EBE NAN GBẸN JI IBHOKHAN GALESHA

1 Imẹn nin Pọl gbẹn ọne ebe nan. Odibo mẹn khin. Ọ iyi eria zẹ imẹn nin mẹn kiẹn odibo, ọ iyi ọria a noo rẹ zẹ imẹn. Jesu Kristi bi Osẹnobulua nin Aba ọle, nọn riọ ọle kpanọ bhi uu, ele re imẹn kiẹn odibo. 2 Imẹn bi ene ibhio mhan ne ribhi enan, je otuẹ ene agbotu rebhe ne ribhi otọ Galesha:

3 Mhan bhii nin Osẹnobulua nin Aba mhan bi Jesu Kristi nin Ebeanlẹn mhan manman mhọn ifuẹkẹ da bha yẹ re ọfure nin bha. 4 Jesu da yu ọbhi olukhọ nọnsẹmhan beji ọle ha da hinmhin mhan bhi ọne agbọn* nan nọn imhẹn. Ọle da lu ọnan ranmhude ọnan hi iho nọnsi Osẹnobulua nin Aba imhan. 5 Uyi hi ọsi Osẹnobulua rẹ sẹbhi ighegheghe. Isẹ.

6 Ọ han mẹn ilo ebi bha rẹ wo re ẹjẹje ha fikekegbe Osẹnobulua yẹ, Osẹnobulua nọn noo ifuẹkẹ nọnsi Jesu Kristi rẹ tie bha. Bha fikekegbe ọle yẹ dọ ha kaehọ uhọnmhunje ọbhebhe, bọsi ghe ọta esili nọn. 7 Ọ iyi ọsi ghe ọta esili ọbhebhe bhọ ribhọ. Ọkpakinọn, ẹbho eso ribhọ ne guanọ bha ẹmhọn. Ele re ohoghe rẹ gua ẹmhọn Kristi nin mhan wewe. 8 Ọria nọn hi ki rẹ khin, ọ ha rẹ ha yi mhan la ẹhi na bhi okhun vae dọ ta ọta esili ọbhebhe man bha, nọn dikẹ bhi ọne imhan ka taman ibha, ọne ọria nin sẹ ọne a ha fi ọle unun. 9 Mẹn dẹ yẹ kie tale beji mhan ka ta khẹ, ọria nọn hi ki rẹ khin nọn vae dọ ta uhọnmhunje ọbhebhe man bha, nọn dikẹ bhi ọne imhan ka taman ibha, ọle sẹ ọria nan ha fi ọle unun.

10 Ọ iyi ebe ha ti eria bhọ mẹn guanọ nin mẹn ha lu, sokpan, ebe ha ti Osẹnobulua bhọ mẹn guanọ nin mẹn ha lu. Sade ebe ha ti eria bhọ mẹn lu, mẹn ida ha yi ọguọmhandia nọnsi Kristi. 11 Ibhio, mẹn ho nin bha lẹn ghe, ọ iyi obọ eria uhọnmhunje nin mẹn taman bha na vae. 12 Ranmhude, ọ iyi ọria mun ọne uhọnmhunje nan nin mẹn. Mẹn bha luẹ ọle bhi obọ ọria soso. Jesu Kristi re ọle man mẹn bhi imianlo.

13 Bha wo họn ebi mẹn rẹ ha lu emhin yẹ, ẹghe nin mẹn rẹ ha ribhi oga ọsi ene ibhokhan Ju. Mẹn da wo ha kpokpo agbotu nọnsi Osẹnobulua, yẹ wo ha si ikuan-egbe ji ene ribhi ọne agbotu. 14 Mẹn da wo manman ha lu re alo bhi ọne oga nan, gbera otu mhan ne bunbun bhi agbaẹbho nọnsẹmhẹn. Ẹmhọn akerebhotọ ọsi aba mẹn wo manman ha hu mẹn bhi udu. 15 Ẹghe nin Osẹnobulua nọn je imẹn re bhi agbọn,* nọn yẹ tie mẹn ranmhude ifuẹkẹ nọn khua nin ọle mhọn da mẹn, rẹ riale emhin nọn khẹke nọn 16 nin ọle rẹ noo mẹn rẹ tẹmhọn Ọmọn nọnsọle man ene agbaẹbho, beji ele ha da vae dọ lẹn ọlẹn, mẹn bha ha guanọ ọria ọbhebhe khian nọn ha taman imẹn ebi mẹn ha lu yẹ. 17 Mẹn bhọ bha bu ene ka mẹn ha yi odibo ne ribhi Jerusalẹm, nin ele taman mẹn ebi mẹn ha lu yẹ. Mẹn da ha khian Arebia. Mẹn ki sibhi enin re, mẹn da fikie vae bhi Damaskọs.

18 Ikpe ea ki gbera, mẹn da dọ tuẹ Sifas* bhi Jerusalẹm, yẹ gbe ikpẹdẹ igbehẹn bhi isọle. 19 Gbera Jemis nin obhio Ebeanlẹn mhan, mẹn bha miẹn etuegbe nekẹle. 20 Ghọle, Osẹnobulua dẹ sabọ sọsali nin mẹn ghe, ẹmhọanta emhin rebhe nin mẹn gbẹn ji bha khin.

21 Mẹn ki sibhi enin re, mẹn da diọbhi otọ Siria bi Silisia. 22 Ọkpakinọn, edibo nesi Kristi ne ribhi agbotu ne ribhi otọ Judia bha lẹn mẹn. 23 Ele gheghe họn ghe, ẹbho tale ghe: “Ọne okpea nọn ka wo ha kpokpo mhan ranmhude ọne ọta esili, dọ munhẹn ha wewe ọne ọta esili nọn zẹle nin ọle da ka ha kpokpo mhan.” 24 Bhiriọ, ele da munhẹn ha re ogẹn ji Osẹnobulua ranmhude imẹn.

2 Ikpe igbenẹn ki gbera, imẹn bi Banabas da gbo ha khian Jerusalẹm. Mẹn da re Taitọs rẹkhan egbe. 2 Arẹman nan rẹman mẹn zẹle nin mẹn da ha khian Jerusalẹm. Mẹn da dọ je ele lẹn uhọnmhunje nin mẹn wewe khian bhi ẹwẹ ene agbaẹbho. Ene ikpea nan mun ekpẹn nan bhi agbotu, ele ọkpa mẹn dọ tale man, nan hẹi dọ miẹn ghe, iwẹnna oga nin mẹn lu dọ kiẹn ihoho. 3 Arẹmiẹn Taitọs nọn rẹkhan mẹn obhokhan Grik nọn, ele bha sua ọle ọbhọ nin ọle dọ ruẹ. 4 Ene do nabhi ẹkẹ agbotu, ne iyi ibhio mhan ọsaje, ele mun ọne ẹmhọn uruẹmhin re. Ele do nabhi ẹkẹ agbotu, nin ele dọ baba mhan fẹ ghe, yẹ miẹn mhan isẹhoa nin mhan mhọn bọsi edibo nesi Jesu Kristi, beji ele ha da rẹ mhan kiẹn igbọn. 5 Mhan bha ka ele ehọ hiehie. Heye, mhan bhọ bha re otọ nin ele, ranmhude, mhan guanọ nin bha sẹyẹ rẹọ bhi ọne ẹmhọanta nin bha luẹle, ẹghe nan rẹ ta ọne ọta esili man bha.

6 Ene ikpea nan mun ekpẹn nan bhi agbotu bhọ bha miẹn emhin ọgbọn nin ele taman imẹn. (Ebi ele ka rẹ ha khin bha rẹtẹ mẹn, ranmhude ọ iyi ebi ọria dia yẹ bhi ukinegbe Osẹnobulua ghe.) 7 Ene ikpea nan da daghe ọle ghe, a zẹ imẹn nin mẹn dọ ha wewe ọne ọta esili man ẹbho ne bha ruẹ, beji a yẹ rẹ zẹ Pita nin ọle dọ ha wewe ọne ọta man ẹbho ne ruẹle. 8 Osẹnobulua nọn zẹ Pita nọn ha yi odibo rẹji ene ruẹle, ọle yẹ zẹ imẹn nin mẹn ha yi odibo rẹji ene iyi ibhokhan Ju. 9 Jemis, Sifas,* bi Jọni nin ẹbho ghe bi okperia, ki daghe ebi Osẹnobulua rẹ manman mhọn ifuẹkẹ da mẹn yẹ, ele da re obọ bhọ nin mẹn bi Banabas ha lu iwẹnna oga nin mhan lu bhi ẹwẹ ene ẹbho ne iyi Ju, sokpan, ele ki ha lu ọsele bhi ẹwẹ ibhokhan Ju. 10 Emhin ọkpa nin ele taman mhan hi, nin mhan ji ẹmhọn ene ibhioguele rẹtẹ mhan. Mẹn wo ka dọnmhegbe rẹ ha lu ọnan.

11 Ọkpakinọn, ẹghe nin Sifas* rẹ vae bhi Antiọk, mẹn da wo nanlẹn gui, ranmhude ọle bha lu nọnsẹn. 12 Ọkuẹsẹ, ene Jemis je re vae, ọle da deba ẹbho ne iyi ibhokhan Ju ha le ebale. Ọkpakinọn, ene ẹbho ki vae, ọle bha yẹ deba ele ha le ebale, ọle da siegbe sibhi ẹwẹ ele re. Ofẹn ebi ẹbho ne ruẹle ha ta yẹ da ha mun ọlẹn. 13 Ibhokhan Ju nekẹle da yẹ deba ọle ha do ọne aki ikpunun nan. Banabas bhọ da yẹ deba ele. 14 Mẹn ki kere ghe, uwedẹ nin ele rẹ ha lu emhin bha diẹn mun ẹmhọanta nin mhan wewe, mẹn da sira ele rebhe taman Sifas* yọle: “Arẹmiẹn obhokhan Ju uwẹ khin, uwẹ ilu emhin bhi uwedẹ nin ibhokhan Ju rẹ lu emhin. Be ki zẹ nin uwẹ da ha guanọ nin uwẹ sua ẹbho ne iyi ibhokhan Ju ọbhọ, nin ele ha lu emhin beji ibhokhan Ju rẹ lu emhin?”

15 Ibhokhan Ju mhan khin, mhan iyi ibhokhan agbaẹbho nekẹle ne lu emhin ebe. 16 Ọrẹyiriọ, mhan lẹnmhin ghe, ọnọn mhọn urẹọbhọ da Jesu Kristi ọle Osẹnobulua ha tiọle ọria nọn khiale, ọ iyi ọnọn re obọ rẹkhan uhi. Ọnan zẹle nin mhan da mhọn urẹọbhọ da Jesu Kristi, beji a ha da tie mhan eria ne khiale, ranmhude urẹọbhọ nin mhan mhọn da ọle, ọ iyi ranmhude nin mhan rẹ re obọ rẹkhan uhi. Osẹnobulua ida tie ọria soso ọnọn khiale, ranmhude ọle re obọ rẹkhan uhi. 17 Ahamiẹn ghe, ranmhude mhan dọnmhegbe nan rẹ tie mhan eria ne khiale rẹ na obọ Kristi, ọle ki zẹ nan da ha tie mhan eria olukhọ, ọnin ki be rẹman ghe Kristi ki re olukhọ khian? Heye! 18 Ahamiẹn ghe, emhin nin mẹn ka siẹn sotọ, ọle mẹn gbo kie dọ ha bọn, mẹn ki rẹ egbe imẹn kiẹn ọgbuhi a. 19 Rẹ na obọ ọne uhi, a da fan imẹn fia bhi otọ ọne uhi,* beji a ha da miẹn Osẹnobulua mẹn ha ki ha nyẹnlẹn nan. 20 A khan mẹn ọbhi oran deba Kristi. Ọ iyi mẹn yẹ nyẹnlẹn, Kristi ki nyẹnlẹn bhi egbe mẹn. Iẹnlẹn nin mẹn ki nyẹnlẹn nian, urẹọbhọ mẹn ki re ọle mhọn da Ọmọn nọnsi Osẹnobulua, nọn hoẹmhọn mẹn, yẹ yu nin mẹn. 21 Mẹn bha re ẹlo gbe ifuẹkẹ nọn khua nin Osẹnobulua mhọn da mẹn an. Sade ene re obọ rẹkhan uhi ele Osẹnobulua ghe ọle ghe e khiale, uyumhin nọnsi Kristi ha rẹ ha yi ihoho.

3 Ibhokhan Galesha ne iwanlan! Họla hiẹ bha yẹ re ibha ha lu emhin ebe? Ibha nan wo gbotọle fanọn an man, ebi a rẹ khan Jesu Kristi ọbhi okhun oran yẹ, ibha re inian ha lu emhin? 2 Bha taman imẹn: Ranmhude bha re obọ rẹkhan uhi be zẹ nan da re ẹlinmhin nọn khiale nin bha? La ranmhude bha mhọn urẹọbhọ da ọta nin bha họnlẹn be zẹ? 3 Iriọ ẹwanlẹn nọnsẹbha sẹ? Ibha ne wo ha lu rẹkhan adia ọsi ẹlinmhin nọn khiale ẹghe nin bha rẹ la munhẹn, ibha ki fikie dọ ha lu emhin bhi uwedẹ nin eria rẹ lu emhin? 4 Ene emhin kẹkẹ nin bha le oya le, bha iwo gheghe le oya ọle kua? Mẹn bha riale iriọ. 5 Ọnọn re ẹlinmhin nọn khiale nin bha yẹ lu emhin ọhan-ilo kẹkẹ bhi ẹwẹ bha ibe lu iriọ, ranmhude bha re obọ rẹkhan uhi? Ọ ibe yi ranmhude bha mhọn urẹọbhọ da ebi bha họnlẹn? 6 Ebenọnkhiale bhọ da yọle ghe, ranmhude Ebraham “mhọn urẹọbhọ da Jehova,* ọle zẹle nan da tiọle ọria nọn khiale.”

7 Bhi ọsi ẹmhọanta, mhan lẹnmhin ghe, ẹbho ne re urẹọbhọ man, ele hi imọn nesi Ebraham. 8 Ebenọnkhiale ka tale ọbhi otọ khẹ ghe, Osẹnobulua dẹ tie ẹbho ne iyi ibhokhan Ju eria ne khiale, sade ele re urẹọbhọ man. Ọnan zẹle nan da ka ta ọne ọta esili nan man Ebraham yole: “Rẹ na obọ ẹ, ọle ene agbaẹbho rebhe ha da miẹn erọnmhọn.” 9 Bhiriọ, ẹbho rebhe ne mhọn urẹọbhọ da Osẹnobulua dẹ miẹn erọnmhọn, beji Ebraham nọn mhọn urẹọbhọ da Osẹnobulua yẹ rẹ miẹn erọnmhọn.

10 Ọrebhe ne re udu tẹ ọne uhi, kiẹn eria nan fi ọle unun, ranmhude Ebenọnkhiale yọle: “Ọnọn hi ki rẹ khin nọn bha lu rẹkhan emhin rebhe nan gbẹn bhi ebe Uhi, kiẹn ọria nan fi ọle unun.” 11 Rẹ deba ọnin, ọ wo khia bhi ẹlo ghe, ọ iyi eria ne re obọ rẹkhan ọne uhi Osẹnobulua ha tiele eria ne khiale. Ebenọnkhiale yọle, “Ọria nọn khiale dẹ miuhọnmhọn, ranmhude urẹọbhọ nin ọle rẹman.” 12 Ọ iyi urẹọbhọ a rẹ re obọ rẹkhan Uhi. “Ọria nọn hi ki rẹ khin nọn lu ebi ọne uhi tale, dẹ ha nyẹnlẹn.” 13 Kristi da dẹ mhan yẹ miẹn mhan fan bhi obọ ọne Uhi. Ọle da sẹkhiẹn ihẹn nọnsẹmhan, yẹ re egbe hẹ ihẹn nọn rẹ khẹke mhan. Ebenọnkhiale yọle: “Ọria nọn hi ki rẹ khin nan khan bhi okhun oran, ọria nan fi ọle unun nọn.” 14 Emhin da dia nian, beji a ha da miẹn ghe, rẹ na obọ Jesu Kristi, erọnmhọn nan ve nin Ebraham ki sẹ obọ ọsi ene iyi ibhokhan Ju. Ẹghenin mhan ki sabọ miẹn ọne ẹlinmhin nọn khiale nan ve nin mhan, ranmhude nin mhan rẹ re urẹọbhọ man.

15 Ibhio, bha ji mẹn noo ijiẹmhin ọkpa rẹ re otọ nan man bha: Ahamiẹn ghe a ve akovẹn fo, aharẹmiẹn ghe eria ve ọne akovẹn, a iyẹ da fi ọle denọ, la nan miẹn ghe a bha mun ọlẹn sẹ. 16 Ebraham bi ọmọn nọnsọle, ele Osẹnobulua ve ive nan. Ẹghe nan rẹ ve ọne ive nanlẹn, a bha yọle, “uwẹ bi imọn nesẹ” bọsi ghe, ene imọn bunbun. Sokpan, a da yọle “uwẹ bi ọmọn nọnsẹ,” ọnan rẹman ghe, ukpọmọn ọkpa nọn. Ọne ọmọn nan hi Kristi. 17 Ikpe ọgban nyan iyisẹn enẹn* ki gbera fo, Osẹnobulua da mun ọne Uhi gbọ. Ọkpakinọn, ọne uhi bha re ọkpẹnlẹn ọbhi akovẹn nin Osẹnobulua ka deba Ebraham ve, beji a ha da miẹn ghe ive nin ọle ve nanlẹn bha yẹ munsẹ. 18 Ahamiẹn ghe, ene re obọ rẹkhan uhi, ele ha le ọne uku, ọ ida ha yi ranmhude ive nin Osẹnobulua vele. Ọkpakinọn, Osẹnobulua da mun ọne uku nin Ebraham ọsọhẹ, ranmhude ive nin ọle ve nanlẹn.

19 Be ki zẹ nin Osẹnobulua da mun Uhi gbọ? A mun ọlẹn gbọ, nan rẹ rẹman eji mhan da ha lu khọlọ, rẹ sẹbhi ẹghe nin ọne ọmọn nan ve ọne ive nan ha rẹ vae. Ene ẹhi Osẹnobulua noo rẹ mun ọne uhi nin Mozis. Mozis da ha yi ọsuọnmhan nọn mun ọne uhi nin ene ẹbho. 20 Bhi ive nin otuọnkpa ve, a imiẹn ebi a re ọsuọnmhan lu. Iriọ yẹ nọn. Osẹnobulua ọkpa hi ọnọn ve ọne ive nan. 21 Ọnan ki be rẹman ghe, ọne Uhi bi ive nesi Osẹnobulua bha diẹn kugbe? Eye! Sade uhi nọn ha sabọ re iẹnlẹn nin ọria ka ha ribhọ nọn, ẹbho ne re obọ rẹkhan ọne uhi, ele Osẹnobulua a rẹ ha tiọle eria ne khiale. 22 Ebenọnkhiale rẹman ghe, a mun emhin rebhe ọbhi obọ ọsi olukhọ. Bhiriọ, ẹbho ne mhọn urẹọbhọ da Jesu Kristi, ele ha miẹn ọne ive nin Osẹnobulua vele.

23 Ọ kuẹ sẹ ọne ẹghe nan ha rẹ munhẹn ha re urẹọbhọ man, ọne uhi da ha dia mhan, ọne uhi da mun imhan gba. Mhan da ha khuaẹloghe ọne ẹghe nan ha rẹ munhẹn ha re urẹọbhọ man. 24 Ọne Uhi hi emhin nọn dia mhan bu Kristi, beji a ha da sabọ tie mhan eria ne khiale, ranmhude urẹọbhọ nin mhan mhọnlẹn. 25 Ọkpakinọn, beji a miẹn ọne ẹghe sẹ nian, nin mhan rẹ munhẹn ha re urẹọbhọ man, ọ iyi ọne uhi ha yẹ ha dia mhan.

26 Ranmhude urẹọbhọ nin bha mhọn da Jesu Kristi, imọn nesi Osẹnobulua ibha rebhe ki khin. 27 Ranmhude, ibha rebhe ne mianmẹn, yẹ kugbe deba Kristi, mun akpa nọnsi Kristi yọ. 28 Ikikẹ iyẹ ribhi ẹwẹ bha. A iyẹ miẹn ọnan hi obhokhan Ju la ọnan hi obhokhan Grik. A iyẹ miẹn ọnan hi igbọn la ọnan hi ọnọn nyan egbe ọle. A iyẹ miẹn ọnan hi okpea la ọnan hi okhuo. Ọkpa ibha rebhe ki khin nin bha rẹ kugbe deba Jesu Kristi. 29 Sẹyẹ, ahamiẹn ibo nọnsi Kristi ibha ye, ọnin rẹman ghe imọn nesi Ebraham bha gene khin. Ibha deba ene ha le ọne uku nan vivọle.

4 Ẹghe nin ọmọn nọn ha le uku nọnsi aba ọle rẹ yi obhokhan, ọle bha khua okhun gbera igbọn ne ribhi ọne uwa, arẹmiẹn ọle hi ọnọn nyan emhin rebhe. 2 Rẹ dọ sẹbhi ukpẹdẹ nin aba ọle rẹyi, odotọ eguọmhandia ne ribhi ọne uwa, bi ẹbho nan mun ele obọ bhọ ne ha gbẹloghe ọle, ọle da ha ye. 3 Iriọ yẹ nọn, ẹghe nin mhan rẹ ha yi ibhokhan, ọle mhan rẹ ji uwedẹ nin ọne agbọn nan rẹ lu emhin bi uwedẹ nin ele rẹ ria eria da ha dia mhan. 4 Ẹghe nin Osẹnobulua rẹyi ki sẹ, ọle da je Ọmọn nọnsọle re. Okhuo da biẹ ọle. Ọne Ọmọn da yẹ ha ribhi odotọ uhi, 5 beji ọle ha da dẹ ẹbho ne ribhi odotọ uhi kiere, bhiriọ, Osẹnobulua ki sabọ re mhan kiẹn imọn nesọle.

6 Ranmhude imọn nesi Osẹnobulua bha khin, ọle re ẹlinmhin nọnsi Ọmọn nọnsọle bha* bhi ọkhọle. Ọne ẹlinmhin re ibha tie Osẹnobulua: “Aba!”* 7 Ibha iyẹ yi igbọn, imọn nesi Osẹnobulua bha ki khin. Ahamiẹn imọn nesọle bha khin, ọnan rẹman ghe ibha deba ene ha le uku nọnsi Osẹnobulua.

8 Ẹghe nin ibha bha sẹ rẹ lẹn Osẹnobulua, ọle ibha rẹ ha ga osẹ ne iyi osẹ. 9 Ọkpakinọn, ejayenan nian, bha dọ lẹn Osẹnobulua, la nin mẹn yọle, Osẹnobulua lẹn bha. Be ki zẹ nin bha da fikie dọ ha lu emhin bii ibhokhan, yẹ lu emhin ne bha kiọnlẹn nin bha ka ha lu khẹ, yẹ ji ene emhin nan ha dia bha? 10 Bha sẹyẹ wo ha lu iluemhin kẹkẹ. Bha lu iluemhin ọsi ukpẹdẹ, ọsi uki, ọsi ukpe, bi ọsi ẹghe kẹkẹ. 11 Ofẹn mun mẹn nan hẹi dọ miẹn ghe, mẹn re obọ lu kua bhi egbe bha.

12 Ibhio, mẹn ka rẹ diabe ibha, ọkpakinọn, imẹn da fidenọ. Bha huẹan, bha re egbe khọkhọ imẹn. Ibha bha re obọ oya mun mẹn. 13 Bha lẹnmhin ghe, emianmhẹn nin mẹn ha khọnmhọn, ọle re isẹhoa nin mẹn rẹ tẹmhọn Osẹnobulua man bha ọsi ọhẹnhẹn. 14 Arẹmiẹn emianmhẹn nin mẹn ha khọnmhọn bha lẹkhẹ nin bha, ibha bha ha sọnnọn imẹn. Bha da sẹyẹ miẹn imẹn ọbhi egbe bọsi ẹhi nọnsi Osẹnobulua, bọsi ghe, Jesu Kristi mẹn khin. 15 Bha rẹ wo ha ghọnghọn ẹghenin, be ki sunu nian? Bhi ọsi ẹmhọanta, mẹn lẹnmhin ghe, sade ọ ji bha lu nọn, bha ha rẹ bhọnọ ikpẹnlo nesẹbha ne nin mẹn. 16 Ibha ki be re imẹn kiẹn oghian bha, ranmhude nin mẹn rẹ ta ẹmhọanta man bha? 17 Ẹbho eso wo ha guanọ nin ele ne ibha ba egbe. Ọkpakinọn, ọ iyi ọmhẹn nọnsẹbha ele guanọ. Ele guanọ nin bha sibhi ibo nọnsẹmhẹn re, beji bha ha da rẹkhan ele. 18 Ọ iyi ọsi ghe, emhin ebe nọn nin ẹmhọn bha rẹ manman rẹtẹ ọria, sade ọmhẹn nọnsẹbha ọle guanọ. Ọkpakinọn, ọkhẹke nin ẹbho ha lu ọnan ẹghe rebhe. Ọ iyi ẹghe nin mẹn rẹ ribhi enin ọkpa. 19 Imọn nesẹmhẹn, ranmhude ibha, mẹn gbo kie ha ribhi ọbalọ bọsi okhuo nọn khian la biẹ. Bha ha dọ re egbe khọkhọ Kristi, ọle ọkpa mẹn ha da sibhi ọne ọbalọ nan re. 20 Ẹmhọn bha wo han mẹn ilo, ọ ha rẹ yẹẹ mẹn sade eji bha ye mẹn ye, beji mẹn ha da lẹn ebi mẹn ha rẹ ne ibha talọ yẹ.

21 Uwẹ nọn guanọ nọn ha ribhi odotọ uhi, uwẹ bha be lẹn ebi a gbẹn bhi ebe Uhi? 22 Bhi ọsi ijiẹmhin, a gbẹn ọlẹn bhi ebe uhi ghe, imọn eva Ebraham ha mhọnlẹn. Igbọn biẹ ọkpa nanlẹn, okhuo nọn biẹ ọnọnkẹle nanlẹn bha ha yi igbọn. 23 Ranmhude ive nin Osẹnobulua ve, ọle zẹle nin ọne okhuo nọn iyi igbọn da sabọ biẹ ọmọn nọnsọle. Sokpan beji a rẹ biẹ imọn nekẹle, ọle ọne igbọn rẹ biẹ ọmọn nọnsọle. 24 Mhan dẹ sabọ re ene emhin nan lu arẹkhọkhọ. Ene ikhuo eva nan mundia nin akovẹn eva. Akovẹn nin ọhẹnhẹn hi ọne a ve bhi uke oke ọsi Sanai. Igbọn ọrebhe ne ribhi odotọ ọne akovẹn nan khin. Ọne akovẹn nan a re Hega khọkhọ. 25 Hega mundia nin oke ọsi Sanai. Otọ Arebia ọne oke nan ye. Hega a rẹ khọkhọ Jerusalẹm nọn ribhi otọ, ranmhude igbọn ele bi imọn nesọle khin. 26 Jerusalẹm nọn ribhi okhun iyi igbọn, ọle hi inẹn mhan.

27 Ebenọnkhiale yọle: “Ha ghọnghọn, uwẹ nin agan, wo ha duje, uwẹ nin okhuo nọn bha sẹ ka biẹ khẹ. Imọn ọsi ọne okhuo nan rẹ mun fia, dọ bun gbera imọn ọsi ọne okhuo nọn mhọn ọdọ.” 28 Ibhio, imọn nan vivọle bha khin, beji Aiziki yẹ rẹ ha yi ọmọn nan vivọle. 29 Beji ọne a biẹ bhi uwedẹ nan rẹ biẹ imọn nekẹle rẹ ha kpokpo ọne a na obọ ẹlinmhin biẹ, iriọ yẹ nọn nian. 30 Ọkpakinọn, Ebenọnkhiale da yọle: “Khu ọne igbọn bi ọne ọmọn nọnsọle fia, ranmhude ọmọn ọsi ọne igbọn ida deba ọmọn ọsi ọne okhuo nọn iyi igbọn le ọne uku.” 31 Ibhio, bha lẹn sẹbhọ ghe, imọn ọsi ọne okhuo nọn iyi igbọn mhan khin. Mhan iyi imọn ọsi ọne igbọn.

5 Kristi fan mhan fia bhi odotọ ọne uhi. Bhiriọ, bha mundia nọnsẹn, bha hẹi ji ọria soso gbo kie rẹ bha kiẹn igbọn.

2 Ghọle! Imẹn nin Pọl, imẹn ta ọnan man bha. Bha ha dọ ruẹ, bha ida miẹn elele bhi ebi Kristi lu nin bha. 3 Mẹn gbo kie taman bha ghe, ahamiẹn ọria ruẹle, ọle ki yẹ wo muegbe nin ọle rẹ re obọ rẹkhan ene Uhi rebhe. 4 Ahamiẹn ghe, uhi bha re obọ rẹkhan beji a ha da tie bha eria ne khiale, bha iyẹ ribhi ibo nọnsi Kristi. Bha re ẹlo gbe ifuẹkẹ nọn khua nọnsi Kristi a. 5 Bhi ọsi mhan, ẹlinmhin nọn khiale wo rẹkpa mhan rẹ ha khẹ ẹghe nan ha rẹ tie mhan eria ne khiale, ranmhude urẹọbhọ nin mhan rẹman. 6 Ọ iyi sade mhan ruẹle la mhan bha ruẹ ha rẹ mhan ha ribhi ibo nọnsi Jesu Kristi. Urẹọbhọ nin mhan mhọnlẹn nọn rẹ mhan ha re oyẹẹ man, ọle ha rẹkpa mhan.

7 Bha rẹ wo ha lu nọnsẹn. Họbhọ ki de bha idobolo, nin ibha bha da yẹ ha re obọ rẹkhan ọne ẹmhọanta? 8 Ọ iyi obọ Osẹnobulua nọn tie bha ene ọta elẹlẹ nan na vae. 9 Obhi yisti khere, ọle re ẹlubọ nan rẹ lu ibrẹd huẹ. 10 Mẹn rẹọbhọ ghe, ibha ne ribhi ibo nọnsi Ebeanlẹn mhan, dẹ rẹọ bhi ebi mẹn tale. Ọria nọn hi ki rẹ khin nọn guanọ ibha ẹmhọn dẹ miẹn ibhuohiẹn nọn khẹke ọle. 11 Ibhio, sade ẹmhọn uruẹmhin mẹn sẹyẹ wewe man ẹbho, ẹbho irẹ ha kpokpo imẹn, ẹmhọn Jesu nan gbe a bhi okhun oran* nin mẹn wewe hẹi rẹ ha re ẹkẹ khọ ele. 12 Ọ ha rẹ wo yẹẹ mẹn sade ene ikpea ne bha ji egbe da fu bha re kiẹn ọwekhuẹ.*

13 Ibhio, Osẹnobulua fan ibha fia. Ọkpakinọn, bha hẹi re ọne isẹhoa nan rẹ ha khu ọbhi emhin nin egbe guanọ. Bha re ọne isẹhoa ha re oyẹẹ man, bha yẹ ha ga ibhio bha. 14 Mhan ha re obọ rẹkhan ọne Uhi nan, nọn yọle: “Hoẹmhọn ibo ẹ, beji uwẹ rẹ hoẹmhọn egbe ẹ.” Ọne hi ghe, mhan re obọ rẹkhan ene uhi rebhe. 15 Ahamiẹn ibha wo ha ne egbe ibha van, yẹ ne egbe khọnlẹn, bha dẹ sabọ gbono egbe a. Bhiriọ, bha mhọn ẹwanlẹn.

16 Bha wo ha lu rẹkhan adia ọsi ẹlinmhin nọn khiale. Bha ha lu iriọ, ibha ida lu emhin ne egbe nọnsẹbha guanọ hiehie. 17 Ebi egbe guanọ bi ebi ọne ẹlinmhin guanọ iyi ọkpa. Ọ iyi ebi ẹlinmhin guanọ egbe guanọ. Ene emhin nan veva ne egbe suan. Ọnan zẹle nin bha ida sabọ lu emhin nin bha ho nin bha lu. 18 Ahamiẹn ghe, ẹlinmhin nọn khiale dia bha, ibha iyẹ ribhi odotọ uhi.

19 Ẹbho ne lu emhin nin egbe nọnsele guanọ, mhan wo daghe ebi ele lu. Ene emhin nin ele lu hi, igboghẹ,* emhin ne bha khia, ilọnmhọn okan,* 20 igẹbọ, ilọnmhọn ikpẹbo, ihegbe, okhọnlẹn, ẹkẹ-oriala,* okpohu, ozughu, iwa-egbea, izibo, 21 oyadan,* idanyọngbegbe, iduje ọsi ẹbibi, bi emhin ne dia inian. Mẹn ka sekha nin bha khẹ ghe, ẹbho ne lu emhin ne sẹ inian ida nabhi Agbejele nọnsi Osẹnobulua. Mẹn gbo kie ha sekha nin bha nian.

22 Bhi obọ nọnkẹle, ẹbho nin ẹlinmhin nọn khiale dia mhọn ene ikpẹ nan, oyẹẹ, eghọnghọn, ọfure, iziẹngbe, ifuẹkẹ, umhẹnmhin, urẹọbhọ, 23 ẹkẹ-omẹnhiẹn, bi imuegbe-bhi-ibẹẹ, uhi iribhọ nọn bha re obọ bhi ene emhin nan. 24 Rẹ deba ọnin, ẹbho ne ribhi ibo nọnsi Jesu Kristi, re ọkpẹnlẹn ọbhi ebi egbe nọnsele guanọ.*

25 Ahamiẹn ẹlinmhin nọnsi Osẹnobulua dia mhan, bha ji mhan wo ha nyẹnlẹn rẹkhan adia ọsi ọne ẹlinmhin. 26 Ọ bha khẹke nin mhan ha tẹngbemun, la nin mhan ne ibo mhan ha hinmhin egbe. Ọ bha yẹ khẹke nin mhan ha mhọn oyadan.*

6 Ibhio, ahamiẹn ọria bhi ẹwẹ bha zẹ ukpoẹ nọn bha khẹke, aharẹmiẹn ọle bha lẹn ghe emhin nọn imhẹn ọle lu, ọkhẹke nin bha nin ẹlinmhin nọn khiale dia dọnmhegbe nin bha rẹ dia ọle ọbhi uwedẹ, ibha ki re ẹkẹ-omẹnhiẹn lu ọle. Ọkpakinọn, bha yẹ gbẹlokotọ bhi egbe nọnsẹbha, nin bha tobọbha hẹi de ọbhi edọnmhẹn. 2 Bha rẹkpa ibhio bha ha mun ihẹ nọn denyẹnyẹn ele. Inian bha ha rẹ rẹman ghe, bha re obọ rẹkhan uhi nọnsi Kristi. 3 Ahamiẹn ọria bha sẹ emhin soso, nin ọle da ha riale ghe, okpọria ọle khin, egbọle ọle gheghe hiẹ. 4 Ọkhẹke nin ọdeọde gbẹlokotọ bhi ebi ọle rẹ lu emhin yẹ, ẹghenin, ọle ki ha ghọnghọn, ranmhude emhin nin ọle sabọ lu, ọ iyi ranmhude ọle re egbe khọkhọ ọria ọbhebhe. 5 Ọdeọde ha tobọle mun ihẹ nọnsọle.

6 Rẹ deba ọnin, ọkhẹke nin ọria nan man ọlẹn ọta nọnsi Osẹnobulua rẹ bhi emhin esili nin ọle mhọn nin ọria nọn man ọle emhin.

7 Bha hẹi hiẹ egbe bha, ọria ida sabọ mun Osẹnobulua lu. Emhin nọn hi ki rẹ khin nin ọria kọle ọle ha yẹ rọ. 8 Ọria nọn lu ebi egbe nọnsọle guanọ dẹ miẹn uu.* Bhi obọ nọnkẹle, ọria nọn lu rẹkhan adia ọsi ẹlinmhin nọn khiale dẹ miẹn iẹnlẹn ọsi ẹdẹdẹmhẹndẹ. 9 Bhiriọ, bha ji mhan wo rẹtẹ ha lu emhin nọn mhẹn, ranmhude, ọne ẹghe ha sẹ, mhan dẹ miẹn elele bhọ sade mhan bha ji egbe lọ mhan. 10 Bhiriọ, ẹghe nọn hi ki rẹ khin nin mhan rẹ miẹn ọne isẹhoa, bha ji mhan ha lu emhin esili nin ọrebhe, manman nọn rẹji ene imhan ko ga.

11 Bha daghe ikpebe ne kọnkọn nin mẹn rẹ gbẹn ọne ebe nan. Imẹn tobọmẹn re obọ mẹn gbẹn ọlẹn.

12 Ẹbho ne guanọ nin eria ne ribhi ọne agbọn nan ha re ẹlo esili ghe ele, ele sua bha bhọ nin bha dọ ruẹ. Ranmhude ele bha guanọ nan ha kpokpo ele ba ẹmhọn Jesu Kristi nan gbe a bhi okhun oran,* ọle zẹle nin ele da lu ọnan. 13 Ene ẹbho nan ne ruẹle bhọ ire obọ rẹkhan ọne Uhi. Ele gheghe guanọ nin bha ruẹ beji ele ha da miẹn ibha rẹ ha dẹgbọ. 14 Bhi ọsẹmhẹn, mẹn ida re emhin ọbhebhe rẹ dẹgbọ, gbera Jesu Kristi nin Ebeanlẹn mhan, nan gbe a bhi okhun oran.* Ranmhude uyumhin nọnsọle, ọne agbọn nan kiẹn emhin nọn yu bhi ẹlo nọnsẹmhẹn. Mẹn yẹ kiẹn ọria nọn yu rẹji ọne agbọn nan. 15 Ọria ruẹle la ọ bha ruẹ iyi emhin soso. Nin Osẹnobulua rẹ re ọria kiẹn ọria ọsọgbọn, ọle hi ebe lu uhọnmhọn emhin. 16 Ọrebhe ne ji ọne ẹmhọanta nan ha dia ele bhi iẹnlẹn, ne yi Izrẹl nọnsi Osẹnobulua, dẹ ha mhọn ọfure bi itohan nọn na obọ Osẹnobulua vae.

17 Rẹ na bhi ọne ẹghe nan rẹ ha khian, ọria soso hẹi si ẹmhọn ji mẹn. Ranmhude, iyaman ri mẹn bhi egbe nọn rẹman ghe, igbọn nọnsi Jesu mẹn khin.

18 Ibhio, mẹn bhii nin Jesu Kristi nin Ebeanlẹn mhan manman mhọn ifuẹkẹ da bha beji bha ha rẹ ha re ikpẹ esili man. Isẹ.