EBE NAN GBẸN JI IBHOKHAN KOLOSE

1 Imẹn nin Pọl nin Osẹnobulua rẹ kiẹn odibo nọnsi Jesu Kristi bi Timoti nin obhio mhan 2 je ọne ilẹta nan ji ene khiale, ehe, ibhio mhan ne ribhi Kolose ne sun rẹkhan Kristi:

Mẹn bhii nin Osẹnobulua nin Aba mhan manman mhọn ifuẹkẹ da bha yẹ re ọfure nin bha.

3 Ẹghe rebhe mhan rẹ khuẹnmhẹn Osẹnobulua nin Aba Jesu Kristi nin Ebeanlẹn mhan, sade mhan nan erọnmhọn nin bha, 4 ranmhude, mhan wo họn ẹmhọn urẹọbhọ nin bha mhọn da Jesu Kristi bi oyẹẹ nin bha mhọn da ene khiale rebhe, 5 ranmhude elele nọn khẹ bha bhi okhun. Ẹghe nan rẹ wewe ẹmhọn ọne ọta nọn mhẹn man bha, ẹghenin bha rẹ họn ẹmhọn ọne ikhuaẹloghe nan. 6 Beji ọne ọta esili rẹ ha tuẹn okhun bhi ẹkẹ agbọn, sẹyẹ, ẹbho ne bunbun wo ha miẹn ọlẹn ọbhi egbe, iriọ ọ yẹ rẹ ha tuẹn okhun bhi ẹwẹ bha, rẹ na bhi ukpẹdẹ nin bha họn ẹmhọn ifuẹkẹ nọn khua nin Osẹnobulua rẹman, yẹ gene lẹn otọ ọle nọnsẹn. 7 Obọ Ẹpafras nin obhio mhan nin mhan ko ga, ọle bha da luẹ ọnan. Ọle wo re ọkhọle rebhe ha miẹnsọn nin Kristi nin ọle rẹ rẹkpa mhan. 8 Ọle da yẹ taman imhan ebi ẹlinmhin nọn khiale rẹ rẹkpa bha rẹ ha re oyẹẹ man yẹ.

9 Ọnin zẹle rẹ nabhi ukpẹdẹ nan taman mhan, mhan da wo ha nan erọnmhọn nin bha, yẹ bhii Osẹnobulua nin ọle re ilẹnmhin nọn gbale ọsi iho nọnsọle nin bha, yẹ re ẹwanlẹn nin bha bhi emhin rebhe. Sẹyẹ, nin ọle rẹkpa bha rẹ lẹn otọ emhin rebhe, 10 beji bha ha da ha lu emhin bii eria ne ga Jehova.* Bhiriọ, bha ki sabọ re ọle ha ghọnghọn. Bha ki ha lu emhin esili rebhe, yẹ ha tuẹn okhun bhi ilẹnmhin nọn gbale nọnsọle. 11 Mhan bhiili nin Osẹnobulua nọn manman mhọn ahu bi uyi mun bha ziẹn, beji bha ha da sabọ ziẹngbe emhin rebhe, yẹ re eghọnghọn ha khẹ ọle. 12 Bha yẹ wo ha khuẹnmhẹn ọne Aba nọn re ibha sẹ eria ne ha deba ene khiale ne wo ha khian bhi ẹfua, le ọne uku.

13 Ọle da ne mhan sibhi ebiuki re, yẹ ne mhan re bhi ejele ọsi Ọmọn nọnsọle nin ọle hoẹmhọnlẹn. 14 Ọmọn nọnsọle ọle noolo rẹ dẹ mhan kiere, yẹ rẹ gbe olukhọ nọnsẹmhan kua. 15 Ọne Ọmọn hi arẹkhọkhọ ọsi Osẹnobulua nan idaghe. Ọle hi ọhẹnhẹn bhi emhin rebhe nan manlẹn.* 16 Ọle Osẹnobulua noolo rẹ man emhin rebhe ne ribhi otọ bi okhun, emhin nan daghe bi emhin nan idaghe, rẹ sẹbhi ejele, ugbẹloghe la ahu. Ọle Osẹnobulua noolo rẹ man emhin nekẹle rebhe, ọle yẹ nyan ele. 17 Ọle ribhi agbọn fo, ọkuẹsẹ a man emhin nekẹle rebhe. Ọle hi ọne a noolo rẹ man ene emhin nekẹle rebhe. 18 Ọle hi ọnọn re ọne agbotu khian. Ọne agbotu hi egbe nọnsọle. Ọle hi umunhẹn ọsi emhin rebhe. Ọle hi ọria ọhẹnhẹn nọn riọ kpanọ bhi uu. Bhiriọ, ọle hi ọria ọhẹnhẹn bhi emhin rebhe. 19 Emhin da dia nian, ranmhude, Osẹnobulua wo ha guanọ nọn gba nanlẹn bhi emhin rebhe. 20 Osẹnobulua da noo ọle rẹ kie si emhin rebhe kẹ egbe. Ọle da re aranlẹn nin Jesu jiẹn kua bhi okhun oran* rẹ lu ọle, nin emhin ne ribhi otọ, bi emhin ne ribhi okhun deba ọle ha ribhi ọfure.

21 Bhi ọsi ẹmhọanta, ibha bha ka rẹ lẹn Osẹnobulua khẹ, bha da yẹ ha yi eghian nesọle, ranmhude, emhin ne imhẹn, ele ha ri bha bhi ọkhọle. 22 Ọkpakinọn, ejayenan nian, ọle noo egbe nọnsi Jesu nọn yu rẹ kie si bha kẹ egbe, beji a ha da miẹn bhi ẹlo nọnsọle, bha ki ha yi eria ne khiale, bi eria ne imhọn okan bhi egbe, sẹyẹ a ida miẹn eji bha da fidọn. 23 Ọkpakinọn, ọkhẹke nin bha mun urẹọbhọ nọnsẹbha mhọn nọnsẹn, bha ha yẹ deziẹn bhi ọne ayotọ. Bha hẹi beghe, bha hẹi mun ọkhọle sibhi ikhuaẹloghe nin bha dọ ha mhọnlẹn re ẹghe nan rẹ ta ọne ọta nọn mhẹn man bha, nan yẹ ta bhi otọ agbọn rebhe. Ọne ọta nọn mhẹn nan ọle Osẹnobulua mun mẹn nin Pọl bhi obọ nin mẹn dọ ha wewe.

24 Arẹmiẹn mẹn wo ha loya ba ẹmhọn bha, mẹn yẹ wo ghọnghọn. Mẹn wo ha loya ranmhude Kristi, ọkpakinọn, mẹn bha sẹ le ọne oya fo. Ọne oya nin mẹn le nan, dẹ re ọmhẹn ji egbe ọsi Kristi, ọne egbe hi ọne agbotu. 25 Osẹnobulua hi ọnọn zẹ imẹn nin mẹn ha yi ọguọmhandia nọnsọle, beji mẹn ha da ha rẹkpa ọne agbotu. Ọnan zẹle nin mẹn da re egbe rebhe rẹ tẹmhọn Osẹnobulua. 26 Mẹn wo ha tẹmhọn ọne ọta ẹkhokho nan. A ka re ọle nẹhe rẹ na otọ ha de. Ẹbho ne nyẹnlẹn bhi ẹghe nọn gbera bha lẹn ọne ọta ẹkhokho nan. Ọkpakinọn, ejayenan nian, a re otọ ọle man ene khiale. 27 Ọ da wo yẹẹ Osẹnobulua nin ọle rẹ re ọne ọta ẹkhokho nan man ene khiale ne ribhi ẹwẹ ene iyi ibhokhan Ju. Emhin nọn ghanlẹn ọne ọta ẹkhokho nan khin. Ọne ọta ẹkhokho nan, ọle hi ghe, bha kugbe deba Kristi, ehe, ibha deba ene ha gha bhi uyi nọnsọle. 28 Ẹmhọn Jesu ọle mhan wewe khian. Mhan wo ha re adia nin ọrebhe, yẹ re ẹwanlẹn man ọrebhe emhin, yẹ rẹkpa ọrebhe ne kugbe deba Kristi rẹ kiẹn eria ne gbale bhi odalo Osẹnobulua. 29 Ranmhude ọnan, mẹn wo ha wẹnna kaka. Mẹn wo manman ha noo ahu nin Osẹnobulua re nin mẹn.

2 Mẹn guanọ nin bha lẹn ebi mẹn rẹ wẹnna kaka yẹ nin mẹn rẹ rẹkpa bha, yẹ rẹkpa ene ribhi Laodesia, bi nin mẹn rẹ rẹkpa ẹbho nin mẹn bi ele bhọ bha sẹ miẹn egbe. 2 Ebezẹle nin mẹn da lu ọnan, ọle hi ghe, mẹn guanọ nin udu nọnsẹbha lọre. Mẹn guanọ nin bha hoẹmhọn egbe ibha, yẹ ha mhọn okugbe. Mẹn yẹ guanọ nin bha miẹn elele* ne ha na bhi emhin nin bha lẹn otọ ọle re, yẹ ha mhọn ilẹnmhin nọn gbale ọsi ọta ẹkhokho nọnsi Osẹnobulua. Ọne ọta ẹkhokho nan hi Kristi. 3 Egbe Jesu, a da ne ẹwanlẹn bi ilẹnmhin rebhe ya. 4 Ranmhude mẹn bha guanọ nin ọria re ọta elẹlẹ rẹ hiẹ bha, ọle zẹle nin mẹn da ta ọnan. 5 Arẹmiẹn mẹn iribhi eji bha ye, ọkhọle nọnsẹmhẹn ribhi enin. Uwedẹ nin bha rẹ lu emhin rẹkhan emhanmhan, bi uwedẹ nin urẹọbhọ nin bha mhọn da Kristi rẹ deziẹn, wo re imẹn ghọnghọn.

6 Bhiriọ, beji a miẹn bha miẹn Jesu Kristi nin Ebeanlẹn mhan ọbhi egbe, bha sẹyẹ wo ha nyẹnlẹn bọsi edibo nọnsọle. 7 Beji bha luẹle, ọkhẹke nin bha bọn urẹọbhọ nọnsẹbha nyan Kristi, bha ha yẹ fi iniẹn mun otọ nọnsẹn. Bha yẹ manman deziẹn, bha yẹ wo ha re ekhuẹnmhẹn ji Osẹnobulua.

8 Bha mhọn ẹwanlẹn. Bha hẹi ji ọria soso noo ẹwanlẹn ọsi ọne agbọn nan, bi ọta ohoghe rẹ mun bha gba. Emhin ọsi ọne agbọn nan bi akerebhotọ ọsi eria, ọle ene ọta nan diẹn mun. Ene ọta nan bha diẹn mun iman-emhin ọsi Kristi. 9 Kristi hi ọnọn re ikpẹ esili rebhe nesi Osẹnobulua man. 10 Re na obọ ọle, ibha yẹ mhọn emhin esili rebhe nin bha guanọ. Ahu rebhe bi ugbẹloghe rebhe ribhi odotọ ọle. 11 Ranmhude ibha dọ kugbe deba ọle, bha da kiẹn eria ne ruẹle. Ọne uruẹmhin nan iyi ọne a re obọ lu. Ebi ọ mundia nan hi nan rẹ mun egbe olukhọ fia. Iriọ edibo nesi Kristi rẹ ruẹ. 12 Osẹnobulua re ibha tọ deba Kristi bhi imianmẹn nọnsọle. Ranmhude ibha kugbe deba Kristi, Osẹnobulua nọn riọ ọle kpanọ bhi uu, da yẹ riọ bha kpanọ deba ọle, ranmhude nin bha rẹ rẹọbhi iwẹnna ọhan-ilo nesọle.

13 Eria ne yuno bha rẹ ka ha khin, ranmhude olukhọ nesẹbha, bi ranmhude ibha bha ruẹ. Ọkpakinọn, Osẹnobulua da re iẹnlẹn nin bha, yẹ lu ọle nin bha kugbe deba ọle. Ọle da tohan mhan yẹ rẹhunmhan olukhọ nesẹmhan. 14 Ọle da gbo ọne uhi nan re obọ gbẹn an. Ọne uhi nan rẹ ha de mhan idobolo. Ọle da re ọne idobolo sibhi odẹ re nin mhan, yẹ khan ọlẹn ọbhi okhun oran* nan khan Jesu ọi. 15 Rẹ na obọ ọle, ọle khọn ahu rebhe bi ugbẹloghe rebhe miotọ. Ọle banọn ele a yẹ re ele man bhi ughe, bọsi ẹbho nan muno bhi okhọn.

16 Bhiriọ, bha hẹi ji ọria soso ha gbuhi nin bha rẹji ẹmhọn ebale bi anyọn, la bhi ẹmhọn iluemhin ọsi uki ọgbọn, la ukpẹdẹ Sabati, la iluemhin nọn hi ki rẹ khin. 17 Emhin ne ha sunu bhi ẹghe odalo, ọle a re ene emhin nan khọkhọ. Egbe Kristi ene emhin da munsẹ. 18 Bha mhọn ẹwanlẹn bhi egbe ọria nọn hi ki rẹ khin nọn man lu bọsi ghe ọle mhọn idegbere, nọn yẹ ga ẹhi.* Ọria nọn sẹ inian dẹ sabọ de ibha idobolo nin bha hẹi miẹn ọne elele. Emhin nin ọle daghe, ọle ọkpa ọle wo rẹọ i.* Emhin ne bha kiọnlẹn nin ọle ria bhi ọkhọle, ọle ọle rẹ dẹgbọ. 19 Ọria nọn sẹ inian bha kugbe deba ọne uhọnmhọn. Ọne uhọnmhọn, ọle re emhin rebhe nin ọne egbe. Ako-uguẹ bi iniẹn kẹkẹ ne ribhi ọne egbe, ele ku obọ kẹkẹ ọsi ọne egbe kugbe. Osẹnobulua hi ọnọn re ọne egbe ha wanre.

20 Ahamiẹn ghe bha deba Kristi yu, yẹ re obọ sibhi emhin ọsi ọne agbọn nan re, bezẹle nin bha da sẹyẹ nyẹnlẹn bọsi ghe, ibo ọsi ọne agbọn nan bha yẹ ye? Bezẹle nin bha da sẹyẹ re obọ rẹkhan uhi ọsi ọne agbọn nan? 21 Uhi bọsi: “Bha hẹi re emhin nọn sẹ inian, bha hẹi le emhin nọn sẹ inian, la bha hẹi re obọ so emhin nọn sẹ inian.” 22 A ha noo ene emhin nan fo, ele ki fo. Iman-emhin ọsi eria ene uhi nan khin. 23 Arẹmiẹn ene emhin nan diabe emhin nin ẹwanlẹn ye, ọ ida sabọ rẹkpa ọria rẹ khọn ebi egbe guanọ. Ẹbho ne lu ene emhin nan, ele tobele zẹ uwedẹ nin ele rẹ ga. Ele ki ha re oya nin egbe ele, ranmhude ele guanọ ne ẹbho ha ghe ele bii eria ne mhọn idegbere.

3 Bhiriọ, beji a miẹn a riọ bha kpanọ deba Kristi, bha ha khu ọbhi emhin ne ribhi okhun, bhi eji Kristi da dotua bhi obera nọnsi Osẹnobulua. 2 Bha mun ọkhọle ọbhi emhin ne ribhi okhun, ọ iyi emhin ne ribhi ọne otọ nan. 3 Ranmhude, ẹghe nin bha rẹ yu, a da re iẹnlẹn nọnsẹbha he ba Kristi, nọn ribhi ibo nọnsi Osẹnobulua. 4 Ẹghe nan ha rẹ re Kristi, nin iẹnlẹn nọnsẹmhan man, a ki yẹ rẹ bha man. Bha ki yẹ deba ọle miẹn uyi.

5 Bha lu ọle nin egbe nọnsẹbha gbin, beji a da miẹn ibha bha lu emhin nin egbe nọnsẹbha guanọ. Emhin bọsi igboghẹ,* emhin ne bha khia, nin ẹmhọn inegbenowẹ rẹ vẹ ọria bhi uhọnmhọn, nin emhin ne si ikuan-egbe re rẹ ha yẹẹ ọria, bi nin ọria rẹ ha mhọn ẹlobhọ. Igẹbọ ọle ẹlobhọ khin. 6 Osẹnobulua dẹ bhuohiẹn ẹbho ne lu emhin ne sẹ inian. 7 Iriọ bha ka rẹ ha nyẹnlẹn khẹ. 8 Ọkpakinọn, ejayenan nian, ọkhẹke nin bha re obọ sibhi ene emhin nan rebhe re: ohu, ẹkẹkhọmhin, ọkhọlọ, bi ihẹn nan ghunmhun. Ọ bha yẹ khẹke nin bha re unun nọnsẹbha ha ta ọta esankan. 9 Bha hẹi ha bha ohoghe man egbe. Bha kuọ unan ọria nin bha ka rẹ ha khin, bi uwedẹ nin bha ka rẹ ha lu emhin. 10 Bha kiẹn unan ọria ọsọgbọn, bha mun ọlẹn yọ bọsi ukpọn. Bha ji ọria ọsọgbọn nin bha ha kiẹn khọ unan ọria nin Osẹnobulua khin. Ilẹnmhin nọn gbale, ọle ha rẹkpa bha rẹ lu ọnan. 11 Ahamiẹn ibha kiẹn unan ọria ọsọgbọn, ikẹ-ikẹ iyẹ da ha ribhi ẹwẹ bha, a iyẹ da ha miẹn Grik la Ju, a iyẹ da ha miẹn ene ruẹle la ene bha ruẹ, a iyẹ da ha miẹn eriọbhe, igue,* igbọn, la ene nyan egbe ele. Kristi ha ki ha yi emhin rebhe rẹji mhan.

12 Bhiriọ, beji a miẹn ghe, eria ne khiale bha khin, sẹyẹ, Osẹnobulua zẹ ibha yẹ hoẹmhọn bha, bha re ẹkẹ-ẹjẹjẹ rẹ hin egbe. Bha yẹ ha mhọn ifuẹkẹ, idegbere, ẹkẹ-omẹnhiẹn, bi iziẹngbe. 13 Bha wo ha gbekua nin egbe, bha ha yẹ re ọkhọ rebhe ha rẹhunmhan egbe, aharẹmiẹn ghe ọria rahiẹ bha. Beji Jehova* rẹ re ọkhọle rebhe rẹhunmhan bha, iriọ ọkhẹke nin bha yẹ wo ha lu. 14 Rẹ gbera ene emhin nan rebhe, bha re oyẹẹ rẹ hin egbe, ranmhude, oyẹẹ ku ẹbho kugbe.

15 Sẹyẹ, bha ji ọfure ọsi Kristi ha dia ọkhọle nọnsẹbha, ranmhude Osẹnobulua tie bha rebhe nin bha dọ kiẹn egbe ọkpa, yẹ ha mhọn ọfure. Bha wo ha gbe ekhuẹnmhẹn. 16 Bha ji ọta nọnsi Kristi ha wẹnna bhi egbe nọnsẹbha, yẹ rẹ bha ha wanlan. Bha ha noo illo ogẹn rẹ man egbe emhin, bha ha yẹ re ọle ha re izẹbhudu nin egbe. Bha wo ha so illo rẹ gẹn Osẹnobulua. Bha re ekhuẹnmhẹn rẹ ha so ene illo. Bha re ọkhọle rebhe rẹ ha so ọle ji Jehova.* 17 Ẹmhọn nọn hi ki rẹ khin nin bha ta, la emhin nọn hi ki rẹ khin nin bha lu, bha lu ọle bhi elin nọnsi Jesu nin Ebeanlẹn mhan. Bha wo na obọ ọle ha re ekhuẹnmhẹn ji Osẹnobulua nin Aba.

18 Ene amhẹn, bha ha degbere nin ọdọ ibha, beji ọkhẹke nin ene rẹkhan Kristi ha lu. 19 Ene ọdọ, bha wo ha hoẹmhọn ikhuo bha, bha hẹi ha to mun ele. 20 Ene ibhokhan, bha wo ha hẹnmhọn nin ene biẹ bha bhi emhin rebhe. Ọnan hi ebe ti Ebeanlẹn mhan bhọ. 21 Ibha nin aba, bha hẹi wo ha lu emhin nọn ha re ẹkẹ ha khọ imọn nesẹbha, nin bha hẹi gbe ele ahu sotọ. 22 Ene igbọn, bha wo ha hẹnmhọn nin ebeanlẹn bha. Bha ha hẹnmhọn nin ele ẹghe rebhe. Ọ iyi isira ele ọkpa bha ha rẹ ha lu ọnan. Ọ iyi ọsi a-ba-daghe-mẹn. Bha wo re ẹkẹata ha lu iriọ ẹghe rebhe, ranmhude bha mun ofẹn Jehova.* 23 Emhin nọn hi ki rẹ khin nin bha lu, bha re ọkhọ rebhe rẹ lu ọle, bọsi ghe Jehova* bha lu ọle nan, ọ iyi eria. 24 Ranmhude, bha lẹnmhin ghe, obọ Jehova* bha ha da miẹn ọne elele nin bha ha le bhi uku. Bha wẹnna nin Kristi nin Ebeanlẹn mhan. 25 Bhi ọsi ẹmhọanta, ọria nọn hi ki rẹ khin nọn lu emhin ebe dẹ miẹn ihaosa nọn khẹke ọle. Osẹnobulua ilu eku.

4 Ibha ne mhọn igbọn, bha ha re obọ esili rẹ mun igbọn nesẹbha. Bha yere ghe, ibha tobobha yẹ mhọn Ebeanlẹn bhi okhun.

2 Bha wo situa ha nan erọnmhọn. Bha ha nanlẹn ẹghe rebhe, bha ha yẹ ha khuẹnmhẹn Osẹnobulua. 3 Bha yẹ wo ha nan erọnmhọn nin mhan, beji Osẹnobulua ha da re isẹhoa nin mhan rẹ dọ ha wewe ọne ọta ẹkhokho rẹji Kristi. Ọne uhọnmhunje nan zẹle nin mẹn da ribhi ighan. 4 Bha nan erọnmhọn nin mhan, beji mẹn ha da sabọ wewe ọle nọnsẹn beji ọkhẹke nin mẹn lu.

5 Bha re ẹwanlẹn ha ne ẹbho ne ribhi ẹkẹ ọne agbọn nan khian. Bha ha noo ẹghe nọnsẹbha nọnsẹn. 6 Bha re ekpẹn-ekpẹn ha talọ. Bha ji ọta nin bha ta diabe ebale nan re umhẹn ọi. Bha ha lu iriọ, bha ki sabọ re ewanniẹn nọn khẹke nin ọdeọde.

7 Tikikọs nin obhio mẹn nọn dan mẹn dẹ tẹmhọn mẹn man bha. Ọguọmhandia ọsi Ebeanlẹn mhan ọle yẹ khin bii mẹn. Mhan wo gbaẹkẹ ọle. 8 Mẹn je ọle bu bha vade, nin ọle dọ ko bha udu re, yẹ taman ibha ebi mhan ki ha khian yẹ. 9 Ọle bi Onẹsimọs ko vade. Obhio mẹn nin mẹn hoẹmhọnlẹn, nọn yẹ wo ga nọnsẹn, ọle Onẹsimọs khin. Eji bha ye ọle rẹ ha ye. Ele dẹ taman bha emhin rebhe ne sunu bhi enan.

10 Aristakọs nin mẹn bi ọle ko ribhi ighan, je otuẹ ibha. Mak nin obhio Banabas* yẹ je otuẹ ibha. (Ọle mẹn ka tẹmhọn ọlẹn man bha, ghe nin bha miẹn ọlẹn ọbhi egbe nọnsẹn sade ọle bu bha re.) 11 Jizọs nan yẹ tie ọle Jọstọs je otuẹ ibha. Ibhokhan Ju ene ẹbho nan khin. Ele ọkpa ene rẹkpa mẹn bhi iwẹnna nan rẹ tẹmhọn Agbejele nọnsi Osẹnobulua. Ele yẹ wo manman ha re ikoudure nin mẹn. 12 Ẹpafras nọn na bhi agbaẹbho nọnsẹbha vae je otuẹ ibha. Ọguọmhandia nọnsi Jesu Kristi ọle khin. Ẹghe rebhe ọle wo rẹ nan erọnmhọn nin bha, beji bha ha da sabọ deziẹn nọnsẹn, yẹ manman rẹọbhi iho nọnsi Osẹnobulua. 13 Mẹn dẹ sabọ sọsali ọbhọ ghe, ẹghe rebhe ọle rẹ wo wẹnna kaka, ranmhude ibha bi ibhiọ mhan rebhe ne ribhi Laodesia bi Hairapolis.

14 Luk nin Dọkitọ nin obhio mhan nọn daan mhan je otuẹ ibha. Dimas yẹ je otuẹ ibha. 15 Bha ne imẹn tuẹ ibhio mhan ne ribhi Laodesia, bha yẹ ne imẹn tuẹ Nimfa bi ibhio mhan ne do ikolo bhi isọle. 16 Bha ha tie ọne ilẹta nan fo, bha re ji agbotu nọn ribhi Laodesia nan yẹ tie ọle bhi enin. Bha yẹ tie ọne a gbẹn ji agbotu nọn ribhi Laodesia. 17 Bha taman Akipọs yọle: “Denọ ẹlo ọbhi iwẹnna oga nin Ebeanlẹn mhan mun uwẹ bhi obọ, beji uwẹ ha da lu ọle sotọ.”

18 Imẹn nin Pọl je otuẹ bha. Imẹn re obọ mẹn gbẹn ọnan. Bha hẹi yele a ghe mẹn ribhi ighan. Mẹn bhii nin Osẹnobulua manman mhọn ifuẹkẹ da bha.