlẹn nọn khiale, bha ha yẹ ha lu emhin ne ha rẹman ghe, ọkhọle rebhe bha rẹ ga Osẹnobulua. 12 Bha ha khẹ ukpẹdẹ nọnsi Jehova,* bha yẹ wo mun ọkhọle ọbhọ. Bhi ọne ukpẹdẹ nin, a dẹ re eranlẹn tuẹ okhun an. Emhin ne ribhọ ki nianlan ranmhude uwedẹ nin ijerebhe ha rẹ ha ghan! 13 Ọkpakinọn, Osẹnobulua vele ghe, otọ ọsọgbọn bi okhun ọsọgbọn dẹ ha ribhọ. Ọnin mhan ki khẹ. Bhi enin, ẹbho rebhe dẹ ha lu ebe gbale.

14 Bhiriọ, ibhio, beji a miẹn ghe bha khẹ ene emhin nan, bha manman dọnmhegbe nin bha rẹ ha mhọn ọfure, yẹ ha yi eria nin okan iri ele bhi egbe rẹ sẹbhi ẹghe nin ọle ha rẹ vae. 15 Rẹ deba ọnin, bha lẹn sẹbhọ ghe, beji bha ha da miẹn uhọnmhọn, ọle zẹle nin Ebeanlẹn imhan da ha mhọn iziẹngbe. Ọnan hi ẹmhọn nin Pọl nin obhio mhan nọn dan mhan ka yẹ re ẹwanlẹn nin Osẹnobulua re nanlẹn rẹ gbẹn ji bha. 16 Ọle wo ha ta ene ẹmhọn nan bhi lẹta rebhe nin ọle gbẹn. Ọkpakinọn, ẹmhọn eso ne ribhi ene ilẹta bha lẹkhẹ nan rẹ lẹn otọ ọle. Eria ne bha lẹn sẹ, bi eria nin urẹọbhọ nọnsele bha ziẹn, wo ha fi ene ẹmhọn nan uhọnmhọn kotọ. Iriọ ele yẹ rẹ fi ẹmhọn rebhe nọn ribhi Ebenọnkhiale uhọnmhọn kotọ. Ọnan dẹ re ele miẹn ugbekhuelo.

17 Ibhio mẹn ne dan mẹn, beji a miẹn bha ki ka lẹn ene emhin nan, bha ha babegbe, nan hẹi dọ miẹn ghe, ene eria nan ne ire obọ rẹkhan uhi re iman-emhin nọnsele rẹ hiẹ bha, yẹ rẹ bha ha beghe. 18 Sokpan, bha dọnmhegbe nin bha rẹ ha nyẹnlẹn bhi uwedẹ nin Osẹnobulua ha da manman ha mhọn ifuẹkẹ da bha. Bha yẹ wo ha wanre bhi ilẹnmhin nọnsi Jesu Kristi nin Ebeanlẹn mhan nọn yẹ yi Ọmiẹnmhanfan. Uyi hi ọsi ọle re na bhi ejayenan nian rẹ sẹbhi ighegheghe. Isẹ.