EBE ỌHẸNHẸN NỌNSI PITA

1 Imẹn nin Pita, ọkpa bhi etuegbe nesi Jesu Kristi gbẹn ọne ebe nan ji ibhio mhan ne ribhi Pọntọs, Galesha, Kapadosia, Esia, bi Bitinia. Eriọbhe bha khin bhi ọne agbọn nan. Enanzẹle bha khin. 2 Osẹnobulua nin Aba imhan, ọle hi ọnọn zẹ ibha ọbhi otọ yẹ re ẹlinmhin nọn khiale nọnsọle rẹ kpe ibha khia beji bha ha da ha yi eria ne hẹnmhọn nanlẹn, nan yẹ khakha aranlẹn nọnsi Jesu Kristi nyan.

Mẹn bhii nin Osẹnobulua manman mhọn ifuẹkẹ da bha yẹ re ọfure nin bha.

3 Ogẹn hi ọsi Osẹnobulua nin Aba Jesu Kristi nin Ebeanlẹn mhan. Ranmhude itohan nọn khua nin ọle mhọn da mhan, ọle da lu ọle nan kie biẹ mhan, beji mhan ha da ha mhọn ikhuaẹloghe ọsi ighegheghe. Ọnan da sabọ sẹ imhan bhi obọ ranmhude ariọkpanọ ọsi Jesu Kristi. 4 Ọle da re uku nọn ida sabọ wea nin mhan. Ọne uku nan ida riia, ọ ida fo. Ọne uku nan khẹ bha bhi okhun, 5 ibha nin Osẹnobulua re ahu nọnsọle rẹ gbega ranmhude urẹọbhọ nọnsẹbha. Ọle da gbega bha beji bha ha da sabọ miẹn umiẹnfan. Osẹnobulua dẹ kẹ re otọ ọne umiẹnfan nan man bhi ẹghe ọkike. 6 Ranmhude ọnan, bha wo ghọnghọn, arẹmiẹn ghe bhi ejayenan nian, bhi obhi ẹghe khere, bha miẹn ọkakale kẹkẹ bhi egbe. 7 Ene ọkakale nan dẹ re urẹọbhọ nọnsẹbha deziẹn. Urẹọbhọ nọnsẹbha ki ghan gbera igolu, ranmhude, igolu dẹ sẹyẹ fuẹn an aharẹmiẹn a re eranlẹn ziẹn ọlẹn. Ọne urẹọbhọ nan ki rẹ bha miẹn uyi, ogẹn, bi ọghọ bhi ẹghe nin Jesu Kristi ha rẹ zegbere. 8 Arẹmiẹn ibha bha sẹka miẹn ọlẹn khẹ, bha da hoẹmhọn ọlẹn. Arẹmiẹn bha idaghe ọle nian, bha da yẹ mhọn urẹọbhọ da ọle. Bha da wo manman ha ghọnghọn yẹ manman ha sọnyẹnmhẹn, 9 ranmhude, bha lẹnmhin ghe urẹọbhọ nin bha mhọnlẹn dẹ rẹ bha miẹn umiẹnfan.

10 Ene akhasẹ ne tẹmhọn ọne ifuẹkẹ nọn khua nin Osẹnobulua mhọn da bha da manman gua otọ ẹmhọn ọne umiẹnfan nan. 11 Osẹnobulua ka re ẹlinmhin nọn khiale nọnsọle rẹ taman ele ghe Kristi dẹ loya, sẹyẹ, a dẹ re uyi nanlẹn. Ranmhude ọnan, ele da wo ha guanọ otọ ọle beji ele ha da lẹn ẹghe nin ene emhin nan ha rẹ sunu ji ọle. 12 Osẹnobulua da rẹkpa ele rẹ lẹn ghe ọne uhọnmhunje nin ele ha wewe bha rẹtẹ ele, ghe ibha ọ rẹtẹ. Ọne uhọnmhunje nin ele ha wewe, ọle hi ọne ọta esili nan re ahu ẹlinmhin nọn khiale nọn na obọ Osẹnobulua vae rẹ wewe man bha. Ene ẹhi bhọ wo ha guanọ nin ele lẹn otọ ene emhin nan.

13 Bhiriọ, bha muegbe nin bha rẹ miẹnsọn. Bha ji ẹwanlẹn gba nin bha. Bha mun ọkhọle ọbhi ifuẹkẹ nọn khua nin Osẹnobulua ha mhọn da bha bhi ẹghe nin Jesu Kristi ha rẹ zegbere. 14 Ẹghe nin ibha bha rẹ lẹn Osẹnobulua, bha da ha lu emhin nin egbe nọnsẹbha guanọ. Beji a ki miẹn imọn ne hẹnmhọn nin Osẹnobulua ibha ki khin nian, bha hẹi yẹ ji ene emhin ne imhẹn nan ha dia bha. 15 Bha re egbe khọkhọ Ọnọn Khiale, nọn tie bha, bha ha yẹ kiẹn eria ne khiale bhi emhin rebhe nin bha lu. 16 Ebenọnkhiale yọle: “Ọkhẹke nin bha ha yi eria ne khiale, ranmhude, Osẹ nọn khiale mẹn khin.”

17 Osẹnobulua nin Aba mhan ibhuohiẹn eku. Emhin nin ọdeọde lu ọle rẹ bhuohiẹn ọlẹn. Beji a miẹn ọle ibha sotie, bha ha lu emhin ne ha rẹman ghe bha mun ofẹn ọlẹn bhi obhi ẹghe khere nin bha ha gbe bhi ọne otọ nan. 18 Ẹghe nin Osẹnobulua rẹ miẹn ibha fan bhi uwedẹ iẹnlẹn nin elele iye, nin aba ibha nin ẹdẹlẹ man bha le, ọ iyi emhin ne sabọ wea ọle noolo. Ọle bha noo igolu la isiliva. 19 Ọkpakinọn, aranlẹn nọn manman ghan nọnsi Kristi, nọn diabe aranlẹn ọsi ohuan nin egbe gba nan, ọle Osẹnobulua rẹ miẹn bha fan. 20 Rẹ na otọ ha de, ọle a rẹ zẹ ọle ọbhi otọ, ọkpakinọn, ẹghe ọkpẹnlẹn ọsi ọne agbọn nan, ọle a rẹ re ọle man beji ọle ha da rẹkpa bha. 21 Ọle hi ọnọn rẹkpa bha dọ lẹn Osẹnobulua. Osẹnobulua hi ọnọn riọ ọle kpanọ bhi uu yẹ re uyi nanlẹn beji bha ha da mhọn urẹọbhọ da Osẹnobulua yẹ mun udu nyan ọlẹn.

22 Ẹmhọanta nin bha re obọ rẹkhan rẹkpa bha rẹ kpe egbe ibha khia. Ranmhude ọnan, bha ki mhọn oyẹẹ ọsaje. Ejayenan nian, bha wo re ọkhọ rebhe rẹ manman hoẹmhọn ibhio bha. 23 Ọta nọnsi Osẹnobulua nọn nyẹnlẹn bhi ẹdẹdẹmhẹndẹ re ibha kiẹn eria nan kie biẹ. Ikpẹ nọn biẹ ibha iyi ikpẹ nọn sabọ wea, ikpẹ nọn isabọ wea nọn. 24 Beji Ebenọnkhiale tale, “inian eria rebhe diabe ilunmhun. Uyi nọnsele da diabe aroro ne ribhọ. Ene ilunmhun ha yuno, ene aroro ki khakha kua. 25 Bhi obọ nọnkẹle, ọta nọnsi Jehova* dẹ ha ribhọ rẹ sẹbhi ighegheghe.” Ọne “ọta” nan, ọle hi ọta nọn mhẹn nan wewe man bha.

2 Bhiriọ, bha re obọ sibhi emhin ebe rebhe re. Bha rẹban ohoghe, eku, oyadan,* bi ọta-ike. 2 Bha ji ọta nọn khiale nọnsi Osẹnobulua ha ghọn bha, beji amẹn-inyẹn rẹ ghọn ọmọn nan la biẹ. Ọne ọta nan dẹ sabọ rẹkpa bha rẹ wanre yẹ miẹn umiẹnfan. 3 Bha dẹ sabọ lu ọnan, ranmhude bha luẹ kere ghe, Ebeanlẹn imhan manman mhọn ifuẹkẹ.

4 Jesu hi ọne udo nọn nyẹnlẹn nin eria hele. Ọkpakinọn, Osẹnobulua da zẹ ọle yẹ re ẹlo nọn ghanlẹn ghe ọle. Ranmhude bha mhọn urẹọbhọ da ọne udo nan, 5 bha da yẹ kiẹn udo ne nyẹnlẹn. A da re ahu ẹlinmhin nọnsi Osẹnobulua rẹ bọn ibha okhun bọsi uwa. Beji bha ha da na obọ Jesu Kristi ha zọese nin Osẹnobulua ha miẹn ọbhi egbe. 6 Ebenọnkhiale yọle: “Ghọle, mẹn mhọn udo kpataki nin mẹn zẹle, nin mẹn rẹ gba ayotọ bhi Zaiyọn. Udo nọn ghanlẹn nọn. Ọria nọn hi ki rẹ khin nọn mhọn urẹọbhọ da ọle, ẹkhọle ida lo ọle.”

7 Ẹlo nọnsẹbha ọle da yi udo nọn ghanlẹn, ranmhude, eria ne mhọn urẹọbhọ bha khin. Rẹji ene imhọn urẹọbhọ, ọ iyi iriọ. Ebenọnkhiale bhọ da yọle: “Ọne udo nin ene bọn uwa hele, ọle ki kiẹn udo kpataki nọn mun ọne uwa mhọnlẹn.”* 8 Sẹyẹ, “Ọle hi ọne udo nọn dua ẹbho oẹ nọn yẹ re ẹkẹ khọ ẹbho.” Ranmhude nin ele bha rẹ lu rẹkhan ọta nọnsi Osẹnobulua, ọle zẹle nin ele da ha dua ọe bhi ọne udo. A ka tale ghe ọnan hi ebe ha sunu ji ele. 9 Bhi obọ nọnkẹle, “eria nan zẹle bha khin. Osẹnobulua da rẹ bha kiẹn ijie bi ohẹn. Ọle da rẹ bha kiẹn agbaẹbho nọn khiale, bi ẹbho kpataki nọnsọle beji bha ha da dọ ha wewe umhẹnmhin nọnsọle.” Ọle hi ọnọn zẹ ibha ne sibhi ebiuki re, yẹ ne bha vae bhi ẹfua. 10 Khẹkhẹ, ibha bha rẹ ha yi ẹbho nesi Osẹnobulua, ọkpakinọn, ejayenan nian, bha kiẹn ẹbho nesọle. Ọle bha rẹ ka mhọn itohan da bha, ọkpakinọn, ejayenan nian, ọle wo mhọn itohan da bha.

11 Ibhio mẹn nin mẹn hoẹmhọnlẹn, bha lẹnmhin ghe, erunmhunyẹn bi eriọbhe bha khin bhi ọne agbọn nan. Bhiriọ, bha rẹban emhin nin egbe nọnsẹbha guanọ. Ene emhin nan ebi bha ne dan. 12 Bha ha nyẹnlẹn nọnsẹn bhi ọne agbọn nan, beji a ha da miẹn ghe, ẹbho ha rẹ yọle ibha imhẹn, ele ki sẹyẹ ha daghe emhin esili nin bha lu. Ọnan ki re ele re ogẹn ji Osẹnobulua bhi ukpẹdẹ nin ọle ha dọ bhuohiẹn.

13 Bha degbere nin eria ne ribhi ihe, ranmhude ọnan hi ebi Ebeanlẹn mhan guanọ. Bha degbere nin ọnojie, ranmhude ọria nọn ribhi ihe nọn khua ọle khin. 14 Bha degbere nin ene gbẹloghe, ranmhude, a ne ele ọbhi ihe nin ele ha re oya nin eria ne ilu nọnsẹn, yẹ ha gẹn ene lu nọnsẹn. 15 Osẹnobulua guanọ nin bha ha lu nọnsẹn, beji a da miẹn ghe, bha ki re ẹkhọle lo* eria ne iwanlan ne re unun ji bha, ranmhude ele bha lẹn sẹ. 16 Eria nan fan fia bha khin. Ọkpakinọn, bha hẹi re isẹhoa nin bha mhọnlẹn rẹ ha lu emhin ebe. Bha re ọle ha ga Osẹnobulua. 17 Bha ha mun ekpẹn nin ẹbho rebhe. Bha hoẹmhọn ibhio bha rebhe nin bha ko ga. Bha ha mun ofẹn Osẹnobulua, bha yẹ ha mun ekpẹn nin ọne ojie.

18 Ọkhẹke nin ene igbọn ha degbere nin ebeanlẹn nọnsele, ele ha yẹ ha mun ofẹn ele. Ọ iyi ene lu ele nọnsẹn, ne yẹ re ẹwanlẹn lu emhin ọkpa ele ha degbere nan, ọ yẹ khẹke nin ele ha degbere nin ene emhin ikẹ ti ele bhọ. 19 Ahamiẹn ranmhude, ọria ho nin ọle lu ebe ti Osẹnobulua bhọ, ọle zẹle nin ọle da miẹn ọkakale bhi egbe, la, ọle zẹle nan da lu ọle khọlọ, Osẹnobulua dẹ re ẹlo esili ghe ọne ọria. 20 Ahamiẹn emhin ebe uwẹ lu nọn zẹ nan da re oya nin uwẹ, uwẹ ha rẹ ziẹngbe ọle, uwẹ bha lu okpemhin. Ọkpakinọn, ahamiẹn ranmhude emhin esili nin uwẹ lu ọle zẹle nin uwẹ da ha loya, Osẹnobulua dẹ re ẹlo esili ghe uwẹ.

21 Bhi ọsi ẹmhọanta, ọne uwedẹ iẹnlẹn nan, ọle Osẹnobulua tie bha nin bha dọ rẹkhan. Kristi tobọle bhọ da loya nin bha. Ọle da re ijiẹmhin ọbhi otọ nin bha, beji bha ha da dọnmhegbe rẹ rẹkhan ukpoẹ nin ọle zẹle. 22 Ọle bha lu emhin ebe soso. A bha miẹn ohoghe bhi unun nọnsọle. 23 Ẹbho rẹ ha ghunmhun ọlẹn, ọle bha ghunmhun ele haosa. Ọle rẹ ha loya, ọle bha ha nyan-yo-nyan-re. Ọkpakinọn ọle da zẹ ọne ẹmhọn obọ nin Osẹnobulua nọn bhuohiẹn nọn gbale. 24 Ọle da re egbe nọnsọle rẹ hẹ olukhọ nọnsẹmhan, a da gbọle a bhi okhun oran. Ọle da lu iriọ beji a ha da miẹn ghe, mhan ki ha nyẹn iẹnlẹn nọn khiale, mhan iyẹ da ha lu emhin ebe. “Itẹ nan zẹ ọle bhi egbe, ọle a rẹ re egbe daan bha.” 25 Bha ka rẹ diabe ihuan ne bibi odẹ. Bhi ejayenan nian, bha fikie bu ọnọn sun bha, nọn yẹ gbẹloghe bha.

3 Bhiriọ sẹyẹ, ene amhẹn, bha ha degbere nin ọdọ ibha. Aharẹmiẹn eso ribhi ẹwẹ ele ne ire obọ rẹkhan ọta nọnsi Osẹnobulua, uwedẹ nin bha rẹ lu emhin sabọ rẹkpa ele rẹ dọ ha re obọ rẹkhan ọta nọnsi Osẹnobulua, aharẹmiẹn ibha bha re unun si ele. 2 Ele ha daghe uwedẹ esili nin bha rẹ nyẹnlẹn, bi ekpẹn nọn dinmhin nin bha mun nin ele, ọnan sabọ rẹkpa ele rẹ fidenọ. 3 Bha hẹi ji ose nọnsẹbha gheghe ha yi ọsi ukinegbe. Ọ iyi nan rẹ gheghe ha lu unan eto kẹkẹ, nan rẹ ha sino igolu ọbhi egbe, la nan rẹ ha yo ukpọn ne mhọn-ose. 4 Ọkpakinọn, ji ose nọnsẹ ha yi ọsi ẹkẹ ọkhọle. Ha yi ọria nọn fu, nọn yẹ degbere. Ọnan hi ose nọn ida fafaa. Ose nọn sẹ inian, ọle ti Osẹnobulua bhọ. 5 Inian ene ikhuo ne khiale ne ga Osẹnobulua bhi ẹghe nọn gbera rẹ ha ho ose. Ele da wo ha degbere nin ọdọ ele, 6 beji Sera rẹ ha hẹnmhọn nin Ebraham. Ọle da ha tie ọle ebeanlẹn ọlẹn. Ahamiẹn bha wo ha lu emhin esili yẹ ha re izebhudu man, bha ki ha yi imọn nesọle.

7 Bhiriọ sẹyẹ, ibha nin ọdọ, bha ha re ilẹnmhin* rẹ ne ikhuo bha nyẹnlẹn. Ikhuo bha ziẹn sẹ bii ibha. Bhiriọ, bha ha mun ekpẹn ele bhi egbe beji a rẹ re obọ ekpẹn mun ukpamanku nọn guọghọ. Ele dẹ deba bha miẹn iẹnlẹn nan rẹ lu ẹsele nin bha. Ahamiẹn ibha bha mun ekpẹn ele bhi egbe, Osẹnobulua ida họn erọnmhọn nọnsẹbha.

8 Bhi ọkike ọle ibhio mẹn, ibha rebhe ha mhọn ọkhọle ọkpa. Bha ji ẹmhọn ibhio bha rẹtẹ bha. Bha hoẹmhọn egbe, bha ha mhọn ẹkẹ-ẹjẹjẹ, bha ha yẹ ha re idegbere man. 9 Bha hẹi re ọbe rẹ haosa ọbe. Bha hẹi ghunmhun ọria nọn ghunmhun ibha. Ọria ha lu bha khọlọ, bha re emhin esili rẹ ha ọle osa. Ọnan zẹle nan da tie bha. Bha ha lu iriọ, Osẹnobulua ki nan erọnmhọn nin bha.

10 Ebenọnkhiale yọle, “Ahamiẹn ọria hoẹmhọn iẹnlẹn, sẹyẹ, ọle guanọ nin ọle ha ghọnghọn bhi iẹnlẹn, ọkhẹke nin ọle gbega unun nọnsọle. Ọle ida ha ta ọta nọn imhẹn la bha ohoghe. 11 Ọle ki re obọ sibhi emhin ebe re, ọle ki ha lu emhin esili. Ọle ki ha yi ọria nọn guanọ ọfure. Ọle ki manman ha khu ọbhi ọfure. 12 Ẹlo nọnsi Jehova* ribhi egbe ọsi eria ne khiale. Ọle yẹ kaehọ erọnmhọn nọnsele. Bhi obọ nọnkẹle, Jehova* he eria ne lu emhin ebe.”

13 Bhi ọsi ẹmhọanta, ọria soso ida sabọ kuan bha sade bha wo re ọyaya ha lu emhin esili. 14 Aharẹmiẹn ibha loya ranmhude nin bha rẹ ha lu emhin esili, bha dẹ yẹ ha ghọnghọn. Sokpan, bha hẹi ji emhin nọn re ofẹn mun ele yẹ re ofẹn ha mun bha,* la nin bha ha kpokpo egbe. 15 Ọkpakinọn, bha mun ekpẹn nin Kristi bhi ọkhọle nọnsẹbha, bha ha yẹ ha ghe ọle bii Ebeanlẹn ibha. Bha muegbe nin bha rẹ re ewanniẹn nin ọria nọn hi ki rẹ khin nọn ho nọn lẹn ebezẹle nin bha da rẹọ bhi ebi bha rẹọ i. Sokpan, bha re ẹkẹ nọn fu bi ekpẹn nọn dinmhin rẹ lu ọle.

16 Bha ha nyẹnlẹn nọnsẹn bọsi edibo nesi Kristi, beji bha ha da ha mhọn ọkhọle nọn khiale. Ẹghenin, bha ki sabọ re ẹkhọle lo ẹbho ne re unun riia bha a. 17 Ahamiẹn Osẹnobulua re otọ nin bha rẹ loya ranmhude ibha lu emhin esili, ọle mhẹn nẹ ghe ibha loya ranmhude ibha lu emhin ebe. 18 Kristi bhọ da yu ọbhi olukhọ ọsi eria osukpa ọkpa. Ọle nin ọria nọn khiale da yu nin eria ne bha khia beji ọle ha da sabọ dia bha bu Osẹnobulua. Egbe efun ọle ha mhọnlẹn ẹghe nan rẹ gbe ọle a, ọkpakinọn, ọle da kiẹn ẹlinmhin ẹghe nan rẹ riọ ọle kpanọ. 19 Ẹghe nan rẹ riọ ọle kpanọ fo, ọle da dọ wewe uhọnmhunje ọsi ibhuohiẹn man ene ẹhi ne ribhi ighan. 20 Ene ẹhi nan hi ene mhọn akan-ehọ da Osẹnobulua bhi ẹghe nin ọle rẹ ha ziẹngbe bhi ẹghe ọsi Noa. Ọne ẹghe nin Noa rẹ ha kanọ okọ. Ikpeta ẹbho, itue elẹnlẹn, ele ọkpa miẹn uhọnmhọn bhi okpamẹn nọn rọle.

21 Mhan dẹ sabọ re ebe sunu bhi ẹghe ọsi Noa rẹ khọkhọ imianmẹn. Ọne imianmẹn nan wo ha miẹn ibha fan ranmhude ariọkpanọ ọsi Jesu Kristi. Imianmẹn ikpe itọn si ọria bhi egbe re, ọkpakinọn, mhan re ọle bhii Osẹnobulua nin ọle re ọkhọle nọn khiale nin mhan. 22 Jesu da diọbhi okhun. Ejayenan nian, ọle dotua bhi obera nọnsi Osẹnobulua. Osẹnobulua da khua ọle okhun gbera ene ẹhi bi ene ribhi ihe.

4 Beji a miẹn ghe Kristi loya ẹghe nin ọle rẹ ha ribhi ọne agbọn nan, bha yẹ muegbe nin bha rẹ loya, ranmhude ọria nọn loya bhi ọne agbọn nan, rẹman ghe ọle re obọ sibhi emhin ebe re. 2 Bhiriọ, ọne ọria iyẹ da re ẹghe nọn kẹre nin ọle ha gbe bhi ọne agbọn nan rẹ ha lu ebi egbe nọnsọle guanọ. Ọle ki re ọle ha lu iho nọnsi Osẹnobulua. 3 Ẹghe nin bha rẹ lu iho ọsi ọne agbọn nan sẹriọ. Bhi ọne ẹghe nin, bha da ha nyẹn iẹnlẹn okan.* Ebe imhẹn da wo ha yẹẹ bha. Bha da ha da anyọn gbe, bha da ha lu idujie ọsi ẹbibi, bha da ha da anyọn gbe egbe,* bha da yẹ wo manman ha ga ẹbọ. 4 Ọ wo han ele ilo ghe ibha bha yẹ deba ele ha do ẹki okan. Ranmhude ọnan, ele da ha re unun ji bha. 5 Kristi dẹ bhuohiẹn ene ẹbho nan bhi emhin nin ele lu. Ọle hi ọnọn ha bhuohiẹn ene yulu bi ene nyẹnlẹn. 6 Bhi ọsi ẹmhọanta, ọnan zẹle nan da yẹ tẹmhọn Osẹnobulua man ene yulu, beji a ha da miẹn aharẹmiẹn eria re uwedẹ nin eria rẹ ghe emhin rẹ bhuohiẹn ele, bhi ẹlo nọnsi Osẹnobulua, ele ki sabọ dọ ha nyẹnlẹn, yẹ ji ẹlinmhin nọnsi Osẹnobulua ha dia ele.

7 Ọkpẹnlẹn ọsi emhin rebhe sire. Bhiriọ, bha ji ẹwanlẹn gba nin bha, bha ha yẹ wo ha nan erọnmhọn ẹghe rebhe. 8 Rẹ deba ene emhin nan, bha manman hoẹmhọn egbe, ranmhude, ahamiẹn ọria mhọn ahoẹmhọn-egbe, ọle ki muegbe nin ọle rẹ rẹhunmhan, aharẹmiẹn igba ne bunbun a lu ọle khọ. 9 Bha wo ha miẹn ẹbho ọbhi egbe, bha hẹi ha zaka zunyọn ọbhọ. 10 Ẹsele nọn hi ki rẹ khin nin bha mhọnlẹn, bha re ọle rẹ ha rẹkpa egbe. Bha wo ha lu iriọ, ranmhude eguọmhandia nesi Osẹnobulua bha khin. Ọle noo bha rẹ re ifuẹkẹ nọnsọle man ẹbho. Uwedẹ kẹkẹ ọle rẹ re ọne ifuẹkẹ nan man. 11 Ahamiẹn ghe ọria talọ, ji a miẹn ghe ebi ọle ta rẹman ghe uhọnmhunje nọn na obọ Osẹnobulua vae ọle tẹmhọnlẹn. Ahamiẹn ghe ọria miẹnsọn rẹ rẹkpa ẹbho, ji ọle mun udu tẹ Osẹnobulua nọn re ahu nanlẹn rẹ lu ọle, beji a ha da miẹn ghe, bhi emhin rebhe, a ki ha re ogẹn ji Osẹnobulua rẹ na obọ Jesu Kristi. Uyi bi ahu ọsi Osẹnobulua rẹ sẹbhi ighegheghe. Isẹ.

12 Ibhio mẹn nin mẹn hoẹmhọnlẹn, bha hẹi ji ọ han ibha ilo ghe bha kuẹlo da ekpokpo nọn nyọn bii eranlẹn. Ranmhude, ọ iyi ebi a bha sẹ ka miẹn khẹ. 13 Ọkpakinọn, bha wo ji ọ re ibha ha ghọnghọn, ranmhude, ebe re Kristi loya, ọle yẹ zẹ nin bha da ha loya. Bha ha lu iriọ, eghọnghọn dẹ gbe bha udu a bhi ẹghe nin Kristi ha rẹ zegbere. 14 Ahamiẹn ghe ranmhude elin nọnsi Kristi ki zẹ nan da ha re unun ji ibha, bha wo ha ghọnghọn, ranmhude ẹlinmhin nọnsi Osẹnobulua, nọn yi ẹlinmhin ọsi uyi ne ibha.

15 Ọkpakinọn, ọ bha khẹke nan miẹn ghe ranmhude bha gbugbele, la bha dọ ra, la bha lu emhin ebe, la bha dọ ha mun unun bhi ọta non bha rẹtẹ bha, ọle ki zẹ nin bha da ha loya. 16 Sokpan, ahamiẹn ghe ranmhude nin bha rẹ yi Kristiẹn ọle zẹ nin bha da ha loya, bha hẹi ji ẹkhọle ha lo bha, bha wo ha gẹn Osẹnobulua, bha ha yẹ wo ha nyẹnlẹn bọsi ene rẹkhan Jesu. 17 Ọne ẹghe a ye nian nin ibhuohiẹn ha rẹ munhẹn. Uwa nọnsi Osẹnobulua ọ ha da munhẹn. Ahamiẹn imhan ọ rẹ munhẹn, be ha ki sunu ji ẹbho ne bha lẹn Osẹnobulua? 18 Ebenọnkhiale yọle ghe, ahamiẹn ghe ọ bha lẹkhẹ nin ọria nọn lu ebe gbale rẹ miuhọnmhọn, be ha ki sunu ji ene iga Osẹnobulua, bi ene lu emhin ebe? 19 Bhiriọ, ji eria ne loya ranmhude nin ele rẹ ha lu iho nọnsi Osẹnobulua sẹyẹ wo ha lu emhin esili, ele ha yẹ ze egbe obọ nin Osẹnobulua, ranmhude, ọle hi Aman nọn man emhin rebhe, mhan dẹ sabọ mun udu nyan ọlẹn.

5 Ọkpa bhi ene ewanlẹn imẹn khin. Ẹlo mẹn sẹ bhi oya nin Kristi le. Mẹn yẹ deba ene ha miẹn uyi nọn vade. Bhiriọ, mẹn bhii ene ewanlẹn ne ribhi ẹwẹ bha: 2 Bha ha sun ihuan nesi Osẹnobulua nan mun bha bhi obọ. Bha ha dia ele.* Bha hẹi ha lu ọle bọsi eria nan sua ọbhọ, sokpan, bha re ọkhọle rebhe ha lu ọle nin Osẹnobulua. Bha hẹi re ọle ha lu ọsi egbe bha, ọkpakinọn, bha wo re ọhubhudu ha lu ọle. 3 Bha hẹi ha le ọba nyan* ẹbho nesi Osẹnobulua. Sokpan, bha ha yi ijiẹmhin esili rẹji ene ihuan nan. 4 Ẹghe nin ọne ọsun-ohuan nọn khua ha rẹ vae, ọle ki re uyi* nọn ha tọ sẹbhi ighegheghe rẹ re ihaosa nin bha.

5 Bhiriọ sẹyẹ, ibha nin usẹn, bha degbere nin ene wanre.* Ọkpakinọn, ibha rebhe re idegbere ha ne egbe lu emhin, ranmhude, ẹmhọn eria ne tengbemun iti Osẹnobulua bhọ. Bhi obọ nọnkẹle, ọle manman mhọn ifuẹkẹ da eria ne mhọn idegbere.

6 Bhiriọ, bha degbere nin Osẹnobulua* nin Osẹ nọn mhọn ahu. Bha ha lu iriọ, ọle ki tuẹn bha okhun sade ẹghe sẹle. 7 Bha zẹ ekpokpo rebhe nesẹbha obọ nanlẹn, ranmhude, ẹmhọn bha rẹtẹ ọle. 8 Bha ha wanlan, bha yẹ ha babegbe. Ojuu nin oghian bha khian nẹga bọsi oduman nọn wo ha so. Ọle wo guanọ ọria nin ọle ha gbe le. 9 Ọkpakinọn, bha mundia nanlẹn suan, bha ha yẹ deziẹn bhi urẹọbhọ nọnsẹbha. Bha lẹn sẹbhọ ghe ibhio bha ne ribhi otọ agbọn rebhe yẹ wo ha kuẹlo da ekpokpo ne sẹ inian. 10 Ọkpakinọn, bha ha ki loya bhi obhi ẹghe khere, Osẹnobulua nọn manman fuẹkẹ, nọn tie bha nin bha dọ ha mhọn uyi ọsi ighegheghe rẹ na obọ Kristi, dẹ man bha emhin sotọ. Ọle ki mun bha ziẹn, ọle ki mun bha toto, ọle ki yẹ rẹkpa bha rẹ mundia nọnsẹn. 11 Ahu hi ọsọle rẹ sẹbhi ighegheghe. Isẹ.

12 Sivanọs* nin obhio mhan nin imẹn gbaẹkẹ ọle, ọle rẹkpa mẹn gbẹn ọne ilẹta nan. Mẹn da fẹkẹ gbẹn ọlẹn kuẹi nin mẹn rẹ re izebhudu nin bha, yẹ rẹkpa bha rẹ lẹn ghe Osẹnobulua wo manman mhọn ifuẹkẹ da bha. Bha hẹi ji ọne ifuẹkẹ ba bha ku. 13 Ọne okhuo nọn ribhi Babilọn,* nin Osẹnobulua zẹle beji ọle yẹ rẹ zẹ ibha, je otuẹ ibha. Mak nin ọmọn nọnsẹmhẹn yẹ je otuẹ ibha. 14 Bha tuẹ ọdeọde mun egbe nọnsẹn.*

Mẹn bhii nin bha rebhe ne kugbe deba Kristi ha mhọn ọfure.