EBE ỌHẸNHẸN NAN GBẸN JI TIMOTI

1 Pọl nin odibo nọnsi Jesu Kristi gbẹn ọne ebe nan. Osẹnobulua nin Ọmiẹnmhanfan bi Jesu Kristi nọn re iruduba nin mhan, ele zẹ imẹn. 2 Uwẹ nin Timoti nin ọmọn nọnsẹmhẹn bhi oga mẹn gbẹn ọne ebe nan je. Ọmọn esili uwẹ khin.

Mẹn bhii nin Osẹnobulua nin Aba mhan, bi Jesu Kristi nin Ebeanlẹn mhan manman mhọn ifuẹkẹ bi itohan da uwẹ, yẹ re ọfure nin uwẹ.

3 Ẹghe nin mẹn rẹ ha muegbe nin mẹn rẹ ha khian Masẹdonia, mẹn da taman uwẹ nin uwẹ debhi Ẹfẹsọs a. Mẹn sẹyẹ guanọ nin uwẹ sẹyẹ debhi Ẹfẹsọs a, beji uwẹ ha da gbuhi nin ẹbho eso ne ribhi enin, nin ele hẹi yẹ man iman-emhin ohoghe. 4 Yẹ taman ele nin ele hẹi yẹ re ehọ bhi okha ohoghe, bi ẹmhọn ulin-uwa kẹkẹ. Emhin ne sẹ iriọ irẹkpa ọria, igbugan ele gheghe sire. Ele bha deba emhin nin Osẹnobulua ne nin mhan nin mhan rẹ ha bọn urẹọbhọ nọnsẹmhan okhun. 5 Bhi ọsi ẹmhọanta, ebezẹle nin mẹn da ha re ọne adia nan nin ele, ọle hi ghe, mẹn guanọ nin ele ha mhọn oyẹẹ ọsaje. Ọkhọ nọn khiale bi urẹọbhọ ọsaje, ọle ha rẹkpa ele rẹ lu ọnan. 6 Eria ne iyẹ mhọn ene ikpẹ esili nan, ele dọ ha re ẹghe nọnsele rẹ ta ọta nin elele iye. 7 Ele guanọ nin ele ha man uhi, ọkpakinọn, ele bha lẹn otọ emhin nin ele man, la ene emhin nin ele mun gba ọbhi uhọnmhọn.

8 Emhin esili ọne Uhi khin. Sokpan, ọkhẹke nin ọria re obọ rẹkhan ọlẹn. 9 Bha lẹnmhin ghe, ọ iyi ranmhude eria ne lu emhin nọnsẹn zẹle nan da gbuhi. Ranmhude ẹbho ne gbuhi a, bi ẹbho ne sọtẹ, ọle zẹle nan da gbuhi. Sẹyẹ, ranmhude ẹbho ne bha lẹn Osẹnobulua, eria olukhọ, ẹbho ne imhọn asun-rẹkhan, ẹbho ne lu emhin ne bha khia, ẹbho ne gbugbele, ele bhọ gbono aba ele bi inẹn ele a, 10 ẹbho ne gboghẹ,* ikpea ne ne ikpea nowẹ, eria ne do ẹbho mun, eria ne bha ohoghe, eria ne sọsali ohoghe, bi ẹbho rebhe ne lu emhin nọn bha diẹn mun iman-emhin ọsi ẹmhọanta. 11 Obọ Osẹnobulua ọsi eghọnghọn, ọle ọne iman-emhin nan na vae. Ọne iman-emhin diẹn mun ọne ọta nọn mhẹn nan mun mẹn bhi obọ nin mẹn ha wewe.

12 Ekhuẹnmhẹn hi ọsi Jesu Kristi nin Ebeanlẹn mhan nọn re ahu nin mẹn. Ọle da ghe mẹn bii ọria nan ha sabọ gbaẹkẹ ọle, yẹ mun ọne iwẹnna oga nan nin mẹn. 13 Ọria oya mẹn rẹ ha khin. Mẹn da wo ha re unun ji Osẹnobulua yẹ kpokpo edibo nesi Kristi. Ọrẹyiriọ, ọle da mun ọne iwẹnna oga nin mẹn. Ọle da mhọn itohan da mẹn, ranmhude, mẹn bha lẹn ebi mẹn ha lu. Mẹn bha ha mhọn urẹọbhọ. 14 Ọkpakinọn, Ebeanlẹn imhan da wo manman mhọn ifuẹkẹ da mẹn. Jesu Kristi da wo manman hoẹmhọn mẹn, yẹ rẹkpa mẹn rẹ ha mhọn urẹọbhọ. 15 Ẹmhọanta ene ọta nan khin, ọkhẹke nin bha rẹọbhọ: Ranmhude eria olukhọ zẹle nin Jesu Kristi da vae bhi ọne agbọn nan. Ọle vae nin ọle dọ miẹn ele fan. Imẹn hi ọria ọhẹnhẹn bhi ẹwẹ ele. 16 Jesu Kristi da mhọn itohan da mẹn, beji a ha da miẹn rẹ na obọ imẹn, nọn yi ọria ọhẹnhẹn nan mhọn itohan da, ọle ki rẹman ọrebhe ghe ọle manman mhọn iziẹngbe. Ẹghenin, mẹn ki kiẹn ijiẹmhin rẹji ọrebhe ne ha dọ rẹọ bhi Jesu, bi ọrebhe ne ha miẹn iẹnlẹn ọsi ighegheghe.

17 Osẹnobulua hi Ojie ọsi itẹbitẹ, ọle ida yu ghee, a idaghe ọle, ọle ọkpa hi Osẹ. Uyi bi ekpẹn hi ọsi ọle rẹ sẹbhi ighegheghe. Isẹ.

18 Timoti nin ọmọn nọnsẹmhẹn, mẹn mun ene uhi nan uwẹ bhi obọ ranmhude ẹmhọn nin ene akhasẹ tale rẹji uwẹ. Ene emhin nan dẹ rẹkpa ẹ rẹ ha khọn ọne okhọn nọn gbale, 19 uwẹ ki yẹ sabọ mun urẹọbhọ nọnsẹ ziẹn, yẹ ha mhọn ọkhọle nọn mhẹn. Ene emhin nan ẹbho eso fikekegbe, nọn zẹle nin urẹọbhọ nọnsele da wẹghẹ a. Urẹọbhọ nọnsele da diabe okọ nọn ruẹle. 20 Ọne usun nan Haimeniọs bi Alẹzẹnda ye. Mẹn mun ele Esu bhi obọ, beji ele ha da luẹ ghe, ọ bha khẹke nan ha re unun ji Osẹnobulua.

2 Mẹn taman ibha nin bha ha nan erọnmhọn ji Osẹnobulua, bha ha khuẹnmhẹn ọlẹn, bha ha yẹ manman ha bhii ọle. Bha yẹ ha bhii nin unan eria rebhe. 2 Bha yẹ ha bhii ji ene ijie, bi ẹbho rebhe ne ribhi ihe, beji mhan ha da miotọ rẹ ha nyẹnlẹn bhi ọfure, yẹ re ọkhọle rebhe ha ga Osẹnobulua. 3 Emhin nọn mhẹn khọnan bhi ẹlo nọnsi Osẹnobulua nin Ọmiẹnmhanfan. 4 Osẹnobulua guanọ nin unan ẹbho rebhe miẹn umiẹnfan. Ọle guanọ nin ele dọ lẹn ẹmhọanta. 5 Osẹnobulua ọkpa, ọle ribhọ, sẹyẹ, ọsuọnmhan ọkpa, ọle ribhọ, ọle hi Jesu Kristi. Ọle hi ọsuọnmhan nọn ribhi ẹwẹ Osẹnobulua bi eria. 6 Ọle da re egbe nọnsọle rẹ zọese, beji ọle ha da dẹ ẹbho rebhe* kiere. A dẹ wewe ọne ẹmhọn nan sade ọne ẹghe sẹle. 7 Beji mẹn ha da wewe ọne ẹmhọn nan, ọle zẹle nan da rẹ mẹn kiẹn odibo, yẹ je imẹn nin mẹn dọ ha tẹmhọn Osẹnobulua. A da je imẹn bu ene iyi ibhokhan Ju, nin mẹn dọ man ele emhin, beji ele ha da sabọ lẹn ẹmhọanta yẹ dọ ha mhọn urẹọbhọ. Ẹmhọanta ọnan khin, ọ iyi ohoghe.

8 Bhiriọ, mẹn guanọ nan miẹn ghe, bhi ijerebhe nin bha da do ikolo, ene ikpea nin ọkhọle nọnsele khiale ha nan erọnmhọn. Ọ bha khẹke nin ele ha khọẹkẹ gbe, la nin ele ha gbugan. 9 Ọ yẹ khẹke nin ene ikhuo ha muegbe nọnsẹn.* Ọkhẹke nin uwedẹ nin ele rẹ muegbe rẹman ghe, eria ne lu emhin ọbhi oleghe ele khin, sẹyẹ, ele mhọn ẹwanlẹn. Ọ iyi nin ele rẹ wo ha lu unan eto kẹkẹ, la nin ele ha sino igolu bi ileghe ọbhi egbe, la nin ele ha yọ ukpọn nọn manman ghan. 10 Sokpan, nin ele ha muegbe bhi uwedẹ nọn khẹke eria ne ga Osẹnobulua. Ọnin hi nin ele ha lu iwẹnna esili.

11 Ọkhẹke nin okhuo degbere ha kaehọ sade a man emhin, nin ọle hẹi talọ. 12 Mẹn bha re otọ nin okhuo rẹ ha man emhin, la rẹ le ọba nyan okpea. Ọkhẹke nin ọle nyangbe, 13 ranmhude, Adam a ka man, a kuẹ man Ivi. 14 Sẹyẹ, ọ iyi Adam a hiẹle, ọne okhuo a hiẹle. Bhiriọ, ọle da kiẹn ọria olukhọ. 15 Ọkpakinọn, ahamiẹn ọne okhuo biẹ imọn, ọnan ki gbega ọle. Sokpan, ọ sẹyẹ khẹke nin ọle wo ha re oyẹẹ bi urẹọbhọ man. Ọle ki yẹ ha lu emhin ne khiale, yẹ rẹman ghe ọle mhọn ẹwanlẹn.

3 Ẹmhọanta ọne ẹmhọn nan khin: Ahamiẹn okpea wẹnna kaka, nin ọle rẹ ha yi ọwanlẹn bhi agbotu, iwẹnna esili ọle guanọ. 2 Ọkhẹke nin ọwanlẹn bhi agbotu ha yi ọria nin okan ine. Ọkhẹke nọn ha yi ọria nọn mhọn okhuo ọkpa, ọria nọn lu emhin ọbhi oleghe, ọria nọn re ẹwanlẹn lu emhin, ọria nọn lu emhin rẹkhan emhanmhan, ọria nọn miẹn ẹbho ọbhi egbe, ọria nọn guẹ rẹ man emhin. 3 Ọ iyi ọria nọn da anyọn gbe egbe, ọ iyi ọria nọn khọn okhọn-okhọn, ọ iyi ọria nin unun ọsi ọria isẹ ọsọle, ọ iyi ọria nọn van ovan-ovan, ọ iyi ọria nọn hoẹmhọn igho. 4 Ọle ki ha yi okpea nọn re azagba-uwa nọnsọle khian nọnsẹn, imọn nesọle ki ha hẹnmhọn nanlẹn, ele ki yẹ mun uhọnmhọn bhi odẹ. 5 (Be okpea nọn bha sabọ re azagba-uwa nọnsọle khian, ha rẹ re agbotu nọnsi Osẹnobulua khian yẹ?) 6 Ọle ida ha yi ọria nọn la nabhi oga, ranmhude, ọnan dẹ sabọ re ọle ha tẹngbemun, ẹghenin, ohiẹn nan bhu gbe Ojuu ki sẹ ọle bhi egbe. 7 Rẹ deba ọnin, ọkhẹke nin ọle ha yi ọria nin ẹbho tẹmhọnlẹn nọnsẹn bhi ughe, na hẹi dọ miẹn ẹbho dọ ha re unun ji ọle. Sẹyẹ nin ọle hẹi de ọbhi ufi ọsi Ojuu.

8 Ọkhẹke nin ene rẹkpa ene ewanlẹn* bhi agbotu ha yi eria ne mun ekpẹn ọbhi egbe. Ele ida ha bha ohoghe, ele ida ha da anyọn gbe egbe, ele ida ha mhọn ẹlobhọ, la do aki eku nin ele rẹ fe. 9 Ọkhẹke nin ele wo ha re obọ rẹkhan iman-emhin ọsi ẹmhọanta ne yi ọta ẹkhokho. Ọ yẹ khẹke nin ele ha mhọn ọkhọ nọn khiale.

10 Ọkhẹke nan ka dọnmhẹn ele fẹghe; si ele dẹ sabọ miẹn ọne ẹsọn nan. Ahamiẹn ghe, ele imhọn eji ele da fidọn, a ki zẹ ele nin ele ha ga.

11 Ọkhẹke nin ikhuo yẹ ha mun ekpẹn ọbhi egbe. Ọkhẹke nin ele ha lu emhin ọbhi oleghe. Ọ yẹ khẹke nin ele ha re urẹọbhọ man bhi emhin rebhe. Ọ bha khẹke nin ele ha re unun riia ẹbho a.

12 Ọria nọn rẹkpa ene ewanlẹn* dẹ ha yi ọria nọn mhọn okhuo ọkpa. Ọle dẹ ha re imọn nesọle bi azagba-uwa nọnsọle khian nọnsẹn. 13 Ene ikpea ne wo ha ga nọnsẹn dẹ ha mhọn elin nọn mhẹn. Ele dẹ yẹ miẹn unun rẹ ha tẹmhọn urẹọbhọ nin ele mhọn da Jesu Kristi.

14 Arẹmiẹn mẹn mhọnlẹn bhi ọkhọle ghe, mẹn dẹ kẹ dọ miẹn uwẹ, mẹn da sẹyẹ gbẹn ene ẹmhọn nan ji uwẹ. 15 Sokpan, ahamiẹn mẹn bha kẹ vae, ene ẹmhọn nan nin mẹn gbẹn ji uwẹ ki rẹkpa ẹ rẹ lẹn ebi uwẹ ha rẹ ha lu emhin yẹ bhi uwa nọnsi Osẹnobulua. Ọne uwa hi agbotu nọnsi Osẹnobulua nọn nyẹnlẹn, ọne agbotu nan hi ikazi nọn mun ẹmhọanta mhọnlẹn. 16 Bhi ọsi ẹmhọanta, okpemhin ọne ọta ẹkhokho nọn diẹn mun oga nọnsi Osẹnobulua khin: ‘Ọle da re egbe man ẹghe nin ọle rẹ ha yi ọria. A da tie ọle ọria nọn khiale, ẹghe nin ọle rẹ ha yi ẹlinmhin. Ọle da re egbe man ene ẹhi. A da wewe ẹmhọn ọlẹn na bhi ene agbaẹbho, ẹbho ne bunbun bhi ọne agbọn nan da mhọn urẹọbhọ da ọle. A da re ọle ha khian okhun yẹ re uyi nanlẹn.’

4 Ẹlinmhin nọnsi Osẹnobulua ka tale ghe, bhi ẹghe odalo, ẹbho eso dẹ de sibhi oga re. Ele ki ha re ehọ bhi iman-emhin ọsi ẹlinmhin-ebe, bi iman-emhin ohoghe, nin ẹbho yọle ghe obọ Osẹnobulua ọ na vae. 2 Ele ki ha re ehọ bhi iman-emhin ohoghe ọsi eria ne re ikpunun ga—eria nin ọkhọle nọnsele gbin, bọsi emhin nan re emantọn nọn ghan rẹ wawa a. 3 Ene eria nan ki ha taman ẹbho nin ele hẹi re okhuo la bọ ọdọ. Ele ki yẹ ha taman ẹbho nin ele ha nẹ ebale eso. Sokpan, Osẹnobulua man ene ebale nan nan ha le ọle. Ẹbho ne gene lẹn ẹmhọanta, ne yẹ mhọn urẹọbhọ ha le ọle, ele ki khuẹnmhẹn ọlẹn. 4 Emhin rebhe nin Osẹnobulua manlẹn mhẹnmhin. Ọ bha khẹke nin mhan ha nẹ esoso. Sokpan, ọkhẹke nin mhan le ọle yẹ gbe ekhuẹnmhẹn ji Osẹnobulua. 5 Osẹnobulua yọle ọne ebale khiale. Sẹyẹ, erọnmhọn nin uwẹ nan bhọ, re ọle kiẹn ebale nan inẹ.

6 Uwẹ ha re inian re ọne adia nan nin ene ibhio mhan, uwẹ ki rẹman ghe, uwẹ wo ga nọnsẹn bọsi odibo nọnsi Jesu Kristi. Uwẹ ki yẹ rẹman ghe, uwẹ manman lẹn iman-emhin ne mhẹn an nesi Osẹnobulua. Ene iman-emhin nan uwẹ wo ha re obọ rẹkhan. 7 Rẹban okha ohoghe. Okha ne ire ogẹn ji Osẹnobulua bọsi okha nin ikpodede gbe. Bhi obọ nọnkẹle, ha sasa bhi oga, ha khu ọbhọ nin uwẹ rẹ ha ga nọnsẹn. 8 Emhin nọn mhẹn nọn nan rẹ ha sasa egbe. Ọkpakinọn, oga nọnsi Osẹnobulua elele ye nẹ. Ranmhude, ọ rẹkpa ọria bhi emhin rebhe. Ọ rẹkpa mhan rẹ miẹn elele nian, ọ dẹ yẹ rẹkpa mhan rẹ miẹn elele bhi ẹghe odalo. 9 Ẹmhọanta ọne ẹmhọn nan khin, ọkhẹke nin uwẹ rẹọbhọ. 10 Ọnan zẹle nin mhan da ha wẹnna kaka yẹ dọnmhegbe. Osẹnobulua nọn nyẹnlẹn mhan mun udu nyan. Ọle hi ọnọn miẹn ẹbho rebhe* fan, manman nọn ene ga ọle nọnsẹn.

11 Ha gbe ene uhi nan nin ele, uwẹ ha yẹ ha man ele ene emhin nan. 12 Hẹi ji ọria soso re ẹlo obhokhan ha ghe ẹ. Ji uwedẹ nin uwẹ rẹ talọ, uwedẹ nin uwẹ rẹ lu emhin, uwedẹ nin uwẹ rẹ re oyẹẹ man, uwedẹ nin uwẹ rẹ re urẹọbhọ man, bi uwedẹ nin uwẹ rẹ nyẹnlẹn iẹnlẹn nọn khiale kiẹn ijiẹmhin rẹji ene mhọn urẹọbhọ. 13 Ọkuẹsẹ mẹn vae, wo ha tie ebe bhi ogbakha, wo ha re ibhude nin ẹbho, uwẹ ha yẹ wo ha man emhin. 14 A re ẹsele nin uwẹ, ẹghe nin ene ewanlẹn rẹ ne obọ nyan uwẹ, beji a ka rẹ tẹmhọn ẹn bhi ọta akhasẹ. Noo ọne ẹsele nọnsẹn. 15 Ha ria eria nyan ene emhin nan; mun ọkhọle rebhe ọbhọ. Ẹghenin, ọrebhe ki daghe ọle ghe, uwẹ wo lu re alo. 16 Gbẹlokotọ bhi egbe ẹ bi uwedẹ nin uwẹ rẹ man emhin. Wo ha lu ene emhin nan. Uwẹ ha lu iriọ, uwẹ ki sabọ miẹn egbe ẹ fan. Uwẹ ki yẹ miẹn ẹbho ne ka uwẹ ehọ fan.

5 Hẹi ne ọwanlẹn gui. Re ekpẹn nanlẹn talọ bọsi ghe aba ẹ nọn. Yẹ ha re ekpẹn ne usẹn ibhokhan talọ bọsi ghe ibhio ẹ nin ikpea ele khin. 2 Ha re ekpẹn nin ikhuo ne wanre talọ, bọsi ghe inẹn uwẹ ele khin, yẹ ha re ekpẹn nin imanmhẹn talọ, bọsi ghe ibhio ẹ nin ikhuo ele khin. Rẹ ọkhọle nọn khiale rẹ ha ne ele lu emhin.

3 Bha ha gbẹloghe ikhuo nin ọdọ ele yu, ne bha miẹn rẹ lu. 4 Ahamiẹn okhuo nọn iyẹ mhọn ọdọ mhọn imọn la eyẹ, ọkhẹke nin ene imọn nan ka rẹman bhi ẹkẹ uwa nọnsele ghe, ele mun ofẹn Osẹnobulua. Ọkhẹke nin ene imọn gbẹloghe ọne okhuo. Ọsenobulua guanọ nin ene imọn lu ebe khẹke nin ene biẹ ele bi odede ele. 5 Okhuo nin ọdọ ọle yu, nọn imhọn ọria nọn ha gbẹloghe ọle, Ọsẹnobulua ọle re udu ba. Ọle ki wo ha bhii ọle asọn bi odanmhẹn. 6 Bhi obọ nọnkẹle, ọnọn dọ ha lu ebi egbe nọnsọle guanọ yu bhi ẹlo nọnsi Osẹnobulua, arẹmiẹn ọle sẹyẹ ribhi agbọn. 7 Bhiriọ, wo ha gbe ene uhi nan nin ele, beji a ha da miẹn ele ki ha yi eria nin okan iri ele bhi egbe. 8 Bhi ọsi ẹmhọanta, ahamiẹn ọria bha gbẹloghe ene ribhi odotọ ugbẹloghe nọnsọle, manman nọn ene ribhi azagba-uwa nọnsọle, ọle fikekegbe emhin nin mhan rẹọ ọi. Ọle bhọ khọ nẹ ọria nọn imhọn urẹọbhọ hiehie.

9 Bha gbẹn elin ọsi ikhuo nin ọdọ ele yu, nan ha re urẹkpa nan ọbhi otọ. Ikhuo nin bha ha gbẹn elin ele ọbhi otọ dẹ ha yi: Ene wanre sẹ ikpe egbọ ea,* ene ha mhọn ọdọ ọkpa, 10 ene a lẹn ọbhi iwẹnna esili, ene bẹẹ imọn nesele wanre nọnsẹn, ene wo ha miẹn ẹbho ọbhi egbe, ene kpe oẹ ọsi ene khiale, ene rẹkpa ẹbho ne ha ribhi ọbalọ, bi ene wo re egbe rebhe ha lu iwẹnna esili.

11 Bhi obọ nọnkẹle, ahamiẹn ene ikhuo nin ọdọ ele yu bha sẹ wanre, bha hẹi gbẹn elin nọnsele ba ọne usun. Egbe nọnsele ha munhẹn ha guanọ inegbenowẹ fo, ọ ki kiẹn ele idobolo bhi oga nọnsi Kristi. Ele ki ha guanọ nin ele bọ ọdọ. 12 Ele dẹ miẹn ibhuohiẹn bhi egbe ranmhude ele fikekegbe ive nin ele ka ve. 13 Sẹyẹ, ele imhọn ebi ele re ẹghe nọnsele lu. Ele ki ha na bhi isi ẹbho khian. Ọ bhọ iyi ọnin ọkpa, ele ki ha ta ọta ike, yẹ lu obhebhezẹ bhi ẹmhọn nọn bha rẹtẹ ele. Ele ki ha tẹmhọn nọn bha rẹ khẹke nin ele ta. 14 Mẹn guanọ nin ikhuo nin ọdọ ele yu ne bha sẹ wanre kie bọ ọdọ. Mẹn guanọ nin ele ha bẹẹ imọn, ele ha yẹ ha gbẹloghe azagba-uwa nọnsele, beji a ha da miẹn ele bha re otọ nin ẹbho rẹ ha re unun riia mhan an. 15 Bhi ọsi ẹmhọanta, eso bhi ene ikhuo nan bhọ fikekegbe ẹmhọanta dọ ha rẹkhan Esu. 16 Ahamiẹn okhuo nọn ribhi oga mhọn obhio nin ọdọ ọle yu, ọkhẹke nin ọle dọ rẹkpa ọle, beji a ha da miẹn ọne ẹsọn bha kiẹn ọsi agbotu. Ẹghenin, agbotu ki sabọ rẹkpa ikhuo nin ọdọ ele yu ne gene guanọ urẹkpa.

17 Bha wo manman ha mun ekpẹn nin ewanlẹn ne gbẹloghe agbotu bhi uwedẹ nọn mhẹn, manman nọn, ene wo wẹnna kaka bhi ọta nan rẹman bi iman-emhin. 18 Ebenọnkhiale yọle, “Bha hẹi re emhin gba unun ọsi ẹmena nan rẹ ha wẹnna bhi eji a da gbe wit.” Sẹyẹ ọ da yọle, “Ọkhẹke nin ọnọn wẹnna miẹn ihaosa nọnsọle.” 19 Ọria ha dọ taman ẹn ghe, ọwanlẹn bhi agbotu lu emhin ọbe, hẹi wo rẹọbhọ. Ọkhẹke nin itue eva la itue ea sọsali ọbhọ. 20 Isira ẹbho rebhe uwẹ ha rẹ dia ọria nọn wo ha lu emhin ebe, beji a ha da miẹn, ofẹn ki yẹ ha mun ene ẹbho rẹ ha lu emhin ebe. 21 Isira Osẹnobulua bi Jesu Kristi bi ene ẹhi nan zẹle, mẹn rẹ taman uwẹ nin uwẹ re obọ rẹkhan ene adia nan. Re obọ rẹkhan ele nọnsẹn, hẹi lu eku.

22 Hẹi wo re otua-otua zẹ ọria re ọbhi ihe. Hẹi deba ọria bhi olukhọ nesọle. Wo ha nyẹnlẹn iẹnlẹn nọn khiale.

23 Ọ iyi amẹn ọkpa uwẹ ha wo ha wọn. Ha wọn obhi anyọn khere. Ọ dẹ rekpa ẹ bhi ẹkẹ nọn ba ẹ, bi emianmhẹn kẹkẹ nin uwẹ khọnmhọn ẹghe rebhe.

24 Ẹbho eso ha lu olukhọ, ọ ki wo vẹ. Ele ki wo re ẹjẹje miẹn ibhuohiẹn nọnsele. Bhi obọ nọnkẹle, ẹbho eso ha lu olukhọ, ọ ikẹ dagbare. Ọ re ẹghe ọ kuẹ dagbare. 25 Iriọ yẹ nọn, ahamiẹn ọria lu emhin nọnsẹn, ẹbho dẹ daghe ọle. Arẹmiẹn ẹbho bha daghe ọle nian, ọ dẹ yẹ zegbere si a zẹbue.

6 Ọkhẹke nin ene igbọn manman ha mun ekpẹn nin ene nyan ele, beji a ha da miẹn ẹbho bha ha re unun ji Osẹnobulua bi iman-emhin nesọle. 2 Ahamiẹn ghe, obhio mhan bhi oga ọle hi ebeanlẹn nọnsele, ele hẹi re ẹlo gbe ọle a ranmhude obhio ele bhi oga nọn. Ọ bhọ khẹke nin ele re ọkhọ rebhe manman wẹnna nanlẹn, ranmhude obhio ele bhi oga, nin ele yẹ hoẹmhọnlẹn, ọle ha miẹn elele bhi ọne iwẹnna nin ele wẹnna.

Wo ha man ele ene emhin nan, uwẹ ha yẹ ha re ene adia nan nin ele. 3 Ahamiẹn ọria dọ ha man iman-emhin ọbhebhe, sẹyẹ, ọle bha re obọ bhi iman-emhin nọn gbale nọn na obọ Jesu Kristi nin Ebeanlẹn mhan vae, nọn diẹn mun uwedẹ nọn khẹke nan rẹ ha ga Osẹnobulua, 4 ọle bha lẹn emhin soso, ọ gheghe tẹngbemun. Nan rẹ ha muan ẹmhọn, bi nan rẹ ha gbugan, ọle ti ọle bhọ. Ene emhin nan re ẹbho mhọn ikhu, ele ki ha gbe egbe, ele ki ha re unun riia egbe a, yẹ ha khẹnegbe. 5 Ele ki ha gbugan ba ẹmhọn ne bha sẹ ẹmhọn. Ikpea nin ọkhọ nọnsele imhẹn, ne bha yẹ lẹn ẹmhọanta, ele lu ene emhin nan. Ele riale ghe, ebi a rẹ lu ọsi egbe ọria ọle oga nọnsi Osẹnobulua khin. 6 Gene-gene, elele nọn khua ribhi oga nọnsi Osẹnobulua, sade mhan ji ebi mhan mhọn khọn mhan. 7 Mhan bha mun emhin soso re bhi ọne agbọn nan, mhan ida yẹ mun emhin soso kpanọ. 8 Bhiriọ, mhan ha miẹn ebale le, yẹ miẹn ukpọn re yọ,* mhan ki ji ọnan khọn mhan.

9 Eria ne khu ọbhọ nin ele rẹ fe, ele de ọbhi ufi bi edọnmhẹn. Ele ki yẹ ha lu emhin uhuki nọn ha si ikuan-egbe ji ele. Ene emhin nan ki gbe ele sotọ yẹ gbe ele khuelo. 10 Emhin ebe kẹkẹ ele nabhọre sade ọria hoẹmhọn igho. Ranmhude ẹbho eso hoẹmhọn igho, ele de sibhi oga re. Ele yẹ si ọbalọ kẹkẹ ji egbe nọnsele.

11 Uwẹ nin ọguọmhandia nọnsi Osẹnobulua, re egbe nẹ bhi ene emhin nan. Bhi obọ nọnkẹle, khu ọbhọ nin uwẹ rẹ ha lu emhin ne gbale, nin uwe rẹ ha mun ofẹn Osẹnobulua, nin uwẹ rẹ ha mhọn urẹọbhọ, oyẹẹ, iziẹngbe, bi ẹkẹ nọn fu. 12 Khọn bhọ nin uwẹ rẹ gbega emhin nin uwẹ rẹọ i. Dọnmhegbe nin iẹnlẹn ọsi ighegheghe nọn zẹle nan da tie uwẹ sẹ uwẹ bhi obọ. Ẹmhọn ọne iẹnlẹn nan uwẹ re unun nọnsẹ wewe man ẹbho ne bunbun.

13 Bhi isira Osẹnobulua nọn re iẹnlẹn nin emhin rebhe, bi isira Jesu Kristi nọn tẹmhọn Agbejele nọnsi Osẹnobulua man Pọntiọs Pailet, mẹn taman uwẹ 14 nin uwẹ re obọ rẹkhan ene uhi nan, rẹ sẹbhi ẹghe nin Jesu Kristi nin Ebeanlẹn mhan ha rẹ vae. Hẹi ji a miẹn okan soso bhi egbe nọnsẹ. 15 Ọne ẹghe nan rẹyi ha sẹ, ọne Ebeanlẹn Nọn Khua nin eghọnghọn yi ọsọle ki re egbe man. Ọle hi Ojie nọn nẹ ojie rebhe. Ọle yẹ hi Ebeanlẹn nọn nẹ ebeanlẹn rebhe. 16 Ọle ọkpa ọnọn ida sabọ yu. Ẹkẹ ẹfua ọle da nyẹnlẹn, a isabọ sẹbhi eji ọle ye. A bha miẹn ọria nọn sẹ ka daghe ọle khẹ, a bha miẹn ọria nọn ha sabọ daghe ọle. Ahu bi uyi hi ọsọle rẹ sẹbhi ighegheghe. Isẹ.

17 Taman ene fe bhi ọne agbọn* nan, nin ele hẹi ha tẹngbemun, nin ele hẹi mun udu nyan afe nọnsele nọn ha sabọ fo. Nin ele mun udu nyan Osẹnobulua nọn ne emhin rebhe nin mhan rẹ ha sọnyẹnmhẹn. 18 Yẹ taman ele nin ele ha lu iwẹnna esili. Ehe, nin ele manman ha lu iwẹnna esili. Sẹyẹ, nin ele wo ha zẹ emhin bhi obọ, nin ele hẹi ha siakhaẹn. 19 Ele ha lu ọnan, ele ki ha ne emhin ne ghanlẹn ya bhi obọ Osẹnobulua, emhin ne ghanlẹn nọn ha re ele ha mhọn ẹghe odalo nọn mhẹn. Ele ki sabọ fi obọ mun iẹnlẹn ọsaje.

20 Timoti, gbega ebi a mun uwẹ bhi obọ. Hẹi ha re ehọ ọbhi ọta ihoho ne ire ogẹn ji Osẹnobulua, sẹyẹ, hẹi ha re ehọ bhi ọta nin ẹbho ne riale ghe ele mhọn “ilẹnmhin” ta. Ene ọta nan bha diẹn mun ẹmhọanta. 21 Ranmhude ẹbho eso wo ha rẹman ghe ele mhọn ilẹnmhin nọn sẹ iriọ, ele da de sibhi oga re.

Mẹn bhii nin Osẹnobulua manman mhọn ifuẹkẹ da uwẹ.