EBE ỌHẸNHẸN NAN GBẸN JI IBHOKHAN TẸSẸLONAIKA

1 Pọl, Sivanọs,* bi Timoti gbẹn ọne ebe nan ji agbotu nọn ribhi Tẹsẹlonaika, nọn kugbe deba Osẹnobulua nin Aba mhan bi Jesu Kristi nin Ebeanlẹn mhan:

Mhan bhii nin Osẹnobulua manman mhọn ifuẹkẹ da bha yẹ re ọfure nin bha.

2 Ẹghe rebhe mhan rẹ khuẹnmhẹn Osẹnobulua bhi erọnmhọn, ranmhude ibha. 3 Ẹghe rebhe mhan rẹ ye bha re bhi odalo Osẹnobulua nin Aba mhan, bhi ẹsọn nin bha miẹn ranmhude oyẹẹ bi urẹọbhọ nin bha mhọnlẹn. Mhan yẹ wo yere uwedẹ nin bha rẹ ha ziẹngbe ekpokpo, ranmhude ikhuaẹloghe nin bha mhọn da Jesu Kristi nin Ebeanlẹn mhan. 4 Ibhio mhan nin Osẹnobulua hoẹmhọnlẹn, mhan lẹnmhin ghe, Osẹnobulua zẹ ibha, 5 ranmhude, ẹghe nin mhan rẹ wewe ọne ọta esili man ibha, ọ iyi ọta khọnkhan ọkpa mhan noolo. Mhan da noo ẹlinmhin nọn khiale, yẹ rẹman bha ghe, mhan manman rẹọbhi ebi mhan taman bha. Ọnan da wo rẹso bha. Bha wo lẹn ebi mhan rẹ ne ibha lu emhin yẹ, ẹghe nin mhan rẹ ha ribhi ẹwẹ bha. 6 Bha da re egbe khọkhọ mhan, bi Ebeanlẹn mhan. Arẹmiẹn bha ribhi ekpokpo, bha da re eghọnghọn miẹn ọne ọta ọbhi egbe—eghọnghọn nin ẹlinmhin nọn khiale re nin ọria. 7 Idia nọnsẹbha da wo kiẹn ijiẹmhin esili rẹji ibhio mhan rebhe ne ribhi otọ Masẹdonia bi Akea.

8 Bhi ọsi ẹmhọanta, ọ iyi otọ Masẹdonia bi Akea ọkpa bha da wewe ọta nọnsi Jehova.* Ẹbho bhi ijerebhe bhọ họn ẹmhọn urẹọbhọ nin bha mhọn da Osẹnobulua, rẹ sẹbhọ ghe, emhin ebhebhe iyẹ ribhọ nin mhan ha gbo kie ha ta. 9 Ene ẹbho nan bhọ ki tale khian ebi mhan rẹ miẹn bha bhi ọsi ọhẹnhẹn yẹ, bi ebi bha rẹ fikekegbe ẹbọ nin bha rẹ ha ga yẹ, dọ ha ga Osẹnobulua nọn nyẹnlẹn, nọn yi Osẹ ọsi ẹmhọanta. 10 Bha da yẹ ha khẹ Ọmọn nọnsi Osẹnobulua nọn nabhi okhun vae—ọne Ọmọn nin ọle riọ kpanọ bhi uu. Ọne Ọmọn hi Jesu nọn miẹn mhan fan bhi ohu nọn vade.

2 Ibhio, bha lẹnmhin ghe, ẹnẹ nin mhan rẹ ji ibha bha ha yi ihoho. Elele wo nabhọre. 2 Bha yẹ lẹn ghe, arẹmiẹn mhan manman loya, sẹyẹ a re obọ oya mun mhan bhi Filipai, Osẹnobulua da rẹkpa mhan rẹ ha mhọn izebhudu, beji mhan ha da sabọ dọ ta ọta esili nọnsi Osẹnobulua man bha, arẹmiẹn a manman wo ha kpokpo imhan.* 3 Ọ iyi adia nọn bha gba mhan re nin bha. Ọ iyi ọkhọ ebe mhan rẹ re ọle nin bha. sẹyẹ, ọne adia iyi adia nọn ha hiẹ bha. 4 Osẹnobulua hi ọnọn zẹ imhan, yẹ mun ọne ọta esili nan mhan bhi obọ nin mhan dọ ha wewe. Bhiriọ, ọ iyi ebe ha ti eria bhọ mhan ta, ọkpakinọn, ebe ha ti Osẹnobulua bhọ. Ọle hi ọnọn fẹ ebe ri mhan bhi ọkhọle.

5 Bhi ọsi ẹmhọanta, bha lẹnmhin ghe, ẹghe bha ha ribhọ nin mhan rẹ re ikpunun ha gẹn bha. Mhan bhọ bha man ha lu ghe eria esili mhan khin, beji mhan ha da miẹn emhin bhi obọ ibha. Osẹnobulua bhọ lẹn ọnan! 6 Mhan bhọ bha ha guanọ ogẹn bhi obọ ọria soso, ọ ha rẹ ha yi bha, la ọria nọn hi ki rẹ khin. Ukọ nesi Kristi mhan khin. mhan ha rẹ sabọ kiẹn ihẹ rẹji bha, 7 ọkpakinọn mhan bha lu iriọ. Mhan da fẹkẹ ha gbẹloghe bha, beji inẹn rẹ gbẹloghe imọn nesọle. 8 Ranmhude ẹkẹ-ẹjẹjẹ nin mhan mhọn da bha, mhan da muegbe nin mhan rẹ tẹmhọn Osẹnobulua man bha. Ọ iyi ọnin ọkpa, mhan bhọ da muegbe nin mhan rẹ re egbe rebhe nọnsẹmhan rẹ rẹkpa bha, ranmhude, ẹmhọn bha da wo ha ti mhan bhọ.

9 Ibhio, bha wo yere ebi mhan rẹ wo ha miẹnsọn kaka yẹ. Asọn bi odanmhẹn mhan rẹ ha wẹnna, beji a ha da miẹn ghe, mhan bha dọ kiẹn ihẹ rẹji ọria soso bhi ẹwẹ bha, beji mhan rẹ tẹmhọn Osẹnobulua man bha. 10 Bha dẹ sabọ sọsali ọbhọ ghe, mhan wo sun rẹkhan bha, yẹ ha nyẹnlẹn iẹnlẹn nọn khiale. Mhan da yẹ ha lu ebe khẹke bhi ẹwẹ bha. Osẹnobulua bhọ dẹ sabọ sọsali ọbhi ọnan. 11 Bha lẹnmhin ghe, mhan wo ha re ibhude nin bha yẹ ko bha udu re. Mhan da yẹ wo ha re adia nin ọdeọde bhi ẹwẹ bha, beji aba rẹ dia imọn nesọle. 12 Mhan da lu iriọ beji bha ha da ha lu emhin bhi uwedẹ nọn khẹke ene ga Osẹnobulua. Osẹnobulua hi ọnọn tie bha vae bhi Ejele nọnsọle, beji bha da dọ ha mhọn uyi.

13 Ọnan zẹle nin mhan da khuẹnmhẹn Osẹnobulua ẹghe rebhe. Ẹghe nin mhan rẹ ta ọta nọnsi Osẹnobulua man bha, bha da wo miẹn ọlẹn ọbhi egbe. Ibha bha ha ghe ọle bii ọta ọsi eria. Bha da rẹọbhọ ghe ọta nọnsi Osẹnobulua nọn. Gene-gene, ọta nọnsi Osẹnobulua nọn. Ọne ọta nan wo ha wẹnna bhi egbe nọnsẹbha. 14 Ibhio, inian bha diabe agbotu nesi Osẹnobulua ne ribhi Judia ne kugbe deba Jesu Kristi, ranmhude, uwedẹ nin ele rẹ le oya bhi obọ ibhokhan Ju, iriọ bha yẹ rẹ le oya bhi obọ ibhokhan agbaẹbho nọnsẹbha. 15 Ene ibhokhan Ju nan hi ene gbe Jesu nin Ebeanlẹn mhan an. Ele hi ene gbe ene akhasẹ a, ele hi ene yẹ ha kpokpo mhan. Ọ iyi ebe ha ti Osẹnobulua bhọ ele lu, sokpan, ebe ida mhẹn ẹbho bhi egbe ele lu, 16 ranmhude, ele wo ha gbe odan ọbhọ nin mhan hẹi tẹmhọn Osẹnobulua man ẹbho ne iyi ibhokhan ju, beji a ha da miẹn ghe ele bha miuhọnmhọn. Ọnan wo re emhin ebe nọnsele ha bun ọbhọ. Osẹnobulua dẹ kẹ re ohu nọnsọle man bhi egbe nọnsele.

17 Ibhio, ẹghe nin mhan rẹ sibhi ẹwẹ bha re bhi ọbhi ẹghe khere, (arẹmiẹn ọkhọle nọnsẹmhan ribhi eji bha ye), ẹlo bha da wo manman ha nyan mhan. Bhiriọ, mhan da wo manman dọnmhegbe, nin mhan rẹ dọ miẹn bha ẹlo. 18 Ranmhude ọnan, mhan da mhanmhanlẹn nin mhan rẹ dọ miẹn ibha. Ọ bhọ sẹbhi igba eva nin mẹn nin Pọl mhanmhanlẹn nin mẹn rẹ dọ miẹn ibha. Ọkpakinọn, Esu da de mhan idobolo. 19 Be bhọ emhin nọn re ikhuaẹloghe nin mhan, nọn rẹ mhan ghọnghọn, bi elele* nan ha re nin mhan bhi odalo Jesu nin Ebeanlẹn mhan ẹghe nin ọle ha rẹ vae?* Ọ ibe yi bha? 20 Ehe, ibha nọn, ibha hi uyi nọnsẹmhan bi ebe re imhan ghọnghọn.

3 Mhan ki kere ghe mhan bha sabọ dọ fẹ bha ghe, mhan da fẹkẹ debhi Atẹns a. 2 Mhan da ki je Timoti nin obhio mhan bu bha. Ọguọmhandia nọnsi Osẹnobulua* ọle khin, nọn wo ha tẹmhọn Kristi. Mhan da je ọle nin ọle dọ ko bha udu re yẹ mun bha urẹọbhọ ziẹn, 3 beji a ha da miẹn ghe, ekpokpo nin bha kuẹlo da bha re ibha ha beghe bhi oga. Ibha tobọbha bhọ lẹnmhin ghe imhan rebhe dẹ loya emhin ne sẹ inian. 4 Bha lẹnmhin ghe, ẹghe nin mhan rẹ ha ribhi ẹwẹ bha, mhan wo ka taman ibha ghe, mhan dẹ miẹn ekpokpo bhi egbe. Ọne ekpokpo mhan miẹn bhi egbe nian. 5 Ọnin zẹle beji a miẹn ghe imẹn bha sẹ sabọ sẹbhi eji bha ye, imẹn da je ọria nọn dọ fẹghe si bha sẹyẹ ha lu nọnsẹn bhi oga. Ranmhude, asabọmiẹn ghe, Ojuu* re ibha lu emhin ebe. Ẹghenin, ẹsọn nin mhan miẹn bhi egbe ibha ki kiẹn ihoho.

6 Ọkpakinọn, Timoti wo na bhi eji bha ye vae nian. Ọle wo taman mhan emhin esili kẹkẹ rẹji bha. Ọle taman mhan ghe bha wo ha lu nọnsẹn bhi oga, sẹyẹ, bha wo re ahoẹmhọn-egbe man. Ọ da yẹ yọle ghe bha wo ria ẹmhọn mhan, ghe, ẹlo mhan nyan bha, beji ẹlo bha yẹ rẹ nyan mhan. 7 Ibhio, arẹmiẹn mhan wo kuẹlo da ọkakale bi ekpokpo, ẹmhọn bha bi urẹọbhọ nin bha rẹman wo ha ko mhan udu re. 8 Ọ re ahu do mhan bhọ rẹ lẹn ghe, bha sẹyẹ mundia nọnsẹn bhi oga. 9 Mhan wo manman khuẹnmhẹn Osẹnobulua, ranmhude, ẹmhọn bha manman wo rẹ mhan ghọnghọn. 10 Asọn bi odanmhẹn mhan rẹ wo bhii Osẹnobulua nin ọle rẹkpa mhan rẹ sabọ dọ miẹn ibha, beji mhan ha da ziẹn urẹọbhọ nọnsẹbha.

11 Ejayenan nian, mhan bhii nin Osẹnobulua nin Aba mhan bi Jesu nin Ebeanlẹn mhan rẹkpa mhan, nin mhan sabọ dọ fẹ bha ghe. 12 Rẹ deba ọnin, mhan bhii nin Ebeanlẹn mhan rẹkpa bha rẹ manman hoẹmhọn egbe, yẹ hoẹmhọn ẹbho rebhe, beji mhan rẹ manman hoẹmhọn bha. 13 Bhiriọ, ọkhọle nọnsẹbha ki sabọ deziẹn. Okan ida ha ri bha bhi egbe. Bha ki ha yi eria ne khiale bhi ẹlo nọnsi Osẹnobulua nin Aba mhan, bhi ẹghe nin Jesu nin Ebeanlẹn mhan bi ene khiale rebhe nesọle ha rẹ vae.*

4 Ibhio, mhan ka taman ibha khẹ uwedẹ nọn khẹke nin bha rẹ ha lu emhin, nọn ha ti Osẹnobulua bhọ. Bha da wo gene re iriọ ha lu emhin. Ọrẹyiriọ, mhan kie taman ibha yẹ bhii bha bhi elin ọsi Jesu nin Ebeanlẹn mhan nin bha sẹyẹ situa ha lu iriọ. 2 Bha wo lẹn ene adia nin mhan re nin bha. Obọ Jesu nin Ebeanlẹn mhan ene adia na vae.

3 Ọnan hi ebi Osẹnobulua guanọ bhi obọ ibha. Ọle guanọ nin bha ha yi eria ne khiale, bha ha yẹ rẹban oghẹ.* 4 Ọkhẹke nin ọdeọde bhi ẹwẹ bha lẹn ebi ọle ha rẹ ha mun egbe nọnsọle ọbhi ibẹẹ yẹ, beji egbe nọnsọle ha da ha yi egbe nọn khiale nin ekpẹn yẹ ye. 5 Ọ bha khẹke nin bha re egbe khọkhọ ẹbho ne bha lẹn Osẹnobulua. Ele isabọ mun egbe ọbhi ibẹẹ bhi ẹmhọn inegbenowẹ. Sẹyẹ, ọ ikhan ele. 6 Ọria soso hẹi lu gbera ughu bhi ọne ẹmhọn nan, yẹ lu ebe imhẹn da obhio ọle. Ranmhude Jehova* dẹ re oya nin ọria nọn hi ki rẹ khin nọn lu emhin ne sẹ inian. Bha yere ghe, mhan ka ta ene ẹmhọn nan man bha, yẹ manman sekha nin bha. 7 Osẹnobulua tie bha nin bha dọ ha yi eria ne khiale, ọ iyi nin bha rẹ dọ ha nyẹnlẹn iẹnlẹn esankan. 8 Bhiriọ, ọria nọn hi ki rẹ khin nọn re ẹlo gbe ọne adia nan an, Osẹnobulua nọn re ẹlinmhin nọn khiale nin bha, ọle ọ re ẹlo gbe a, ọ iyi eria.

9 Mhan ida gbo kie ha gbẹn ebe ji bha nin mhan rẹ taman ibha ghe nin bha hoẹmhọn egbe bha bọsi ene ribhi azagba-uwa ọkpa, ranmhude Osẹnobulua ki ka man bha le ghe ọkhẹke nin bha hoẹmhọn egbe bha. 10 Bhi ọsi ẹmhọanta, bha bhọ wo ha re oyẹẹ man ibhio bha ne ribhi otọ Masẹdonia. Ọkpakinọn, mhan bhii bha nin bha sẹyẹ wo manman ha lu iriọ. 11 Bha hẹi ha lu obhebhezẹ bhi ẹmhọn nọn bha rẹtẹ bha. Bha dọnmhegbe nin bha rẹ fẹkẹ ha khian okhian ọsẹbha, bha ha yẹ re obọ nọnsẹbha ha wẹnna, beji mhan ka rẹ gbuhi nin bha. 12 Ẹghenin, eria ne iga Osẹnobulua ki daghe ọle ghe, eria ne nyẹnlẹn nọnsẹn bha khin. Sẹyẹ bha ki ha mhọn emhin rebhe nin bha guanọ.

13 Ibhio, rẹ deba ọnin, mhan guanọ nin bha lẹn ebe ha sunu ji eria ne yulu,* nin bha hẹi dọ ha lu akhiẹ bii eria ne imhọn ikhuaẹloghe. 14 Mhan rẹọbhọ ghe, Osẹnobulua riọ Jesu kpanọ bhi uu. Bhiriọ, mhan yẹ rẹọbhọ ghe, Osẹnobulua dẹ riọ edibo nesi Jesu ne yu* kpanọ bhi uu, ne dọ deba Jesu. 15 Beji Jehova* tale, bha lẹn sẹbhọ ghe, imhan ne nyẹnlẹn sẹbhi ẹghe nin Ebeanlẹn mhan ha rẹ vae,* ida ka ene yulu ha khian okhun. 16 Ẹghe nin Ebeanlẹn mhan ha rẹ na bhi okhun vae, ọle dẹ re akala ọsi Osẹnobulua mhọnlẹn. A ki họn ukpurulu nọnsọle—ukpurulu ọsi ọdiọn ene ẹhi. Ẹghenin, edibo nesi Kristi ne yu ki ka riọkpanọ. 17 Ele ha ki riọkpanọ fo, imhan ne nyẹnlẹn sẹbhi ẹghe nin Ebeanlẹn imhan ha rẹ vae ki rẹkhan ele. A ki ne mhan kpanọ bhi adudu amẹn, nin mhan dọ bu Ebeanlẹn mhan bhi ideghedeghe. Eji Ebeanlẹn mhan ye mhan ha ki ha ye rẹ ha khian. 18 Bha wo re ene ẹmhọn nan ha ko ibhio bha udu re.

5 Ibhio, ọ bha khẹke nin mhan gbo ha gbẹn ebe ji bha rẹ taman ibha ẹmhọn ọne ẹghe nin Osẹnobulua rẹyi. 2 Ranmhude ibha tobọbha ka wo lẹn khẹ ghe, beji oyi rẹ na ọria bhi uwa ọsasọn, iriọ ukpẹdẹ nọnsi Jehova* ha rẹ vae. 3 Bhi ọne ẹghe nin ẹbho ha rẹ ha yọle, “Mhan mhọn ọfure bi ogbaga!” ugbekhuelo ki re osukpa bu ele re, beji ubiẹmhin rẹ re osukpa lu okhuo nọn hanmhan. Ele ida miuhọnmhọn bhi ọne ẹghe nin. 4 Bhi ọsẹbha, ranmhude bha iribhi ebiuki, ọne ukpẹdẹ nin ida mun bha ikenegbe, bọsi oyi nin ẹdẹ we kere. 5 Imọn ọsi ẹfua bi ọsi odanmhẹn bha rebhe khin. Mhan ikhian bhi ọsasọn la ebiuki.

6 Bhiriọ, ọ bha khẹke nin mhan wẹ fia beji ẹbho nekẹle lu. Bha ji mhan ha babegbe, mhan ha yẹ ji ẹwanlẹn gba nin mhan. 7 Ọsasọn ẹbho rẹ wẹ. Sẹyẹ, ọsasọn ẹbho rẹ da anyọn gbe egbe. 8 Sokpan, rẹji mhan ne khian bhi odanmhẹn, ọkhẹke nin mhan ji ẹwanlẹn gba nin mhan. Ọkhẹke nin mhan mun awegbe ẹlọnmhọn ọsi urẹọbhọ bi oyẹẹ yọ. Ọ yẹ khẹke nin mhan mun ukparu ẹlọnmhọn ọsi ikhuaẹloghe yọ, ọnin hi, umiẹnfan nin mhan khuaẹloghe. 9 Osẹnobulua zẹ mhan, beji ọle ha da re umiẹnfan nin mhan rẹ na obọ Jesu Kristi nin Ebeanlẹn mhan, ọ iyi ranmhude ọle ho nin ọle fuẹn mhan an. 10 Jesu da yu nin mhan, beji a da miẹn ghe, aharẹmiẹn mhan ribhi agbọn la mhan yulu,* mhan ki sabọ deba ọle ha nyẹnlẹn. 11 Bhiriọ, bha wo ha re izebhudu nin egbe, bha ha yẹ ha bọn egbe okhun beji bha ka wo lu khẹ.

12 Ejayenan nian ibhio, mhan guanọ nin bha ha mun ekpẹn nin ene wo ha wẹnna kaka bhi ẹwẹ bha, ne sun ibha bhi oga yẹ re adia nin bha. 13 Bha wo manman ha re oyẹẹ bi ifuẹkẹ man ele, ranmhude iwẹnna nin ele lu. Bha deba ọrebhe ha ribhi ọfure. 14 Rẹ deba ọnin, bha gbuhi nin eria ne ilu emhin rẹkhan emhanmhan. Bha re ẹkẹ-ẹjẹjẹ ne ẹbho nin egbe lọle* talọ. Bha rẹkpa ene wẹghẹ, bha yẹ re iziẹngbe ha ne ọrebhe lu emhin. 15 Bha hẹi re ọbe rẹ haosa ọbe. Bha wo ha lu emhin ne mhẹn da ibhio bha, bi ẹbho nekẹle.

16 Bha ha ghọnghọn ẹghe rebhe. 17 Bha ha nan erọnmhọn ẹghe rebhe. 18 Bha ha gbe ekhuẹnmhẹn bhi emhin rebhe. Ọnan hi ebi Osẹnobulua guanọ bhi obọ ene rẹkhan Jesu Kristi. 19 Bha ji eranlẹn ọsi ẹlinmhin nọn khiale ha nyọn bhi egbe nọnsẹbha. Bha hẹi fuẹn ọlẹn an. 20 Bha hẹi ha ghe ọta akhasẹ bii ebe bha lu uhọnmhọn emhin. 21 Bha ha fẹ otọ emhin rebhe ghe. Bha ha lu emhin nọn mhẹn ẹghe rebhe. 22 Bha rẹban emhin nọn hi ki rẹ khin nọn imhẹn.

23 Ibhio, mẹn bhii nin Osẹnobulua ọsi ọfure kpe bha khia sẹsẹsẹ. Sẹyẹ, nin iẹnlẹn* nọnsẹbha, ikpẹ esili nin bha mhọnlẹn, bi egbe nọnsẹbha gba fo sẹsẹsẹ, yẹ kiẹn emhin nin okan iye, rẹ sẹbhi ukpẹdẹ nin Jesu Kristi nin Ebeanlẹn mhan ha vae.* 24 Mhan rẹọbhọ ghe, Osẹnobulua nọn tie bha, dẹ gene lu ene emhin nan, ranmhude, a imiẹn ebi ọle tale nin ọle imunsẹ.

25 Ibhio, bha wo ha nan erọnmhọn nin mhan.

26 Bha tuẹ ene ibhio mhan rebhe mun egbe nọnsẹn.*

27 Mẹn re elin ọsi Ebeanlẹn mhan rẹ bhii bha, nin bha dọnmhegbe rẹ tie ọne ilẹta nan man ene ibhio mhan rebhe.

28 Mẹn bhii nin Jesu Kristi nin Ebeanlẹn imhan manman mhọn ifuẹkẹ da bha.