EBE NAN GBẸN JI IBHOKHAN ẸFẸSỌS

1 Imẹn nin Pọl, nin Osẹnobulua rẹ kiẹn odibo ọsi Jesu Kristi, imẹn gbẹn ọne ebe nan ji ene khiale ne ribhi Ẹfẹsọs ne yẹ sun rẹkhan Jesu Kristi.

2 Mẹn bhili nin Osẹnobulua nin Aba mhan, bi Jesu Kristi nin Ebeanlẹn mhan manman mhọn ifuẹkẹ da bha, yẹ re ọfure nin bha.

3 Ogẹn hi ọsi Osẹnobulua nin Aba Jesu Kristi nin Ebeanlẹn mhan, ranmhude ọle re emhin esili nọn na obọ ọle vae rẹ lu ẹsele nin mhan bhi okhun ẹlinmhin, nin mhan rẹ kugbe deba Kristi. 4 Rẹ na bhi ẹghe umunhẹn ọsi ọne agbọn nan ha de, ọle da zẹ imhan nin mhan dọ kugbe deba Kristi. Ọle da lu ọle nin mhan ha yi eria ne khiale bhi ẹlo nọnsọle ranmhude oyẹẹ nin mhan mhọn da ọle. 5 Ranmhude iho nọnsọle nọn bi ranmhude ọ yẹẹ ọle, ọle da ka zẹ imhan ọbhi otọ, yẹ yọle ọle dẹ re mhan kiẹn imọn nọnsọle rẹ na obọ Jesu Kristi. 6 Ọle da mhọn ọne ifuẹkẹ nọn khua nan da mhan rẹ na obọ ọmọn nọnsọle nin ọle hoẹmhọnlẹn, beji ẹbho ha da re ogẹn ji ọle. 7 Osẹnobulua da noo aranlẹn ọsi Jesu rẹ dẹ mhan kiere, yẹ fan mhan fia bhi obọ olukhọ. Ọ da yẹ re ọle rẹhunmhan olukhọ nọnsẹmhan. Ranmhude ọle manman mhọn ifuẹke, ọle zẹle nin ọle da lu ọnan.

8 Osẹnobulua da manman mhọn ọne ifuẹkẹ nan da mhan, yẹ re ẹwanlẹn bi ilẹn-otọ-emhin nin mhan bhi emhin rebhe. 9 Ọle da rẹkpa mhan rẹ lẹn iho nọnsọle, nọn yi ọta ẹkhokho. Ọne ọta ẹkhokho nan ti ọle bhọ. Ọnan zẹle nin ọle da mhanmhanlẹn 10 nin ọle rẹ re uwedẹ ọbhi otọ nan rẹ ha re emhin khian, sade ọne ẹghe nan rẹyi sẹle. A ki re ọne uwedẹ rẹ ku emhin rebhe kugbe rẹ na obọ Kristi, emhin ne ribhi okhun bi emhin ne ribhi otọ. Ehe, rẹ na obọ Jesu 11 nin mhan kugbe deba, nin mhan ha yẹ deba le emhin uku nin Osẹnobulua vivọle. Osẹnobulua ka zẹ imhan ọbhi otọ, ranmhude ọ diẹn mun emhanmhan nọnsọle. A imiẹn emhin nin ọle mhanmhanlẹn nọn imunsẹ. 12 Imhan hi eria ọhẹnhẹn ne ka mhọn urẹọbhọ da Kristi. Osẹnobulua da ka zẹ imhan ọbhi otọ beji a ha da miẹn rẹ na obọ mhan, ẹbho ki re uyi bi ogẹn ji ọle. 13 Ẹghe nan rẹ ta ọne ẹmhọanta man bha, ọne ọta esili rẹji umiẹnfan nọnsẹbha, bha da yẹ mhọn urẹọbhọ da ọle. Bha ki mhọn urẹọbhọ da ọle fo, Osẹnobulua da re ẹlinmhin nọn khiale nin ọle vivọle rẹ re iyaman nin bha rẹ na obọ Jesu Kristi. 14 Ọne ẹlinmhin nọn khiale Osẹnobulua rẹ bhu nin mhan ghe, ebi ọle ve nin mhan dẹ sẹ mhan obọ. Ọle da lu ọnan beji ọle ha da fan ẹbho nesọle fia, yẹ dẹ ele kiere. Ọnan ki re ogẹn ji ọle.

15 Ọnan yẹ zẹ ẹghe nin mẹn rẹ hẹnmhọn urẹọbhọ nin bha mhọn da Jesu nin Ebeanlẹn mhan, bi oyẹẹ nin bha mhọn da ene khiale rebhe, 16 mẹn da wo ha khuẹnmhẹn Osẹnobulua. Mẹn da wo ha bhii ji bha ẹghe rebhe, 17 nin Osẹnobulua nọn manman mhọn uyi, nọn yi Osẹnobulua ọsi Jesu Kristi nin Ebeanlẹn mhan, re ẹwanlẹn nin bha yẹ rẹkpa bha rẹ lẹn otọ emhin nin ọle zẹ ọle egbe dagbare. Bhiriọ, bha ki sabọ ha mhọn ilẹn-emhin nọn gbale nọnsọle. 18 Ọle taan bha ọkhọle a, beji bha ha da sabọ lẹn otọ ikhuaẹloghe nin ọle re nin bha, beji bha ha da sabọ lẹn uyi nọn khua nin ọle ha rẹ lu ẹsele nin ene khiale, 19 bi beji bha ha da sabọ daghe ahu nọn khua nin ọle rẹman bhi egbe mhan ne mhọn urẹọbhọ da ọle. Ọle wo re ọne ahu nọn khua nan man bhi emhin kẹkẹ nin ọle lu. 20 Ọne ahu ọle rẹman ẹghe nin ọle rẹ riọ Kristi kpanọ bhi uu, yẹ re ọle dotua bhi obera nọnsọle bhi okhun ẹlinmhin. 21 Ọle da re ọle ọbhi ihe nọn khua okhun gbera ugbẹloghe rebhe, enijie rebhe, ahu rebhe, bi okpọria nọn hi ki rẹ khin bhi ọne ore nan bi ore* nọn vade. 22 Ọle da mun emhin rebhe ọle bhi obọ nin ọle ha gbẹloghe, yẹ re ọle kiẹn ọnọn re emhin rebhe khian bhi ẹkẹ agbotu. 23 Ọne agbotu hi egbe nọnsi Jesu. Sẹyẹ, emhin esili ne vuọn ọle egbe, ọle ọ rẹ vuọn ọne agbotu. Ọle hi ọnọn re emhin rebhe gba fo.

2 Eria ne yulu bha ka rẹ ha khin bhi ẹghe nin bha rẹ ha lu olukhọ, ọkpakinọn, Osẹnobulua da re iẹnlẹn nin bha. 2 Bhi ọne ẹghe nin, bha da ha lu rẹkhan uwedẹ nin ẹbho ne ribhi ọne agbọn nan rẹ lu ẹmhin, bha da ha lu rẹkhan ebi ọnọn gbẹloghe ahoho ọsi ọne agbọn nan guanọ. Ọne ahoho ọle hi ọne iria-eria nin ẹbho mhọn ẹlẹnan, nọn zẹle nin ele da mhọn akan-ehọ. 3 Bhi ọsi emhọanta, ẹghe ribhọ nin mhan ka rẹ deba ele ha lu emhin nin egbe nọnsẹmhan guanọ. Mhan da ji egbe nọnsẹmhan bi iria-eria nọnsẹmhan ha dia mhan. Rẹ nabhi ẹghe nan rẹ biẹ mhan, mhan da kiẹn eria ne khẹke nan re oya nan, bọsi ẹbho nekẹle. 4 Ọkpakinọn, ranmhude ifuẹkẹ nọn khua nin Osẹnobulua mhọn da mhan, bi ranmhude ọle manman hoẹmhọn mhan, 5 ọle da re iẹnlẹn nin mhan, yẹ ku mhan kugbe deba Kristi, arẹmiẹn ghe mhan rẹ ka yu ọbhi ẹkẹ olukhọ. Ifuẹkẹ nọn khua nin Osẹnobulua mhọn da bha, ọle zẹlẹ nin bha da miẹn umiẹnfan. 6 Rẹ deba ọnin, Osẹnobulua da re iẹnlẹn nin mhan, yẹ re eji mhan ha dotua ọi nin mhan bhi okhun. Ọle da lu ọnan ranmhude ọle ku mhan kugbe deba Jesu Kristi. 7 Bhiriọ, bhi agbọn* nọn vade, ọle ki re ifuẹkẹ nọn khua nọnsọle man bhi egbe mhan, bhi uwedẹ nin ọle ha rẹ re umhẹnmhin nọnsọle man mhan ne kugbe deba Jesu Kristi.

8 Ọne ifuẹkẹ nọn khua nan, ọle re Osẹnobulua miẹn bha fan, ranmhude urẹọbhọ nin bha mhọnlẹn. Ẹsele Osẹnobulua re ọle lu nin bha, ọ iyi ahu bha gbe ọle, 9 bha bhọ bha miẹnsọn ọbhọ, bhiriọ, ọria soso bhi ẹwẹ bha ida sabọ yọle ghe ahu ọle gbe ọle. 10 Iwẹnna obọ nesi Osẹnobulua mhan khin, ranmhude nin mhan rẹ yi edibo nesi Kristi. Ọle da man mhan nin mhan ha lu ene iwẹnna esili kẹkẹ nin ọle mhanmhan ọbhi otọ khẹ mhan.

11 Bha yere ghe ẹghe ribhọ nin ẹbho ne ruẹle rẹ ha tie ibha ne iyi ibhokhan Ju ene bha ruẹ, arẹmiẹn ghe eria khọnkhan ruẹ ele. 12 Bhi ọne ẹghe nin, ibha bha lẹn Kristi, ibha bha deba ibhokhan Izrẹl. Ibha bha deba ẹbho nin Osẹnobulua deba ve akovẹn, ẹghe nin ọle rẹ ve ive. Bha bhọ bha ha mhọn ikhuaẹloghe bhi ọne agbọn nan. Sẹyẹ, ibha bha lẹn Osẹnobulua. 13 Sokpan, ranmhude nin bha rẹ dọ kugbe deba Jesu Kristi nian, ibha ne bha rẹ ka sikẹ Osẹnobulua hiehie, ki dọ sikẹ ọle. Aranlẹn ọsi Kristi rẹkpa bha rẹ lu ọnan. 14 Kristi hi ọnọn re ọfure nin mhan. Ọle hi ọnọn dunmhun ọne ogbe nọn rẹ wa ene usun veva a, yẹ re ele kiẹn ọkpa. 15 Ọle da re egbe nọnsọle rẹ re ọkpẹnlẹn ọbhi ọne emhin nọn rẹ si eghian re bhi ẹwẹ ene usun. Ọne emhin hi ene uhi kẹkẹ ne ribhi uhi ọsi Mozis. Ọle da lu ọnan beji ọle ha da re edibo nesọle bhi ene usun veva rẹ kiẹn ọkpa, yẹ re ele kiẹn usun ọsọgbọn.* Sẹyẹ, ọ da re ọfure nin ele. 16 Sẹyẹ, uyumhin nin ọle yu ọbhi okhun oran* ọle rẹ re ene usun veva kiẹn ọkpa, yẹ rẹkpa ele rẹ kie deba Osẹnobulua ha mhọn ikolu. Uyumhin nin ọle yulu ọle rẹ re ọkpẹnlẹn bhi ọne eghian nọn ha ribhi ẹwẹ ele. 17 Ọle da vae dọ wewe uhọnmhunje ọsi ọfure man bha ne bha ka sikẹ Osẹnobulua hiehie. Ọle da yẹ tale man ene sikẹ Osẹnobulua. 18 Rẹ na obọ ọle, imhan rebhe sabọ bu ọne aba re ranmhude ẹlinmhin nọn khiale nin ọle re nin mhan.

19 Bhiriọ, bha iyẹ yi eriọbhe, la erunmhunyẹn. Ibhokhan agbaẹbho ọkpa ibha bi ene khiale ki khin. Bha deba ene ribhi azagba-uwa nọnsi Osẹnobulua. 20 Ene etuegbe, bi ene akhasẹ, ele ayotọ nan bọn bha nyan bọsi uwa. Jesu Kristi, ọle udo kpataki nọn ribhi ọne ayotọ. 21 Ranmhude ije kẹkẹ bhi ọne uwa nan kugbe nọnsẹn, yẹ kugbe deba Kristi, ọ wo fẹkẹ ha kiẹn uwa oga nọn khiale nọnsi Jehova.* 22 Ranmhude nin bha rẹ kugbe deba Kristi, Osẹnobulua wo ha bọn ibha okhun bọsi uwa. Uwa nọnsọle nọn, ranmhude, ẹlinmhin nọnsọle ribhi enin.

3 Ranmhude nin mẹn rẹ yi odibo nọnsi Jesu Kristi, bi ranmhude nin mẹn rẹ ha temhọn Osẹnobulua man bha ne iyi ibhokhan Ju, ọle zẹ nin mẹn nin Pọl da ribhi ighan. 2 Bha ka lẹn ghe Osẹnobulua rẹ mẹn kiẹn ọguọmhandia nọnsọle, beji mẹn ha da rẹkpa bha rẹ miẹn elele bhi ifuẹkẹ nọn khua nọnsọle. 3 Beji mẹn ka gbẹn ji bha kuẹi, imianlo, ọle Osẹnobulua da re ọne ọta ẹkhokho man mẹn. 4 Bha ha tie ọne ebe nan, bha dẹ lẹn ghe mẹn wo manman lẹn otọ ọne ọta ẹkhokho rẹji Kristi. 5 Bhi ore nọn gbera, a bha re otọ ọne ọta ẹkhokho nan man ẹbho. Sokpan ejayenan nian, a re ọle man ene etuegbe bi ene akhasẹ ne khiale, rẹ na obọ ẹlinmhin nọn khiale. 6 Ọne ọta ẹkhokho ọle hi ghe, ene ẹbho ne iyi ibhokhan Ju, ne dọ kiẹn odibo nọnsi Jesu Kristi, ranmhude uhọnmhunje nan taman ele, dẹ deba ene ha le uku nọnsi Osẹnobulua. Ele ki kiẹn usun ọkpa yẹ deba mhan miẹn ọne ive. 7 Ranmhude ifuẹkẹ nọn khua nin Osẹnobulua mhọn da mẹn, ọle da zẹ imẹn nin mẹn ha yi ọguọmhandia nọnsọle, beji mẹn ha da ha wewe ọne ota ẹkhokho nan. Ahu nọnsọle ọle rẹ lu ọne ẹseọhẹ nan nin mẹn.

8 Arẹmiẹn imẹn hi ọnọn khere nẹ bhi ẹwẹ ene khiale, Osẹnobulua da lu ọne ẹseọhẹ* nan nin mẹn, beji imẹn ha da dọ taman ene iyi ibhokhan Ju ẹmhọn ẹsele nin unun isabọ ta nin Kristi ha lu nin mhan. 9 Sẹyẹ, nin mẹn rẹkpa ọrebhe rẹ daghe ebi Osẹnobulua ha rẹ mun ọne ọta ẹkhokho sẹ yẹ. Osẹnobulua nọn man emhin rebhe, ọle hi ọnọn re ọne ọta ẹkhokho he rẹ na bhi ikpe ne bunbun ha de. 10 Emhin da dia inian, beji a ha da miẹn ghe ọne agbotu ki rẹkpa ene gbẹloghe bi ene ribhi ihe bhi okhun rẹ daghe ẹwanlẹn nọnsi Osẹnobulua nin ọle rẹman bhi uwedẹ kẹkẹ. 11 Ọnan diẹn mun iho nọnsi Osẹnobulua nọn da ha ribhọ rẹ sẹbhi ighegheghe. Ọne iho nan rẹtẹ Jesu Kristi nin Ebeanlẹn mhan. 12 Ranmhude urẹọbhọ nin mhan mhọn da Kristi, mhan da sabọ miẹn unun rẹ ha talọ yẹ sabọ ha nan erọnmhọn ji Osẹnobulua, ranmhude mhan rẹọbhọ ghe ọle dẹ ka mhan ehọ. 13 Ọnan zẹle nin mẹn da ha taman ibha nian nin bha hẹi ji egbe lọ bha, ranmhude nin mẹn rẹ ha le oya ba ẹmhọn bha. Oya nin mẹn le dẹ rẹ bha miẹn uyi.

14 Ranmhude ọnan, mẹn ne iguẹ sotọ ha nan erọnmhọn ji Aba imhan. 15 Ọle hi ọnọn mun ene azagba-uwa kẹkẹ ne ribhi okhun gbọ. Ọle yẹ hi ọnọn mun ene ribhi ọne otọ nan gbọ. 16 Mẹn bhii nin Osẹnobulua nọn manman mhọn uyi noo ahu ẹlinmhin nọnsọle rẹ mun bha ziẹn. 17 Mẹn bhii nin Kristi ha ri bha bhi ọkhọle, ranmhude nin bha rẹ mhọn urẹọbhọ da ọle. Mẹn yẹ bhii nin oyẹẹ ha ri bha bhi ọkhọle, sẹyẹ, nin bha sabọ deziẹn* yẹ mundia nọnsẹn bhi ọne ayotọ, 18 beji a ha da miẹn ghe, ibha bi ene khiale rebhe ki sabọ lẹn otọ ene emhin ne rẹtẹ Osẹnobulua nọnsẹn. Bha ki sabọ lẹn ebi ele bhia sẹ yẹ, tan sẹ yẹ, yo sẹ yẹ, yẹ dinmhin sẹ yẹ. 19 Sẹyẹ, bha ki lẹn oyẹẹ nin Kristi rẹman nọn gbera ilẹnmhin nọn hi ki rẹ khin. Ẹghenin, bha ki sabọ dọ ha mhọn emhin esili rebhe nin Osẹnobulua re nin ọria.

20 Osẹnobulua nọn re ahu ẹlinmhin nọn khiale nin mhan, dẹ sabọ lu gbera emhin rebhe nin mhan bhii ọle le, la nin mhan bhọ mhọn bhi ọkhọle. 21 Ogẹn dẹ wo ha yi ọsọle rẹ sẹbhi ighegheghe rẹ na obọ ọne agbotu, bi Jesu Kristi. Isẹ.

4 Bhiriọ, imẹn nin Pọl nọn ribhi ighan ranmhude Ebeanlẹn mhan, bhii bha nin bha ha nyẹnlẹn bhi uwedẹ nọn khẹke nin eria nan tiele rẹ ha nyẹnlẹn. 2 Bha wo ha mhọn idegbere, ẹkẹ-omẹnhiẹn, iziẹngbe. Bha ha gbekua nin ẹbho, bha ha yẹ ha rẹ oyẹẹ man egbe. 3 Bha ha mhọn ọfure bhi ẹwẹ bha, bha wẹnna kaka nin bha rẹ gbega okugbe nin ẹlinmhin nọn khiale rẹkpa bha rẹ ha mhọnlẹn. 4 Egbe ọkpa, ọle ribhọ. Ẹlinmhin ọkpa, ọle yẹ ribhọ. Beji bha rẹ mhọn egbe ọkpa, iriọ a yẹ rẹ tie bha nin bha dọ ha mhọn ikhuaẹloghe ọkpa. 5 Ebeanlẹn ọkpa, ọle mhan mhọn, urẹọbhọ ọkpa, ọle mhan mhọn, imianmẹn ọkpa a yẹ re nin mhan. 6 Osẹnobulua ọkpa, ọle mhan mhọn, ọle hi Aba ọsi ọrebhe, ọle hi ọnọn kpọnọ nẹ ọrebhe, ọle noo ọrebhe rẹ lu emhin kẹkẹ, yẹ noo ahu nọnsọle bhi egbe ele.

7 Osẹnobulua wo re ifuẹkẹ nọn khua nọnsọle man bhi egbe ọdeọde bhi ẹwẹ mhan. Kristi hi ọnọn lu ọne ẹsele nan nin mhan. 8 Ebenọnkhiale da yọle: “Ẹghe nin ọle rẹ diọbhi eje yoyo, ọle da muno ẹbho; ọle da re ikpea rẹ lu ẹsele.” 9 Be a ho nan tẹmhọnlẹn ẹghe nan rẹ yọle ghe, “Ọle da diọbhi eje yoyo?” Ebi a ho nan rẹman hi, ọle ka huẹnre vae bhi ọne otọ nan. 10 Ọne ọria nọn ka vae bhi ọne otọ nan, ọle hi ọnọn yẹ diọbhi eje ree nẹ bhi okhun-ẹlinmhin. Ọle da lu iriọ beji ọle ha da mun emhin rebhe sẹ.

11 Ọle da re eso kiẹn etuegbe, re eso kiẹn akhasẹ, re eso kiẹn ene tẹmhọn Osẹnobulua, re eso kiẹn ene gbẹloghe agbotu,* yẹ re eso kiẹn ene man emhin, 12 beji ele ha da ha dia ene khiale ọbhi uwedẹ, lu ilọnmhọn oga, yẹ bọn egbe nọnsi Kristi okhun. 13 Ele dẹ wo ha lu inian, rẹ sẹbhi ẹghe nin mhan rebhe ha rẹ lẹn Ọmọn nọnsi Osẹnobulua nọnsẹn, yẹ kugbe ranmhude urẹọbhọ nin mhan mhọnlẹn. Ẹghenin, mhan ki dọ kiẹn okpea-ọba, nọn wo gba nan fo bhi uwedẹ rebhe, beji ọ rẹ gba nin Kristi. 14 Bhiriọ, ọ bha yẹ khẹke nin mhan diabe ibhokhan nan sabọ fi ele ọkhọle denọ, beji ahoho rẹ fi okpẹdẹ yo fi ọle re. Ọ bha khẹke nin mhan ji eria nin uwedẹ nọnsele bha dia re iman-emhin kẹkẹ nọnsele rẹ ha fi mhan yo fi mhan re. Ọ bha yẹ khẹke nin mhan ji ele re uwedẹ eku nọnsele rẹ hiẹ mhan. 15 Ọkpakinọn, bha ji mhan ha ta ẹmhọanta, bha ji mhan ha re oyẹẹ man, mhan ha yẹ ha lu re alo bhi emhin rebhe nọn rẹtẹ Kristi nọn yi ebeanlẹn mhan. 16 Rẹ na obọ ọle, egbe rebhe da kugbe nọnsẹn. Sẹyẹ, ranmhude ene ako-uguẹ ne mun eje kẹkẹ bhi ọne egbe mhọnlẹn, ọne egbe rebhe da ha wẹnna kugbe. Ahamiẹn, ije kẹkẹ bhi egbe wo ha wẹnna nọnsẹn, ọnan ki rẹkpa ọne egbe rẹ ha wanre. Ọ ki yẹ deziẹn bhi oyẹẹ.

17 Ebi mẹn ta, nin mẹn yẹ rẹ ha gbuhi nin bha bhi elin ọsi Jesu nin Ebeanlẹn mhan, ọle hi, ọ bha khẹke nin bha yẹ ha lu emhin bhi uwedẹ nin ẹbho ne ribhi ẹkẹ agbọn rẹ lu emhin. Uwedẹ nọn bha gba nin ele rẹ ria eria, ọle ele rẹ lu emhin. 18 Ọkhọle nọnsele so ebiuki a, ranmhude nin ele bha rẹ ho nin ele lẹn Osẹnobulua, bi ranmhude, nin ọkhọle nọnsele rẹ gbin. Ele inyẹnlẹn bhi uwedẹ nọn yẹẹ Osẹnobulua. 19 Ranmhude nin ọkhọle nọnsele iyẹ rẹ taman ele ebe mhẹn bi ebe imhẹn, ele da ha lu ilọnmhọn okan,* ele da wo ha lu unan emhin kẹkẹ ne bha khia. Ele bhọ bha sabọ mun egbe ọbhi ibẹẹ.

20 Ọkpakinọn, bha lẹnmhin ghe, Kristi iyi unan ọria nọn sẹ iriọ. 21 Ahamiẹn bha ka ọle ehọ beji ọle rẹ ha man bha emhin, bha ki gene dọ lẹn ghe, ọle iyi unan ọria nọn sẹ iriọ. Ẹmhọanta, ọle Jesu man. 22 A taman ibha ghe ọkhẹke nin bha fi unan ọria nin bha ka rẹ khin denọ, nọn rẹso uwedẹ nin bha ka rẹ ha lu emhin. Ranmhude, unan ọria nin bha ka rẹ khin bha ha mhẹn, bha da wo ji iria-eria nọnsẹbha ha hiẹ bha. 23 Ọ yẹ khẹke nin bha wo ha fi uwedẹ nin bha rẹ ria eria denọ. 24 Bha mun akpa ọsọgbọn yọ, ọnin hi, bha ha lu emhin beji Osẹnobulua guanọ nin bha rẹ ha lu emhin. Bha ha lu iriọ, bha ki sabọ ha lu ebe gbale, yẹ re ọkhọle rebhe ha hẹnmhọn nin Osẹnobulua.

25 Beji a miẹn ghe bha rẹban ohoghe, bha ha ta ẹmhọanta man ibo bha, ranmhude egbe ọkpa mhan rebhe ye. 26 Ẹkẹ sabọ rẹ khọ uwẹ, ọkpakinọn, hẹi lu olukhọ. Hẹi ji ẹkẹ khọ uwẹ sẹbhi ẹghe nin oẹnlẹn ha rẹ defia; 27 hẹi re otọ nin Ojuu. 28 Ọria nọn ra hẹi yẹ ra, ọkpakinọn, ọkhẹke nin ọle wẹnna kaka. Ehe, nin ọle re obọ nọnsọle miẹnsọn nọn mhẹn, beji ọle ha da miẹn emhin re nin ẹbho ne imhọnlẹn. 29 Bha hẹi re unun nọnsẹbha ha ta ọta esankan. Sokpan, bha re ọle ha ta ọta esili, ọta ne ha sabọ bọn ẹbho okhun, yẹ rẹkpa ene kaehọ. 30 Sẹyẹ, bha hẹi lu emhin nọn ha re ẹlinmhin nọn khiale nọnsi Osẹnobulua ha lu akhiẹ, ranmhude, ọne ẹlinmhin a rẹ re iyaman bha bhi egbe khẹ ukpẹdẹ nan ha rẹ re izọese nọnsi Jesu Kristi fan ibha fia.

31 Rẹban emhin rebhe ne imhẹn, bọsi ẹkẹ-oriala, ẹkẹkhọmhin, okpohu, uvanhiẹnmhin, ihẹn. 32 Ọkpakinọn, bha ha mhọn ifuẹkẹ bi ẹkẹ-ẹjẹjẹ da egbe, bha yẹ re ọkhọle rebhe ha rẹhunmhan egbe, beji Osẹnobulua rẹ re ọkhọle rebhe rẹhunmhan ibha rẹ na obọ Kristi.

5 Bhiriọ, bha re egbe khọkhọ Osẹnobulua bọsi imọn nin ọle hoẹmhọnlẹn. 2 Bha wo ha re oyẹẹ man beji Kristi rẹ hoẹmhọn mhan.* Ọle da re iẹnlẹn nọnsọle rẹ lu ẹsele, yẹ zọese nin mhan,* bọsi emhin nọn vin-ohin nan rẹ ze ji Osẹnobulua.

3 Ọ bha khẹke nin ọria soso bhi ẹwẹ bha ha lu ilọnmhọn oghẹ.* Ọ bha yẹ khẹke nin bha ha lu ilọnmhọn itọn soso, la nin bha ha mhọn ẹlobhọ,* ranmhude emhin ne sẹ inian bha khẹke ene khiale. 4 Ọ bha yẹ khẹke nin bha ha lu emhin okan, ọ bha khẹke nin bha ha ta ọta uhuki, la zẹ ojẹ ne de itọn an. Emhin ne sẹ inian bha khẹke ibha. Ebe khẹke nin bha ha lu hi, nin bha ha gbe ekhuẹnmhẹn. 5 Bha wo manman lẹn ghe, ọria nọn hi ki rẹ khin nọn gboghẹ,* la nọn nyẹnlẹn iẹnlẹn nọn bha khia, la nọn mhọn ẹlobhọ*—ọnin hi ọria nọn ga ẹbọ—ida le Ejele ọsi Kristi bi ọsi Osẹnobulua bhi uku.

6 Bha hẹi ji ọria soso re ọta ne iyọle rẹ hiẹ bha. Eria ne wo bhi uhọnmhọn, ne lu emhin ne sẹ iriọ, Osẹnobulua dẹ re oya nin ele. 7 Bhiriọ, bha hẹi deba ele ha lu emhin ne sẹ iriọ.* 8 Bha ka rẹ ha ribhi ebiuki khẹ. Ọkpakinọn, ẹfua bha ki ye nian nin bha rẹ dọ kugbe deba Ebeanlẹn mhan. Bha wo ha nyẹnlẹn bọsi eria ne ribhi ẹfua.* 9 Ọnan a rẹ lẹn eria ne ribhi ẹfua, ele ki ha lu emhin ne mhẹn, ele ki ha lu ebe gbale yẹ ha yi eria ẹmhọanta. 10 Bha wo ha dọnmhegbe nin bha rẹ ha lu emhin ne ha ti Ebeanlẹn mhan bhọ. 11 Bha hẹi yẹ lu emhin nin elele iye nin ẹbho lu bhi ebiuki. Sokpan, bha re ebi ele khin tee man. 12 Emhin ẹkhọle emhin nin ele lu bhi ẹkhokho khin, ọ bhọ ida ji a ta dagbare. 13 Ẹfua, ọle zẹ emhin egbe dagbare. Bhiriọ, emhin nọn hi ki rẹ khin nin ẹfua bhaa nyan, ọ iyẹ yi emhin ẹkhokho. 14 Ọnan zẹle nin Ebenọnkhiale da yọle: “Riọ bhi owe, uwe nọn wẹ, riọ kpanọ bhi uu, beji Kristi ha da bhaa nyan ẹn.”

15 Bhiriọ, bha gbẹlokotọ nọnsẹn bhi uwedẹ nin bha rẹ lu emhin, nan hẹi dọ miẹn ghe bha dọ ha lu emhin bii eria ne iwanlan. Bha ha lu emhin bii eria ne wanlan. 16 Bha ha noo ẹghe nọnsẹbha nọnsẹn, ranmhude, ẹghe nin mhan da nyẹnlẹn iyẹ mhẹn. 17 Ranmhude ọnan, bha hẹi yẹ ha lu emhin bii eria ne iria eria. Ọkpakinọn, bha wo ha dọnmhegbe nin bha rẹ lẹn ebi Jehova* guanọ nin bha lu. 18 Sẹyẹ, bha hẹi ha da anyọn gbe egbe, ranmhude, ọ dẹ rẹ ibha ha re egbe bhi unun.* Ọkpakinọn, bha wo ha lu emhin nọn ha rẹ ibha ha mhọn ẹlinmhin nọn khiale. 19 Bha ko ha so illo ogẹn,* bha ha so illo rẹ gẹn Osẹnobulua. Ehe, bha ha so ọle. Bha re ọkhọle rebhe ha so illo* rẹ re ogẹn ji Jehova.* 20 Bha wo ha gbe ekhuẹnmhẹn nin Osẹnobulua nin Aba mhan bhi emhin rebhe, bhi elin nọnsi Jesu Kristi nin Ebeanlẹn mhan.

21 Bha wo ha degbere nin ibhio bha. Ọnan ki rẹman ghe bha mun ekpẹn nin Kristi. 22 Ji ene amhẹn ha degbere nin ọdọ ele, beji ele yẹ rẹ degbere nin Ebeanlẹn mhan, 23 ranmhude, ọne okpea, ọle hi ebeanlẹn ọsi okhuo ọle, beji Kristi rẹ yi ebeanlẹn ọsi agbotu. Ọne agbotu hi egbe nọnsọle nin ọle re umiẹnfan nan. 24 Bhi ọsi ẹmhọanta, beji ọne agbotu rẹ degbere nin Kristi, iriọ ọ yẹ rẹ khẹke nin ene amhẹn ha degbere nin ọdọ ele bhi emhin rebhe. 25 Ọdọ, hoẹmhọn okhuo ẹ, beji Kristi rẹ hoẹmhọn ọne agbotu, yẹ re egbe ọle zọẹse nanlẹn. 26 Ọle da lu iriọ, beji ọle ha da kpe ọle khia. Ehe, ọle da re amẹn rẹ kpe ọle khia, ọne amẹn hi ọta nọnsi Osẹnobulua. 27 Beji ọne agbotu ha da mhọn-ose a bhi ẹlo nọnsọle, ọle zẹle nin ọle da lu iriọ. Ọle guanọ nin ọne agbotu kpe khia, ọ ida ha mhọn itọn la okan soso bhi egbe, sokpan, egbe ki gba nanlẹn.

28 Beji Jesu lu, ọkhẹke nin ene ọdọ hoẹmhọn amhẹn ele, beji ele rẹ hoẹmhọn egbe nọnsele. Okpea nọn hoẹmhọn okhuo ọle, egbe nọnsọle ọle yẹ hoẹmhọnlẹn. 29 Ọria soso iribhọ nọn lu egbe ọle khọlọ. Ọkpakinọn, ọrebhe le ebale ọbhi egbe, yẹ gbẹloghe egbe. Iriọ Kristi yẹ rẹ ha gbẹloghe ọne agbotu, 30 ranmhude, mhan deba egbe nọnsọle. 31 “Ranmhude ọnan, okpea ki zẹ aba ọle bi inẹn ọlẹn obọ yẹ sun rẹkhan okhuo ọle, ele veva ki dọ ha yi efun ọkpa.” 32 Okpemhin, ọle ọne ọta ẹkhokho nan khin. Ẹmhọn Kristi bi ọne agbotu, ọle mẹn tẹmhọnlẹn. 33 Ọrẹyiriọ, ọkhẹke nin ọdeọde bhi ẹwẹ bha hoẹmhọn okhuo ọle beji ọle rẹ hoẹmhọn egbọle. Bhi obọ nọnkẹle, uwẹ nin okhuo, ha mun ekpẹn nọn dinmhin nin ọdọ uwẹ.

6 Ene ibhokhan, bha ha hẹnmhọn nin ene biẹ bha. Emhin nọn gbale khọnan, nin Ebeanlẹn mhan yẹ guanọ nin bha ha lu. 2 “Mun ekpẹn nin aba ẹ, bi inẹn ẹn,” ọnan hi uhi ọhẹnhẹn nin ive rẹkhan: 3 “Emhin ki kiọnlẹn nin bha, sẹyẹ, bha ki manman tọ.” 4 Ene aba, bha hẹi ha re ẹkẹ khọ imọn nesẹbha. Ọkpakinọn, bha ha re adia nin ele, beji Osẹnobulua guanọ ọle le. Bha ha man ele emhin, bha yẹ ha dia ele ọbhi uwedẹ nọnsi Jehova.*

5 Ene igbọn, bha ha hẹnmhọn nin ebeanlẹn bha. Bha ji ofẹn ele ha mun bha, bha yẹ re ọkhọle rebhe ha mun ekpẹn nin ele, beji bha rẹ mun ekpẹn nin Kristi. 6 Ọ iyi isira ebeanlẹn ibha ọkpa bha ha rẹ ha lu ọnan, nọn hẹi dọ kiẹn ọsi a-ba-daghe-mẹn. Sokpan, bha ha lu iriọ ẹghe rebhe, bọsi igbọn nesi Kristi, ne re ọkhọle rebhe rẹ lu iho nọnsi Osẹnobulua. 7 Bha ha re ọkhọle rebhe miẹnsọn nin ebeanlẹn ibha, bọsi ghe, Jehova* ibha miẹn ọlẹn nan. Bha hẹi ha lu ọle bọsi ghe eria bha lu ọle nan. 8 Ranmhude, bha lẹnmhin ghe, emhin esili nọn hi ki rẹ khin nin ọria lu, Jehova* hi ọnọn ha re ihaosa nanlẹn, aharẹmiẹn igbọn ọle khin la ọle iyi igbọn. 9 Bhi obọ nọnkẹle, ibha nin ebeanlẹn, bha yẹ ha re obọ esili mun igbọn nesẹbha, bha hẹi ha lu emhin nọn ha re ofẹn ha mun ele. Bha yere ghe, Ebeanlẹn ọkpa ibha veva ko mhọnlẹn, okhun ọle ye, sẹyẹ, ọle ilu eku.

10 Bhi ọkike ọle, mẹn bhili nin Ebeanlẹn mhan re ahu nin bha, ranmhude, ọle manman mhọn ahu. 11 Gbanọ ene emhin kẹkẹ nin Osẹnobulua ne nin uwẹ rẹ khọnlẹn ọbhi egbe, beji uwẹ ha da sabọ mundia nọnsẹn, yẹ re egbe nẹ bhi edọnmhẹn kẹkẹ ọsi Ojuu. 12 Ranmhude, okhọnlẹn mhan ye. Ọ iyi eria khọnkhan mhan ne khọnlẹn. Ene imhan ne khọnlẹn hi, ene ugbẹloghe kẹkẹ, ene ribhi ahu, ene re ọne agbọn nan nọn so ebiuki a khian, ene ẹlinmhin-ebe ne ribhi okhun. 13 Ranmhude ọnan, bha gbanọ ene emhin rebhe nin Osẹnobulua ne nin bha rẹ khọnlẹn ọbhi egbe, beji bha ha da sabọ ne eghian bha dan bhi ọne ukpẹdẹ ebe. Bhiriọ, bha ki sabọ mundia nọnsẹn, sade bha lu emhin rebhe sotọ nọnsẹn.

14 Bhiriọ, bha mundia nọnsẹn, bha re ugbakun ọsi ẹmhọanta rẹ gba akun nọnsẹbha, bha mun awegbe* ọsi ẹlọnmhọn ọsi ikhiakhiale yọ. 15 Bha ne ibata ọbhi oẹ, ọnin hi, bha muegbe nin bha rẹ dọ wewe ẹmhọn ọfure. 16 Rẹ deba ene emhin nan, bha mun ugue ọsi urẹọbhọ mhọnlẹn. Ọle bha ha noo rẹ gbega egbe ibha bhi ifẹnmhẹn* nin Esu* fi je ibha. 17 Bha yẹ mun ukparu nọn re umiẹnfan nin ọria yọ. Sẹyẹ, bha re agbada ọsi ẹlinmhin nọn khiale mhọnlẹn, ọnin hi ọta nọnsi Osẹnobulua. 18 Bha ji ẹlinmhin nọn khiale wo ha noo bha rẹ nan erọnmhọn ji Osẹnobulua bhi idia nọn hi ki rẹ khin nin bha da ke egbe ibha re. Bha ha nan unan erọnmhọn kẹkẹ, bha ha yẹ ha bhii unan ubhimhin kẹkẹ. Bhiriọ, bha ha babegbe ẹghe rebhe, bha wo ha bhii je ene khiale rebhe. 19 Bha wo ha nan erọnmhọn nin mẹn, beji mẹn ha da sabọ miẹn unun rẹ talọ, yẹ ha mhọn izebhudu rẹ ta ọne ọta esili nọn yi ọta ẹkhokho. 20 Osẹnobulua hi ọnọn je imẹn nin mẹn dọ wewe ọne ọta esili. Ọnan bhọ zẹ nan da ne ighan mẹn bhi obọ. Bha nan erọnmhọn nin mẹn beji Osẹnobulua ha da rẹkpa mẹn rẹ re izebhudu rẹ ta ọne ọta esili, beji ọkhẹke nin mẹn rẹ tale.

21 Ejayenan nian, mẹn dẹ je Tikikọs bu ibha re, nọn dọ taman ibha ebi mẹn ki ha khian yẹ, beji bha ha da gbo sabọ họn ẹmhọn mẹn. Mẹn wo manman hoẹmhọn ọlen. Ọkhọle rebhe ọle rẹ wẹnna nin Ebeanlẹn mhan. 22 Beji bha ha da lẹn ebi mhan ki ha khian yẹ bhi enan, bi nin ọle da sabọ re ikoudure nin bha, ọle zẹle nin mẹn da je Tikikọs bu bha vade.

23 Mẹn bhii nin Osẹnobulua nin Aba bi Jesu Kristi nin Ebeanlẹn mhan re ọfure nin bha. Mẹn yẹ bhii nin ele rẹkpa bha rẹ ha mhọn oyẹẹ bi urẹọbhọ. 24 Mẹn bhii nin Osẹnobulua manman mhọn ifuẹkẹ da ọrebhe ne wo ha mhọn oyẹẹ ọsaje da Jesu Kristi nin Ebeanlẹn mhan.