EBE NAN GBẸN JI TAITỌS

1 Imẹn nin Pọl gbẹn ọne ebe nan. Ọguọmhandia nọnsi Osẹnobulua bi odibo ọsi Jesu Kristi mẹn khin. Urẹọbhọ ọkpa imẹn bi enanzẹle ko mhọnlẹn. Sẹyẹ, iwẹnna odibo nin mẹn lu, diẹn mun iman-emhin ọsi ẹmhọanta. Ọne ẹmhọanta nan rẹman uwedẹ nọn khẹke nin mhan rẹ ha ga Osẹnobulua. 2 Ene emhin nan diẹn mun ive ọsi ẹdẹdẹmhẹndẹ nin Osẹnobulua nọn isabọ bha ohoghe ve nin mhan rẹ na otọ ha de. 3 Ẹghe nin ọle rẹyi ki sẹ, ọle da re ọta nọnsọle man, rẹ na obọ iwẹnna itẹmhọn Osẹnobulua nin mẹn ha lu. Osẹnobulua nin Ọmiẹnmhanfan hi ọnọn je imẹn nin mẹn ha lu ọne iwẹnna nan. 4 Taitọs nin ọmọn nọnsẹmhẹn bhi oga mẹn gbẹn ọne ebe nan je.

Mẹn bhii nin Osẹnobulua nin Aba mhan bi Jesu Kristi nin Ọmiẹnmhanfan manman mhọn ifuẹkẹ da ẹ yẹ re ọfure nin uwẹ.

5 Mẹn da zẹ uwẹ obọ bhi agbaẹbho ọsi Krit ranmhude emhin eso ne bha de ọbhọ. Mẹn da taman uwẹ nin uwẹ re ene emhin ọi nọnsẹn. Mẹn da yẹ taman uwẹ nin uwẹ zẹ ikpea eso bhi agbaẹbho rẹ sẹbhi agbaẹbho ne ọbhi ihe ọsi ọwanlẹn bhi agbotu. 6 Zẹ ikpea ne imhọn okan bhi egbe, ne mhọn okhuo ọkpa, nin imọn nesele ribhi oga. Ene imọn ki ha yi imọn ne mun uhọnmhọn bhi odẹ, ne yẹ hẹnmhọn. 7 Beji a miẹn ghe, ọguọmhandia nọnsi Osẹnobulua ọwanlẹn bhi agbotu khin, ọ bha khẹke nin ọle ha mhọn okan bhi egbe. Ọle ida ha yi ọria nọn lu ebe ghọn ọlẹn, ọle ida ha yi ọria nọn kẹ re ohu, ọle ida ha yi ọria nọn da anyọn gbe egbe, ọle ida ha yi ọria nọn khọn okhọn-okhọnlẹn, ọle ida ha yi ọria nọn mhọn ẹlobhiamhin. 8 Ọkhẹke nin ọle ha yi ọria nọn miẹn ẹbho ọbhi egbe, ọria nin emhin esili yẹẹ, ọria nọn mhọn ẹwanlẹn, ọria nọn lu ebe gbale, ọria nọn mhọn asun-rẹkhan, ọria nọn mun egbe ọbhi ibẹẹ. 9 Ọle ki wo ha noo ọta ẹmhọanta sade ọle man emhin, beji ọle ha da sabọ re iman-emhin nọn gbale rẹ re izebhudu nin ẹbho yẹ dia ẹbho ne bha lu rẹkhan ọne iman-emhin.

10 Eria ne bunbun ribhọ ne sọtẹ, manman nọn ene mun ẹmhọn uruẹmhin gba bhi uhọnmhọn. Ele ta ọta nin elele iye yẹ hiẹ ẹbho. 11 Ọkhẹke nan taman ene ẹbho nan nin ele gue unun, ranmhude ele re iman-emhin nọn bha khẹke rẹ wẹghẹ urẹọbhọ ọsi azagba-uwa eso a. Elele nin ele ha miẹn, ọle zẹle nin ele da lu ọle. 12 Obhokhan agbaẹbho nọnsele nọn yi akhasẹ, bhọ da yọle: “Ohoghe ọkpa a miẹn bhi unun ọsi ibhokhan Krit, ele ki ha lu emhin bii elanmhẹn ẹwẹ. Ele imiẹnsọn, ebale-ebale ọkpa ele le.”

13 Ẹmhọanta ọnan wo gene khin. Bhiriọ, wo manman ha re adia nin ele, beji a da miẹn ghe, ele ki mundia nọnsẹn bhi oga. 14 Sẹyẹ, ele ida ha re ehọ bhi okha ohoghe bi uhi kẹkẹ ọsi eria ne ilu emhin rẹkhan ẹmhọanta. 15 Rẹji eria ne khiale, a bha miẹn emhin nọn bha khia. Ọkpakinọn rẹji eria ne sankan an bi eria ne imhọn urẹọbhọ, emhin soso iribhọ nọn khiale, ranmhude ọkhọle bi umueria nọnsele bha khia. 16 Ene eria nan ki ha tale bhi ogbakha ghe, ele lẹn Osẹnobulua. Ọkpakinọn, emhin nin ele lu rẹman ghe, ele bha lẹn ọlẹn. Eria ne sọnnọn ele khin bhi ẹlo nọnsi Osẹnobulua, ranmhude, ele ihẹnmhọn nanlẹn. Bhiriọ, ele bha sẹ eria ne ha lu iwẹnna esili soso.

2 Bhi ọsi uwẹ, ji emhin nin uwẹ man diẹn mun iman-emhin nọn gbale. 2 Ọkhẹke nin ikpea ne wanre ha yi eria ne lu emhin ọbhi oleghe, ne mun emhin ẹgba, ne rẹ ẹwanlẹn lu emhin, ne mhọn iziẹngbe, ne re oyẹẹ man, ne yẹ mun oga mhọn nọnsẹn. 3 Iriọ sẹyẹ, ọkhẹke nin ene ikhuo ne wanre ha nyẹnlẹn bhi uwedẹ nọn ha re ogẹn ji Osẹnobulua. Ele ida ha riia ẹbho elin an, ele ida ha da anyọn gbe egbe, sokpan, ele ki ha man emhin nọn mhẹn. 4 Bhiriọ, ele ki sabọ ha taman ikhuo ne bha sẹ wanre, nin ele hoẹmhọn ọdọ ele bi imọn nesele, 5 nin ele ha re ẹwanlẹn lu emhin, nin ele ha nyẹn iẹnlẹn nọn khiale, nin ele ha miẹnsọn bhi uwa, nin ele ha lu emhin nọnsẹn, nin ele yẹ ha degbere nin ọdọ ele. Ele ha lu iriọ, a ida re unun riia ọta nọnsi Osẹnobulua a.

6 Rẹ deba ọnin, wo ha taman ene usẹn nin ele ha re ẹwanlẹn lu emhin. 7 Wo ha re ijiẹmhin esili ọbhi otọ nin ele bhi emhin nọn hi ki rẹ khin nin uwẹ lu. Wo ha man emhin nọn khiale,* mun ọkhọle ọbhọ. 8 Wo ha noo ọta ne gbale, ọta ne mhẹn. Uwẹ ha lu iriọ, ẹbho ne ne imhan suan ida miẹn emhin soso nọn imhẹn nin ele ha ta mhan bhi egbe. Uwẹ ki re ẹkhọle lo ele. 9 Ọkhẹke nin igbọn ha degbere nin ebeanlẹn nọnsele bhi emhin rebhe, nin ele ha lu ebe ti ele bhọ, nin ele hẹi ha gban ele unun sade ele talọ, 10 nin ele hẹi ha do ele emhin ne. Ọkhẹke nin ele ha yi eria nan gbaẹkẹ ọle bhi emhin rebhe, beji ele ha da re iman-emhin nọnsi Osẹnobulua nin Ọmiẹnmhanfan ha yẹẹ ẹbho.

11 Osẹnobulua wo manman re ifuẹkẹ man. Ọnan da rẹkpa unan ẹbho kẹkẹ rẹ miẹn umiẹnfan. 12 Ọne ifuẹkẹ nan zẹle nin mhan da rẹban uwedẹ iẹnlẹn nọn iyẹẹ Osẹnobulua bi emhin ne yẹẹ ẹbho ne ribhi ẹkẹ agbọn. Ọle yẹ zẹ nin mhan da lu ebe gbale, re ẹwanlẹn lu emhin, yẹ re ọkhọle rebhe ga Osẹnobulua bhi ẹkẹ ọne agbọn* nan, 13 beji mhan rẹ khẹ ẹghe nin emhin nọn mhẹn an nin mhan khuaẹloghe ha rẹ sẹ mhan obọ, bi ẹghe nin Osẹnobulua nọn kpọnọ nẹ bi Jesu Kristi nin Ọmiẹnmhanfan ha rẹ re ahu man. 14 Jesu Kristi hi ọnọn yu nin mhan, beji ọle ha da rẹkpa mhan re obọ sibhi emhin ebe rebhe re. Ọle da yẹ kpe mhan khia nin mhan ha yi ẹbho kpataki nesọle, ne yẹ re ọhubhudu lu iwẹnna ne mhẹn.

15 Wo ha man ẹbho ene emhin nan. Ha re izebhudu nin ele, uwẹ ha yẹ wo ha re adia nin ele, ranmhude, a re ahu nin uwẹ rẹ lu iriọ. Hẹi ji ọria soso re ẹlo gbe uwẹ a.

3 Wo ha taman ele nin ele ha degbere nin ene gbẹloghe, bi ene ribhi ihe, ele ha yẹ ha hẹnmhọn nin ele. Ha taman ele nin ele yẹ wo muegbe nin ele rẹ ha lu iwẹnna esili, 2 Yẹ taman ele nin ele hẹi re unun ji ọria soso, nin ele hẹi ha lu ẹmhọn, sokpan, nin ele ha re ekpẹn-ekpẹn lu emhin, ele ha yẹ re ẹkẹ nọn fu ha ne ọrebhe lu emhin. 3 Ẹghe ka ha ribhọ nin mhan tobọmhan bha rẹ ha re ẹwanlẹn lu emhin. Mhan da ha mhọn akan-ehọ, mhan da ha bibi, mhan da kiẹn igbọn rẹji ọlẹnlẹnbhegbe bi emhin nin egbe nọnsẹmhan guanọ, mhan da ha lu emhin ebe kẹkẹ yẹ mhọn oyadan.* Mhan da ha nyẹn iẹnlẹn nọn sọnnọn. Mhan da yẹ he ibo mhan.

4 Ọkpakinọn, ẹghe nin Osẹnobulua nin Ọmiẹnmhanfan rẹ mhọn ifuẹkẹ da mhan yẹ re oyẹẹ man mhan, 5 ọle da re amẹn nin ọle rẹ khọ mhan an rẹ re iẹnlẹn nin mhan. Ọle da yẹ re ẹlinmhin nọn khiale rẹ re imhan kiẹn eria ọsọgbọn. Ọ iyi ọsi ghe mhan mhọn emhin esili nin mhan lu, nọn zẹle nin ọle da lu ọnan nin mhan. Itohan ọle mhọn da mhan. 6 Ọle da manman biri ẹlinmhin nọnsọle nyan mhan, rẹ na obọ Jesu Kristi nin Ọmiẹnmhanfan. 7 Ọle da lu iriọ beji a da miẹn ghe, mhan ki kiẹn eria ne ha le uku ọsi iẹnlẹn ọsi ighegheghe. Ifuẹkẹ nọn khua nin Osẹnobulua mhọn da mhan, nọn zẹ nin ọle da tie mhan eria ne khiale, ọle zẹ nin mhan ha da le ọne uku nan.

8 Ẹmhọanta ene ẹmhọn nan khin. Mẹn guanọ nin uwẹ wo ha tale, beji a da miẹn ghe, ene rẹọ bhi Osẹnobulua ki sabọ denọ ọkhọle nọnsele ọbhi iwẹnna esili, yẹ wo ha lu ọle. Emhin nọn mhẹn khọnan nọn ha yẹ sabọ rẹkpa eria.

9 Hẹi deba ẹbho ha gbugan nin ẹwanlẹn iye. Hẹi deba ele ha nene ulin-uwa yẹ ha gbugan bhi ebi Uhi tale. Ihoho ene emhin nan khin, elele inabhọre. 10 Ahamiẹn ọria ribhi ẹwẹ bha nọn ho nọn si iwaegbea re, bha sekha nanlẹn. Ahamiẹn ibha lu iriọ sẹ igba eva, ọle bha ka fidenọ, bha rẹban ọlẹn. 11 Ranmhude, ọria nọn sẹ iriọ de sibhi oga ẹmhọanta re, olukhọ ọle ki lu, ọle bhọ bhuohiẹn gbe egbe ọle fo.

12 Ẹghe nin mẹn ha rẹ je Atẹmas la Tikikọs bu uwẹ re, dọnmhegbe nin uwẹ rẹ bu mẹn re bhi Nikopolis. Enin imẹn ha da gbe ẹghe ulinlin. 13 Dọnmhegbe nin uwẹ rẹ rẹkpa Apọlọs, bi Zinas nọn manman lẹn uhi rẹ muegbe okhian. Yẹ ne emhin rebhe nin ele ha noo bhi okhian nin ele. 14 Ọkpakinọn, taman ẹbho nesẹmhan nin ele wo ha lu iwẹnna esili, beji a da miẹn ele ki sabọ re urẹkpa re sade a guanọ emhin. Bhiriọ, ele ki ha yi eria ne re ikpẹ esili man.

15 Ọrebhe ne ribhi eji mẹn ye je otuẹ uwẹ. Ne imẹn tuẹ ibhio mhan nin mhan ko ga ne hoẹmhọn mhan.

Mẹn bhii nin Osẹnobulua manman mhọn ifuẹkẹ da bha rebhe.