EBE ỌZEVA NAN GBẸN JI TIMOTI

1 Odibo nọnsi Jesu Kristi imẹn nin Pọl khin. Osẹnobulua zẹ imẹn, beji mẹn ha da wewe ẹmhọn iẹnlẹn nin ọle ve nin mhan rẹ na obọ Jesu Kristi. 2 Imẹn gbẹn ọne ebe nan ji Timoti nin ọmọn nọnsẹmhẹn nin mẹn hoẹmhọnlẹn.

Mẹn bhii nin Osẹnobulua nin Aba mhan bi Jesu Kristi nin Ebeanlẹn mhan manman mhọn ifuẹkẹ bi itohan da ẹ, yẹ re ọfure nin uwẹ.

3 Mẹn khuẹnmhẹn Osẹnobulua, nin mẹn re oga nọn khiale je beji aba imẹn nin ẹdẹlẹ yẹ lu. Ọkhọ nọn khiale mẹn rẹ ga ọle. Asọn bi odanmhẹn mẹn rẹ ye uwẹ re bhi erọnmhọn. 4 Mẹn ha ye eviẹ nọnsẹ re, ọ ki wo ha ghọn mẹn nin mẹn rẹ miẹn uwẹ, beji mẹn ha da ha ghọnghọn. 5 Mẹn yẹ wo yere urẹọbhọ ọsaje nin uwẹ mhọnlẹn. Lọis nin odede ẹ bi Yunis nin inẹn ẹn, ele ka re urẹọbhọ nọn sẹ inian man. Mẹn rẹọbhọ ghe uwẹ yẹ wo mhọn ọne urẹọbhọ nan.

6 Bhiriọ, ji ẹsele nin Osẹnobulua re nin uwẹ ẹghe nin mẹn rẹ nan erọnmhọn nin uwẹ, wo ha nyọn bhi egbe nọnsẹ bọsi eranlẹn. 7 Ẹlinmhin nin Osẹnobulua re nin mhan iyi ẹlinmhin nọn rẹ mhan kiẹn eria ne mun ofẹn-ofẹn. Ẹlinmhin nọn ha rẹ mhan ha mhọn ahu nọn, nọn ha rẹ mhan ha re oyẹẹ man, yẹ ha mhọn ọkhọle nọn gbale. 8 Bhiriọ, hẹi ji ẹkhọle ha lo uwẹ rẹ tẹmhọn Ebeanlẹn mhan. Sẹyẹ, hẹi ji ẹkhọ mẹn ha lo uwẹ ranmhude nin mẹn rẹ kiẹn onighan ba ẹmhọn Ebeanlẹn mhan. Muegbe nin uwẹ rẹ le oya ranmhude ọne ọta esili, uwẹ ha yẹ rẹọbhọ ghe, Osẹnobulua dẹ re ahu nọnsọle rẹ rẹkpa uwẹ. 9 Osẹnobulua hi ọnon miẹn mhan fan, yẹ tie mhan nin mhan dọ ha yi eria ne khiale. Ọ iyi ahu mhan gbe ọle. Ọkpakinọn, ranmhude iho nọnsọle bi ranmhude ifuẹkẹ nọn khua nọnsọle, ọle zẹle nin ọle da lu ọnan. Rẹ na otọ a de ọle lu ọnan nin mhan, rẹ na obọ Jesu Kristi. 10 Ejayenan nian, Jesu Kristi nin Ọmiẹnmhanfan vae dọ rẹman mhan ebi ọne ifuẹkẹ nan khin. Ọle da re uu kie. Ọle da re ọne ọta esili rẹ rẹkpa mhan lẹn ebi mhan ha rẹ sabọ ha mhọn iẹnlẹn bi egbe nọn ida sabọ wea yẹ. 11 Ranmhude ọne ọta esili nan, ọle zẹle nan da re imẹn kiẹn odibo, nin mẹn dọ ha tẹmhọn Osẹnobulua yẹ ha man ẹbho emhin.

12 Ọne ọta esili nan zẹle nin mẹn da yẹ ha le oya ene emhin nan. Ọrẹyiriọ, ẹkhọle ilo mẹn, ranmhude, mẹn lẹn Osẹ nin mẹn ga. Mẹn wo rẹọbhọ ghe, rẹ sẹbhi ukpẹdẹ ibhuohiẹn, ọle dẹ sabọ gbega emhin rebhe nin mẹn mun ọle bhi obọ. 13 Wo ha lu rẹkhan ene iman-emhin esili nin uwẹ luẹ bhi obọ imẹn. Lu rẹkhan ele beji mẹn rẹ man uwẹ ele tee. Re oyẹẹ bi urẹọbhọ nin uwẹ mhọnlẹn, ranmhude nin uwẹ rẹ kugbe deba Jesu Kristi rẹ lu rẹkhan ele. 14 Re ẹlinmhin nọn khiale nan re nin mhan rẹ gbega ọne okpemhin nan, nan mun uwẹ bhi obọ.

15 Uwẹ lẹnmhin ghe ẹbho rebhe ne ribhi otọ Esia mun mẹn fia, rẹ sẹbhi Faijẹlọs bi Hẹmojinis. 16 Mẹn bhii nin Ebeanlẹn imhan mhọn itohan da azagba-uwa ọsi Onẹsiforọs. Ẹghe rebhe ọle rẹ wo re ikoudure nin mẹn. Ẹkhọ mẹn bhọ bha lo ọle arẹmiẹn onighan mẹn khin. 17 Ẹghe nin ọle bhọ rẹ sẹbhi Rom, ọle da dọ ha guanọ imẹn khian. Ọle da miẹn mẹn. 18 Mẹn bhii nin Jehova* nin Ebeanlẹn imhan mhọn itohan da ọle bhi ukpẹdẹ ibhuohiẹn. Uwẹ yẹ wo lẹn ebi ọle rẹ rẹkpa mẹn yẹ bhi Ẹfẹsọs.

2 Ọmọn nọnsẹmhẹn, ji ifuẹkẹ nọn khua nin Jesu Kristi mhọn da mhan rẹkpa ẹ rẹ manman ha ziẹn ọbhọ. 2 Man ikpea nan gbaẹkẹ ele ene emhin nin uwẹ luẹ bhi obọ imẹn, nin ẹbho ne bunbun yẹ sọsali ọi. Ẹghenin, ene ikpea nan ki yẹ sẹ eria ne ha sabọ ha man ẹbho nekẹle emhin. 3 Muegbe nin uwẹ rẹ miẹn ọkakale bhi egbe, ranmhude, ọyokhọnlẹn nọnsi Jesu Kristi uwẹ khin. 4 Ọyokhọnlẹn ire obọ ọbhi ẹki nan do,* ranmhude, ọle guanọ nin ọle sabọ ha lu ebe ti ebeanlẹn nọnsọle bhọ. 5 Iriọ yẹ nọn bhi igemu nan gbe. Ọria ha rẹ gbe igemu, nin ọle bha da re obọ rẹkhan uhi ọsi ọne igemu, a ida mun ọne ukpu nanlẹn. 6 Ọmungbo nọn wẹnna kaka, ọle hi ọria nọn khẹke nọn ka le bhi emhin nin ọle kọle. 7 Wo ha ria eria nyan ene emhin nan nin mẹn taman uwẹ. Ebeanlẹn mhan dẹ rẹkpa uwẹ rẹ lẹn otọ emhin rebhe.

8 Yere ghe, ọmọn nọnsi Devid Jesu Kristi ha khin. Sẹyẹ, a riọ ọle kpanọ bhi uu. Ọnan hi ọta esili nin mẹn ha wewe. 9 Ọne ọta esili nin mẹn ha wewe zẹle nin mẹn da ha loya. Ọle yẹ zẹ nan da mun mẹn khue bọsi ọria nọn gbuhi a. Ọrẹyiriọ, a bha mun ọta nọnsi Osẹnobulua gba. 10 Bhiriọ, mẹn wo ha ziẹngbe emhin rebhe ranmhude enanzẹle. Mẹn guanọ nin ele yẹ miẹn umiẹnfan rẹ na obọ Jesu Kristi, yẹ ha mhọn uyi nọn ha tọ sẹbhi ighegheghe. 11 Ẹmhọanta ọne ẹmhọn nan khin: Ahamiẹn mhan deba ọle yu, mhan ki yẹ deba ọle ha nyẹnlẹn. 12 Mhan ha ziẹngbe, mhan ki deba ọle gbẹloghe. Mhan ha he ọle, ọle ki yẹ he mhan. 13 Mhan ha rẹ fikekegbe ọle, ọle dẹ yẹ mun ọta nọnsọle sẹ, ranmhude, ọle ida sabọ hiẹ egbe ọle.

14 Wo ha ye ele ene emhin nan re. Ha gbuhi nin ele bhi odalo Osẹnobulua nin ele hẹi yẹ ha gbugan, ranmhude, elele inabhọre. Ikuan-egbe ọ si ji ene kaehọ. 15 Dọnmhegbe nin uwẹ rẹ ha yi ọria nin ẹmhọn ọlẹn ti Osẹnobulua bhọ. Diabe ọria nin ẹkhọ iwẹnna obọ nọnsọle ilo. Ha noo ọta nọnsi Osẹnobulua* nọnsẹn. 16 Rẹban ọta ne bha kiẹn ọlẹn. Ene ọta nan ire ogẹn ji Osẹnobulua. Ọ re ẹbho lu emhin ne iyẹẹ Osẹnobulua, ene ẹbho ki ha khọ bhọ. 17 Ọta ọsi ẹbho ne sẹ inian ki ha vẹ bii itẹ nọn bha ka rie. Haimeniọs bi Failitọs deba ẹbho ne ta ọta ne sẹ inian. 18 Ene ikpea nan fikekegbe iman-emhin ọsi ẹmhọanta. Ele yọle ghe, a riọ ene yu kpanọ bhi uu fo. Ele wẹghẹ urẹọbhọ ọsi ẹbho eso a. 19 Ọrẹyiriọ, ọne ayotọ nọn ziẹnlẹn nọnsi Osẹnobulua sẹyẹ mundia. Ebi a gbẹn ọbhọ yọle, “Jehova* lẹn ene yi ọsọle.” Sẹyẹ, “ji ọrebhe ne sotie elin nọnsi Jehova* rẹban emhin ebe.”

20 Ukpamanku kẹkẹ a miẹn bhi ẹkẹ udede uwa. Eso ribhọ nan re igolu lu, eso ribhọ nan re isiliva lu, eso ribhọ nan re eran kanọ, eso yẹ ribhọ nan re ekẹn man. A re eso bhi ene ukpamanku rẹ lu emhin kpataki, a re eso rẹ lu emhin nọn hi ki rẹ khin. 21 Ahamiẹn ọria rẹban ẹbho ne diabe ukpamanku nan rẹ lu emhin nọn hi ki rẹ khin, ọle ki diabe ukpamanku nan rẹ lu emhin kpataki, ọle ki kiẹn ọne a kpe khia, nin ọnọn nyan ọlẹn ha sabọ noo. A ki noo ọle rẹ ha lu emhin esili. 22 Re egbe nẹ bhi emhin ne yẹẹ usẹn. Deba eria ne re ọkhọ nọn khiale rẹ ha ga Ebeanlẹn mhan ha khu ọbhi ikhiale, urẹọbhọ, oyẹẹ, bi ọfure.

23 Sẹyẹ, rẹban igbugan nin ẹwanlẹn iye, ranmhude okhọnlẹn ele sire. 24 Ọ bha khẹke nin ọguọmhandia ọsi Ebeanlẹn mhan ha khọnlẹn, ọkhẹke nin ọle ha yi ọria nọn fu,* ọria nọn sabọ man emhin, bi ọria nọn sabọ mun egbe ọle mhọnlẹn sade a lu ọle khọ. 25 Ọle ki ha re ekpẹn-ekpẹn rẹ dia ẹbho ne bha muegbe ne rẹ re ehọ bhi adia. Iriọ a ha da miẹn Osẹnobulua dẹ rẹkpa ele rẹ fi ọkhọle denọ, bhiriọ, ele ki sabọ dọ lẹn ẹmhọanta. 26 Ele ki dọ daghe ọle ghe, Ojuu rẹ mun ele rẹ ha lu iho nọnsọle. Ẹlo ele ki dọ gbanọn an bhi uhọnmhọn. Bhiriọ, ele ki zẹ egbe ele sibhi ufi nọnsọle re.

3 Mẹn ho nin uwẹ lẹn ghe, bhi ẹghe ọkike, emhin dẹ wo manman kaka. Iẹnlẹn ki wo manman ha nọghọ. 2 Ẹbho ki hoẹmhọn egbe ele ọkpa, ele ki hoẹmhọn igho, ele ki ha dẹgbọ, ele ki ha hianbhegbe, ele ki ha re unun ji Osẹnobulua. Imọn iyẹ da ha hẹnmhọn nin ene biẹ ele, ẹbho ki ha gbe ibo ele ọbhi ẹsele, ele iyẹ da ha mhọn asun-rẹkhan. 3 Ẹbho iyẹ da ha mhọn ẹkẹ-ẹjẹjẹ, ele ki he nin ele rẹ deba ibo ele tẹmhọn ọbhi ekpẹn, ele ki ha re unun riia ibo ele a, ele iyẹ da ha mun egbe ọbhi ibẹẹ, ele ki ha fi bhi ẹlo, emhin esili iyẹ da ha yẹẹ ele. 4 Ẹbho ki ha mun ibo ele khiẹn, ele ki wo bhi uhọnmhọn, ele ki ha tẹngbemun, nin ele rẹ hoẹmhọn Osẹnobulua, ele ki ha khu ọbhi ọlẹnlẹnbhegbe. 5 Ele ki man ha lu bọsi ghe Osẹnobulua ele ga, ọkpakinọn, uwedẹ nin ele rẹ lu emhin ki rẹman ghe, ọ iyi Osẹnobulua ele ga. Rẹban eria ne sẹ inian. 6 Eso bhi ene ikpea nan ki fẹkẹ do na ẹbho bhi uwa. Ele ki hiẹ ikhuo nin olukhọ wẹghẹ a. Igbọn ene ikhuo nan khin rẹji ebi egbe nọnsele guanọ. 7 Ele rẹ wo luẹ emhin, ele bha sẹ sabọ dọ lẹn ẹmhọanta.

8 Beji Janis bi Jambris rẹ ne Mozis suan, iriọ ene ikpea nan rẹ ha gbodan bhi ẹmhọanta. Ọkhọ ebe ene ikpea nan mhọnlẹn. Osẹnobulua he ele, ranmhude ele ire obọ rẹkhan emhin nin mhan rẹọ ọi. 9 Bhi ọsi ẹmhọanta ẹki nin ene ikpea do dẹ kẹ gbẹlo, ranmhude ẹbho rebhe dẹ kẹ daghe ọle ghe, ẹwanlẹn iribhi ebi ele lu, beji ọ ha khin rẹji Janis bi Jambris. 10 Bhi ọsi uwẹ, uwẹ da wo re obọ rẹkhan emhin nin mẹn man, bi emhanmhan nọnsẹmhẹn. Uwẹ da yẹ re egbe khọkhọ uwedẹ iẹnlẹn nọnsẹmhẹn. Uwẹ da re egbe khọkhọ imẹn bhi uwedẹ nin mẹn rẹ re oyẹẹ bi urẹọbhọ man, uwedẹ nin mẹn rẹ ziẹngbe khẹ Osẹnobulua, bi uwedẹ nin mẹn rẹ ha ziẹngbe ọkakale. 11 Uwẹ lẹn oya bi ekpokpo kẹkẹ nin mẹn miẹn bhi egbe, bọsi ọne imẹn miẹn bhi egbe ẹghe nin mẹn rẹ ha ribhi Antiọk, Aikoniọm, bi Listra. Mẹn da ziẹngbe ene ekpokpo nan rebhe. Ebeanlẹn imhan da miẹn imẹn fan bhọ. 12 Bhi ọsi ẹmhọanta, ọrebhe ne muegbe ne rẹ ga Osẹnobulua bọsi edibo nesi Jesu Kristi dẹ miẹn ekpokpo bhi egbe. 13 Ọkpakinọn, eria ne imhẹn bi eria eku dẹ ha khọ bhọ. Ele ki ha hiẹ ẹbho, a ki yẹ ha hiẹ ele.

14 Wo ha re obọ rẹkhan emhin nan man uwẹ ele, nan yẹ rẹkpa uwẹ rẹ rẹọ, ranmhude, uwẹ lẹn unan ẹbho ne man uwẹ ene emhin nan. 15 Rẹ deba ọnin, rẹ na bhi egbe obhokhan, ọle uwẹ rẹ lẹn ẹmhọn nọn ribhi Ebenọnkhiale. Ene ẹmhọn nan dẹ sabọ re uwẹ ha wanlan. Ọ dẹ yẹ sabọ re umiẹnfan nin uwẹ, ranmhude urẹọbhọ nin uwẹ mhọn da Jesu Kristi. 16 Emhin rebhe nọn ribhi Ebenọnkhiale, obọ Osẹnobulua ọ na vae. Ebe nọn mhẹn nọn. A sabọ re ọle man emhin, a sabọ re ọle gbe ọria bhi esankan, a sabọ re ọle dia emhin ọbhi uwedẹ, a yẹ sabọ re ọle man ọria emhin beji ọle ha da ha lu emhin nọn gbale. 17 Beji a ha da miẹn ọria nọn ga Osẹnobulua ki ha yi ọria nọn manman guẹ iwẹnna esili, nọn yẹ mhọn emhin rebhe nọn khẹke nin ọle rẹ lu ọle.

4 Jesu hi ọnọn ha bhuohiẹn ene nyẹnlẹn bi ene yu, ẹghe nin ọle ha rẹ zegbere, bi ẹghe nin ọle ha rẹ ha gbẹloghe bhi Ejele nọnsọle. Mẹn bhii ẹ bhi odalo Osẹnobulua bi bhi odalo Jesu Kristi, 2 nin uwẹ wo ha tẹmhọn Osẹnobulua ẹghe rebhe. Ha lu ọle ẹghe rebhe, ọ ha rẹ ha yi ẹghe nin emhin rẹ lẹkhẹ la ẹghe nin emhin rẹ kaka. Ha gbuhi nin ẹbho, ha re adia nin ele, wo ha re izebhudu nin ele. Re iziẹngbe ha lu ọle, uwẹ yẹ wo ha lu ọle bii ọria nọn guẹ rẹ man emhin. 3 Lẹn sẹbhọ ghe, ẹghe vade nan ha rẹ miẹn ghe, ọ iyẹ da ha yẹẹ ẹbho rẹ re ehọ bhi ọne ọta nọn mhẹn. Ebe ri ele bhi ọkhọle ele ha ki ha lu. Ele ki ha guanọ ebho ne ha taman ele ebi ele ho nin ele họn. 4 Ele iyẹ da ha re ehọ bhi ẹmhọanta, ele ki dọ ha re ehọ bhi okha ohoghe. 5 Bhi ọsi uwẹ, ha re ẹwanlẹn lu emhin, ziẹngbe ekpokpo, ha tẹmhọn Osẹnobulua, uwẹ ha lu iwẹnna oga nọnsẹ nọnsẹn.

6 Inian mẹn ki diabe anyọn nan rẹ zọese. Ẹghe nan ha rẹ gbe imẹn an sire. 7 Mẹn wo khọn ọne okhọn nọn mhẹn sotọ, mẹn re ọne unẹ sotọ, mẹn yẹ ga nọnsẹn. 8 Rẹ nabhi ọne ẹghe nan rẹ ha khian, ukparu ojie ọsi ikhiale nan ha mun nin mẹn ribhi otọ fo. Ebeanlẹn mhan nọn bhuohiẹn nọn gbale dẹ mun nin mẹn bhi ukpẹdẹ ibhuohiẹn. Ọ iyi mẹn ọkpa ọle ha mun nan, ọ dẹ mun nin ọrebhe ne guanọ nin ọle vae.

9 Dọnmhegbe nin uwẹ kẹ bu mẹn re. 10 Dimas mun mẹn fia ranmhude ọle hoẹmhọn ọne agbọn* nan, ọle diọbhi Tẹsẹlonaika. Krẹsẹns khian Galesha, Taitọs khian Damesha. 11 Luk ọkpa ribhi eji mẹn ye. Re Mak mhọn rẹkhan egbe sade uwẹ vade, ranmhude, ọle dẹ sabọ rẹkpa mẹn bhi iwẹnna oga. 12 Mẹn je Tikikọs ha khian Ẹfẹsọs. 13 Uwẹ a ha vade, mun ukpọn nin mẹn rẹ hin egbe re. Isi Kapọs ọ ye bhi Troas. Yẹ ne ene ebe nan khili re, manman nọn ene a re ohian elanmhẹn rẹ lu.

14 Alẹzẹnda nin ojogun wo manman lu mẹn khọlọ, ọ iyi khere. Jehova* dẹ ha ọle osa bhi ebi ọle lu mẹn le. 15 Huẹan mhọn ẹwanlẹn bhi egbe ọle, ranmhude ọle manman wo ne imhan suan. Uhọnmhunje nin mhan wewe bha yẹẹ ọle.

16 Ẹghe nan ka rẹ guiẹzọ nọnsẹmhẹn bhi ikotu, ọria soso bha deba mẹn. Ene ibhio mhan rebhe da fikekegbe imẹn. Mẹn bhii nin Osẹnobulua rẹhunmhan ele. 17 Ọkpakinọn, Ebeanlẹn mhan da rẹkpa mẹn. Ọle da re ahu nin mẹn, beji a ha da miẹn mẹn ki sabọ tẹmhọn Osẹnobulua sotọ nọnsẹn, sẹyẹ ene agbaẹbho rebhe ki hẹnmhọn Osẹnobulua. Ọle da hinmhin mẹn bhi obọ ọne oduman nọn ha ho nọn gbe imẹn le. 18 Ebeanlẹn mhan dẹ yẹ hinmhin mẹn bhi emhanmhan ne imhẹn rebhe. Ọle ki miẹn mẹn fan yẹ re mẹn nabhi Agbejele nọnsọle nọn ribhi okhun. Uyi hi ọsi ọle rẹ sẹbhi ighegheghe. Isẹ.

19 Ne imẹn tuẹ Priska bi Akuila, yẹ ne imẹn tuẹ azagba-uwa ọsi Onẹsiforọs.

20 Ẹrastọs ribhi Kọrint. Mailitọs mẹn da zẹ Trofimọs obọ, ranmhude ọle da ha khọnmhọn. 21 Dọnmhegbe nin uwẹ rẹ sẹ enan ọkuẹsẹ ẹghe ulinlin.

Yubiulọs yọle nin mẹn tuẹ uwẹ. Pudẹns, Lainus, Klọdia bi ene ibhio mhan rebhe yẹ yọle nin mẹn tuẹ uwẹ.

22 Ebeanlẹn mhan dẹ nan erọnmhọn nin uwẹ bhi ọkhọle esili nin uwẹ rẹ ha lu emhin, mẹn bhii nin ọle manman mhọn ifuẹkẹ da ẹ.