EBE ỌZEVA NAN GBẸN JI IBHOKHAN TẸSẸLONAIKA

1 Pọl, Sivanọs,* bi Timoti gbẹn ọne ebe nan ji agbotu nọn ribhi Tẹsẹlonaika, nọn kugbe deba Osẹnobulua nin Aba mhan bi Jesu Kristi nin Ebeanlẹn mhan:

2 Mẹn bhii nin Osẹnobulua nin Aba imhan bi Jesu Kristi nin Ebeanlẹn imhan manman mhọn ifuẹkẹ da bha yẹ re ọfure nin bha.

3 Ibhio, ẹghe rebhe mhan rẹ khuẹnmhẹn Osẹnobulua ranmhude ibha. Ọnan wo khẹke, ranmhude, urẹọbhọ nọnsẹbha wo manman ha tuẹn okhun. Sẹyẹ, bha kie wo manman ha mhọn oyẹẹ da egbe. 4 Ọnan zẹle nin mhan da rẹ bha hio bhi ẹwẹ ene agbotu nesi Osẹnobulua. Arẹmiẹn bha kuẹlo da ekpokpo bi ọkakale, bha wo ha ziẹngbe. Bha yẹ wo ha re urẹọbhọ man. 5 Ene emhin nan wo rẹman ghe, uwedẹ nesi Osẹnobulua wo gba. Bhiriọ, bha dẹ le Ejele nọnsi Osẹnobulua bhi uku—ọne Ejele nọn zẹle nan da ha kpokpo ibha.

6 Emhin nọn gbale nọn bhi ẹlo nọnsi Osẹnobulua, nin ọle rẹ re oya nin ẹbho ne kpokpo ibha. 7 Ẹghe nin Jesu nin Ebeanlẹn mhan, bi ẹhi nesọle ne manman mhọn ahu ha rẹ na okhun vae,* ibha ne miẹn ekpokpo bhi egbe nian ki miẹn ọfubhegbe, imhan bi ibha. 8 Ele ki re eranlẹn vae. Ele ki mun ibhuohiẹn bu ẹbho ne bha lẹn Osẹnobulua bi ẹbho ne bha re obọ rẹkhan ọne ọta esili rẹji Jesu nin Ebeanlẹn mhan. 9 Ebeanlẹn mhan ki bhuohiẹn ene ẹbho nan. Ọle ki gbe ele khuelo sẹsẹsẹ. Ele iyẹ da ha ribhi iyalo nọnsọle. Ele iyẹ da daghe uyi ọsi ahu nọnsọle. 10 Ẹghe nin Ebeanlẹn mhan ha rẹ vae, ọle bi ene khiale dẹ miẹn uyi. Bhi ọne ẹghe nin, ọrebhe ne mhọn urẹọbhọ da ọle ki mun ekpẹn nanlẹn. Ibha ne re urẹọbhọ man ẹghe nin mhan rẹ sọsali man bha ki yẹ deba ele.

11 Ọnan zẹle nin mhan da nan erọnmhọn nin bha ẹghe rebhe, ghe, nin Osẹnobulua nọnsẹmhan ka bha ba ene ọle zẹle. Sẹyẹ, nin ọle re ahu nọnsọle rẹ lu emhin esili rebhe nin ọle guanọ nin ọle lu bhi egbe bha, yẹ lu ọle nin iwẹnna nin bha re urẹọbhọ lu kiọnlẹn, 12 beji a ha da miẹn Jesu nin Ebeanlẹn imhan ki miẹn uyi rẹ na obọ ibha, sẹyẹ, bha ki miẹn uyi nin bha rẹ kugbe deba ọle. Bha dẹ miẹn ọne uyi nan ranmhude ifuẹkẹ nọn khua nin Osẹnobulua bi Jesu Kristi nin Ebeanlẹn imhan mhọn da bha.

2 Ibhio, mẹn lẹnmhin ghe, bha khẹ ọne ẹghe nin Jesu Kristi nin Ebeanlẹn mhan ha rẹ vae,* bi ọne ẹghe nan ha rẹ ne mhan bu ọle. Sokpan, 2 bha hẹi jẹje fikekegbe emhin nin bha rẹọ i, la nin bha ha kpokpo egbe ranmhude ẹbho yọle ghe ukpẹdẹ nọnsi Jehova* sire. Bha hẹi lu iriọ, aharẹmiẹn ele yọle ghe, obọ Osẹnobulua ọne uhọnmhunje na vae, la ilẹta nin mhan gbẹnlẹn ele da tie ọle.

3 Bha hẹi ji ọria re uwedẹ soso rẹ hiẹ bha, ranmhude, ọkuẹsẹ ukpẹdẹ nọnsi Osẹnobulua vae, ẹbho dẹ ka sọtẹ da Osẹnobulua,* sẹyẹ, ọne okpea nọn gbuhi a ki zegbere. Ọle hi ọne a ha gbe khuelo. 4 Ọle ne Osẹnobulua ha suan, yẹ si egbe ọle okhun gbera osẹ kikẹ nin ẹbho ga. Ọle bhọ da dotua bhi uwa oga nọnsi Osẹnobulua. Ọle da ha lu bọsi ghe osẹ ọle khin bhi isira ẹbho. 5 Ẹghe nin mẹn rẹ ha ribhi ẹwẹ bha, mẹn wo ha ta ene ẹmhọn nan man bha. Ibha bha be yere?

6 Bha lẹn ebe sẹ mun ọlẹn mhọn nian, nọn zẹle nin ọle bha sẹ da zegbere. Ọle dẹ zegbere sade ẹghe ọle sẹle. 7 Bhi ọsi ẹmhọanta, ọne okpea nọn gbuhi a bhọ wẹnna fo. Ọkpakinọn, ẹkhokho ọle sẹ da ha gbe. Iriọ ọ da ha ye rẹ sẹbhi ẹghe nin ebe mun ọlẹn mhọnlẹn ha rẹ siegbe kie. 8 Ebe mun ọlẹn mhọn ha ki siegbe kie fo, ọle ki gbe dughere. Jesu nin Ebeanlẹn mhan dẹ re ẹlinmhin nọn ribhi unun nọnsọle rẹ gbe ọle a. Ọle ki re ọle obọ sotọ sẹsẹsẹ bhi ẹghe nin ọle ha rẹ vae.* 9 Ẹghe nin ọne okpea nọn gbuhi a ha rẹ zegbere, ọle ki ha lu emhin ọhan-ilo, yẹ ha lu emhin ọnyunuan rẹ hiẹ ẹbho. Esu hi ọnọn da ha noo ọle rẹ lu ene emhin nan. 10 Ọle ki ha lu emhin ne imhẹn rẹ hiẹ ẹbho ne ha miẹn ugbekhuelo. Ene ẹbho nan de miẹn ugbekhuelo ranmhude, ele bha ka re ọkhọle rebhe miẹn iman-emhin ọsi ẹmhọanta ọbhi egbe, beji ele ha da miuhọnmhọn. 11 Ọnin zẹle nin Osẹnobulua da zẹ ele obọ nan re iman-emhin ohoghe rẹ hiẹ ele. Ọle da zẹ ele obọ nin ele rẹọ bhi ohoghe 12 beji ọle ha da bhuohiẹn ele, ranmhude, ele bha rẹọ bhi ẹmhọanta. Ele da ji ebe imhẹn ha yẹẹ ele.

13 Ibhio mẹn nin Jehova* hoẹmhọnlẹn, ẹghe rebhe mhan rẹ khuẹnmhẹn Osẹnobulua nin bha. Ranmhude, rẹ na otọ ha de, ọle Osẹnobulua zẹ ibha nin bha dọ miẹn umiẹnfan. Ọle da yẹ re ẹlinmhin nọnsọle rẹ kpe ibha khia, ranmhude nin bha rẹ rẹọ bhi ẹmhọanta. 14 Ọne ọta esili nin mhan wewe, ọle Osẹnobulua rẹ tie bha nin bha dọ miẹn umiẹnfan, beji a ha da re uyi nin bha, beji a rẹ re uyi nin Jesu Kristi nin Ebeanlẹn mhan. 15 Bhiriọ, ibhio, bha mundia nọnsẹn, bha yẹ manman rẹọ bhi ene emhin nin mhan man bha ele, ọ ha rẹ ha yi unun mhan rẹ tale man bha, la ilẹta mhan gbẹn ji bha rẹ taman ibha. 16 Osẹnobulua nin Aba imhan hoẹmhọn mhan. Sẹyẹ, ranmhude ifuẹkẹ nọn khua nin ọle mhọn da mhan, ọle da re ikhuaẹloghe nọn mhẹn an nin mhan, yẹ re ikoudure nọn ha tọ sẹbhi ighegheghe nin mhan. Mhan bhii nin ọle bi Jesu Kristi nin Ebeanlẹn mhan 17 ko bha udu re yẹ mun bha ziẹn, beji bha ha da ha ta ọta nọn mhẹn yẹ lu emhin nọn mhẹn ẹghe rebhe.

3 Bhi ọkike ọle ibhio, bha wo ha nan erọnmhọn nin mhan, beji a ha da miẹn ghe, ọta nọnsi Jehova* ki ha vẹ. Sẹyẹ, ẹbho ki re ekpẹn miẹn ọlẹn bhi egbe beji bha rẹ miẹn ọlẹn ọbhi egbe. 2 Bha yẹ ha nan erọnmhọn nin mhan, nin Osẹnobulua miẹn mhan fan bhi obọ eria ne imhẹn, ranmhude, ọ iyi ẹbho rebhe rẹọ bhi Osẹnobulua. 3 A imiẹn ebi Osẹ tale nin ọle imunsẹ. Ọle dẹ mun bha ziẹn, yẹ gbega bha bhi obọ ọne ọria nọn imhẹn.* 4 Rẹ deba ọnin, imhan nin edibo nesi Ebeanlẹn mhan wo rẹọbhọ ghe, bha wo re obọ rẹkhan adia nin mhan re nin bha. Mhan yẹ wo rẹọbhọ ghe, bha dẹ wo ha lu iriọ rẹ ha khian. 5 Mẹn bhii nin Ebeanlẹn mhan wo ha dia ọkhọle nọnsẹbha, beji bha ha da sabọ hoẹmhọn Osẹnobulua, yẹ sabọ ziẹngbe beji bha rẹ rẹkhan Kristi.

6 Ejayenan nian ibhio, mhan taman ibha bhi elin nọnsi Jesu Kristi nin Ebeanlẹn mhan ghe, ahamiẹn ọria ribhi agbotu, nọn ilu emhin rẹkhan emhanmhan, nọn iyẹ re obọ rẹkhan emhin nin mhan man bha* le, bha hẹi yẹ nanlẹn muobọ. 7 Ibha tobọbha lẹn ebi bha ha rẹ re egbe khọkhọ mhan yẹ, ranmhude, mhan wo ha lu emhin rẹkhan emhanmhan ẹghe nin mhan rẹ ha ribhi ẹwẹ bha. 8 Mhan bha miẹn ọria ebale le bhi ọsọhẹ. Asọn bi odanmhẹn mhan rẹ wo ha miẹnsọn kaka, beji a ha da miẹn mhan bha kiẹn ihẹ rẹji bha. 9 Ọ iyi ọsi ghe, mhan irẹ sabọ miẹn bha emhin ọsọhẹ. Ọkpakinọn, mhan guanọ nin mhan re ijiẹmhin esili ọbhi otọ nin bha. 10 Ẹghe nin mhan rẹ ha ribhi ẹwẹ bha, ẹghe rebhe mhan rẹ wo ha taman ibha yọle: “Ahamiẹn ọria bha ho nin ọle wẹnna, bha hẹi ji ọle da le ebale.” 11 Mhan họn ghe, ẹbho eso bhi ẹwẹ bha ilu emhin rẹkhan emhanmhan. Ele bhọ imiẹnsọn hiehie. Ele lu obhebhezẹ khian bhi ẹmhọn nọn bha rẹtẹ ele. 12 Mhan re elin nọnsi Jesu Kristi nin Ebeanlẹn mhan rẹ bhii ẹbho ne sẹ iriọ, ghe, nin ele mun ekpẹn ọbhi egbe, ele ha yẹ miẹnsọn ọbhi ebale nin ele ha le.

13 Ibhio, bha sẹyẹ wo ha lu emhin esili, bha hẹi zobọ bhọ. 14 Ahamiẹn ọria soso ribhi ẹwẹ bha nọn bha ka re obọ rẹkhan ebi mhan ta bhi ọne ilẹta nan, bha yi ọle aman, bha ha rẹban ọlẹn beji ẹkhọle ha da ha lo ọle. 15 Sokpan, bha hẹi ne ọle lu emhin bọsi ghe oghian bha ọle khin. Bha yẹ wo ha re adia nanlẹn bọsi obhio.

16 Mẹn bhii nin Osẹ* ọsi ọfure wo ha re ọfure nin bha bhi emhin rebhe. Mẹn yẹ bhii nin ọle ne ibha rebhe dia.

17 Imẹn nin Pọl tuẹ ibha. Obọ imẹn mẹn rẹ gbẹn ọne otuẹ nan. Ọnan hi iyaman nin mẹn re bhi ebe rebhe nin mẹn gbẹn. Inian mẹn rẹ gbẹn ebe.

18 Mẹn bhii nin Jesu Kristi nin Ebeanlẹn mhan manman mhọn ifuẹkẹ da bha.