EBE NỌNSI JEMIS

1 Jemis nin ọguọmhandia nọnsi Osẹnobulua bi ọsi Jesu Kristi nin Ebeanlẹn mhan gbẹn ọne ebe nan ji ene ulin-uwa igbeva ne ribhi ije kẹkẹ.

Bha doo!

2 Ibhio mẹn, bha wo ha ghọnghọn ẹghe nọn hi ki rẹ khin nin bha rẹ miẹn ọnọghọ kẹkẹ, 3 ranmhude, bha lẹnmhin ghe, a ha re inian dọnmhẹn urẹọbhọ nọnsẹbha, ọ dẹ rẹkpa bha rẹ ha mhọn iziẹngbe. 4 Ọkpakinọn, ọkhẹke nin bha ziẹngbe sotọ, beji a ha da miẹn ghe bha ki gba fo bhi uwedẹ rebhe, bha ida ha mhọn eji ọ da kẹ bha re.

5 Ahamiẹn ọria soso ribhi ẹwẹ bha nọn guanọ nin ọle ha wanlan, ji ọle wo ha bhii Osẹnobulua nọn re ẹwanlẹn nanlẹn. Osẹnobulua dẹ re nanlẹn, ranmhude ọle manman zẹ emhin bhi obọ, ọle igbe ọria okan. 6 Ọkpakinọn, ọkhẹke nin ọne ọria rẹọbhọ ghe, Osẹnobulua dẹ họn erọnmhọn nọnsọle. Ọ bha khẹke nin ọle ha mhọn edandan. Inian ọria nọn mhọn edandan diabe okpẹdẹ nin ahoho fiyo-fire. 7 Ọria nọn sẹ iriọ hẹi ha riale ghe, ọle dẹ miẹn emhin soso bhi obọ Jehova.* 8 Ọle bha lẹn ebi ọle guanọ, ẹghe rebhe ọle rẹ fi ọkhọle denọ.

9 Bha ji ibhio mhan ne yi ibhioguele ha ghọnghọn, ranmhude, Osẹnobulua tuẹn ele okhun. 10 Ji ibhio mhan ne fele yẹ ha ghọnghọn, ranmhude, a si ele ke otọ. Beji aroro rẹ khakha kua, iriọ ene fele ha rẹ siegbe kie. 11 Ovuẹn ha nyan re, nọn da manman zẹ, ọ ki tuẹ ebe bi ilunmhun an. Aroro ne ribhọ ki khakha kua, ose ọsi ene aroro ki fafaa. Iriọ ọria nọn fele ha yẹ rẹ yu fia, beji ọle rẹ khu ẹfe khian.

12 Ọria nọn wo ha ziẹngbe ekpokpo dẹ miẹn eghọnghọn, ranmhude, ọle ha sabọ ziẹngbe sotọ, ọle dẹ miẹn iẹnlẹn* nin Jehova* ve nin ene hoẹmhọn ọlẹn. 13 Ahamiẹn ọria ribhi ekpokpo, ọle hẹi yọle: “Osẹnobulua dọnmhẹn imẹn,” ranmhude, a ire emhin ebe rẹ dọnmhẹn Osẹnobulua, ọle iyẹ re emhin ebe rẹ dọnmhẹn ọria. 14 Emhin ne yẹẹ ọria, ele kiẹn ufi rẹji ọle. Ene emhin nan kiẹn edọnmhẹn rẹji ọle. 15 Ọne ọria ha ki zẹ ria ẹmhọn ọne emhin nọn yẹẹ ọle, ọ ki re ọle dọ lu olukhọ. Ọne olukhọ nin ọle lu ki si uu ji ọle.

16 Ibhio mẹn ne dan mẹn, bha hẹi ji ọria soso hiẹ bha. 17 Emhin esili rebhe bi ẹsele ne mhẹn rebhe, obọ Aba mhan nọn ribhi okhun ọ na vae. Ọle hi ọnọn man ovuẹn bi uki bi ene ahiẹnhiẹn. Ọle ifidenọ beji adudu rẹ fidenọ. 18 Iho nọnsọle nọn, nin ọle rẹ re iman-emhin ọsi ẹmhọanta rẹ re iẹnlẹn nin mhan, beji mhan ha da ha yi eria ọhẹnhẹn nan zẹle bhi ẹwẹ eria nin ọle manlẹn.

19 Ibhio mẹn nin mẹn hoẹmhọnlẹn, ọkhẹke nin bha lẹn ọnan: Bha wo ha gbehọkotọ nọnsẹn, bha hẹi kẹ ha talọ bhi ẹmhọn. Bha hẹi ji ohu kẹ ha re bha, 20 ranmhude ohu ida re ọria lu emhin nọn gbale bhi ẹlo nọnsi Osẹnobulua. 21 Bhiriọ, bha rẹban emhin ebe rebhe, bi emhin rebhe ne ditọn an. Bha degbere ji Osẹnobulua kọ ọta nọnsọle ọbhi ọkhọle nọnsẹbha. Ọne ọta nan dẹ sabọ miẹn ibha fan.

22 Ahamiẹn bha gheghe họn ọta nọnsi Osẹnobulua, ọkpakinọn ibha bha lu rẹkhan ọlẹn, egbe ibha bha hiẹ. 23 Ahamiẹn ọria họn ọta nọnsi Osẹnobulua, nin ọle bha da lu rẹkhan ọlẹn, inian ọle diabe okpea nọn ghe egbe ọle bhi ughegbe. 24 Ọle fẹ egbe ọle ghe fo, ọle da kpanọ. Ọle da wo re ẹjẹje yele a ebi ọle dia yẹ. 25 Ọkpakinọn, ahamiẹn ọria wo ha luẹ ọne uhi nọn rẹ mhan kiẹn eria nan fan fia, nin ọle da yẹ ha lu rẹkhan ọlẹn, ọle ki kiẹn ọria nọn lu rẹkhan ebi ọle họn. Ọle ida ha yi ọria nọn yele ebi ọle họnlẹn an. Ọle ki ha ghọnghọn bhi emhin nin ọle lu.

26 Ahamiẹn ọria yọle ọga-Osẹnobulua ọle khin, nin ọle bha da sabọ dia olanmhẹn nọnsọle, egbọle ọle hiẹ. Ọ iyi Osẹnobulua ọle gene ga. 27 Oga nin Osẹnobulua nin Aba mhan ghe ọle oga nọn khiale, ọle hi, nin mhan rẹ gbẹloghe imọn ne iyẹ mhọn aba bi inẹn, nin mhan rẹ rẹkpa ikhuo ne iyẹ mhọn ọdọ, sade ele ribhi ọkakale, bi nin mhan rẹ re egbe nẹ bhi ilọnmhọn ọsi ọne agbọn nan.

2 Ibhio mẹn, bha ida sabọ yọle ibha gene mhọn urẹọbhọ da Jesu Kristi nin Ebeanlẹn mhan sade ibha lu ẹbho eso nọnsẹn yẹ re ẹlo gbe enekẹle a. 2 Ji a yọle ghe ikpea eva dọ deba bha bhi eji bha da ha do ikolo, ọkpa bhọ da yọ ukpọn nọn mhọn-ose a, yẹ ne olika nan re igolu lu ọbhi obọ. Ọnọnkẹle nọn yi obhioguele da yọ ukpọn nọn imhẹn bhi ẹlo. 3 Ibha dẹ be re ẹlo esili ghe ọnọn yọ ukpọn nọn mhọn-ose a, yẹ taman ọlẹn yọle, “Dotua bhi ọne aga nin nọn ribhi eje mhọn-ose,” yẹ taman ọnọnkẹle nọn bha fe yọle, “Mundia bhi enin” la, “Uwẹ sabọ dotua bhi otọ bhi egbegbe ijoko nin mẹn ne oẹ nyan”? 4 Ahamiẹn ebi bha lu khọnan, ọ rẹman ghe ibha munhẹn ha lu ẹbho eso nọnsẹn gbera enekẹle. Ọ yẹ rẹman ghe eria ne bhuohiẹn eku ibha khin.

5 Ibhio mẹn, bha ka mẹn ehọ. Eria nin ọne agbọn nan ghe ọle ibhioguele, ele Osẹnobulua zẹle nin ele dọ ha mhọn urẹọbhọ, yẹ le uku ọsi Agbejele, nin ọle ve nin eria ne hoẹmhọn ọlẹn. 6 Ọkpakinọn, ibha re ẹlo gbe ene ibhioguele nan an. Ọ ibe yi ene fele denyẹnyẹn ibha, yẹ muno ibha yo ikotu? 7 Ọ ibe yi ele be re unun riia ọne elin nọn mhẹn nin Osẹnobulua re nin mhan an? 8 Ebenọnkhiale yọle, “Hoẹmhọn ibo ẹ beji uwẹ rẹ hoẹmhọn egbe ẹ.” Ahamiẹn ibha wo ha lu rẹkhan ọne uhi nan nin ojie gbele, ebe mhẹn ibha wo ha lu riọ. 9 Ọkpakinọn, ahamiẹn ibha sẹyẹ wo ha lu ẹbho eso nọnsẹn, yẹ zọn ẹbho nekẹle, emhin ebe ibha wo ha lu riọ, sẹyẹ, ibha kiẹn ọgbuhia.

10 Bhi ọsi ẹmhọanta, ọria ha rẹ re obọ rẹkhan emhin rebhe nin ọne Uhi tale, ọkpakinọn, ọle da re obọ gbera ọkpa bhi ẹwẹ ele, ọle ki kiẹn ọria nọn gbobọra ene uhi rebhe. 11 Ọnọn yọle, “Hẹi gboghẹ,” ọle yẹ yọle, “Hẹi gbugbele.” Ọkpakinọn, ahamiẹn ghe uwẹ bha gboghẹ, ghe ugbele uwẹ gbe, ọgbuhia uwẹ yẹ khin riọ. 12 Ẹbho nan fan fia ibha khin. Uhi ọsi eria nan fan fia, ọle a ha rẹ bhuohiẹn ibha. Bhiriọ, bha ha ji uwedẹ nin bha rẹ lu emhin bi ọta nin bha ta rẹman ghe eria nan fan fia bha khin. 13 Ọria nan miẹn ghe ọ imhọn itohan da ẹbho, a ida yẹ mhọn itohan da ọle sade a bhuohiẹn ọlẹn. Itohan, ọle ke okhun nẹ ibhuohiẹn.

14 Ibhio, ahamiẹn ghe ọria yọle ghe ọle mhọn urẹọbhọ, nin ọle bha da lu emhin ne ha rẹman ghe ọle mhọn ọne urẹọbhọ, ọnin iyi emhin soso. Urẹọbhọ nọn sẹ iriọ ida sabọ miẹn ọlẹn fan. 15 Ji a yọle obhio mhan nin okpea, la obhio mhan nin okhuo bha miẹn ukpọn yọ, sẹyẹ, ọle bha miẹn ebale ukpẹdẹ le. 16 Bhiriọ, ọle da bu uwẹ re. Ọkpakinọn, uwẹ da taman ọlẹn yọle, “Ha khian, egbe fu ẹ re; uwẹ dẹ miẹn ebale le, uwẹ dẹ yẹ miẹn ukpọn yọ.” Sokpan, uwẹ rẹ ta ene ẹmhọn nan, uwẹ bha re ukpọn nan ọlẹn yọ, la re ebale nanlẹn le. Be bhọ ebi uwẹ tale ha rẹ sabọ rẹkpa ọle yẹ? 17 Iriọ yẹ nọn. Ọria ha yọle ghe ọle mhọn urẹọbhọ, nin ọle bha da lu emhin esili rẹ re ọle man, ihoho nọn.

18 Ọrẹyiriọ, ọria sabọ rẹ yọle: “Uwẹ mhọn urẹọbhọ, imẹn lu iwẹnna esili. Be uwẹ ha rẹ sabọ re urẹọbhọ nọnsẹ man mẹn yẹ, sade uwẹ bha lu iwẹnna esili? Imẹn dẹ re iwẹnna esili nesẹmhẹn rẹ rẹman ẹn ghe imẹn mhọn urẹọbhọ.” 19 Uwẹ rẹọbhọ ghe, Osẹnobulua ọkpa sẹsẹ ribhọ, emhin nọn mhẹn khọnin. Sokpan, lẹn sẹbhọ ghe, ene ẹlinmhin-ebe yẹ rẹọbhọ ghe, Osẹnobulua ọkpa sẹsẹ ribhọ. Ofẹn ọlẹn mun ele. 20 Uwẹ nin okpea nọn bha lẹn eji a ye, uwẹ bha be lẹn ghe, ọria ha yọle ghe ọle mhọn urẹọbhọ, nin ọle bha da lu iwẹnna esili rẹkhan ọlẹn, ihoho nọn? 21 Ẹghe nin Ebraham nin aba mhan rẹ re Aiziki nin ọmọn nọnsọle ze bhi ukhuo-izọese fo, ọle a rẹ tiọle ọria nọn khiale. A da tiọle ọria nọn khiale ranmhude ebi ọle lu. 22 Ọ khia bhi ẹlo ghe, Ebraham wo re ebi ọle ha lu rẹ rẹman ghe ọle mhọn urẹọbhọ. Ene emhin nin ọle lu, da wo re urẹọbhọ nọnsọle gba fo. 23 Ọnan zẹle nin Ebenọnkhiale da yọle: “Ebraham da mhọn urẹọbhọ da Jehova,* bhiriọ, Osẹnobulua da tiọle ọria nọn khiale.” Rẹ deba ọnin, a da ha tiọle ọmọẹ Jehova.*

24 Ọ khia bhi ẹlo ghe, ọria nọn lu iwẹnna esili rẹ re urẹọbhọ nọnsọle man, ọle a ha tiọle ọria nọn khiale, ọ iyi ọria nọn gheghe yọle ọle mhọn urẹọbhọ. 25 Iriọ ọ yẹ ha khin bhi egbe Rehab nin agbilẹ. Ọle da miẹn ene ukọ nan jere ọbhi egbe, yẹ je ele kpanọ bhi uwedẹ ọbhebhe. Ranmhude ebi ọle lu nan, a da tiọle ọria nọn khiale. 26 Bhi ọsi ẹmhọanta, ọria nin ẹlinmhin* iyẹ ri ọle bhi egbe yulu. Iriọ ọ yẹ dia rẹji urẹọbhọ. Ahamiẹn ọria yọle ghe ọle mhọn urẹọbhọ, ọkpakinọn, ọle bha da lu iwẹnna esili, ihoho urẹọbhọ nọnsọle khin.

3 Ibhio mẹn, ọ iyi ibha rebhe ọkhẹke ne ha man emhin, ranmhude, imhan ne man emhin ibhuohiẹn nọnsele ha kaka nẹ. 2 Ẹghe-ẹghe imhan rebhe rẹ dobọ. Ahamiẹn ghe ọria ribhọ nọn idunun, ọria nọn gba nan ọle khin. Ọle sabọ dia egbe nọnsọle rebhe. 3 Mhan re uri gba akasi unun beji ọle ha da ha hẹnmhọn nin mhan. Mhan ki re ọne uri ha dia ọne akasi diọbhi eji mhan guanọ. 4 Bha yẹ ria ẹmhọn okọ nọn ribhi ẹdẹ. Arẹmiẹn ghe ọ manman kpọnọ, sẹyẹ, okpahoho sua ọle, obhi emhin khere nan rẹ gua ọle, ọle ọria nọn gua ọne okọ rẹ dia ọle diọbhi eji ọ hi ki rẹ khin nin ọle ho nin ọle diọ i.

5 Iriọ yẹ nọn, arẹmiẹn olanmhẹn dia khere bhi egbe, ọ manman wo dẹgbọ. Obhi eranlẹn khere, ọle tuẹ udede ẹgbo a. 6 Inian olanmhẹn nọnsẹmhan diabe eranlẹn. Obọ ọkpa bhi egbe nọnsẹmhan nin emhin ebe wo manman vuọn, ọle olanmhẹn khin. Ọ re okan sin obọ nekẹle bhi egbe, yẹ re eranlẹn ọbhi iẹnlẹn ọsi ọria. Gẹhẹna,* ọle re eranlẹn ọbhọ. 7 Elanmhẹn iribhọ nin eria isabọ dia. Ele sabọ dia elanmhẹn rebhe, ọ ha rẹ ha yi elanmhẹn ẹwẹ, la ene lẹnlẹn bhi otọ, la afianmhẹn, la elanmhẹn ne ribhi ẹdẹ. 8 Ọkpakinọn, ọria iribhọ nọn sẹ sabọ dia olanmhẹn nọnsọle. Ọlanmhẹn manman wo bebe, obi yẹ vuọn ọlẹn. Ọ yẹ si ikuan-egbe re. 9 Ọne olanmhẹn nin mhan rẹ gẹn Jehova* nin Aba mhan, ọle mhan yẹ rẹ ghunmhun ẹbho nin Osẹnobulua man bhi arẹkhọkhọ nọnsọle. 10 Unun nin mhan rẹ nan erọnmhọn, ọle mhan yẹ rẹ ghunmhun ihẹn.

Ibhio mẹn, emhin nọn sẹ inian bha khẹke. 11 Amẹn nọn ji a wọn bi amẹn nọn iji a wọn ida sabọ ha na bhi ijanlẹn ọkpa dagbare. 12 Ibhio mẹn, eran fig imọn ikpẹ oliv, sẹyẹ, a irọ fig bhi ikperan anyọn. Iriọ sẹyẹ nọn, a ida sabọ miẹn amẹn nọn mhẹn bhi ẹdẹ nan da miẹn amẹn-umhẹn.

13 Ahamiẹn ọria nọn wanlan, nọn yẹ mhọn ilẹn-otọ-emhin ribhi ẹwẹ bha, ji ọle re ene ikpẹ nan man bhi uwedẹ esili nin ọle rẹ lu emhin. Ji ọle re idegbere rẹ ha lu emhin beji ọria nọn wanlan rẹ lu emhin. 14 Sokpan, ahamiẹn ghe bha mhọn oyadan* bi ọkhọle nan rẹ ne egbe suan,* bha hẹi yẹ gheghe ha dẹgbọ yẹ bha ohoghe ghe bha wanlan. 15 Ọ iyi ẹwanlẹn nọn na obọ Osẹnobulua vae bha mhọn. Ẹwanlẹn ọsi ọne agbọn nan bha mhọn, ẹwanlẹn nọn re ẹbho lu emhin bọsi elanmhẹn, ẹwanlẹn nin ene ẹlinmhin-ebe mhọnlẹn. 16 Ranmhude eji ẹbho da mhọn oyadan* bi eji ẹbho da ne egbe suan,* ọle a da miẹn ozughu bi emhin ebe rebhe.

17 Ahamiẹn ọria mhọn ẹwanlẹn nọn na obọ Osẹnobulua vae, ọle ki ha yi ọria nọn khiale. Ọnan hi ikpẹ ọhẹnhẹn nọn khẹke nin ọle ha mhọnlẹn. Rẹ deba ọnin, ọle ki ha yi ọria nọn khu ọbhi ọfure, ọria nọn re ekpẹn-ekpẹn lu emhin, ọria nọn hẹnmhọn nin Osẹnobulua. Ọle ki ha yi ọria nọn mhọn itohan, ọria nọn lu emhin ne mhẹn. Ọle ida ha bhuohiẹn eku. Ọle ida ha yi ọria nọn re ikpunun ga. 18 Ene khu ọbhi ọfure, ele ha sabọ miẹn elele bhi emhin esili nin ele lu, ranmhude, eji ọfure ye, ọle emhin esili da kiọnlẹn.

4 Bezẹle nin bha da khọnlẹn? Bezẹle nin bha da gbegbe? Emhin ebe ne ri bha bhi ọkhọle, nin bha ne dan, ele si bha ọbhi ọnan. 2 Bha guanọ emhin kẹkẹ, ọkpakinọn ene emhin bha sẹ ibha obọ. Arẹmiẹn bha wo ha gbe ugbele, sẹyẹ, bha ji emhin ọsi ibo bha ha sa bha bhi ẹlo, emhin nin bha guanọ bha sẹ ibha obọ. Bha wo gheghe ha khọnlẹn yẹ gbegbe. Ranmhude ọ iyi Osẹnobulua bha bhii, ọle zẹle ene emhin nin bha guanọ bha da sẹ ibha obọ. 3 Bha bhọ ha rẹ bhii Osẹnobulua le, ọle ida rẹ nin bha, ranmhude, emhin ebe bha guanọ nin bha re ọle lu. Bha ho nin bha re ọle lu ebi egbe nọnsẹbha guanọ.

4 Agbilẹ* bha khin. Ibha bha be lẹn ghe ọria ha deba ọne agbọn nan lu ọmọẹ, ọle ki kiẹn oghian Osẹnobulua? Ọria nọn hi ki rẹ khin nọn guanọ nin ọle ha yi ọmọẹ ọsi ọne agbọn nan, ọle ki re egbe ọle kiẹn oghian Osẹnobulua. 5 Ibha bha be lẹn ghe emhin zẹle nin Ebenọnkhiale da yọle: “Ọkhọle nọnsẹmhan wo kẹ si mhan ọbhọ nin mhan rẹ ha mhọn ẹlobhọ”? 6 Ọrẹyiriọ, ifuẹkẹ nọn khua nin Osẹnobulua mhọn da mhan rẹkpa mhan rẹ khọn ọne ọkhọle nin. Ebenọnkhiale da yọle: “Ẹmhọn ene tẹngbemun iyẹẹ Osẹnobulua. Bhi obọ nọnkẹle, ọle manman mhọn ifuẹkẹ da eria ne mhọn idegbere.”

7 Bhiriọ, bha degbere nin Osẹnobulua, bha ha ne Ojuu suan. Bha ha lu iriọ, ọle ki nẹ bhi eji ibha ye. 8 Bha sikẹ Osẹnobulua, ọle ki yẹ sikẹ bha. Bha kpe obọ bha khia, ibha ne lu emhin ebe, bha ha yẹ kpe ọkhọle nọnsẹbha khia, ibha ne mhọn edandan. 9 Bha ha viẹ, bha ha wo ha lu akhiẹ. Bha hẹi yẹ jẹ, bha ha viẹ. Bha hẹi yẹ dujie, bha ha lu akhiẹ. 10 Bha degbere nin Jehova,* ọle ki tuẹn bha okhun.

11 Ibhio, bha hẹi yẹ ha re unun riia egbe a. Ọria nọn hi ki rẹ khin nọn re unun riia obhio ọle a, la nọn bhuohiẹn gbe obhio ọle, uhi nọnsi Osẹnobulua ọle re unun riia a, sẹyẹ, ọne uhi ọle bhuohiẹn gbe. Ahamiẹn ghe ọria bhuohiẹn gbe uhi nọnsi Osẹnobulua, ọle re egbe ọle kiẹn ọbhuohiẹn, ọle iyẹ re obọ rẹkhan ọne uhi. 12 Osẹnobulua ọkpa hi Ọnọn Gbuhi Nin Mhan, ọle ọkpa yẹ hi Ọbhuohiẹn nọnsẹmhan. Ọle hi ọnọn ha sabọ fuẹn eria a. Ọle yẹ hi ọnọn ha sabọ hinmhin eria. Họla uwẹ kuẹ khin nin uwẹ da bhuohiẹn gbe ibo ẹ?

13 Eso bhi ẹwẹ bha ki ha yọle: “Ẹlẹnan la akhọ, mẹn dẹ diọbhi agbaẹbho ọbhebhe. Mẹn ki gbe ukpe ọkpa bhi enin, mẹn ki doẹki bhi enin, yẹ manman gbe igho.” 14 Ọkpakinọn ibha bha lẹn ebi ewiẹ ha dia yẹ. Inian bha diabe ebhu nọn bhu re bhi obhi ẹghe khere yẹ siegbe kie. 15 Ebi ọkhẹke nin bha ha ta, ọle hi, “Ọ a ha yi iho* nọnsi Jehova,* mhan dẹ ha ribhi agbọn, la mhan dẹ lu ọnan, la mhan dẹ lu ọnin.” 16 Sokpan, ibha bha lu iriọ. Bha da wo ha tẹngbemun yẹ dẹgbọ. Emhin nọn sẹ inian imhẹn. 17 Ọria ha lẹn ebe mhẹn, nin ọle bha da lu ọle, olukhọ ọle lu.

5 Bha ka mẹn ehọ ibha ne fele. Bha ha viẹ, bha ha lu akhiẹ, ranmhude, ọbalọ bu bha vade. 2 Emhin* nin bha mhọnlẹn wea. Sẹyẹ, ododo le ukpọn nọnsẹbha. 3 Igolu bi isiliva nesẹbha mọntọn an. Ọnan hi ebe ha rẹman ghe bha imhẹn. Ọle yẹ hi ebe ha fuẹn bha a. Ẹfe nin bha khuan ya dẹ diabe eranlẹn bhi ukpẹdẹ nọn kike. 4 Ghọle! eria ne ne ibha khuan emhin ugbo, nin ibha bha ha ele osa viẹ. Jehova* nọn nyan ene eyokulo họn eviẹ nọnsele. 5 Bha da wo manman re ẹfe nọnsẹbha ha sọnyẹnmhẹn. Bha da ha lu ebe ghọn bha bhi ọne agbọn nan. Bha wo le ebale yẹ dia dinyẹn-dinyẹn. Bha diabe ẹmena nan manman re ebale nan beji ọ ha da huhu ọkuẹsẹ a gbe ọle a. 6 Ibha bhuọhiẹn gbe ọria nọn bha lukhọ. Ibha gbe ọria nọn khiale a. Ọnin zẹle nin ẹmhọn bha ida yẹẹ ọle.

7 Ibhio mẹn, bha ziẹngbe sẹbhi ẹghe nin Ebeanlẹn imhan ha rẹ vae.* Bha lẹnmhin ghe ọmungbo mundia khẹ ẹghe nin emhin nin ọle kọle ha rẹ mọn ikpẹ. Ọle ki ziẹngbe khẹ ẹghe nin amẹn nin ọhẹnhẹn bi amẹn nin ọkike ha rẹ rọ. 8 Bha yẹ wo ha ziẹngbe. Bha mundia nọnsẹn, ranmhude, ẹghe nin Ebeanlẹn mhan ha rẹ vae* sire.

9 Ibhio, bha hẹi ha guiẹzọ ibhio bha khian. Bha ha lu iriọ, a dẹ bhuohiẹn gbe ibha. Ghọle! Ọnọn ha bhuohiẹn mhan sire fo. 10 Ibhio, bha re egbe khọkhọ ijiẹmhin esili ọsi ene akhasẹ ne kha akhasẹ bhi elin nọnsi Jehova.* Ẹbho wo manman lu ele khọ. Ele da yẹ wo re iziẹngbe man. 11 Ghọle! eghọnghọn hi ọsi ẹbho ne ziẹngbe. Bha lẹn ebi Jobu rẹ ziẹngbe yẹ. Bha yẹ lẹn ihaosa nin Jehova* re nanlẹn. Ọnan da rẹkpa bha rẹ lẹn ghe Jehova* manman mhọn itohan bi ẹkẹ-ẹjẹjẹ.

12 Ibhio mẹn, rẹ gbera ene emhin nan rebhe, bha rẹban ihẹn nan vẹn. Bha hẹi re ọne otọ nan, la okhun bhi ẹlinmhin, la emhin nọn hi ki rẹ khin rẹ ve ihẹn. Bha ha yọle “Ehe,” bha ji ọle ha yi iriọ. Bha ha yọle “Eye,” bha ji ọle ha yi iriọ, nin bha hẹi miẹn ibhuohiẹn bhi egbe.

13 Ahamiẹn ọria bhi ẹwẹ bha ribhi ọkakale, ji ọle wo ha nan erọnmhọn. Ahamiẹn ọria bhi ẹwẹ bha ghọnghọn, ọle wo ha so illo rẹ gẹn Osẹnobulua. 14 Ahamiẹn ọria bhi ẹwẹ bha khọnmhọn, ọkhẹke nin ọle tie ene ewanlẹn bhi ẹkẹ agbotu. Ene ewanlẹn ki nan erọnmhọn nanlẹn yẹ re abhili gbo ọle bhi elin nọnsi Jehova.* 15 Erọnmhọn nin ele re urẹọbhọ nan ki re egbe daan ọlẹn.* Jehova* ki hinmhin ọlẹn. Sẹyẹ, ọle* ki re olukhọ nin ọle lu hunmhan ọlẹn.

16 Bhiriọ, ahamiẹn bha lu olukhọ, bha tale dagbare, bha ha yẹ nan erọnmhọn nin egbe, beji a ha da miẹn egbe ki daan bha. Erọnmhọn ọsi ọria nọn khiale manman wẹnna. 17 Ọria bii mhan ọle Ẹlaija ha khin. Ọrẹyiriọ, ẹghe nin ọle rẹ manman bhii Osẹnobulua nin amẹn hẹi rọ, amẹn bha gene rọ bhi ikpe ea bi ukhiọnmhẹn. 18 Ọle ki gbo bhii Osẹnobulua nin amẹn rọ, amẹn da gene rọ. Otọ da biẹ ebale.

19 Ibhio, ahamiẹn ghe ọria soso bhi ẹwẹ bha bibi sibhi odẹ ẹmhọanta re, nin ọria ọbhebhe da rẹkpa ọle rẹ fikiere, 20 bha lẹn sẹbhọ ghe, ọne ọria nọn rẹkpa ọluemhiebe rẹ fidenọ, uhọnmhọn ọ hinmhin ọle le. Ọ yẹ rẹkpa ọle rẹ miẹn irẹhunmhan bhi emhin ebe ne bunbun nin ọle lu.