IWẸNNA ỌSI ENE ETUEGBE

1 Tiofilọs, bhi ebe nin ọhẹnhẹn nin mẹn gbẹn ji uwẹ, mẹn da taman uwẹ emhin rebhe nin Jesu ha man bi emhin rebhe nin ọle lu 2 rẹ sẹbhi ukpẹdẹ nan re ọle ha khian okhun. Ọkuẹsẹ a re ọle ha khian okhun, ẹlinmhin nọn khiale da noo ọle rẹ taman etuegbe nin ọle zẹle ebi ele ha lu. 3 Ọle ki loya fo, ọle da re egbe man ele igba ne bunbun, beji ele ha da lẹn ghe, ọle kie ha nyẹnlẹn. Ikpẹdẹ egbọ eva* ọle gbe bhi ẹwẹ ele, sẹyẹ, ọle da ha tẹmhọn Ejele nọnsi Osẹnobulua man ele. 4 Ẹghe nin ọle rẹ ha ne ele talọ, ọle da taman ele yọle: “Bha hẹi sibhi Jerusalẹm re. Bha wo ha khẹ ọne emhin nin ọne Aba vivọle, nin mẹn yẹ tẹmhọnlẹn man bha. 5 Amẹn, ọle Jọni da ha gbe ẹbho ruẹ, ọkpakinọn, bhi ẹghe nọn bha yẹ ree gbe nian, a dẹ gbe bha ruẹ bhi ẹlinmhin nọn khiale.”

6 Ẹghe nin ele ki rẹ sikoko, ele da nọọn Jesu yọle: “Ebeanlẹn mhan, ẹghe be sẹ nin uwẹ ha rẹ kie mun ugbẹloghe ọsi Izrẹl gbọ?” 7 Ọle da taman ele yọle: “Ọ bha khẹke nin bha lẹn ọne ẹghe la uriagogo nin ọne Aba rẹyi. Ọle ọkpa lẹn ẹghe nin ọle rẹyi. 8 Bha dẹ ha mhọn ahu ẹghe nin ẹlinmhin nọn khiale ha rẹ na bha bhi egbe. Ẹghenin, bha ki ha sọsali nin mẹn bhi Jerusalẹm, bhi otọ Judia rebhe, bi Sameria, rẹ dọ sẹbhi eje ree nẹ bhi ọne otọ nan.” 9 Ọle ki ta ene ẹmhọn nan fo, Osẹnobulua da re ọle diọbhi okhun bhi isira edibo nesọle. Adudu amẹn da gue ọle, ele bha yẹ daghe ọle. 10 Beji ele sẹyẹ ha ghe okhun, ẹghe nin Jesu rẹ ha kpanọ, ikpea eva ne yọ ukpọn nọn fua da rẹ osukpa mundia sike ele, 11 Ene ikpea da yọle: “Ibhokhan* Galili, Bezẹle nin bha da sẹyẹ ha ghe okhun? Ọne uwedẹ nan nin bha daghe a rẹ re Jesu diọbhi okhun, iriọ ọle ha yẹ rẹ vae.”

12 Ele da ki na bhi Oke ọsi Oliv nin ele ha ye fikie diọbhi Jerusalẹm. Ọne oke nan sikẹ Jerusalẹm, ọne okhian bha ree.* 13 Ele ki sẹbhi Jerusalẹm, ele da diọbhi ugha nọn ribhi okhun uwa bhi eji ele ka ha ye. Pita, Jọni, Jemis, Andru, Filip, Tọmọs, Batolomio, Matiu, Jemis nin ọmọn nọnsi Afiọs, Saimọn nọn mhọn ọhubhudu, bi Judas nin ọmọn nọnsi Jemis da ha ribhi enin. 14 Ele rebhe da kugbe ha nan erọnmhọn. Ibhio Jesu, Meri nin inẹn Jesu, bi ikhuo eso da yẹ deba ele.

15 Bhi ọne ẹghenin, Pita da kpanọ mundia bhi ẹwẹ ele (ẹbho ne ha ribhi enin bun sẹbhi itue egbọ ehan).* Ọle da yọle: 16 “Ibhio, ọkhẹke nin ẹmhọn nin ẹlinmhin nọn khiale noo Devid rẹ ta rẹji Judas munsẹ—Judas nọn ne ẹbho re dọ mun Jesu. 17 Usun nọnsẹmhan ọle rẹ ha ye, a da yẹ zẹ ọle nin ọle deba mhan bhi ọne iwẹnna oga nan. 18 (Ọne okpea nan da re igho nan ha ọle le bhi emhin ebe nọn lu rẹ dẹ otọ. Ọle da de, yẹ mun uhọnmhọn so bhi otọ, sẹyẹ, egbe nọnsọle da vẹa. Bhiriọ, ibiẹn nọnsọle da yanọ dagbare. 19 Ọrebhe ne ribhi otọ Jerusalẹm bhọ da lẹn ọnan, rẹ sẹbhọ ghe, a da ha tie ọne otọ bhi urolo nọnsele Akẹdama. Ọnin hi, “Otọ ọsi Aranlẹn.”) 20 A gbẹn ọlẹn bhi ebe ọsi Illo Ogẹn yọle, ‘Eji ọle dia dẹ dunmhun an, sẹyẹ, ọria soso ida nyẹnlẹn bhọ. A dẹ re ọria ọbhebhe ọbhi ihe nọnsọle.’ 21 Bhiriọ, ọkhẹke nin ọkpa bhi ene ikpea ne ha rẹkhan mhan bhi ẹghe nin Jesu nin Ebeanlẹn mhan rẹ ha lu iwẹnna oga bhi ẹwẹ mhan 22 deba mhan sọsali ọbhi ariọkpanọ nọnsọle. Ọne ọria nan dẹ ha yi ọria nọn rẹkhan mhan rẹ na bhi ẹghe nin Jọni rẹ re amẹn nin Jesu, rẹ dọ sẹbhi ẹghe nin Osẹnobulua rẹ re ọle ha khian okhun.”

23 Ele da sunu ọbhi ikpea eva. Ọkpa bhọ da ha yi Josẹf natiọle Basabas, nan yẹ tiọle Jọstọs. Ọnọnkẹle da ha yi Matayas. 24 Ele ki da nan erọnmhọn. Ele da yọle: “Eo Jehova,* uwẹ hi ọnọn lẹn ọkhọle ọsi ọrebhe. Rẹman mhan ọne uwẹ zẹle bhi ẹwẹ ene ikpea nan, 25 nọn deba mhan bhi ọne iwẹnna oga nan, yẹ dọ ha yi etuegbe nọnsi Jesu. Ọne ihe nan Judas munfia dọ ha lu ebe ghọn ọlẹn.” 26 Ele da ki fi onolo ọbhọ, ọne onolo da de ọbhi egbe ọsi Matayas. Bhiriọ, ele da zẹ ọle yẹ ka ọle ba ene etuegbe ugbolọ.

2 Ẹghe nan rẹ ha lu Iluemhin ọsi Pẹntikọst, ene edibo da ko ha ribhi ijan ọkpa. 2 Osukpa, ele da họn usomhin bhi okhun, bọsi ahoho nọn wo manman ha fi. Ọne ahoho da gba eje rebhe bhi ọne uwa nin ele ye. 3 Ele da munhẹn ha daghe ebe diabe olanmhẹn eranlẹn. Ene olanmhẹn eranlẹn da gha egbe a, ọkpa-ọkpa da mundia bhi uke uhọnmhọn ọsi ọdeọde bhi ẹwẹ ele. 4 Ẹlinmhin nọn khiale da na ele bhi egbe, sẹyẹ, ele da munhẹn ha zẹ urolo kẹkẹ. Ele da ha zẹ urolo nọn ki rẹ khin nin ọne ẹlinmhin rẹkpa ele rẹ zẹ.

5 Bhi ọne ẹghenin, ibhokhan Ju ne ga Osẹnobulua ne na bhi otọ agbọn rebhe vae, da ha ribhi Jerusalẹm. 6 Ẹbho ki họn ọne usomhin nan, ele da sikoko. Ele da kere ghe ene edibo zẹ urolo nesele. Ọnan da wo han ele ilo. 7 Bhi ọsi ẹmhọanta, ilo da han ele sẹbhọ ghe, ele da yọle: “Ọ ibe yi ibhokhan Galili ene ẹbho nan khin? 8 Be ele ki rẹ sabọ ha zẹ urolo nesẹmhan yẹ? 9 Agbaẹbho kẹkẹ mhan na vae: Patia, Midia, Ilam, Mẹsopotemia, Judia, Kapadosia, Pọntọs, otọ Esia, 10 Frijia, Pamfilia, Ijipt, idunmhun bhi otọ Libia ne sikẹ agbaẹbho ọsi Sairini. Erunmhunyẹn eso yẹ na bhi agbaẹbho ọsi Rom vae, eso ibhokhan Ju, enekẹle ene deba ibhokhan Ju ga. 11 Eso yẹ nabhi agbaẹbho ọsi Krit bi Arebia vae. Ọrẹyiriọ, mhan họn ghe, ele zẹ urolo nọnsẹmhan rẹ tẹmhọn iwẹnna ọhan-ilo nọnsi Osẹnobulua.” 12 Ebe sunu da wo manman han ele ilo, ele da ha nọọn egbe ele yole: “Be ọnan khin?” 13 Ọkpakinọn, ẹbho eso da ha jiẹ ele. Ele da ha yọle: “Anyọn mun ele.”

14 Ọkpakinọn, Pita bi ene etuegbe ugbolọ da kpanọ mundia. Ọle da si uru okhun yọle: “Ibhokhan Judia bi ibha rebhe ne nyẹnlẹn bhi Jerusalẹm, bha ka mẹn ehọ nọnsẹn, bha ha yẹ lẹn ọnan. 15 Ọ iyi anyọn mun ene ẹbho nan beji bha riale. Agogo isinlin ọsewewiẹ* a sẹyẹ ye. 16 Ọkpakinọn, ebi Joẹl nin akhasẹ tale, ọle munsẹ bhi egbe ele nian. 17 Ọle da yọle: ‘Inian Osẹnobulua tale, “Bhi ikpẹdẹ ne kike, mẹn dẹ biri ẹlinmhin nọnsẹmhẹn nyan unan eria kẹkẹ. Imikpea nesẹbha bi imikhuo nesẹbha ki ha kha akhasẹ. Usẹn ibhokhan nesẹbha ki ha miẹn imianlo, sẹyẹ, ewanlẹn nesẹbha ki ha bhohiẹ. 18 Bhi ọne ẹghenin, mẹn dẹ yẹ biri ẹlinmhin nọnsẹmhẹn nyan eguọmhandia nesẹmhẹn nin ikpea bi eguọmhandia nesẹmhẹn nin ikhuo. Ele ki ha kha akhasẹ. 19 Mẹn ki re iyaman man bhi okhun bi ọne otọ nan. Ọne iyaman hi: aranlẹn, eranlẹn, bi ighogho. 20 Ọkuesẹ ọne ukpẹdẹ nọn khua nọnsi Jehova* vae, ovuẹnlẹn ki so ebiuki a, uki ki yẹ kiẹn aranlẹn. 21 Ọrebhe ne sotie elin nọnsi Jehova* dẹ miuhọnmhọn.”’

22 “Bha ka mẹn ehọ ibhokhan Izrẹl: Jesu nin obhi Nazarẹt wo ha yi okpea nin Osẹnobulua jere. Ọle da noo ọle rẹ lu iwẹnna ọhan-ilo kẹkẹ, beji bha ha da rẹọbhọ ghe, ọle je ọle re. Ibha tobọbha bhọ lẹn ọnan. 23 Bha da mun ọne okpea nan nin eria olukhọ ne khan ọlẹn bhi oran yẹ gbe ọle a. Osẹnobulua lẹnmhin ghe emhin dẹ dia inian, ranmhude, iho nọnsọle nọn. 24 Ọkpakinọn, Osẹnobulua da riọ ọle kpanọ bhi uu. Ọle da fan ọlẹn sibhi obọ ọsi uu re, ranmhude, uu ida sabọ mun ọlẹn gba. 25 Rẹji ọle, Devid da yọle: ‘Ẹghe rebhe mẹn rẹ ria ẹmhọn Jehova.* Ọle ribhi obera nọnsẹmhẹn, bhiriọ, emhin soso iribhọ nọn ha re ofẹn mun mẹn. 26 Ranmhude ọnan, eghọnghọn da gbe mẹn udu a, mẹn da re eghọnghọn ha talọ. Mẹn dẹ wo ha mhọn ikhuaẹloghe; 27 ranmhude, uwẹ ida zẹ imẹn obọ bhi Idin.* Uwẹ ida yẹ ji egbe nọnsẹmhẹn da wea, ranmhude, mẹn sun rẹkhan ẹn. 28 Uwẹ wo re uwedẹ ọsi iẹnlẹn man mẹn; imẹn dẹ wo ha ghọnghọn sade mẹn ribhi eji uwẹ ye.’

29 “Ibhio mẹn, bha re otọ nin mẹn rẹ tẹmhọn Devid nin aba mhan nin ẹdẹlẹ man bha. Bha lẹnmhin ghe ọle mọn yu, sẹyẹ, a da re ọle tọ. Idin nọnsọle sẹyẹ ribhi enan rẹ sẹbhi ẹlẹnan. 30 Akhasẹ ọle ha khin. Sẹyẹ, Osẹnobulua da ve nanlẹn ghe, ọkpa bhi imọn nesọle dẹ dotua bhi uke ojukhuo nọnsọle. 31 Devid da daghe ebe ha sunu bhi ẹghe odalo, yẹ tẹmhọn ariọkpanọ ọsi Kristi. Ọle da yọle ghe, a ida zẹ Kristi obọ bhi Idin,* la nin egbe nọnsọle wea. 32 Osẹnobulua da riọ ọne Jesu nan nin mhan tẹmhọnlẹn kpanọ bhi uu. Ẹlo mhan rebhe sẹbhọ ọnan. 33 Bhiriọ, a riọ ọle kpanọ vae bhi obera nọnsi Osẹnobulua. Sẹyẹ, Aba ọle da re ẹlinmhin nọn khiale nọn vivọle nanlẹn. Ọne ẹlinmhin ọle re nin ene ẹbho nan, nọn zẹle nin bha da daghe ene emhin nan, yẹ họn ene ẹmhọn nan. 34 Arẹmiẹn Devid bha diọbhi okhun, ọle da yọle, ‘Jehova* da taman Ebeanlẹn mẹn yọle: “Dotua bhi obera nọnsẹmhẹn 35 rẹ sẹbhi ẹghe nin mẹn ha rẹ ne eghian nesẹ ọbhi otọ oẹ nọnsẹ.”’ 36 Bhiriọ ọkhẹke nin ọrebhe bhi otọ Izrẹl lẹn ghe, bhi ọsi ẹmhọanta, Osẹnobulua re Jesu nin bha gbe a bhi okhun eran rẹ kiẹn Ebeanlẹn mhan bi Kristi.”

37 Ele ki họn nan, ọ da wo manman ba ele bhi egbe. Bhiriọ, ele da nọọn Pita bi etuegbe nekẹle yọle: “Ibhio, be ọkhẹke nin mhan lu?” 38 Pita da taman ele yọle: “Bha kiọya bhi olukhọ nọnsẹbha, bha ha yẹ mianmẹn bhi elin nọnsi Jesu Kristi, beji a ha da rẹhunmhan olukhọ nọnsẹbha. Bha ha lu ọnan, Osẹnobulua ki re ẹsele ọsi ẹlinmhin nọn khiale nin bha. 39 Eria rebhe nin Jehova* nin Osẹnobulua nọnsẹmhan tiele, ele ọle ve ọne ive nan nan—ibha, imọn nesẹbha, bi ẹbho ne ribhi eje rele.” 40 Pita da yẹ ta ọta ne bunbun rẹ sọsali man ele, yẹ re adia nin ele. Ọle da yọle: “Bha sibhi ẹwẹ eria ne imhẹn re beji bha ha da miuhọnmhọn.” 41 Bhiriọ, ene re ọkhọle rebhe miẹn adia nọnsọle ọbhi egbe da mianmẹn. Bhi ọne ukpẹdẹ nin, ebe sẹbhi itue uli ea* da deba ele. 42 Ele da wo ha luẹ emhin bhi obọ ene etuegbe. Ele da ha ne egbe muobọ. Ele da ha le ebale kugbe yẹ ko nan erọnmhọn.

43 Ene etuegbe da wo ha lu emhin ọhan-ilo ne bunbun. Ọnan da wo re ofẹn ha mun ene ẹbho. 44 Ọrebhe ne dọ kiẹn edibo nesi Jesu da ko ha lu emhin kugbe yẹ nyẹnlẹn kugbe. 45 Ele da ha khiẹn otọ nọnsele yẹ khiẹn emhin nin ele mhọnlẹn. Ele da re ọne igho rẹ ha rẹkpa egbe beji ọdeọde rẹ ha guanọ urẹkpa. 46 Ukpẹdẹ-ukpẹdẹ ele rẹ ha yo uwa oga dọ ha ga kugbe. Ele ki ha le ebale bhi uwa ọsi ibhio ele kẹkẹ. Ele da ha re eghọnghọn bi ẹkẹata rẹ gha ebale nọnsele nin egbe. 47 Ele da ha gẹn Osẹnobulua. Ẹbho da ha re ẹlo esili ghe ele. Rẹ deba ọnin, Jehova* da ha ne ẹbho ba ele ukpẹdẹ-ukpẹdẹ—ẹbho ne ha miuhọnmhọn.

3 Bhi egbẹghe agogo ea bhi ọsodanmhẹn,* Pita bi Jọni da ha khian uwa oga nin ele dọ nan erọnmhọn. 2 Bhi ọne ẹghe nin, ẹbho da ha mun okpea ọkpa nan biẹ ọle akhun vade bhi enin. Ukpẹdẹ-ukpẹdẹ ele rẹ mun ọlẹn re bhi uwa oga. Ele ki mun ọlẹn ọbhi egbe igeti natiọle Igeti Ọsi Ose, beji ọle ha da bhii emhin bhi obọ ẹbho ne vae bhi uwa oga. 3 Ọle ki daghe Pita bi Jọni ho nin ele nabhi uwa oga, ọle da munhẹn ha bhii ele emhin. 4 Ọkpakinọn, Pita bi Jọni da ghe ọle yẹ taman ọlẹn yọle: “Ghe mhan.” 5 Bhiriọ, ọle da ha ghe ele. Ọle da ha riale ghe ele guanọ nin ele re emhin nanlẹn. 6 Ọkpakinọn, Pita da ki taman ọlẹn yọle: “Mẹn imhọn isiliva, mẹn imhọn igolu, mẹn dẹ re ebi mẹn mhọnlẹn nin uwẹ. Bhi elin ọsi Jesu Kristi nin obhi Nazarẹt, kpanọ ha khian!” 7 Pita da ki mun ọle obera mhọnlẹn yẹ khua ọle okhun. Bhi ọne ẹghe nin tee, oẹ ọsi ọne okpea bi igogo nesọle da mun zeze. 8 Ọne okpea ki kpanọ mundia, ọle da munhẹn ha khian, ọle da rẹkhan ele nabhi uwa oga. Ọle da ha khian nẹga yẹ san-yo-san-re. Ọle da ha khuẹnmhẹn Osẹnobulua. 9 Ọrebhe da daghe ọle beji ọle rẹ ha khian nẹga yẹ khuẹnmhẹn Osẹnobulua. 10 Ẹbho da lẹn ọria nin ọle khin. Ele da lẹn ghe, ọle hi ọne okpea nọn bhii emhin bhi isi Igeti Ọsi Ose nọn ribhi uwa oga. Ebe sunu ji ọle da wo manman han ele ilo.

11 Beji ọne okpea sẹyẹ gba Pita bi Jọni mhọnlẹn, ene ẹbho rebhe ne ha ribhi enin da runẹ bu ele bhi eji a tiọle Ukporina ọsi Solomọn. Ebe sunu da han ele ilo. 12 Pita ki daghe ọnan, ọle da taman ene ẹbho yọle: “Ibhokhan Izrẹl, bezẹle nin bha da ji ọnan han bha ilo? Bezẹle nin bha da ha ghe mhan bọsi ghe ahu nọnsẹmhan mhan rẹ lu ọle, la, ikhiakhiale nọnsẹmhan zẹle nin ọle da sabọ ha khian? 13 Osẹnobulua ọsi Ebraham, ọsi Aiziki, bi ọsi Jekọp nin aba imhan nin ẹdẹlẹ rẹ uyi nin Jesu nin Ọguọmhandia nọnsọle, nin bha mun nin Pailet nọn gbe a. Arẹmiẹn ghe Pailet muegbe nin ọle rẹ fan ọlẹn fia, bha da he ọle yẹ mun ọlẹn nanlẹn. 14 Ehe, bha da he ọle, arẹmiẹn ọria esili bi ọria nọn khiale ọle khin. Bha da yọle nan fan ọgbugbele fia nin bha. 15 Ọne ọria nin Osẹnobulua zẹ nọn re iẹnlẹn nin eria, bha da gbe ọle a. Sokpan Osẹnobulua da riọ ọle kpanọ bhi uu. Bhi ọsi ẹmhọanta, ẹlo mhan sẹbhi ọnan. 16 Ranmhude elin nọnsi Jesu, bi urẹọbhọ nin mhan mhọn da ọne elin, ọle zẹle nin egbe da daan ọne okpea nan nin bha daghe bhi enan ẹlẹnan—ọne okpea nan nin bha lẹnlẹn. Urẹọbhọ nin mhan mhọn da ọle, ọle zẹle nin egbe da daan ọne okpea nan. 17 Ọkpakinọn ejayenan nian ibhio, mẹn lẹnmhin ghe ibha bha lẹn ebi bha ha lu, beji ene gbẹloghe bha yẹ rẹ lẹn ebi ele ha lu. 18 Emhin nin Osẹnobulua tale rẹ na obọ ene akhasẹ, ghe, Kristi dẹ loya, ọle munsẹ.

19 “Bhiriọ, bha kiọya bhi olukhọ nọnsẹbha, bha yẹ fidenọ, beji a ha da rẹhunmhan olukhọ nọnsẹbha. Bha ha lu iriọ, Jehova* ki re ọfubhegbe nin bha. 20 Ọle ki yẹ je Jesu nin Kristi nin ọle zẹle, nọn dọ rẹkpa bha. 21 Jesu dẹ sẹyẹ ha ribhi okhun, rẹ sẹbhi ẹghe nan ha rẹ hẹnhẹn emhin rebhe. Ọne ẹghe nan Osẹnobulua tẹmhọnlẹn rẹ na obọ ene akhasẹ ne nyẹnlẹn bhi ẹghe ẹdẹlẹ. 22 Mozis bhọ da yọle: ‘Jehova* nin Osẹnobulua nọnsẹbha, dẹ zẹ akhasẹ bhi ẹwẹ bha, nọn diabe mẹn, nọn ha rẹkpa bha. Ọkhẹke nin bha re obọ rẹkhan emhin rebhe nọn yọle nin bha lu. 23 Ọria nọn hi ki rẹ khin nọn bha re obọ rẹkhan ebi ọne akhasẹ nin tale, a ki gbe ọle a.’ 24 Ene akhasẹ rebhe, rẹ na bhi egbe Samuẹl ha de, yẹ wo tẹmhọn ọne ẹghe nan. 25 Imọn ọsi ene akhasẹ ibha khin, sẹyẹ, ibha hi ene ha miẹn elele ọsi ọne akovẹn nin Osẹnobulua deba aba ibha nin ẹdẹlẹ ve. Ọle da taman Ebraham yọle: ‘Rẹ na obọ imọn nesẹ, azagba-uwa rebhe ne ribhi ọne otọ nan dẹ miẹn erọnmhọn.’ 26 Beji Osẹnobulua zẹ ọne ọguọmhandia nọnsọle nan fo, ibha eria ọhẹnhẹn nin ọle je ọle bu. Ọle da lu iriọ, beji ọle ha da rẹkpa ọdeọde bhi ẹwẹ bha rẹ re obọ sibhi emhin ebe re.”

4 Beji ele veva sẹyẹ ha ne ene ẹbho talọ, ene ohẹn, ọnọn re emhin khian bhi uwa oga, bi ibhokhan Sadusi da bu ele re. 2 Ẹkẹ da wo ha khọ ele, ranmhude ene etuegbe wo ha man ene ẹbho emhin. Ele yẹ wo ha tale bhi ogbakha ghe, a riọ Jesu kpanọ bhi uu. 3 Ele da dọ mun ele khue. Ranmhude ọsemuan a ki ha ye, ele da mun ele mhọn sẹbhi ukpẹdẹ nọn rẹkhan ọlẹn. 4 Ọnan rẹ sunu, ene bunbun ne ka ele ehọ da rẹọ bhi ebi ele tale. Ikpea ne ribhi usun nọnsele da ki dọ bun sẹbhi itue uli isẹn.*

5 Ẹdẹ ki we, ene gbẹloghe, ene ewanlẹn, bi ene man uhi da sikoko bhi Jerusalẹm. 6 Annas nin ọkpa bhi ene ohẹn ne khua, Keafas, Jọni, Alẹzẹnda, bi ibhio Annas nekẹle da ha ribhi enin. 7 Ele da ne Pita bi Jọni mundia bhi adesẹ yẹ ha nọọn ele ọta. Ele da nọọn ele yọle: “Họla re ahu nin bha rẹ lu ọne emhin nan?” 8 Ẹlinmhin nọn khiale da munhẹn ha noo Pita. Ọle da taman ele yọle:

“Ene gbẹloghe bi ene ewanlẹn, 9 ahamiẹn ghe, emhin esili nin mhan lu da ọne okpea nan nọn rẹ ha yi akhun, ọle zẹle nin bha da ha nọọn mhan ọta, sẹyẹ, ghe, bha guanọ nin bha lẹn ọnọn re egbe daan ọlẹn, 10 mhan ho nin ibha bi ẹbho rebhe ne ribhi otọ Izrẹl lẹn sẹbhọ ghe, elin nọnsi Jesu Kristi nin obhi Nazarẹt ọle mhan rẹ re egbe daan ọne okpea nan nọn mundia bhi odalo ibha, ọne Jesu nin bha gbe a bhi okhun oran. Ọkpakinọn, Osẹnobulua da re ọle kpanọ bhi uu. 11 Ọle hi ‘ọne udo nin ibha ne bọn uwa re ẹlo gbe a. Ọle ki dọ kiẹn udo kpataki nọn mun ọne uwa mhọnlẹn.’* 12 Rẹ gbera ọle, ọria ọbhebhe iribhọ nọn ha sabọ re umiẹnfan re. Ọria ọbhebhe iribhọ ọne otọ nan nin Osẹnobulua zẹle nọn ha miẹn mhan fan.”

13 Ele ki daghe uwedẹ nin Pita bi Jọni rẹ wo re izebhudu ha talọ, ilo da han ele, ranmhude ele lẹnmhin ghe eria khọnkhan ele khin, sẹyẹ, ele bha yo isiku.* Ọkpakinọn, ele da dọ yere ghe, ele ka gene ha rẹkhan Jesu. 14 Ele ki ha ghe ọne okpea nan re egbe daan nọn mundia bhi ẹwẹ ele, ele bha yẹ miẹn ebi ele ha ta rẹ wanniẹn ele. 15 Ele ki da taman ene ikpea nin ele dagbare bhi ẹkẹ ọne ikotu. Ele ki da munhẹn ha tẹmhọn ele. 16 Ele da ha yọle: “Be imhan ha khian ene ikpea nan yẹ? Ranmhude, bhi ọsi ẹmhọanta, ele wo lu emhin ọhan-ilo. Ẹbho rebhe bhi Jerusalẹm bhọ daghe ọnan, mhan ida sabọ yọle mhan bha daghe ọle. 17 Nan hẹi dọ miẹn ghe ọne ẹmhọn nan vẹ gba ijerebhe, bha ji mhan gbe ofẹn ele bhi ẹkẹ yẹ taman ele nin ele hẹi yẹ tẹmhọn elin ọsi ọne okpea nan man ọria soso.”

18 Bhiriọ, ele da tie ene etuegbe yẹ taman ele nin ele hẹi yẹ tẹmhọn elin nọnsi Jesu, la re ọle ha man emhin. 19 Ọkpakinọn, Pita bi Jọni da wanniẹn ele yọle: “Bha tobọbha tare, si emhin nọn mhẹn nọn bhi ẹlo nọnsi Osẹnobulua nin mhan rẹ hẹnmhọn nin bha, yẹ gbobọra uhi nọnsọle. 20 Bhi ọsẹmhan, mhan ida sabọ miẹn ghe, mhan bha yẹ ta ebi mhan daghe bi ebi mhan họnlẹn.” 21 Ele ki manman sekha nin ele fo, ele da fan ele fia, ranmhude, ele bha rauhi soso nọn ha re ele re oya nin ele. Sẹyẹ, ofẹn ene ẹbho da ha mun ele, ranmhude ene ẹbho wo ha re ogẹn ji Osẹnobulua bhi ebe sunu. 22 Ọne okpea nan re egbe daan gbera ikpe egbọ eva.*

23 A ki fan ele fia fo, ele da bu ibhio ele dọ taman ele ebi ene ohẹn ne khua bi ene ewanlẹn taman ele. 24 Ibhio ele ki họn ọnan, ele rebhe da ku urulu kugbe rẹ nan erọnmhọn ji Osẹnobulua yọle:

“Ebeanlẹn Nọn Ke Okhun Nẹ, uwẹ hi ọnọn man otọ man okhun, nọn man okpẹdẹ bi emhin rebhe ne ribhọ. 25 Ọguọmhandia nọnsẹ ọle Devid nin aba mhan nin ẹdẹlẹ ha khin. Ẹlinmhin nọn khiale nọnsẹ da noo ọle rẹ yọle: ‘Bezẹle nin ẹkẹ da ha khọ ene agbaẹbho? Bezẹle nin ele da ha ria eria nyan emhin nọn iyi emhin? 26 Ene ijie ne ribhi ọne otọ nan da muegbe okhọn. Ene gbẹloghe da kuobọgbe ne ele rẹ nin Jehova* bi ọnọn ọle zẹle* ha suan.’ 27 Gene-gene, Hẹrọd bi Pọntiọs Pailet, bi ibhokhan Izrẹl, bi ẹbho ne na bhi agbaẹbho nekẹle vae, da sikoko bhi ọne agbaẹbho nan nin ele rẹ gbe Jesu a, nin ọguọmhandia nọnsẹ nọn khiale, nin uwẹ zẹle. 28 Ele da lu emhin nin uwẹ ka ta bhi otọ. Ene emhin nan da sunu ranmhude uwẹ hi ọnọn mhọn ọne ahu,* sẹyẹ, iho nọnsẹ nọn. 29 Jehova,* huẹan, wanniẹn ene ẹbho ne nyan nin mhan, uwẹ ha yẹ rẹkpa mhan nin eguọmhandia nesẹ rẹ ha re izebhudu ta ọta nọnsẹ. 30 Noo ahu* nọnsẹ rẹ ha re egbe daan ẹbho, uwẹ ha yẹ rẹkpa mhan rẹ ha lu emhin ọhan-ilo kẹkẹ bhi elin nọnsi Jesu nin ọguọmhandia nọnsẹ nọn khiale.”

31 Ele ki manman nan erọnmhọn fo, eje ele da sikoko da ha lueghe. Ẹlinmhin nọn khiale da ha noo ele rebhe, ele da wo re izebhudu ha tẹmhọn Osẹnobulua.

32 Ọrebhe ne dọ kiẹn odibo da wo ha mhọn ọkhọle ọkpa. A bha miẹn ọria bhi ẹwẹ ele nọn re emhin nọnsọle rẹ ha si akhaẹn. Ele da ko ha noo emhin nin ele mhọnlẹn. 33 Ene etuegbe da wo manman ha sọsali rẹji ariọkpanọ ọsi Jesu nin Ebeanlẹn mhan. Sẹyẹ, Osẹnobulua da wo manman mhọn ifuẹkẹ da ele. 34 Bhi ọsi ẹmhọanta, ọria bha ha ribhi ẹwẹ ele nọn bha miẹn rẹ lu, ranmhude, ene mhọn uwa bi ene mhọn otọ ha khiẹn ọlẹn, ele ki re ọne igho re. 35 Ele ki re ọne igho ji ene etuegbe. Ene etuegbe ki gha ọne igho nin ọdeọde ne guanọ urẹkpa. 36 Josẹf, nin obhi Livai, nọn na bhi agbaẹbho ọsi Saiprọs vae, nin ene etuegbe yẹ tiọle Banabas (ebi ọne elin mundia nan hi, “Ọnọn Ko Ẹbho Udu Re”), 37 da ha mhọn otọ. Ọle da khiẹn ọne otọ yẹ re ọne igho ji ene etuegbe.

5 Okpea ọkpa natiọle Ananayas, bi okhuo ọle natiọle Safaira, da khiẹn otọ nọnsele. 2 Ọkpakinọn, ọle da re sibhi ọne igho re. Ọle bi okhuo ọle ko mhanmhanlẹn. Ọle da re ọnọn kẹre je ene etuegbe. 3 Pita da ki taman ọlẹn yọle: “Ananayas, bezẹle nin uwẹ da ji Esu noo ẹ rẹ ha bha ohoghe man ẹlinmhin nọn khiale? Bezẹle nin uwẹ da do re sibhi igho ọsi ọne otọ re, yẹ yọle ghe ọne igho rebhe khọnan? 4 Ọ iyi uwẹ be nyan ọne otọ? Beji uwẹ khiẹn ọlẹn fo, ọ iyi uwẹ be yẹ nyan ọne igho? Bezẹle nin uwẹ da ria emhin ebe nọn sẹ inian bhi ọkhọle? Osẹnobulua uwẹ bha ohoghe man, ọ iyi eria.” 5 Ananayas ki họn ene ẹmhọn nan, ọle da wo kuọlọ. Ọle da yu. Ofẹn da wo ha mun ẹbho rebhe ne họn ebe sunu. 6 Usẹn ikpea ne ha ribhi enin, da re ukpọn gbanọ ọlẹn, yẹ mun ọlẹn dagbare dọ re ọle tọ.

7 Ebe sẹ uriagogo ea ki gbera, okhuo ọle da vae, ọle bha sẹ họn ebe sunu. 8 Pita da nọọn ọlẹn yọle: “Eka nin ọdọ ẹ yọle bha rẹ khiẹn ọne otọ, ọle bha gene rẹ khiẹn ọlẹn?” Ọne okhuo da yole: “Ehe, iriọ mhan rẹ khiẹn ọlẹn.” 9 Pita da ki taman ọlẹn yọle: “Bezẹle nin bha veva da ko mhanmhanlẹn nin bha rẹ dọnmhẹn ẹlinmhin nọnsi Jehova?* Ghọle, eria ne dọ re ọdọ ẹ tọ sikẹ enan fo, ele dẹ yẹ mun uwẹ dagbare.” 10 Ọle da wo rẹ osukpa kuọlọ, yẹ yu. Ene usẹn ikpea ki nabhi ẹkẹ-uwa, ele da kere ghe, ọne okhuo yu. Ele da mun ọlẹn dagbare dọ rẹ ọle tọ sikẹ ọdọ ọle. 11 Ọnan da wo re ofẹn ha mun ọrebhe ne ribhi ọne agbotu bi ọrebhe ne họn ebe sunu.

12 Rẹ deba ọnin, ene etuegbe da wo ha lu emhin ọhan-ilo, bi emhin ọnyunuan kẹkẹ bhi ẹwẹ ene ẹbho. Ele rebhe da ha ko bhi eji a tiọle Ukporina ọsi Solomọn. 13 Ofẹn da wo ha mun ẹbho nekẹle rẹ deba ele. Ọrẹyiriọ, ẹbho da wo ha tẹmhọn ele nọnsẹn. 14 Ẹbho ne bunbun ne rẹọ bhi Ebeanlẹn mhan da wo yẹ ha deba ele. Ikpea bi ikhuo ne bunbun da wo dọ deba usun nọnsele. 15 Ẹbho bhọ da wa ewa bhi ughe, yẹ muno ẹbho nesele ne khọnmhọn ọbhọ, beji a ha da miẹn ghe, Pita ha gbera, adudu nọnsọle ki de gue ele, yẹ re egbe daan ele. 16 Eria ne bunbun ne ribhi agbaẹbho ne nẹga Jerusalẹm, da yẹ wo ha muno ẹbho nesele nin egbe bha daan re, bi ene ẹlinmhin-ebe kpokpo. Ene etuegbe da re egbe daan ele rebhe.

17 Ọne ojohẹn bi ene rẹkhan ọlẹn, bi ibhokhan Sadusi da ha khọẹkẹ ene etuegbe. 18 Bhiriọ, ele da dọ mun ele khue bhi ighan ọsi ọne agbaẹbho. 19 Ọkpakinọn, bhi ọsasọn, ẹhi nọnsi Jehova* da tuje ọne ighan an yẹ ne ele dagbare. Ọne ẹhi da taman ele yole: 20 “Bha ha khian uwa oga, bha wo dọ ha tẹmhọn iẹnlẹn ọsi ighegheghe man ene ẹbho.” 21 Ranmhude ebi ọne ẹhi taman ele, ẹdẹ ki wo we, ele da ha khian uwa oga dọ ha man emhin.

Ọne ojohẹn bi ene rẹkhan ọlẹn ki sẹbhi eji ele da do ikolo, ele da tie ọrebhe ne bhuohiẹn bhi ikotu Sanhẹdrin koko, yẹ tie ewanlẹn rebhe ọsi ibhokhan Izrẹl. Ele da je ẹbho ha khian ne dọ ne ene etuegbe re bhi ighan. 22 Ene unakpa ki sẹbhi ọne ighan, ele bha yẹ ke ene etuegbe re bhi enin. Bhiriọ, ele da fikie dọ taman ene je ele ebe sunu. 23 Ele da yọle: “Mhan kere ghe, a khue ọne ighan yẹ wo gbega ọle nọnsẹn, ene khẹ odẹ yẹ wo ribhi odẹ. Ọkpakinọn, beji mhan tuje ọle a, mhan bha ke ọria soso re bhi ẹkẹ ọle.” 24 Ọnọn re emhin khian bhi uwa oga, bi ene ohẹn ne khua ki họn ọnan, ilo da han ele. Ele da ha ria ẹmhọn ebe ha na bhi ọnan re. 25 Ọkpakinọn, ọria da vae dọ taman ele yọle: “Ghọle! Ene ikpea nin bha mun khue ribhi uwa oga, ele man ẹbho emhin.” 26 Ọnọn re emhin khian bhi uwa oga da ne egbanegbe nesọle rẹkhan egbe ha khian dọ muno ele re, ele da re ekpẹn-ekpẹn lu ọle, ọ iyi ọsi ugbe bi umun, ranmhude, ofẹn ene ẹbho da ha mun ele, nin ene ẹbho hẹi re udo-udo gbe ele.

27 Ele da ne ele re bhi ikotu ọsi Sanhẹdrin. Ọne ojohẹn da ki ha ne ele gui, 28 ọle da yọle: “Mhan bha be manman gbuhi nin bha, nin bha hẹi yẹ re elin nọnsi Jesu rẹ ha man emhin? Ibha bha họn. Bha da yẹ re ọne iman-emhin nọnsẹbha rẹ gba Jerusalẹm rebhe. Bha wo guanọ nin aranlẹn ọsi ọne okpea nan ha ri mhan bhi uke uhọnmhọn.” 29 Pita bi edibo nekẹle da ki wanniẹn ọlẹn yọle: “Osẹnobulua hi ojie nin mhan ha hẹnmhọn nan, ọ iyi eria. 30 Osẹnobulua ọsi aba mhan nin ẹdẹlẹ riọ Jesu kpanọ—Jesu nin bha gbe a bhi okhun oran. 31 Osẹnobulua re ọle dotua bhi obera nọnsọle, yẹ re ọle kiẹn Ọmiẹnmhanfan bi ọria nan ha na bhi obọ ọle miẹn iẹnlẹn. Osẹnobulua da lu ọnan beji ibhokhan Izrẹl ha da sabọ fidenọ, yẹ miẹn urẹhunmhan. 32 Ẹlo mhan sẹbhi ene emhin nan. Ẹlinmhin nọn khiale nin Osẹnobulua re nin ẹbho ne hẹnmhọn nanlẹn yẹ sọsali ọbhọ.”

33 Ele ki họn ọnan, ohu da wo re ele,* ele da ha guanọ nin ele gbono ene etuegbe a. 34 Ọkpakinọn, obhokhan Farisi ọkpa natiọle Gameliẹ da kpanọ mundia bhi ọne Sanhẹdrin. Ọkpa bhi ene man uhi ọle khin, ẹbho rebhe wo mun ekpẹn nanlẹn. Ọle da yọle nan ne ene ikpea dagbare fo. 35 Ọle da ki yọle: “Ibhokhan Izrẹl, bha mhọn ẹwanlẹn bhi ebi bha ho nin bha lu ene ikpea nan le. 36 Bhi ọsi ijiẹmhin, bhi ẹghe nọn gbera, okpea ọkpa natiọle Tudas da zegbere, ọle da ha yọle ghe ọria kpataki ọle khin. Ikpea ne bun sẹbhi itue iyisẹn enẹn* da deba usun nọnsọle. Ọkpakinọn, ẹbho eso da gbe ọle a. Iriọ ẹbho rebhe ne ha rẹkhan ọlẹn rẹ vẹ kua, emhanmhan nọnsele da de ihoho a. 37 Ọnin ki gbera, Judas nin obhi Galili da zegbere, bhi ẹghe nan rẹ ha ka ẹbho. Ẹbho da vẹ rẹkhan ọlẹn. Ọkpakinọn, ẹbho da yẹ gbe ọle a, iriọ ọrebhe ne ha rẹkhan ọlẹn yẹ rẹ vẹ kua. 38 Ejayenan nian, mẹn dẹ yọle, nin bha zẹ ene ikpea nan obọ, bha hẹi de ele idobolo. Ranmhude, ahamiẹn ghe, obọ eria iwẹnna nọnsele la emhanmhan nọnsele na vae, ọ dẹ de ihoho a. 39 Sokpan, ahamiẹn iwẹnna nọnsi Osẹnobulua nọn, bha ida sabọ gbe ele khuelo, bha bhọ ki kiẹn ene ne Osẹnobulua suan.” 40 Ele da re ibhude nin ọle re nin ele. Ele da ki tie ene etuegbe, re asan gbe ele, yẹ taman ele ne ele hẹi yẹ re elin nọnsi Jesu man emhin. Ele ki lu ọnan fo, ele da zẹ ele obọ ne ha khian.

41 Ene etuegbe da ghọnghọn sibhi ọne ikotu ọsi Sanhẹdrin re, ranmhude, ekpẹn nọn khua nọn rẹji ele, nin ele rẹ loya nin Jesu. 42 Ukpẹdẹ-ukpẹdẹ, ele da ha man emhin bhi uwa oga, bi ukuwa rẹ sẹbhi ukuwa. Ele da yẹ ha ta ọne ọta nọn mhẹn rẹji Jesu nin Kristi. Ele bha zobọ bhọ.

6 Bhi ọne ẹghe nin, ẹghe nin ene edibo ki rẹ ha bun ọbhọ, ẹmhọn da zegbere nin ibhokhan Ju ne zẹ urolo Grik bi ibhokhan Ju ne zẹ urolo Hibru. Ibhokhan Ju ne zẹ urolo Grik da ha guinẹzọ, ramhude, ebale nan ha gha, bha ha sẹ obọ ọsi ikhuo nesele ne iyẹ mhọn ọdọ. 2 Bhiriọ, ene etuegbe igbeva da tie ene edibo rebhe koko yẹ yọle: “Ọ bha khẹke nin mhan zẹ iwẹnna itẹmhọn Osẹnobulua obọ dọ ha gha ebale. 3 Bhiriọ ibhio, bha zẹ ikpea ihinlọn bhi ẹwẹ bha, ne wo lu nọnsẹn, ne mhọn ẹwanlẹn, bi ẹlinmhin nọn khiale, nin mhan mun ọne ẹsọn nan ele bhi obọ. 4 Bhi ọsẹmhan, mhan ki denọ ẹlo ọbhi erọnmhọn bi iwẹnna itẹmhọn Osẹnobulua.” 5 Ebi ele tale da wo manman ti ene edibo rebhe bhọ. Bhiriọ, ele da zẹ Stivin, okpea nọn manman mhọn urẹọbhọ bi ẹlinmhin nọn khiale. Ele da yẹ zẹ Filip, Prokorọs, Naikenọ, Taimọn, Paminas, bi Nikoleọs nin obhi Antiọk nọn dọ deba ibhokhan Ju ha ga. 6 Ele da ne ele bu ene etuegbe. Ene etuegbe ki nan erọnmhọn fo, ele da ne obọ nyan ele.

7 Bhiriọ, ọta nọnsi Osẹnobulua da wo manman ha vẹ, ẹbho ne bunbun da wo dọ ha kiẹn edibo bhi Jerusalẹm. Rẹ deba ọnin, ohẹn ne bunbun da wo yẹ dọ ha mhọn urẹọbhọ.

8 Bhi ọne ẹghe nin, Stivin da wo ha lu emhin ọhan-ilo ne bunbun bhi ẹwẹ ene ẹbho, ranmhude, Osẹnobulua nanlẹn dia, yẹ re ahu nanlẹn. 9 Ọkpakinọn, ikpea eso ne na bhi usun natiọle Enan Fan Fia vae, da dọ ne Stivin ha gbugan. Ibhokhan Sairini, Alẹzandria, Silisia, bi Esia da yẹ deba ele. 10 Ranmhude ẹwanlẹn nin Stivin rẹ ha talọ, bi ẹlinmhin nọn khiale nọn ha noo ọle, ele bha sabọ nanlẹn muan ẹmhọn. 11 Ele da dọ nin ikpea eso mhanmhanlẹn nin ele yọle ghe ele họn Stivin re unun ji Mozis bi Osẹnobulua. 12 Ebi ele tale da wo re ẹkẹ ha khọ ene ẹbho bi ene ewanlẹn bi ene man uhi. Ele da bu Stivin re, yẹ re idu-idu mun ọlẹn ha khian ikotu ọsi Sanhẹdrin. 13 Ele da ne ẹbho re ne dọ sọsali ohoghe gbe ọle, ene ẹbho da yọle: “Ẹghe rebhe ọne okpea nan rẹ re unun ji uwa oga nọnsi Osẹnobulua bi ọne Uhi. 14 Bhi ọsi ijiẹmhin, mhan sẹ ka họn ghe, ọle tale ghe Jesu nin obhi Nazarẹt dẹ dunmhun ọne uwa oga nan sotọ, sẹyẹ, ọle dẹ fi akerebhotọ nin Mozis mun nin mhan deno.”

15 Ẹghe nin ọrebhe ne ha ribhi ikotu ọsi Sanhẹdrin ki rẹ ghe ẹlo nọnsi Stivin, ele da kere ghe, ẹlo nọnsọle diabe ọsi ẹhi.

7 Ọne ojohẹn da ki nọọn Stivin yọle: “Ẹmhọanta ele tale?” 2 Stivin da ki yọle: “Ibhio mẹn bi ewanlẹn nesẹmhẹn, bha ka mẹn ehọ. Ẹghe nin Ebraham nin aba mhan nin ẹdẹlẹ rẹ ha ribhi Mẹsopotemia, ọkuẹsẹ ọle dọ ha nyẹnlẹn bhi Heran, Osẹnobulua nọn ke okhun nẹ da re egbe man ọlẹn. 3 Ọ da taman ọlẹn yọle: ‘Sibhi agbaẹbho nọnsẹ re, uwẹ ha sibhi eji ibhio ẹ ye re ha khian agbaẹbho nin mẹn ha rẹman ẹn.’ 4 Ọle da gene sibhi otọ Kadia re dọ ha nyẹnlẹn bhi Heran. Aba ọle ki yu fo, ọle da sibhi Heran re. Osẹnobulua da re ọle re bhi ọne otọ nan nin bha da nyẹnlẹn nian. 5 Ọrẹyiriọ, Osẹnobulua bha mun otọ nanlẹn. Ọle bhọ bha hian obhi ọ khere bhọ nanlẹn. Ọkpakinọn, ọ da ve nanlẹn ghe, ọle dẹ re ọne otọ nanlẹn bi imọn nesọle, arẹmiẹn, ọle bha sẹ ha mhọn ọmọn soso. 6 Rẹ deba ọnin, Osẹnobulua da taman ọlẹn ghe, imọn nesọle dẹ dọ ha nyẹnlẹn bhi agbaẹbho ọbhebhe. Ene ẹbho ki re ele lu igbọn yẹ re oya nin ele rẹ na bhi ikpe iyisẹn enẹn.* 7 Osẹnobulua da yọle, ‘Mẹn dẹ bhuohiẹn ọne agbaẹbho nọn ha re ele lu igbọn. Ene emhin nan ha ki sunu fo, ele ki sibhi ọne agbaẹbho re, yẹ vae bhi ọne otọ nan dọ ha ga imẹn.’

8 “Osẹnobulua da deba ọle gbe akovẹn. Ọle da taman ọlẹn nin ọle bi imọn nesọle ha ruẹ, Ebraham da biẹ Aiziki yẹ ruẹ ọle bhi ukpẹdẹ nọnzi elẹnlẹn. Aiziki da biẹ Jekọp, Jekọp da biẹ imọn igbeva ne nyan ene ulin-uwa igbeva. 9 Ranmhude oyadan,* ibhio Josẹf da khiẹn Josẹf nin ibhokhan Ijipt. Ọrẹyiriọ, Osẹnobulua da nanlẹn dia, 10 yẹ hinmhin ọlẹn bhi ekpokpo rebhe. Ọle da yẹ re ẹwanlẹn nanlẹn, yẹ lu ọle nin Fero nin ojie ọsi Ijipt re ẹlo esili ghe ọle. Fero da zẹ ọle nọn ha gbẹloghe otọ ọsi Ijipt bi ẹgua nọnsọle. 11 Ọkizẹbue, ukhunmhun da munhẹn ha fi bhi otọ Ijipt rebhe, bi otọ Kenan. Ọnan da wo ha yi ọkakale nọn khua. Aba mhan nin ẹdẹlẹ bha yẹ miẹn ebale ha le. 12 Jekọp ki họn ghe ebale ribhi otọ Ijipt, ọle da je imọn nesọle nin aba mhan nin ẹdẹlẹ ha khian. 13 Ẹghe nin ele ki rẹ yo bhi ọsi ugba ọzeva, Josẹf da taman ibhio ọle ọne ọle khin. Iriọ Fero rẹ dọ lẹn azagba-uwa ọsi Josẹf. 14 Iriọ Josẹf rẹ je uhọnmhọn bu Jekọp nin aba ọle, nin ọle bi azagba-uwa nọnsọle rebhe sibhi Kenan re vae bhi otọ Ijipt. Itue isẹn iribhi egbọ enẹn* ele rebhe ha khin. 15 Jekọp da gene ha khian Ijipt. Enin ọle ki da yu. Enin imọn nesọle nin aba mhan nin ẹdẹlẹ da yẹ yu. 16 A da muno ele vae bhi Shikẹm, dọ re ele tọ bhi idin nin Ebraham re igho isiliva dẹ bhi obọ imọn ọsi Hemọn.

17 “Beji ọne ẹghe ki ha sire, nin ive nin Osẹnobulua ve nin Ebraham ha rẹ munsẹ, ibhokhan Izrẹl ne ha ribhi otọ Ijipt da wo kie manman ha bun ọbhọ. 18 Akizẹbue, Ijipt da dọ ha mhọn ojie ọsọgbọn. Ọne ojie nan bha lẹn Josẹf. 19 Ọne ojie nan da lu ẹbho nesẹmhan khọlọ. Ọle da yẹ gbuhi nin ene aba, nin ele muno imọn nesele kua, beji ene imọn ha da yuno. 20 Ọne ẹghe nin a rẹ biẹ Mozis. Ọle da wo manman ha mhọn-ose bhi ẹlo nọnsi Osẹnobulua. A da bẹẹ ọle na bhi uki ea bhi uwa nọnsi aba ọle. 21 Ẹghe nan ki rẹ mun ọlẹn fia, ọmokhuo nọnsi Fero da miẹn ọlẹn mun, ọ da dọ bẹẹ ọne ọmọn wanre bọsi ọmọn nọnsọle. 22 A da man Mozis ilẹnmhin rebhe ọsi ibhokhan Ijipt. Ọle da wo dọ kiẹn okpọria. Ọta nin ọle ta bi emhin nin ọle lu da wo re ọnan man.

23 “Ọle ki ha ribhi ikpe egbọ eva,* ọ da na ọle bhi ọkhọle nin ọle dọ fẹ ibhio ọle nin ibhokhan Izrẹl ghe. 24 Ọle ki daghe obhokhan Ijipt ọkpa re obọ oya mun ọkpa bhi ẹwẹ ele, ọle da dọ khọn nanlẹn, yẹ gbe ọne obhokhan Ijipt a. 25 Ọle da rẹ ha riale ghe, ibhokhan Izrẹl dẹ riale ghe, Osẹnobulua je ọle nọn dọ miẹn ele fan, ọkpakinọn, ele bha ghe ọle iriọ. 26 Ukpẹdẹ nọn rẹkhan ọlẹn, ọle da gbo vae bhi eji ẹbho nesọle ye. Ọle da daghe eva ne ha khọnlẹn. Ọle da ha ho nin ọle muno ele bhi okhọn. Ọle da taman ele yọle: ‘Ikpea, ibhio bha khin, bezẹle nin bha da khọnlẹn?’ 27 Ọkpakinọn, ọnọn ha lu obhio ọle khọ, da sua ọle, yẹ taman ọlẹn yọle: ‘Họla re uwẹ kiẹn ojie bi ọbhuohiẹn nọnsẹmhan? 28 Uwẹ be guanọ nin uwẹ gbe imẹn an, beji uwẹ rẹ gbe ọne obhokhan Ijipt nin an inodẹ?’ 29 Mozis ki họn ọnan, ọle da nẹgbe dọ ha nyẹnlẹn bhi agbaẹbho ọsi Midian. Bhi enin, ọle da dọ ha mhọn imikpea eva.

30 “Ikpe egbọ eva* ki gbera, ẹhi da re egbe man ọlẹn bhi ojẹgbo nọn sikẹ oke ọsi Sanai. Ọne ẹhi da zegbere bhi ẹkẹ ẹwẹ igbẹn nọn ha to. 31 Ẹghe nin Mozis rẹ daghe ọnan, ilo da han ọlẹn. Ọkpakinọn, ọle ki ha sikẹ ọle, nin ọle fẹ ọle ghe, ọle da họn urulu nọnsi Jehova* yọle: 32 ‘Imẹn hi Osẹnobulua ọsi aba ẹ nin ẹdẹlẹ, Osẹnobulua ọsi Ebraham, Osẹnobulua ọsi Aiziki, bi Osẹnobulua ọsi Jekọp.’ Mozis da ki munhẹn ha guọ, ọle bha yẹ gbudu dọ fẹ ọle ghe. 33 Jehova* da ki taman ọlẹn yọle: ‘Ne ibata sibhi oẹ re, ranmhude eje khiale uwẹ da mundia riọ. 34 Imẹn daghe uwedẹ nan rẹ ha denyẹnyẹn ẹbho nesẹmhẹn bhi otọ Ijipt, mẹn yẹ họn eviẹ nọnsele. Ejayenan nian, mẹn ho nin mẹn hinmhin ele. Vae, mẹn dẹ je uwẹ ha khian otọ Ijipt.’ 35 Ọne Mozis nan nin ele hele, ẹghe nin ele rẹ yọle: ‘Họla re uwẹ kiẹn ojie bi ọbhuohiẹn nọnsẹmhan?’ Ọle ọne Osẹnobulua jele nọn dọ ha yi ojie nọnsele bi ọnọn ha miẹn ele fan, re na obọ ọne ẹhi nọn re egbe man ọlẹn bhi ẹwẹ ọsi igbẹn. 36 Ọne okpea nan da sun ele sibhi otọ Ijipt re, ọle da lu emhin ọhan-ilo ne bunbun bhi otọ Ijipt, bhi Okpẹdẹ nọn Jan bi bhi ẹkẹ ojẹgbo, rẹ na bhi ikpe egbọ eva.*

37 “Ọne Mozis nan da taman ibhokhan Izrẹl yọle: ‘Osẹnobulua dẹ zẹ akhasẹ bhi ẹwẹ bha, nọn diabe mẹn, nọn ha rẹkpa bha.’ 38 Ọle hi ọnọn ha ribhi ẹwẹ ibhokhan Izrẹl, bhi ẹkẹ ojẹgbo. Ọle bi ẹhi nọn nanlẹn talọ bhi Oke ọsi Sanai bi aba mhan nin ẹdẹlẹ, ele ko ha ribhi ẹkẹ ojẹgbo. A da taman ọlẹn ọta nọnsi Osẹnobulua nọn ida fo ghee, nin ọle tale man mhan. 39 Aba mhan nin ẹdẹlẹ bha ka hẹnmhọn nanlẹn. Ele da re ẹlo gbe ọle a. Sẹyẹ, ebi ele fikekegbe bhi otọ Ijipt da dọ ha yẹẹ ele. 40 Ele da ha taman Erọn yọle: ‘Man osẹ nin mhan nọn ha dia mhan, ranmhude, mhan bha yẹ lẹn ebe sunu ji ọne Mozis nan nọn ne mhan sibhi otọ Ijipt re.’ 41 Ele da ki kanọ obhi ẹmena bhi ene ikpẹdẹ nin, yẹ ha zọese ji ọne ẹbọ. Ele da ha sọnyẹnmhẹn bhi emhin ne ele re obọ nọnsele man. 42 Bhiriọ, Osẹnobulua da fikekegbe ele, yẹ zele obọ ne ha ga ahiẹnhiẹn ne ribhi okhun. Bhi Ebenọnkhiale, Osẹnobulua da yọle: ‘Ibhokhan Izrẹl, ene izọese rebhe nin bha ha lu bhi ẹkẹ ikpe egbọ eva* nin bha rẹ ha ribhi ojẹgbo, ọ iyi mẹn bha ha re ọle ga. 43 Ibọkpọ ọsi Molọk, bi ahiẹnhiẹn ọsi osẹ natiọle Rifan, ọle bha ha mun-yo-mun-re. Ene amanzẹ nan bha ha ga. Ranmhude ọnan, mẹn dẹ ji a da muno ibha kpanọ ha khian eje ree gbera Babilọn.’

44 “Ẹghe nin aba mhan nin ẹdẹlẹ rẹ ha ribhi ojẹgbo, ele da ha mhọn ọne ibọkpọ nọn rẹman ghe, Osẹnobulua ne ele dia. Osẹnobulua hi ọnọn taman Mozis nọn bọn ọlẹn. Ọle da yẹ rẹman ọlẹn ebi ọle ha rẹ bọn ọlẹn yẹ tee. 45 Ọne ibọkpọ da ha ribhi obọ ọsi aba mhan nin ẹdẹlẹ. Ele bi Joshua da mun ọne ibọkpọ nabhi ọne otọ nin ene agbaẹbho rẹ ha ye. Osẹnobulua hi ọnọn khuno ene ẹbho nan sibhi ọne otọ nan re, yẹ mun nin aba mhan ne ẹdẹlẹ. Ọne ibọkpọ da ha ribhi enan rẹ sẹbhi ẹghe ọsi Devid. 46 Osẹnobulua da wo re ẹlo esili ghe Devid. Devid da yọle ọle ho nin ọle bọn uwa nin Osẹnobulua ọsi Jekọp. 47 Ọkpakinọn, Solomọn hi ọnọn ki bọn ọne uwa. 48 Sokpan, Osẹnobulua nọn Ke Okhun Nẹ inyẹnlẹn bhi uwa nin eria bọnlẹn. Beji Ebenọnkhiale tale, 49 ‘Jehova* da yọle: Okhun hi ojukhuo nọnsẹmhẹn, ọne otọ nan hi eji mẹn ne oẹ i. Bha dẹ sabọ bọn uwa nin mẹn? Bha dẹ sabọ bọn eji mẹn ha dia? 50 Iwẹnna obọ nesẹmhẹn ene emhin nan rebhe khin.’

51 “Eria ne wo bhi uhọnmhọn bha khin. Bha ihẹnmhọn. Iriọ ọkhọle nọnsẹbha yẹ rẹ gbin. Bọsi aba bha nin ẹdẹlẹ, bha ilu rẹkhan adia ọsi ẹlinmhin nọn khiale. 52 Akhasẹ iribhọ nin aba bha nin ẹdẹlẹ bha kpokpo. Ele da gbono ene akhasẹ a ne tale ghe, ọnọn khiale vade. Ọle bhọ ki vae, ibha bhọ da khiẹn ọlẹn yẹ gbọle a. 53 Osẹnobulua da noo ọne ẹhi rẹ mun ọne Uhi nin bha. Ọkpakinọn, ibha bha re obọ rẹkhan ọlẹn.”

54 Ele ki họn ọnan, okpohu da re ele.* Ele da ha guanọ nin ele kuan ọlẹn. 55 Ọkpakinọn, ẹlinmhin nọn khiale da manman ha noo Stivin. Ọle da ghe okhun yẹ daghe uyi nọnsi Osẹnobulua. Ọle da yẹ daghe Jesu mundia bhi obera nọnsi Osẹnobulua. 56 Ọle da yọle: “Mẹn da daghe okhun tuje a, mẹn da yẹ daghe Ọmọn nọnsi okpea mundia bhi obera nọnsi Osẹnobulua.” 57 Bhi ọne ẹghe nan, ele ki họn ọnan, ele da reso yẹ re obọ lan ehọ nọnsele. Ele rebhe da re osukpa vẹ ru ọle. 58 Ele ki da sua ọle dagbare yẹ munhẹn ha re udo gbe ọle. Ene ẹbho ne dọ sọsali gbe ọle, da kuọ ukpọn nọnsele, yẹ ne ọbhi egbe oẹ ọsi okpea ọkpa natiọle Sọl, nọn ne ele re ẹlo ọbhọ. 59 Ẹghe nin ele rẹ ha re udo gbe Stivin, Stivin da yọle: “Jesu nin Ebeanlẹn imẹn, mẹn zẹ iẹnlẹn nọnsẹmhẹn obọ nin uwẹ.” 60 Ọle ki da diguẹ, yẹ reso yọle: “Jehova,* hẹi ka ọne olukhọ nan ele bhi obọ.” Ọle ki ta ọnan fo, ọle da yu.

8 Sọl da re obọ bhọ nan gbe Stivin an.

Bhi ọne ukpẹdẹ nin, ọne agbotu nọn ribhi Jerusalẹm da manman miẹn ekpokpo bhi egbe. Ene edibo rebhe da nẹ diọ bhi ije kẹkẹ bhi otọ Judia bi Sameria, ene etuegbe ọkpa bha nẹ kpanọ. 2 Ọkpakinọn, ikpea eso ne mun ofẹn Osẹnobulua da mun Stivin kpanọ dọ re ọle tọ, ele da manman viẹ ọle. 3 Sọl da wo hẹ da ene ribhi ọne agbotu yẹ ha kpokpo ele. Ọle ha diọbhi uwa nọnsele, ọle ki si ele dagbare nan dọ mun ele khue, ọ ha rẹ ha yi okpea la okhuo.

4 Ọkpakinọn, ene edibo ne diọbhi ije kẹkẹ, da wo ha wewe ọne ọta esili nọnsi Osẹnobulua khian. 5 Bhi ọne ẹghe nan, Filip da diọbhi agbaẹbho ọsi Sameria,* dọ ha tẹmhọn Kristi man ene ribhi enin. 6 Ene ẹbho da wo gbehọkotọ bhi ebi Filip ha ta. Ele da ka ọle ehọ, yẹ gbẹlokotọ bhi emhin ọhan-ilo nin ọle ha lu. 7 Ọle da ha re egbe daan ẹbho ne bunbun nin ẹlinmhin-ebe kpokpo. Ene ẹlinmhin-ebe ha reso, ele ki dagbare. Rẹ deba ọnin, ọle da re egbe daan akhun ne bunbun. 8 Ọnan da wo re ọrebhe bhi ọne agbaẹbho nin ha ghọnghọn.

9 Okpea ọkpa natiọle Saimọn da ha ribhi ọne agbaẹbho nan. Ọkuẹsẹ ọne ẹghe nan, emhin idunan ọle lu. Emhin nin ọle lu da ha yi emhin ọhan-ilo bhi ẹlo ọsi ibhokhan Sameria. Ranmhude ọnan, ọle da ha riale ghe okpọria ọle khin. 10 Ọrebhe, ke obhokhan ke ọwanlẹn da ha ka ọle ehọ. Ele ki ha yọle: “Ọne okpea nan mhọn okpahu nọn na obọ Osẹnobulua vae.” 11 Rẹ sẹbhi ọne ẹghe nan, ele da wo ha mun ekpẹn nanlẹn, ranmhude, emhin ọhan-ilo, ọle emhin idunan nin ọle ha lu khin bhi ẹlo nọnsele. 12 Filip ki dọ tẹmhọn Agbejele nọnsi Osẹnobulua bi elin nọnsi Jesu Kristi man ele, ele da rẹọbhọ. Ele da yẹ mianmẹn, ene ikpea bi ene ikhuo. 13 Saimọn bhọ da yẹ rẹọbhi Jesu, bhiriọ, ọle da mianmẹn. Ọle da ha rẹkhan Filip. Emhin ọhan-ilo nin Filip ha lu, da han ọle ilo.

14 Etuegbe ne ribhi Jerusalẹm ki họn ghe, ibhokhan Sameria rẹọbhi ọta nọnsi Osẹnobulua, ele da je Pita bi Jọni bu ele. 15 Pita bi Jọni da diọbhi enin dọ nan erọnmhọn nin ele, beji ele ha da ha mhọn ẹlinmhin nọn khiale. 16 Ranmhude, ele bha sẹ ha mhọn ẹlinmhin nọn khiale. Elin nọnsi Jesu nin Ebeanlẹn mhan ọkpa ele sẹ rẹ mianmẹn. 17 Pita bi Jọni da ki ne obọ nyan ele, ele da ki dọ ha mhọn ẹlinmhin nọn khiale.

18 Saimọn ki kere ghe, ene etuegbe ha ne obọ nyan ẹbho, ọle ẹbho da miẹn ẹlinmhin nọn khiale, ọle da re igho nin Pita bi Jọni, 19 yẹ yọle: “Bha yẹ re ọne ahu nan nin mẹn, beji a ha da miẹn ghe, ọria nọn hi ki rẹ khin nin mẹn ne obọ nyan, ki yẹ ha mhọn ẹlinmhin nọn khiale.” 20 Ọkpakinọn, Pita da taman ọlẹn yọle: “Uwẹ bi igho nọnsẹ dẹ fuẹn an, nin uwẹ rẹ ha guanọ nin uwẹ re igho dẹ ẹseọhe nọnsi Osẹnobulua. 21 Ọne ebi uwẹ guanọ nan ida sabọ sẹ uwẹ obọ, ranmhude, Osẹnobulua daghe ọle ghe, ọkhọle ebe uwẹ mhọnlẹn. 22 Bhiriọ, kiọya bhi olukhọ nọnsẹ, uwẹ ha fidenọ. Yẹ manman bhii Jehova* nin ọle rẹhunmhan uwẹ nin uwẹ rẹ ha ria ebe imhẹn bhi ọkhọle. 23 Mẹn daghe ọle ghe, obi vuọn uwẹ ọkhọle, sẹyẹ, igbọn ọsi emhin ebe uwẹ khin.” 24 Saimọn da ki taman ele yọle: “Bha ne mẹn bhii Jehova,* beji a da miẹn ene emhin nan nin bha tale bha ruan mẹn.”

25 Ele ki wewe ọne ọta nọn mhẹn na bhi ijerebhe fo, yẹ tẹmhọn Jehova* man ẹbho, ele da fikie ha khian Jerusalẹm. Beji ele rẹ khian, ele da wewe ẹmhọn Osẹnobulua na bhi idunmhun kẹkẹ ne ribhi agbaẹbho ọsi Sameria.

26 Ọkpakinọn, ẹhi nọnsi Jehova* da ne Filip talọ. Ọ da taman ọlẹn yọle: “Kpanọ ha khian obọ ọsi saot.* Ha khian ọne odẹ nọn na Jerusalẹm khian Gaza.” (Ugbẹbubu ọne odẹ nan rẹkhan.) 27 Bhiriọ, ọle da kpanọ ha khian, ọle ki sẹbhi enin, ọle da miẹn okpea ọkpa nin obhi Ẹtiopia. Ihe nọn khua ọne okpea nan ye bhi eguare ọsi Kandesi nin esọn* ọsi Ẹtiopia. Ọle hi ọnọn gbẹloghe afe bi ua ọsi ọne esọn. Ọle yo Jerusalẹm dọ ga. 28 Beji ọle ha khian uwa, ọle da ha tie ebe ọsi Ẹzaya nin akhasẹ dagbare bhi ẹkẹ awẹnẹwẹnẹ nọnsọle. 29 Ọne ẹlinmhin da taman Filip yọle: “Ha khian. Bu ọne awẹnẹwẹnẹ nin.” 30 Filip da runẹ ke ọne awẹnẹwẹnẹ re, ọle da họn ghe ọne okpea tie ebe ọsi Ẹzaya nin akhasẹ. Ọle da ki nọọn ọlẹn yọle: “Uwẹ be lẹn otọ ebi uwẹ tie?” 31 Ọne okpea da yọle: “Mẹn ida sabọ lẹn sade ọria bha re otọle man mẹn.” Ọle ki da taman Filip nọn nabhi ẹkẹ ọne awẹnẹwẹnẹ. 32 Eji ọle ha tie bhi Ebenọnkhiale khọnan: “A da mun ọlẹn re bọsi ohuan na khian la gbe a. Sẹyẹ, bọsi ohuan nọn bha so ẹghe nan rẹ ha rie ọle ilọn, ọle bha ta emhin soso. 33 Ẹghe nan rẹ ha zuọzuọ ọle, a bha bhuohiẹn esili nanlẹn. Họla ha gbe okha ọsi iẹnlẹn nọnsọle? Ọria soso iribhọ, ranmhude, a re iẹnlẹn nọnsọle sibhi ọne otọ nan re.”

34 Ọne okpea da ki nọọn Filip yọle: “Huẹan, họla ọne akhasẹ nan tẹmhọnlẹn? Egbọle ọle be tẹmhọnlẹn, la ọria ọbhebhe?” 35 Filip da ki munhẹn ha nanlẹn talọ. Ọle da re eji ọne okpea ha tie rẹ munhẹn ha tẹmhọn Jesu man ọlẹn. 36 Beji ele sẹyẹ khian bhi uwedẹ, ele da sẹbhi eji amẹn ye. Bhiriọ, ọne okpea da taman Filip yọle: “Ghọle! Amẹn ribhi enan. Be ki mun mẹn mhọn nian nin mẹn hẹi mianmẹn?” 37* —— 38 Bhiriọ, ọle da taman ọne ọria nọn hẹn ọne awẹnẹwẹnẹ nọn mundia. Filip bi ọne okpea da huẹnre nabhi ẹkẹ amẹn. Ọle da re amẹn nanlẹn bhi enin. 39 Ẹghe nin ele ki rẹ dagbare bhi ẹkẹ ọne amẹn, ẹlinmhin nọnsi Jehova* da wo re osukpa re Filip kpanọ. Bhiriọ, ọne okpea bha yẹ daghe ọle. Ọle da ki ghọnghọn ha khian uwa. 40 Ọkpakinọn, Filip da ke egbọle re bhi Ashdọd. Ọle da ha wewe ọne ọta nọn mhẹn na bhi idunmhun kẹkẹ ne ribhi ọne agbaẹbho rẹ dọ sẹbhi Sizaria.

9 Ọkpakinọn, Sọl da yẹ wo ha zuza. Ranmhude ọle guanọ nin ọle gbono edibo nesi Jesu a, ọle da bu ojohẹn. 2 Ọle da taman ọlẹn nọn re ebe nanlẹn, nọn ha re otọ nanlẹn rẹ diọbhi sinagọg nọn ribhi Damaskọs, beji a da miẹn, ọria nọn hi ki rẹ khin nin ọle miẹn nọn ribhi Ọne Uwedẹ Ẹmhọanta, ọle ki dọ mun ọlẹn khue bhi Jerusalẹm, ọ ha rẹ ha yi okpea la okhuo.

3 Ọle ki da ha khian Damaskọs. Ọ ki kẹ khere nin ọle rẹ sẹbhọ, ẹfua da wo re osukpa na bhi okhun bha nyan ọlẹn. 4 Ọle da de ọbhi otọ yẹ họn ukpuru nọn yọle: “Sọl, Sọl, bezẹle nin uwẹ da kpokpo mẹn?” 5 Sọl da yọle: “Ebeanlẹn mẹn, họla uwẹ khin?” Ọle da yọle: “Imẹn hi Jesu, ọne uwẹ kpokpo. 6 Kpanọ mundia. Uwẹ ha diọbhi ẹkẹ ọne agbaẹbho. A dẹ taman uwẹ ebe khẹke nin uwẹ lu.” 7 Bhi ọne ẹghe nan, ene ikpea ne rẹkhan ọlẹn da zeze mundia. Arẹmiẹn ele họn ukpuru, ele bha daghe ọnọn talọ. 8 Sọl da ki kpanọ sibhi otọ re. Arẹmiẹn ọle taan ẹlo a bhi uhọnmhọn, ọle bha sabọ daghe emhin soso. Bhiriọ, ele da re ọle ukpobọ mhọn nabhi ẹkẹ Damaskọs. 9 Rẹ na bhi ikpẹdẹ ea, ọle bha sabọ daghe. Rẹ deba ọnin, ọle bha da, ọle bha le.

10 Odibo ọkpa da ha ribhi Damaskọs natiọle Ananayas, Ebeanlẹn mhan da bu ọle re bhi ebhohiẹ. Ọle da so tie ọle, yẹ yọle: “Ananayas!” Ọle da wanniẹn yọle: “Ghe mẹn bhi enan Ebeanlẹn imẹn.” 11 Ebeanlẹn mhan da taman ọlẹn yọle: “Kpanọ ha khian ọne uwedẹ natiọle Ukpọwala. Uwẹ ha dọ guanọ okpea ọkpa natiọle Sọl, nọn na bhi Tasọs vae. Ọle ribhi uwa ọsi Judas. Ọle wo nan erọnmhọn nian. 12 Sẹyẹ, ọle miẹn imianlo, ghe, okpea ọkpa natiọle Ananayas bu ọle re dọ ne obọ nyan ọlẹn, beji ọle ha da kie ha daghe.” 13 Ọkpakinọn, Ananayas da wanniẹn ọlẹn yọle: “Ebeanlẹn imẹn, mẹn sẹ wo họn ghe, ẹbho ne bunbun tẹmhọn ọne okpea nan, bi ebi ọle rẹ re obọ oya mun edibo nesẹ yẹ bhi Jerusalẹm. 14 Rẹ gbera ọnin, ene ohẹn ne khua re obọ ọle bhọ, nin ọle rẹ dọ mun edibo nesẹ ne ribhi enan khue.” 15 Ọkpakinọn, Ebeanlẹn mhan da taman ọlẹn yọle: “Ha khian! ranmhude mẹn zẹ ọne okpea nan, nin mẹn noo ọle rẹ wewe elin nọnsẹmhẹn man ene agbaẹbho, ene ijie bi ibhokhan Izrẹl. 16 Mẹn dẹ wo rẹman ọlẹn emhin rebhe nin ọle ha loya le ranmhude elin nọnsẹmhẹn.”

17 Ananayas da ki ha khian. Ọle da nabhi ọne uwa. Ọle da ne obọ nọnsọle nyan Sọl yẹ taman ọlẹn yọle: “Sọl nin obhio, Jesu nin Ebeanlẹn mhan nọn re egbe man uwẹ ẹghe nin uwẹ rẹ ha vade bhi uwedẹ, ọle je mẹn re, beji uwẹ ha da kie ha daghe yẹ ha mhọn ẹlinmhin nọn khiale.” 18 Osukpa, ebe diabe ihianmhẹn ehẹn da de sibhi ẹlo ọsi Sọl re. Ọle da ki ha daghe. Ọle da kpanọ mundia, yẹ dọ mianmẹn. 19 Ọle da le ebale, sẹyẹ, ahu da do ọle bhọ.

Ọle da deba edibo ne ribhi Damaskọs gbe ẹghe eso, 20 sẹyẹ, ọle da wo munhẹn ha tẹmhọn Jesu bhi sinagọg, ghe, Jesu hi Ọmọn nọnsi Osẹnobulua. 21 Sokpan, ilo da han ọrebhe ne họn ebi ọle ha ta. Ele da yọle: “Ọnan ibe yi ọne okpea nan nọn kpokpo edibo nesi Jesu bhi Jerusalẹm? Ọle vae bhi enan dọ mun ele ji ene ohẹn ne khua, beji ele ha da mun ele khue, ọ ibe yi iriọ?” 22 Ọkpakinọn, Sọl da wo manman ha lu re alo bhi oga. Ọle da wo re ẹwanlẹn ha rẹman ghe, Jesu, ọle hi Kristi. Ọnan da wo re ilo han ibhokhan Ju ne ha nyẹnlẹn bhi Damaskọs.

23 Ẹghe eso ki gbera, ibhokhan Ju eso da mhanmhanlẹn nin ele gbe Sọl a. 24 Ọkpakinọn, Sọl da lẹn ebi ele ha mhanmhan. Ele da ha khẹ igeti asọn bi odanmhẹn, beji ele ha da gbe ọle a. 25 Bhiriọ, bhi ọsasọn, edibo nesọle da na bhi uhio nan hian bhi egbuwa re okhuale mun ọlẹn huẹnre.

26 Sọl ki sẹbhi Jerusalẹm, ọle da ha dọnmhegbe nin ọle rẹ deba ene edibo ha lu emhin. Ọkpakinọn, ofẹn ọlẹn da ha mun ele, ranmhude, ele bha rẹọbhọ ghe, ọle kiẹn odibo. 27 Bhiriọ, Banabas da vae dọ rẹkpa ọle, yẹ re ọle bu ene etuegbe. Ọle da taman ene etuegbe ebi Sọl rẹ miẹn Ebeanlẹn mhan yẹ bhi uwedẹ, ebi Ebeanlẹn mhan rẹ nanlẹn talọ yẹ, bi ebi ọle rẹ re izebhudu tẹmhọn Jesu yẹ bhi Damaskọs. 28 Ọle da ki ne ele dia, yẹ miẹn isẹhoa rẹ ha khian-yo-khian-re bhi Jerusalẹm. Ọle da yẹ wo ha re izebhudu tẹmhọn Ebeanlẹn mhan. 29 Ọle da ha ne ibhokhan Ju ne zẹ urolo Grik talọ, yẹ ne ele gbugan. Ọkpakinọn, ele da guanọ nin ele gbe ọle a. 30 Ene edibo ki họn ọnan, ele da re ọle vae bhi Sizaria, yẹ na enin je ọle ha khian Tasọs.

31 Bhi ọsi ẹmhọanta, ene agbotu rebhe ne ribhi otọ Judia, Galili, bi Sameria, da wo dọ ha mhọn ọfure. Ele da ha tuẹn okhun. Rẹ deba ọnin, ele da ha bun ọbhọ, beji a miẹn ghe, ele re ọkhọle rebhe ha ga Jehova,* yẹ ha miẹn ikoudure bhi obọ ẹlinmhin nọn khiale.

32 Ejayenan nian, beji Pita ha rẹnẹ yo agbaẹbho kẹkẹ, ọle da sẹbhi Lida dọ rẹnẹ ji ene khiale ne ribhi enin. 33 Okpea ọkpa da ha ribhi enin natiọle Aniyas. Ikpe elẹnlẹn ki nọn nian nin ọle ribhi ijan ọkpa, ranmhude, akhun ọle khin. 34 Pita da taman ọlẹn yọle: “Aniyas, Jesu Kristi re egbe daan ẹn. Kpanọ uwẹ ha hẹnhẹn ibẹd nọnsẹ.” Ẹjẹje ọle da kpanọ. 35 Ọrebhe ne ribhi Lida bi otọ Sharọn ki miẹn Aniyas, ele da mhọn urẹọbhọ da Ebeanlẹn mhan.

36 Ejayenan nian, odibo ọkpa da ha ribhi Jọpa, elin ọne okhuo nan hi Tabita. “Dọkas”* a tie ọne okhuo nan bhi urolo Grik. Ọle wo sabọ zẹ emhin bhi obọ rẹ lu ẹsele nin ẹbho. 37 Bhi ọne ẹghe nin, ọle da ha khọnmhọn. Ọle da yu. Bhiriọ, ele da khọ ọle a, yẹ mun ọlẹn bhi ugha nọn ribhi okhun uwa. 38 Lida bha ree bhi Jọpa. Bhiriọ, ẹghe nin ene edibo rẹ họn ghe Pita ribhi Lida, ele da je ikpea eva bu ọle, nin ele dọ taman ọlẹn yọle: “Huẹan, jẹje bu mhan re.” 39 Bhiriọ, Pita da kpanọ rẹkhan ele. Ọle ki sẹbhi enin, ele da re ọle ha khian ugha nọn ribhi okhun uwa. Ene ikhuo rebhe ne iyẹ mhọn ọdọ da bu ọle re. Ele da ha viẹ. Ele da re ukpọn nin Dọkas so nin ele ẹghe nọn rẹ ha ribhi agbọn man ọlẹn. 40 Pita da yọle nin ọrebhe dagbare. Ọle da ki diguẹ nan erọnmhọn. Ọle ki nan erọnmhọn fo, ọle da denọ ẹlo da ọne ekuegbe yẹ yọle: “Tabita, kpanọ!” Ọle da taan ẹlo a. Ọle ki daghe Pita, ọle da kpanọ dotua. 41 Pita da mun ọle obọ mhọn, yẹ mun ọlẹn kpanọ. Ọle da ki tatie ene khiale* bi ene ikhuo ne iyẹ mhọn ọdọ, yẹ re ọle man ele. 42 Ọne ẹmhọn nan da vẹ na bhi ijerebhe bhi otọ Jọpa. Sẹyẹ, ene bunbun da dọ ha mhọn urẹọbhọ da Ebeanlẹn mhan. 43 Ọle da gbe ikpẹdẹ eso bhi Jọpa, bhi uwa ọsi okpea ọkpa nọn va ohian-elanmhẹn.* Saimọn a tie ọne okpea nan.

10 Ejayenan nian, okpea ọkpa da ha ribhi Sizaria natiọle Kọniliọs. Ọle sun eyokhọnlẹn natiọle usun ọsi Itali.* 2 Ọne okpea nan bi azagba-uwa nọnsọle wo mun ofẹn Osẹnobulua. Ọle wo manman lu ẹsele nin ẹbho. Rẹ deba ọnin, ẹghe rebhe ọle rẹ wo nan erọnmhọn ji Osẹnobulua. 3 Bhi egbẹghe agogo ea ọsodanmhẹn,* ẹhi nọnsi Osẹnobulua da bu ọle re bhi imianlo, yẹ tatie ọle yọle: “Kọniliọs!” 4 Ofẹn da ha mun Kọniliọs beji ọle rẹ ha ghe ọne ẹhi. Ọle da nọọn ọne ẹhi yọle: “Bela, Ebeanlẹn imẹn?” Ọne ẹhi da taman ọlẹn yọle: “Osẹnobulua họn erọnmhọn nesẹ, yẹ daghe ẹseọhẹ nin uwẹ lu nin ẹbho. Ọle ye ẹ re. 5 Ejayenan nian, je ikpea eso ha khian Jọpa, ne dọ tatie Saimọn ji uwẹ, na yẹ tiọle Pita. 6 Ọle ribhi uwa ọsi Saimọn nọn va ohian-elanmhẹn, nọn bọn uwa bhi egbe okpẹdẹ.” 7 Ọne ẹhi ki wo kpanọ, Kọniliọs da tatie eva bhi eguọmhandia nesọle, bi ọkpa bhi egbanegbe nesọle nọn mun ofẹn Osẹnobulua. 8 Ọle da taman ele emhin rebhe, yẹ je ele ha khian Jọpa.

9 Ukpẹdẹ nọnzi eva, beji ele ha sikẹ ọne agbaẹbho, Pita da diọbhi okhun uwa, bhi egbẹghe agogo igbeva ọsodanmhẹn* dọ ha nan erọnmhọn. 10 Ọkpakinọn, ohanmhẹn da ha gbe ọle. Bhiriọ, ọle da ha guanọ nin ọle le ebale. Beji ele ha nyẹn ọne ebale, ọle da munhẹn ha miẹn imianlo. 11 Ọle da daghe okhun tuje a, sẹyẹ, emhin nọn diabe udede ukpọn linẹn nan mun mhọn bhi obọ nenẹn, da na bhi okhun ha bu ọle vade. 12 Unan elanmhẹn kẹkẹ ne mhọn oẹ enẹn, elanmhẹn ne re ẹkẹ siọ otọ, bi afianmhẹn ne tinọn bhi okhun da ha ribhi uke ọle. 13 Ọle da họn ukpuru nọn yọle: “Kpanọ Pita, uwẹ ha gbe bhọ le!” 14 Ọkpakinọn, Pita da yọle: “Eye Ebeanlẹn imẹn. Mẹn bha sẹ ka le emhin soso nọn bha khia khẹ.” 15 Ọne urulu da kie talọ, ọ da yọle: “Hẹi yẹ kie dọnmhẹn ọlẹn tie emhin nin Osẹnobulua kpe khia ebe bha khia.” 16 Ọnan ki wo sunu fo ọsi ugba ọzea, a da mun ọne emhin nọn diabe udede ukpọn linẹn kpanọ diọbhi okhun.

17 Beji Pita sẹyẹ ha ria ẹmhọn ebi emhin nin ọle miẹn bhi imianlo mundia nan, ene ikpea nin Kọniliọs je da sẹbhi isi Saimọn. Ele da mundia bhi odalo igeti ọsi ọne uwa. 18 Ele da si urulu okhun rẹ nọọn si Saimọn nan yẹ tiọle Pita ribhi enin. 19 Beji Pita sẹyẹ ha ria ẹmhọn imianlo nin ọle miẹn, ọne ẹlinmhin da taman ọlẹn yọle: “Ghọle! Ikpea ea nọọn ẹmhọn ẹn. 20 Huẹnre bu ele bhi otọ, uwẹ ha rẹkhan ele ha khian. Hẹi zẹwẹ mhọn edandan, ranmhude, imẹn je ele re.” 21 Pita da ki huẹnre bu ene ikpea bhi otọ. Ọle da nọọn ele yọle: “Ọ iyi mẹn bha be guanọ? Ghe mẹn. Be ibha re imẹn lu?” 22 Ele da yọle: “Kọniliọs nin ọwanlẹn ọsi eyokhọnlẹn je mhan re. Okpea nọn khiale ọle khin, ọle wo manman mun ofẹn Osẹnobulua. Sẹyẹ, ibhokhan Ju rebhe manman tẹmhọn ọlẹn nọnsẹn. Ẹhi nọnsi Osẹnobulua, ọle taman ọlẹn nọn tie uwẹ vae bhi uwa nọnsọle, beji ọle ha da họn ebi uwẹ ha taman ọlẹn.” 23 Pita da ki tie ele nabhi uwa. Ele da wẹ enin.

Ẹdẹ ki we, ọle da kpanọ rẹkhan ele. Ibhio mhan nin ikpea eso bhi Jọpa da rẹkhan ọlẹn. 24 Bhi ukpẹdẹ nọn rẹkhan ọlẹn, ele da sẹbhi Sizaria. Kọniliọs da wo muegbe khẹ ele, ọle da tie ibhio ọle bi imọẹ ọle koko. 25 Pita ki wo ha nabhi uwa ọsi Kọniliọs, Kọniliọs da bu ọle re. Ọle da dediguẹ yẹ debhẹre nin Pita. 26 Ọkpakinọn, Pita da khua ọle okhun, ọ da taman ọlẹn yọle: “Kpanọ; ọria khọnkhan bii uwẹ mẹn yẹ khin.” 27 Ele da ko talọ nabhi uwa. Pita ki nabhi ẹkẹ uwa, ọle da kere ghe ẹbho ne bunbun si egbe koko. 28 Pita da taman ele yọle: “Bha lẹnmhin ghe ebi a nẹ nọn, nin obhokhan Ju rẹ rẹnẹ ji ọria ọbhebhe nọn iyi obhokhan Ju, la nanlẹn muobọ. Ọrẹyiriọ, Osẹnobulua rẹman mẹn ghe, nin mẹn hẹi tie ọria soso ọria nọn bha khia. 29 Ọnan zẹle ẹghe nin uwẹ rẹ je nan tatie mẹn, mẹn bha siegbe re ikeke, mẹn da wo ha vade. Bhiriọ, taman imẹn, bezẹle nin uwẹ da tie mẹn?”

30 Kọniliọs da yọle: “Uhẹn ọ ki ye nian, nin mẹn ha nan erọnmhọn bhi uwa nọnsẹmhẹn, bhi egbẹghe agogo ea ọsodanmhẹn.* Bhi ọne ẹghe nin, okpea ọkpa nọn yọ ukpọn nọn fi wanlan-wanlan da mundia bhi odalo nọnsẹmhẹn. 31 Ọle da yọle: ‘Kọniliọs, Osẹnobulua họn erọnmhọn nọnsẹ, yẹ daghe ẹseọhẹ nin uwẹ lu nin ẹbho. Ọle ye ẹ re. 32 Je ọria ha khian Jọpa, nọn dọ tatie Saimọn nan yẹ tiọle Pita re. Ọle ribhi isi Saimọn nọn va ohian-elanmhẹn, nọn mhọn uwa bhi egbegbe okpẹdẹ.’ 33 Iriọ mẹn rẹ je nan dọ tie ẹ re, uwẹ da wo gene vae bhi enan. Ejayenan nian, mhan ribhi odalo Osẹnobulua. Mhan muegbe nin mhan rẹ kaehọ emhin rebhe nin Jehova* yọle nin uwẹ taman mhan.”

34 Pita da ki munhẹn ha talọ, ọle da yọle: “Mẹn ki wo dọ gene lẹn ghe, Osẹnobulua izọn ọria, 35 ọkpakinọn, bhi agbaẹbho nọn hi ki rẹ khin, ọria nọn mun ofẹn ọlẹn, nọn yẹ lu ebe mhẹn, ọle Osẹnobulua miẹn ọbhi egbe. 36 Ọle da je uhọnmhunje ji ibhokhan Izrẹl, nan dọ taman ele ọta esili ọsi ọfure rẹ na obọ Jesu Kristi nọn yi Ebeanlẹn ọsi ọrebhe. 37 Bha lẹn ọne uhọnmhunje nan ha wewe bhi otọ Galili, bi otọ Judia rebhe, ẹghe nin Jọni rẹ wewe ẹmhọn imianmẹn fo: 38 A da ha tẹmhọn Jesu nin obhi Nazarẹt, bi ebi Osẹnobulua rẹ re ẹlinmhin nọn khiale zẹ ọle yẹ, yẹ re ahu nanlẹn. Ranmhude Osẹnobulua nanlẹn dia, ọle da ha na bhi agbaẹbho rebhe khian. Ọle da lu emhin esili yẹ re egbe daan ẹbho nin ẹlinmhin-ebe kpokpo. 39 Ẹlo mhan sẹ bhi ene emhin rebhe nin ọle lu bhi ene agbaẹbho ọsi ibhokhan Ju bi bhi Jerusalẹm. Ọkpakinọn, ele da gbe ọle a bhi okhun oran. 40 Bhi ukpẹdẹ nọnzi ea, Osẹnobulua da riọ ọle kpanọ bhi uu, yẹ ji ẹbho da daghe ọle. 41 Ọkpakinọn, ọ iyi ẹbho rebhe daghe ọle. Imhan ọkpa hi ene daghe ọle, imhan ne deba ọle da, yẹ le, ẹghe nin ọle rẹ riọ kpanọ. Osẹnobulua hi ọnọn ka zẹ mhan bhi otọ, nin mhan daghe ọle yẹ tẹmhọn ọlẹn. 42 Sẹyẹ, ọle da taman mhan, nin mhan dọ tẹmhọn ọlẹn man ẹbho nesẹmhan, yẹ manman sosali ọbhọ ghe, ọle hi ọne Osẹnobulua zẹle nọn ha yi ọbhuohiẹn ọsi ene nyẹnlẹn bi ene yulu. 43 Ọle ene akhasẹ rebhe sọsali nan, ghe, ọria nọn hi ki rẹ khin nọn mhọn urẹọbhọ da ọle, a ki rẹhunmhan olukhọ nọnsọle, rẹ na obọ elin nọnsọle.”

44 Beji Pita sẹyẹ ha ta ene emhin nan, ẹlinmhin nọn khiale da nabhi egbe ọsi ọrebhe ne ha ka ọle ehọ. 45 Ilo da wo han ene ibhokhan Ju* ne rẹkhan Pita, ranmhude, ele daghe ọle ghe, Osẹnobulua yẹ ha re ẹlinmhin nọn khiale rẹ lu ẹsele nin ene iyi ibhokhan Ju. 46 Ele da họn ghe, ele zẹ urolo kẹkẹ, yẹ re ogẹn ji Osẹnobulua. Pita da ki yọle: 47 “Osẹnobulua re ẹlinmhin nọn khiale nin ene eria nan, beji ọle yẹ rẹ re nin mhan. Bhiriọ, họla ha ki yọle nan hẹi re amẹn nin ele?” 48 Bhiriọ, ọle da yọle nan re amẹn nin ele bhi elin nọnsi Jesu Kristi. Ele da ki taman Pita nọn ne ele gbe ikpẹdẹ eso.

11 Ene etuegbe bi ene edibo ne ribhi Judia da họn ghe, ẹbho ne iyi ibhokhan Ju rẹọ bhi ọta nọnsi Osẹnobulua. 2 Ẹghe nin Pita ki rẹ sẹbhi Jerusalẹm, ẹbho ne rẹọbhọ ghe ọkhẹke nin ọrebhe ne ga Osẹnobulua ha ruẹ da ha nanlẹn van. 3 Ele da nọọn ọlẹn yọle: “Be re uwẹ nabhi uwa ọsi eria ne bha ruẹ, yẹ dọ deba ele le ebale?” 4 Bhiriọ, Pita da gbe otọ ọne ẹmhọn fanọn an man ele, ọle da yọle:

5 “Ẹghe nin mẹn rẹ ha ribhi agbaẹbho ọsi Jọpa, mẹn da miẹn imianlo beji mẹn ha nan erọnmhọn. Bhi ọne imianlo, emhin nọn diabe udede ukpọn linẹn nan mun mhọn bhi obọ nenẹn da na bhi okhun bu mẹn re. 6 Mẹn ki fẹ ọle ghe, mẹn da kere ghe, elanmhẹn ne mhọn oẹ enẹn, elanmhẹn ẹwẹ, elanmhẹn ne re ẹkẹ siọ bhi otọ, bi afianmhẹn, ele ribhi uke ọle. 7 Mẹn da yẹ họn ukpuru nọn yọle: ‘Pita, kpanọ, gbe bhọ, uwẹ ha le ọle!’ 8 Ọkpakinọn, mẹn da taman ọlẹn yọle: ‘Eye Ebeanlẹn imẹn, emhin nọn bha khia bha sẹ nan mẹn bhi unun ghee.’ 9 Mẹn da gbo kie họn ọne ukpuru na bhi okhun yọle: ‘Hẹi yẹ tie emhin nin Osẹnobulua kpe khia emhin nọn bha khia.’ 10 Ọne ukpuru da yẹ ne imẹn talọ bhi ọsi ugba ọzea, ọkuẹsẹ a mun ọne emhin rebhe fikie diọ bhi okhun. 11 Bhi ọne ẹghe nin tee, ikpea ea nan na bhi Sizaria je bu mẹn re, da vae bhi uwa nin mhan ha ye. 12 Ẹlinmhin nọnsi Osẹnobulua da taman mẹn nin mẹn rẹkhan ele, nin mẹn hẹi mhọn edandan. Ene ibhio mhan ehan nan da yẹ rẹkhan mẹn. Imhan rebhe da ko nabhi uwa ọsi ọne okpea.

13 “Ọne okpea da taman mhan ebi ẹhi rẹ bu ọle re yẹ bhi uwa, yẹ taman ọlẹn yọle: ‘Je ẹbho ha khian Jọpa, ne dọ tatie Saimọn nan yẹ tiọle Pita. 14 Ọle dẹ taman uwẹ ebi uwẹ bi azagba-uwa nọnse ha lu, nọn ha rẹ bha miẹn umiẹnfan.’ 15 Beji mẹn sẹyẹ ha ne ele talọ, Osẹnobulua da re ẹlinmhin nọn khiale nin ele, beji ọle yẹ rẹ re nin mhan bhi ẹghe ọhẹnhẹn. 16 Bhi ọne ẹghe nan, imẹn da yere ebi Jesu nin Ebeanlẹn mhan mọn ha ta, ẹghe nin ọle rẹ ha yọle: ‘Amẹn Jọni da ha gbe ẹbho ruẹ, ọkpakinọn, a dẹ gbe bha ruẹ bhi ẹlinmhin nọn khiale.’ 17 Beji a ki miẹn Osẹnobulua yẹ re ẹseọhẹ nin ọle re nin mhan rẹ lu ẹsele nin ele, họla imẹn ki khin, nin mẹn ha da yọle nin iho nọnsi Osẹnobulua hẹi munsẹ?”

18 Ele ki họn ebi Pita tale, ele bha yẹ ha nanlẹn van.* Ele da ha re ogẹn ji Osẹnobulua. Ele da ha yọle: “Osẹnobulua yẹ re isẹhoa nin ẹbho ne iyi ibhokhan Ju rẹ fidenọ, beji ele ha da miẹn iẹnlẹn.”

19 Ene edibo ne nẹgbe ẹghe nin ekpokpo rẹ munhẹn, beji a gbe Stivin a fo, da nẹ sẹbhi otọ Finishia, Saiprọs, bi Antiọk. Ibhokhan Ju ọkpa ele ha tẹmhọn Osẹnobulua man. 20 Ọkpakinọn, ikpea eso nin ibhokhan Saiprọs bi Sairini da vae bhi Antiọk. Ele da ha wewe ẹmhọn Jesu ne Ebeanlẹn mhan man ene zẹ urolo Grik. 21 Jehova* da wo ha rẹkpa ele. Ẹbho ne bunbun da dọ rẹọ bhi Jesu nin Ebeanlẹn mhan yẹ ha rẹkhan ọlẹn.

22 Agbotu nọn ribhi Jerusalẹm da họn ebe ha sunu. Bhiriọ, ele da je Banabas ha khian Antiọk. 23 Ọle ki sẹbhi enin, ọle da daghe ebi Osẹnobulua rẹ manman mhọn ifuẹkẹ da ele yẹ. Ọnan da wo re ọle ha ghọnghọn. Ọle da ha re izebhudu nin ele, yẹ taman ele nin ele wo re ọkhọ rebhe sun rẹkhan Ebeanlẹn imhan. 24 Ọria esili Banabas ha khin, ọle da yẹ wo manman ha mhọn urẹọbhọ, bi ẹlinmhin nọn khiale. Ranmhude ebi ọle lu, ẹbho ne bunbun da wo dọ deba ene rẹkhan Ebeanlẹn mhan. 25 Banabas da ki ha khian Tasọs dọ guanọ Sọl. 26 Ọle ki miẹn ọlẹn, ọle da re ọle re bhi Antiọk. Bhi ẹkẹ ukpe ọkpa, ele da deba agbotu nọn ribhi enin ha do ikolo. Ele da yẹ ha man ẹbho ne bunbun emhin. Bhi Antiọk, ọle a da munhẹn ha tie ene edibo Kristiẹn.* Osẹnobulua hi ọnọn re obọ bhọ nọn dia iriọ.

27 Bhi ọne ẹghe nin, akhasẹ eso da na bhi Jerusalẹm vae bhi Antiọk. 28 Ẹlinmhin nọn khiale da noo ọkpa bhi ẹwẹ ele natiọle Agabọs rẹ kha akhasẹ ghe, ukhunmhun nọn khua dẹ fi bhi otọ agbọn rebhe. Ebi ọle ta da gene munsẹ bhi ẹghe nọnsi Klọdiọs. 29 Ene edibo da ki mhanmhanlẹn, nin ele rẹ re iyobọ ji ibhio ele ne ribhi Judia, beji ahu nọnsele gbe. 30 Ele da gene lu emhin nin ele mhanmhan. Ele da na obọ Banabas bi Sọl je ọle bu ene ewanlẹn.

12 Bhi egbe ọne ẹghe nin, Hẹrọd nin ojie da munhẹn ha kpokpo ene ribhi agbotu. 2 Ọle da re agbada rẹ gbe Jemis nin obhio Jọni a. 3 Ọle ki kere ebi ọle lu yẹẹ ene ibhokhan Ju, ọle da yẹ mun Pita khue. (Ẹghe Iluemhin Ọsi Ibrẹd Nọn Ihuẹ ọnan rẹ sunu.) 4 Hẹrọd da mun Pita fiọbhi ighan. Ọle da ne egbanegbe igbehan ọbhọ, nin ele re usun ọsi enẹn-enẹn ha gbega ọle. Ọle da ha mhọnlẹn bhi ọkhọle ghe, a ha lu Iluemhin ọsi Anagbera fo, ọle ki mun ọlẹn dagbare dọ bhu ọle ohiẹn bhi isira ene ẹbho. 5 Iriọ Pita rẹ ha ribhi ighan. Ọkpakinọn, ọne agbotu da wo manman ha bhii ji ọle.

6 Bhi ọne ukpasọn nọn we fiọbhi ukpẹdẹ nin Hẹrọd guanọ nọn mun ọlẹn dagbare, Pita da ha wẹ bhi adesẹ egbanegbe eva. A da re ighan gbanọ ọle obọ ba ene egbanegbe. Egbanegbe ebhebhe da yẹ mundia bhi odẹ ha gbega ọne ighan. 7 Ọkpakinọn, ẹhi nọnsi Jehova* da re osukpa vae. Ukpa da wo ha bhala bhi ọne ighan. Ọne ẹhi da re obọ so Pita bhi efẹn yẹ riọ ọle bhi owe. Ọ da taman ọlẹn yọle: “Ẹjẹje, kpanọ!” Ene ighan da fanọn si Pita bhi obọ re. 8 Ọne ẹhi da taman ọlẹn yọle: “Ne ukpọn yọ, uwẹ ha ne ibata bhi oẹ.” Pita da gene lu iriọ. Ọne ẹhi da yẹ taman ọlẹn yọle: “Re ukpọn nin uwẹ yọ ke okhun yọ, uwẹ ha rẹkhan mẹn.” 9 Pita da dagbare yẹ ha rẹkhan ọne ẹhi. Ebi ọne ẹhi ha lu da diabe ebhohiẹ bhi ẹlo nọnsọle. Ọ bha diabe emhin nọn gene ha sunu. 10 Ele da gbera ọkhẹ-odẹ nin ọhẹnhẹn, yẹ gbera ọne ọzeva. Ele da sẹbhi isi igeti nan re ẹlọnmhọn* lu, nan na diọ bhi ọne agbaẹbho. Ọne igeti nan da tuje a nin ele. Ele ki nanlẹn gbera fo, ele da rẹkhan uwedẹ ọkpa. Bhi ọne ẹghe nin, ọne ẹhi da zẹ ọle obọ. 11 Ebe sunu da ki mun Pita ẹlo kore. Ọle da yọle: “Bhi ejayenan nian, mẹn lẹnmhin ghe, Jehova* je ẹhi nọnsọle re, nọn dọ hinmhin mẹn bhi obọ Hẹrọd bi emhin rebhe nin ibhokhan Ju rẹ ha khẹ nọn sunu ji mẹn.”

12 Bhiriọ, ọle da ki ha khian uwa ọsi Meri nin inẹn Jọni nan yẹ tiọle Mak. Edibo eso da ha ribhi enin ne ha nan erọnmhọn. 13 Ọle ki so obọ bhi odẹ, Ọguọmhandia ọkpa natiọle Roda, da vae nin ọle dọ tuje odẹ a. 14 Ọne ọmanmhẹn ki họn urulu ọsi Pita, ọle da wo manman ha ghọnghọn. Ọle bha yẹ tuje ọne odẹ a, ọle da runẹ fikie diọbhi ẹkẹ uwa dọ taman ene ribhi ẹkẹ uwa ghe Pita ribhi ununro. 15 Ele da taman ọlẹn yọle: “Uhọnmhọn ẹn bha gba.” Ọkpakinọn, ọle da sẹyẹ ha yọle ghe Pita nọn. Ele da ki yọle: “Ẹhi* ọ da ha khin.” 16 Pita da sẹyẹ mundia bhi olele ha so obọ bhi odẹ. Ele ki tuje odẹ a, ele da daghe ọle. Ọ da wo han ele ilo. 17 Ọle da ki re obọ taman ele nin ele huẹan. Ọle da taman ele ebi Jehova* rẹ re ọle dagbare bhi ighan yẹ. Ọle da yẹ taman ele yole: “Bha dọ taman Jemis bi ibhio mẹn nekẹle ebe sunu.” Ọle da ki sibhi enin re ha khian agbaẹbho ọbhebhe.

18 Ẹdẹ ki we, ene egbanegbe da wo ha kpokpo egbe, ranmhude, ele bha yẹ miẹn Pita. 19 Hẹrọd da wo ha guanọ Pita na-ike-na-alo. Ọle ki kere ghe ọle bha miẹn ọlẹn, ọle da nọọn ene egbanegbe ọta, yẹ yọle nan dọ re oya nin ele. Ọle da sibhi Judia re ha khian Sizaria nin ọle dọ gbe ẹghe eso bhi enin.

20 Ẹkẹ ibhokhan Taya bi Saidọn da ha khọ Hẹrọd. Ranmhude ọnan, ene ẹbho nan da bu ọle re. Ele da ha bhii Blastọs nọn gbẹloghe ẹgua ọsi Hẹrọd nin ojie, nọn rẹkpa ele bhii Hẹrọd nọn mun ẹmhọn fia. Ele da ha bhii, ranmhude, agbaẹbho ọsi ọnojie, ọle ele da miẹn ebale nin ele le. 21 Bhi ọne ẹdẹ nan rẹyi, Hẹrọd da wo mun ukpọn ọsi ojie yọ, yẹ dotua bhi aga nin ọle da bhuohiẹn. Ọle da munhẹn ha ne ene ẹbho talọ. 22 Ene ẹbho ne sikoko da munhẹn ha so yọle: “Osẹ ne mhan talọ, ọ iyi ọria khọnkhan!” 23 Bhi ọne ẹghe nin tee, ẹhi nọnsi Jehova* da gbehẹ ọle, ranmhude, ọle bha rẹ ọne ogẹn ji Osẹnobulua. Ekhọle da le ọle a, ọle da yu.

24 Ẹbho ne bunbun da wo ha họn ọta nọnsi Jehova.* Ẹbho ne bunbun da yẹ wo ha rẹọbhọ.

25 Banabas bi Sọl ki re iyobọ nin ene ribhi Jerusalẹm fo, ele da fikiere dọ re Jọni nan yẹ tiọle Mak.

13 Ene ẹbho nan hi ene akhasẹ, bi ene ha man emhin bhi agbotu nọn ribhi Antiọk: Banabas, Simiọn nan yẹ tiọle Naija, Lushiọs nin obhi Sairini, Maniẹn nin ọle bi Hẹrọd ko yi isiku, bi Sọl. 2 Beji ele ha fi azinmin,* yẹ re oga ji Jehova,* ẹlinmhin nọn khiale da taman ele yọle: “Bha zẹ Sọl bi Banabas, nin ele dọ lu iwẹnna nọn zẹle nin mẹn da tie ele.” 3 Ele ki nan erọnmhọn yẹ fi azinmin fo, ele da ne obọ nyan ele, yẹ je ele kpanọ.

4 Ene ikpea nan nin ẹlinmhin nọn khiale je dagbare, da ha khian Selushia. Bhi Selushia, ele da nabhi okọ ha khian Saiprọs. 5 Ele ki sẹbhi Salamis, ele da munhẹn ha tẹmhọn Osẹnobulua bhi sinagọg nin ibhokhan Ju da ga. Jọni da rẹkhan ele yẹ ha rẹkpa ele.

6 Ele da nẹga ọne agbaẹbho rebhe, rẹ dọ sẹbhi Pefọs. Bhi enin, ele da miẹn obhokhan Ju ọkpa natiọle Ba-Jizọs. Akhasẹ ohoghe ọne okpea nan khin, ọbo ọle yẹ khin. 7 Ọle da ha ribhi eji gọvanọ natiọle Sajiọs Pọlọs yẹ. Okpea nọn manman lẹn emhin Sajiọs Pọlọs khin. Ọne gọvanọ nan da tie Banabas bi Sọl, ranmhude, ọle guanọ nin ọle họn ọta nọnsi Osẹnobulua. 8 Ọkpakinọn, Ẹlimas nin ọbo, (ọnin hi ebi a re elin nọnsọle ta) da ha ne ele suan, ranmhude, ọle bha guanọ nin ọne gọvanọ rẹọ bhi ọta nọnsi Osẹnobulua. 9 Ẹlinmhin nọn khiale da munhẹn ha noo Sọl, nan yẹ tiọle Pọl, ọle da kuẹlo da Ẹlimas, 10 yẹ taman ọlẹn yọle: “Uwẹ nin ọmọn nọnsi Ojuu, uwẹ nin eku bi emhin ebe rebhe vuọn ọlẹn obọ, uwẹ nin emhin esili iyẹẹ, bezẹle nin uwẹ da ha khiẹn ọta nọnsi Jehova* a? 11 Ghọle! Jehova* dẹ re oya nin uwẹ, uwẹ ki ruẹlo, uwẹ iyẹ da daghe bhi ẹghe eso.” Bhi ọne ẹghe nin tee, ebiuki da so ọle bhi ẹlo; ẹlo da bhii ọle bhi uhọnmhọn. Ọle da ha bibi khian yẹ guanọ ọria nọn ha dia ọle. 12 Ọne gọvanọ ki daghe ebe sunu, ọle da rẹọ bhi ọta nọnsi Osẹnobulua, ranmhude, iman-emhin nọnsi Jehova* wọ manman rẹso ọle.

13 Pọl bi ene ele ko ha khian da nabhi okọ bhi Pefọs ha khian Pẹga nọn ribhi Pamfilia. Ọkpakinọn, Jọni da zẹ ele obọ ha khian Jerusalẹm. 14 Ele ki sibhi Pẹga re, ele da vae bhi Antiọk nọn ribhi Pisidia. Bhi ukpẹdẹ Sabati, ele da nabhi sinagọg yẹ dotua. 15 Ẹghe nan ki rẹ tie ebe Uhi bi ebe nin ene akhasẹ gbẹn fo, ene ewanlẹn ne gbẹloghe ọne sinagọg da taman Pọl bi Banabas yọle: “Ibhio, ahamiẹn bha mhọn ọta izebhudu nin bha ha taman ene ẹbho, bha tale.” 16 Pọl da ki kpanọ mundia, yẹ re obọ taman ene ẹbho nin ele huẹan. Ọle da yọle:

“Ikpea, ibhokhan Izrẹl, bi ibha nekẹle ne mun ofẹn Osẹnobulua, bha ka mẹn ehọ. 17 Osẹnobulua ọsi Izrẹl, da zẹ aba mhan nin ẹdẹlẹ. Bhi ẹghe nin ele rẹ ha yi eriọbhe bhi otọ Ijipt, ọle da re ele kiẹn okpẹbho, yẹ re ahu* nọnsọle ne ele dagbare. 18 Bhi ẹkẹ ikpe egbọ eva* nin ele rẹ ha ribhi ẹkẹ ojẹgbo, ọle da ha ziẹngbe ele. 19 Ọle da fuẹn agbaẹbho ihinlọn an bhi otọ Kenan, yẹ mun ọne otọ nin ele. 20 Ikpe igbe nyan egbọ eva nyan iyisẹn enẹn* ene emhin nan rebhe rẹ sunu.

“Ọne ẹghe nan ki gbera, ọle da ne ebhuohiẹn nin ele, ọkuẹsẹ ẹghe nọnsi Samuẹl nin akhasẹ. 21 Bhi ẹghe nọnsi Samuẹl, ele da yọle ghe ele guanọ ojie. Osẹnobulua da re Sọl nin ọmọn nọnsi Kish, nọn nabhi ulin-uwa ọsi Bẹnjamin vae nin ele. Sọl da ha yi ojie rẹ nabhi ikpe egbọ eva.* 22 Ọle ki re Sọl sibhi ihe re, ọle da re Devid kiẹn ojie. Ọle da sọsali ọbhọ yọle: ‘Imẹn miẹn ọria nin ẹmhọn ọlẹn ti mẹn bhọ. Ọle hi Devid nin ọmọn nọnsi Jesi. Ọle dẹ lu emhin rebhe nin mẹn guanọ.’ 23 Beji Osẹnobulua vele, ọle da gene re ọria dagbare bhi ulin ọsi ọne okpea nan, nọn ha miẹn ibhokhan Izrẹl fan. Ọne ọria nan hi Jesu. 24 Ọkuẹsẹ Jesu vae, Jọni da taman ibhokhan Izrẹl rebhe ghe, ọkhẹke nin ele mianmẹn, nin ele rẹ rẹman ghe, ele fidenọ. 25 Beji Jọni ki ha muegbe nọn rẹ lu iwẹnna oga nọnsọle fo, ọle da ha taman ene ẹbho yọle: ‘Họla ibha riale mẹn khin? Mẹn iyi ọne ọria nin bha khẹ. Ọria ribhọ nọn vade! Mẹn bhọ bha sẹ ọne ha kuọ ọle ibata.’

26 “Ibhio, ibha ne na bhi ulin-uwa ọsi Ebraham vae bi ẹbho nekẹle ne mun ofẹn Osẹnobulua bhi ẹwẹ bha, bha lẹn sẹbhọ ghe Osẹnobulua je ọne uhọnmhunje ọsi umiẹnfan ji mhan. 27 Ibhokhan Jerusalẹm bi ene gbẹloghe bha lẹn ọne ọria nan. Ẹghe nin ele rẹ ha bhuohiẹn ọlẹn, ele da mun ẹmhọn nin ene akhasẹ tale sẹ—ene ẹmhọn nan tie dagbare bhi ẹdẹ Sabati rebhe. 28 Arẹmiẹn ọle bha lu emhin nọn ha re ele gbe ọle a, ele da yọle nin Pailet gbe ọle a. 29 Ele ki mun emhin rebhe nan gbẹn ọbhi otọ rẹji ọle sẹ, ele da mun ọlẹn huẹnre bhi okhun oran yẹ re ọle tọ. 30 Ọkpakinọn, Osẹnobulua da riọ ọle kpanọ bhi uu. 31 Bhi ikpẹdẹ ne bunbun, ọle da re egbe man ene ẹbho ne na bhi Galili rẹkhan ọlẹn ha khian Jerusalẹm. Ene ẹbho nan ne daghe ọle, ele ki sọsali ọbhọ nian.

32 “Ive nan ve nin aba mhan nin ẹdẹlẹ, ọle hi ọne ọta nọn mhẹn nan nin mhan wewe man bha. 33 Osẹnobulua wo mun ọne ive sẹ nin mhan nin imọn nesele. Ọle da riọ Jesu kpanọ bhi uu. Bhi uhọnmhọnlẹn nọnzi eva bhi ebe illo ogẹn, ọle da yọle: ‘Ọmọn nọnsẹmhẹn uwẹ khin; ẹlẹnan, imẹn kiẹn aba uwẹ.’ 34 Osẹnobulua da tẹmhọn nọn rẹman ghe, beji ọle riọ Jesu kpanọ fo, ọle iyẹ da kie ha mhọn egbe ọsi eria, nọn ha sabọ yu yẹ wea. Ọle da yọle: ‘Mẹn dẹ ha rẹ oyẹẹ nọn ibeghe man uwẹ, beji mẹn ve nin Devid. Ive nan ha sabọ mun udu nyan ọnan khin.’ 35 Ije ebhebhe bhi ebe illo ogẹn da yẹ yọle: ‘Uwẹ ida ji egbe ọsi ọria nọn sun rẹkhan ẹn da wea.’ 36 Devid wo lu iwẹnna nọnsi Osẹnobulua bhi ẹghe nin ọle rẹ ha ribhi agbọn. Ọkpakinọn ọle da yu. A da re ọle tọ ba aba ọle nin ẹdẹlẹ. Egbe nọnsọle da wea. 37 Bhi obọ nọnkẹle, egbe ọsi ọne ọria nin Osẹnobulua riọ kpanọ bhi uu bha wea.

38 “Ibhio, mẹn ho nin mẹn ji bha lẹn ghe, rẹ na obọ ọne ọria nan, ọle Osẹnobulua ha da rẹhunmhan olukhọ nọnsẹbha. 39 Uhi nọnsi Mozis bha sabọ re bha kiẹn eria ne khiale. Ọkpakinọn, rẹ na obọ ọne okpea nan, Osẹnobulua dẹ tie ọrebhe ne mhọn urẹọbhọ eria ne khiale. 40 Bhiriọ, bha mhọn ẹwanlẹn, nin ẹmhọn nọn ribhi ebe nin ene akhasẹ gbẹnlẹn hẹi sunu ji bha. Ẹmhọn nọn yọle: 41 ‘Ibha ne re ẹlo gbe emhin an, bha ghe emhin nin mẹn lu bhi ẹghe nọnsẹbha. Aharẹmiẹn ọria gbotọle fanọn an man bha, ibha ida rẹọbhọ. Ọkpakinọn, ọ dẹ han bha ilo, sẹyẹ bha ki fuẹn an.’”

42 Pọl bi Banabas ki ha dagbare, ene ẹbho da ha bhii ele, nin ele gbo vae ẹdẹ Sabati nọn vade dọ ta ene ẹmhọn nan. 43 A ki zobọ bhi ọne ikolo nan do bhi sinagọg, ene bunbun bhi ene ibhokhan Ju bi ene deba ibhokhan Ju ga Osẹnobulua, da rẹkhan Pọl bi Banabas. Pọl bi Banabas da ha taman ele nin ele sẹyẹ wo situa ha lu emhin nọn ha re Osẹnobulua manman mhọn ifuẹkẹ da ele.

44 Ukpẹdẹ Sabati nọn rẹkhan ọlẹn, ọrebhe bhi ọne agbaẹbho da sikoko, nin ele dọ họn ọta nọnsi Jehova.* Ikpeta ẹbho ọkpa bha ha ribhi enin. 45 Ene ibhokhan Ju ki daghe ene usun ẹbho, ele da ha mhọn oyadan.* Ele da munhẹn ha ne Pọl gbugan, yẹ re unun riia ẹmhọn nin ọle ha ta a. 46 Pọl bi Banabas da ki re izebhudu taman ele yọle: “Ibha ọkhẹke nan ka tẹmhọn Osẹnobulua man. Beji a miẹn ghe, ibha bha ka miẹn ọlẹn ọbhi egbe, sẹyẹ, ibha bha ghe egbe bha bii ene ha sabọ miẹn iẹnlẹn ọsi ighegheghe, mhan dẹ bu ene iyi ibhokhan Ju. 47 Jehova* taman imhan yọle: ‘Mẹn zẹ ibha nin bha ha yi ẹfua rẹji ene agbaẹbho. Sẹyẹ, nin bha tẹmhọn umiẹnfan na bhi ọne otọ nan rebhe.’”

48 Ene iyi ibhokhan Ju ki họn ọnan, ele da wo manman ha ghọnghọn, ele da yẹ ha re ogẹn ji Jehova* ranmhude ọta nọnsọle. Sẹyẹ, ọrebhe ne muegbe nin ele rẹ miẹn iẹnlẹn ọsi ighegheghe da rẹọbhọ. 49 Rẹ deba ọnin, ẹmhọn Jehova* da wo ha vẹ na bhi ijerebhe bhi ọne agbaẹbho. 50 Ọkpakinọn, ikhuo eso ne mun ẹmhọn oga gba bhi uhọnmhọn, bi ikpea eso nan manman lẹn bhi ọne agbaẹbho, da munhẹn ha kpokpo Pọl bi Banabas. Ele da yẹ khu ele sibhi agbaẹbho nọnsele re. Ene ibhokhan Ju, ele si ele ọbhọ. 51 Pọl bi Banabas da ki bọnmhẹn ekẹn sibhi oẹ re* bhi ọne agbaẹbho, yẹ kpanọ ha khian Aikoniọm. 52 Ene edibo da wo manman ha ghọnghọn. Ẹlinmhin nọn khiale da yẹ wo ha noo ele.

14 Pọl bi Banabas ki sẹbhi Aikoniọm, ele da nabhi sinagọg nin ibhokhan Ju da ga. Ranmhude uwedẹ nin ele rẹ talọ, usun ẹbho ne bunbun ne yi ibhokhan Ju bi ibhokhan Grik da mhọn urẹọbhọ da Osẹnobulua. 2 Ọkpakinọn, ene ibhokhan Ju ne bha rẹọ bhi ebi ele tale, da sua ẹbho ne iyi ibhokhan Ju ọbhọ nin ele ne Pọl bi Banabas ha suan. 3 Ọrẹyiriọ, ele da manman gbe ẹghe bhi enin. Ranmhude ahu nin Jehova* re nin ele, ele da ha re izebhudu rẹ talọ. Osẹnobulua da wo ha noo ele rẹ lu emhin ọhan-ilo. Ọle da re ọnan rẹman ghe, ọle re obọ ọbhi ẹmhọn ifuẹkẹ nọn khua nọnsọle, nin ele ha taman ẹbho. 4 Iwaegbea da zegbere bhi ẹwẹ ene ẹbho ne ribhi ọne agbaẹbho. Eso da deba ibhokhan Ju, enekẹle da deba Pọl bi Banabas. 5 Ibhokhan Ju, bi ene iyi ibhokhan Ju, bi ene gbẹloghe da rẹ ha guanọ nin ele re obọ oya mun Pọl bi Banabas yẹ re udo gbe ele. 6 Ọkpakinọn, ẹbho da dọ taman ele. Bhiriọ, ele da nẹgbe diọbhi Listra bi Dẹbi bhi agbaẹbho ọsi Likaonia, bi agbaẹbho ne nẹga ọle. 7 Ele da wo ha wewe ọne ọta esili bhi ene agbaẹbho nan.

8 Okpea ọkpa da ha ribhi Listra. Ijan ọkpa ọle ye ranmhude ọle isabọ khian. A biẹ ọle akhun. 9 Ọne okpea nan da ha ka Pọl ehọ beji ọle ha talọ. Pọl da ghe ọne okpea ẹlo, yẹ kere ghe, ọne okpea rẹọ bhi ebi ọle ha ta, sẹyẹ, ọle rẹọbhọ ghe ọle dẹ sabọ re egbe daan ọlẹn. 10 Pọl da ki taman ọlẹn yọle: “Kpanọ mundia.” Bhiriọ, ọne okpea da san kpanọ, yẹ munhẹn ha khian. 11 Ene ẹbho ki daghe ebi Pọl lu, ele da re urolo Likaonia reso, ele da yọle: “Ene osẹ mun akpa ọsi eria yọ bu mhan re!” 12 Ele da ha tie Banabas Zus* yẹ ha tie Pọl Hẹmis,* ranmhude, ọle hi ọnọn manman ha talọ. 13 Aluẹbọ ọsi Zus sikẹ igeti ọsi ọne agbaẹbho, bhiriọ, ohẹn ọsi Zus da muno ẹmena bi ukparu nan re aroro lu re bhi igeti ọsi ọne agbaẹbho. Ọne ohẹn da ha guanọ nin ọle bi ene ẹbho re ene emhin rẹ zọese ji Pọl bi Banabas.

14 Ọkpakinọn, Banabas bi Pọl ki họn ọnan, ele da nyanghan ukpọn nọnsele a, yẹ runẹ nabhi ẹwẹ ene usun ẹbho. Ele da ha yọle: 15 “Ẹbholo, bezẹle nin bha da ha lu ene emhin nan? Eria khọnkhan bii ibha mhan khin. Ẹmhọn Osẹnobulua mhan dọ taman bha, beji bha ha da re obọ sibhi ene emhin ne bha kiọnlẹn nan re, yẹ dọ ha ga Osẹnobulua nọn nyẹnlẹn. Ọle hi ọnọn man otọ bi okhun, okpẹdẹ bi emhin rebhe ne ribhọ. 16 Bhi ẹghe nọn gbera, ọle da re otọ nin ene agbaẹbho rebhe rẹ ha lu ebe ghọn ele. 17 Ọkpakinọn, ọle da re emhin esili nin ọle ha lu rẹ rẹman unan ọria nin ọle khin. Ọle da ji amẹn da ha rọ nin bha, yẹ ji ebi bha kọle da kiọnlẹn. Ọle da yẹ re ebale nin bha le sẹbhi ọkhọnlẹn, beji bha ha da ha ghọnghọn.” 18 Arẹmiẹn Pọl bi Banabas ta ọnan, ọ da wo manman nọghọ ele ọkuẹsẹ ele sabọ mun ene ẹbho mhọn nin ele hẹi zọese ji ele.

19 Ọkpakinọn, ibhokhan Ju eso da na bhi Antiọk bi Aikoniọm vae dọ hiẹ ene usun ẹbho. Ene usun ẹbho da re udo gbe Pọl yẹ sua ọle dagbare bhi ọne agbaẹbho. Ele da ha riale ghe ọle yu. 20 Ọkpakinọn, ẹghe nin ene edibo rẹ bu ọle re, ọle da kpanọ yẹ nabhi ẹkẹ ọne agbaẹbho. Ẹdẹ ki we, ọle bi Banabas da kpanọ ha khian Dẹbi. 21 Ele ki tẹmhọn Osẹnobulua fo bhi ọne agbaẹbho, yẹ re ẹbho eso kiẹn edibo, ele da fikie ha khian Listra bi Aikoniọm bi Antiọk. 22 Ele da re izebhudu nin ene edibo ne ribhi enin. Ele da taman ele nin ele mun oga mhọn nọnsẹn. Ele da yẹ taman ele yọle: “Mhan dẹ miẹn ekpokpo ne bunbun, ọkuẹsẹ mhan nabhi Agbejele nọnsi Osẹnobulua.” 23 Ele da zẹ ẹbho ne ha yi ewanlẹn bhi ene agbotu kẹkẹ. Ele da nan erọnmhọn yẹ fi azinmin. Ele da mun ele Jehova* bhi obọ, ranmhude ọle ele ga.

24 Ele da na otọ Pisidia ha khian Pamfilia, 25 Ele ki tẹmhọn Osẹnobulua fo bhi Pẹga, ele da ha khian Atalaya. 26 Bhi enin, ele da nabhi okọ fikie ha khian Antiọk nọn ribhi Siria. Enin a da ka mun ọne iwẹnna itẹmhọn Osẹnobulua nan nin ele, yẹ bhii Osẹnobulua nọn manman mhọn ifuẹkẹ nọn khua da ele. Ele ki miẹn ọne ẹsọn fo nian.

27 Ele ki sẹbhi enin, ele da si ọrebhe ne ribhi ọne agbotu koko, yẹ taman ele emhin rebhe nin Osẹnobulua noo ele rẹ lu. Ele da yẹ taman ele ghe, Osẹnobulua re isẹhoa nin ene agbaẹbho rẹ dọ ha ga ọle. 28 Ele da manman bue bhi eji ene edibo ye.

15 Ejayenan nian, edibo eso da na bhi Judia vae dọ ha taman ibhio ele yole: “Ahamiẹn ibha bha ruẹ beji uhi nọnsi Mozis tale, ibha ida sabọ miẹn umiẹnfan.” 2 Pọl bi Banabas ki zẹ ne ele gbugan, a da mhanmhanlẹn nin Pọl bi Banabas bi ẹbho eso bu ene etuegbe bi ene ewanlẹn ne ribhi Jerusalẹm nin ele dọ zilo nyan ọne ẹmhọn.

3 Ibhio ele bhi agbotu ki hoho* ele sẹ uwedẹ, ele da rẹkhan Finishia bi Sameria. Ele da ha tẹmhọn ebi ẹbho ne ribhi ẹkẹ agbọn rẹ dọ ha ga Osẹnobulua yẹ. Ọnan da wo manman re ene edibo ha ghọnghọn. 4 Ele ki sẹbhi Jerusalẹm, agbotu nọn ribhi enin, bi ene etuegbe, bi ene ewanlẹn, da wo miẹn ele ọbhi egbe. Pọl bi Banabas da taman ele emhin kẹkẹ nin Osẹnobulua noo ele rẹ lu. 5 Ọkpakinọn, eso bhi ẹwẹ ele ne ka rẹ ha yi ibhokhan Farisi, ne ki dọ rẹọbhi Jesu da kpanọ mundia yẹ yọle: “Ọkhẹke nin ele ha ruẹ, ọ yẹ khẹke nan taman ele nin ele ha re obọ rẹkhan uhi nọnsi Mozis.”

6 Bhiriọ, ene etuegbe bi ene ewanlẹn da do ikolo nin ele rẹ zilo nyan ọne ẹmhọn. 7 Ele ki zẹ gbugan, Pita da kpanọ mundia, yẹ yọle: “Ibhio, bha lẹnmhin ghe, rẹ na ẹghe ọhẹnhẹn, ọle Osẹnobulua rẹ zẹ imẹn bhi ẹwẹ bha, beji a da miẹn rẹ na obọ imẹn, ene agbaẹbho ki sabọ họn ọne ọta nọn mhẹn yẹ ha mhọn urẹọbhọ. 8 Sẹyẹ, Osẹnobulua nọn lẹn ebe ri ọria bhi ọkhọle da sọsali ọbhi ọnan. Ọle da re ẹlinmhin nọn khiale nin ele, beji ọle yẹ rẹ re nin mhan. 9 Ẹlo nin ọle rẹ ghe mhan ọle yẹ rẹ ghe ele. Ọle da kpe ọkhọle nọnsele khia ranmhude urẹọbhọ nin ele dọ ha mhọnlẹn. 10 Be ki zẹ nin bha da ha dọnmhẹn Osẹnobulua? Bezẹle nin bha da ha khun ihẹ nin ele—ihẹ nọn bha fo mhan bi aba mhan nin ẹdẹlẹ rẹ mun? 11 Mhan rẹọbhọ ghe, beji mhan rẹ miẹn umiẹnfan ranmhude ifuẹkẹ nọn khua nin Jesu nin Ebeanlẹn mhan mhọn da mhan, iriọ ele yẹ rẹ miẹn umiẹnfan.”

12 Bhiriọ, ele rebhe da huẹan. Ele da ha kaehọ beji Banabas bi Pọl ha tẹmhọn ebi Osẹnobulua rẹ noo ele rẹ lu emhin ọhan-ilo kẹkẹ yẹ bhi ẹwẹ ene agbaẹbho. 13 Ele ki talọ fo, Jemis da yọle: “Ibhio mẹn, bha ka mẹn ehọ. 14 Beji mhan họnlẹn, Simiọn taman mhan ebi Osẹnobulua rẹ ye ẹbho ne iyi ibhokhan Ju re, bi ebi Osẹnobulua rẹ zẹ ẹbho bhi ẹwẹ ele yẹ, nin ọle ha tie elin nọnsọle mun. 15 Ẹmhọn nin ene Akhasẹ gbẹnlẹn bhọ re obọ bhi ọnan. Ebenọnkhiale da yọle: 16 ‘Ene emhin nan ha ki gbera, mẹn ki fikie dọ khua ibọkpọ* nọnsi Devid okhun, nọn rẹ siẹn sotọ. Mẹn ki bọn ọlẹn yẹ re ọle ọi nọnsẹn, 17 beji a ha da miẹn ene kẹre bi ẹbho ne ribhi ene agbaẹbho ki re ọkhọle rebhe guanọ Jehova.* Ele hi ẹbho nan tie elin nọnsẹmhẹn mun. Imẹn nin Jehova,* nọn lu ene emhin nan ta ọnan. 18 Rẹ na otọ ha de mẹn rẹ zẹ nin mẹn rẹ lu ene emhin nan.’ 19 Bhiriọ, ebi mẹn ha ta bhi ọne ẹmhọn nan, ọle hi ghe, ọ dẹ ha mhẹn sade mhan bha re emhin nọghọ ene ẹbho ne na bhi ene agbaẹbho vae dọ ha ga Osẹnobulua. 20 Ọkpakinọn, nin mhan gbẹn ji ele, nin ele re egbe nẹ bhi emhin nan rẹ ze ji ẹbọ, aranlẹn, oghẹ,* bi elanmhẹn nan bha da ọle aranlẹn. 21 Rẹ na otọ ha de, ẹbho wo ha ribhọ ne ha tẹmhọn Mozis rẹ na bhi agbaẹbho rẹ sẹ bhi agbaẹbho, ranmhude, ukpẹdẹ Sabati rebhe a rẹ tie ẹmhọn nin ọle gbẹn man ẹbho bhi sinagọg.”

22 Bhiriọ, ene etuegbe, bi ene ewanlẹn, bi ọrebhe ne ribhi ọne agbotu da zẹ nin ele rẹ je ikpea bhi ẹwẹ ele rẹkhan Pọl bi Banabas ha khian Antiọk. Ele da zẹ Sailas bi Judas na yẹ tiọle Basabas. Enan hi ene mun ọkalo bhi ẹwẹ ene edibo. 23 Bhi ọne ebe nin ele gbẹn re nin ele re ha khian, ele da yọle:

“Imhan nin ibhio bha, nin ene etuegbe bi ene ewanlẹn, imhan gbẹn ọne ebe nan ji bha ne iyi ibhokhan Ju, ne nyẹnlẹn bhi agbaẹbho ọsi Antiọk, Siria, bi Silisia: Bha do! 24 Mhan họn ghe, ẹbho eso bhi ẹwẹ mhan vae dọ ha taman ibha ebi mhan bha je ele. Ele ho nin ele re emhin nọghọ bha yẹ wẹghẹ urẹọbhọ nọnsẹbha a. 25 Bhiriọ, mhan da kugbe tale, nin mhan je ikpea eso ji bha, rẹ deba Banabas bi Pọl nin ẹmhọn ele ti mhan bhọ, 26 ne wo mun iẹnlẹn nọnsele ọbhi okhẹnan, ranmhude elin nọnsi Jesu Kristi nin Ebeanlẹn mhan. 27 Mhan je Judas bi Sailas bu bha, beji ele ha da yẹ re unun taman bha emhin nan gbẹn ọbhi ọne lẹta. 28 Ẹlinmhin nọn khiale rẹkpa mhan rẹ lẹn ghe, ọ bha khẹke nin mhan gbo ha khun ihẹ mun nin bha. Sokpan, ọkhẹke nin bha re obọ rẹkhan ene emhin nan ne lu uhọnmhọn emhin: 29 bha re egbe nẹ bhi emhin nan rẹ ze nin ẹbọ, aranlẹn, oghẹ,* bi elanmhẹn nan bha da ọle aranlẹn. Ahamiẹn bha re egbe nẹ bhi ene emhin nan, emhin ki kiọnlẹn nin bha. Egbe fu bha re!”

30 A ki je ele kpanọ fo, ele da diọbhi Antiọk. Ele ki sẹbhi enin, ele da tie ọne usun rebhe koko, yẹ re ebe nan gbẹn ji ele nin ele. 31 Ele ki tie ọne ebe fo, ele da wo manman ha ghọnghọn, ranmhude, ọ ko ele udu re. 32 Judas bi Sailas ne yẹ yi akhasẹ da re izebhudu nin ele. Ele da wo ta ọta ne bunbun rẹ re ikoudure nin ele. 33 Ele ki zẹ gbe ẹghe eso bhi enin, ene edibo da gbe ọkinbue nin ele, yẹ je ele kpanọ ha khian Jerusalẹm. 34* —— 35 Sokpan, Pọl bi Banabas da yẹ ha ribhi Antiọk. Ele bi ibhio ele ne bunbun da ha man emhin, yẹ wewe ẹmhọn ọta esili nọnsi Jehova.*

36 Ikpẹdẹ eso ki gbera, Pọl da taman Banabas yọle: “Ji mhan* fikie rẹnẹ ji ibhio mhan ne ribhi ene agbaẹbho kẹkẹ nin mhan da wewe ẹmhọn Jehova,* beji mhan ha da lẹn ebi ele ki ha khian yẹ.” 37 Banabas da wo ha guanọ nin ọle re Jọni nan yẹ tiọle Mak rẹkhan egbe. 38 Ọkpakinọn, Pọl bha ka nọn rẹkhan ele, ranmhude, ẹghe nọn ka rẹ rẹkhan ele, ọle bha deba ele dọ lu ọne iwẹnna. Ọ da zẹ ele obọ bhi Pamfilia. 39 Ọnan da wo si ovan re bhi ẹwẹ ele, rẹ sẹbhọ ghe, ele da van egbe obọ. Banabas da re Mak rẹkhan egbe; ele da nabhi okọ ha khian Saiprọs. 40 Pọl da zẹ Sailas. Ene edibo ki nan erọnmhọn ji Jehova* fo nọn gbẹloghe ọle,* ọle da kpanọ. 41 Ọle da rẹkhan Siria bi Silisia, ele da ha re izebhudu nin ene agbotu ne ribhi enin.

16 Pọl da sẹbhi Dẹbi. Ọle da yẹ sẹbhi Listra. Odibo ọkpa natiọle Timoti da ha ribhi enin. Obhokhan Ju inẹn ọlẹn khin. Ọkpa bhi edibo nesi Jesu inẹn ọlẹn yẹ khin, ọkpakinọn, aba ọle da ha yi obhokhan Grik. 2 Ene edibo ne ribhi Listra bi Aikoniọm da wo manman tẹmhọn Timoti nọnsẹn. 3 Pọl da yọle ghe, ọle ho nin ọle re Timoti rẹkhan egbe. Bhiriọ, ọle da re ọle dọ ruẹ ọle, ranmhude ene ibhokhan Ju ne ha ribhi ene agbaẹbho lẹnmhin ghe obhokhan Grik aba ọle khin. 4 Beji ele rẹ na bhi ene agbaẹbho kẹkẹ khian, ele ki ha taman ele uhi nin ene etuegbe bi ene ewanlẹn ne ribhi Jerusalẹm gbe ọbhi otọ, beji ele ha da re obọ rẹkhan ọlẹn. 5 Ọnan da wo re urẹọbhọ ọsi ene ribhi agbotu ha ziẹn ọbhọ. Rẹ deba ọnin, ele da ha bun ọbhọ ukpẹdẹ-ukpẹdẹ.

6 Ele da ki diọbhi agbaẹbho ọsi Frijia bi Galesha. Ẹlinmhin nọn khiale bha ji ele da wewe ọne ọta nọn mhẹn bhi agbaẹbho ọsi Esia. 7 Ẹghe nin ele rẹ sẹbhi Misia, ele da rẹ ha ho nin ele nabhi Bitinia, ọkpakinọn, ẹlinmhin nọnsi Jesu bha ji ele da nabhọ. 8 Bhiriọ, ele da gbera Misia diọbhi Troas. 9 Bhi ọsasọn, Pọl da miẹn imianlo. Okpea ọkpa nin obhokhan Masẹdonia da wo ha taman ọlẹn yọle: “Vae bhi Masẹdonia nin uwẹ dọ rẹkpa mhan.” 10 Beji ọle miẹn ọne imianlo fo, mhan da muegbe nin mhan rẹ ha khian Masẹdonia. Mhan da rẹọbhọ ghe, Osẹnobulua, ọle guanọ nin mhan diọbhi enin nin mhan dọ wewe ọne ọta esili man ẹbho ne ribhi enin.

11 Bhiriọ, mhan da nabhi okọ bhi Troas rẹgbodẹ ha khian Samotres. Ẹdẹ ki we, mhan da diọbhi Niapolis. 12 Mhan da na bhi enin diọbhi Filipai, nọn yi agbaẹbho kpataki bhi otọ Masẹdonia. Mhan da gbe ikpẹdẹ eso bhi ọne agbaẹbho nan. 13 Bhi ukpẹdẹ Sabati, mhan da dagbare bhi igeti ọsi ọne agbaẹbho. Mhan da diọbhi eji ikhuo eso da sikoko bhi egbe ẹdẹ. Mhan da rẹ ha riale eji a da nan erọnmhọn nọn. Mhan ki sẹbhi enin mhan da dotua, yẹ munhẹn ha tẹmhọn Osẹnobulua man ene ikhuo. 14 Okhuo ọkpa natiọle Lidia, nọn na bhi agbaẹbho ọsi Tayataira vae, da ha ribhi enin. Ukpọn nọn pọpo ọle khiẹn,* sẹyẹ, Osẹnobulua ọle ga. Ọle da ha kaehọ. Sẹyẹ, Jehova* da taan ọlẹn ọkhọle a nin ọle rẹ re ehọ bhi ebi Pọl ha ta. 15 Ẹghe nin ọle bi azagba-uwa nọnsọle ki rẹ mianmẹn, ọle da taman mhan yọle: “Ahamiẹn bha ghe mẹn bii ọria nọn ga Jehova,* bha vae dọ debhi isẹmhẹn an.” Ranmhude uwedẹ nin ọle rẹ ha lẹlẹ mhan, mhan da rẹkhan ọlẹn ha khian uwa.

16 Ẹghe ọkpa nin mhan rẹ ha khian eji a da nan erọnmhọn, obhokhan okhuo ọkpa nin ẹlinmhin-ebe noo da bu mhan re. Ene nyan ọlẹn re ọle khuan igho, ranmhude, ọle sabọ tare ebe ha sunu bhi ẹghe odalo. 17 Ọne obhokhan okhuo nan da wo rẹkhan mhan bi Pọl. Ọle da ha so yọle: “Eguọmhandia nesi Osẹnobulua nọn Ke Okhun Nẹ ene ikpea nan khin. Sẹyẹ, ẹmhọn nọn ha re umiẹnfan nin bha ele wewe man bha.” 18 Inian ọle wo ha lu rẹ nabhi ikpẹdẹ ne bunbun. Egbe ọle da sha lọ Pọl, ọle da denọ ẹlo da ọne ọmanmhẹn, yẹ taman ọne ẹlinmhin yọle: “Bhi elin nọnsi Jesu Kristi, mẹn taman uwẹ, dagbare bhi egbe nọnsọle.” Ọne ẹlinmhin da wo si ọle bhi egbe re bhi ọne ẹghe nin tee.

19 Ẹghe nin ene nyan ọne obhokhan okhuo ki rẹ kere ghe, ele iyẹ da sabọ ha rẹ ọle khuan igho, ele da mun Pọl bi Sailas, yẹ si ele mun ha khian ughele* bhi eji ene gbẹloghe ye. 20 Ele ki muno ele sẹbhi enin, ele da taman ene gbẹloghe yọle: “Ene ikpea nan wo ha si ozughu rẹ bhi agbaẹbho nọnsẹmhan. Ibhokhan Ju ele khin. 21 Ele dọ ha man emhin ne bha diẹn mun uhi nọnsẹmhan. Ibhokhan Rom mhan khin. Ọ iyi uwedẹ nin ele rẹ lu emhin mhan rẹ lu emhin.” 22 Ene usun ẹbho da hẹ da ele. Ene gbẹloghe da yọle nan nyanghan ukpọn si ele bhi egbe re, yẹ dọ re asan gbe ele. 23 Ele ki gbe ele fo, ele da muno ele fiọbhi ẹkẹ ighan, yẹ taman ọnọn gbẹloghe ighan nọn gbega ele nọnsẹn, ne hẹi nẹgbe. 24 Ranmhude a ta ọnan man ọlẹn, ọle da muno ele ọbhi ighan nan manman gbega, yẹ khan ele oẹ bhi aban.*

25 Ọkpakinọn, bhi ọsasọn ogiziẹn, Pọl bi Sailas da ha nan erọnmhọn. Ele da yẹ ha so illo rẹ gẹn Osẹnobulua. Ene onighan da ha ka ele ehọ. 26 Bhi ọne ẹghe nin, otọ da mun vẹ a. Ayotọ ọsi ọne ighan da mun lueghe. Bhiriọ ene odẹ rebhe da wo tuje a. Sẹyẹ, ighan nan rẹ gba obọ bi oẹ ọsi ene onighan rebhe da fanọn kua. 27 Ẹghe nin ọne ọria nọn gbẹloghe ọne ighan ki rẹ riọ bhi owe, ọle da kere ghe, odẹ ọsi ene ighan rebhe tuje a. Ọle da ha riale ghe, ene onighan nẹgbe, bhiriọ, ọle da yo agbada nọnsọle a, nin ọle rẹ gbe egbe ọle a. 28 Pọl da reso taman ọlen yọle: “Mhan ribhi enan, hẹi kuan egbe ẹ!” 29 Bhiriọ, ọne okpea da yọle nan mun orukpa nanlẹn. A ki mun nanlẹn fo, ọle da jẹje diọbhi ighan nin Pọl bi Sailas ye, ọle da dediguẹ bhi odalo ele, ọle da ha guọ. 30 Ọle da ne ele dagbare, yẹ nọọn ele yọle: “Ewanlẹn, be imẹn ha lu, nin mẹn da sabọ miẹn umiẹnfan?” 31 Ele da taman ọlẹn yọle: “Mhọn urẹọbhọ da Jesu nin Ebeanlẹn mhan, uwẹ bi azagba-uwa nọnsẹ ki miẹn uhọnmhọn.” 32 Ele da ki tẹmhọn Jehova* man ọlẹn, ọle bi ene ribhi azagba-uwa nọnsọle. 33 Ọle da ne ele kpanọ bhi ọne ọsasọn nin dọ kpe ele itẹ. Sẹyẹ, ọle bi azagba-uwa nọnsọle da jẹje mianmẹn. 34 Ọle da ne ele re bhi uwa nọnsọle, yẹ mun ebale ele bhi otọ. Ọle bi azagba-uwa nọnsọle da wo ha ghọnghọn, ranmhude, ele ki wo dọ rẹọ bhi Osẹnobulua.

35 Ẹdẹ ki we, ene gbẹloghe da je unakpa bu ọle nin ele dọ taman ọlẹn yọle: “Fan ene ikpea nin fia” 36 Ọnọn gbẹloghe onighan da dọ taman Pọl yọle: “Ene gbẹloghe yọle nin mẹn fan bha veva fia. Bha dagbare dọ ha khian, egbe fu bha re.” 37 Pọl da ki taman ene unakpa yọle: “Arẹmiẹn ibhokhan Rom mhan khin, ele da gbono mhan bhi ughe, yẹ muno imhan fiọbhi ighan, arẹmiẹn mhan bha gbobọra uhi soso.* Ejayenan nian, ele ho nin ele dọ do ne mhan kpanọ bhi ighan. Heye o! Ji ele tobele vae dọ ne mhan dagbare.” 38 Ene unakpa da dọ taman ene gbẹloghe ebi Pọl tayẹ. Ofẹn da wo ha mun ele ẹghe ne ele rẹ họn ghe, ibhokhan Rom Pọl bi Sailas khin. 39 Ele ki da vae dọ bhii ele. Ele ki ne ele dagbare fo, ele da taman ele nin ele sibhi agbaẹbho nọnsele re. 40 Ele ki sibhi ọne ighan re, ele da ha khian uwa ọsi Lidia. Ele ki miẹn ibhio ele, ele da re izebhudu nin ele yẹ kpanọ.

17 Ele da rẹkhan agbaẹbho ọsi Amfipolis bi Apolonia vae bhi Tẹsẹlonaika, bhi sinagọg nin ibhokhan Ju da ga. 2 Beji Pọl ka lu khẹ, ọle da bu ibhokhan Ju bhi ẹkẹ ọne sinagọg. Bhi ikpẹdẹ Sabati ea, ọle da ha noo Ebenọnkhiale rẹ ne ele zilo. 3 Ọle da ha gbotọle fanọn an, yẹ re eje kẹkẹ bhi ẹkẹ ọle rẹ re otọle man ele, ghe, emhin nọn khẹke nọn nin Kristi rẹ loya, sẹyẹ, nan rẹ riọ ọle kpanọ bhi uu. Ọle da ha yọle: “Jesu, ọle hi ọne Kristi nin mẹn tẹmhọnlẹn man bha.” 4 Ranmhude ọnan, eso bhi ẹwẹ ele da dọ rẹọbhọ, ele da yẹ dọ ne Pọl bi Sailas ha muobọ. Ibhokhan Grik ne bunbun ne ga Osẹnobulua bi ikhuo eso nan manman lẹn da yẹ deba ele.

5 Ranmhude ọnan, ẹkẹ da ha khọ ene ibhokhan Ju nekẹle. Ele da dọ tie ikpea ne imhẹn re bhi eji a da do ẹki. Ele da re ene ikpea si ozughu ọbhi ọne agbaẹbho. Ele da gbe odẹ a na Jesin bhi uwa. Ele da ha guanọ nin ele ne Pọl bi Sailas dagbare nin ene usun ẹbho. 6 Beji ele ki kere ele bha miẹn ele, ele da mun Jesin bi edibo eso ji ene gbẹloghe. Ele da ha taman ele yọle: “Ene ikpea ne si ozughu bhi otọ agbọn rebhe vae bhi enan. 7 Jesin da ne ele nabhi uwa. Ene ikpea nan ire obọ rẹkhan uhi ọsi Siza. Ele yọle ghe, ojie ọbhebhe ribhọ natiọle Jesu.” 8 Ene usun ẹbho bi ene gbẹloghe ki họn ọnan, ẹkẹ da wo riia ele a. 9 Jesin bi edibo nekẹle ki ha igho nan hian ele le fo, ele da ji ele da kpanọ.

10 Ẹjẹje, bhi ọne ọsasọn nin, ene edibo da je Pọl bi Sailas kpanọ ha khian Bẹria. Ele ki sẹbhi enin, ele da ha khian sinagọg ọsi ene ibhokhan Ju. 11 Ẹbho ne ribhi Bẹria da wo manman taan ọkhọle a gbera ene ribhi Tẹsẹlonaika. Ele da wo re ọkhọle miẹn ebi ele họnlẹn ọbhi egbe. Ele da wo ha luẹ Ebenọnkhiale ukpẹdẹ-ukpẹdẹ, beji ele ha da lẹn si ẹmhọanta ene emhin nan khin. 12 Bhiriọ, ẹbho ne bunbun bhi ẹwẹ ele da dọ ha mhọn urẹọbhọ. Ikhuo eso nan manman mun ekpẹn nan, ne yi ibhokhan Grik, bi ikpea eso ne yi ibhokhan Grik da yẹ ha mhọn urẹọbhọ. 13 Ẹghe nin ene ibhokhan Ju ne ribhi Tẹsẹlonaika rẹ họn ghe, Pọl vae bhi Bẹria dọ ha tẹmhọn Osẹnobulua, ele da vae dọ ha sua ene ẹbho ọbhọ nin ele ha ne ene edibo suan. 14 Ranmhude ọnan, ene ibhio mhan da jẹje je Pọl kpanọ dọ nabhi okọ, ọkpakinọn, Sailas bi Timoti da sẹyẹ debhi enin a. 15 Ene a je rẹkhan Pọl da re ọle sẹbhi Atẹns. Pọl ki taman ele fo nin ele taman Sailas bi Timoti nin ele kẹ bu ọle re, ele da kpanọ.

16 Ẹghe nin Pọl rẹ ha khẹ ele bhi Atẹns, ọle da daghe ghe, ẹbọ wo vuọn eje rebhe bhi ọne agbaẹbho. Bhiriọ, ẹkẹ da wo riia ọle a. 17 Ọle da ki diọbhi sinagọg dọ munhẹn ha ne ibhokhan Ju bi ẹbho nekẹle ne ga Osẹnobulua zilo. Sẹyẹ, ẹdẹ-ẹdẹ bhi eji a da do ẹki, ọle ki ha ne ẹbho nin ọle miẹn zilo. 18 Ọkpakinọn, ibhokhan Ẹpikurọs bi ekhẹn Stọik eso da munhẹn ha nanlẹn gbugan. Eso bhi ẹwẹ ele da ha yọle: “Be ọne okpea nan nọn nyanagban kuẹ tẹmhọnlẹn?” Enekẹle da ha yọle: “Ọ diabe ẹmhọn osẹ nin mhan bha lẹn ọle tẹmhọnlẹn.” Ranmhude ẹmhọn Jesu bi ẹmhọn ariọkpanọ ọsi Jesu nin Pọl ha wewe, ọle zẹle nin ele da ha ta ọnan. 19 Ele da ki re ọle ha khian Ariopagọs.* Ele da taman ọlẹn yọle: “Mhan ho nin mhan lẹn otọ ọne iman-emhin ọsọgbọn nan nin uwẹ man, 20 ranmhude, emhin nin mhan bha sẹ ka họn khẹ, ọle ene emhin nan nin uwẹ tẹmhọnlẹn khin. Mhan ho nin mhan lẹn ebi ele mundia nan.” 21 Bhi ọsi ẹmhọanta, ọ wo yẹẹ ibhokhan Atẹns, bi erunmhunyẹn ne ribhi enin rẹ ha re ẹghe nọnsele rẹ gbokha, yẹ kaehọ okha nin ele bha sẹ ka họn khẹ, sade ele iyẹ mhọn iwẹnna bhi obọ. 22 Pọl da mundia bhi adesẹ ọne ikotu,* yẹ yọle:

“Ibhokhan Atẹns, mẹn daghe ọle ghe, bha manman mun ofẹn osẹ kẹkẹ. Ọ diabe ibha mun ofẹn ele gbera ẹbho nekẹle. 23 Bhi ọsi ijiẹmhin, ẹghe nin mẹn rẹ ha gbera, mẹn da gbẹlokotọ ha ghe emhin kẹkẹ nin bha ga. Mẹn bhọ da daghe ukhuo-izọese nan gbẹn ene ẹmhọn nan ọi, ‘Ukhuo-izọese Nan Bọn Nin Osẹ Nan Bha Lẹn.’ Ọne Osẹ nin ibha bha lẹn nan nin bha ga, ọle mẹn tẹmhọnlẹn man bha. 24 Ọle hi Osẹnobulua nọn man ọne agbọn nan bi emhin rebhe ne ribhọ. Ọle hi ọnọn nyan otọ bi okhun. Ọle inyẹnlẹn bhi uwa oga nan re obọ bọn. 25 Ọle ikhẹ ọria soso nọn lu emhin nanlẹn, ranmhude, emhin soso iribhọ nin ọle imhọnlẹn. Ọle bhọ hi ọnọn re emhin rebhe nin mhan, rẹ sẹbhi iẹnlẹn bi ohiẹnhiẹn. 26 Rẹ na obọ okpea ọkpa nin ọle manlẹn, ọle agbaẹbho rebhe ne nyẹnlẹn bhi ọne otọ nan na vae. Ọle da mhanmhan ẹghe nin emhin kẹkẹ ha rẹ sunu, yẹ tare eji eria ha nyẹnlẹn sẹ bhi ọne otọ nan. 27 Osẹnobulua guanọ nin ẹbho guanọ ọlẹn. Ele ha dọnmhegbe rẹ guanọ ọlẹn, ele ki miẹn ọlẹn, ranmhude ọle bha ree bhi eji ọdeọde bhi ẹwẹ mhan ye. 28 Ọle hi ọnọn zẹle nin mhan da ribhi agbọn, nin mhan da nyẹnlẹn, yẹ khian nẹga. Ibhokhan nesẹbha ne gbẹn ebe bhọ yọle: ‘Imọn nesọle mhan khin.’

29 “Bhiriọ, beji a miẹn ghe, imọn nesi Osẹnobulua mhan khin, ọ bha khẹke nin mhan ha riale ghe, Osẹnobulua diabe amanzẹ nan re igolu la isiliva la udo rẹ man. Ọ bha yẹ khẹke nin mhan ha riale ghe, ọle diabe emhin nọn hi ki rẹ khin nin ọria ria bhi ọkhọle yẹ man. 30 Bhi ọsi ẹmhọanta, Osẹnobulua re ẹlo gbera emhin nin ẹbho lu bhi ẹghe nin ele bha sẹ rẹ lẹn ọlẹn. Ejayenan nian, ọle taman ẹbho rebhe bhi ijerebhe nin ele fidenọ. 31 Ranmhude, ọle re ọne ukpẹdẹ yi nin ọle ha rẹ bhuohiẹn ọne agbọn nan rebhe, rẹ na obọ okpea ọkpa nin ọle zẹle. Ọle da riọ ọne okpea nan kpanọ bhi uu, nin ọle rẹ rẹman ọrebhe ghe, ọne ukpẹdẹ nan dẹ gene vae.”

32 Ẹghe nin ele ki rẹ họn ghe, ọle tẹmhọn ariọkpanọ bhi uu, eso bhi ẹwẹ ele da munhẹn ha jiẹ ọle. Enekẹle da yọle: “Ẹdẹ ọbhebhe uwẹ ha ki gbo tẹmhọn ọnan man mhan.” 33 Bhiriọ, Pọl da kpanọ zẹ ele obọ. 34 Ọkpakinọn, ikpea eso da rẹkhan Pọl yẹ kiẹn edibo nesi Jesu. Ọkpa bhi ẹwẹ ele hi Daonisiọs. Ọbhuohiẹn ọle khin bhi ikotu ọsi Ariopagọs.* Okhuo ọkpa natiọle Damaris bi ẹbho ebhebhe da yẹ rẹkhan Pọl.

18 Pọl ki sibhi Atẹns re, ọle da ha khian Kọrint. 2 Bhi enin, ọle da miẹn obhokhan Ju ọkpa natiọle Akuila. Obhokhan Pọntọs ọne okpea khin. Ọle bi okhuo ọle nin Prisilia wo la na bhi Itali vae, ranmhude, Klọdiọs yọle nin ibhokhan Ju rebhe sibhi Rom re. Ọle da bu ọne okhuo bi ọdọ. 3 Ranmhude iwẹnna ọkpa ele ko lu, ọle da debhi isi ele a, yẹ deba ele ha wẹnna. Ibọkpọ ele do. 4 Bhi ukpẹdẹ Sabati rebhe, ọle ki ha re ọta man* bhi sinagọg, beji ọle ha da rẹkpa ibhokhan Ju bi ibhokhan Grik rẹ fi ọkhọle denọ.

5 Sailas bi Timoti ki na bhi Masẹdonia vae, Pọl da wo re ẹghe nọnsọle rebhe rẹ ha tẹmhọn Osẹnobulua man ene ibhokhan Ju, nin ọle rẹ rẹman ele ghe Jesu hi Kristi. 6 Sokpan, ene ẹbho da sẹyẹ ha ne Pọl suan, yẹ re unun ji ole. Ranmhude ọnan, ọle da bọnmhẹn ukpọn nọnsọle a, ye yọle: “Aranlẹn nọnsẹbha ri bha bhi uhọnmhọn. Obọ mẹn khia bhi egbe bha. Rẹ na bhi ọne ẹghe nan rẹ ha khian, ene iyi ibhokhan Ju mẹn ha ki bu.” 7 Bhiriọ, ọle da sibhi ọne sinagọg re. Ọle da diọbhi uwa ọsi okpea ọkpa natiọle Tishiọs Jọstọs, nin uwa nọnsọle sikẹ sinagọg. Ọria nọn ga Osẹnobulua ọne okpea nan khin. 8 Ọkpakinọn, Krispọs nin ọwanlẹn nọn gbẹloghe ọne sinagọg bi azagba-uwa nọnsọle da rẹọ bhi Jesu nin Ebeanlẹn mhan. Sẹyẹ, ibhokhan Kọrint ne bunbun ne họn ọne ọta nọn mhẹn da rẹọbhọ yẹ mianmẹn. 9 Bhi ọsasọn, Pọl da miẹn imianlo. Bhi ọne imianlo, Ebeanlẹn mhan da taman ọlẹn yọle: “Hẹi ji ofẹn mun uwẹ rẹ ha tẹmhọn Osẹnobulua. Wo ha tale, hẹi gue unun, 10 ranmhude, imẹn ne ẹ dia. Ọria soso ida kuan ẹn, la re obọ oya mun ẹn. Mẹn sẹyẹ mhọn ẹbho ne bunbun bhi ọne agbaẹbho nan, nin mẹn ha rẹ kiẹn ọsẹmhẹn.” 11 Bhiriọ, ọle da gbe ukpe ọkpa bi uki ehan bhi enin. Ọle da ha man ene ẹbho ẹmhọn Osẹnobulua.

12 Ẹghe nin Galio rẹ ha yi gọvanọ ọsi agbaẹbho ọsi Akea, ene ibhokhan Ju da mun okhọn bu Pọl. Ele da mun ọlẹn bu Galio bhi eji ọ da bhuohiẹn. 13 Ele da taman ọlẹn yọle: “Ọne okpea nan wo ha taman ẹbho nin ele ha ga Osẹnobulua bhi uwedẹ nọn bha diẹn mun uhi nọnsẹmhan.” 14 Ọkpakinọn, Pọl ki ho nọn talọ re, Galio da taman ene ibhokhan Ju yọle: “Ahamiẹn ghe emhin ọbe ọne okpea nan gene lu, la emhin nọn gbuhi a ọle lu, mẹn dẹ gbehọkotọ ka bha ehọ nọnsẹn. 15 Sokpan, ahamiẹn ghe ẹmhọn uhi nọnsẹbha, elin, bi ikpọta kẹkẹ bha gbugan ọlẹn, bha dọ tobọbha talọ bhọ. Mẹn imhọn obọ bhi ẹmhọn ne sẹ iriọ.” 16 Bhiriọ, ọle da vẹ ele kua. 17 Ele da ki mun Sọstẹnis nin ọwanlẹn nọn gbẹloghe ọne sinagọg. Ele da munhẹn ha gbe ọle bhi odalo ojukhuo ọsi Galio. Ọkpakinọn, Galio bha fiehọ bhọ.

18 Pọl ki gbe ikpẹdẹ eso bhi enin, ọle da gbe ọkinbue nin ene edibo yẹ nabhi okọ ha khian Siria. Akuila bi Prisilia da rẹkhan ọlẹn. Bhi Sẹnkria, ọle da gbẹn eto nọnsọle a, ranmhude, ive nin ọle ve ji Osẹnobulua. 19 Ele ki sẹbhi Ẹfẹsọs, Pọl da ze enekẹle obọ bhi enin, ọle da nabhi sinagọg dọ ha ne ibhokhan Ju zilo. 20 Ele rẹ ha taman ọlẹn nọn sẹyẹ ne ele zẹbue, ọle bha ka. 21 Ọle da gbe ọkinbue nin ele, yẹ taman ele yọle: “Ọ a ha yi iho nọnsi Jehova,* mẹn dẹ kie bu bha re.” Ọle da nabhi okọ sibhi Ẹfẹsọs re. 22 Ọle da ki vae bhi Sizaria. Ọle da ka dọ tuẹ agbotu nọn ribhi Jerusalẹm, ọle kuẹ na bhi enin ha khian Antiọk.

23 Ọle ki gbe ẹghe eso bhi enin fo, ọle da kpanọ. Ọle da ha na ije kẹkẹ bhi otọ Galesha bi Frijia. Ọle da ha re izebhudu nin ene edibo.

24 Obhokhan Ju ọkpa natiọle Apọlọs, nọn na bhi otọ Alẹzandria vae, da vae bhi Ẹfẹsọs. Ọne okpea wo manman guẹ ebi a rẹ talọ yẹ. Ọle da yẹ manman lẹn ẹmhọn ne ribhi Ebenọnkhiale. 25 A ka man ọne okpea nan ẹmhọn Jehova.* Ẹlinmhin nọn khiale da wo re ọle ha mhọn ọhubhudu. Ọle da wo ha man ẹbho ẹmhọanta rẹji Jesu. Ọkpakinọn, imianmẹn nin Jọni lu, ọle ọkpa ọle lẹn ẹmhọn ọlẹn. 26 Ọle da wo re izebhudu ha tẹmhọn Osẹnobulua bhi sinagọg. Ẹghe nin Akuila bi Prisilia ki rẹ họn ebi ọle ha ta, ele da si ọle kẹ egbe, yẹ manman gbe otọ ẹmhọn nọnsi Osẹnobulua fanọn an man ọlẹn nọnsẹn. 27 Apọlọs ki yọle ọle ho nin ọle ha khian Akea, edibo ne ribhi Ẹfẹsọs da gbẹn ebe ji edibo ne ribhi enin rẹ taman ele nin ele miẹn ọlẹn ọbhi egbe nọnsẹn. Ẹghe nin ọle ki rẹ sẹbhi enin, ọle da wo manman rẹkpa ene dọ kiẹn edibo ranmhude ifuẹkẹ nọn khua nin Osẹnobulua mhọn da ele. 28 Ọle da wo manman re ọhubhudu ha talọ bhi ogbakha. Ọle da rẹman ghe iman-emhin ọsi ibhokhan Ju bha gba. Ọle da re ẹmhọn ne ribhi Ebenọnkhiale rẹ rẹman ẹbho ghe Jesu hi Kristi.

19 Bhi ẹghe nin ene emhin nan rẹ ha sunu, beji Apọlọs ha ribhi Kọrint, Pọl da khian na bhi agbaẹbho kẹkẹ vae bhi Ẹfẹsọs. Ọle da miẹn edibo eso bhi enin. 2 Ọle da nọọn ele yọle: “A be re ẹlinmhin nọn khiale nin bha, ẹghe nin bha rẹ kiẹn edibo?” Ele da wanniẹn ọlẹn yọle: “Mhan bha sẹ ka họn ẹmhọn ẹlinmhin nọn khiale khẹ.” 3 Ọle da ki nọọn ele yole: “Imianmẹn nela ibha lu?” Ele da yọle: “Ọsi Jọni.” 4 Pọl da yọle: “Jọni re amẹn nin ẹbho, nin ele rẹ rẹman ghe, ele fidenọ. Ọle da ha taman ẹbho nin ele mhọn urẹọbhọ da ọnọn vade. Ọne ọria nin hi Jesu.” 5 Ele ki họn ọnan, ele da mianmẹn bhi elin nọnsi Jesu nin Ebeanlẹn mhan. 6 Pọl ki ne obọ nyan ele, ẹlinmhin nọn khiale da na ele bhi egbe. Ele da munhẹn ha zẹ urolo kẹkẹ, yẹ kha akhasẹ. 7 Itue igbeva ene ikpea rebhe khin.

8 Bhi ẹkẹ uki ea, Pọl da wo ha vae bhi sinagọg dọ ha re izebhudu tẹmhọn Osẹnobulua. Ọle da ha re ọta man yẹ wo re egbe rebhe re ne ele zilo ẹmhọn Agbejele nọnsi Osẹnobulua. 9 Sokpan, ẹghe nin ẹbho eso ne bha ka rẹọ bhi ebi ọle ta, ki rẹ ha re unun riia ọne Uwedẹ Ẹmhọanta man ene ẹbho, ọle da sibhi ẹwẹ ele re, yẹ ne ene edibo sibhi enin re. Ukpẹdẹ-ukpẹdẹ, ọle da ha re ọta man bhi udede uwa nọn ribhi isiku ọsi Tairanus. 10 Ikpe eva ọle lu ọnan na. Ranmhude ọnan, ẹbho rebhe ne nyẹnlẹn bhi otọ Esia, rẹ sẹbhi ibhokhan Grik bi ibhokhan Ju, da họn ọta nọnsi Osẹnobulua.

11 Osẹnobulua da wo ha noo Pọl rẹ lu emhin ọhan-ilo kẹkẹ, 12 rẹ sẹbhọ ghe, ẹbho ha ne ukpọn nin Pọl diẹn bhi akun bi ukpọn ebhebhe nin ọle noolo ji eria ne khọnmhọn, emianmhẹn ki si ele bhi egbe re. Ẹlinmhin-ebe ki yẹ si ele bhi egbe re. 13 Ọkpakinọn, ibhokhan Ju eso ne yẹ yo agbaẹbho kẹkẹ dọ ha khu ẹlinmhin-ebe si ẹbho bhi egbe re, da ha guanọ nin ele noo elin nọnsi Jesu nin Ebeanlẹn mhan rẹ khu ẹlinmhin-ebe si ẹbho bhi egbe re. Ele ki ha taman ẹlinmhin-ebe yọle: “Dagbare bhi elin nọnsi Jesu nin Pọl tẹmhọnlẹn.” 14 Imikpea ihinlọn ọsi okpea ọkpa natiọle Siva, ele ha lu ọnan. Ọkpa bhi ohẹn ne khua ọsi ibhokhan Ju ọne okpea nan khin. 15 Ẹghe ọkpa nin ele ha lu ọnan, ọne ẹlinmhin-ebe da wanniẹn ele yọle: “Mẹn lẹn Jesu, mẹn yẹ lẹn Pọl, ọkpakinọn, mẹn bha lẹn bha. Hebhọ bha khin?” 16 Ọne okpea nin ẹlinmhin-ebe noo da dekhun ele. Ọle da mun ele ọkpa-ọkpa, yẹ muno ele gbe ọbhi otọ. Ọle da kuan ele. Eban-eban ele ki rẹ nẹ sibhi ọne uwa re. 17 Ibhokhan Ju rebhe bi ibhokhan Grik ne nyẹnlẹn bhi Ẹfẹsọs da họn ebe sunu. Ofẹn da wo ha mun ele rebhe. Ẹbho da wo manman mun ekpẹn nin elin nọnsi Jesu ne Ebeanlẹn mhan. 18 Ene bunbun bhi ene dọ mhọn urẹọbhọ da Jesu ki wo dagbare dọ ta emhin ebe nin ele lu man ọrebhe bhi ogbakha. 19 Ẹbho ne bunbun ne rẹ ha lu ilọnmhọn idunan da koko ebe nesele ne dagbare, yẹ tuẹ ele a bhi isira ọrebhe. Ele ki lolo eka igho nin ene ebe khin, ele da kere ghe ọ sẹbhi igho isiliva uli igbe nyan egbọ eva.* 20 Inian ọta nọnsi Jehova* rẹ wo ha vẹ na bhi ijerebhe, yẹ manman ha mhọn ahu.

21 Ene emhin nan ki sunu fo, Pọl da taman egbọle ghe, ọle ha nẹga otọ Masẹdonia bi Akea fo, ọle dẹ ha khian Jerusalẹm. Ọle da yọle: “Mẹn ha sibhi enin re, mẹn ki ha khian Rom.” 22 Bhiriọ, ọle da je eva bhi eria ne rẹkpa ọle ha khian Masẹdonia. Timoti bi Ẹrastọs ọle je. Ọkpakinọn, ọle da sẹyẹ ha ribhi otọ Esia bhi ẹghe eso.

23 Bhi ọne ẹghe nin, udede ẹmhọn da zegbere ranmhude ọne Uwedẹ Ẹmhọanta. 24 Ojogun* ọkpa natiọle Dẹmitriọs, nọn re isiliva rẹ lu ikuẹkuẹ aluẹbọ ọsi Atemis, sẹ wo rẹkpa ene ele ko wẹnna rẹ miẹn elele nọn khua. 25 Ọle da tie ele bi ojogun nekẹle ne lu iwẹnna nọn sẹ iriọ. Ọle da taman ele yọle: “Ikpea, bha lẹnmhin ghe, mhan wo manman miẹn elele bhi ọne iwẹnna nan. 26 Ibha bha be họn? Ibha bha be daghe ebi Pọl lu bhi Ẹfẹsọs bi otọ Esia rebhe? Ọle lẹlẹ ẹbho ne bunbun ọbhọ nin ele rẹ rẹọ bhi emhin ọbhebhe. Ọle taman ele ghe osẹ nan re obọ man ọ iyi osẹ ọsi ẹmhọanta. 27 Bhi ọbhi ẹghe khere nian, ẹbho dẹ ha re unun riia ọne iwẹnna nọnsẹmhan nan an. Ele iyẹ da ha ghe uwa oga ọsi Atemis nin ẹbọ* nọn khua bii emhin soso. Ẹghenin, ẹbho iyẹ da ha mun ekpẹn nin ọne osẹ nan ga bhi otọ Esia rebhe bi ọne otọ nan rebhe.” 28 Ene ikpea ki họn ọnan, ohu da wo manman re ele. Ele da munhẹn ha so yọle: “Osẹ nọn khua Atemis nin osẹ ọsi ibhokhan Ẹfẹsọs khin!”

29 Ozughu da ha ribhi ọne agbaẹbho rebhe, ene ẹbho rebhe da vẹ nabhi eji a da ghe ughe. Ele da si Geyọs bi Aristakọs rẹkhan egbe. Ibhokhan Masẹdonia ne rẹkhan Pọl yo okhian, ọle Geyọs bi Aristakọs khin. 30 Pọl da rẹ ha guanọ nin ọle bu ene ẹbho, ọkpakinọn, ene edibo bha ji ọle da ha khian. 31 Eria eso ne yi imọẹ ọle bhi ẹwẹ ene mhọn obọ bhi igemu* bi iluemhin, bhọ da je uhọnmhọn ji ọle, rẹ taman ọlẹn nin ọle hẹi dọnmhẹn nabhi eji a da ghe ughe. 32 Ene ẹbho da wo ha so, eso da ta ọkpa, enekẹle da ta ọbhebhe. Ozughu da ha ribhi ẹwẹ ele. Bhi ọsi ẹmhọanta, ene bunbun bhi ẹwẹ ele bhọ bha lẹn ebezẹle nin ele da vae bhi enin. 33 Ele da ki re Alẹzẹnda dagbare, ene ibhokhan Ju. Ele suasua ọle dagbare. Alẹzẹnda da re obọ taman ene ẹbho nin ele de urulu re. Ọle da ha guanọ nin ọle ne ele talọ. 34 Ọkpakinọn, ele ki lẹn ghe, obhokhan Ju ọle khin, ele rebhe da kugbe ha so yọle: “Osẹ nọn khua Atemis nin osẹ ọsi ibhokhan Ẹfẹsọs khin!” Ele da so na bhi uriagogo eva.

35 Ọne ọwanlẹn nọn re emhin khian bhi ọne agbaẹbho, ki sha sabọ luọle nin ene ẹbho huẹan, ọle da yọle: “Ibhokhan Ẹfẹsọs, a bha miẹn ọria nọn bha lẹn ghe, agbaẹbho ọsi Ẹfẹsọs, ọle gbẹloghe aluẹbọ ọsi Atemis nin osẹ nọn khua bi ọne amanzẹ nọn nabhi okhun dere. 36 Beji a miẹn ọrebhe ki ka lẹn ọnan, bha hẹi yẹ kpokpo egbe, bha re ekpẹn-ekpẹn lu emhin. 37 Ene ikpea nan nin bha mun re bhi enan bha re unun riia ẹbọ* nọnsẹmhan an, ele bha yẹ do emhin ne bhi aluẹbọ nesẹmhan. 38 Bhiriọ, ahamiẹn Dẹmitriọs bi ibo ọle mhọn ọria nin ele bi ele ko mhọn ẹmhọn, imhan mhọn ikotu bi gọvanọ; ne ele dọ tie ele ẹzọ bhi enin. 39 Ọkpakinọn, ahakimiẹn ghe, ọ iyi ọnin bha guanọ, ene gbẹloghe ki tie ikolo rẹ talọ bhọ. 40 Bhi ọsi ẹmhọanta, ebi mhan lu ẹlẹnan dẹ sabọ mun mhan ọbhi ẹmhọn, a dẹ sabọ yọle mhan sọtẹ. Ranmhude, emhin iribhọ nin mhan ha yọle ghe ọle zẹle nin mhan da si ozughu ẹlẹnan.” 41 Ọle ki talọ fo, ọle da taman ene ẹbho ne ha rie.

20 Ene ẹbho ki zẹbibi fo, Pọl da datie ene edibo. Ọle da re izebhudu nin ele, yẹ gbe ọkinbue nin ele. Ọle da kpanọ ha khian Masẹdonia. 2 Ọle ki nẹga idunmhun ne ribhi otọ Masẹdonia fo, yẹ manman re izebhudu nin edibo ne ribhi enin, ọle da ha khian Gris. 3 Ọle da gbe uki ea bhi Gris. Ẹghe nin ọle ki rẹ ha ho nin ọle nabhi okọ kpanọ ha khian Siria, ọle da họn ghe ibhokhan Ju mhanmhanlẹn nin ele rẹ gbe ọle a. Ranmhude ọnan, ọle da rẹkhan odẹ Masẹdonia fikie. 4 Ẹbho eso da rẹkhan ọlẹn, ene ẹbho nan hi, Sọpeta nin ọmọn nọnsi Pirọs nọn nabhi Bẹria vae, Aristakọs bi Sẹkọndọs nin obhi Tẹsẹlonaika, Geyọs nin ọbhi agbaẹbho ọsi Dẹbi, bi Timoti. Tikikọs bi Trofimọs ne nabhi agbaẹbho ọsi Esia vae da yẹ rẹkhan ọlẹn. 5 Ene ikpea nan da ke odalo nin mhan dọ mundia khẹ mhan bhi Troas. 6 A ki lu Iluemhin Ọsi Ibrẹd Nọn Ihuẹ fo, mhan da nabhi okọ bhi Filipai ha bue ele khian bhi Troas. Ikpẹdẹ isẹn mhan gbe bhi uwedẹ. Mhan da gbe ikpẹdẹ ihinlọn bhi enin.

7 Ukpẹdẹ ọhẹnhẹn ọsi ọne uzana, bhi ẹghe nin mhan rẹ sikoko nin mhan le ebale, Pọl da munhẹn ha ne ene ẹbho talọ. Ọle da talọ nabhi ọsasọn ogiziẹn, ranmhude, ọle dẹ kpanọ zẹ ele obọ sade ẹdẹ we. 8 Orukpa ne bunbun da ha ribhi ugha nin mhan ha ye bhi okhun ọne uwa igedege. 9 Usẹn obhokhan ọkpa natiọle Yutikọs da dotua bhi windo beji Pọl ha talọ. Owe da re ọle bhi enin. Ọle da nabhi enin de. Obọ nọnzi ea bhi ọne igedege ọle na de. Ẹghe nin ene ẹbho rẹ dọ mun ọle kpanọ, ele da kere ghe ọ yu fo. 10 Ọkpakinọn, Pọl da na okhun ọne uwa huẹnre. Ọle da nowẹ nyan ọne obhokhan yẹ kinọn mun ọlẹn. Ọle da taman ene ẹbho yọle: “Bha hẹi yẹ kpokeke, ọne obhokhan ribhi agbọn.” 11 Pọl da fikie diọbhi okhun ọne uwa, yẹ munhẹn ha le ọne ebale. Ọle da sẹyẹ ne ele zilo rẹ dọ sẹbhi ẹdẹwe. Ẹdẹ ki we, ọle da kpanọ. 12 Ene ẹbho da re ọne obhokhan ha khian uwa. Ele da wo manman ha ghọnghọn ghe, a riọ ọle kpanọ bhi uu.

13 Mhan da dọ nabhi okọ ha khian Asọs. Enin mhan ha da mun Pọl beji ọle taman mhan, ranmhude, oẹ ọle guanọ nin ọle rẹ ha khian Asọs. 14 Ọle ki ke mhan re bhi Asọs, mhan da mun ọlẹn. Mhan da ha khian Mitilini. 15 Ẹdẹ ki we, mhan da sibhi enin re, mhan da sẹbhi Kiọs. Bhi ukpẹdẹ nọnzi eva, mhan da sẹbhi Semọs. Ukpẹdẹ nọnzi ea mhan da sẹbhi Mailitọs. 16 Pọl bha muegbe nọn rẹ mundia bhi Ẹfẹsọs, ranmhude, ọle bha ho nin ọle gbe ẹghe soso bhi otọ Esia. Ọle da wo ha tua, ranmhude, ọle ho nin ọle sẹbhi Jerusalẹm bhi ukpẹdẹ Iluemhin ọsi Pẹntikọst.

17 Ọkpakinọn, bhi ẹghe nin ọle rẹ ha ribhi Mailitọs, ọle da je uhọnmhọn ji ene ewanlẹn ne ribhi agbotu nọn ribhi Ẹfẹsọs ne bu ọle re. 18 Ele ki bu ọle re, ọle da taman ele yọle: “Bha lẹn ebi mẹn rẹ ne bha ha lu emhin yẹ rẹ na bhi ukpẹdẹ ọhẹnhẹn nin mẹn nabhi otọ Esia. 19 Mẹn da wo re idegbere ha wẹnna nin Ebeanlẹn mhan. Mẹn da ha ribhi akhiẹ. Mẹn da yẹ wo miẹn ọnọghọ kẹkẹ bhi egbe, ranmhude emhanmhan ọbe nin ibhokhan Ju mhanmhan da mẹn. 20 Bha lẹnmhin ghe, imẹn bha zobọ bhọ rẹ ha taman bha ene emhin ne ha rẹkpa bha. Mẹn da wo ha man bha emhin bhi ogbakha bi rẹ na bhi ukuwa rẹ sẹbhi ukuwa. 21 Mẹn da wo manman tẹmhọn Osẹnobulua man ibhokhan Ju bi ibhokhan Grik, beji ele ha da fidenọ bu Osẹnobulua re, yẹ dọ ha mhọn urẹọbhọ da Jesu nin Ebeanlẹn mhan. 22 Ejayenan nian, beji ọne ẹlinmhin rẹ dia mẹn, mẹn khian Jerusalẹm, arẹmiẹn mẹn bha lẹn ebe ha sunu ji mẹn bhi enin. 23 Emhin ọkpa nin mẹn lẹnlẹn, ọle hi ghe, bhi agbaẹbho nin mẹn hi rẹ sẹ, ẹlinmhin nọn khiale ki wo ha rẹman mẹn ghe, ọnọghọ kẹkẹ khẹ mẹn, sẹyẹ, a dẹ mun mẹn khue. 24 Bhi ọsẹmhẹn, ọ iyi iẹnlẹn nọnsẹmhẹn ebe lu uhọnmhọn emhin nẹ. Ebe lu uhọnmhọn emhin nẹ, ọle hi nin mẹn rẹ ga sotọ, yẹ miẹnsọn nin Jesu nin Ebeanlẹn mhan mun nin mẹn. Ọne ẹsọn hi, nin mẹn rẹ manman taman ẹbho ọne ọta nọn mhẹn rẹji ifuẹkẹ nọn khua nọnsi Osẹnobulua.

25 “Ọria soso iribhi ẹwẹ bha nin mẹn tẹmhọn Agbejele man, nọn ha kie miẹn mẹn. 26 Ọnan zẹle nin mẹn da tie bha ẹlẹnan, nin bha sọsali ọbhọ ghe, aranlẹn ọsi ọria soso iri mẹn bhi obọ. 27 Ranmhude, ẹghe rebhe mẹn wo rẹ ha taman bha adia nọnsi Osẹnobulua. A bha miẹn ebi mẹn bha taman bha. 28 Bha gbẹlokotọ bhi egbe bha. Bha yẹ gbẹlokotọ bhi egbe ene ihuan nin ẹlinmhin nọn khiale zẹ bha nin bha ha gbẹloghe. Bha ha sun agbotu nọnsi Osẹnobulua—agbotu nin ọle re aranlẹn nọnsi Ọmọn nọnsọle rẹ dẹ. 29 Mẹn lẹnmhin ghe mẹn ha kpanọ fo, eria ne lu emhin bii elanmhẹn ne tuakọn* dẹ nabhi ẹwẹ bha. Ele ki ha re obọ oya rẹ mun ihuan nesi Osẹnobulua. 30 Sẹyẹ, eria eso dẹ zegbere bhi ẹwẹ bha. Ele ki ha man iman-emhin ohoghe, beji ele ha da si ene edibo sibhi agbotu re vae bhi ibo nọnsele.

31 “Bhiriọ, bha ha babegbe. Bha yere ghe, ikpe ea mẹn gbe bhi ẹwẹ bha. Asọn bi odanmhẹn, mẹn da ha re ibhude nin ọdeọde bhi ẹwẹ bha. Mẹn bhọ ha viẹ, ẹghe nin mẹn re ha re ibhude nin bha. 32 Ejayenan nian, mẹn mun bha bhi obọ Osẹnobulua bi ọta nọnsọle nọn tẹmhọn ifuẹkẹ nọn khua nin ọle mhọnlẹn. Ọne ota nin dẹ sabọ rẹkpa bha rẹ deziẹn, yẹ rẹkpa bha rẹ miẹn ọne uku nin ene khiale ha miẹn. 33 Mẹn bha miẹn ọria soso isiliva, la igolu, la ukpọn. 34 Ibha tobọbha lẹnmhin ghe, obọ mẹn imẹn rẹ ha wẹnna rẹ gbẹloghe egbe mẹn bi eria ne rẹkhan mẹn. 35 Mẹn wo re emhin rebhe nin mẹn lu rẹ rẹman bha ghe, ọkhẹke nin bha ha wẹnna kaka rẹ rẹkpa eria ne guanọ urẹkpa. Bha yẹ ha yere ẹmhọn nin Jesu nin Ebeanlẹn mhan tale, ẹghe nin ọle rẹ yọle: ‘Ọria nọn lu ẹsele, ọle ha ghọnghọn gbera ọria nan lu ẹsele nan.’”

36 Ọle ki ta ene ẹmhọn nan fo, ọle da deba ele diguẹ yẹ nan erọnmhọn. 37 Ele rebhe da wo manman ha viẹ. Ele da mun Pọl dede, yẹ manman re unun fiofio ọle. 38 Ọ da wo manman ba ele bhi egbe ghe, ọle yọle ghe ele iyẹ da kie miẹn ọlẹn. Ele ki lu fo, ele da hoho* ọle dọ nabhi okọ.

21 Mhan ki sha sabọ ze ẹle obọ, mhan da dọ nabhi okọ. Mhan da rẹgbodẹ ha khian Kọs. Ukpẹdẹ nọnzi eva, mhan da ha khian Rods. Mhan da nabhi enin ha khian Patara. 2 Mhan ki miẹn okọ nọn ha khian Finishia, mhan da nabhọ kpanọ. 3 Mhan ki sẹbhi eji mhan da ha ghe agbaẹbho ọsi Saiprọs bhi obọ agobọ, mhan da re gbera ha khian Siria. Mhan da dọ sẹbhi Taya. Enin a ha da muno ihẹ sibhi ọne okọ re. 4 Bhi enin, mhan da dọ guanọ ene edibo. Mhan ki miẹn ele, mhan da gbe ikpẹdẹ ihinlọn bhi eji ele ye. Ranmhude ebi ẹlinmhin nọn khiale rẹman ele, ele da wo ha taman Pọl nin ọle hẹi yo Jerusalẹm. 5 Ẹghe ki sẹ nin mhan ha rẹ kpanọ, mhan da rẹgbodẹ. Ele rebhe rẹ sẹbhi ene ikhuo bi ene ibhokhan da hoho* imhan dagbare bhi ọne agbaẹbho. Mhan ki sẹbhi egbe ẹdẹ, mhan da diguẹ yẹ nan erọnmhọn. 6 Mhan ki gbe ọkinbue nin egbe fo, mhan da ha khian dọ nabhi okọ. Ele da fikie diọbhi uwa.

7 Mhan da na bhi Taya ha khian Tolemeas. Mhan ki sẹbhi enin, mhan da tuẹ ibhio mhan ne ribhi enin yẹ ne ele gbe ukpẹdẹ ọkpa. 8 Ẹdẹ ki we, mhan da kpanọ ha khian Sizaria. Mhan ki sẹ enin, mhan da ha khian uwa ọsi Filip nọn tẹmhọn Osẹnobulua. Ọkpa bhi ene ikpea ihinlọn nin ene ewanlẹn ne ribhi Jerusalẹm zẹle ọle khin. Mhan da dẹbhi isi ọle a. 9 Ọne okpea nan mhọn imikhuo enẹn ne bha sẹ bọ ọdọ.* Akhasẹ ele khin. 10 Mhan ki zẹ gbe ikpẹdẹ eso bhi enin, akhasẹ ọkpa natiọle Agabọs da nabhi Judia vae. 11 Ọle da bu mhan re. Ọle da re ugbakun nọnsi Pọl rẹ gba obọ bi oẹ nọnsọle, yẹ yọle: “Ghe ebi ẹlinmhin nọn khiale tale, ‘Inian ibhokhan Ju bhi Jerusalẹm ha rẹ gba ọne okpea nọn nyan ọne ugbakun nan. Ele ki yẹ mun ọlẹn nin ẹbho ne iyi ibhokhan Ju.’” 12 Mhan ki họn ọnan, imhan bi ẹbho ne ha ribhi enin da ha bhii Pọl nin ọle hẹi yo Jerusalẹm. 13 Pọl da ki taman mhan yọle: “Bezẹle nin bha da viẹ? Bezẹle nin bha da ho nin bha gbe imẹn ahu sotọ? Bha lẹn sẹbhọ ghe, mẹn bhọ muegbe nan rẹ mun mẹn khue, bi nan rẹ gbe mẹn an bhi Jerusalẹm ranmhude elin nọnsi Jesu nin Ebeanlẹn mhan.” 14 Mhan ki kere ghe, ọle bha muegbe nin ọle rẹ fi ọkhọle denọ, mhan da zẹ ọle obọ. Mhan da yọle: “Ji iho nọnsi Jehova* munsẹ.”

15 Ikpẹdẹ eso ki gbera, mhan da muegbe yẹ kpanọ ha khian Jerusalẹm. 16 Eso bhi edibo ne ribhi Sizaria da rẹkhan mhan. Ele da ne mhan ha khian isi Manesin nin obhi Saiprọs nin mhan dọ debhi isi ọle a. Ọkpa bhi usun edibo nin ọhẹnhẹn ọle khin. 17 Mhan ki sẹbhi Jerusalẹm, ibhio mhan ne ribhi enin da wo manman gbe obokhian nin mhan. 18 Ẹdẹ ki wẹ, Pọl da rẹkhan mhan ha bu Jemis. Ene ewanlẹn rebhe da yẹ ha ribhi enin. 19 Pọl da tuẹ ele, yẹ taman ele emhin rebhe nin Osẹnobulua lu nin ẹbho ne iyi ibhokhan Ju, rẹ na obọ iwẹnna oga nin ọle ha lu.

20 Ele ki họn ọnan, ele da wo ha gẹn Osẹnobulua. Ọkpakinọn, ele da taman ọlẹn yọle: “Obhio, uwẹ wo daghe ọle ghe, ibhokhan Ju ne bunbun dọ ha rẹkhan Jesu. Ọkpakinọn, ele sẹyẹ mun Uhi ọsi Mozis mhọn kaka. 21 Ele họn ghe, ẹbho yọle ghe, uwẹ dọ ha taman ibhokhan Ju ne ribhi agbaẹbho kẹkẹ nin ele mun uhi nọnsi Mozis fia, nin ele hẹi yẹ ruẹ imọn nesele, bi nin ele hẹi yẹ re obọ rẹkhan akerebhotọ ọsi ibhokhan Ju. 22 Ele dẹ họn ghe uwẹ vae. Be imhan ha ki khian yẹ nian? 23 Ghe ebi mhan guanọ nin uwẹ lu: Ikpea enẹn ribhi ẹwẹ mhan ne ve ive. 24 Ne ele rẹkhan egbe, bha ha dọ kpe egbe nọnsẹbha khia beji Uhi tale beji ele ha da sabọ gbẹn eto nọnsele a. Uwẹ hi ọnọn ha haosa emhin nin ele ha noo. Uwẹ ha lu ọnan, ọ ki khia bhi ẹlo ọsi ọrebhe ghe, ẹmhọanta iribhi ebi ele họn rẹji uwẹ. Ele ki lẹn ghe uwẹ wo ha lu nọnsẹn yẹ rẹ obọ rẹkhan Uhi. 25 Mhan ki ka gbẹn ebe ji ene edibo ne nabhi agbaẹbho nekẹle vae, rẹ taman ele nin ele rẹban aranlẹn, emhin nan rẹ ze nin ẹbọ, elanmhẹn nan bha da ọle aranlẹn, bi oghẹ.”*

26 Ẹdẹ ki we, Pọl bi ene ikpea da ha khian dọ kpe egbe khia. Pọl da nabhi uwa oga nin ọle dọ taman ọne ohẹn ukpẹdẹ nin ele ha kpe egbe khia fo, beji a ha da zọese nin ọdeọde bhi ẹwẹ ele.

27 Ene ikpẹdẹ ihinlọn ki khian la gba, ibhokhan Ju eso ne nabhi Esia vae, da daghe Pọl bhi uwa oga. Ele da tie ẹbho ọle bhi egbe nin ele dọ mun ọlẹn. 28 Ele da ha so yọle: “Ibhokhan Izrẹl, bha vae o! Bha dọ ghe ọne okpea nọn re unun ji ẹbho nọnsẹmhan, bi Uhi nọnsẹmhan, bi ọne uwa oga nan bhi ijerebhe. Bha ghe ọle! Ọle bhọ ne ibhokhan Grik vae bhi uwa oga nọnsẹmhan ne dọ faa ọle a.” 29 Ranmhude, ele ka daghe ọle bi Trofimọs nin obhi Ẹfẹsọs bhi ọne agbaẹbho, ele da wo ha riale ghe Pọl re ọle nabhi ẹkẹ uwa oga. 30 Ijerebhe da rughu a bhi ọne agbaẹbho. Ene ẹbho da runẹ nabhi ẹkẹ uwa oga. Ele da mun Pọl yẹ si ọle mun dagbare bhi ẹkẹ ọne uwa oga, yẹ jẹje khue ọne odẹ. 31 Bhi ọne ẹghe nan nin ele rẹ ha ho nin ele gbe ọle a, ọria da dọ taman ọwanlẹn ọsi eyokhọnlẹn ghe ẹbibi zẹ bhi Jerusalẹm. 32 Ọle da jẹje ne eyokhọnlẹn eso, yẹ ha runẹ khian enin. Ene ẹbho ki daghe ọne ọwanlẹn bi eyokhọnlẹn nesọle, ele da de obọ i, ele bha yẹ ha gbe Pọl.

33 Ọne ọwanlẹn ọsi eyokhọnlẹn da vae bhi eji Pọl ye. Ọle da mun ọlẹn, yẹ yọle nan ne ighan ọle bhi obọ veva. Ọle da nọọn ene ẹbho yọle, ‘Họbhọ ọne okpea nan? Be ọle lu?’ 34 Ọkpakinọn, ene ẹbho da ha ta emhin kẹkẹ. Ranmhude uwedẹ nin ele rẹ ha so, ọne ọwanlẹn ọsi eyokhọnlẹn bha sabọ lẹn otọ ebi ele ha ta. Ọle da ki yọle nan mun Pọl re bhi eji eyokhọnlẹn dia. 35 Pọl ki sẹbhi eji a da hẹn okhun diọbhi eji ene eyokhọnlẹn dia, ene ẹbho da ho nin ele kuan ọlẹn. Ranmhude ọnan, ene eyokhọnlẹn da gaga ọle gbera. 36 Usun ẹbho ne bunbun da vẹ rẹkhan ọlẹn ha so yọle: “Bha gbe ọle a!”

37 Ele ki ho nin ele re ọle nabhi ẹkẹ eji eyokhọnlen dia, Pọl da taman ọne ọwanlẹn ọsi eyokhọnlẹn yọle: “Mẹn dẹ sabọ ne uwẹ talọ?” Ọne okpea da yọle: “Uwẹ bhọ sabọ zẹ Grik. 38 Uwẹ ibe yi ọne obhokhan Ijipt nin, nọn sọtẹ da ene gbẹloghe, yẹ ne ikpea uli enẹn* ne re ọghale* rẹ khọnlẹn nabhi ẹkẹ ojẹgbo?” 39 Pọl da ki yọle: “Eye, obhokhan Ju mẹn khin. Tasọs nọn ribhi agbaẹbho ọsi Silisia mẹn na vae. Agbaẹbho nan manman lẹn nọn. Huẹan ji mẹn da ne ene ẹbho nan talọ.” 40 Ọne okpea ki re otọ nin Pọl rẹ talọ, Pọl da mundia bhi eji a da hẹn okhun diọbhi eji ene eyokhọnlẹn dia. Ọle da re obọ taman ene ẹbho ne de urulu re. Ene ẹbho rebhe da huẹan. Ọle da zẹ urolo Hibru rẹ taman ele yọle:

22 “Ibhio, ene ewanlẹn, huẹan, bha ka mẹn ehọ.” 2 Ele ki họn ghe, urolo Hibru ọle rẹ ha ne ele talọ, ele da manman huẹan. Ọle da ki yọle: 3 “Obhi Ju mẹn khin. Tasọs nọn ribhi Silisia a da biẹ mẹn, ọkpakinọn, Jerusalẹm imẹn da luẹ emhin bhi obọ Gameliẹ. A wo manman man imẹn emhin rebhe nin Uhi ọsi Mozis tale. Iriọ mẹn yẹ rẹ re ọyaya ha ga Osẹnobulua, beji bha yẹ wo ha lu nian. 4 Mẹn da ha kpokpo ẹbho ne ribhi ọne Uwedẹ oga nan, rẹ sẹbhọ ghe, imẹn da ha muno ele re nan gbono ele a. Mẹn da ha muno ikpea bi ikhuo fiọbhi ighan. 5 Ene ojohẹn bi ene ewanlẹn dẹ sabọ sọsali ọbhi ọnan. Mẹn bhọ da miẹn ele lẹta, nin mẹn ne ji ibhio mhan ne ribhi Damaskọs, beji mẹn ha da sabọ mun ene ribhi ọne Uwedẹ nan re bhi Jerusalẹm nan re oya nin ele.

6 “Mẹn ki ha sikẹ Damaskọs, bhi egbẹghe ọsodanmhẹn, ẹfua da wo re osukpa na bhi okhun bhaa nyan mẹn. 7 Mẹn da de ọbhi otọ. Mẹn da họn ukpuru ne mẹn talọ. Ọ da yọle: ‘Sọl, Sọl, bezẹle nin uwẹ da kpokpo imẹn?’ 8 Mẹn da nọọn ọlẹn yọle: ‘Ebeanlẹn imẹn, họla uwẹ khin?’ Ọle da taman imẹn yọle: ‘Imẹn hi Jesu nin obhi Nazarẹt, ọne uwẹ kpokpo.’ 9 Ene ikpea ne rẹkhan mẹn daghe ọne ẹfua nọn bhaa nyan mẹn, ọkpakinọn, ele bha họn ebi ọria nọn ha ne imẹn talọ ha taman imẹn. 10 Mẹn da ki nọọn ọlẹn yọle: ‘Ebeanlẹn imẹn, be imẹn ha lu yẹ?’ Ọle da taman imẹn yọle: ‘Kpanọ, nabhi Damaskọs. Uwẹ ha sẹbhi enin, a dẹ taman ẹn emhin rebhe nan mhanmhan ọbhi otọ khẹ uwẹ.’ 11 Ọne ẹfua da ru mẹn ẹlo, mẹn bha yẹ ha daghe emhin soso. Ene ikpea ne rẹkhan mẹn, ele ki re mẹn obọ mhọn nabhi Damaskọs.

12 “Bhi enin, okpea ọkpa natiọle Ananayas da bu mẹn re. Okpea nọn manman ga Osẹnobulua beji Uhi tale ọle khin. Ibhokhan Ju ne ribhi enin yẹ wo manman tẹmhọnlẹn nọnsẹn. 13 Ọle ki bu mẹn re, ọle da mundia sikẹ mẹn, yẹ taman mẹn yọle: ‘Sọl nin obhio, taan ẹlo a, kie ha daghe!’ Bhi ọne ẹghe nin tee, mẹn da tuẹn ẹlo okhun, yẹ daghe ọle. 14 Ọle da yọle: ‘Osẹnobulua ọsi aba mhan nin ẹdẹlẹ zẹ uwẹ, nin uwẹ vae dọ lẹn ihọ nọnsọle, nin uwẹ dọ daghe ọnọn khiale, yẹ họn urulu nọnsọle. 15 Ranmhude, uwẹ dẹ sọsali nanlẹn. Uwẹ dẹ taman ẹbho rebhe ebi uwẹ họnlẹn bi ebi uwẹ daghe. 16 Ejayenan nian, be uwẹ mundia khẹ? Kpanọ dọ mianmẹn. Rẹọ bhi elin nọnsi Jesu, beji a ha da kpe uwẹ khia bhi olukhọ nesẹ.’

17 “Ẹghe nin mẹn ki rẹ fikie vae bhi Jerusalẹm, mẹn da miẹn imianlo, bhi ẹghe nin mẹn rẹ ha nan erọnmhọn bhi uwa oga. 18 Mẹn da daghe Jesu. Ọle da taman imẹn yọle: ‘Jẹje sibhi Jerusalẹm re, ranmhude, ele ida rẹọ bhi ọta nin uwẹ tale rẹji mẹn.’ 19 Mẹn da yọle: ‘Ebeanlẹn imẹn, ele tobele bhọ lẹnmhin ghe imẹn hi ọnọn rẹ ha muno ẹbho ne rẹọ bhi uwẹ fiọbhi ighan, yẹ re asan gbe ele bhi sinagọg kẹkẹ. 20 Ẹghe nan rẹ ha gbe Stivin an, nọn ha sọsali nin uwẹ, mẹn da mundia sikẹ ene ha gbe ọle a, yẹ re obọ bhi ebi ele ha lu. Mẹn da ne ele ha re ẹlo ọbhi awegbe nọnsele.’ 21 Ọrẹyiriọ, ọle da taman imẹn yọle, ‘Sibhi ọne agbaẹbho nan re, ranmhude, mẹn dẹ je uwẹ bu ene iyi ibhokhan Ju, ne nyẹnlẹn bhi agbaẹbho ne bha sire.’”

22 Ọle ki ta ọne ẹmhọn nan fo, ele bha yẹ ka ọle ehọ. Ele da munhẹn ha so yọle: “Be ọria nọn sẹ inian lu bhi agbọn? Bha dọ gbe ọle a!” 23 Ene ẹbho da wo ha so, ele da ha banọn ukpọn nọnsele ne fino kua, yẹ fi ẹbubu okhun. 24 Ranmhude ọnan, ọwanlẹn ọsi ene eyokhọnlẹn da yọle nan re Pọl vae bhi eji ene eyokhọnlẹn dia. Ọle da yọle nan re asan nọọn ọlẹn ọta, beji ọle ha da lẹn ebezẹle nin ene ẹbho da ha so yọle nan gbe ọle a. 25 Ele ki gba ọle nin ele re asan gbe ọle, Pọl da nọọn ọkakulo ọkpa nọn ha ribhi enin yọle: “Ọ be khẹke nan rẹ gbe obhokhan Rom sade a bha sẹ guiẹzọ nọnsọle?” 26 Ọne ọkakulo ki họn ọnan, ọle da bu ọwanlẹn ọsi ene eyokhọnlẹn dọ taman ọlẹn yọle: “Be uwẹ ha khian ọnan yẹ nian? Obhokhan Rom ọne okpea nan khin.” 27 Bhiriọ, ọne ọwanlẹn ọsi ene eyokhọnlẹn da bu Pọl re, ọle da nọọn ọle yọle: “Obhokhan Rom uwẹ gene khin?” Ọle da yọle: “Ehe.” 28 Ọwanlẹn ọsi ene eyokhọnlẹn da yọle: “Udede igho mẹn zẹ, nan rẹ re imẹn kiẹn obhi Rom.” Ọkpakinọn, Pọl da wanniẹn ọlẹn yọle: “Ọmotọ mẹn khin.”

29 Ene ikpea ne rẹ ha guanọ ne nọọn ọlẹn ọta yẹ re oya nanlẹn, da jẹje zẹ ọle obọ. Beji ọne ọwanlẹn ọsi ene eyokhọnlẹn ki kere ghe obhokhan Rom Pọl khin, ofẹn da ha mun ọlẹn, ranmhude, ọle hi ọnọn yọle nan ne ighan ọle bhi obọ.

30 Ẹdẹ nọn rẹkhan ọlẹn, ọle da ne ighan si Pọl bhi obọ re. Ọle da tie ene ohẹn ne khua, bi ibhokhan ikotu ọsi ene Sanhẹdrin rebhe koko, ranmhude, ọle ho nin ọle lẹn ebe ene ibhokhan Ju yọle ghe Pọl lu. Ele ki sikoko, ọle da re Pọl re yẹ re ọle mundia bhi ẹwẹ ele.

23 Pọl ki denọ ẹlo da ẹbho ne ribhi ọne ikotu ọsi Sanhẹdrin, ọle da yọle: “Ibhio, rẹ sẹbhi ukpẹdẹ nin ẹlẹnan, ọkhọle igbe mẹn asan hiehie, ranmhude, ebe yẹẹ Osẹnobulua mẹn wo ha lu.” 2 Pọl ki ta ọnan, Ananayas nin ojohẹn da taman ene mundia sikẹ Pọl ne gbehẹ ọle bhi unun. 3 Pọl da taman ọlẹn yọle: “Osẹnobulua dẹ gbehẹ uwẹ, uwẹ nin egbuwa nọn gbitọn an, nan gheghe re ẹre ralọ. Uwẹ hi ọnọn dotua bhi enin ha bhuohiẹn mẹn si mẹn gbobọrauhi. Uwẹ bhọ hi ọnọn ki gbobọrauhi nin uwẹ rẹ taman ele nin ele gbehẹ mẹn.” 4 Ene mundia bhi enin da taman ọlẹn yọle: “Ojohẹn nọnsi Osẹnobulua uwẹ ghunmhun?” 5 Pọl da yọle: “Ibhio, mẹn bha lẹn ghe ojohẹn nọn. Ebenọnkhiale bhọ yọle, ‘Bha hẹi re unun ji ọnọn gbẹloghe ẹbho nesẹbha.’”

6 Ranmhude Pọl lẹn ghe, ibhokhan Farisi bi ibhokhan Sadusi ele ha ribhi ọne Sanhẹdrin, ọle da so dagbare yọle: “Ibhio, obhokhan Farisi mẹn khin, ulin-uwa ọsi Farisi mẹn na vae. Ranmhude mẹn rẹọbhọ ghe ene yu dẹ riọ kpanọ, ọle zẹle nan da ha ne imẹn gui ukpẹdẹ nin ẹlẹnan.” 7 Ranmhude ebi ọle ta, ene ibhokhan Farisi bi ibhokhan Sadusi da munhẹn ha ne egbe van. Ọne ikolo da zagha a. 8 Ibhokhan Sadusi yọle ghe, a imiẹn ariọkpanọ bhi uu, a imiẹn ẹhi, sẹyẹ, ẹlinmhin iribhọ. Ọkpakinọn, ibhokhan Farisi wo rẹọbhọ ghe,* a miẹn ele rebhe. 9 Bhiriọ, ozughu da dọ ha ribhi ẹwẹ ele. Ene man uhi bhi ẹwẹ ibhokhan Farisi da munhẹn ha gbugan yọle: “Ọne okpea nan bha miẹn ebi ọle lu. Ahamiẹn ghe ẹhi la ẹlinmhin nanlẹn talọ—.” 10 Ẹghe nin ọne ẹmhọn ki rẹ manman ha nyọn, ofẹn da ha mun ọwanlẹn ọsi ene eyokhọnlẹn, nin ele hẹi nyanọn Pọl a. Bhiriọ, ọle da je egbanegbe nin ele dọ re ọle sibhi enin re, yẹ re ọle vae bhi eji ene egbanegbe dia.

11 Asọn nọn rẹkhan ọlẹn, Ebeanlẹn mhan da bu Pọl re yẹ taman ọlẹn yọle: “Hẹi ji ofẹn mun ẹn. Beji uwẹ rẹ manman sọsali nin mẹn bhi Jerusalẹm, uwẹ dẹ yẹ sọsali nin mẹn bhi Rom.”

12 Ẹdẹ ki we, ene ibhokhan Ju da siuman. Ele da yẹ ve ihẹn ọbhọ ghe ahamiẹn ele bha gbe Pọl a fo, ele ida da, ele ida le. 13 Ọ gbera ikpea egbọ eva* ne ko si ọne uman nan yẹ ve ihẹn ọbhọ. 14 Ene ikpea nan da bu ene ohẹn ne khua bi ene ewanlẹn yẹ taman ele yọle: “Mhan ve ihẹn ghe, sade mhan bha gbe Pọl a fo, mhan ida da, mhan ida le. 15 Ejayenan nian, ibha bi ene bhuohiẹn bhi ikotu ọsi Sanhẹdrin je uhọnmhọn ji ọwanlẹn ọsi eyokhọnlẹn nin ọle re Pọl re. Bha ki man yọle bha ho nin bha kie fẹ otọ ọne ẹmhọn ghe. Ọkpakinọn, ọle kuẹ sẹbhi eji bha ye, mhan ki khẹ ọle bhi uwedẹ yẹ gbe ọle a.”

16 Ọmọn ọsi obhio Pọl nin okhuo da họn ebi ele ha mhanmhan khẹ Pọl. Bhiriọ, ọle da ha khian eji ene eyokhọnlẹn dia dọ taman Pọl. 17 Pọl da ki tie ọkpa bhi ene ọkakulo yẹ taman ọlẹn yọle: “Re ọne usẹn obhokhan nan bu ọwanlẹn ọsi ene eyokhọnlẹn. Ọle mhọn ebi ọle ho nin ọle taman ọlẹn.” 18 Ọne ọkakulo da ki re ọle bu ọwanlẹn ọsi ene eyokhọnlẹn yẹ taman ọlẹn yọle: “Pọl nin onighan yọle nin mẹn re ọne usẹn obhokhan nan bu uwẹ re, ghe ọle mhọn ebi ọle ho nin ọle taman ẹn.” 19 Ọne ọwanlẹn ọsi ene eyokhọnlẹn da re ọne obhokhan obọ, yẹ re ọle ha khian eji ẹbho iye. Ọle da nọọn ọlẹn yọle: “Be uwe ho nin uwẹ taman imẹn?” 20 Ọne usẹn obhokhan da yọle: “Ene ibhokhan Ju tale ghe, ele dẹ taman ẹn nin uwẹ re Pọl re bhi Sanhẹdrin akhọ. Ele ki man yọle ghe, ele guanọ nin ele manman nọọn ọlẹn ọta nọnsẹn. 21 Hẹi ka nin ele, ranmhude ikpea ne gbera itue egbọ eva* khẹ ọle bhi uwedẹ. Ele ve ihẹn ghe, sade ele bha gbe Pọl a fo, ele ida da, ele ida le. Ele bhọ muegbe fo, ebi uwẹ ha tayẹ ele ki khẹ.” 22 Bhiriọ, ọwanlẹn ọsi ene eyokhọnlẹn da taman ọne usẹn obhokhan yọle: “Hẹi ji ọria soso lẹn ghe, uwẹ ta ọne ẹmhọn nan man mẹn.” Ọ ki ta ọnan man ọlẹn fo, ọ da je ọle kpanọ.

23 Ọne ọwanlẹn da ki tatie ọkakulo eva yẹ taman ele yọle: “Bha ne eyokhọnlẹn iyisẹn eva,* ikpea igbe nyan egbọ ea* ne hẹn akasi,* bi ikpea iyisẹn eva* ne re opolo khọnlẹn, bha ha muegbe nin bha re ha khian Sizaria, agogo isinlin* ọsasọn nan. 24 Bha yẹ muno akasi re, nọn ha mun Pọl sẹbhi eji Fẹlis nin gọvanọ ye bhi egbehẹnẹdẹ.” 25 Ọle da yẹ gbẹn ilẹta re nin ele. Ọnan hi ebi ọle gbẹn:

26 “Fẹlis nin gọvanọ nọn khua, imẹn nin Klọdiọs Lisias gbẹn ọne ebe nan ji uwẹ. Mẹn tuẹ uwẹ ọwanlẹn! 27 Ibhokhan Ju mun ọne okpea nan. Ele da ha guanọ nin ele gbe ọle a. Ọkpakinọn, mẹn ki họn ghe obhokhan Rom ọle khin, mẹn da tuabe ne eyokhọnlẹn nesẹmhẹn dọ rẹ hinmhin ọlẹn. 28 Ranmhude mẹn guanọ nin mẹn lẹn ebi ele yọle ọle lu, mẹn da re ọle ha khian ikotu ọsi Sanhẹdrin nọnsele. 29 Imẹn da dọ kere ghe ẹmhọn nọn rẹtẹ Uhi nọnsele zẹle nin ele da ha nanlẹn gui, ghe, ọle bha lu emhin nọn zẹle nan ha da gbe ọle a la mun ọlẹn khue. 30 Ọkpakinọn, mẹn ki họn ghe ene ẹbho sẹyẹ mhanmhanlẹn nin ele rẹ gbe ọle a, mẹn da ji ọle ha vade eji uwẹ ye. Mẹn da yẹ taman ene tie ọle ẹzọ ne dọ gui ọne ẹzọ bhi eji uwẹ ye.”

31 Bhiriọ, ene eyokhọnlẹn da lu beji a taman ele. Ele da re Pọl bhi ọne ọsasọn nin, yẹ ha re ọle khian Antipatris. 32 Ẹdẹ ki wẹ, Pọl bi ene ikpea ne hẹn akasi da ha khian Sizaria. Ene eyokhọnlẹn nekẹle da fikie ha khian eji ele dia. 33 Ene ikpea ne hẹn akasi ki sẹbhi Sizaria, ele da re ọne ilẹta nin ọne gọvanọ, yẹ re Pọl bu ọle. 34 Ọle ki tie ọne ilẹta fo, ọle da nọọn Pọl idunmhun nela ọle na vae. Pọl da yọle Silisia nọn. 35 Ọle da yọle: “Ene tie uwẹ ẹzọ ha vae, mẹn dẹ wo ka uwẹ ehọ.” Bhiriọ, ọle da yọle, nan re ọle ha khian Ẹgua ọsi Hẹrọd dọ gbega ọle bhi enin.

24 Ikpẹdẹ isẹn ki gbera, Ananayas nin ojohẹn bi eso bhi ene ewanlẹn da vae bhi Sizaria. Ele da re ilọya natiọle Tẹtulọs rẹkhan egbe. Ele da dọ guiẹzọ Pọl man Fẹlis nin gọvanọ. 2 Ẹghe nan ki rẹ tie Tẹtulọs nọn gui re, ọle da yọle:

“Fẹlis nin gọvanọ nọn khua, ranmhude ẹwanlẹn nin uwẹ rẹ gbẹloghe, emhin esili ne bunbun wo zegbere bhi agbaẹbho nọnsẹmhan. Mhan yẹ wo manman mhọn ọfure. 3 Ẹghe rebhe, mhan rẹ tale, ijerebhe mhan da yẹ tale. Uwẹ obulu-obulu. 4 Ọkpakinọn, mẹn bha ho nin mẹn gbe uwẹ ẹghe. Huẹan, mhọn ifuẹkẹ da mhan, uwẹ ha re obhi ẹghe khere nin mhan rẹ taman uwẹ ebe sunu. 5 Ọria esusu ọne okpea nan khin. Ọle wo ha taman ibhokhan Ju bhi otọ ọne agbọn nan rebhe ẹmhọn nọn ha re ele sọtẹ da ene gbẹloghe. Ọle hi ọnọn sun otu ọsi ene rẹkhan Jesu nin obhi Nazarẹt. 6 Ọle da yẹ ha guanọ nin ọle faa uwa oga nọnsẹmhan an. Ọnan zẹle nin mhan da mun ọlẹn. 7* —— 8 Uwẹ ha tobuwẹ nọọn ọlẹn ọta, uwẹ dẹ kere ghe, ẹmhọanta mhan tale.”

9 Ene ibhokhan Ju da yẹ deba ọle ha re unun ji Pọl, ele da ha yọle ghe, ẹmhọanta Tẹtulọs tale. 10 Ọne gọvanọ ki yi Pọl nin ọle gui re, Pọl da yọle:

“Ọ wo manman ti mẹn bhọ ghe uwẹ imẹn ha gui man. Ranmhude ikpe ne bunbun ki nọn nian nin uwẹ mọn da bhuohiẹn bhi ọne agbaẹbho nan. 11 Ikpẹdẹ igbeva ki nọn nian nin mẹn diọbhi Jerusalẹm dọ ga. Uwẹ dẹ sabọ guanọ otọ nan fẹghe. 12 Ọria bha miẹn mẹn bhọ ghe mẹn ne ọria soso gbugan bhi uwa oga, la mẹn re ẹbho si ozughu bhi sinagọg, la bhi ẹkẹ ọne agbaẹbho. 13 Ọne emhin nan nin ele yọle mẹn lu, ele ida sabọ rẹman ẹn ghe imẹn gene lu ọle. 14 Ọkpakinọn, ẹmhọanta nọn ghe, ọne uwedẹ oga nin ele tiọle otu ọsi ene rẹkhan Jesu nin obhi Nazarẹt, ọle mẹn ye. Inian mẹn rẹ re oga ji Osẹnobulua ọsi aba imẹn nin ẹdẹlẹ. Mẹn rẹọ bhi ẹmhọn ne ribhi ebe Uhi bi ebe nin ene akhasẹ gbẹnlẹn. 15 Bọsi ene ikpea nan, mẹn rẹọbhọ ghe ariọkpanọ bhi uu dẹ ha ribhọ. Osẹnobulua dẹ riọ ene khiale bi ene bha khia kpanọ bhi uu. 16 Ranmhude ọnan, mẹn wo dọnmhegbe nin mẹn rẹ ha lu emhin ne ha re mẹn ha mhọn ọkhọle nọn khiale bhi odalo Osẹnobulua bi bhi odalo eria. 17 Ikpe ne bunbun ki gbera, mẹn da fikie vae bhi Jerusalẹm, nin mẹn ne emhin nan rẹ re iyobọ nin ẹbho nesẹmhan ji ele, bi nin mẹn dọ zọese ji Osẹnobulua. 18 Ẹghe nin mẹn rẹ ha lu ene emhin nan, ọle ele rẹ ke mẹn re bhi uwa oga. Ele wo kere ghe mẹn kpe egbe khia beji uhi tale. Ele bha ke mẹn bi usun ẹbho re; ele bha kere ghe imẹn si ozughu. Ọkpakinọn, ibhokhan Ju eso ne na bhi otọ Esia vae da ha ribhi enin. 19 Ọ rẹ khẹke nin ele ha ribhi enan, nin ele dọ tobele re unun ele ta ebi ele yọle ghe imẹn lu, sade mẹn mhọn ebi mẹn bhọ gene lu. 20 Ọ iki yi riọ, ji ene ikpea nan tobele taman ẹn emhin ebe nin ele kere bhi obọ imẹn, ẹghe nin ele rẹ guiẹzọ nọnsẹmhẹn bhi Sanhẹdrin. 21 Mẹn bha miẹn ebi mẹn lu, gbera ọne ẹmhọn nan nin mẹn tale ẹghe nin mẹn rẹ ha ribhi ẹwẹ ele. Mẹn da yọle: ‘Ranmhude mẹn rẹọbhọ ghe ene yu dẹ riọ kpanọ, ọle zẹle nan da ha ne imẹn gui ukpẹdẹ nin ẹlẹnan!’”

22 Ranmhude Fẹlis manman lẹn ẹmhọn ọne Uwedẹ Oga nan, ọle da je ele kpanọ yẹ yọle: “Lisias nin ọwanlẹn ọsi eyokhọnlẹn ha ki vae, mẹn kuẹ bhuohiẹn ọne ẹmhọn nan.” 23 Ọle da taman ọkakulo ọkpa nin ọle mun Pọl khue, ọkpakinọn, nin ọle re obhi ẹho nanlẹn rẹ ha lu emhin eso, ọle ha yẹ ji imọẹ ọle da ha gbẹloghe ọle.

24 Ikpẹdẹ eso ki gbera, Fẹlis da re okhuo ọle nin Drusila re. Obhokhan Ju okhuo ọle khin. Ọle da je nan tie Pọl re. Ele da ha kaehọ beji Pọl ha taman ele ebi a re ọle ta nan rẹ mhọn urẹọbhọ da Jesu Kristi. 25 Ọkpakinọn, Pọl ki ha tẹmhọn ikhiakhiale, imuegbe-bhi-ibẹẹ, bi ukpẹdẹ ibhuohiẹn nọn vade, ofẹn da ha mun Fẹlis. Bhiriọ, ọle da yọle: “Ha khian fo. Mẹn dẹ tie ẹ ẹdẹ ọbhebhe sade mẹn miẹn otọ.” 26 Fẹlis da yẹ ha riale ghe Pọl dẹ re igho nanlẹn. Ranmhude ọnan, ọle da ha tie ọle ẹghe-ẹghe nin ele ko zilo. 27 Ikpe eva ki gbera, Pọshiọs Fẹstọs da nabhi ihe ọsi Fẹlis. Ọkpakinọn, ranmhude Fẹlis guanọ nin ọle lu ebe ha ti ibhokhan Ju bhọ, ọle da zẹ Pọl obọ bhi ighan.

25 A ki tiọle ikpẹdẹ ea nin Fẹstọs vae bhi ọne agbaẹbho yẹ munhẹn ha gbẹloghe, ọle da na bhi Sizaria ha khian Jerusalẹm. 2 Bhi enin, ene ohẹn ne khua bi ene ikpea nan manman lẹn bhi ẹwẹ ibhokhan Ju da guiẹzọ Pọl man ọlẹn. Ele da ha bhii Fẹstọs 3 nin ọle lu ẹsele nin ele, nin ọle je nan re Pọl re bhi Jerusalẹm. Ọkpakinọn, emhanmhan nọnsele hi, nin ele rẹ khẹ Pọl bhi uwedẹ yẹ gbe ọle a. 4 Fẹstọs da taman ele ghe Sizaria ọkhẹke nin Pọl ha ye, sẹyẹ, ọle tobọle dẹ fikie ha khian enin bhi ẹghe nọn bha ree gbe. 5 Ọle da yẹ yọle: “Ahamiẹn ghe ọne okpea nan gene mhọn emhin ebe nin ọle lu, ji ene mun ọkalo bhi ẹwẹ bha rẹkhan mẹn ha khian Sizaria nin bha dọ nanlẹn guiẹzọ bhi enin.”

6 Ọle ki gbe ebe sẹ ikpẹdẹ elẹnlẹn la igbe bhi enin, ọle da fikie ha khian Sizaria. Bhi ukpẹdẹ nọn rẹkhan ọlẹn, ọle da dotua bhi eji ọle da bhuohiẹn, yẹ yọle nan re Pọl re. 7 Pọl ki vae, ibhokhan Ju ne na bhi Jerusalẹm vae da mundia nẹga ọle. Ele da wo ha ta emhin ne bunbun ọle bhi egbe. Ọkpakinọn, ele bha sabọ rẹman ghe, ẹmhọanta ebi ele tale khin.

8 Pọl da ki yọle: “Mẹn bha gbobọra Uhi ọsi ene ibhokhan Ju, mẹn bha faa uwa oga a, mẹn bha yẹ gbobọra uhi ọsi Siza.” 9 Ranmhude Fẹstọs guanọ nin ọle lu ebe ha ti ibhokhan Ju bhọ, ọle da nọọn Pọl yọle: “Uwẹ be guanọ nin uwẹ ha khian Jerusalẹm, nan sira mẹn gui ọne ẹzọ bhi enin?” 10 Pọl da yọle: “Ikotu ọsi Siza mẹn da mundia nian. Enan ọkhẹke nan da gui ọne ẹzọ nan. Mẹn bha miẹn ebi mẹn lu ibhokhan Ju le. Uwẹ tobuwẹ bhọ yẹ lẹn ọnan. 11 Ahamiẹn ọluemhiebe mẹn gene khin, ghe, imẹn lu emhin nọn sẹ nan ha da gbe mẹn an, mẹn bha yọle nan hẹi gbe mẹn an. Ọkpakinọn, ahamiẹn ghe, ẹmhọanta iribhi ene emhin nan nin ene ikpea nan ta mẹn bhi egbe, ọria iribhọ nọn ha sabọ rẹ mẹn lu ẹsele nin ele. Mẹn ho nin Siza talọ bhi ọne ẹmhọn nan!” 12 Fẹstọs bi ekhaẹmhọn nesọle ki ko zilo fo, ọle da taman Pọl yọle: “Beji a miẹn uwẹ yọle ghe uwẹ guanọ nin Siza talọ bhi ọne ẹmhọn nan, uwẹ dẹ bu Siza.”

13 Ikpẹdẹ eso ki gbera, Agripa nin ojie bi Bẹnis da vae bhi Sizaria dọ rẹnẹ ji Fẹstọs. 14 Ele ki gbe ikpẹdẹ eso bhi enin, Fẹstọs da tẹmhọn Pọl man Agripa nin ojie. Ọle da yọle:

“Okpea ọkpa ribhi enan nin Fẹlis zọbọ bhi ighan. 15 Ẹghe nin mẹn rẹ sẹbhi Jerusalẹm, ene ohẹn ne khua bi ene ewanlẹn ọsi ibhokhan Ju da tẹmhọn ọlẹn man mẹn. Ele da yọle nin mẹn bhuohiẹn gbe ọle, nan gbe ọle a. 16 Ọkpakinọn, mẹn da taman ele ghe, uhi ọsi Rom bha re obọ bhọ nan wo rẹ mun ọria re, re oya nanlẹn, sade a bha re otọ nanlẹn bi eria ne tie ọle ẹzọ rẹ ko miẹn egbe yẹ saa egbe bhi unun. 17 Ele ki vae bhi enan, mẹn bha riia ẹghe a. Ukpẹdẹ nọn rẹkhan ọlẹn, mẹn da dotua bhi eji mẹn da bhuohiẹn, yẹ yọle nan re ọne okpea re. 18 Ene ikpea nan ki kpanọ mundia ha guiẹzọ, ẹzọ nin ele gui bha rẹman ghe ọne okpea nan lu emhin ebe soso nin mẹn rẹ ha mhọn bhi ọkhọle. 19 Ẹzọ nin ele mhọn bha gbera ẹmhọn oga nọnsele bi ẹmhọn okpea ọkpa natiọle Jesu. Ọne okpea nan yu. Ọkpakinọn, Pọl wo ha tale ghe ọne okpea sẹyẹ ribhi agbọn. 20 Mẹn bha lẹn ebi mẹn ha rẹ talọ bhi ọne ẹmhọn yẹ. Bhiriọ, mẹn da nọọn ọlẹn si ọ dẹ yẹẹ ọle rẹ ha khian Jerusalẹm nan dọ talọ bhi ọne ẹmhọn bhi enin. 21 Ọkpakinọn, Pọl da yọle ghe ọle ho nin ọle debhi ighan an ha khẹ ẹghe nin Ojie Nọn Khua* ha rẹ talọ bhi ọne ẹmhọn. Bhiriọ, mẹn da yọle nin ọle ha ribhi ighan fo, ọkuesẹ mẹn je ọle ha bu Siza.”

22 Agripa ki da taman Fẹstọs yọle: “Mẹn ho nin mẹn tobomẹn họn unun ọsi ọne okpea nan.” Fẹstọs ki da taman ọlẹn yọle: “Ọle dẹ guiẹzọ man ẹn akhọ.” 23 Ukpẹdẹ nọn rẹkhan ọlẹn, Agripa bi Bẹnis da re okpẹhio nabhi eji ene ẹbho da sikoko. Ijerebhe da wo ha titi. Ewanlẹn ọsi ene egbanegbe, bi ikpea ne manman hẹn usi bhi ọne agbaẹbho da yẹ rẹkhan ele. Fẹstọs da yọle nan re Pọl re. A da gene re ọle re. 24 Fẹstọs da yọle: “Agripa nin ojie bi ẹbho rebhe ne sikoko bhi enan ẹlẹnan, bha ghe ọne okpea nan nin ibhokhan Ju rebhe bhi Jerusalẹm bi ene ribhi enan guiẹzọ ọle man mẹn. Ele wo ha so yọle nan gbe ọle a, ghe, ọ bha khẹke nin ọle ha nyẹnlẹn. 25 Ọkpakinọn, mẹn bha daghe ebi ọle lu nọn zẹle nan ha da gbe ọle a. Bhiriọ, ọle ki yọle ọle guanọ nin Ojie Nọn Khua talọ bhi ẹmhọn nọnsọle, mẹn da yọle mẹn dẹ je ọle bu ọle. 26 Ọkpakinọn, mẹn bha miẹn emhin kpataki nin mẹn ha gbẹn ọbhi otọ ji Ebeanlẹn mhan, nin mẹn ha yọle ghe ọle lu. Ọnan zẹle nin mẹn da re ọle bu bha re, manman nọn uwẹ nin Agripa nin ojie, beji a ha da miẹn ghe, bha ha ki nọọn ọlẹn ọta fo, mẹn ki miẹn ebi mẹn ha gbẹn ọbhi otọ. 27 Mẹn bha riale ghe emhin ẹwanlẹn nọn nin mẹn rẹ je onighan bu ebeanlẹn mhan, ghe, mẹn bha taman ọlẹn ebi a yọle ọle lu.”

26 Agripa da taman Pọl yọle: “Taman imhan ebe sunu.” Pọl da ki niẹn obọ a yẹ munhẹn ha talọ. Ọle da yọle:

2 “Agripa nin Ojie, ibhokhan Ju wo ta ọta ne bunbun mẹn bhi egbe. Ọkpakinọn, mẹn wo ghọnghọn ghe, uwẹ mẹn ha guiẹzọ man ẹlẹnan, 3 ranmhude, uwẹ wo manman lẹn uwedẹ nin ibhokhan Ju rẹ lu emhin, bi igbugan kẹkẹ nọn ribhi ẹwẹ ele. Bhiriọ, huẹan, ka mẹn ehọ.

4 “Ibhokhan Ju ne bunbun wo lẹn uwedẹ nin mẹn rẹ ha nyẹnlẹn, rẹ nabhi egbe obhokhan ha de, rẹ dọ sẹbhi ẹghe nin mẹn rẹ ha ribhi Jerusalẹm. 5 Ẹbho rebhe ne lẹn mẹn dẹ sabọ sọsali ọbhọ ghe, usun ne ire ẹmhọn oga nọnsẹmhan khiẹn hiehie ọle imẹn deba. Farisi mẹn ha khin. 6 Ejayenan nian, ranmhude mẹn rẹọbhọ ghe, Osẹnobulua dẹ mun ive nin ọle ve nin aba mhan nin ẹdẹlẹ sẹ, ọle zẹ nan da ne imẹn ha guiẹzọ. 7 Ọne ive nan ulin-uwa igbeva ọsi ibhokhan Izrẹl yẹ khẹ, nọn zẹle nin ele da ga Osẹnobulua asọn bi odanmhẹn. Ọnojie, ọne ive nan zẹ nin ibhokhan Ju da tie mẹn ẹzọ.

8 “Bezẹle nin ibha bha da rẹọbhọ ghe Osẹnobulua dẹ sabọ riọ ene yu kpanọ bhi uu? 9 Bhi ọsẹmhẹn, imẹn ka rẹ wo rẹọbhọ ghe, emhin nọn khẹke nọn nin mẹn rẹ lu emhin nọn hi ki rẹ khin nin mẹn ha sabọ lu, nin mẹn rẹ gbe elin nọnsi Jesu nin obhi Nazarẹt khuelo. 10 Ọnan hi ebi mẹn wo ha lu bhi Jerusalẹm. Ene ohẹn ne khua da re ahu nin mẹn rẹ ha muno edibo nesi Jesu* khue bhi ighan. Ahamiẹn a guanọ nan gbono ele a, mẹn ki wo re obọ bhọ. 11 Ẹghe rebhe mẹn dọ rẹ ha re oya nin ele bhi sinagọg kẹkẹ. Mẹn da ha guanọ nin ele zẹ uwedẹ oga nọnsele obọ. Ranmhude ẹkẹ ele wo manman ha khọ mẹn, mẹn bhọ da diọbhi agbaẹbho nekẹle dọ ha kpokpo ele bhi enin.

12 “Bhi ọne ẹghe nan, ene ohẹn ne khua da je imẹn nin mẹn ha khian Damaskọs dọ kpokpo ene edibo ne ribhi enin. 13 Ọkpakinọn ọnojie, bhi egbẹghe odanmhẹn, beji mẹn ha khian bhi uwedẹ, ẹfua nọn bhaa gbera ovuẹn da na bhi okhun bhaa nyan mẹn bi ẹbho nin mhan ko ha khian. 14 Mhan rebhe ki denọ bhi otọ, mẹn da họn ukpuru nọn re urolo Hibru yọle: ‘Sọl, Sọl, bezẹle nin uwẹ da kpokpo imẹn? Egbe ẹ uwẹ gheghe kuan nin uwẹ rẹ ha ne imẹn suan.’* 15 Mẹn da ki nọọn ọlẹn yọle: ‘Họla uwẹ khin Ebeanlẹn imẹn?’ Ọle da yọle: ‘Imẹn hi Jesu, ọne uwẹ kpokpo. 16 Kpanọ mundia. Ranmhude mẹn zẹ uwẹ nin uwẹ ha yi ọguọmhandia nọnsẹmhẹn, ọle zẹle nin mẹn da re egbe man ẹn. Uwẹ dẹ sọsali ọbhi ene emhin nan nin uwẹ daghe, bi emhin ne rẹtẹ mẹn nin mẹn ha yẹ rẹman ẹn. 17 Mẹn dẹ hinmhin ẹn bhi obọ ibhokhan Ju, bi ẹbho ne iyi ibhokhan Ju, nin mẹn ha jẹ uwẹ bu. 18 Uwẹ dẹ taan ele ẹlo a, yẹ rẹkpa ele sibhi ebiuki re vae bhi ẹfua. Uwẹ ki ne ele sibhi obọ Esu re, yẹ rẹkpa ele fikie bu Osẹnobulua, beji Osẹnobulua ha da rẹhunmhan olukhọ nọnsele. Beji ele ha da yẹ miẹn ihaosa nin Osẹnobulua ha re nin ene ọle kpe khia ranmhude urẹọbhọ nin ele mhọn da mẹn.’

19 “Bhiriọ, Agripa nin ojie, mẹn da wo lu rẹkhan emhin nan taman imẹn bhi ọne imianlo nan, nan na okhun rẹman mẹn. 20 Mẹn da dọ ha taman ẹbho nin ele kiọya bhi olukhọ nọnsele, nin ele fikie bu Osẹnobulua re, ele ha yẹ lu emhin ne rẹman ghe ele fidenọ. Ẹbho ne ribhi Damaskọs mẹn rẹ munhẹn, mẹn kuẹ ha khian Jerusalẹm. Mẹn da yẹ wewe ọle na bhi Judia rebhe, mẹn kuẹ bu ene agbaẹbho ne iyi ibhokhan Ju. 21 Ọnan zẹle nin ibhokhan Ju da mun mẹn bhi uwa oga yẹ ha guanọ nin ele gbe mẹn an. 22 Ọkpakinọn, Osẹnobulua da wo rẹkpa mẹn. Ọnan zẹle nin mẹn da sẹyẹ sabọ wewe ọne uhọnmhunje nan man ọrebhe ukpẹdẹ nin ẹlẹnan, ọ ha rẹ ha yi ọdafẹn la obhiogue. Emhin ọbhebhe iribhọ nin mẹn wewe man ẹbho, nọn gbera ebi Mozis bi ene akhasẹ yọle ghe ọ dẹ sunu. 23 Ele gbẹn ọlẹn bhi otọ ghe, Kristi dẹ loya, ghe, ọle dẹ ha yi ọria ọhẹnhẹn nọn ha riọ kpanọ bhi uu. Ọle dẹ re ẹfua ji ibhokhan Ju bi ene iyi ibhokhan Ju.”

24 Pọl ki ha ta ene emhin nan, Fẹstọs da reso yọle: “Emhẹnmhẹn uwẹ ki ye Pọl! Ebe zagha uwẹ uhọnmhọn an!” 25 Pọl ki da yọle: “Fẹstọs nin Ebeanlẹn imẹn, ọ iyi emhẹnmhẹn mẹn ye, uhọnmhọn wo gba nin mẹn. Ẹmhọanta ene emhin nan nin mẹn ta khin. 26 Bhi ọsi ẹmhọanta, Agripa nin ojie nin mẹn ta ene ẹmhọn nan man lẹn otọ ebi mẹn taman ọlẹn. Mẹn wo rẹọbhọ ghe, ọle lẹn otọ ene emhin nan, ranmhude, a bha lu ene emhin nan soso bhi ẹkhokho. 27 Agripa nin ojie, uwẹ bha be rẹọ bhi ẹmhọn nin ene akhasẹ gbẹnlẹn? Mẹn lẹnmhin ghe, uwe rẹọbhọ.” 28 Ọkpakinọn, Agripa da taman Pọl yọle: “Uwẹ dẹ kẹ fi mẹn ọkhọle denọ yẹ rẹ mẹn kiẹn odibo ọsi Kristi.” 29 Bhiriọ, Pọl da yọle: “Ọnin bhọ hi ebi mẹn bhii Osẹnobulua le, ghe ọ ha rẹ ha yi bhi ejayenan la bhi ẹghe odalo, nin ọle rẹkpa uwẹ bi ọrebhe ne ka mẹn ehọ ẹlẹnan rẹ dọ ha rẹkhan Kristi beji mẹn rẹ rẹkhan ọlẹn. Ọkpakinọn, mẹn bha guanọ nan ne ighan ibha bhi obọ.”

30 Ẹghenin, ọne ojie da ki kpanọ mundia, ọne gọvanọ, Bẹnis bi ene ikpea ne deba ele dotua da yẹ kpanọ mundia. 31 Ele ki ha kpanọ, ele da ha tale bhi ẹwẹ ele yọle: “Ọne okpea nan bha rẹ lu emhin nan ha gbe ọle a ba, la mun ọlẹn ọbhi ighan ba.” 32 Agripa ki da taman Fẹstọs yọle: “A ha rẹ fan ọne okpea nan fia sade ọle bha yọle ghe, ọle guanọ nin Siza talọ bhi ẹzọ nọnsọle.”

27 Ele ki mhanmhanlẹn fo nin mhan rẹ nabhi okọ ha khian Itali, ele da mun Pọl bi onighan ebhebhe ọbhi obọ ọkakulo ọkpa natiọle Juliọs. Usun eyokulo ọsi Ọgọstọs, ọle Juliọs ye. 2 Mhan da dọ nabhi okọ nọn na bhi Adramitiọm vade. Ọne okọ dẹ mundia bhi eje kẹkẹ nin okọ da mundia bhi otọ Esia. Aristakọs nin obhi Masẹdonia, nọn na bhi Tẹsẹlonaika vae, da rẹkhan mhan. 3 Ukpẹdẹ nọn rẹkhan ọlẹn, mhan da sẹbhi Saidọn. Juliọs da wo ha lu Pọl nọnsẹn. Ọle da re otọ nanlẹn rẹ dọ tuẹ imọẹ ọle, beji ele ha da gbẹloghe ọle.

4 Mhan ki sibhi enin re, mhan da rẹkhan efẹn-efẹn agbaẹbho ọsi Saiprọs ranmhude okpahoho nọn ha fi. 5 Mhan da ki gua ọne okọ rẹkhan ẹkẹ okpẹdẹ. Mhan da gbera Silisia bi Pamfilia. Mhan da dọ mundia bhi Maira bhi Lisia. 6 Bhi enin, ọne ọkakulo da miẹn okọ nọn na bhi Alẹzandria vade. Itali ọne okọ khian. Ọle da ne mhan nabhọ. 7 Mhan da fẹkẹ ha khian khere-khere. Ikpẹdẹ ne bunbun ki gbera, mhan da sẹbhi Kanaidọs. Ọne okhian bha lẹkhẹ nin mhan. Ranmhude okpahoho nọn ha fi, mhan bha yẹ sabọ rẹkhan ukpọwala. Mhan da gua ọne okọ rẹkhan efẹn-efẹn agbaẹbho ọsi Krit yẹ hian obọ ọsi Samoni fia. 8 Iriọ mhan rẹ dọnmhegbe rẹ gua ọne okọ rẹkhan ehọ-ehọ ẹdẹ ọkuẹsẹ mhan dọ sẹbhi eji a tiọle Fẹ Hevuns. Ọne agbaẹbho nan bha ree bhi agbaẹbho natiọle Lesia.

9 Mhan wo manman riia ẹghe a bhi enan. Ẹghe nan rẹ fi azinmin* ọsi Ukpẹdẹ Izọese bhọ ki da gbera. Bhi ejayenan nian, okhẹnan dẹ ha ribhọ sade mhan sẹyẹ ha gua ọne okọ khian. Ranmhude ọnan, Pọl da re ibhude nin ele. 10 Ọle da yọle: “Ikpea, mẹn daghe ọle ghe mhan ha sẹyẹ ha khian ọne okhian nan, ọbalọ dẹ sabọ nabhọre. Ọ iyi ọne okọ bi emhin ne ribhọ ọkpa ha yulu mhan. Mhan bhọ dẹ sabọ re uhọnmhọn fia.” 11 Ọkpakinọn, ọne ọkakulo bha ka Pọl ehọ. Ọle da re ehọ bhi ebi ọnọn ha gua ọne okọ bi ọnọn nyan ọne okọ tale. 12 Beji a miẹn ghe mhan ida sabọ gbe ẹghe ulinlin bhi enan, ene bunbun bhi ọne okọ da yọle nin mhan fẹghe si mhan dẹ sabọ gua ọne okọ sẹbhi Finis bhi agbaẹbho ọsi Krit, nin mhan dọ gbe ẹghe ulinlin bhi enin. Eji okọ da mundia bhi Finis denọ ẹlo diọbhi eji oẹnlẹn da hẹnre.

13 Ahoho ki fẹkẹ na bhi obọ ọsi saot* fi re, ele da ha riale ghe ele dẹ sabọ sẹbhi eji ele khian. Bhiriọ, ele da fanọn ebi ele rẹ mun ọne okọ diẹn an. Ele da munhẹn ha gua ọne okọ rẹkhan ehọ-ehọ ẹdẹ. Ele da gua ọle rẹkhan egbegbe agbaẹbho ọsi Krit. 14 Ọ bha sẹ bue, okpahoho natiọle Yuroakuilo da munhẹn ha fi. 15 Ọne okpahoho da ha fi ọne okọ yo fi ọne okọ re. Mhan bha yẹ sabọ denọ ọne okọ uhọnmhọn bhi odẹ. Bhiriọ, mhan da zẹ egbe obọ nanlẹn. Ọne okpahoho da ha mun mhan khian. 16 Mhan da ki sẹbhi obhi agbaẹbho khere nin amẹn nẹga natiọle Kọda. Ọne okpahoho bha manman ha fi bhi enan. Ọrẹyiriọ, ọ da wo manman nọghọ mhan rẹ mun obhi okọ* nan diẹn bhi ikeke ọne okọ nabhi ẹkẹ ọne okọ, nọn hẹi ruẹ. 17 Ene gua ọne okọ ki sabọ mun ọne obhi okọ nabhi ẹkẹ okọ, ele da re iri gbanọ ọne okọ nin mhan ye nọn hẹi nyanọn an. Ọkpakinọn, ofẹn da ha mun ele nin ọne okọ hẹi dọ hian ze bhi ekẹn nọn ribhi otọ ẹdẹ.* Bhiriọ, ele da si umun-ahoho ke otọ, nin ahoho fẹkẹ ha re ọne okọ khian. 18 Ọkpakinọn, ọne okpahoho da sẹyẹ wo ha fi mhan yo fi mhan re. Ranmhude ọnan, ẹdẹ ki we, ele da munhẹn ha muno ihẹ ne ribhi ọne okọ kua beji ọne okọ ha da hẹghẹ a. 19 Ukpẹdẹ nọnzi ea, ele da re obọ nọnsele ha ne iri bi emhin eso nan rẹ bọn ọne okọ kua.

20 Bhi ikpẹdẹ ne bunbun, ovuẹn bha nyan re, ahiẹnhiẹn bha zegbere. Efi da yẹ wo manman ha fi. Bhiriọ, mhan bha yẹ rẹọbhọ ghe mhan dẹ sabọ miuhọnmhọn. 21 Sẹyẹ, ọ ki ree nin mhan le ebale. Pọl da ki kpanọ mundia bhi ẹwẹ ele yẹ yọle: “Ikpea, bha ha rẹ ka mẹn ehọ ẹghe nin mẹn rẹ yọle nin mhan hẹi sibhi Krit re. Sade bha ka mẹn ehọ nọn, ene emhin nan soso irẹ yulu mhan. 22 Emhin rẹ dia inian, bha hẹi kpokpo egbe. Ọria soso bhi ẹwẹ mhan ida yu. Ọne okọ ọkpa ha ruẹ. 23 Asọn nọn gbera, ẹhi nọnsi Osẹnobulua nin mẹn ga da bu mẹn re. 24 Ọ da taman imẹn yọle: ‘Pọl, hẹi ji ofẹn mun uwẹ. Uwẹ dẹ sẹbhi eji Siza ye. Osẹnobulua dẹ yẹ ranmhude uwẹ hinmhin ọrebhe ne ribhi ọne okọ.’ 25 Bhiriọ, bha hẹi ji ofẹn mun bha. Mẹn rẹọbhọ ghe Osẹnobulua dẹ lu ebi ọle tale. 26 Ọkpakinọn, ọne efi nan dẹ dọ kpono mhan kuọ bhi egbe ẹdẹ bhi agbaẹbho ọkpa nin amẹn nẹga.”

27 Ukpasọn nọnzi igbenẹn, ọne efi da sẹyẹ ha fi mhan yo fi mhan re bhi okpẹdẹ ọsi Edria. Bhi ọsasọn ogiziẹn, ene gua ọne okọ da ha riale ghe ọ diabe ele fẹkẹ ha sikẹ otọ. 28 Ele da re emhin rẹ fẹghe ebi ẹdẹ dinmhin sẹ yẹ. Ele ki mhaan ọlẹn, ọ da ha yi fatọm uje.* Ele ki gbo zẹ khian khere, ele da kie mhaan ọlẹn. Ọ da ha yi fatọm igbehẹn.* 29 Ofẹn da ki ha mun ele nin ọne okọ hẹi dọ ha udo mun. Ranmhude ọnan, ele da na bhi ikeke ọne okọ fi emhin enẹn ba bhi otọ rẹ mun ọne okọ mhọn. Ele da ha khẹ nin ẹdẹ we. 30 Akizẹbue, ene gua ọne okọ da man ha lu bọsi ghe ele guanọ nin ele fi emhin ba bhi odalo ọne okọ rẹ mun ọne okọ mhọn. Ọkpakinọn, ele da do ha mun obhi okọ nọn ribhi ẹkẹ ọne okọ dagbare, nin ele re ọle nẹgbe. 31 Pọl da ki taman ọne ọkakulo bi ene eyokhọnlẹn yọle: “Bha ha ji ene ikpea nan da sibhi ọne okọ nan re, bha ida miuhọnmhọn.” 32 Ene eyokhọnlẹn da ki jia iri sibhi ọne obhi okọ re yẹ ji ọ da defia.

33 Ọ ki kẹ khere nin ẹdẹ rẹ we, Pọl da taman ọrebhe nin ele le ebale. Ọle da yọle: “Ukpẹdẹ nọnzi igbenẹn ki khọnan nian nin ibha bha sẹ rẹ le ebale, ranmhude nin bha rẹ ha kpokpo egbe. 34 Bha huẹan, bha le ebale. Ọmhẹn nọnsẹbha zẹle nin mẹn da yọle nin bha le ebale. Bhi ọsi ẹmhọanta, emhin soso ida sunu ji ọkpa bhi ẹwẹ bha.” 35 Ọle ki ta ọnan fo, ọle da re ibrẹd, yẹ sira ele nan erọnmhọn ọbhọ. Ọle da khuẹnẹn ọlẹn an yẹ munhẹn ha le ọle. 36 Bhiriọ, ene ẹbho da de ọkhọle re, yẹ munhẹn ha le ebale. 37 Itue enẹn iribhi egbọ enẹn nyan iyisẹn eva* mhan ha khin bhi ẹkẹ ọne okọ. 38 Ele ki le ebale khọn, ele da muno ẹkpa ebale* ne ribhi ọne okọ fino ku ọbhi ẹkẹ ẹdẹ beji ọne okọ ha da heghe a.

39 Ẹdẹ ki gbanọn an, ele bha lẹn eji ele ha ye. Ọkpakinọn, ele da daghe eji ekẹn ye bhi egbẹdẹ. Bhiriọ, ele da ha guanọ nin ele gua ọne okọ sẹbhi enin, sade ọ dẹ fo ele. 40 Bhiriọ, ele da jiajia emhin nan rẹ mun ọne okọ diẹn ku ọbhi ẹkẹ ẹdẹ. Ele da yẹ taan iri sibhi ukpokpo nan rẹ gua ọne okọ re. Ele da taan ọne umun-ahoho a, yẹ munhẹn ha gua ọne okọ khian egbẹdẹ. 41 Ele ki ha ukene ekẹn mun bhi ẹkẹ ọne ẹdẹ, odalo okọ nọnsele da hian ze bhi ẹkẹ ọle. Ele bha yẹ sabọ sibhi enin re. Okpahoho nọn ha fi da ha nyanọn ikeke ọne okọ kua. 42 Ene eyokhọnlẹn ki daghe ọnan, ele da ha guanọ nin ele gbono ene onighan rebhe a, nin ọsoso bhi ẹwẹ ele hẹi san fiọbhi ẹdẹ yẹ nẹgbe. 43 Ranmhude ọne ọkakulo wo ha guanọ nin ọle re Pọl sẹbhi eji ọle khian, ọle bha ji ene eyokhọnlẹn da lu ebi ele ha mhanmhan. Ọle da yọle nin ene sabọ gua ẹdẹ ka sannọn fiọbhi ẹkẹ ẹdẹ yẹ gua ha khian egbẹdẹ. 44 Ọle da yẹ yọle nin enekẹle fino obọ mun eran bi emhin kẹkẹ ne nyanọn sibhi ọne okọ re. Iriọ, ele rebhe rẹ sabọ miuhọnmhọn rẹ sẹbhi egbẹdẹ.

28 Mhan ki miuhọnmhọn rẹ sibhi ọne ẹdẹ re, mhan da kere ghe Mọta a tie ọne agbaẹbho nin mhan da ke egbe mhan re. 2 Ẹbho ne ribhi ọne agbaẹbho da wo re ifuẹkẹ man mhan. Ele da miẹn mhan ọbhi egbe yẹ fie eranlẹn nin mhan ha gha, ranmhude amẹn nọn ha rọ bi ulinlin nọn ha fi. 3 Pọl ki koko eran yẹ ne kpọn, ẹnyẹn da na bhi ẹkẹ ọle dagbare yẹ fi akọn mun ọle obọ. Eranlẹn nọn ha to mun ọne ẹnyẹn khu ọle dagbare. 4 Ẹbho ne ribhi ọne agbaẹbho ki daghe ghe ẹnyẹn fi akọn mun ọle obọ, ele da ha tale bhi ẹwẹ ele yọle: “Ọgbugbele ọne okpea nan khin. Arẹmiẹn ẹdẹ bha gbe ọle, ese* yẹ dọ ke ọle re bhi enan.” 5 Ọkpakinọn, ọle da fianmhẹn ọne ẹnyẹn fiọbhi ẹkẹ eranlẹn. Emhin soso bha sunu ji ọle. 6 Ele da ha khẹ nin ọle huẹre la nin ọle yu. Ele ki zẹ khẹ yẹ kere emhin soso bha sunu ji ọle, ele da fi unun denọ. Ele da ha yọle, osẹ ọle khin.

7 Okpea ọkpa natiọle Publiọs da ha mhọn otọ ne bunbun bhi eje bha ree gbe bhi enin. Okpea kpataki ọle khin bhi ọne agbaẹbho. Ọle da miẹn mhan ọbhi egbe, yẹ gbẹloghe mhan na bhi ikpẹdẹ ea. 8 Aba ọne okpea nan da ha khọnmhọn ifiva bi disẹntri. Pọl da bu ọle bhi ẹkẹ uwa. Ọ da nan erọnmhọn nanlẹn yẹ re egbe daanlẹn. 9 Ọnan ki sunu fo, ẹbho nin egbe bha daan ne ribhi ọne agbaẹbho da bu ọle re. Ọle da re egbe daan ele. 10 Ele da wo mun ekpẹn mhan bhi egbe. Ele da ne emhin ne bunbun nin mhan. Mhan ki la kpanọ, ele da ne emhin rebhe nin mhan guanọ nin mhan, yẹ ne mhan hẹ ele ọbhi ọne okọ.

11 Mhan ki gbe uki ea bhi ọne agbaẹbho fo, mhan da nabhi okọ nọn mhọn amanzẹ ọsi “Imọn nesi Zus” bhi odalo ọle. Alẹzandria ọne okọ na vade, ọ da mundia bhi ọne agbaẹbho bhi ẹghe ulinlin. 12 Mhan da mundia bhi eji a da mun okọ diẹn bhi Sirakus. Mhan da gbe ikpẹdẹ ea bhi enin. 13 Mhan ki sibhi enin re, mhan da ha khin Rigiọm. Ukpẹdẹ nọn rẹkhan ọlẹn, ahoho da na bhi obọ ọsi saot* fi re, mhan da sabọ sẹbhi Putiolai bhi ukpẹdẹ nọnzi eva. 14 Mhan da miẹn ibhio mhan bhi ọne agbaẹbho nan. Ele da yọle nin mhan deba ele gbe uzana ọkpa. Mhan ki sibhi enin re, mhan da ha khian Rom. 15 Ibhio mhan ne ribhi Rom ki họn ẹmhọn mhan, ele da khian bu mhan re bhi Ẹki Apiọs bi eji a tiọle Tiri Tavan. Pọl ki daghe ele, ọle da khuẹnmhẹn Osẹnobulua. Ahu da yẹ do ọle bhọ. 16 Mhan ki nabhi ẹkẹ Rom, ele da re otọ nin Pọl rẹ debhi uwa a. Ọgbanegbe ọkpa da ha gbega ọle.

17 A ki tie ọle ikpẹdẹ ea nin Pọl vae bhi Rom, ọle da tie ikpea nan manman lẹn bhi ẹwẹ ibhokhan Ju ne ribhi enin. Ele ki vae, ọle da taman ele yọle: “Ibhio, arẹmiẹn ghe mẹn bha rahiẹ ẹbho nesẹmhan, la re obọ gbera akerebhotọ ọsi aba mhan nin ẹdẹlẹ, ibhokhan Ju ne ribhi Jerusalẹm da yẹ mun mẹn nin ibhokhan Rom nin ele mun mẹn ọbhi ighan. 18 Ele ki nọọn mẹn ọta fo, ele da ha guanọ nin ele fan imẹn fia, ranmhude ele bha miẹn emhin soso bhi obọ nọnsẹmhẹn nọn ha re ele gbe mẹn an. 19 Ọkpakinọn, ene ibhokhan Ju bha ka. Ọnan da ki re imẹn yọle nan mun ọne ẹzọ bu Siza. Ọ iyi ranmhude mẹn guanọ nin mẹn tie ẹbho nesẹmhẹn ẹzọ zẹle nin mẹn da lu ọnan. 20 Ọnan bhọ hi ebezẹle nin mẹn da tie bha nin mẹn ne bha talọ, nin mẹn ji bha lẹn ghe, ranmhude ọne ọria nin ibhokhan Izrẹl khẹ, ọle zẹle nan da ne ene ighan nan mẹn bhi obọ.” 21 Ele da ki taman ọlẹn yọle: “A bha na bhi Judia gbẹn ebe ji mhan nan rẹ tẹmhọn uwẹ man mhan. Sẹyẹ, ibhio mhan ne na bhi enin vae bha tẹmhọn ẹn man mhan, la ta emhin ọbe soso uwẹ bhi egbe. 22 Ọkpakinọn, mhan riale emhin nọn khẹke nọn nin mhan rẹ họn bhi unun ẹn, ranmhude, mhan lẹnmhin ghe, ijerebhe ẹbho da re unun riia ọne usun nọnsẹbha nan an.”

23 Ele da ki re ukpẹdẹ yi nin ele rẹ kie vae. Eria ne vae bhi isi ọle bhi ọne ukpẹdẹ nin bhọ da bun gbera eria ne ka vae. Rẹ na bhi ọsewewiẹ rẹ sẹbhi ọsemuan, ọle da wo ha tẹmhọn Agbejele nọnsi Osẹnobulua man ele. Ọle da ha noo Uhi nọnsi Mozis bi ebe nin ene akhasẹ gbẹn rẹ ne ele talọ, beji ọle ha da rẹkpa ele rẹ rẹọ bhi Jesu. 24 Eso bhi ẹwẹ ele da rẹọ bhi ebi ọle tale, enekẹle bha rẹọbhọ. 25 Ranmhude iwaegbea nọn ha ribhi ẹwẹ ele, ele da munhẹn ha kpanọ. Ele ki ha kpanọ, Pọl da yọle:

“Ẹmhọanta ẹmhọn nin ẹlinmhin nọn khiale noo Ẹzaya nin akhasẹ rẹ taman aba bha nin ẹdẹlẹ khin. 26 Ọle da taman ọlẹn yọle: ‘Bu ene ẹbho nan, uwẹ ha taman ele yọle: “Ibha dẹ gene họn, ọkpakinọn, ibha ida lẹn ebi a tẹmhọnlẹn. Ibha dẹ ha ghe, ọkpakinọn ibha ida daghe emhin soso. 27 Ranmhude, ọkhọle ọsi ene ẹbho nan gbin. Ele ha rẹ họn ẹmhọn, ele ilu rẹkhan ọlẹn. Ele gue ẹlo nọnsele, yẹ lan ehọ nọnsele, beji a da miẹn ele bha re ọle daghe emhin soso la họn emhin soso. Ranmhude ọnan, ele bha lẹn otọ ebi a tẹmhọnlẹn. Sẹyẹ, ele bha fi ọkhọle denọ beji mẹn ha da hinmhin ele.”’ 28 Bha lẹn sẹbhọ ghe, a wewe ẹmhọn umiẹnfan nọnsi Osẹnobulua man ene iyi ibhokhan Ju. Ele dẹ wo miẹn ọlẹn obhi egbe.” 29* ——

30 Ọle da gbe ikpe eva bhi enin. Uwa nin ọle mun ọle ha dia. Ọria nọn hi ki rẹ khin nọn rẹnẹ ji ọle, ọle ki wo miẹn ọlẹn ọbhi egbe. 31 Ọle da wo re izebhudu ha taman ele ẹmhọn Agbejele nọnsi Osẹnobulua, yẹ ha man ele ẹmhọn Jesu Kristi nin Ebeanlẹn mhan. Ọle bha ji emhin soso de ọle idobolo.