EBE ỌZEVA NAN GBẸN JI IBHOKHAN KỌRINT

1 Imẹn nin Pọl, nin Osẹnobulua rẹ kiẹn odibo ọsi Jesu Kristi, bi Timoti nin obhio mhan gbẹn ọne ebe nan ji agbotu nọnsi Osẹnobulua nọn ribhi Kọrint, bi ene khiale rebhe ne ribhi otọ Akea:

2 Mẹn bhii nin Osẹnobulua nin Aba mhan, bi Jesu Kristi nin Ebeanlẹn mhan manman mhọn ifuẹkẹ da bha, yẹ re ọfure nin bha.

3 Ekhuẹnmhẹn hi ọsi Osẹnobulua nin Aba Jesu Kristi nin Ebeanlẹn mhan. Ọle hi Aba nọn manman mhọn itohan. Ọle yẹ Osẹnobulua nọn re ikoudure nin mhan. 4 Ọle ko mhan udu re bhi ekpokpo nọn hi ki rẹ khin nin mhan ye. Mhan ki yẹ noo ọne ikoudure nin mhan miẹn bhi obọ ọle rẹ ko ẹbho udu re bhi ekpokpo nọn hi ki rẹ khin nin ele ye. 5 Beji mhan rẹ manman ha le oya ranmhude Kristi, iriọ mhan rẹ manman ha miẹn ikoudure rẹ na obọ Kristi. 6 Ahamiẹn mhan ziẹngbe ekpokpo, iziẹngbe nọnsẹmhan dẹ sabọ ziẹn bha udu, yẹ rẹkpa bha rẹ miẹn umiẹnfan. Sẹyẹ, ahamiẹn a re ikoudure nin mhan, ọ dẹ sabọ ziẹn bha udu. Ọnan ki rẹkpa bha rẹ ziẹngbe ekpokpo nin mhan yẹ ziẹngbe ọle. 7 Mhan imhọn edandan bhi ẹmhọn bha hiehie. Mhan lẹnmhin ghe, beji bha rẹ deba mhan ha ziẹngbe ekpokpo, bha dẹ yẹ deba mhan miẹn ikoudure.

8 Ibhio, mhan guanọ nin bha lẹn ekpokpo nin mhan miẹn bhi ẹghe nin mhan rẹ ha ribhi agbaẹbho ọsi Esia. Ọ wo manman nyọn mun mhan. Ahu bhọ da fo mhan bhọ. Mhan bhọ da ha riale ghe mhan bhọ ida miuhọnmhọn. 9 Bhi ọsi ẹmhọanta, mhan bhọ da ha riale ghe, ọsẹmhan folo. Ebe sunu nan da rẹkpa mhan lẹn ghe, Osẹnobulua nọn ha sabọ riọ ọria kpanọ bhi uu, ọle ọkhẹke nin mhan mun udu nyan, ọ iyi egbe mhan. 10 Osẹnobulua da gene miẹn mhan fan bhi ọne ekpokpo nan nọn rẹ la miẹn mhan uhọnmhọn. Ọle dẹ kie lu ọle. Mhan wo rẹọbhọ ghe, ọle dẹ sẹyẹ ha miẹn mhan fan. 11 Bha wo ha nan erọnmhọn nin mhan. Urẹkpa ọnan khin rẹji mhan. Bha ha lu ọnan, ẹbho ne bunbun ki khuẹnmhẹn Osẹnobulua bhi emhin esili nin ọle lu nin mhan, nin bha ne bunbun rẹ ha nan erọnmhọn nin mhan.

12 Ebi mhan rẹ dẹgbọ, ọle hi ghe, ọkhọle nọnsẹmhan khia, ranmhude, ikhiale bi ẹkẹata, ọle mhan rẹ nyẹnlẹn bhi ẹkẹ ọne agbọn nan. Ọle mhan yẹ rẹ ne ibha lu emhin. Mhan bha noo ẹwanlẹn nọnsẹmhan. Mhan da wo ha re ifuẹkẹ man, beji Osẹnobulua rẹ re ifuẹkẹ nọn khua man. 13 Emhin nin bha ha sabọ tie yẹ lẹn otọ ọle,* ọle mhan gbẹn ji bha. Mẹn rẹọbhọ ghe bha dẹ sẹyẹ ha dọnmhegbe rẹ lẹn otọ ọle nọnsẹn. 14 Mhan lẹnmhin ghe, eso bhi ẹwẹ bha dọ kere ghe, mhan sẹ eria nin bha ha rẹ ha hio, beji mhan ha yẹ rẹ re ibha hio bhi ukpẹdẹ nin Jesu nin Ebeanlẹn mhan ha vae.

15 Ranmhude mẹn manman rẹọ bhi ọnan, ọle zẹle nin mẹn da rẹ ha guanọ nin mẹn rẹnẹ ji bha ọsi ugba ọzeva, beji a ha da miẹn bha ki miẹn isẹhoa ọbhebhe rẹ gbo ha ghọnghọn.* 16 Mẹn da rẹ ha mhọn ọlẹn bhi ọkhọle ghe, mẹn a ha khian Masẹdonia, mẹn ki van obọ tuẹ bha. Sẹyẹ, mẹn ha ki ha vade, mẹn ki yẹ tuẹ bha. Mẹn ha ki ha khian Judia, bha ki hoho* imẹn sẹ uwedẹ. 17 Ẹghe nin mẹn rẹ ha mhọn ọne emhanmhan nin mẹn rẹ dọ fẹ bha ghe, imẹn wo gene ha guanọ nin mẹn vae. Ọ iyi beji ọ ghọn mẹn, mẹn rẹ ha mhanmhan emhin. Mẹn bha yọle “ehe” fo, akizẹbue mẹn da fi unun denọ yọle “heye.” 18 Bha dẹ sabọ mun udu nyan Osẹnobulua, ghe, ẹmhọanta mhan taman ibha. Mhan ida yọle “ehe” yẹ gbo fi unun denọ yọle “heye.” 19 Jesu Kristi nin Ọmọn nọnsi Osẹnobulua, nin mẹn, Sivanọs* bi Timoti tẹmhọn ọlẹn bhi ẹwẹ bha, bha yọle “ehe,” akizẹbue, ọ da gbo yọle “heye.” “Ehe” nọnsọle ifidenọ. 20 Ive nesi Osẹnobulua rebhe kiẹn “ehe” ranmhude Jesu. Ọle yẹ zẹ nin mhan da na obọ ọle gbe “Isẹ” ọbhi erọnmhọn rẹ re uyi ji Osẹnobulua. 21 Ọkpakinọn, Osẹnobulua hi ọnọn tare ghe, Kristi nyan mhan bi bha. Osẹnobulua yẹ hi ọnọn zẹ imhan. 22 Osẹnobulua re iyaman nọnsọle mhan bhi egbe, ọle rẹ ẹlinmhin nọn khiale mhan bhi ọkhọle nin ọle rẹ rẹman mhan ghe emhin nọn vade bhi ẹghe odalo dẹ sẹ mhan obọ.

23 Osẹnobulua dẹ sabọ sọsali ọbhọ ghe, ranmhude imẹn bha ho nọn khọ nin bha gbe, ọle zẹle nin mẹn bha da sẹ vae bhi Kọrint. 24 Mhan iyi ebeanlẹn nesẹbha. Ọ iyi mhan ha taman ibha ebi ibha ha rẹ ga Osẹnobulua yẹ. Ene deba bha wẹnna beji bha da ha ghọnghọn mhan khin. Urẹọbhọ nin bha mhọnlẹn, ọle hi ebe re ibha deziẹn.

2 Mẹn taman egbe imẹn ghe, imẹn ha kie bu bha re, imẹn ida rẹ bha ha lu akhiẹ. 2 Ranmhude, imẹn ha rẹ bha rebhe ha lu akhiẹ, imẹn iyẹ da miẹn ọria nọn ha rẹ mẹn ha ghọnghọn. 3 Nan hẹi dọ miẹn ghe, eria ne rẹ khẹke ne ha rẹ mẹn ha ghọnghọn, ele ki rẹ mẹn viẹ, ọle zẹle nin mẹn da ka gbẹn ebe ji bha. Mẹn rẹọbhọ ghe, ebe rẹ mẹn ghọnghọn, ọle yẹ rẹ bha rebhe ghọnghọn. 4 Akhiẹ bi ọbalọ mẹn ha ye ẹghe nin mẹn rẹ gbẹn ọne ebe nin ji bha. Mẹn da wo yẹ manman ha viẹ. Ọ iyi nin mẹn rẹ rẹ bha lu akhiẹ zẹle nin mẹn da gbẹn ọne ebe nin. Mẹn gbẹn ọlẹn nin mẹn rẹ ji bha lẹn ghe mẹn manman hoẹmhọn bha.

5 Ahamiẹn ọria soso bhi ẹwẹ bha lu emhin nọn ha re ọria ha lu akhiẹ, ọ iyi mẹn ọle rẹ ha lu akhiẹ. Ibha rebhe ọle rẹ ha lu akhiẹ. Mẹn bha yẹ ho nin mẹn talọ gbe bhi ọne ẹmhọn nan. 6 Adia nin ene bunbun bhi ẹwẹ bha re nin ọne ọria sẹriọ. 7 Ejayenan nian, bha rẹhunmhan ọlẹn, bha yẹ ko ọle udu re, nan hẹi dọ miẹn ghe, akhiẹ gbe ọle ahu sotọ. 8 Bha huẹan, bha rẹman ọlẹn ghe bha sẹyẹ hoẹmhọn ọlẹn. 9 Emhin ọbhebhe ribhọ nọn zẹle nin mẹn da ka gbẹn ebe ji bha: Mẹn ho nin mẹn re otọ nin bha rẹ rẹman ghe bha gene hẹnmhọn. 10 Bha ha rẹhunmhan ọria bhi emhin nọn hi ki rẹ khin, mẹn yẹ rẹhunmhan ọlẹn. Bhi ọsi ẹmhọanta, emhin nọn hi ki rẹ khin nin mẹn rẹhunmhan (sade emhin gene ribhọ nin mẹn rẹhunmhan), ranmhude ọmhẹn nọnsẹbha zẹle nin mẹn da rẹhunmhan ọlẹn. Kristi dẹ sabọ sọsali ọbhi ọnan. 11 Mhan ha lu iriọ, obọ ọsi Esu ida ke okhun bhi egbe mhan. Bhi ọsi ẹmhọanta, mhan lẹn uwedẹ kẹkẹ nin ọle rẹ lu emhin.

12 Ẹghe nin mẹn rẹ sẹbhi Troas, nin mẹn dọ tẹmhọn Kristi, isẹhoa da tuje a nin mẹn rẹ lu iwẹnna ọsi Ebeanlẹn mhan. 13 Ọkpakinọn, ọkhọ mẹn bha sotọ, ranmhude, mẹn bha miẹn Taitọs nin obhio mẹn. Bhiriọ, mẹn da gbe ọkinbue nin ele yẹ kpanọ ha khian Masẹdonia.

14 Ekhuẹnmhẹn hi ọsi Osẹnobulua, nin ọle rẹ re imhan dujie rẹkhan Kristi, bọsi eyokhọnlẹn ne khọn miotọ bhi okhọnlẹn. Ọle rẹkpa mhan rẹ ha wewe ilẹnmhin nọnsọle na bhi ijerebhe. Ọne ilẹnmhin nan diabe emhin nọn vin-ohin. 15 Bhi ẹlo nọnsi Osẹnobulua, inian imhan ne tẹmhọn Kristi diabe emhin nọn vin-ohin. Mhan vin-ohin sẹbhi eji ẹbho ne da miuhọnmhọn ye, mhan yẹ vin-ohin sẹbhi eji ẹbho ne da fuẹn an ye. 16 Rẹji ene ha fuẹn an, imhan ya uu, ranmhude ele dẹ miẹn uu. Rẹji ene ha miuhọnmhọn, mhan vin-ohin ọsi iẹnlẹn, ranmhude ele dẹ miẹn iẹnlẹn. Họla ọnọn gene sẹ nọn ha lu ọne iwẹnna nan? 17 Imhan hi ene sẹle, ranmhude, mhan ire ọta nọnsi Osẹnobulua rẹ do ẹki beji ẹbho ne bunbun lu. Ẹkẹata mhan rẹ tale, bọsi eria nin Osẹnobulua jele, bi bọsi edibo nesi Kristi. Sẹyẹ, odalo Osẹnobulua mhan da lu ọne iwẹnna nan.

3 Ọ bha khẹke, nin mhan gbo kie ha tẹmhọn egbe mhan man bha. Ọ bha khẹke nan gbẹn ilẹta ji bha rẹ tẹmhọn mhan man bha, la nin bha gbẹn ilẹta rẹ tẹmhọn mhan man ẹbho, arẹmiẹn ghe, iriọ ikpea eso rẹ guanọ nan gbẹn ilẹta rẹ tẹmhọn ele man ẹbho. 2 Ibha bhọ hi ilẹta nan rẹ tẹmhọn mhan. Ọkhọle nọnsẹmhan a gbẹn bha ọi. Ẹbho rebhe lẹn bha. Ibha hi ọne ilẹta nin ele tie. 3 Ọ wo khia bhi ẹlo ghe, ibha hi lẹta ọsi Kristi nin mhan ne wẹnna nanlẹn gbẹnlẹn. Ọ iyi ukeke mhan rẹ gbẹn ọlẹn. Sokpan, ẹlinmhin nọnsi Osẹnobulua nọn nyẹnlẹn mhan rẹ gbẹn ọlẹn, ọ iyi uke udo mhan gbẹn ọlẹn ọi. Ọkhọle nọnsẹbha mhan gbẹn ọlẹn ọi.

4 Urẹkpa nin Kristi re nin mhan zẹle nin mhan da gbudu ta ọnan bhi odalo Osẹnobulua. 5 Ọ iyi ọsi ghe, mhan gene sẹ ene ha lu ọne iwẹnna nan. Osẹnobulua hi ọnọn rẹ mhan kiẹn eria ne sẹle. 6 Osẹnobulua, hi ọnọn rẹ mhan sẹ eria ne da ha yi ọguọmhandia ọsi akovẹn ọsọgbọn. Mhan iyi ọguọmhandia ọsi uhi nan re obọ gbẹn, ọsi ẹlinmhin nọn khiale mhan khin. Uu, ọle ọne uhi nan re obọ gbẹn si re. Bhi obọ nọnkẹle, iẹnlẹn, ọle ẹlinmhin nọn khiale re nin ọria.

7 Ẹghe nan rẹ mun ọne uhi nan gbẹn ọbhi udo, nọn yẹ si uu re nin Mozis, uyi nọn khua rẹkhan ọlẹn, arẹmiẹn ghe, ọne uyi nan dẹ si egbe kie. Ranmhude ọne uyi nan, ẹlo nọnsi Mozis bhọ da ha fi wanlan-wanlan, rẹ sẹbhọ ghe ibhokhan Izrẹl bha yẹ gbudu ha ghe ọle ẹlo. 8 Eka-eka ki hi ẹlinmhin nọnsi Osẹnobulua? Uyi nọn da ha mhọnlẹn dẹ wo manman kpọnọ gbera ọsi ọne uhi. 9 Ahamiẹn ghe, ọne uhi nan rẹ bhu gbe ẹbho ghe, ele lu ebe imhẹn wo manman ha mhọn uyi, eka-eka ki uyi ọsi iwẹnna nan rẹ rẹkpa ẹbho kiẹn eria ne khiale? Uyi nọnsọle ha kpọnọ nẹ! 10 Bhi ọsi ẹmhọanta, emhin nọn ka rẹ ha mhọn uyi khẹ iyẹ mhọn uyi. A re uyi si ọle bhi egbe re, ranmhude, emhin nọn mhọn uyi gbera ọle zegbere. 11 Ahamiẹn ghe, emhin nan ha re kie wo manman ha mhọn uyi ẹghe nan rẹ mun ọlẹn gbọ, eka-eka ki emhin nọn da ha ribhọ? Uyi nọnsọle ha kpọnọ nẹ!

12 Beji a miẹn ghe, mhan mhọn iruduba nọn sẹnian, ofẹn imun mhan rẹ talọ dagbare. 13 Mhan ilu bọsi Mozis nọn re emhin gue ẹlo, beji a da miẹn ibhokhan Izrẹl bha wo ha ghe uyi ọsi ọne uhi nọn ha siegbe kie. 14 Ele bha ha mhọn ilẹn-otọ-emhin. Rẹ sẹbhi ẹlẹnan nian, ọkhọle nọnsele sẹyẹ diabe ebi a re emhin gue. Ọnan zẹle ne ele bha da sabọ lẹn otọ akovẹn nọn ka ribhọ khẹ. Ele ha mhọn urẹọbhọ da Kristi, ọle ọkpa ọne ugue nan ha da sabọ si ele bhi ọkhọle re. 15 Rẹ dọ sẹbhi ẹlẹnan, ẹghe nọn hi ki rẹ khin nan rẹ tie ebe nin Mozis gbẹn, ọne ugue nan ki degue ọkhọle nọnsele. 16 Ọkpakinọn, ọria ha bu Jehova* re, ọle ki re ọne ugue nan si ọle bhi ọkhọle re. 17 Jehova* hi ọne ẹlinmhin. Ẹbho ne mhọn ẹlinmhin nọnsi Jehova* mhọn isẹhoa. 18 Mhan rebhe wo ha re uyi nọnsi Jehova* man, beji ughegbe rẹ fi wanlan-wanlan. Mhan bha re emhin gue ẹlo. Mhan wo ha fidenọ nin mhan diabe Osẹnobulua, yẹ manman ha re uyi nọnsọle man beji Jehova* nin ọne Ẹlinmhin* rẹ ha guanọ ọle tee.

4 Bhiriọ, beji a miẹn ghe, a mhọn itohan da mhan, yẹ mun ọne iwẹnna oga nan nin mhan, mhan ida ji egbe lọ mhan. 2 Mhan he emhin ẹkhọle nan lu bhi ẹkhokho, mhan ilu eku, sẹyẹ, mhan ire ohoghe gua ọta nọnsi Osẹnobulua. Sokpan, mhan rẹkpa ẹbho rẹ lẹn ẹmhọanta. Ọne uwedẹ nan mhan rẹ rẹman ẹbho* ghe eria ne mhẹn mhan khin bhi ẹlo nọnsi Osẹnobulua. 3 Bhi ọsi ẹmhọanta, ahamiẹn ghe emhin degue ọta esili nin mhan wewe, bhi ẹlo ọsi ẹbho ne ha fuẹn an, ọle emhin da degue ọle. 4 Ene ẹbho nan bha lẹn Osẹnobulua. Osẹ ọsi ọne ore* nan re ọkhọle nọnsele gbin, beji a da miẹn ghe uyi ọsi ẹmhọn Kristi nọn yi arẹkhọkhọ nọnsi Osẹnobulua bha bhaa na ele bhi ọkhọle. 5 Ọ iyi ẹmhọn egbe mhan mhan tẹmhọn ọlẹn. Ebi mhan wewe hi, Jesu Kristi hi Ebeanlẹn mhan. Igbọn nesẹbha mhan khin ranmhude Jesu. 6 Osẹnobulua hi ọnọn yọle: “Ji ẹfua bhaa dagbare bhi ẹkẹ ebiuki.” Rẹ na obọ Kristi, Osẹnobulua da re ọne ẹfua bhaa nyan mhan, beji a ha da miẹn ilẹnmhin nọn gbale nọnsọle ki re ọkhọle nọnsẹmhan ha bhala.

7 Arẹmiẹn ghe mhan diabe akhe nan re ekẹn man, Osẹnobulua da mun iwẹnna oga nọn ghanlẹn mhan bhi obọ, beji ọ ha da khia bhi ẹlo ghe, ọ iyi mhan nyan ahu nọn khua nin mhan noo, sokpan, Osẹnobulua hi ọnọn re ọle nin mhan. 8 Iẹnlẹn rẹ wo kaka mun mhan, mhan sẹyẹ sabọ zughu egbe. Emhin rẹ wo re ilo han mhan, mhan sẹyẹ sabọ lẹn ebi mhan ha lu yẹ.* 9 A kpokpo mhan, ọkpakinọn, Osẹnobulua bha fi mhan ehọ a. A gbe mhan fi ọbhi otọ, ọkpakinọn, ọsẹmhan bha fo. 10 Bọsi Jesu, ẹghe rebhe mhan rẹ loya yẹ kuẹlo da uu, beji ọrebhe ha da daghe ọle ghe, uwedẹ nin Jesu rẹ nyẹnlẹn, ọle mhan rẹ nyẹnlẹn. 11 Bhi iẹnlẹn nọnsẹmhan, mhan wo ha kuẹlo da uu ukpẹdẹ-ukpẹdẹ ranmhude Jesu. Ọnan rẹkpa ẹbho rẹ lẹn ghe, uwedẹ nin Jesu rẹ nyẹnlẹn, ọle mhan nin eria khọnkhan yẹ rẹ nyẹnlẹn. 12 Arẹmiẹn mhan wo ha kuẹlo da uu, iẹnlẹn ọ ha rẹ bha miẹn.

13 A da gbẹn ọbhi Ebenọnkhiale yọle: “Ranmhude imẹn mhọn urẹọbhọ, ọle zẹle nin mẹn da talọ.” Ranmhude mhan mhọn urẹọbhọ nọn sẹ iriọ, ọle zẹ nin mhan da yẹ talọ. 14 Sẹyẹ, mhan lẹnmhin ghe, Osẹnobulua nọn riọ Jesu kpanọ bhi uu, dẹ yẹ riọ mhan kpanọ nin mhan dọ deba Jesu. Ọle ki re imhan bi bha man ọlẹn. 15 Ranmhude ibha zẹle nin ene emhin nan rebhe da sunu. Ene emhin nan da re otọ nin Osẹnobulua rẹ manman re ifuẹkẹ man ẹbho ne bunbun. Beji ene ẹbho ha rẹ ha khuẹnmhẹn ọlẹn, ọnan ki re uyi ji ọle.

16 Ranmhude ọnan, mhan ida ji egbe lọ mhan. Arẹmiẹn ghe egbe nọnsẹmhan wo ha le kua, ọria nin mhan khin bhi ẹkẹ egbe wo ha dẹ ọgbọn bhọ ukpẹdẹ-ukpẹdẹ. 17 Ọkakale nin mhan ye, ọsi obhi ẹghe khere nọn, sẹyẹ ọ bha kaka gbe. Ọrẹyiriọ, ọ dẹ rẹkpa mhan rẹ ha mhọn uyi nọn khua nọn ha yẹ tọ sẹbhi ighegheghe. 18 Bhiriọ, bha ji mhan ha ria ẹmhọn emhin nin mhan idaghe, ọ iyi emhin nin mhan daghe. Ranmhude emhin nin mhan idaghe, ele ha tọ sẹbhi ighegheghe, ọ iyi emhin nin mhan daghe.

5 Mhan lẹnmhin ghe, aharẹmiẹn a siẹn ọne ibọkpọ nin mhan ye nan sotọ, Osẹnobulua dẹ re uwa ọbhebhe nin mhan. Uwa nan bha re obọ bọn. Okhun-ẹlinmhin ọne uwa nan ye. Ọ dẹ ha ribhọ rẹ sẹbhi ighegheghe. 2 Mhan wo ribhi ọbalọ bhi ọne uwa nan nin mhan ye nian. Mhan wo ha guanọ nin mhan nabhi ọnọn na okhun vae, 3 beji a ha da miẹn mhan ha nabhọ,* ẹbho ida daghe eban nọnsẹmhan. 4 Imhan ne ribhi ọne ibọkpọ nan, wo ribhi ọbalọ. Mhan yẹ wo kpokpo egbe, ranmhude mhan bha ho nin mhan mun ọne ibọkpọ nan fia. Ọkpakinọn, mhan guanọ nin mhan nabhi ọnọnkẹle, beji a da miẹn iẹnlẹn ki re ọkpẹnlẹn ọbhi emhin nọn sabọ yu. 5 Osẹnobulua hi ọnọn mun mhan egbe khẹ ọne emhin nan. Ọle hi ọnọn re ẹlinmhin nọnsọle nin mhan. Ọle re ọnan rẹ ji mhan lẹn ghe,* ebi ọle vele dẹ sẹ mhan obọ.

6 Bhiriọ, mhan imhọn edandan bhi ọne ẹmhọn nan hiehie. Sẹyẹ, mhan lẹnmhin ghe, bhi ọne ẹghe nan nin mhan rẹ ribhi ọne egbe nan, mhan isẹ ribhi eji Ebeanlẹn mhan ye. 7 Urẹọbhọ mhan rẹ nyẹnlẹn, ọ iyi ebi mhan daghe. 8 Mhan imhọn edandan hiehie. Ọ dẹ yẹẹ mhan rẹ sibhi ọne egbe nan re dọ deba Ebeanlẹn mhan ha nyẹnlẹn. 9 Bhiriọ, aharẹmiẹn mhan ribhi eji ọle ye, la mhan iribhi eji ọle ye, mhan wo dọnmhegbe nin mhan rẹ lu ebe ti ọle bhọ. 10 Ranmhude, mhan rebhe dẹ mundia bhi odalo ojukhuo nọnsi Kristi. Ọle dẹ bhuohiẹn ọrebhe yẹ re ihaosa nin ele bhi emhin nin ele lu bhi ẹghe nin ele rẹ ha ribhi egbe ọsi efun, ọ ha rẹ ha yi emhin nọn mhẹn la emhin nọn imhẹn.

11 Bhiriọ, ranmhude mhan lẹnmhin ghe, ọkhẹke nin mhan ha mun ofẹn Ebeanlẹn mhan, mhan wo ha taman ẹbho ne ka mhan ehọ. Bhi ọsi ẹmhọanta, Osẹnobulua wo lẹn eria nin mhan gene khin. Ọrẹyiriọ, mẹn yẹ wo guanọ nin bha lẹn eria nin mhan gene khin. 12 Ọ iyi ẹmhọn egbe imhan mhan gbo kie taman ibha. Mhan ho nin mhan taman ibha ebezẹle nin bha ha da rẹ mhan ha dẹgbọ, beji bha ha da sabọ ha re ewanniẹn nin ẹbho ne re ebi ele khin bhi ukinegbe dẹgbọ, ọ iyi ebi ele khin bhi ẹkẹ ọkhọle. 13 Arẹmiẹn mhan lu emhin bii ọria nin uhọnmhọn ọlẹn bha gba, Osẹnobulua mhan lu ọle nan. Sẹyẹ, ahamiẹn ghe mhan lu emhin bii ọria nin uhọnmhọn ọlẹn gbale, ibha mhan lu ọle nan. 14 Oyẹẹ nin Kristi mhọnlẹn, ọle re mhan lu emhin nin mhan lu. Ranmhude, mhan dọ luẹ kere ghe, okpea ọkpa yu nin mhan rebhe. Ọnan da khẹke, ranmhude, ọrebhe ka rẹ yu. 15 Ẹbho rebhe ọle yu nan, beji a ha da miẹn ọrebhe ne nyẹnlẹn ki ha nyẹnlẹn nanlẹn. Ele ida yẹ ha nyẹnlẹn nin egbe ele, ranmhude, ọle hi ọnọn yu nin ele, nan yẹ riọ kpanọ bhi uu.

16 Rẹ na bhi ọne ẹghe nan rẹ ha khian, mhan iyẹ re ẹlo khọnkhan ghe ọria soso. Arẹmiẹn ẹlo khọnkhan mhan ka rẹ ha ghe Kristi, mhan iyẹ re ẹlo nọn sẹ iriọ ghe ọle. 17 Bhiriọ, ahamiẹn ọria kugbe deba Kristi, ọria ọgbọn ọle ki khin. Ghọle! emhin ne ribhọ khẹ siẹgbe kie; emhin ọsọgbọn zegbere. 18 Obọ Osẹnobulua emhin rebhe na vae. Ọle hi ọnọn kie si mhan kẹ egbe, rẹ na obọ Kristi. Ọle da yẹ mun ọne iwẹnna oga nan nin mhan, nin mhan rẹ rẹkpa ẹbho kiẹn imọẹ nesọle. 19 Ebi ọnan rẹman hi, Osẹnobulua wo kie ha miẹn ẹbho ne ribhi ọne agbọn nan ọbhi egbe, rẹ na obọ Jesu Kristi. Ọle gbe olukhọ nọnsele kua. Imhan ọle je ne dọ ha wewe ọne uhọnmhunje nan.

20 Ukọ* mhan khin. Kristi mhan mundia nan. Imhan Osẹnobulua noo rẹ tie ẹbho. Bọsi eria ne talọ nin Kristi, mhan taman ẹbho yọle: “Bha huẹan, bha fikie bu Osẹnobulua re, yẹ dọ kiẹn imọẹ nesọle.” 21 Arẹmiẹn Jesu bha lu olukhọ, a da re ọle zọese ọbhi olukhọ ranmhude imhan, beji a ha da miẹn rẹ na obọ ọle, mhan ki sabọ kiẹn eria ne khiale bhi ẹlo nọnsi Osẹnobulua.

6 Beji mhan rẹ deba Osẹnobulua ha wẹnna, mhan bhii bha, nin bha hẹi miẹn ifuẹkẹ nọn khua nọnsi Osẹnobulua ọbhi egbe fo, yẹ yele a ebezẹle nan da mhọn ọne ifuẹkẹ da bha. 2 Osẹnobulua da yọle: “Ọne ẹghe ki sẹ nin mẹn ha rẹ miẹn ẹbho ọbhi egbe, mẹn da ka bha ehọ. Ọne ukpẹdẹ nin mẹn ha rẹ miẹn bha fan ki vae, mẹn da rẹkpa bha.” Ghọle! Ọne ẹghe nin Osẹnobulua ha rẹ miẹn ẹbho ọbhi egbe, ọle a ye nian. Ghọle! Ọne ukpẹdẹ nin ọle ha rẹ miẹn mhan fan, ọle a ye nian.

3 Mhan bha guanọ nin ọria soso re unun ji iwẹnna oga nin mhan lu. Ranmhude ọnin, mhan ilu emhin soso nọn ha dua ọria oẹ. 4 Bhi uwedẹ rebhe, mhan wo ha rẹman ghe ene ga Osẹnobulua mhan khin. Mhan ziẹngbe ọkakale kẹkẹ, mhan miẹn ekpokpo bhi egbe, mhan bha miẹn rẹ lu, mhan miẹn ọnọghọ kẹkẹ. 5 A da gbe mhan, a da muno mhan khue, usun ẹbho da mun okhọn bu mhan, mhan da miẹnsọn oya, asọn eso mhan bha wẹ, ẹghe eso mhan bha miẹn ebale le. 6 Mhan da ha nyẹn unyẹnmhin nọn khiale, mhan da ha lu emhin rẹkhan ilẹnmhin nin mhan mhọnlẹn, mhan da ha re ifuẹkẹ bi iziẹngbe man, mhan da ji ẹlinmhin nọn khiale ha dia iẹnlẹn nọnsẹmhan, mhan da yẹ ha re oyẹẹ ọsaje man. 7 Mhan da ha ta ẹmhọanta, mhan da re udu tẹ Osẹnobulua nọn re ahu nin mhan, mhan da ne emhin okhọnlẹn ọsi ikhiale mhọn bhi obera* bi agobọ.* 8 Ẹbho eso da mun ekpẹn nin mhan, eso da re ẹlo gbe mhan an. Ẹbho eso da tẹmhọn mhan nọnsẹn, eso da re unun riia mhan an. Ẹbho da ha ghe mhan bii ene hiẹ ẹbho, ọkpakinọn, ẹmhọanta ọkpa a miẹn bhi unun nọnsẹmhan. 9 Arẹmiẹn ẹbho bha lẹn mhan, Osẹnobulua lẹn mhan. Mhan rẹ diabe eria ne khian la yu, mhan sẹyẹ nyẹnlẹn. A rẹ re oya nin mhan, a bha gbono mhan an. 10 Mhan rẹ ha lu akhiẹ, mhan yẹ wo ghọnghọn. Arẹmiẹn ibhioguele mhan khin, mhan wo rẹkpa ẹbho ne bunbun rẹ kiẹn ene fele. Arẹmiẹn mhan imhọn emhin soso, mhan yẹ mhọn emhin rebhe.

11 Ibhokhan Kọrint, mhan wo ta ebe ri mhan bhi ọkhọle man bha. Mhan yẹ wo re ọkhọle rebhe ne ibha lu emhin. 12 Ọkhọle rebhe mhan rẹ hoẹmhọn bha. Ọkpakinọn, ibha bha re ọkhọle rebhe hoẹmhọn mhan. 13 Ọnan zẹle nin mẹn da taman ibha bọsi imọn nesẹmhẹn: Bha yẹ re ọkhọle rebhe ha re oyẹẹ man.

14 Bha hẹi deba ẹbho ne iga Osẹnobulua ha muobọ, ranmhude, bha iyi ọkpa. Ikhiale bi olukhọ* imhọn ọne ele ko ye. Ẹfua bi ebiuki iyẹ mhọn ọne ele ko ye. 15 Rẹ deba ọnin, Kristi bi Bilia* imhọn ọne ele ko ye. Sẹyẹ, ọria nọn ga Osẹnobulua bi ọria nọn iga Osẹnobulua imhọn ọne ele ko ye. 16 Ẹbọ ida sabọ ha ribhi uwa nọnsi Osẹnobulua. Imhan hi uwa oga nọnsi Osẹnobulua nọn nyẹnlẹn. Osẹnobulua da yọle: “Mẹn dẹ deba ele ha nyẹnlẹn. Mẹn dẹ ha ribhi ẹwẹ ele. Mẹn ki ha yi Osẹnobulua nọnsele, ele ki ha yi ẹbho nesẹmhẹn.” 17 “Jehova* da yẹ yọle: ‘Ranmhude ọnan, bha sibhi ẹwẹ ele re, bha ha si egbe kie bhi eji ele ye. Bha hẹi yẹ re obọ so emhin nọn bha khia.’” “‘Bha ha lu ọnan, mẹn ki miẹn bha ọbhi egbe.’” 18 “‘Mẹn ki kiẹn aba ibha, bha ki kiẹn imọn* nesẹmhẹn.’ Ọnan hi ebi Jehova* nin Osẹ Nọn Mhọn Ahu Nẹ tale.”

7 Ibhio mẹn nin mẹn hoẹmhọnlẹn, beji a miẹn a ve ene ive nan nin mhan, bha ji mhan kpe egbe mhan khia bhi emhin rebhe ne riia efun bi ọkhọle a. Bha ji mhan mun ofẹn Osẹnobulua, mhan ha yẹ ha khu ọbhọ nin mhan rẹ kiẹn eria ne khiale.

2 Bha rẹ ọkhọle rebhe hoẹmhọn mhan. Mhan bha lu ọria soso khọlọ, mhan bha riia ọria soso a, mhan bha mun ọria soso lu. 3 Mẹn bha ta ọnan nin mẹn rẹ bhuohiẹn gbe ibha. Mhan ha rẹ ha ribhi agbọn la mhan yu, ẹmhọn bha dẹ wo ha ti mhan bhọ. 4 Ofẹn imun mẹn nin mẹn rẹ ne ibha talọ. Mẹn wo manman re ibha hio. Ọkhọle mẹn yẹ wo dere. Mẹn wo ghọnghọn arẹmiẹn mhan miẹn ekpokpo.

5 Ẹghe nin mhan rẹ sẹbhi Masẹdonia, egbe bha fu mhan re. Mhan da wo ha miẹn ọbalọ bhi egbe rebhe. Ẹbho da ha kpokpo mhan, mhan da yẹ ha kpokpo egbe ranmhude ibhio mhan. 6 Ọkpakinọn, Osẹnobulua nọn re ikoudure nin ẹbho ne egbe lọ le, da ko mhan udu re, rẹ na obọ Taitọs nọn rẹnẹ ji mhan. 7 Ọ iyi ẹnẹ nin ọle rẹ ji mhan ọkpa ọle rẹ ko mhan udu re. Izebhudu nin bha re nanlẹn da yẹ ko mhan udu re. Ọle da taman imhan ebi ẹlo mẹn rẹ ha nyan bha yẹ, ebi bha rẹ manman lu akhiẹ yẹ, bi ebi ẹmhọn mẹn rẹ manman rẹtẹ bha yẹ. Ọnan da wo re imẹn manman ha ghọnghọn.

8 Arẹmiẹn ilẹta nin mẹn gbẹn ji bha rẹ bha lu akhie, ọ bha ba mẹn bhi egbe. Ọ ka rẹ ha ba mẹn bhi egbe ẹghe nin mẹn rẹ kere ghe, ọ re ibha ha lu akhiẹ. Ọkpakinọn, mẹn lẹn ghe, ọbhi ẹghe khere bha rẹ lu akhie. 9 Ejayenan nian, eghọnghọn mẹn ki ye, ranmhude ibha bha wo gheghe lu akhiẹ. Ọne akhiẹ da rẹkpa bha rẹ kiọya bhi emhin ebe nin bha lu. Uwedẹ nọn yẹẹ Osẹnobulua bha rẹ lu akhiẹ. Ranmhude bha lu iriọ, ebi mhan tale bha si ikuan-egbe ji bha. 10 Ọria ha lu akhiẹ bhi uwedẹ nọn yẹẹ Osẹnobulua, ọle ida kiẹ-egbe ọbhọ. Ọne akhiẹ ki rẹ ọle kiọya bhi emhin ebe nin ọle lu; ọnan ki re ọle miuhọnmhọn. Bhi obọ nọnkẹle, ọria ha lu akhiẹ bhi uwedẹ nin ọne agbọn nan rẹ lu akhiẹ, uu ha nabhọre. 11 Ọ wo khia bhi ẹlo ghe, bha gene wo lu akhiẹ bhi uwedẹ nọn yẹẹ Osẹnobulua. Ọnan zẹle nin bha da wo manman dọnmhegbe nin bha rẹ lu emhin ne mhẹn. Bha da kpe elin nọnsẹbha khia, bha da ji emhin ebe ha sọnnọn bha, bha da ha mun ofẹn Osẹnobulua, bha da ha guanọ nin bha fidenọ, bha da re ọhubhudu man, bha da re emhin ọi nọnsẹn! Bhi ọne ẹmhọn nan, bha da lu emhin rebhe nọn khẹke, nin bha rẹ rẹman ghe, eria ne khiale bha khin. 12 Ọ iyi ranmhude ọne ọria nọn lu ọne emhin ebe, la ẹbho nan lu ọne emhin ebe da zẹle nin mẹn da gbẹn ọne ebe nin ji bha. Sokpan, mẹn guanọ nin bha rẹman bhi odalo Osẹnobulua ghe, bha muegbe nin bha rẹ hẹnmhọn nin mhan. 13 Emhin nin bha lu da wo re ọkhọle mhan dere.

Rẹ deba ọnin, mhan yẹ wo manman ghọnghọn, ranmhude uwedẹ nin bha rẹ ko Taitọs udu re, yẹ re ọle ha ghọnghọn. 14 Mẹn wo re ẹmhọn bha dẹgbọ man Taitọs, ibha bha re ẹkhọle lo mẹn. Beji ẹmhọn rebhe nin mhan taman ibha rẹ yi ẹmhọanta, iriọ ẹmhọn bha nin mhan rẹ dẹgbọ man Taitọs yẹ rẹ yi ẹmhọanta. 15 Sẹyẹ, ẹghe rebhe nin ọle rẹ yere, uwedẹ nin bha rẹ hẹnmhọn nanlẹn, yẹ manman mun ekpẹn nanlẹn, ẹmhọn bha ki wo kie manman ha ti ọle bhọ. 16 Mẹn wo ghọnghọn, ranmhude, bhi emhin rebhe nin bha lu, imẹn dẹ sabọ gbaẹkẹ bha.*

8 Ibhio, mhan guanọ nin mhan taman ibha ebi Osẹnobulua rẹ manman mhọn ifuẹkẹ da agbotu ne ribhi Masẹdonia yẹ. 2 Bhi ẹghe nin ele rẹ miẹn ekpokpo nọn khua bhi egbe, ele da sẹyẹ wo re eghọnghọn zẹ emhin bhi obọ, arẹmiẹn ele tobele bha miẹn rẹ lu. Ọnan da wo rẹman ghe, eria ne manman zẹ emhin bhi obọ ele khin. 3 Ele da wo lu eka nin ahu nọnsele gbe. Bhi ọsi ẹmhọanta, imẹn dẹ sabọ sọsali ọbhọ ghe, ele lu gbera eka nin ahu nọnsele gbe. 4 Ele bhọ da ha bhii mhan, nin mhan re otọ nin ele rẹ zẹ emhin bhi obọ, nin ele rẹ rẹkpa ibhio ele* ne ribhi ọnọghọ.* 5 Ele bhọ da wo lu gbera eka nin mhan re ọkhọle ọi. Ranmhude iho nọnsi Osẹnobulua nọn, ele da re ọkhọle rebhe rẹ lu iwẹnna ọsi Ebeanlẹn mhan. Ele da yẹ rẹkpa mhan. 6 Ọnan zẹle nin mhan da taman Taitọs, nọn dọnmhegbe rẹ lu iwẹnna nin ọle munhẹn ha lu bhi ẹwẹ bha sotọ. Ọnin hi, nin ọle koko emhin nin bha re eghọnghọn zẹ. 7 Bha wo ha lu nọnsẹn bhi emhin rebhe, bha manman mhọn urẹọbhọ, bha sabọ man emhin, bha manman mhọn ilẹnmhin bi ọhubhudu, bha yẹ wo re oyẹẹ man ẹbho beji mhan rẹ re oyẹẹ man bha. Beji bha rẹ lu nọnsẹn bhi ene uwedẹ nan, bha yẹ wo re iriọ manman ha zẹ emhin bhi obọ.

8 Ọ iyi ọsi ghe mẹn ho nin mẹn taman ibha ebi bha ha lu zẹle nin mẹn da ha ta ọnan. Sokpan, imẹn guanọ nin bha lẹn ebi ẹbho ebhebhe rẹ ha re ọhubhudu man yẹ, bi nin mẹn fẹghe si bha gene mhọn oyẹẹ ọsaje. 9 Bha lẹn ebi Jesu Kristi nin Ebeanlẹn mhan rẹ mhọn ifuẹkẹ nọn khua da bha yẹ. Ranmhude ibha, ọle da kiẹn obhioguele, arẹmiẹn ghe, ọria nọn manman fe ọle khin. Ọle da lu ọnan nin ọle rẹ rẹkpa bha kiẹn eria ne fele.

10 Nin mẹn taman ibha ebi mẹn ria ọne ẹmhọn nan yẹ: Bha dẹ miẹn elele bhọ sade bha lu ọne iwẹnna nan sotọ. Ukpe nọn gbera, bha da rẹman ghe bha guanọ nin bha lu ọle. Bha da yẹ munhẹn ha lu ọle. 11 Ejayenan nian, bha lu ọne iwẹnna sotọ. Bha ha lu iriọ, bha ki re emhin nin bha sabọ re re rẹ rẹman ghe, bha gene muegbe nin bha rẹ zẹ emhin bhi obọ. 12 Ahamiẹn ọria gene muegbe nin ọle rẹ zẹ emhin bhi obọ, emhin nin ọle re re ki ti Osẹnobulua bhọ. Ranmhude, emhin nin ahu ọsi ọria gbele, ọle Osẹnobulua guanọ bhi obọ ọle, ọ iyi ebi ahu nọnsọle bha gbe. 13 Mẹn bha ho nin mẹn miẹn ẹbho nekẹle ihẹ dọ mun nyan bha. 14 Sokpan, mẹn guanọ nan miẹn ghe, bhi ọne ẹghe nan nin bha rẹ manman mhọn emhin, bha ki re ebi bha mhọn rẹ rẹkpa ele. Beji a ha da miẹn, ẹghe nan ha rẹ miẹn bha imhọnlẹn, ele ki yẹ re bhi emhin ne bunbun nin ele mhọnlẹn rẹ rẹkpa bha. Bhiriọ, ọkpa ida ha mhọnlẹn nin ọnọnkẹle ha manmobọ. 15 Ẹghenin, ẹmhọn nin Ebenọnkhiale tale ki munsẹ, nọn yọle: “Ọsi ọria nọn manman mhọnlẹn bha bun gbe, sẹyẹ, ọsi ọria nọn imhọnlẹn bha khere gbe.”

16 Mhan khuẹnmhẹn Osẹnobulua, nin ọle rẹ wo ji ẹmhọn bha rẹtẹ Taitọs, beji ẹmhọn bha yẹ rẹ rẹtẹ mhan. 17 Ẹmhọn nin mhan taman ọlẹn wo rẹso ọle. Ọ wo bọbọ ọle bhi egbe nin ọle rẹ lu emhin nin mhan taman ọlẹn. Ranmhude ọnan, ọle tobọle zẹ nin ọle rẹ ha bu bha vade. 18 Mhan dẹ yẹ ji obhio mhan rẹkhan ọlẹn—ọne obhio mhan nin ọrebhe bhi ene agbotu rebhe wo ha gẹn, ranmhude ẹsọn nin ọle miẹn bhi iwẹnna itẹmhọn Osẹnobulua. 19 Agbotu rebhe zẹ ọle nin ọle ha rẹkhan mhan, yẹ deba mhan ha gha ene emhin nin bha zẹ bhi obọ. Ọne ẹsọn nan wo re uyi ji Ebeanlẹn mhan. Ọ yẹ wo rẹman ghe, mhan muegbe nin mhan rẹ rẹkpa ibhio mhan. 20 Mhan wo ha lu ebe khẹke, ranmhude mhan bha guanọ nin ọria soso re unun ji mhan bhi uwedẹ nin mhan rẹ ha gha ọne igho nan nin bha re ọkhọ rebhe zẹ bhi obọ. 21 Ẹkẹata mhan rẹ ha lu emhin rebhe, bhi ẹlo nọnsi Jehova* bi bhi ẹlo nọnsi eria.

22 Mhan dẹ yẹ je obhio mhan ọbhebhe rẹkhan ele. Mhan sẹ wo dọnmhẹn ọne obhio mhan nan bhi emhin ne bunbun yẹ kere ghe ọle manman gbẹlokotọ lu emhin. Mhan lẹnmhin ghe, ọle dẹ wo manman gbẹlokotọ miẹn ọne ẹsọn nan, ranmhude ọle wo gbaẹkẹ bha ghe bha dẹ lu ebe khẹke. 23 Ahamiẹn, ọria ribhọ nọn bha lẹn ọria nin Taitọs khin, bha ji ọle lẹn ghe, ọzeva imẹn nọn. Imẹn bi ọle ko wẹnna ranmhude ọmhẹn nọnsẹbha. Ahamiẹn, ọria ribhọ nọn bha lẹn ene ibhio mhan ne rẹkhan ọlẹn, bha ji ọle lẹn ghe, ukọ ele khin nin ene agbotu jele. Ele wo ha re uyi ji Kristi. 24 Bhiriọ, bha rẹman ele ghe bha hoẹmhọn ele. Bha yẹ rẹman ene agbotu ghe, mhan bha re ibha dẹgbọ kua.

9 Bhi ọsi ẹmhọanta, ọ bha rẹ khẹke nin mẹn gbẹn ebe ji bha rẹ taman ibha ghe ọkhẹke nin bha rẹkpa ene khiale. 2 Ranmhude, imẹn lẹnmhin ghe, bha muegbe nin bha rẹ rẹkpa ele. Mẹn bhọ wo rẹ bha ha dẹgbọ man ibhokhan Masẹdonia. Mẹn taman ele ghe, ọ ki sẹ ukpe ọkpa nian, nin bha nin ibhokhan Akea ki mọn muegbe nin bha rẹ ze emhin bhi obọ rẹ rẹkpa ibhio bha. Ọhubhudu nọnsẹbha bhọ da re ene bunbun bhi ẹwẹ ele ha mhọn ọhubhudu. 3 Ejayenan nian, mẹn je ene ibhio mhan bu bha vade. Bha ji a miẹn ghe, ele gene kere ghe bha muegbe beji mẹn tale, beji bha ha da rẹman ghe mhan bha gheghe re ibha dẹgbọ kua. 4 Ahamiẹn ibha bha muegbe, nin ibhokhan Masẹdonia da rẹkhan mẹn vae bhi enin dọ kere ghe ibha bha muegbe, ọ iyi mhan ọkpa ẹkhọle da lo nin mhan rẹ re bha dẹgbọ. Ẹkhọle dẹ yẹ lo bha. 5 Ọnan zẹle nin mẹn da riale ghe, ọkhẹke nin mẹn ka je ibhio mhan eso re, nin ele dọ koko ene emhin nin bha ho nin bha rẹ lu ẹsele. Ahamiẹn bha ne ene emhin nin ele ọkuẹsẹ mhan vae, ọ ki ha yi emhin nin bha re ọkhọle rebhe re re, ọ ida diabe emhin nan sua bha ọbhọ rẹ lu.

6 Bha yere ghe, ọnọn kọ obhi emhin khere, ọle ha rọ obhi emhin khere. Ọnọn kọ emhin ne bunbun, dẹ rọ emhin ne bunbun. 7 Bha ji ọdeọde lu eka nin ọle mhanmhan bhi ọkhọle. Ọle hẹi ha zaka-zunyọn beji ọle rẹ lu ọle. Ọle hẹi lu ọle bi ọria nan sua. Ọria nọn re eghọnghọn zẹ emhin bhi obọ, ọle ẹmhọn ọlẹn ti Osẹnobulua bhọ.

8 Rẹ gbera ọnin, Osẹnobulua dẹ sabọ mhọn ifuẹkẹ nọn khua da bha, beji a da miẹn bha ki ha mhọn emhin rebhe nin bha guanọ bhi iẹnlẹn. Bha ki yẹ ha mhọn emhin ne bunbun nin bha ha rẹ lu iwẹnna esili. 9 (Ebenọnkhiale da yọle: “Ọle ne emhin ne bunbun nin ẹbho rebhe. Ọle ne emhin nin ẹbho ne imhọnlẹn. Emhin esili nin ọle lu dẹ ha ribhọ rẹ sẹbhi ighegheghe.” 10 Osẹnobulua nọn re ikpẹ ne bunbun nin ọmungbo rẹ kọ, nọn yẹ re ebale nin ẹbho le, dẹ rẹkpa bha rẹ ha mhọn ikpẹ ne bunbun nin bha ha rẹ kọ. Ọle ki yẹ rẹkpa bha rẹ miẹn ikpe ne bunbun rọ bhi emhin esili nin bha kọle.) 11 Osẹnobulua wo rẹkpa bha rẹ ha mhọn emhin rebhe, beji bha ha da miẹn emhin rẹ ha lu ẹsele. Rẹ na obọ mhan, ẹsele nin bha lu ki re ẹbho ha khuẹnmhẹn Osẹnobulua. 12 Ranmhude, ọne iwẹnna oga nan nin mhan lu rẹkpa mhan rẹ re iyobọ nin ene khiale ne guanọ urẹkpa. Ọ iyi ọnin ọkpa, ọ yẹ wo re ẹbho ne bunbun ha re ekhuẹnmhẹn ji Osẹnobulua. 13 Uwedẹ nin bha rẹ zẹ emhin bhi obọ rẹman unan eria nin bha khin. Ranmhude ọnan, ẹbho gẹn Osẹnobulua. Ele gẹn Osẹnobulua ranmhude ele daghe ọle ghe bha gene nyẹnlẹn rẹkhan ẹmhọn Kristi nin bha wewe, sẹyẹ, bha wo ha ze emhin bhi obọ rẹ rẹkpa ele yẹ rẹkpa ẹbho rebhe. 14 Ele yẹ wo hoẹmhọn bha, yẹ ha nan erọnmhọn nin bha ranmhude ifuẹkẹ nọn khua nin Osẹnobulua mhon da bha.

15 Ekhuẹnmhẹn hi ọsi Osẹnobulua. Ẹsele nin ọle lu nin mhan, unun isabọ tale.

10 Imẹn nin Pọl re itohan bi ifuẹkẹ nin Kristi rẹman rẹ bhii bha. Eso bhi ẹwẹ bha yọle ghe, imẹn ha ribhi ẹwẹ bha, imẹn ki wẹghẹ a. Sokpan, ahamiẹn imẹn iribhi eji bha ye, imẹn ki ha re izebhudu man. 2 Bha huẹan, ọkuẹsẹ mẹn vae, ji ẹbho ne riale ghe mhan lu emhin bọsi ene ribhi ẹkẹ agbọn fidenọ, beji a ha da miẹn mẹn bha re obọ nọn kaka rẹ mun ele. 3 Arẹmiẹn eria mhan khin, ọ iyi uwedẹ nin eria ne ribhi ẹkẹ agbọn rẹ khọn mhan rẹ khọnlẹn. 4 Ranmhude, ọ iyi emhin okhọnlẹn nin ẹbho ne ribhi ẹkẹ agbọn rẹ khọn mhan rẹ khọnlẹn. Osẹnobulua ne emhin okhọnlẹn nesẹmhan nin mhan, nin mhan rẹ ha vuno emhin ne fi ika mun otọ sibhi otọ re. 5 Emhin kẹkẹ nin ẹbho ria, mhan wo ha fi ele denọ. Idobolo kẹkẹ ne bha ji ẹbho da lẹn Osẹnobulua, mhan wo ha guọguọ ele sotọ. Mhan mun ene iria-eria rebhe gba, yẹ dia ele, ne ele ha hẹnmhọn nin Kristi. 6 Mhan wo muegbe nin mhan rẹ re oya nin ene mhọn akan-ehọ, sade bha rẹman fo ghe, bha muegbe nin bha rẹ hẹnmhọn nin mhan.

7 Ebi emhin diayẹ bhi ẹlo, ọle bha ghe. Ahamiẹn ọria soso bhi ẹwẹ bha wo rẹọbhọ ghe, odibo nọnsi Kristi ọle khin, ji ọle ria eria nyan ọne ẹmhọn nan: Beji bha rẹ yi odibo ọsi Kristi, iriọ mhan yẹ rẹ yi odibo ọsi Kristi. 8 Ebeanlẹn mhan ne mhan ọbhi ọne ihe nan, nin mhan ha bọn ibha okhun, ọ iyi nin mhan gbe ibha sotọ. Arẹmiẹn ọ diabe imẹn re ọne ihe nan dẹgbọ gbe, ẹkhọ ida lo mẹn. 9 Mẹn bha ho nin bha ha riale ghe, mẹn ho nin mẹn re ene ilẹta nin mẹn gbẹn ji bha rẹ gbe ofẹn bha bhi ẹkẹ. 10 Ẹbho eso yọle: “Pọl ha gbẹn ilẹta re, ọle ki wo ha re ahu talọ. Ọkpakinọn, ọ ha vae, ọ ki wo fọfọ a, ọ iyẹ miẹn unun rẹ talọ.” 11 Ọkhẹke nin ẹbho ne tẹmhọn nọn sẹ iriọ lẹn sẹbhọ ghe, ebi mhan gbẹn re bhi lẹta, ọle mhan ha yẹ lu sade mhan vae. 12 Mhan bha ho nin mhan diabe eria ne re unun nọnsele rẹ gẹn egbe ele. Mhan iribhi ibo nọnsele. Ebi ele lu, nin ele riale ọ mhẹn, ọle ele rẹ tie egbe ele eria ne mhẹn. Ọnan rẹman ghe, ele imhọn ẹwanlẹn.

13 Ọ iyi ẹsọn nan bha mun nin imhan mhan rẹ dẹgbọ, ẹsọn nin Osẹnobulua gha nin mhan nin mhan miẹn, ọle mhan rẹ dẹgbọ. Ibha deba ọne ẹsọn nan mun nin mhan. 14 Bhi ọsi ẹmhọanta, mhan bha lu gbera ughu* nin mhan rẹ bu bha re. Mhan bhọ hi eria ọhẹnhẹn ne ka dọ tẹmhọn Kristi man bha. 15 Ọ iyi ẹsọn nin ọria ọbhebhe miẹn mhan rẹ dẹgbọ. Ẹsọn nan mun nin imhan, ọle mhan rẹ dẹgbọ. Ọkpakinọn, mhan rẹọbhọ ghe, beji urẹọbhọ nọnsẹbha ha rẹ ha tuẹn okhun, iriọ mhan ha rẹ manman miẹn ẹsọn ha miẹn bhi iwẹnna nin Osẹnobulua mun nin mhan. Mhan ki wo gene miẹn ẹsọn ha miẹn, 16 rẹ sẹbhọ ghe, mhan ki dọ tẹmhọn Osẹnobulua bhi agbaẹbho nekẹle. Mhan ha lu iriọ, mhan ida ha re ẹsọn nin ọria ọbhebhe miẹn rẹ dẹgbọ. 17 Ọkpakinọn, beji Ebenọnkhiale tale, “Ji a miẹn ghe, ọnọn hi ki rẹ khin nọn ho nọn dẹgbọ, Jehova,* ọle rẹ dẹgbọ.” 18 Ranmhude, ọ iyi ọnọn tobọle gẹn egbe ọle, Osẹnobulua miẹn ọbhi egbe. Ọria nin Jehova* tie ọle ọria nọn mhẹn, ọle Ọle miẹn ọbhi egbe.

11 Ẹmhọn nin mẹn ho nin mẹn ta nian ha rẹ diabe ọta uhuki, bha huẹan, bha re otọ nin mẹn rẹ tale. Bhi ọsi ẹmhọanta, bha bhọ re otọ nin mẹn fo. 2 Ẹmhọn bha wo manman rẹtẹ mẹn, beji ẹmhọn bha rẹ rẹtẹ Osẹnobulua, ranmhude, imẹn ve nin Kristi ghe imẹn dẹ re ibha nanlẹn bọsi amhẹn. Bhiriọ, imẹn guanọ nin bha ha yi ọmanmhẹn nọn mun ekpẹn bhi egbe ẹghe nin mẹn ha rẹ re ibha nanlẹn. 3 Ọkpakinọn, ofẹn mun mẹn, nin ọria hẹi dọ hiẹ bha beji Esu re hiẹ Ivi. Ẹghenin, bha iyẹ da ha nyẹnlẹn iẹnlẹn nọn khiale. Sẹyẹ bha iyẹ da re ọkhọle rebhe sun rẹkhan Kristi. 4 Ebezẹle nin imẹn da ta ọnan, ọle hi ghe, ọria ha bu bha rẹ dọ taman ibha ẹmhọn Jesu ọbhebhe gbera ọne imhan ka taman ibha, la ẹlinmhin ọbhebhe ha munhẹn ha dia ọkhọle nọnsẹbha, la ọria dọ ta uhọnmhunje ọbhebhe man bha gbera ọne imhan ka taman ibha, bha ki wo miẹn ọlẹn ọbhi egbe. 5 Ene ukọ nesẹbha ne riale ghe ele mhẹn nẹ, bha miẹn ebi ele rẹ mhẹn nẹ imẹn. 6 Aharẹmiẹn mẹn isabọ talọ, mẹn lẹn emhin. Mhan wo re ọnan man bha bhi emhin rebhe, bi bhi uwedẹ rebhe.

7 Emhin ebe mẹn be lu nin mẹn rẹ degbere yẹ re otọ nin bha rẹ miẹn ogẹn? La emhin ebe mẹn be lu nin mẹn rẹ re eghọnghọn tẹmhọn Osẹnobulua man bha ọsọhẹ? 8 Agbotu nekẹle, ele mẹn miẹn ele emhin nin mẹn rẹ ha gbeloghe egbe beji imẹn ha da sabọ dọ ga ibha. 9 Ẹghe nin mẹn bha rẹ miẹn rẹ lu, beji mẹn ribhi ẹwẹ bha, imẹn bha re ebi mẹn guanọ rẹ kpokpo ibha. Ibhio mhan ne na bhi Masẹdonia vae, ele ne emhin rebhe nin mẹn guanọ nin mẹn. Mẹn da wo ha dọnmhegbe nin mẹn hẹi kiẹn ihẹ rẹji bha bhi uwedẹ soso. Mẹn dẹ wo sẹyẹ ha lu iriọ. 10 Beji a miẹn ghe mẹn sẹyẹ yi odibo nọnsi Kristi, imẹn dẹ wo ha re ọne ẹmhọn nan dẹgbọ bhi otọ Akea rebhe. 11 Ọ iyi ranmhude imẹn bha hoẹmhọn bha zẹle nin mẹn ha da ha lu ọnan. Osẹnobulua lẹnmhin ghe mẹn hoẹmhọn bha.

12 Mẹn dẹ sẹyẹ wo ha lu ebi imẹn ka lu khẹ, beji a ha da miẹn ghe, ene dẹgbọ man bha ghe ọkpa imhan bi ele khin, ida miẹn ebi ele ha ta. Emhin nọn rẹ re ele ha dẹgbọ ki kiẹn ihoho. 13 Eria eku ene ikpea nin khin. Ele iyi edibo ọsaje. Ele man lu bosi ghe edibo nesi Kristi ele khin. 14 Ọnan bha han mhan ilo. Iriọ Esu yẹ rẹ lu bọsi ghe ẹhi nọn mhẹn* ọle khin. 15 Bhiriọ, ọ iyi ojemhin sade ene rẹkhan ọlẹn yẹ man ha lu bosi ghe eria ne khiale ele khin. Bhi ọkike ọle, a dẹ re ihaosa nin ele beji ele rẹ wẹnna.

16 Mẹn gbo kie taman ibha: Bha hẹi ha ghe ọta nin mẹn ta bii ọta uhuki. Sokpan, aharẹmiẹn bha ghe ọle iriọ, bha re iriọ zọbọ, beji imẹn ha da miẹn otọ rẹ dẹgbọ khere. 17 Ọ iyi beji ọria nọn re egbe khọkhọ Ebeanlẹn mhan rẹ talọ, mẹn rẹ ha talọ nian. Beji uhuki rẹ dẹgbọ, ọle imẹn rẹ ha dẹgbọ. 18 Beji a miẹn ẹbho ne bunbun wo ha re ebi ele khin rẹ dẹgbọ, mẹn dẹ yẹ dẹgbọ. 19 Ibha wo manman wanlan, ọle be kuẹ zẹ nin bha da miẹn eria ne iwanlan ọbhi egbe? 20 Ẹbho rebhe, ele bha miẹn ọbhi egbe—ene rẹ ibha kiẹn igbọn, ene riia bha elin an, ene gbe ibha miẹn bha ebi ibha mhọn, ene denyẹnyẹn ibha, bi ene gbono ubi bha bhi ẹlo.

21 Ẹkhọle wo ha lo mẹn rẹ ha ta ene ẹmhọn nan, ranmhude eso bhi ẹwẹ bha sabọ ha ghe mhan bii eria ne wẹghẹ.

Ọkpakinọn, ahamiẹn ghe ẹbho eso gbudu dẹgbọ, mẹn dẹ yẹ sabọ dẹgbọ, aharẹmiẹn ghe ọta nin mẹn ta diabe ọta uhuki. 22 Ahamiẹn ghe ibhokhan Hibru ele khin, imẹn ibe yẹ yi obhokhan Hibru? Ahamiẹn ibhokhan Izrẹl ele khin, imẹn ibe yẹ yi obhokhan Izrẹl? Ahamiẹn imọn nesi Ebraham ele khin, imẹn ibe yẹ yi ọmọn nọnsi Ebraham? 23 Ele ha yọle edibo nọnsi Kristi ele khin, imẹn dẹ so dagbare bọsi ọmhẹnmhẹn yọle, imẹn bhọ lu odibo ọsi Kristi nẹ ele, ranmhude, ẹsọn nin mẹn miẹn nẹ ọsi ele. Ẹghe rebhe a rẹ ha mun mẹn khue, a sẹ gbe mẹn igba ne bunbun, igba ne bunbun mẹn kuẹlo da uu. 24 Igba isẹn, ọle ibhokhan Ju gbe mẹn asan ọkpa iribhi egbọ eva.* 25 Igba ea, ọle ẹbho re eran gbe imẹn, ẹghe ọkpa, a da re udo gbe imẹn, igba ea okọ nin mẹn ha ye ruẹle. Mẹn da gbe asọn bi odanmhẹn bhi ẹkẹ ẹdẹ. 26 Ẹghe rebhe imẹn rẹ ha yo okhian, imẹn da ha ribhi okhẹnan bhi ẹkẹ ẹdẹ, bhi obọ oyi, bhi obọ ẹbho nesẹmhẹn, bhi obọ ẹbho ne iyi ibhokhan Ju, bhi ẹkẹ agbaẹbho bi bhi ẹkẹ ojẹgbo, bhi ẹkẹ okpẹdẹ, bi bhi obọ ibhio ne re ukpunun ga. 27 Ẹghe rebhe imẹn rẹ ha wẹnna kaka. Asọn ne bunbun mẹn bha wẹ. Ẹghe ne bunbun, ohanmhẹn da wo ha gbe mẹn. Mẹn bha miẹn ebale le, mẹn bha miẹn amẹn wọn. Ulinlin da wo ha gbe mẹn, mẹn bha miẹn ukpọn agbọn yọ.

28 Rẹ gbera ene ekpokpo nan nin mẹn ha miẹn bhi egbe, ukpẹdẹ-ukpẹdẹ imẹn rẹ wo ha kpokpo egbe ba ẹmhọn ene agbotu. 29 Ahamiẹn ọria wẹghẹ, ọ ki wo re egbe lọ mẹn. Ahamiẹn ọria re ọria lu ebe imhẹn,* ọ ki wo re ẹkẹ ha khọ mẹn.

30 Mẹn ha yọle nin mẹn gene dẹgbọ, emhin ne ha rẹman eji mẹn da wẹghẹ, ele mẹn ha rẹ dẹgbọ. 31 Osẹnobulua nin Aba Jesu nin Ebeanlẹn mhan lẹnmhin ghe, mẹn bha bha ohoghe. Ọle hi ọnọn khẹke nan ha gẹn rẹ sẹbhi ighegheghe. 32 Ẹghe nin mẹn rẹ ha ribhi Damaskọs, ọne gọvanọ nọn ha ribhi odotọ Aritas nin ojie, da ne ẹbho ọbhi igeti ọsi ọne agbaẹbho beji ele ha da mun mẹn. 33 Ọkpakinọn, ene ibhio mẹn da na bhi windo nọn ribhi egbuwa re okhuale* mun mẹn sibhi ẹkẹ ọne agbaẹbho re. Iriọ mẹn rẹ miuhọnmhọn bhi obọ ọle.

12 Mẹn dẹ wo dẹgbọ, arẹmiẹn elele iribhọ. Mẹn dẹ tẹmhọn imianlo bi arẹman nin Ebeanlẹn mhan rẹman mẹn. 2 Odibo ọsi Kristi ọkpa ribhọ* nin mẹn lẹnlẹn. Ikpe igbenẹn ne gbera, a da re ọle ha khian okhun nọnzi ea. Mẹn bha ki lẹn si egbe efun ọle rẹ ha khian la egbe ẹlinmhin. Osẹnobulua hi ọnọn lẹnlẹn. 3 Ehe, mẹn lẹn ọne okpea. Si egbe efun a rẹ re ọle a khian la egbe ẹlinmhin, mẹn bha lẹn. Osẹnobulua ọkpa hi ọnọn lẹnlẹn. 4 A da re ọle ha khian ogba ọfubhegbe. Ọle da họn ẹmhọn nan igbudu ta dagbare, bi ọta nan bha ho nin ọria ta dagbare. 5 Mẹn dẹ re okpea nọn sẹ iriọ rẹ dẹgbọ. Ọkpakinọn, mẹn ida re egbe imẹn rẹ dẹgbọ. Eji mẹn da wẹghẹ ọkpa mẹn ha tẹmhọnlẹn. 6 Mẹn ha rẹ ha ho nin mẹn dẹgbọ, mẹn ida ta ọta uhuki, ẹmhọanta mẹn ha ta. Ọkpakinọn, mẹn ida dẹgbọ, ranmhude mẹn bha ho nin ọria dọ ha gẹn mẹn ọbhi ebi mẹn bha lu, la ebi ọle bha họn bhi unun mẹn. 7 Ọria soso hẹi gẹn mẹn gbera beji ọkhẹke, ranmhude mẹn miẹn arẹman ne sẹ inian.

Beji a ha da miẹn mẹn bha ha tẹngbemun gbe, a da ji igbẹn mẹn bhi efun. Ọne igbẹn nan da diabe ẹhi ọsi Esu nọn wo ha gbe imẹn, beji a da miẹn mẹn bha dọ ha tẹngbemun gbe. 8 Igba ea mẹn bhii Ebeanlẹn mhan nin ọne igbẹn si mẹn bhi egbe re. 9 Ọkpakinọn, ọle da taman imẹn yọle: “Ifuẹkẹ nọn khua nin mẹn mhọn da uwẹ sẹ uwe riọ. Ranmhude, ẹghe nin ọria rẹ wẹghẹ, ọle mẹn rẹ manman re ahu nọnsẹmhẹn man.” Bhiriọ, ọ dẹ wo ti mẹn bhọ nin mẹn rẹ re eji mẹn da wẹghẹ re dẹgbọ, beji ahu ọsi Kristi ha da degue mẹn bọsi ibọkpọ. 10 Ọ wo re imẹn ghọnghọn, sade mẹn wẹghẹ, sade a ghunmhun imẹn, sade mẹn bha miẹn rẹ lu, sade a kpokpo imẹn, sade mẹn ribhi ọnọghọ kẹkẹ ranmhude Kristi. Ranmhude, ẹghe nin mẹn rẹ wẹghẹ, ẹghenin mẹn rẹ manman mhọn ahu.

11 Mẹn wo talọ bii ọria nọn ta ọta uhuki. Ibha si ọle mẹn bhi egbe, ranmhude, ibha ọ rẹ khẹke nọn ha gẹn mẹn man ẹbho. Arẹmiẹn mẹn imhọn ebi mẹn khin, ene ukọ nesẹbha ne riale ghe ele mhẹn nẹ, bha miẹn ebi ele rẹ mhẹn nẹ mẹn. 12 Mẹn wo rẹman bha ghe, odibo nọnsi Jesu mẹn khin, ranmhude, mẹn wo ziẹngbe emhin ne bunbun. Mẹn da yẹ wo lu emhin ọhan-ilo bi emhin ọnyunuan kẹkẹ bhi ẹwẹ bha. 13 A bha miẹn ebi mẹn lu nin agbotu nekẹle, nin mẹn bha lu nin bha. Emhin ọkpa nin mẹn bha lu, ọle hi nin mẹn bha rẹ kiẹn ihẹ rẹji bha. Ahamiẹn ọnan mẹn rẹ lu bha khọlọ, bha rẹhunmhan imẹn.

14 Ghọle! Ugba-ọzea khọnan nian nin mẹn ho nin mẹn vae bhi eji bha ye. Mẹn ha vae, mẹn ida kiẹn ihẹ rẹji bha. Ọ iyi emhin nesẹbha mẹn guanọ, ibha mẹn ho nin mẹn miẹn fan. Ene biẹ ọmọn ọkhẹke ne khuan khẹ imọn nọnsele, ọ iyi ene imọn. 15 Mẹn dẹ re eghọnghọn noo emhin rebhe nin mẹn mhọn, rẹ sẹbhi iẹnlẹn nọnsẹmhẹn ranmhude ibha. Beji a miẹn mẹn re inian manman hoẹmhọn bha, ọ bha be rẹ khẹke nin bha yẹ manman hoẹmhọn mẹn? 16 Arẹmiẹn ghe, imẹn bha kiẹn ihẹ rẹji bha, bha da yẹ yọle ghe “ọria eku mẹn khin,” sẹyẹ, “mẹn hiẹ bha.” 17 Mẹn bha noo ene ibhio mhan soso nin mẹn je bu bha rẹ miẹn ibha emhin. 18 Imẹn hi ọnọn je Taitọs bi ọne obhio mhan nọn rẹkhan ọlẹn bu bha re. Ẹghe nin Taitọs rẹ vae bhi eji bha ye, ọle be re eku miẹn bha emhin. Eye! Ọle bha lu iriọ, ranmhude ọkhọle ọkpa mhan mhọnlẹn, uwedẹ ọkpa mhan rẹ lu emhin.

19 Bha hẹi ha riale ranmhude mhan guanọ nin bha ha ghe mhan bii eria esili, ọle zẹle nin mhan da ta ene ẹmhọn nan nin mhan ta. Edibo nesi Kristi mhan khin. Osẹnobulua lẹnmhin ghe, ẹmhọanta ene ẹmhọn nan nin mhan ta khin. Ibhio mẹn ne daan mẹn, ranmhude ọmhẹn nọnsẹbha zẹle nin mhan da lu emhin rebhe nin mhan lu. 20 Ofẹn mun mẹn ghe, ẹghe nin mẹn ha rẹ vae, imẹn dẹ kere ghe ibha inyẹnlẹn nọnsẹn. Ẹghenin, uwedẹ nin mẹn ha rẹ ne bha lu emhin ida yẹẹ bha. Ofẹn mun mẹn ghe, mẹn dẹ dọ kere ghe, ibha gbegbe, ibha mhọn oyadan,* ibha re okpohu lu emhin, ibha van, ibha ghunmhun egbe, ibha ta ọta ike, ibha hianbhegbe, sẹyẹ, ozughu ribhi ẹwẹ bha. 21 Asabọmiẹn, ẹghe nin mẹn ha rẹ kie vae, Osẹnobulua dẹ ji ẹkhọle da lo mẹn bhi isira bha. Sẹyẹ, mẹn ki ha viẹ, ranmhude ene bunbun bhi ẹwẹ bha ne bha ka kiọya bhi emhin ebe nin ele lu. Ele bha sẹ fi iria-eria nọnsele denọ rẹji iẹnlẹn okan,* oghẹ,* bi emhin ne ditọn an.

13 Ọsi ugba-ọzea khọnan nin mẹn wo ha muegbe nin mẹn rẹ dọ tuẹ ibha. “Itue eva la itue ea ha sọsali ọbhi ẹmhọn, a iyẹ muan ọlẹn.” 2 Arẹmiẹn mẹn iribhi eji bha ye nian, ọ diabe ghe mẹn ribhi enin ọsi ugba-ọzeva. Mẹn wo ha sekha* nin bha ne ka lu olukhọ bi ibha nekẹle rebhe. Bha lẹn sẹbhọ ghe, mẹn ha vae, mẹn dẹ re oya nin ene lu emhin ebe. 3 Mẹn dẹ lu ọnan, beji a miẹn ghe bha ho nin bha lẹn si Kristi gene noo mẹn rẹ talọ. Mẹn lẹnmhin ghe, bha ighe Kristi bii ọria nọn wẹghẹ. Bha lẹnmhin ghe, ọ manman mhọn ahu. 4 Ẹghe nin ọle rẹ wẹghẹ, ọle a rẹ gbe ọle a bhi okhun oran. Ọkpakinọn, Osẹnobulua da re ahu nọnsọle re riọ ọle kpanọ. Ẹmhọanta nọn ghe, mhan yẹ wẹghẹ nian beji ọle ka rẹ wẹghẹ. Ọkpakinọn, rẹ na obọ ahu nin Osẹnobulua rẹman bhi egbe ibha, mhan dẹ deba ọle ha nyẹnlẹn.

5 Bha wo ha fẹ egbe bha ghe, nin bha rẹ lẹn si bha sẹyẹ mun oga mhọn nọnsẹn. Bha wo ha fẹ egbe bha ghe nin bha re lẹn unan eria nin bha gene khin. Ibha bha be lẹn ghe, Jesu Kristi deba bha. Ahamiẹn Osẹnobulua bha miẹn ibha ọbhi egbe, ọle ọkpa ha zẹ Jesu bha deba bha. 6 Mẹn rẹọbhọ ghe, bha dẹ lẹnmhin ghe Osẹnobulua miẹn mhan ọbhi egbe.

7 Mhan bhii Osẹnobulua nin ọle rẹkpa bha rẹ wo ha lu emhin nọn mhẹn. Ọ iyi ranmhude mhan guanọ ne ẹbho ha ghe mhan bii eria nin Osẹnobulua miẹn ọbhi egbe zẹle nin mhan da lu ọnan. Sokpan, mhan guanọ nin bha ha lu emhin nọn mhẹn, aharẹmiẹn ẹbho ghe imhan bii eria nin Osẹnobulua bha miẹn obhi egbe. 8 Mhan ida lu emhin soso nọn ha gbe odan* ọbhi ẹmhọanta nọnsi Osẹnobulua. Emhin ne ha re ọne ẹmhọanta ha tuẹn okhun, ele ọkpa mhan lu. 9 Bha ha deziẹn, mhan ki ha ghọnghọn, aharẹmiẹn mhan wẹghẹ. Ebi mhan bhii Osẹnobulua le ẹghe rebhe, ọle hi nin bha wo ha dia iria-eria nọnsẹbha. 10 Ọnan zẹle nin mẹn da ka gbẹn ene ẹmhọn nan ji bha, beji a ha da miẹn ẹghe nin mẹn ha rẹ vae, mẹn ida re obọ nọn kaka rẹ mun bha. Ebeanlẹn mhan re imẹn ọbhi ọne ihe nan, nin mẹn ha bọn ibha okhun, ọ iyi nin mẹn gbe ibha sotọ.

11 Bhi ọkike ọle ibhio mẹn, bha wo ha ghọnghọn, bha ha fi iria-eria nọnsẹbha denọ, bha wo ha miẹn ikoudure ọbhi egbe, bha ha mhọn ọkhọle ọkpa, bha ko ha nyẹnlẹn bhi ọfure. Bha ha lu iriọ, Osẹnobulua ọsi oyẹẹ bi ọfure ki ne ibha dia. 12 Bha tuẹ ọdeọde mun egbe nọnsẹn.* 13 Ene khiale rebhe je otuẹ ibha.

14 Mẹn bhii nin ifuẹkẹ nọnsi Jesu Kristi nin Ebeanlẹn mhan, bi oyẹẹ nọnsi Osẹnobulua ne ibha dia. Mẹn yẹ bhii nin ọne ẹlinmhin nọn khiale nan re nin mhan rebhe ne ibha dia.