EBE NỌNSI JỌNI

1 Bhi ẹghe umunhẹn, ọne Ọta da ha ribhọ. Ọle bi Osẹnobulua ko ha ribhọ. Sẹyẹ, ọne Ọta da ha yi osẹ. 2 Ọle da deba Osẹnobulua ha ribhọ bhi ẹghe umunhẹn. 3 Ọle Osẹnobulua noolo rẹ man emhin rebhe. Emhin soso iribhọ nin Osẹnobulua bha noo ọle rẹ man.

Osẹnobulua da noo ọle 4 rẹ man iẹnlẹn. Iẹnlẹn nọnsọle da ha yi ẹfua rẹji eria. 5 Sẹyẹ, ọne ẹfua da ha bhala bhi ebiuki. Ọne ebiuki bha sabọ degue ọle.

6 Osẹnobulua da je okpea ọkpa re. Elin ọlẹn da ha yi Jọni. 7 Ọne okpea nan da vae dọ taman ẹbho ẹmhọn ọne ẹfua, beji ọle ha da rẹkpa unan ẹbho rebhe rẹọbhọ. 8 Ọ iyi ọle hi ọne ẹfua. Ọle vae dọ tẹmhọn ọne ẹfua.

9 Ọ da ha kẹ khere nin ọne ẹfua ọsaje nọn ha rẹ ẹfua nin unan ẹbho rebhe rẹ vae bhi ọne agbọn nan. 10 Bhi ọsi ẹmhọanta, ọle bhọ da ha ribhi ọne agbọn nan fo, ọkpakinọn, ene ribhi ọne agbọn nan bha lẹn ọlẹn, arẹmiẹn ọle Osẹnobulua noo rẹ man ele. 11 Ọle da vae bhi agbaẹbho nọnsọle. Ọkpakinọn, ẹbho nesọle bha miẹn ọlẹn ọbhi egbe. 12 Ọle da re isẹhoa nin ọrebhe ne miẹn ọlẹn ọbhi egbe rẹ kiẹn imọn nesi Osẹnobulua, ranmhude ele wo rẹọbhi elin nọnsọle. 13 Ọ iyi ẹfun, la aranlẹn, la iho ọsi ọria a rẹ biẹ ele. Osẹnobulua hi ọnọn re ele kiẹn imọn.

14 A da biẹ ọne Ọta bhi ọne otọ nan, ọle da dọ ha nyẹnlẹn bhi ẹwẹ mhan. Imhan da daghe uyi nọnsọle, bọsi uyi nin ukpọmọn-ọkpa sẹsẹ miẹn bhi obọ aba ọle. Ọle da wo ha yi ọria ẹmhọanta. Osẹnobulua da yẹ wo re ẹlo esili ha ghe ọle. 15 (Jọni da tẹmhọnlẹn. Ọle da yọle: “Ọnan hi ọne imẹn ha tẹmhọnlẹn ẹghe nin imẹn rẹ yọle, ‘Ọnọn vade bhi ikeke imẹn kalo nin imẹn, ranmhude, ọle ka mẹn ha nyẹnlẹn.’”) 16 Ranmhude ifuẹkẹ nọnsọle, ọle zẹle nan da manman tohan imhan. 17 Rẹ na ọbọ Mozis ọle ọne Uhi na vae. Ọkpakinọn, rẹ na obọ Jesu Kristi, ọle mhan da miẹn ifuẹkẹ nọn khua, bi ẹmhọanta. 18 Ọria soso iribhọ nọn sẹ miẹn Osẹnobulua bhi ẹlo. Ọne ukpọmọn-ọkpa sẹsẹ nọn yẹ yi osẹ, nọn manman sikẹ ọne Aba, ọle hi ọnọn tẹmhọn ọlẹn man mhan.

19 Ọnan hi ebi Jọni tale ẹghe nin ibhokhan Ju rẹ nabhi Jerusalẹm je ene ohẹn bi ibhokhan Livai bu ọle ne dọ nọọn ọlẹn yọle: “Họla uwẹ khin?” 20 Ọle da wo ta ẹmhọanta, ọle bha bha ohoghe. Ọle da yọle: “Imẹn iyi Kristi.” 21 Ele da nọọn ọlẹn yọle: “Uwẹ be hi Ẹlaija?” Ọle da yọle: “Imẹn iyi Ẹlaija.” Ele da ki yọle: “Uwẹ be hi ọne Akhasẹ nin mhan khẹ?” Ọle da yẹ yọle: “Heye!” 22 Bhiriọ, ele da nọọn ọlẹn yọle: “Họla uwẹ khin? Taman imhan, beji mhan ha da miẹn ebi mhan ha taman ene je mhan re. Họla uwẹ yọle uwẹ khin?” 23 Ọle da yọle: “Beji Ẹzaya nin akhasẹ tale, imẹn hi ọnọn so dagbare bhi ẹkẹ ojẹgbo yọle, ‘Bha dia uwedẹ nọnsi Jehova.’”* 24 Ibhokhan Farisi je ene ẹbho nan re. 25 Ene ẹbho ki da nọọn ọlẹn yọle: “Beji a miẹn uwẹ iyi Kristi, la Ẹlaija, la ọne Akhasẹ, be ki zẹ nin uwẹ da ha re amẹn nin ẹbho?” 26 Jọni da ki taman ele yọle: “Ẹmhọanta nọn ghe mẹn re amẹn nin ẹbho, ọkpakinọn, ọria ribhi ẹwẹ bha nin ibha bha lẹn. 27 Ọnan hi ọne ọria nọn vade bhi ikeke imẹn. Imẹn bhọ bha sẹ ọnọn ha taan iri si ọle bhi ibata re.” 28 Eji Jọni da ha re amẹn nin ẹbho bhi Bẹtani, bhi obọ nọnkẹle bhi ẹdẹ Jọdan, ọle ene emhin nan da sunu.

29 Ukpẹdẹ nọn rẹkhan ọlẹn, Jọni da daghe Jesu bu ọle vade. Ọle da yọle: “Bha ghe Ohuan nọnsi Osẹnobulua nọn ha re olukhọ sibhi ọne agbọn nan re! 30 Ọle hi ọne imẹn ha tẹmhọnlẹn ẹghe nin mẹn rẹ yọle: ‘Ọnọn vade bhi ikeke imẹn kalo nin mẹn, ranmhude, ọle ka mẹn ha nyẹnlẹn.’ 31 Imẹn tobọmẹn bhọ bha rẹ lẹn ọlẹn. Ọkpakinọn, nin ibhokhan Izrẹl sabọ lẹn ọlẹn, ọle zẹle nin mẹn da ha re amẹn nin ẹbho.” 32 Jọni da yẹ yọle: “Imẹn da daghe ẹlinmhin nọn khiale na bhi okhun bu ọle re bọsi idulu. Ọne ẹlinmhin da nanlẹn dia. 33 Imẹn bha rẹ lẹn ọlẹn. Sokpan, Ọnọn je imẹn nin mẹn dọ ha re amẹn nin ẹbho da taman imẹn yọle: ‘Ọria nin uwẹ daghe ọle ghe, ẹlinmhin nọn khiale vae dọ de ọle bhi uke uhọnmhọn an, ọle hi ọnọn da ha gbe ẹbho ruẹ bhi ẹlinmhin nọn khiale.’ 34 Imẹn ki daghe ọle nian. Imẹn da sọsali ọbhọ ghe ọle hi Ọmọn nọnsi Osẹnobulua.”

35 Ukpẹdẹ nọnkẹle, Jọni bi eva bhi edibo nesọle da ko ha ribhi ijan ọkpa. 36 Ọle ki daghe Jesu khian gbera, ọle da yọle: “Bha ghe Ohuan nọnsi Osẹnobulua!” 37 Ene edibo eva ki họn ọnan, ele da rẹkhan Jesu. 38 Jesu ki fiorọ, ọle da daghe ele. Ọle da ki nọọn ele yọle: “Be ibha guanọ?” Ele da yọle: “Rabai ejela uwẹ dia i?” (Ebi a re Rabai ta hi “Ọman-emhin.”) 39 Ọle da taman ele yọle: “Bha vae dọ ghe ọle.” Bhiriọ, ele da rẹkhan ọlẹn. Ele da dọ daghe eji ọle dia. Ele da deba ọle dia bhi ọne ukpẹdẹ nin. Egbẹghe agogo enẹn* ọsodanmhẹn, ọle a ha ye. 40 Ọkpa bhi ene edibo eva ne họn ebi Jọni tale yẹ rẹkhan Jesu, da ha yi Andru, nin obhio Saimọn Pita. 41 Ọle da ka dọ guanọ obhio ọle nin Saimọn yẹ taman ọlẹn yọle: “Imhan miẹn Mezaya.” (Ebi a re Mezaya ta hi “Kristi.”) 42 Ọle da re Saimọn bu Jesu. Jesu ki miẹn ọlẹn, ọle da yọle: “Uwẹ hi Saimọn, nin ọmọn nọnsi Jọni. Ọkpakinọn, a dẹ ha tie uwẹ Sifas.” (Ọne elin nin hi “Pita” bhi urolo Grik.)

43 Ukpẹdẹ nọn rẹkhan ọlẹn, Jesu da ha ho nin ọle ha khian Galili. Ọle ki miẹn Filip, ọ da taman ọlẹn yọle: “Dọ ha rẹkhan mẹn.” 44 Agbaẹbho ọsi Bẹtseada Filip na vae. Ọne agbaẹbho nan Andru bi Pita yẹ na vae. 45 Filip ki miẹn Nataniẹ, ọle da taman ọlẹn yọle: “Imhan miẹn ọne ọria nan tẹmhọnlẹn bhi Uhi nọnsi Mozis bi ebe nin ene akhasẹ gbẹnlẹn. Ọle hi Jesu, nin ọmọn nọnsi Josẹf nọn na bhi Nazarẹt vae.” 46 Ọkpakinọn, Nataniẹ da taman ọlẹn yọle: “Emhin esili dẹ sabọ na bhi Nazarẹt vae?” Filip da ki taman ọlẹn yọle: “Vae dọ re ẹlo nọnsẹ daghe ọle.” 47 Jesu ki daghe Nataniẹ bu ọle vade, ọle da yọle: “Sẹghe, obhokhan Izrẹl ọsaje nin eku iri ọle bhi obọ.” 48 Nataniẹ da nọọn ọlẹn yọle: “Je uwẹ da lẹn mẹn?” Jesu da wanniẹn ọlẹn yọle: “Ọkuẹsẹ Filip tie uwẹ, mẹn daghe ẹ ẹghe nin uwẹ rẹ ha ribhi odotọ eran fig.” 49 Nataniẹ da yọle: “Rabai, Ọmọn nọnsi Osẹnobulua uwẹ khin, uwẹ hi Ojie ọsi Izrẹl.” 50 Jesu da taman ọlẹn yọle: “Ranmhude mẹn taman uwẹ ghe mẹn daghe uwẹ bhi odotọ eran fig, ọle re uwẹ ha mhọn urẹọbhọ? Uwẹ dẹ miẹn emhin ne nẹ ọnan.” 51 Ọle da yọle: “Bhi ọsi ẹmhọanta, mẹn taman ibha ghe, bha dẹ daghe ọle ghe okhun tuje a, bha ki daghe ẹhi nesi Osẹnobulua beji ele ha rẹ ha bu Ọmọn nọnsi okpea re yẹ fikie diọbhi okhun.”

2 Bhi ukpẹdẹ nọnzi ea, a da lu iluemhin ọsi ibọdọ bi ireokhuo bhi Kena, bhi agbaẹbho ọsi Galili. Inẹn Jesu da ha ribhi enin. 2 A da yẹ tie Jesu bi edibo nesọle vae bhi ọne iluemhin.

3 Anyọn ki fo, inẹn Jesu da bu ọle re dọ taman ọlẹn yọle: “Anyọn nọnsele folo.” 4 Jesu da ki taman ọlẹn yọle: “Okhuo, ọnela ọsẹmhẹn bi ọsuwẹ bhi ọne ẹmhọn nan?* Ẹghe nọnsẹmhẹn bha sẹ sẹ.” 5 Inẹn ọlẹn da taman ene ha gha ebale bi anyọn yọle: “Bha lu ebi ọ hi ki rẹ khin nin ọle taman ibha.” 6 Beji ibhokhan Ju rẹ lu emhin, akhe ehan nan rẹ sa amẹn da ha ribhi enin, nin ẹbho miẹn rẹ ha kpe obọ a. Ọkpa bhi ene akhe nan sabọ mun amẹn nọn ha vuọn galọn igbeva la galọn igbe-elẹnlẹn.* 7 Jesu da taman ele yọle: “Bha sa amẹn vuọn ene akhe.” Ele da sa amẹn vuọn ene akhe. 8 Jesu da ki taman ele yọle: “Bha sa bhọ, bha mun ji ọne okpea nọn re emhin khian bhi ọne iluemhin.” Ele da gene lu iriọ. 9 Ọne okpea da dọnmhẹn ọne amẹn nan rẹ kiẹn anyọn. Ọkpakinọn, ọle bha lẹn eji ọ na vae. (Ene eguọmhandia ne sa ọle ji ọle lẹn eji ọ na vae.) Ọle da ki tie ọne okpea nọn re amhẹn. 10 Ọle da taman ọlẹn yọle: “Anyọn nọn mhẹn bhi unun, ọle ẹbho ka mun dagbare. Anyọn ha ki munhẹn ha mun ẹbho, ele kuẹ mun ọnọn imhẹn bhi unun dagbare. Sokpan, uwẹ da mun ọnọn mhẹn bhi unun ya khẹ ọne ẹghe nan.” 11 Agbaẹbho ọsi Kena bhi otọ Galili, ọle Jesu da lu ọne emhin ọhan-ilo nan. Ọnan da ha yi emhin ọhan-ilo ọhẹnhẹn nin ọle lu. Ọle da re uyi nọnsọle man. Edibo nesọle da wo ha mhọn urẹọbhọ da ọle.

12 Ọnan ki gbera, Jesu bi inẹn ọlẹn bi ibhio ọle bi edibo nesọle da ha khian Kapaniọn. Ọkpakinọn, ele bha debhi enin an bue.

13 Iluemhin ọsi Anagbera nin ibhokhan Ju lu da ha sire. Jesu da ki ha khian Jerusalẹm. 14 Ọle ki sẹbhi enin, ọle da ka eria ne khiẹn ẹmena, ihuan, bi idulu re bhi ẹkẹ uwa oga. Ọle da yẹ ka ẹbho ne hian igho re bhi enin. 15 Ọle ki re uri rẹ lu asan, ọle da vẹ ene ihuan bi ene ẹmena, bi ene nyan ele sibhi uwa oga re. Ọle da biri igho ọsi ene hian igho kua, yẹ si itebu nọnsele ẹlo ru. 16 Ọle da taman ene khiẹn ene idulu yọle: “Bha ne ene emhin nan sibhi enan re! Bha hẹi yẹ do ẹki bhi uwa nọnsi Aba imẹn.” 17 Edibo nesọle da yere ghe, a gbẹn ọlẹn ọbhi Ebenọnkhiale yọle: “Ẹmhọn uwa nọnsẹ dẹ ha hu mẹn bhi udu.”

18 Ibhokhan Ju ne ribhi enin da ki nọọn ọlẹn yọle: “Emhin ọhan-ilo nela uwẹ ha lu nin uwẹ re rẹman ghe, uwẹ mhọn ahu nin uwẹ rẹ ha lu ene emhin nan?” 19 Jesu da ki taman ele yọle: “Bha dunmhun ọne uwa oga nan sotọ, mẹn ki re ikpẹdẹ ea bọn ọlẹn sẹ okhun.” 20 Ene ibhokhan Ju da ki yọle: “Ikpe ehan nyan egbọ eva* a rẹ bọn ọne uwa oga nan. Be uwẹ ha ki rẹ re ikpẹdẹ ea bọn ọlẹn yẹ?” 21 Egbe nọnsọle, ọle uwa oga nin ọle ha tẹmhọnlẹn. 22 Ẹghe nan ki rẹ riọ Jesu kpanọ bhi uu, edibo nesọle da ye ene ẹmhọn nan nin ọle ha ta re. Ele da rẹọ bhi ẹmhọn nan gbẹn ọbhi Ebenọnkhiale bi ẹmhọn nin Jesu tale.

23 Bhi ọne ẹghe nan nin ọle rẹ ha ribhi Jerusalẹm bhi iluemhin ọsi Anagbera, ẹbho ne bunbun ne daghe emhin ọhan-ilo nin ọle ha lu da rẹọ bhi elin nọnsọle. 24 Ọkpakinọn, Jesu bha fanọn egbe a man ele, ranmhude, ọle lẹn ebe ri ele bhi ọkhọle. 25 Ọ iyi ọria ha taman ọlẹn ebi eria dia yẹ, ranmhude, ọle lẹn ebe ri eria bhi ọkhọle.

3 Okpea ọkpa da ha ribhọ natiọle Nikodemọs. Ọkpa bhi ibhokhan Farisi ọle khin. Ọwanlẹn ọsi ibhokhan Ju ọle yẹ khin. 2 Ọne okpea nan da bu Jesu re bhi ọsasọn yẹ taman ọlẹn yọle: “Rabai, imhan lẹnmhin ghe, Osẹnobulua je uwẹ re nin uwẹ dọ ha man emhin. Ọria soso iribhọ nọn ha sabọ lu ene emhin ọhan-ilo nin uwẹ lu nan sade Osẹnobulua iri ọle bhi ikeke.” 3 Jesu da taman ọlẹn yọle: “Bhi ọsi ẹmhọanta, mẹn taman uwẹ ghe, ahamiẹn a bha kie biẹ ọria,* ọle ida sabọ nabhi Agbejele nọnsi Osẹnobulua.” 4 Nikodemọs da ki taman ọlẹn yọle: “Be a ha rẹ kie biẹ ọria nọn wanre fo yẹ? Ọle dẹ be nabhi ẹkẹ ọsi inẹn ọlẹn nan kie biẹ ọle ugba ọzeva?” 5 Jesu da wanniẹn ọlẹn yọle: “Bhi ọsi ẹmhọanta, mẹn taman uwẹ ghe, ahamiẹn a bha re amẹn bi ẹlinmhin rẹ biẹ ọria, ọle ida sabọ nabhi Agbejele nọnsi Osẹnobulua. 6 Ọne a re efun biẹ ki ha yi ọria nọn mhọn egbe ọsi efun. Ọkpakinọn, ọne a re ẹlinmhin nọn khiale biẹ ki ha yi ẹlinmhin. 7 Hẹi ji ọ han uwẹ ilo ghe, mẹn taman uwẹ ghe: Ọ khẹke nan kie biẹ bha. 8 Eje ghọn ahoho, ọle ọ fi diọ i, uwẹ ki yẹ họn ebi ọ rẹ ha fi yẹ. Ọkpakinọn, uwẹ ida lẹn eji ọ na fi vade, la eji ọ fi khian. Iriọ yẹ nọn rẹji ọrebhe nan re ẹlinmhin biẹ.”

9 Nikodemọs ki da nọọn ọlẹn yọle: “Be ene emhin nan ha rẹ sabọ sunu yẹ?” 10 Jesu da taman ọlẹn yọle: “Be uwẹ nin ọman-emhin bhi otọ Izrẹl bha rẹ lẹn ene emhin nan yẹ? 11 Bhi ọsi ẹmhọanta, mẹn taman uwẹ ghe, ebi mhan lẹnlẹn, ọle mhan ta. Sẹyẹ, ebi ẹlo mhan sẹ, ọle mhan sọsali ọi. Ọkpakinọn, ibha bha rẹọ bhi ebi mhan taman bha. 12 Mẹn taman bha ẹmhọn emhin ne sunu bhi otọ, ibha bha rẹọbhọ. Be ibha ha ki rẹ rẹọbhọ yẹ sade mẹn taman ibha emhin ne sunu bhi okhun ẹlinmhin? 13 Rẹ gbera Ọmọn nọnsi okpea nọn na okhun vare bhi ọne otọ nan, ọria soso iribhọ nọn sẹ na bhi ọne otọ nan diọbhi okhun. 14 Beji Mozis rẹ mun ẹnyẹn rọ bhi okhun eran bhi ẹkẹ ojẹgbo, iriọ a ha yẹ rẹ mun Ọmọn nọnsi okpea rọ, 15 beji ọrebhe ne mhọn urẹọbhọ da ọle ha da miẹn iẹnlẹn ọsi ighegheghe.

16 “Osẹnobulua wo manman hoẹmhọn ọne agbọn nan. Ranmhude ọnan, ọle da re Ukpọmọn ọkpa sẹsẹ nọnsọle nin ele. Beji a ha da miẹn ghe, ọrebhe ne mhọn urẹọbhọ da ọle ki ha mhọn iẹnlẹn ọsi ighegheghe. A ida fuẹn ele a. 17 Osẹnobulua bha je Ọmọn nọnsọle re nin ọle dọ bhuohiẹn gbe ọne agbọn nan. Ọle je ọle re nin ọle dọ miẹn ọne agbọn nan fan. 18 Ọria nọn hi ki rẹ khin nọn mhọn urẹọbhọ da ọle, a ida bhuohiẹn gbe ọle. Ọnọn bha mhọn urẹọbhọ da ọle, a bhọ bhuohiẹn gbe ọle fo, ranmhude, ọle bha rẹọ bhi elin ọsi Ukpọmọn ọkpa sẹsẹ nọnsi Osẹnobulua. 19 Ọnan hi ebezẹle nan ha da bhuohiẹn gbe ẹbho: ọne ẹfua vae bhi ẹkẹ agbọn, ọkpakinọn, ranmhude emhin ebe nọn vuọn ẹbho obọ, ele da hoẹmhọn ebiuki gbera ọne ẹfua. 20 Ẹfua iyẹẹ ẹbho ne lu emhin ebe. Ele re egbe nẹ nin ẹfua, ranmhude ele bha guanọ nin emhin ebe nin ele lu dughere. 21 Ọkpakinọn, ọria nọn lu emhin nọn mhẹn, ọle vae bhi ẹfua, beji ẹbho ha da daghe ọle ghe emhin nin ọle lu diẹn mun iho nọnsi Osẹnobulua.”

22 Akizẹbue, Jesu bi edibo nesọle da ha khian idunmhun ne nẹga Judia. Ọle da deba edibo nesọle gbẹghe bhi enin. Sẹyẹ, ọle da ha re amẹn nin ẹbho. 23 Jọni da yẹ ha re amẹn nin ẹbho bhi eji a tiọle Inọn, bhi egbegbe Selim, ranmhude, amẹn wo ha ribhi enin. Ẹbho da ha bu ọle re bhi enin dọ ha mianmẹn; 24 a bha sẹ mun Jọni khue bhi ọne ẹghe nan.

25 Edibo nesi Jọni bi obhokhan Ju ọkpa da ha gbugan ba ẹmhọn emhin nin ọria ha lu nin ọle rẹ kiẹn ọria nọn khia bhi ẹlo nọnsi Osẹnobulua. 26 Edibo nesi Jọni da ki bu Jọni re dọ taman ọlẹn yọle: “Rabai, ọne okpea nin nọn bu ẹ re bhi obọ nọnkẹle bhi ẹdẹ Jọdan, nin uwẹ ha tẹmhọnlẹn man mhan, ọ re amẹn nin ẹbho. Ẹbho rebhe wo ha vẹ bu ọle.” 27 Jọni da ki taman ele yọle: “Ọria ida sabọ ha mhọn emhin soso sade Osẹnobulua bha re nanlẹn. 28 Ibha tobọbha lẹnmhin ghe, mẹn ka yọle ‘Imẹn iyi Kristi, ghe, a je mẹn kalo nanlẹn.’ 29 Ọne okpea nọn ha re okhuo, ọle nyan ọne okhuo. Ọkpakinọn, ọmọẹ ọne okpea ha họn urulu nọnsọle, ọle ki wo ha ghọnghọn. Bhiriọ, eghọnghọn gbe mẹn udu a. 30 Ọle dẹ wo ha tuẹn okhun, ọkpakinọn, mẹn dẹ ha de re otọ.”

31 Ọnọn na bhi okhun vae, ọle ke okhun nẹ ẹbho nekẹle. Ọria nọn na bhi ọne otọ nan vae, emhin ne ribhi ọne otọ nan ọle tẹmhọnlẹn, ranmhude ọne otọ nan ọle na vae. Ọnọn na bhi okhun ẹlinmhin vae, ọle ke okhun nẹ ẹbho rebhe. 32 Ọle sọsali ọbhi ebi ọle daghe bi ebi ọle họnlẹn. Ọkpakinọn, ọria soso bha rẹọ ọle bhọ. 33 Ọria nọn rẹọ bhi ebi ọle tale re obọ bhọ ghe, Osẹnobulua ibha ohoghe. 34 Ọne Osẹnobulua jere, ẹmhọn Osẹnobulua ọle ta, ranmhude, Osẹnobulua manman re ẹlinmhin nọnsọle nin ọria. 35 Ọne Aba hoẹmhọn ọne Ọmọn. Ọle yẹ mun emhin rebhe ọle bhi obọ. 36 Ọria nọn mhọn urẹọbhọ da ọne Ọmọn ki ha mhọn iẹnlẹn ọsi ighegheghe. Ọkpakinọn, ọnọn mhọn akan-ehọ da ọne ọmọn ida miẹn iẹnlẹn. Ẹkẹ ọle ki wo ha khọ Osẹnobulua.

4 Ẹghe nin Jesu ki rẹ lẹn ghe ibhokhan Farisi họnlẹn ghe, edibo nesọle bi ẹbho nin ọle a re amẹn nan bun gbera ọsi Jọni, 2 (Edibo nesi Jesu, ele ha re amẹn nin ẹbho, ọ iyi Jesu tobọle.) 3 ọle da sibhi Judia re ha khian Galili. 4 Ọkpakinọn, ọ da khẹke nin ọle rẹkhan uwedẹ Sameria. 5 Ọle da ki sẹbhi agbaẹbho natiọle Saika bhi otọ Sameria. Ọne agbaẹbho nan sikẹ otọ nin Jekọp mun nin Josẹf nin ọmọn nọnsọle. 6 Omin nọnsi Jekọp bhọ da ha ribhi enin. Ejayenan nian, egbe da lọ Jesu ranmhude okhian nin ọle khianlẹn. Ọle da ki dotua bhi isi ọne omin. Egbẹghe agogo igbeva* a ha yẹ bhi ọne ẹghe nan.

7 Okhuo ọkpa nin obhi Sameria da vae dọ sa amẹn. Jesu da taman ọlẹn yọle: “Sa amẹn nin mẹn wọn.” 8 (Edibo nesọle bha ha ribhi enin. Ele da ha khian ẹkẹ ọne agbaẹbho dọ dẹ ebale re.) 9 Ọne obhokhan Sameria da nọọn ọlẹn yọle: “Bezẹle nin uwẹ nin obhokhan Ju da yọle nin mẹn sa amẹn nin uwẹ, arẹmiẹn obhokhan Sameria mẹn khin?” (Ibhokhan Ju bi ibhokhan Sameria iko lu emhin kugbe.) 10 Jesu da wanniẹn ọlẹn yọle: “Sade uwẹ lẹn ẹseọhẹ nọnsi Osẹnobulua bi ọnọn taman uwẹ nin uwẹ sa amẹn nanlẹn wọn, uwẹ ha rẹ taman ọlẹn nin ọle sa amẹn ọsi iẹnlẹn nin uwẹ. Ọle ki sa ọle nin uwẹ.” 11 Ọne okhuo da ki yọle: “Ọwanlẹn, uwẹ bhọ imhọn ebi a rẹ sa amẹn. Ọne omin yẹ dinmhin. Ejela uwẹ ha ki da miẹn ọne amẹn ọsi iẹnlẹn? 12 Uwẹ be kpọnọ gbera Jekọp nin aba imhan nin ẹdẹlẹ nọn mun ọne omin nan nin mhan? Ọne omin nan, ọle Jekọp, imọn nesọle bi ẹmena nesọle da wọn amẹn.” 13 Jesu da ki taman ọlẹn yọle: “Ohanmhẹn amẹn dẹ sẹyẹ ha gbe ọrebhe ne wọn bhi ọne amẹn nan. 14 Ọkpakinọn, ọria ha wọn bhi amẹn nin mẹn ha sa nanlẹn, ohanmhẹn amẹn iyẹ da gbe ọle. Ọne amẹn nin mẹn ha sa nanlẹn ki diabe amẹn nọn vẹ dagbare bhi udo bhi egbe nọnsọle, beji ọ ha da re iẹnlẹn ọsi ighegheghe nanlẹn.” 15 Ọne okhuo ki da yọle: “Ọwanlẹn, sa ọne amẹn nan nin mẹn. Beji a ha da miẹn ohanmhẹn amẹn bha yẹ ha gbe mẹn, la nin mẹn ha vae bhi enan dọ ha sa amẹn.”

16 Jesu da taman ọlẹn yọle: “Ha khian dọ datie ọdọ ẹ re.” 17 Ọne okhuo da yọle; “Mẹn imhọn ọdọ.” Jesu da ki yọle: “Ẹmhọanta uwẹ tale nin uwẹ rẹ yọle uwẹ imhọn ọdọ. 18 Igba isẹn uwẹ sẹ bọ ọdọ. Ọne okpea nin bha ko ribhi uwa nian, ọ iyi ọdọ ẹ. Ẹmhọanta uwẹ wo gene ta.” 19 Ọne okhuo da ki yọle: “Ọwanlẹn, ọ diabe akhasẹ uwẹ khin. 20 Uke okhun ọne oke nan, ọle aba imhan nin ẹdẹlẹ da ha ga Osẹnobulua. Ọkpakinọn, ibha yọle ghe, Jerusalẹm ọ da khẹke nan ha ga Osẹnobulua.” 21 Jesu da taman ọne okhuo yọle: “Bhi ọsi ẹmhọanta, mẹn taman uwẹ ghe, ẹghe vade nan ha rẹ miẹn ghe bha iyẹ da ha ga Osẹnobulua bhi Jerusalẹm, la bhi ọne oke nan. 22 Ibha bha lẹn ọne ibha ga, ọkpakinọn, imhan lẹn ọne imhan ga. Ranmhude, ibhokhan Ju a ka re umiẹnfan nan. 23 Ọkpakinọn, ọne ẹghe vade nan ha rẹ miẹn ghe, ẹbho ne gene ga Osẹnobulua ki ha re ẹlinmhin bi ẹmhọanta rẹ ga ọle. Ọne ẹghe a bhọ ki ye nian. Eria ne sẹ inian, ọle ọne Aba guanọ ne ha ga ọle. 24 Ẹlinmhin Osẹnobulua khin. Bhiriọ, ene ga ọle dẹ ha re ẹlinmhin bi ẹmhọanta rẹ ga ọle.” 25 Ọne okhuo da taman ọlẹn yọle: “Mẹn lẹnmhin ghe, Mezaya vade, nan yẹ tiọle Kristi. Ọle ha vae, ọle ki re otọ emhin rebhe man mhan.” 26 Jesu da taman ọlẹn yọle: “Imẹn nọn ne ẹ talọ, imẹn hi ọne Mezaya.”

27 Bhi ọne ẹghe nan nian, edibo nesọle da vae. Ọ da wo han ele ilo ghe, ọle ne okhuo talọ. Ọkpakinọn, ele bha nọọn ọlẹn: “Be uwẹ nanlẹn ta?” la, “Bezẹle nin uwẹ da nanlẹn talọ?” 28 Ọne okhuo da zẹ akhe nọnsọle obọ, yẹ ha khian ẹkẹ ọne agbaẹbho. Ọle da dọ taman ẹbho yọle: 29 “Bha vae dọ ghe okpea ọkpa nọn tẹmhọn egbe mẹn mhan mẹn. Asabọmiẹn ọle hi Kristi.” 30 Ene ẹbho da ki ha bu Jesu khian.

31 Bhi ọne ẹghe nan nian, edibo nesi Jesu da ha taman ọlẹn yọle: “Rabai, le ebale.” 32 Ọle da taman ele yọle: “Imẹn mhọn ebale nin mẹn ha le. Ọkpakinọn, ibha bha lẹn ebale nọn khin.” 33 Edibo nesọle da ki nọọn egbe ele yọle: “Họ bhọ ki mun ebale ji ọle?” 34 Jesu da ki taman ele yọle: “Ebale nọnsẹmhẹn, ọle hi nin mẹn rẹ lu iho ọsi ọnọn je imẹn re, yẹ miẹnsọn nọnsọle sotọ. 35 Ibha bha be yọle ọ sẹyẹ kẹ uki enẹn ọkuẹsẹ ẹghe nan rẹ ne emhin ugbo? Bha khua ẹlo okhun nin bha fẹ ọne ugbo ghe, bha ki daghe ọle ghe ebi a kọle wolo, ẹghe sẹ nan ha rẹ koko ele. 36 A ha ọne ọria nọn ha koko ene emhin ugbo osa fo. Ọle koko ikpẹ ọsi ene ha miẹn iẹnlẹn ọsi ighegheghe, beji a ha da miẹn ọnọn kọ emhin bi ọnọn khuan ọlẹn ki ko ha ghọnghọn. 37 Idia nọn sẹ inian a da yọle: Ọnọn kọ emhin ikẹ, ọnọn rọ ọle ikẹ. 38 Ebi ibha bha kọ, ọle mẹn je ibha nin bha dọ rọ. Bha miẹn elele bhi ẹsọn nin ẹbho ebhebhe miẹn.”

39 Ibhokhan Sameria ne bunbun da mhọn urẹọbhọ da ọle, ranmhude ẹmhọn nin ọne okhuo dọ taman ele, ẹghe nin ọle rẹ yọle: “Ọle tẹmhọn egbe mẹn man mẹn.” 40 Ene ibhokhan Sameria ki bu ọle re, ele da taman ọlẹn nin ọle ne ele dia. Ọle da gbe ikpẹdẹ eva bhi enin. 41 Ranmhude ọnan, ẹbho ne bunbun da họn ebi ọle ha ta, yẹ mhọn urẹọbhọ da ọle. 42 Ele da ki taman ọne okhuo yọle: “Ọ iyẹ yi ebi uwẹ tale ọkpa rẹ imhan rẹọ bhi ọne okpea nan; imhan re ehọ mhan họn ebi ọle ha ta, yẹ rẹọbhọ ghe, ọle gene hi ọria nọn ha miẹn ọne agbọn nan fan.”

43 Jesu ki gbe ikpẹdẹ eva bhi enin, ọle da kpanọ ha khian Galili. 44 Jesu tobọle bhọ da tale ghe, a imun ekpẹn nin akhasẹ bhi agbaẹbho nin ọne akhasẹ na vae. 45 Ẹghe nin Jesu rẹ sẹbhi Galili, ibhokhan Galili da miẹn ọlẹn ọbhi egbe, ranmhude ele daghe emhin nin ọle lu bhi Jerusalẹm bhi ẹghe iluemhin. Ele bhọ yẹ yo ọne iluemhin.

46 Ọle da gbo vae bhi agbaẹbho ọsi Kena bhi otọ Galili, bhi eji ọle da re amẹn kiẹn anyọn. Ọmọn ọsi okpea ọkpa nọn wẹnna nin ọnojie da ha khọnmhọn. Kapaniọn ọle ye. 47 Ọne okpea nan ki họn ghe, Jesu na bhi Judia vae bhi Galili, ọle da dọ bhii ọle nin ọle vae dọ hinmhin ọmọn nọnsọle, ranmhude, ọne ọmọn khian la yu. 48 Ọkpakinọn, Jesu da taman ọlẹn yọle: “Ibha igbo rẹọ bhi emhin sade a bha lu emhin ọhan-ilo man bha fo.” 49 Ọne okpea nọn wẹnna bhi isi ọnojie da taman ọlẹn yọle: “Ebeanlẹn imẹn, jẹje vae dọ re egbe daan ọmọn nọnsẹmhẹn nin ọle hẹi yu.” 50 Jesu da taman ọlẹn yọle: “Ha khian uwa; egbe daan ọmọn nọnsẹ.” Ọne okpea da rẹọ bhi ebi Jesu tale, yẹ kpanọ. 51 Ọle ki ribhi uwedẹ, eguọmhandia nesọle da vae dọ taman ọlẹn ghe egbe daan ọne ọmọn. 52 Ọle da ki nọọn ele ẹghela egbe rẹ daan ọlẹn. Ele da yọle: “Inodẹ, egbẹghe agogo ọkpa bhi ọsodanmhẹn.”* 53 Ọne okpea da wo lẹn ghe, ẹghe nin Jesu rẹ yọle egbe daan ọmọn nọnsọle, ọle egbe rẹ wo daan ọlẹn. Bhiriọ, ọle bi azagba-uwa nọnsọle da mhọn urẹọbhọ da ọle. 54 Ọnan hi emhin ọhan-ilo nọnzi eva nin Jesu lu ẹghe nin ọle rẹ na bhi Judia vae bhi Galili.

5 Ẹghe iluemhin ọsi ibhokhan Ju ki sẹ, Jesu da ha khian Jerusalẹm. 2 Bhi Jerusalẹm, eji amẹn da nẹ koko ribhọ natiọle Bẹtzeta bhi urolo Hibru. Ọ da ha ribhi obọ ọsi Geti Ohuan. Ukporina* isẹn, ele nẹga ọle. 3 Eria ne bunbun ne khọnmhọn, ene ruẹlo, ene akhun, bi ẹbho ne obọ bi oẹ nọnsele nẹghẹ a, da nowẹ bhi ene ukporina. 4* —— 5 Okpea ọkpa da ha ribhi enin, nọn mọn da khọnmhọn bhi ikpe elẹnlẹn nyan ọgban.* 6 Jesu lẹnmhin ghe, ọ ki ree nin ọne okpea nan mọn da khọnmhọn. Ọle ki daghe ọle bhi eji ọ da nowẹ, ọle da nọọn ọlẹn yọle: “Uwẹ be guanọ nin egbe daan uwẹ?” 7 Ọne okpea da taman ọlẹn yọle: “Ọwanlẹn, mẹn imhọn ọria nọn ha mun mẹn fiọbhi ọne amẹn bhi ẹghe nin ọne amẹn rẹ tughu. Mẹn a ha guanọ nin mẹn nabhọ, ọria ebhebhe ki ka mẹn nabhọ.” 8 Jesu da taman ọlẹn yọle: “Kpanọ! Re ewa nọnsẹ, uwẹ ha munhẹn ha khian.” 9 Bhi ọne ẹghe nin tee, egbe da daan ọne okpea. Ọle da re ewa nọnsọle, yẹ munhẹn ha khian nẹga.

Ukpẹdẹ Sabati ọne emhin nan rẹ sunu. 10 Ibhokhan Ju eso da ki munhẹn ha taman ọne okpea yọle: “Ẹlẹnan hi sabati. Uwẹ gbe uhi a nin uwẹ rẹ mun ewa mhọnlẹn.” 11 Ọle da ki taman ele yọle: “Ọne ọria nọn re egbe daan mẹn, ọle yọle nin mẹn re ewa nọnsẹmhẹn, yẹ munhẹn ha khian.” 12 Ele da nọọn ọlẹn yọle: “Họla hi ọne ọria nọn taman uwẹ nin uwẹ re ewa nọnsẹ, uwẹ ha yẹ munhẹn ha khian?” 13 Ọne okpea bha lẹn ọria nọn hinmhin ọlẹn. Rẹ deba ọnin, Jesu bhọ sibhi enin re nabhi ẹwẹ ene usun ẹbho.

14 Akizẹbue, Jesu da miẹn ọne okpea bhi uwa oga, yẹ taman ọlẹn yọle: “Egbe daan uwẹ nian o. Hẹi yẹ lu emhin ebe, nin emhin nọn khọ gbera ebe ka sunu ji uwẹ hẹi sunu ji uwẹ.” 15 Ọne okpea da kpanọ dọ taman ibhokhan Ju ghe, Jesu re egbe daan ọlẹn. 16 Bhiriọ, ene ibhokhan Ju da ha kpokpo Jesu, ranmhude ukpẹdẹ Sabati ọle rẹ ha lu ene emhin ọhan-ilo nan. 17 Jesu da taman ele yọle: “Rẹ sẹbhi ẹlẹnan, Aba imẹn sẹyẹ wẹnna, imẹn dẹ yẹ ha wẹnna.” 18 Ene ibhokhan Ju ki họn ọnan, ele da kie manman ha guanọ nin ele gbe ọle a. Ele da ha riale ghe, ọle gbobọra uhi ọsi Sabati, yẹ ha re egbe ọle ọbhi ihe ọsi Osẹnobulua, nin ọle rẹ yọle ghe ọmọn nọnsi Osẹnobulua ọle khin.

19 Jesu da ki wanniẹn ele yọle: “Bhi ọsi ẹmhọanta, mẹn taman ibha ghe, emhin soso iribhọ nin ọne ọmọn lu beji ọ ghọn ọlẹn. Ebi ọle daghe Aba ọle lu ọle yẹ lu. Emhin nọn hi ki rẹ khin nin ọne Aba lu, ọle ọne Ọmọn yẹ lu. Ọle ki lu ọle beji Aba ọle rẹ lu ọle. 20 Ọne Aba wo manman hoẹmhọn ọne Ọmọn, ọle da yẹ re emhin rebhe nin ọle lu man ọlẹn. Ọle bhọ dẹ yẹ re emhin ne kpọnọ nẹ ọnan man ọlẹn, beji ilo ha da han bha. 21 Beji ọne Aba rẹ riọ ene yulu kpanọ yẹ re iẹnlẹn nin ele, iriọ ọne Ọmọn yẹ rẹ re iẹnlẹn nin ọria nọn hi ki rẹ khin nọn ghọn ọlẹn. 22 Ọne Aba ibhuohiẹn ọria soso, ọle ze ibhuohiẹn obọ nin ọne Ọmọn 23 beji a ha miẹn ghe ọrebhe ki ha mun ekpẹn nin ọne Ọmọn, beji ele rẹ mun ekpẹn nin ọne Aba. Ọria nọn hi ki rẹ khin nọn bha mun ekpẹn nin ọne Ọmọn, ọle bha yẹ mun ekpẹn nin ọne Aba nọn je ọne Ọmọn re. 24 Bhi ọsi ẹmhọanta, mẹn taman ibha ghe, ọria nọn hi ki rẹ khin nọn ka imẹn ehọ, yẹ mhọn urẹọbhọ da ọnọn je mẹn re, dẹ ha mhọn iẹnlẹn ọsi ighegheghe. A ida bhuohiẹn gbe ọle. Ọle ki diabe ọria nọn rẹ yu nọn kie dọ ha nyẹnlẹn.

25 “Bhi ọsi emhọanta, ọne ẹghe vade nin ene yulu ha rẹ họn urulu ọsi Ọmọn nọnsi Osẹnobulua. Ene hẹnmhọn nanlẹn ki ha nyẹnlẹn. Ọne ẹghe bhọ a ki ye nian. 26 Ọne Aba sabọ re iẹnlẹn nin ọria. Ọle da yẹ re ọne ahu nin ọne Ọmọn rẹ ha re iẹnlẹn nin eria. 27 Ọle da yẹ re ahu nanlẹn rẹ ha bhuohiẹn, ranmhude ọle hi Ọmọn nọnsi okpea. 28 Bha hẹi ji ọnan han bha ilo, ranmhude ọne ẹghe vade nin ọrebhe ne ribhi idin ha rẹ họn urulu ọsi Ọmọn nọnsi Osẹnobulua. 29 Ele ki dagbare. Ene lu emhin esili ki riọkpanọ dọ ha nyẹnlẹn. Ene lu emhin ebe ki riọkpanọ dọ miẹn ibhuohiẹn. 30 Emhin soso iribhọ nin mẹn lu beji ọ ghọn mẹn. Ebi Aba imẹn taman imẹn, ọle imẹn rẹ bhuohiẹn. Mẹn bhuohiẹn nọn gbale, ranmhude ọ iyi iho nọnsẹmhẹn mẹn lu. Iho ọsi ọnọn je mẹn, ọle mẹn lu.

31 “Ahamiẹn imẹn tobọmẹn sọsali nin egbe mẹn, a ida rẹọ bhi ebi mẹn tale. 32 Ọria ribhọ nọn sọsali nin mẹn. Mẹn lẹnmhin ghe, ẹmhọanta ọle tale rẹji mẹn. 33 Ibha da je ẹbho bu Jọni. Ẹmhọn nin ọle tale rẹji mẹn da ha yi ẹmhọanta. 34 Ọrẹyiriọ, ọ iyi ọria mẹn khẹ nọn dọ sọsali nin mẹn. Beji bha ha da miuhọnmhọn, ọle zẹle nin mẹn da ta ene emhin nan. 35 Jọni wo diabe ukpa nọn ha bhala. Bhi obhi ẹghe khere, ọ da ha yẹẹ bha rẹ ha ghọnghọn bhi ẹfua nọnsọle. 36 Imẹn mhọn emhin nọn sọsali nin mẹn, gbera ọsali ọsi Jọni. Ene iwẹnna nan nin mẹn lu, nin Aba mẹn je mẹn nin mẹn lu, ele sọsali ọbhọ ghe ọne Aba je mẹn re. 37 Aba mẹn nọn je mẹn yẹ tobọle sọsali nin mẹn. Ibha bha sẹ ka họn urulu nọnsọle khẹ la daghe ọle khẹ, 38 sẹyẹ, ranmhude ibha bha rẹọ bhi ọne ọle je re, ọta nọnsọle iri bha bhi ọkhọle.

39 “Bha wo ha gua otọ Ebenọnkhiale, ranmhude bha riale ghe ọ dẹ rẹkpa bha rẹ miẹn iẹnlẹn ọsi ighegheghe; ọne Ebenọnkhiale, ọle bhọ tẹmhọn mẹn. 40 Ọrẹyiriọ, ibha bha guanọ nin bha bu mẹn re beji bha da miẹn iẹnlẹn. 41 Mẹn bha guanọ nin ẹbho ha gẹn mẹn. 42 Mẹn lẹnmhin ghe ibha bha hoẹmhọn Osẹnobulua. 43 Elin ọsi Aba imẹn mẹn rẹ vae,* ọkpakinọn, ibha bha miẹn mẹn ọbhi egbe. Ọria ọbhebhe ha tobọle vae, bha ki miẹn ọlẹn ọbhi egbe. 44 Be ibha ha rẹ mhọn urẹọbhọ da mẹn yẹ? Ibha ne guanọ nin ẹbho ha gẹn ibha. Ibha bha guanọ ogẹn nọn na bhi obọ Osẹnobulua vae. 45 Bha hẹi ha riale ghe, imẹn hi ọnọn ha taman ọne Aba ghe ibha bha lu nọnsẹn; Mozis nin bha mun udu nyan, ọle hi ọnọn wo ha tale ghe ibha bha lu nọnsẹn. 46 Bhi ọsi ẹmhọanta, ibha ha rẹọbhi ebi Mozis tale, bha ki mhọn urẹọbhọ da mẹn. Ranmhude, Mozis tẹmhọn mẹn bhi ebe nin ọle gbẹn. 47 Ahamiẹn ibha bha rẹọ bhi ebi Mozis gbẹn, be ibha ha ki rẹ rẹọ bhi ebi mẹn tale yẹ?”

6 Ọnin ki gbera, Jesu da fan Okpẹdẹ ọsi Galili ra, nan yẹ tiọle Okpẹdẹ ọsi Taiberias. 2 Usun ẹbho ne bunbun da ha rẹkhan ọlẹn, ranmhude, ele daghe emhin ọhan-ilo nin ọle a lu, nin ọle rẹ ha re egbe daan ẹbho. 3 Jesu bi edibo nesọle da ha khian uke oke dọ dotua. 4 Bhi ọne ẹghe nan, iluemhin ọsi Anagbera nin ibhokhan Ju lu da ha sire. 5 Jesu ki khua ẹlo okhun, ọle da daghe ọle ghe, usun ẹbho bu ọle vade. Bhiriọ, ọle da nọọn Filip yọle: “Ji mhan ha da miẹn ebale dẹ nin ene ẹbho nan le?” 6 Ọle gheghe nọọn Filip ọne ọta nan nin ọle rẹ dọnmhẹn ọlẹn, ranmhude ọle lẹn ebi ọle ho nin ọle lu. 7 Filip da wanniẹn ọlẹn yọle: “Mhan ha rẹ re dinariọs* iyisẹn eva* rẹ dẹ ibrẹd, ọ bhọ ida gba ene ẹbho nan obọ.” 8 Ọkpa bhi edibo nesọle natiọle Andru, nin obhio Saimọn Pita da taman ọlẹn yọle: 9 “Obhokhan okpea ọkpa ribhi enan nọn mhọn ibrẹd isẹn nan re bali lu, bi ikuẹkuẹ ehẹn eva. Sokpan, ọnan bha zẹwẹ miẹn ebi ọ ha gbe.”

10 Jesu da yọle: “Bha taman ene ẹbho nin ele dotua.” Ilunmhun wo ha ribhi enin. Bhiriọ ene ẹbho da dotua bhọ. Ọ sẹ ikpea uli isẹn* ne ha ribhi enin. 11 Jesu da ne ene ibrẹd, yẹ nan erọnmhọn ọbhọ. Ọle da gha ọle nin ene ẹbho ne dotua bhi enin. Iriọ ọle yẹ lu rẹji ene ikuẹkuẹ ehẹn. Ele rebhe da le sẹbhi ọkhọnlẹn. 12 Ele ki le ebale sẹbhi ọkhọnlẹn fo, Jesu da taman edibo nesọle yọle: “Bha koko ebale ne kẹre kugbe, beji a ha da miẹn ghe, a bha riia emhin soso a.” 13 Bhiriọ, ele da koko ene ebale kugbe. Ebale nin ene ẹbho le kẹre bhi ene ibrẹd isẹn, da vuọn okhuale igbeva.

14 Ene ẹbho ki daghe emhin ọhan-ilo nin ọle lu, ele da ha yọle: “Ọnan gene hi ọne akhasẹ nan yọle ọ dẹ vae bhi ọne agbọn nan.” 15 Jesu ki lẹn ghe, ele ho nin ele mun ọlẹn re ọle kiẹn ojie, ọle da sibhi enin re ha khian uke oke. Ọle ọkpa da ha ribhi enin.

16 Ọsemuan ki re, edibo nesọle da ha khian egbẹdẹ. 17 Ele da nabhi okọ yẹ gua ọle ha khian obọ ọsi Kapaniọn. Ebi ki lo bhi ọne ẹghe nan, ọkpakinọn, Jesu bha sẹ bu ele re. 18 Sẹyẹ, ọne okpẹdẹ da ha fiyo-fire, ranmhude okpahoho nọn ha fi. 19 Ele ki zẹ gua ọne okọ sẹbhi ebe ree sẹbhi imaili ea, la enẹn,* ele da daghe Jesu khian vade bhi uke amẹn. Ọle da ha sikẹ ele. Bhiriọ, ofẹn da wo manman ha mun ele. 20 Ọle da ki taman ele yọle: “Bha hẹi ji ofẹn mun bha! Imẹn nọn.” 21 Bhiriọ, ele da ki wo ji ọle da nabhi ẹkẹ ọne okọ. Bhi obhi ẹghe khere, ele da ki sẹbhi eji ele khian.

22 Ẹdẹ ki we, ene usun ẹbho ne ribhi obọ nọnkẹle bhi ọne okpẹdẹ da kere ghe, okọ soso iyẹ ribhi egbẹdẹ. Obhi okọ khere nọn rẹ ha ribhi enin, ọle edibo nesi Jesu na i kpanọ, sokpan, Jesu bha rẹkhan ele nabhọ. 23 Ọkpakinọn, okọ eso da na bhi Taiberias vae bhi egbegbe eji Jesu da nan erọnmhọn ọbhi ibrẹd rẹ re ebale nin ele le. 24 Ene ẹbho ki kere ghe, Jesu bi edibo nesọle kpanọ fo, ele da nabhi ene okọ ha khian Kapaniọn dọ guanọ Jesu.

25 Ele ki sẹbhi obọ nọnkẹle bhi ọne okpẹdẹ, ele da miẹn ọlẹn. Ele da ki nọọn ọlẹn yọle: “Rabai, ẹghela uwẹ rẹ sẹ enan?” 26 Jesu da wanniẹn ele yọle: “Bhi ọsi ẹmhọanta, mẹn taman ibha ghe, ọ iyi ranmhude emhin ọhan-ilo nin bha daghe zẹle nin bha da ha guanọ imẹn. Ebale nin mẹn rẹ nin bha le sẹ ọkhọnlẹn, ọle zẹle nin bha da ha guanọ imẹn. 27 Bha hẹi yẹ ha khu ọbhi ebale nọn riia a, ọkpakinọn, bha wẹnna ọbhi ebale nọn re iẹnlẹn ọsi ighegheghe nin ọria—ebale nin Ọmọn nọnsi okpea ha re nin bha; ranmhude, ọle Osẹnobulua nin Aba re ahu nan rẹ lu iriọ.”

28 Ele da ki nọọn ọlẹn yọle: “Be imhan ha rẹ sabọ lu ebe ti Osẹnobulua bhọ yẹ?” 29 Jesu da wanniẹn ele yọle: “Ọnan hi iho nọnsi Osẹnobulua, ghe, nin bha mhọn urẹọbhọ da ọne ọle je re.” 30 Ele da ki nọọn ọlẹn yọle: “Emhin ọhan-ilo nela uwẹ ha lu, beji mhan ha da daghe ọle yẹ mhọn urẹọbhọ da uwẹ? Iwẹnna ọhan-ilo nela uwẹ ha lu? 31 Aba imhan nin ẹdẹlẹ le mana ẹghe nin ele rẹ ha ribhi ojẹgbo. Ebenọnkhiale yọle: ‘Ọle da na bhi okhun re ebale nin ele le.’” 32 Jesu da ki taman ele yọle: “Bhi ọsi ẹmhọanta, mẹn taman ibha ghe, Mozis bha na bhi okhun re ibrẹd ọsaje nin bha le. Aba imẹn hi ọnọn na bhi okhun re ibrẹd ọsaje nin bha le nian. 33 Ọnọn na bhi okhun vae dọ re iẹnlẹn nin ọne agbọn nan, ọle hi ibrẹd nọn na obọ Osẹnobulua vae.” 34 Ele da taman ọlẹn yọle: “Ebeanlẹn imhan, wo ha re ọne ibrẹd nan nin mhan.”

35 Jesu da taman ele yọle: “Imẹn hi ibrẹd ọsi iẹnlẹn. Ọnọn ki rẹ khin nọn bu mẹn re, ohanmhẹn iyẹ da kie gbe ọle. Sẹyẹ, ọnọn hi ki rẹ khin nọn mhọn urẹọbhọ da mẹn, ohanmhẹn amẹn iyẹ da kie gbe ọle. 36 Ọkpakinọn, beji mẹn taman ibha, ibha rẹ miẹn mẹn, ibha bha mhọn urẹọbhọ da mẹn. 37 Ọrebhe nin Aba imẹn ne nin mẹn dẹ bu mẹn re. Mẹn ida khu ọria soso nọn bu mẹn re fia. 38 Iho ọsi ọnọn je imẹn re, ọle mẹn na okhun vae dọ lu. Ọ iyi iho nọnsẹmhẹn. 39 Ọnan hi iho ọsi ọnọn je imẹn re: nin ọsoso hẹi yulua bhi ẹwẹ ene ọle ne nin mẹn, ọkpakinọn, nin mẹn riọ ele kpanọ bhi ukpẹdẹ nọn kike. 40 Iho nọnsi Aba imẹn ọle hi ghe, nin ọrebhe ne lẹn ọne Ọmọn, ne yẹ mhọn urẹọbhọ da ọle miẹn iẹnlẹn ọsi ighegheghe, sẹyẹ, imẹn ki riọ ele kpanọ bhi ukpẹdẹ nọn kike.”

41 Ene ibhokhan Ju da ki ha guinẹzọ, ranmhude ọle yọle ghe, ọle hi ọne ibrẹd nọn na bhi okhun vae. 42 Ele da ha yọle: “Ọnan ibe yi Jesu nin ọmọn nọnsi Josẹf? Mhan lẹn aba ọle bi inẹn ọlẹn. Bezẹle nin ọle da ki ha yọle, ‘Okhun mẹn na vae’?” 43 Jesu ki da wanniẹn ele, yẹ taman ele yọle: “Bha hẹi yẹ guinẹzọ. 44 Ọria soso ida sabọ bu mẹn re, sade Aba imẹn nọn je imẹn bha re ọle bu mẹn re. Sẹyẹ, bhi ukpẹdẹ nọn kike, mẹn ki riọ ọle kpanọ. 45 A gbẹn ọlẹn ọbhi ebe ọsi ene akhasẹ yọle: ‘Jehova* dẹ man ele rebhe emhin.’ Ọrebhe ne ka ọne Aba ehọ, yẹ miẹn ebi ele luẹle ọbhi egbe, ele bu mẹn re. 46 Gbera imẹn, ọria soso bha sẹ miẹn ọne Aba. Imẹn nin Osẹnobulua je re ọkpa sẹ miẹn ọne Aba. 47 Bhi ọsi ẹmhọanta mẹn taman ibha ghe, ọria nọn hi ki rẹ khin nọn mhọn urẹọbhọ da mẹn, ọle hi ọnọn ha miẹn iẹnlẹn ọsi ighegheghe.

48 “Imẹn hi ibrẹd ọsi iẹnlẹn. 49 Aba bha nin ẹdẹlẹ rẹ le mana bhi ẹkẹ ojẹgbo, ele da yẹ yu. 50 Ọkpakinọn, ọria nọn le ibrẹd nọn na okhun vae ida yu. 51 Imẹn hi ọne ibrẹd nọn nyẹnlẹn, nọn na bhi okhun vae. Ọria ha le bhi ọne ibrẹd nan, ọle ki ha nyẹnlẹn bhi ighegheghe; bhi ọsi ẹmhọanta, efun nọnsẹmhẹn ọle hi ọne ibrẹd nin mẹn ha re nin ọne agbọn nan beji ele ha da miẹn iẹnlẹn.”

52 Ene ibhokhan Ju da munhẹn ha ne egbe ele gui. Ele da ha yọle: “Be ọne okpea nan ha rẹ re efun nọnsọle nin mhan le yẹ?” 53 Jesu da ki taman ele yọle: “Bhi ọsi ẹmhọanta, mẹn taman ibha ghe, ahamiẹn ibha bha le efun ọsi Ọmọn nọnsi okpea, yẹ wọn aranlẹn nọnsọle, ibha ida ha mhọn iẹnlẹn. 54 Ọnọn hi ki rẹ khin nọn le efun nọnsẹmhẹn, yẹ wọn aranlẹn nọnsẹmhẹn dẹ miẹn iẹnlẹn ọsi ighegheghe. Sẹyẹ, mẹn ki riọ ọle kpanọ bhi ukpẹdẹ ọkike. 55 Ebale ọsaje, ọle efun nọnsẹmhẹn khin. Sẹyẹ, anyọn ọsaje, ọle aranlẹn nọnsẹmhẹn khin. 56 Ọria nọn hi ki rẹ khin nọn le efun nọnsẹmhẹn, yẹ da aranlẹn nọnsẹmhẹn ki ha ribhi ibo nọnsẹmhẹn. 57 Ranmhude ọne Aba nọn je mẹn nyẹnlẹnmhin, imẹn da sẹyẹ ha mhọn iẹnlẹn. Iriọ sẹyẹ nọn, ọria nọn le efun nọnsẹmhẹn dẹ ha nyẹnlẹn ranmhude imẹn. 58 Ọnan hi ọne ibrẹd nọn na okhun vae. Ọnan iyi ọne ibrẹd nin aba ibha nin ẹdẹlẹ le, nin ele da sẹyẹ yu. Ọnọn le ọne ibrẹd nan dẹ nyẹnlẹn bhi ighegheghe.” 59 Ẹghe nin ọle rẹ ha man emhin bhi sinagọg* nọn ribhi Kapaniọn ọle rẹ ta ene ọta nan.

60 Edibo nesọle ki họn ọnan, ene bunbun bhi ẹwẹ ele da ha yọle: “Be a tie enan bhi ọta? Ọnan iyi ọta nan kaehọ ọle.” 61 Ranmhude Jesu lẹnmhin ghe, edibo nesọle guinẹzọ ba ebi ọle tale, ọle da nọọn ele yọle: “Ọnan be han ibha ilo? 62 Be ibha ha ki khian yẹ sade bha daghe Ọmọn nọnsi okpea fikie khian okhun? 63 Ọne ẹlinmhin, ọle re iẹnlẹn nin ọria, ọ iyi ọne efun. Ene ọta nan nin mẹn taman ibha, obọ ẹlinmhin nọn khiale ọ na vae, sẹyẹ, ọ re iẹnlẹn nin ọria. 64 Ọkpakinọn, eso ribhi ẹwẹ bha ne imhọn urẹọbhọ.” Rẹ na otọ ha de, ọle Jesu rẹ lẹn ene ida ha mhọn urẹọbhọ bi ọnọn ha mun ọlẹn khiẹn. Ọnan zẹle nin ọle da yọle ghe, eso ribhi ẹwẹ bha ne imhọn urẹobhọ. 65 Ọle da yẹ yọle: “Ọnan zẹle nin mẹn da taman ibha ghe, ọria soso ida sabọ bu mẹn re sade ọne Aba bha re otọ nanlẹn.”

66 Ranmhude ọnan, ene bunbun bhi edibo nesọle da fikie bu emhin nin ele ka fikekegbe. Ele bha yẹ ha rẹkhan ọlẹn. 67 Jesu da ki nọọn ene etuegbe igbeva yọle: “Ibha dẹ be yẹ rẹkhan ele?” 68 Saimọn Pita da ki wanniẹn ọlẹn yọle: “Ebeanlẹn imẹn, họla mhan ha ki bu? Iman-emhin nesẹ, ele ha sabọ re ọria miẹn iẹnlẹn ẹdẹdẹmhẹndẹ. 69 Imhan mhọn urẹọbhọ da ẹ. Sẹyẹ, mhan lẹn ghe, uwẹ hi Ọnọn Khiale nin Osẹnobulua je re.” 70 Jesu da taman ele yọle: “Imẹn hi ọnọn zẹ ibha itue igbeva, ọkpakinọn, ọbhahoghe* ọkpa bhi ẹwẹ bha khin.” 71 Judas nin ọmọn nọnsi Saimọn Iskarọt, ọle Jesu ha tẹmhọn ọlẹn. Arẹmiẹn ọkpa bhi ene etuegbe igbeva ọle khin, ọle hi ọne ọria nọn ha mun Jesu khiẹn.

7 Jesu da sẹyẹ ha ribhi agbaẹbho ọsi Galili. Ọle da ha lu iwẹnna oga bhi enin. Ọle bha guanọ nin ọle dọ ha lu iriọ bhi Judia, ranmhude ọle lẹnmhin ghe ibhokhan Ju* guanọ nin ele gbe ọle a. 2 Bhi ọne ẹghe nan, iluemhin nin ibhokhan Ju lu nin ele da nyẹnlẹn bhi ibọkpọ da ha sire. 3 Ibhio ọle nin ikpea da ki taman ọlẹn yọle: “Kpanọ ha khian Judia beji edibo nesẹ ha da yẹ daghe iwẹnna nin uwẹ lu. 4 Ọria ida debhi ẹkhokho a ha lu emhin sade ọle guanọ nin ẹbho rebhe lẹn ọlẹn. Beji a miẹn ghe uwẹ lu ene emhin nan, dọ lu ele bhi isira ẹbho rebhe.” 5 Bhi ọsi ẹmhọanta, ibhio ọle bha ha mhọn urẹọbhọ da ọle. 6 Jesu da ki taman ele yọle: “Ẹghe nọnsẹmhẹn bha sẹ sẹ. Bhi ọsẹbha, bha dẹ sabọ ha khian ọne iluemhin bhi ẹghe nọn hi ki rẹ khin. 7 Emhin soso iribhọ nọn ha re ọne agbọn nan he ibha. Ọkpakinọn, ele he imẹn, nin mẹn rẹ ha tale ghe ebi ele lu imhẹn. 8 Bha ha khian ọne iluemhin. Imẹn isẹ vade, ranmhude, ẹghe nọnsẹmhẹn bha sẹ sẹ.” 9 Ọle ki ta ene ẹmhọn nan man ele fo, ọle da sẹyẹ debhi Galili a.

10 Ọkpakinọn, ibhio ọle ki kpanọ ha khian ọne iluemhin fo, ọle da do kpanọ ha khian. 11 Ibhokhan Ju da ki munhẹn ha guanọ ọle bhi ọne iluemhin. Ele da ha yọle: “Ọne okpea nan ki bho?” 12 Ẹbho ne bunbun da ha ta ikuẹkuẹ ọta ọle bhi egbe. Eso da ha yọle: “Ọria esili ọne okpea khin.” Enekẹle da ha yọle: “Ọ iyi ọria esili, ọ hiẹ ẹbho.” 13 Bhi ọsi ẹmhọanta, ọria soso iribhọ nọn gbudu tẹmhọn ọlẹn dagbare, ranmhude ele da ha mun ofẹn ene ibhokhan Ju.

14 A ki tiọle ikpẹdẹ enẹn nan mun ọne iluemhin hẹn, Jesu da nabhi ẹkẹ uwa oga yẹ munhẹn ha man emhin. 15 Ọnan da wo han ene ibhokhan Ju ilo, rẹ sẹbhọ ghe, ele da yọle: “Be ọne okpea nan rẹ lẹn otọ Ebenọnkhiale sẹ inian yẹ? Ọle bha yo isiku.”* 16 Jesu da ki wanniẹn ele. Ọle da yọle: “Emhin nin mẹn man iyi ọsẹmhẹn, iman-emhin ọsi ọnọn je imẹn re nọn. 17 Ọria nọn hi ki rẹ khin nọn guanọ nin ọle lu iho nọnsi Osẹnobulua dẹ lẹnmhin ghe, emhin nin mẹn man iyi ọsẹmhẹn, ghe ọsi Osẹnobulua nọn. 18 Ọria nọn hi ki rẹ khin nọn man ebe ri ọle bhi ọkhọle, ogẹn ọle guanọ. Ọkpakinọn, ọnọn guanọ nan re uyi nin ọnọn je ọle re, ọria ẹmhọanta ọne ọria nan khin. Sẹyẹ, emhin ebe iri ọle bhi obọ. 19 Mozis re ọne Uhi nin bha. Ọ ibe yi iriọ? Ọkpakinọn, bha ire obọ rẹkhan ọlẹn. Bezẹle nin bha da ha guanọ nin bha gbe mẹn an?” 20 Ene usun ẹbho da wanniẹn ọlẹn yọle: “Elinmhin ebe kpokpo ẹ. Họ bhọ guanọ nọn gbe ẹ a?” 21 Jesu da taman ele yọle: “Emhin ọhan-ilo ọkpa nin mẹn lu, ọle re ilo han bha nian? 22 Bha ria eria nyan ọne ẹmhọn nan: Mozis da yọle nin bha ha ruẹ. Ọ iyi ọsi ghe obọ Mozis ọ na vae, obọ aba ibha nin ẹdẹlẹ ọ na vae. Ọ ha rẹ ha yi ukpẹdẹ Sabati, bha ki yẹ ruẹ. 23 Ahamiẹn bha ruẹ ọmokpea bhi ukpẹdẹ Sabati, beji a ha da miẹn ghe ibha bha gbe uhi ọsi Mozis a, bezẹle nin ẹkẹ mẹn ki da khọ bha, ghe mẹn re egbe daan ọria bhi ukpẹdẹ Sabati? 24 Bha hẹi yẹ ha ghe ẹlo rẹ bhuohiẹn. Bha ha bhuohiẹn nọn gbale.”

25 Ibhokhan Jerusalẹm eso da ki munhẹn ha yọle: “Ọnan ibe yi ọne okpea nin ele ha guanọ nin ele gbe a? 26 Sẹ ghe, ọle wo talọ bhi ogbakha. Ele bha zẹwẹ nanlẹn talọ. La ele be dọ kere ghe ọle hi Kristi? 27 Mhan lẹn eji ọne okpea nan na vae; ọkpakinọn, Kristi ha vae, ọria soso ida lẹn eji ọle na vae.” 28 Ẹghe nin Jesu ki rẹ ha man emhin bhi uwa oga, ọle da reso yọle: “Ibha lẹn mẹn, yẹ lẹn eji mẹn na vae. Ọ iyi mẹn tobọmẹn vae. Ọnọn je imẹn re gene ribhọ. Sokpan, ibha bha lẹn ọlẹn. 29 Mẹn lẹn ọlẹn, ranmhude, elin nọnsọle mẹn rẹ vae. Sẹyẹ, Ọle hi ọnọn je mẹn re.” 30 Ele da ki ha guanọ nin ele mun ọlẹn. Ọkpakinọn, ọria soso bha sabọ mun ọlẹn, ranmhude, ẹghe nọnsọle bha sẹ sẹ. 31 Ene emhin nan rẹ sunu, ẹbho ne bunbun da mhọn urẹọbhọ da ọle. Ele da ha yọle: “Kristi ha bhọ rẹ vae, ọle dẹ be lu emhin ọhan-ilo ne gbera ebi ọne okpea nan lu?”

32 Ibhokhan Farisi ki họn ebe ene ẹbho nan ha ta rẹji Jesu, ele bi ene ohẹn ne khua da je unakpa nin ele dọ mun ọlẹn. 33 Jesu da taman ele yọle: “Obhi ẹghe khere mẹn ha ki deba bha gbe ọkuẹsẹ mẹn kpanọ ha bu ọnọn je imẹn re. 34 Ibha ki ha guanọ mẹn. Ọkpakinọn, bha ida miẹn mẹn. Sẹyẹ, bha ida sabọ vae bhi eji mẹn ye.” 35 Ene ibhokhan Ju da ki munhẹn ha nọọn egbe ele yọle: “Ji ọne okpea na bhọ khian, nan ha da miẹn ghe mhan bha yẹ sabọ miẹn ọlẹn? Ibhokhan Ju ne ribhi ẹwẹ ibhokhan Grik ọle be bu khian, nin ọle dọ man ene ibhokhan Grik emhin? 36 Be ọle re ọle ta nin ọle rẹ yọle ghe, ‘Ibha dẹ guanọ mẹn, ọkpakinọn, bha ida miẹn mẹn. Sẹyẹ bha ida sabọ vae bhi eji mẹn ye’?”

37 Bhi ukpẹdẹ nọn kike bhi ọne iluemhin, nọn yi ukpẹdẹ nin ọne iluemhin rẹ nyọn, Jesu da kpanọ mundia yẹ si urulu okhun rẹ yọle: “Ọria nọn hi ki rẹ khin nin ohanmhẹn amẹn gbe, ji ọle bu mẹn re, mẹn ki re amẹn nanlẹn wọn. 38 Beji Ebenọnkhiale tale, ọria ha mhọn urẹọbhọ da mẹn, ‘Amẹn nọn re iẹnlẹn nin ọria ki ha nẹkua bhi egbe nọnsọle.’” 39 Ẹlinmhin nọn khiale ọle ha tẹmhọnlẹn, nin ene mhọn urẹọbhọ da ọle ha miẹn. A bha sẹ rẹ ẹlinmhin nọn khiale nin ẹbho bhi ọne ẹghe nan, ranmhude, a bha sẹ re uyi nin Jesu. 40 Ẹbho eso ne ribhi ọne usun ne họn ebi ọle tale da munhẹn ha yọle: “Ọnan gene hi ọne akhasẹ.” 41 Eso da ha yọle: “Ọnan hi ọne Kristi.” Ọkpakinọn, enekẹle da ha yọle: “Kristi ida na bhi Galili vae. 42 Ebenọnkhiale bha be tale ghe, ulin-uwa ọsi Devid ọne Kristi ha na vae? Ọ bha be yẹ tale ghe, Bẹtlẹhẹm nọn yi idunmhun ọsi Devid ọ ha na vae?” 43 Iwaegbea da zegbere bhi ẹwẹ ele, ranmhude ẹmhọn ọlẹn. 44 Eso bhi ẹwẹ ene ẹbho da rẹ ha guanọ nin ele mun ọlẹn. Ọkpakinọn, ele bha sabọ.

45 Ene unakpa da ki fikie bu ibhokhan Farisi bi ene ohẹn ne khua. Ele da nọọn ele yọle: “Bezẹle nin ibha bha da mun ọlẹn re bhi enan?” 46 Ene unakpa da yọle: “Mhan bha sẹ miẹn ọria nọn re inian talọ khẹ.” 47 Ene ibhokhan Farisi da ki yọle: “Ọle ki gbo hiẹ bha? 48 A bha miẹn ọkpa bhi ene gbẹloghe, la ibhokhan Farisi soso ne mhọn urẹọbhọ da ọle. 49 Ene ẹbho nan ne a ka Jesu ehọ, ele bha lẹn Uhi. Eria nan fi ele unun ele khin.” 50 Nikodemọs nọn ka bu Jesu re, nọn yẹ yi ọkpa bhi ibhokhan Farisi da taman ele yọle: 51 “Beji Uhi nọnsẹmhan tale, a ibhuohiẹn gbe ọria sade a bha ka họn bhi unun ọlẹn fo yẹ họn ebi ọle lu.” 52 Ele da ki wanniẹn ọlẹn yọle: “Ọnela uwẹ bhọ ye bhọ? Ibhokhan Galili uwẹ ki deba? Dọ guanọ otọle fẹghe, uwẹ ki kere ghe, akhasẹ soso ida na bhi Galili vae.”*

8 12 Jesu da gbo kie ne ele talọ. Ọle da taman ele yọle: “Imẹn hi ẹfua ọsi ọne agbọn nan. Ọnọn hi ki rẹ khin nọn rẹkhan mẹn, ọ ida khian bhi ebiuki, ọle ki ha mhọn ẹfua nọn re iẹnlẹn nin ọria.” 13 Ene ibhokhan Farisi da taman ọlẹn yọle: “Uwẹ sọsali nin egbuwẹ. Ebi uwẹ ta iyi ẹmhọanta.” 14 Jesu da taman ele yọle: “Aharẹmiẹn imẹn sọsali nin egbe mẹn, ebi mẹn tale ẹmhọanta nọn, ranmhude, mẹn lẹn eji mẹn na vae, mẹn yẹ lẹn eji mẹn khian. Ọkpakinọn, ibha bha lẹn eji mẹn na vae, ibha bha yẹ lẹn eji mẹn khian. 15 Uwedẹ nin eria rẹ bhuohiẹn, ọle bha rẹ bhuohiẹn; imẹn ibhuohiẹn ọria soso. 16 Aharẹmiẹn mẹn bhuohiẹn, ohiẹn nọn gbale imẹn bhu, ranmhude ọ iyi mẹn ọkpa khian. Aba imẹn nọn je imẹn ne imẹn dia. 17 A bhọ gbẹn ọlẹn ọbhi Uhi nọnsẹbha ghe: ‘Itue eva ha sọsali ọbhi emhin, ẹmhọanta nọn.’ 18 Imẹn sọsali nin egbe mẹn, sẹyẹ, ọne Aba nọn je imẹn yẹ sọsali nin mẹn.” 19 Ele ki da nọọn Jesu yọle: “Ọne Aba ẹ bhọ bho?” Jesu ki da taman ele yọle: “Ibha bha lẹn mẹn, ibha bha yẹ lẹn Aba imẹn. Sade bha lẹn mẹn nọn, bha ha yẹ rẹ lẹn Aba imẹn.” 20 Ẹghe nin ọle rẹ ha man emhin bhi uwa oga, bhi eji a da re igho ọbhi ẹkpẹti, ẹghenin ọle rẹ ta ene ẹmhọn nan. Ọkpakinọn, ọria soso bha mun ọlẹn, ranmhude ẹghe nọnsọle bha sẹ sẹ.

21 Ọle da taman ele yọle: “Mẹn dẹ kpanọ, bha ki guanọ mẹn, ọrẹyiriọ, bha ki yu ọbhi olukhọ nọnsẹbha. Bha ida sabọ vae bhi eji mẹn khian.” 22 Ene ibhokhan Ju ki da ha yọle: “Ọle yọle ghe imhan ida sabọ vae bhi eji ọle khian. Ọle dẹ be gbe egbe ọle a?” 23 Jesu da ki taman ele yọle: “Ọne otọ nan bha ye; okhun mẹn na vae. Ọne agbọn nan bha na vae; ọ iyi ọne agbọn nan mẹn na vae. 24 Ọnan zẹle nin mẹn da taman ibha yọle: Bha dẹ yu ọbhi olukhọ nọnsẹbha. Ahamiẹn ibha bha rẹọbhọ ghe, ọria nin mẹn yọle mẹn khin ọle imẹn khin, bha ki yu ọbhi olukhọ nọnsẹbha.” 25 Bhiriọ, ele da ha nọọn ọlẹn yọle: “Họ bhọ uwẹ khin?” Jesu da wanniẹn ele yọle: “Be bhọ zẹle nin mẹn da ha riia ẹghe a rẹ ne ibha talọ? 26 Emhin bunbun nin mẹn ha ta rẹji bha. Sẹyẹ, emhin bunbun nin mẹn ha bhuohiẹn ọlẹn. Bhi ọsi ẹmhọanta, ọria ẹmhọanta ọnọn je imẹn khin. Sẹyẹ, emhin nin mẹn họn bhi unun ọlẹn, ele mẹn yẹ ta bhi ọne agbọn nan.” 27 Ele bha lẹn ghe ẹmhọn Aba ọle ọle tẹmhọnlẹn. 28 Jesu ki da taman ele yọle: “Ẹghe nin bha ha ki rẹ khan Ọmọn nọnsi okpea ọbhi oran fo, ẹghenin bha ha ki rẹ lẹn ghe imẹn hi ọle, ghe, ọ iyi emhin obọ mẹn imẹn lu; emhin nin Aba imẹn man mẹn ele, ele mẹn ta. 29 Ọnọn je imẹn re ne imẹn dia; ọle bha zẹ mẹn obọ. Ranmhude, ebe ti ọle bhọ mẹn lu ẹghe rebhe.” 30 Beji ọle ha ta ene emhin nan, ẹbho ne bunbun da mhọn urẹọbhọ da ọle.

31 Jesu da taman ibhokhan Ju ne mhọn urẹọbhọ da ọle yọle: “Edibo nesẹmhẹn bha gene khin, sade bha lu rẹkhan ọta nọnsẹmhẹn. 32 Sẹyẹ, bha ki lẹn ẹmhọanta, ọne ẹmhọanta ki fan ibha fia.” 33 Enekẹle ki da wanniẹn ọlẹn yọle: “Imọn nesi Ebraham mhan khin. Imhan bha sẹ ka ha yi igbọn ọsi ọria soso khẹ. Be ki zẹ nin uwẹ da yọle a dẹ fan imhan fia?” 34 Jesu ki da wanniẹn ele. Ọle da yọle: “Ọnọn hi rẹ khin nọn lu emhin ebe, igbọn ọle khin rẹji emhin ebe. 35 Rẹ gbera ọnin, igbọn idebhi uwa ọsi ebeanlẹn ọlẹn an rẹ ha khian. Ọmọn ọsi ọne ebeanlẹn, ọle debhi uwa a rẹ ha khian. 36 Bhiriọ, ọne Ọmọn ha fan ibha fia, ibha ki ha yi eria nan gene fan fia. 37 Mẹn lẹn ghe, imọn nesi Ebraham bha khin. Ọkpakinọn, ibha ho nin bha gbe mẹn an, ranmhude, ibha bha miẹn ọta nọnsẹmhẹn ọbhi egbe. 38 Emhin nin mẹn daghe Aba imẹn lu, bhi ẹghe nin mẹn rẹ ha ribhi eji ọle ye, ele imẹn ta. Bhi ọsẹbha, emhin nin bha luẹ bhi obọ aba ibha ọle bha lu.” 39 Ele ki da taman ọlẹn yọle: “Ebraham hi aba imhan.” Jesu da taman ele yọle: “Sade imọn nesi Ebraham bha khin, bha ha rẹ ha lu iwẹnna nin Ebraham lu. 40 Sokpan, bha guanọ nin bha gbe imẹn an. Imẹn nọn taman ibha ẹmhọanta nin mẹn họnlẹn bhi obọ Osẹnobulua. Ebraham bha lu ọnan. 41 Iwẹnna ọsi aba ibha bha lu.” Ele ki da taman ọlẹn yọle: “Imhan iyi imọn nan biẹ bhi ughe.* Aba ọkpa mhan mhọnlẹn. Ọle hi Osẹnobulua.”

42 Jesu da taman ele yọle: “Sade Osẹnobulua hi aba ibha, bha ha rẹ hoẹmhọn mẹn, ranmhude, Osẹnobulua je imẹn re, ọle zẹle nin mẹn da ribhi enan. Ọ iyi imẹn tobọmẹn vae. Ọkpakinọn, ọle hi ọnọn je imẹn re. 43 Ranmhude ibha bha guanọ nin bha miẹn emhin nin mẹn man ọbhi egbe, ọle zẹle ibha bha sabọ lẹn otọ ebi mẹn taman ibha. 44 Ojuu, ọle hi aba ibha. Emhin ne yẹ aba ibha, ọle bha guanọ nin bha ha lu. Ọgbugbele ọle ha khin ẹghe nin ọle rẹ munhẹn.* Ọle bha rẹkhan uwedẹ ẹmhọanta, ranmhude ẹmhọanta iri ọle bhi unun. Ọle ha bha ohoghe, ọle ki wo rẹman unan ọria nin ọle khin. Ọbhahoghe ọle khin, sẹyẹ, ọle hi aba ohoghe. 45 Ọkpakinọn, ibha bha rẹọ mẹn bhọ, arẹmiẹn mẹn ta ẹmhọanta man bha. 46 Họla bhi ẹwẹ bha ha sabọ yọle ghe mẹn lu emhin ebe? Ahamiẹn ghe, ẹmhọanta mẹn taman ibha, bezẹle nin bha ida rẹọ mẹn bhọ? 47 Imọn nesi Osẹnobulua, ele kaehọ ọta nọnsi Osẹnobulua. Ranmhude ibha iyi imọn nesi Osẹnobulua, ọle zẹle nin bha ida ka mẹn ehọ.”

48 Ene ibhokhan Ju ki da wanniẹn ọlẹn yọle: “Uwẹ bha be daghe ọle ghe ẹmhọanta mhan tale nin mhan rẹ yọle ghe obhokhan Sameria uwẹ khin, ghe ẹlinmhin ebe kpokpo ẹ?” 49 Jesu ki da wanniẹn ele yọle: “Ẹlinmhin-ebe ikpokpo mẹn. Imẹn mun ekpẹn nin Aba imẹn. Ọkpakinọn, ibha imun ekpẹn mẹn. 50 Mẹn iguanọ uyi nin egbe mẹn, Osẹnobulua, ọle guanọ nan re uyi nin mẹn. Ọle yẹ hi ọnọn bhuohiẹn. 51 Bhi ọsi ẹmhọanta mẹn taman ibha ghe, ọria nọn hi ki rẹ khin nọn re obọ rẹkhan ọta nọnsẹmhẹn, ọle ida yu ghee.” 52 Ene ibhokhan Ju ki da taman ọlẹn yọle: “Ọ ki wo gene khia bhi ẹlo ghe ẹlinmhin ebe kpokpo ẹ. Ebraham bha be yu? Ene akhasẹ bha be yẹ yu? Be uwẹ ha ki rẹ yọle ghe, ọria nọn re obọ rẹkhan ota nọnsẹ ida yu ghee? 53 Uwẹ bha kpọnọ nẹ aba imhan nin Ebraham. Ọle bha be yu? Ene akhasẹ bha be yẹ yu? Họla uwẹ bhọ riale uwẹ khin?” 54 Jesu da wanniẹn ele yọle: “Imẹn ha re uyi nin egbe mẹn, ọne uyi nin iyi emhin soso. Aba imẹn, ọle hi ọnọn re uyi nin mẹn, ọne ibha yọle ghe ọle hi Osẹnobulua nọnsẹbha. 55 Ọrẹyiriọ, ibha bha lẹn ọlẹn. Sokpan, imẹn lẹn ọlẹn. Mẹn ha yọle ghe mẹn bha lẹn ọlẹn, mẹn ki diabe ibha ne bha ohoghe. Mẹn lẹn ọlẹn, mẹn yẹ re obọ rẹkhan ọta nọnsọle. 56 Ebraham nin aba ibha da wo re eghọnghọn ha khẹ ọne ukpẹdẹ nin mẹn ha rẹ vae. Ọle da daghe ọle yẹ wo ha ghọnghọn.” 57 Ene ibhokhan Ju ki da taman ọlẹn yọle: “Uwẹ bha sẹ sẹ ikpe igbe nyan egbọ eva.* Be uwẹ ki rẹ miẹn Ebraham yẹ?” 58 Jesu ki da taman ele yọle: “Bhi ọsi ẹmhọanta, mẹn taman bha ghe, mẹn nyẹnlẹn fo ọkuẹsẹ Ebraham vae bhi ọne agbọn nan.” 59 Bhiriọ, ele da ne udo nin ele rẹ gbe ọle. Ọkpakinọn, Jesu da nẹhe. Ọle da sibhi uwa oga re.

9 Beji Jesu ha gbera, ọle da daghe okpea ọkpa nan biẹ ọle ọruẹlo. 2 Edibo nesọle da nọọn ọlẹn yọle: “Rabai emhin ebe nin ọne okpea nan lu be zẹ nan da biẹ ọle ọruẹlo, la ene biẹ ọle be lu emhin ebe?” 3 Jesu da wanniẹn ele yọle: “Ọ iyi emhin ebe nin ọne okpea nan lu la nin ene biẹ ọle lu zẹle nin ọle da ruẹlo. Emhin dia inian, beji ẹbho ha da daghe iwẹnna ọhan-ilo nọnsi Osẹnobulua bhi egbe ọne okpea nan. 4 Ọkhẹke nin mhan lu iwẹnna ọsi Ọnọn je imẹn re, beji ẹdẹ sẹyẹ gbanọn an, ranmhude ebi ha lo fo, ọria iyẹ da sabọ wẹnna. 5 Beji a miẹn ọne agbọn nan mẹn sẹyẹ ye, imẹn hi ẹfua ọsi ọne agbọn nan.” 6 Ọle ki ta ene ẹmhọn nan fo, ọle da tuẹsẹn ọbhi otọ, yẹ re ọle fun ekẹn. Ọle da re ọle gbo ọne okpea ẹlo. 7 Ọle da taman ọne okpea yọle: “Ha khian Siloam, dọ kpe ẹlo a bhi eji amẹn da nẹ koko bhi enin.” (Ebi a re Siloam ta hi, “Amẹn Nọn Tue Dagbare.”) Ọle da gene ha khian dọ kpe ẹlo a. Ọle ki fikiere, ọle da ha daghe.

8 Ediake nesọle bi eria ne lẹn ọlẹn ọbhi ọria nọn bhii emhin da ha yọle: “Ọnan ibe yi ọne okpea nan nọn bhii emhin?” 9 Eso da ha yọle: “Ọle nọn.” Enekẹle da ha yọle: “Ọ iyi ọle. Ọ gheghe khọ ọle.” Ọkpakinọn, ọne okpea da ha taman ele yọle: “Imẹn nọn.” 10 Ele ki da nọọn ọlẹn yọle: “Be ẹlo nọnsẹ ki rẹ taan yẹ?” 11 Ọle da taman ele yọle: “Okpea ọkpa natiọle Jesu, ọle re ẹsẹn rẹ fun ekẹn, yẹ rẹ ọle gbo mẹn ẹlo. Ọle da taman imẹn yọle: ‘Ha khian eji amẹn da nẹ koko bhi Siloam, uwẹ ha dọ kpe ọle a.’ Mẹn da gene ha khian dọ kpe ẹlo a, bhiriọ, mẹn da ha daghe.” 12 Bhiriọ, ele da nọọn ọlẹn yọle: “Ọne okpea bhọ bho nian?” Ọle da taman ele yọle: “Mẹn bha lẹn.”

13 Ele ki da re ọne okpea nọn rẹ ruẹlo bu ibhokhan Farisi. 14 Ukpẹdẹ Sabati ọle Jesu re ẹsẹn fun ekẹn rẹ taan ọne okpea nan ẹlo a. 15 Ene ibhokhan Farisi da gbo munhẹn ha nọọn ọne okpea ebi ọle rẹ munhẹn ha daghe yẹ. Ọle da taman ele yọle: “Ọle da re ekhuọrọ gbo mẹn ẹlo. Mẹn da dọ kpe ẹlo a. Mẹn da munhẹn ha daghe.” 16 Eso bhi ene Farisi da ha yọle: “Ọne okpea nan iyi ọria Osẹnobulua, ranmhude, ọle iri obọ rẹkhan uhi ọsi Sabati.” Enekẹle da ha yọle: “Ahamiẹn ọluemhiebe ọne okpea nan khin, be ọle ha rẹ sabọ lu emhin ọhan-ilo nọn sẹ inian yẹ?” Bhiriọ, iwaegbea da ha ribhi ẹwẹ ele. 17 Ele da gbo nọọn ọne okpea nọn rẹ ruẹlo yọle: “Beji a miẹn ghe ẹlo nọnsẹ ọle taan, họla uwẹ riale ghe ọne okpea nan khin?” Ọle da taman ele yọle: “Akhasẹ nọn.”

18 Ene Ju bha rẹ rẹọbhọ ghe, ọne okpea nan ka gene ruẹlo, ghe ọle ki daghe nian. Bhiriọ, ele da datie ene biẹ ọle. 19 Ele da nọọn ele yọle: “Ọmọn nọnsẹbha nin bha yọle bha biẹ ọle ọruẹlo be khọnan? Be ọle ki rẹ munhẹn ha daghe yẹ?” 20 Ene biẹ ọle da wanniẹn yọle: “Mhan lẹnmhin ghe, ọmọn nọnsẹmhan khọnan, ghe a biẹ ọle ọruẹlo. 21 Ọkpakinọn, ebi ọle ki rẹ munhẹn ha daghe yẹ nian, imhan bha lẹn. Imhan bha lẹn ọnọn taan ọle ẹlo a. Bha nọọn ọlẹn, ọle iyẹ yi obhokhan. Ọle dẹ sabọ talọ nin egbe ọle.” 22 Ranmhude ofẹn ene ibhokhan Ju nọn ha mun ene biẹ ọne okpea nan, ọle zẹle nin ele da re inian wanniẹn ele. Ranmhude, ene Ju ki tale fo ghe, ọnọn hi ki rẹ khin nọn yọle ghe Jesu hi Kristi, a dẹ sun ọlẹn fia bhi sinagọg. 23 Ọnan zẹle nin aba ọle bi inẹn ọlẹn da yọle: “Ọle iyẹ yi obhokhan. Bha nọọn ọle ọta.”

24 Bhi ọsi ugba ọzeva ele da tie ọne okpea nọn rẹ ruẹlo, yẹ taman ọlẹn yọle: “Ta ẹmhọanta nin uwẹ rẹ re ogẹn je Osẹnobulua; mhan lẹnmhin ghe, ọluemhiebe ọne okpea nan khin.” 25 Ọle da wanniẹn ele yọle: “Si ọluemhiebe ọle khin mẹn bha lẹn. Ọne mẹn lẹnlẹn hi, mẹn rẹ ka ruẹlo, ejayenan nian, mẹn ki daghe.” 26 Ele da nọọn ọlẹn yọle: “Be ọle khian uwẹ yẹ? Be ọle rẹ taan uwẹ ẹlo a yẹ?” 27 Ọle da wanniẹn ele yọle: “Mẹn ka taman ibha, ibha bha ka mẹn ehọ. Bezẹle nin bha ki da gbo kie ha nọọn mẹn? La ibha be ho nin bha kiẹn edibo nesọle?” 28 Ele da re ohu taman ọne okpea yọle: “Odibo nọnsọle uwẹ khin. Edibo ọsi Mozis mhan khin. 29 Mhan lẹnmhin ghe, Osẹnobulua ne Mozis talọ. Ọkpakinọn, imhan bha lẹn eji ọne okpa nan na vae.” 30 Ọne okpea da wanniẹn ele yọle: “Ọnan han mẹn ilo, ghe okpea nọn taan mẹn ẹlo a, ibha bha lẹn eji ọle na vae. 31 Mhan lẹnmhin ghe, Osẹnobulua ihọn erọnmhọn ọsi eria ne lu olukhọ. Ọkpakinọn, ọria nọn hi ki rẹ khin, nọn mun ofẹn Osẹnobulua, nọn yẹ lu iho nọnsọle, ọle Osẹnobulua ka ọle ehọ. 32 A bha sẹ ka họn khẹ ghe, a taan ẹlo ọsi ọria nan biẹ ọle ọruẹlo a. 33 Sade ọ iyi Osẹnobulua je ọne okpea nan re, ọle irẹ sabọ lu ene emhin nan soso.” 34 Ele da wanniẹn ọlẹn yọle: “Uwẹ nan biẹ bhi ẹkẹ olukhọ, uwẹ man mhan emhin?” Ele da sua ọle dagbare.

35 Jesu da họn ghe ele khu ọne okpea fia. Jesu ki miẹn ọlẹn, ọle da nọọn ọlẹn yọle: “Uwẹ be mhọn urẹọbhọ da Ọmọn nọnsi okpea?” 36 Ọne okpea da yọle: “Ọwanlẹn, họla ọle khin, beji mẹn ha da mhọn urẹọbhọ da ọle?” 37 Jesu da taman ọlẹn yọle: “Uwẹ miẹn ọlẹn. Ọle bhọ hi ọnọn ne ẹ talọ riọ.” 38 Ọle da yọle: “Imẹn mhọn urẹọbhọ da ẹ, Ebeanlẹn imẹn.” Ọle da debhẹre nanlẹn. 39 Jesu da yọle: “Ọnan zẹle nin mẹn da vae bhi ọne agbọn nan. Beji a ha da miẹn emhin nin mẹn lu ki re ẹbho ne ruẹlo ha daghe, sẹyẹ, ene daghe ki kiẹn eria ne ruẹlo.” 40 Ibhokhan Farisi ne ha ribhi enin ne họn ebi ọle tale da yọle: “Mhan bha ruẹlo.” 41 Jesu da taman ele yọle: “Sade bha ruẹlo nọn, bha irẹ ha mhọn olukhọ. Ọkpakinọn, ranmhude bha yọle, ‘Imhan daghe,’ olukhọ nọnsẹbha ri bha bhi uhọnmhọn.”

10 “Bhi ọsi ẹmhọanta, mẹn taman ibha ghe, ọria nọn bha rẹkhan odẹ nabhi ẹkẹ ogba ọsi ohuan, nọn hẹn okhun ọlẹn nabhọ, oyi ọle khin. 2 Ọkpakinọn, ọria nọn rẹkhan odẹ nabhọ, ọle hi ọnọn sun ene ohuan. 3 Ọnọn khẹ odẹ ki tuje odẹ a nanlẹn da nabhọ. Sẹyẹ, ene ihuan ki họn ukpuru nọnsọle. Ọle ki tie ihuan nesọle yẹ ne ele dagbare. 4 Ọle ha ki ne ihuan nesọle rebhe dagbare fo, ọle ki kalo nin ele. Sẹyẹ, ene ihuan ki rẹkhan ọlẹn, ranmhude, ele lẹn ukpuru nọnsọle. 5 Ele ida rẹkhan ọriọbhe, ele ki nẹ nanlẹn, ranmhude, ele bha lẹn urulu ọsi ọriọbhe.” 6 Jesu da ta ọne arẹkhọkhọ nan man ele. Ọkpakinọn, ele bha lẹn otọ ebi ọle ha tẹmhọnlẹn.

7 Jesu da ki taman ele yọle: “Bhi ọsi ẹmhọanta, mẹn taman bha ghe, imẹn hi ọne odẹ nin ene ihuan na gbera. 8 Ọrebhe ne vae, ne yọle ghe imẹn ele khin, oyi ele khin; sẹyẹ, ene ihuan bha ka ele ehọ. 9 Imẹn hi ọne odẹ; ọria nọn hi ki rẹ khin nọn rẹkhan uwedẹ nọnsẹmhẹn nabhi ọne ogba, ọle ki miuhọnmhọn. Ọle ki sabọ ha nabhi ọne ogba yẹ dagbare. Ọle ki yẹ miẹn ebale le. 10 Nan rẹ dọ ra, yẹ riia emhin an, ọle hi ọsi oyi. Ọkpakinọn, mẹn vae beji ene ihuan ha da ha mhọn iẹnlẹn ọsi ighegheghe. 11 Imẹn hi ọne ọsun-ohuan nọn mhẹn; ọne ọsun-ohuan nọn mhẹn muegbe nin ọle rẹ yu nin ihuan nesọle. 12 Ọria nan ha ọle osa nọn rẹ gbẹloghe ene ihuan ha daghe elanmhẹn nọn tuakọn* vade, ọle ki nẹgbe zẹ ene ihuan obọ, ranmhude, ọle iyi ọsun-ohuan, la ọnọn nyan ene ihuan. Ọne elanmhẹn nọn tuakọn ki mun bhi ene ihuan yẹ vẹ enekẹle kua. 13 Ẹmhọn ene ihuan bha rẹtẹ ọle. A gheghe re ọle nin ọle ha re ẹlo ọbhi ene ihuan. 14 Imẹn hi ọne ọsun-ohuan nọn mhẹn. Imẹn bi ihuan nesẹmhẹn lẹn egbe, 15 beji mẹn bi ọne Aba yẹ rẹ lẹn egbe. Mẹn muegbe nin mẹn rẹ yu nin ene ihuan.

16 “Imẹn mhọn ihuan ebhebhe ne iribhi ọne usun nan. Mẹn dẹ yẹ si ele koko, ele ki ka mẹn ehọ. Ele ki dọ ha yi usun ohuan ọkpa ne mhọn ọsun-ohuan ọkpa. 17 Ọnan zẹle nin ọne Aba da hoẹmhọn mẹn, ranmhude, mẹn re iẹnlẹn nọnsẹmhẹn fia, beji mẹn ha da kie miẹn ọlẹn. 18 Ọ iyi ọria miẹn mẹn ele. Imẹn tobọmẹn zẹ nin mẹn rẹ re ọle zọese. Mẹn mhọn ọne ahu nin mẹn rẹ re ọle zọese. Mẹn yẹ mhọn ọne ahu nin mẹn rẹ kie miẹn ọlẹn. Ọnan hi ebi Aba imẹn taman imẹn nin mẹn lu.”

19 Ene ẹmhọn nan nin Jesu tale da gbo si iwaegbea re bhi ẹwẹ ene Ju. 20 Ene bunbun bhi ẹwẹ ele da ha yọle: “Ẹlinmhin-ebe kpokpo ọle. Uhọnmhọn ọlẹn bha gba. Bezẹle nin bha da ha ka ọle ehọ?” 21 Enekẹle da ha yọle: “Ọria nin ẹlinmhin-ebe kpokpo ire inian talọ. Ẹlinmhin-ebe ida sabọ taan ẹlo ọsi ọria nọn ruẹlo a.”

22 Bhi ọne ẹghenin, a da ha lu Ayere Ọsi Ẹghe Nan Rẹ Re Uwa Oga Guẹ bhi Jerusalẹm. Ẹghe ulinlin ọne ẹghe nan ha khin. 23 Jesu da ha khian bhi uwa oga, bhi eji a tiọle ukporina ọsi Solomọn. 24 Ene ibhokhan Ju da vẹ nẹga ọle, yẹ nọọn ọlẹn yọle: “Bezẹle nin uwẹ da ha riia ẹghe a nin uwẹ rẹ ji mhan lẹn ọne uwẹ khin? Ahamiẹn uwẹ hi Kristi, wo taman imhan.” 25 Jesu da ki taman ele yọle: “Mẹn taman ibha, ọkpakinọn, ibha bha rẹọbhọ. Ene iwẹnna nin mẹn lu bhi elin nọnsi Aba imẹn re ọle man ọne mẹn khin. 26 Ibha bha rẹọbhọ, ranmhude bha iyi ihuan nesẹmhẹn. 27 Ihuan nesẹmhẹn hẹnmhọn nin mẹn, mẹn lẹn ele, sẹyẹ ele rẹkhan mẹn. 28 Mẹn dẹ re iẹnlẹn ọsi ighegheghe nin ele. Ele ida fuẹn an hiehie. Sẹyẹ, ọria iribhọ nọn ha ne ele si mẹn bhi obọ re. 29 Ebi Aba imẹn ne nin mẹn lu uhọnmhọn emhin gbera emhin nọn hi ki rẹ khin. Ọria iribhọ nọn ha sabọ ne ele sibhi obọ nọnsi Aba imẹn re. 30 Ọkpa imẹn bi ọne Aba khin.”*

31 Ene ibhokhan Ju da gbo ne udo nin ele rẹ gbe ọle. 32 Jesu da ki taman ele yọle: “Mẹn sẹ wo lu emhin ọhan-ilo ne bunbun man bha, beji ọne Aba yọle nin mẹn lu. Ọnela bhi ene emhin nan re ibha ha fino udo gbe mẹn?” 33 Ene ibhokhan Ju da wanniẹn ọlẹn yọle: “Ọ iyi ranmhude iwẹnna esili nin uwẹ lu rẹ imhan ha fino udo gbe uwẹ. Ranmhude uwẹ re unun ji Osẹnobulua, ọle rẹ imhan ha fino udo gbe uwẹ. Uwẹ nin ọria, uwẹ yọle ghe osẹ uwẹ khin.” 34 Jesu da wanniẹn ele yọle: “Bhi Uhi nọnsẹbha, ‘Osẹnobulua da yọle, “Osẹ bha khin.”’* 35 Ahamiẹn ọle tie eria ‘osẹ,’ eria nin ọle yọle ọkhẹke nan re oya nan, sẹyẹ, a ida sabọ fi ebi ọle tale denọ, 36 be ki zẹ nin bha da ha yọle ghe, mẹn re unun je Osẹnobulua nin mẹn rẹ yọle Ọmọn nọnsi Osẹnobulua mẹn khin? Imẹn nin ọne Aba kpe khia, yẹ je vae bhi ọne agbọn nan. 37 Ahamiẹn ọ iyi iwẹnna ọsi Aba imẹn mẹn lu, bha hẹi rẹọ mẹn bhọ. 38 Ọkpakinọn, ahamiẹn ọne iwẹnna mẹn lu, bha rẹọ bhi ene emhin nin mẹn lu, aharẹmiẹn ibha bha rẹọ bhi ọta nin mẹn tale. Ọnan ki rẹkpa bha rẹ lẹn, yẹ wo ha rẹọbhọ ghe, ọne Aba deba mẹn, sẹyẹ, mẹn ribhi ibo ọsi ọne Aba.” 39 Ene ibhokhan Ju da rẹ ha guanọ nin ele mun ọlẹn. Ọkpakinọn, ọle da nẹgbe.

40 Ọle da kpanọ, yẹ fan ẹdẹ Jọdan ra ha khian eji Jọni da ka rẹ ha re amẹn nin ẹbho. Ọle da debhi enin an. 41 Ẹbho ne bunbun da bu ọle re yẹ ha yọle: “Arẹmiẹn Jọni bha lu emhin ọhan-ilo soso, emhin rebhe nin ọle ta rẹji ọne okpea nan wo munsẹ.” 42 Ẹbho ne bunbun bhi enin da mhọn urẹọbhọ da ọle.

11 Okpea ọkpa natiọle Lazarọs da ha khọnmhọn. Ibhio ọle da ha yi Meri bi Mata. Idunmhun natiọle Bẹtani ele na vae. 2 Ọnan hi ọne Meri nọn biri abhii nọn vin-ohin ọbhi egbe nọnsi Jesu, yẹ re eto nọnsọle rẹ ka ọle; obhio ọle nin Lazarọs, ọle ha khọnmhọn. 3 Bhiriọ, Meri bi Mata da je uhọnmhọn bu Jesu rẹ taman ọlẹn yọle: “Ebeanlẹn imhan, ọne uwẹ hoẹmhọnlẹn khọnmhọn.” 4 Ẹghe nin Jesu ki rẹ họn ọnan, ọle da yọle: “Ọ iyi uu ha nabhi ọne emianmhẹn nan re. Ọ dẹ re uyi ji Osẹnobulua, yẹ re ogẹn ji Ọmọn nọnsi Osẹnobulua.”

5 Jesu wo hoẹmhọn Mata, Meri, bi Lazarọs. 6 Ọrẹyiriọ, ẹghe nin ọle rẹ họn ghe Lazarọs khọnmhọn, ọle bha sibhi eji ọle ye re. Ọle da kie gbe ikpẹdẹ eva bhi enin. 7 Ọle ki gbe ene ikpẹdẹ eva fo, ọle da taman edibo nesọle yọle: “Bha ji mhan kie ha khian agbaẹbho ọsi Judia.” 8 Edibo nesọle da taman ọlẹn yọle: “Rabai, eji ibhokhan Judia da ka rẹ ha guanọ ne re udo-udo gbe ẹ a, enin uwẹ guano nin uwẹ gbo kie ha khian?” 9 Jesu da taman ele yọle: “Uriagogo igbeva, ọle ribhi ukpẹdẹ. Ahamiẹn ọria khian bhi ẹghe nin ẹdẹ rẹ gbanọn an, ọle ida dua oẹ, ranmhude ọle daghe ẹfua ọsi ọne agbọn nan. 10 Ọkpakinọn, ahamiẹn ọria khian bhi ẹkẹ ebiuki, ọle ki dua oẹ, ranmhude, ọne ẹfua ine ọle.”

11 Ọle ki ta ene ẹmhọn nan fo, ọle da yọle: “Lazarọs nin ọmọẹ mhan wẹ. Mẹn dẹ ha khian enin nin mẹn dọ riọ ọle bhi owe.” 12 Edibo nesọle da taman ọlẹn yọle: “Ebeanlẹn imhan, ahamiẹn ghe owe ọle ye, egbe dẹ daan ọlẹn.” 13 Ebi Jesu ha tẹmhọnlẹn hi ghe, Lazarọs yu. Ọkpakinọn, ele da ha riale ghe Jesu yọle ọ wẹ. 14 Jesu da ki wo taman ele ebi ọle tẹmhọnlẹn. Ọle da yọle: “Lazarọs yulu. 15 Ọ wo mhẹn ghe mẹn bha ha ribhi enin, ranmhude, ebi mẹn ha lu nian dẹ re urẹọbhọ nọnsẹbha deziẹn. Bha ji mhan ha khian isọle.” 16 Bhiriọ, Tọmọs nan yẹ tiọle Abieva da taman edibo nekẹle yọle: “Bha ji mhan rẹkhan ọlẹn ha khian, beji imhan ha da deba ọle yu.”

17 Jesu ki sẹbhi enin, ọ da kere ghe, ọ ki sẹ ikpẹdẹ enẹn nian nan re Lazarọs tọ. 18 Bẹtani bha ree bhi Jerusalẹm. Ọ dẹ sẹbhi imaili eva.* 19 Ibhokhan Ju ne bunbun da vae bhi uwa ọsi Mata bi Meri, ne dọ ko ele udu re, ranmhude obhio ele nọn yulu. 20 Ẹghe nin Mata rẹ họn ghe Jesu vade, ọle da kpanọ bu ọle bhi uwedẹ. Ọkpakinọn, Meri da sẹyẹ ha ribhi uwa. 21 Mata da ki taman Jesu yọle: “Ebeanlẹn imẹn, sade uwẹ ribhi enan nọn, obhio mẹn irẹ yu. 22 Ọrẹyiriọ, mẹn sẹyẹ rẹọbhọ ghe, emhin nọn hi ki rẹ khin nin uwẹ bhii Osẹnobulua le, ọle dẹ lu ọle nin uwẹ.” 23 Jesu da taman ọlẹn yọle: “Obhio ẹ dẹ riọkpanọ.” 24 Mata da taman ọlẹn yọle: “Mẹn lẹnmhin ghe ọle dẹ riọkpanọ bhi ukpẹdẹ nọn kike.” 25 Jesu da taman ọlẹn yọle: “Imẹn hi ariọkpanọ, imẹn yẹ hi iẹnlẹn. Ọria nọn mhọn urẹọbhọ da mẹn, ọle ha rẹ yu, ọle dẹ kie dọ ha nyẹnlẹn. 26 Sẹyẹ, ọrebhe ne nyẹnlẹn, ne mhọn urẹọbhọ da mẹn, ele ida yu ghẹdẹ. Uwẹ be rẹọ bhi ọnan?” 27 Ọle da taman Jesu yọle: “Ehe, Ebeanlẹn imẹn. Mẹn wo ka rẹọbhọ ghe uwẹ hi ọne Kristi, nin Ọmọn nọnsi Osẹnobulua nan jere bhi ọne agbọn nan.” 28 Ọle ki ta ọnan fo, ọle da kpanọ dọ datie Meri nin obhio ọle. Ọle da do taman ọlẹn yọle: “Ọman-emhin vae. Ọle tie ẹ.” 29 Meri ki họn ọnan, ọle da jẹje kpanọ bu ọle.

30 Jesu bhọ bha sẹ sẹ idunmhun nọnsele. Eji Mata da bu ọle re ọle sẹyẹ ha ye. 31 Ene ibhokhan Ju ne vae bhi isi Meri dọ ko ọle udu re, ki daghe ọle ghe ọle gua kpanọ dagbare, ele da rẹkhan ọlẹn, ranmhude ele da ha riale ghe isi ọne idin ọle khian nin ọle dọ ha viẹ bhi enin. 32 Ẹghe nin Meri ki rẹ sẹbhi eji Jesu ye, yẹ daghe ọle, ọle da dediguẹ bhi odalo ọle yẹ taman ọlẹn yọle: “Ebeanlẹn imẹn, sade uwẹ ribhi enan nọn, obhio mẹn irẹ yu.” 33 Jesu ki daghe ghe, Meri bi ibhokhan Ju ne rẹkhan ọlẹn vae viẹ, ọ da manman ba ọle bhi egbe, ọle da kiẹ-egbe a. 34 Ọle da nọọn ele yọle: “Je ibha da re ọle tọ?” Ele da taman ọlẹn yọle: “Ebeanlẹn imhan, vae dọ ghe ọle.” 35 Jesu da gbeviẹ a. 36 Ibhokhan Ju ki daghe ọnan, ele da yọle: “Sẹ ghe, ọle wo gene hoẹmhọn ọlẹn!” 37 Ọkpakinọn, eso bhi ẹwẹ ele da yọle: “Bezẹle nin ọne okpea nan nọn taan ọria ẹlo a, bha da sabọ lu ọle nin Lazarọs hẹi yu?”

38 Jesu ki gbo kiẹ-egbe fo, ọle da vae bhi isi ọne idin. Uhio nan hian bhi ẹkẹ udo, ọle ọne idin khin. Sẹyẹ, a da re udo gue ọle unun. 39 Jesu da yọle: “Bha mun ọne udo kie.” Mata nin obhio ọle yu da taman Jesu yọle: “Ebeanlẹn imẹn, ọ ki dẹ ha ya nian. Ikpẹdẹ enẹn ki nọn nian nan re ọle tọ.” 40 Jesu da taman ọlẹn yọle: “Mẹn bha be ka taman uwẹ ghe, uwẹ dẹ daghe uyi nọnsi Osẹnobulua sade uwẹ mhọn urẹọbhọ?” 41 Bhiriọ, ele da mun ọne udo kie. Jesu da ki khua ẹlo okhun yẹ yọle: “Aba, imẹn khuẹnmhẹn uwẹ nin uwẹ rẹ họn erọnmhọn nọnsẹmhẹn. 42 Bhi ọsi ẹmhọanta, mẹn lẹnmhin ghe, uwẹ ka họn erọnmhọn nọnsẹmhẹn khẹ. Ọkpakinọn, beji ẹbho ne ribhi enan ha da rẹọbhọ ghe, uwẹ hi ọnọn je mẹn re, ọle zẹle nin mẹn da ta ene emhin nan dagbare.” 43 Ọle ki nan erọnmhọn fo, ọle da reso yọle: “Lazarọs, dagbare!” 44 Ọne okpea nọn rẹ yu da dagbare, ọle bi ukpọn nan rẹ gbanọ ọle egbe bi ẹlo. Jesu da taman ele yọle: “Bha fanọn ene ukpọn si ọle bhi egbe re, bha ha yẹ ji ọle da ha khian.”

45 Ene bunbun bhi ẹwẹ ibhokhan Ju ne khian bu Meri re, ne yẹ daghe ebe sunu, da mhọn urẹọbhọ da ọle. 46 Ọkpakinọn, eso bhi ẹwẹ ele da kpanọ dọ taman ibhokhan Farisi ebi Jesu lu. 47 Bhiriọ, ene ohẹn ne khua bi ibhokhan Farisi da tie ikolo bhi ikotu nọnsele natiọle Sanhẹdrin.* Ele da yọle: “Be imhan ha khian yẹ? Ọne okpea nan wo ha lu emhin ọhan-ilo ne bunbun. 48 Mhan ha zẹ ọle ọbọ, ẹbho rebhe dẹ mhọn urẹọbhọ da ọle, sẹyẹ, ibhokhan Rom ki vae dọ miẹn mhan uwa oga nọnsẹmhan* bi agbaẹbho nọnsẹmhan.” 49 Ọkpakinọn, ọkpa bhi ẹwẹ ele natiọle Keafas, nọn ha yi ojohẹn bhi ọne ukpe nin da taman ele yọle: “Ibha bha lẹn emhin soso. 50 Ibha bha be lẹn ghe, otuọnkpa ha yu nin agbaẹbho rebhe, ọle mhẹn gbera nin agbaẹbho rebhe rẹ fuẹn an?” 51 Ọ iyi ọkhọ obọ ọle ọle rẹ ta ọne ọta nan. Ọkpakinọn, ranmhude ọle hi ojohẹn bhi ọne ukpe nin, ọle zẹle nin ọle da kha akhasẹ ghe Jesu dẹ yu nin ọne agbaẹbho. 52 Ọ iyi ọne agbaẹbho ọkpa ọle ha yu nan. Uyumhin nin ọle ha yu dẹ yẹ si imọn nesi Osẹnobulua ne zagha bhi ije kẹkẹ kugbe. 53 Bhiriọ, rẹ ne ọne ukpẹdẹ nin rẹ ha khian, ele da ha guanọ uwedẹ nin ele ha rẹ gbe ọle a.

54 Ranmhude ọnan, Jesu bha yẹ ha khian na bhi eji ẹbho* ne bunbun ha da miẹn ọlẹn. Ọle da sibhi enin re ha khian agbaẹbho natiọle Ifrem, nọn sikẹ ojẹgbo. Ọle bi edibo nesọle da ha ribhi enin. 55 Bhi ọne ẹghe nan nian, iluemhin ọsi Anagbera nin ibhokhan Ju lu da ha sire. Ẹbho ne bunbun ne na bhi agbaẹbho kẹkẹ vae, da ha khian Jerusalẹm dọ kpe egbe khia beji uhi tale ọkuẹsẹ ẹghe nan ha rẹ lu ọne Anagbera. 56 Ele da ha guanọ Jesu. Bhi eji ele da mundia bhi uwa oga, ele da ha tẹmhọn ọlẹn. Ele da ha yọle: “Be ibha riale yẹ? Bha riale ọle dẹ vae bhi ọne iluemhin nan?” 57 Ene ọhẹn ne khua bi ibhokhan Farisi ka tale ghe, ọria soso ha miẹn Jesu, nin ọle vae dọ taman ele, beji ele ha da dọ mun ọlẹn.

12 Ọ ki kẹ ikpẹdẹ ehan nan ha rẹ lu Iluemhin Ọsi Anagbera, Jesu da vae bhi Bẹtani, bhi eji Lazarọs nin ọle riọkpanọ bhi uu ye. 2 A da nyẹn ebale nanlẹn bhi enin, Mata hi ọnọn ha mun ebale nin ele. Lazarọs da ha yi ọkpa bhi ene deba ọle ha le ebale. 3 Meri da ki re ọgọ* abhii nọn vin-ohin, nad* ọsaje a rẹ lu ọne abhili. Ọne abhili manman ghanlan. Ọle da gbe ọle bhi oẹ nọnsi Jesu, yẹ re eto nọnsọle gbo ọle a. Ọne abhii da wo re ijerebhe bhi ọne uwa ha vin-ohin. 4 Ọkpakinọn, Judas Iskarọt nin ọkpa bhi edibo nesi Jesu, nọn ha kẹ mun Jesu khiẹn da yọle: 5 “A ha rẹ khiẹn ọne abhii nan dinariọs* iyisẹn ea* yẹ re ọne igho nin ene ibhioguele.” 6 Ranmhude oyi ọle khin, ọle zẹle nin ọle da ta ọnan, ọ iyi ranmhude ẹmhọn ene ibhioguele rẹtẹ ọle. Ọle hi ọnọn mun ẹkpẹti igho mhọnlẹn. Ọle do igho ne bhi ẹkẹ ọle. 7 Jesu da ki yọle: “Zẹ ọle obọ. Ji ọle da mun mẹn egbe khẹ ukpẹdẹ nan ha rẹ mẹn tọ. 8 Ibhioguele dẹ wo ha ribhi ẹwẹ bha, ọkpakinọn, imẹn ida ha ribhi ẹwẹ ibha rẹ ha khian.”

9 Bhi ọne ẹghe nan nian, ibhokhan Ju ne bunbun da lẹn sẹbhọ ghe Jesu ribhi Bẹtani. Ele da vae nin ele dọ miẹn ọlẹn, yẹ miẹn Lazarọs nin ọle riọkpanọ bhi uu. 10 Ene ohẹn ne khua da yẹ mhanmhanlẹn nin ele rẹ gbe Lazarọs a, 11 ranmhude, ọle zẹle nin ẹbho ne bunbun da ha diọbhi eji Jesu ye, yẹ mhọn urẹọbhọ da ọle.

12 Ukpẹdẹ nọn rẹkhan ọlẹn, usun ẹbho ne bunbun ne vae bhi ọne iluemhin da họn ghe Jesu vade Jerusalẹm. 13 Bhiriọ, ele da ne ikpilanmhẹn mhọn bhi obọ yẹ dagbare bu ọle. Ele da ha so yọle: “Hinmhin ọlẹn, mhan bhii ẹ! Erọnmhọn hi ọsi ojie ọsi Izrẹl nọn re elin nọnsi Jehova* vae!” 14 Jesu ki miẹn obhi kẹtẹkẹtẹ,* ọle da dotua bhọ, beji a rẹ gbẹn ọlẹn ọbhi Ebenọnkhiale yọle: 15 “Ọmokhuo nọnsi Zaiyọn, hẹi ji ofẹn mun ẹn. Ghọle, ojie nọnsẹ vade, ọle dotua bhi uke obhi kẹtẹkẹtẹ.”* 16 Edibo nesọle bha ka lẹn otọ ene emhin nan. Ọkpakinọn, ẹghe nan ki rẹ re uyi nin Jesu fo, ele da yere ghe, a ka gbẹn ene ẹmhọn nan ọbhi otọ rẹji ọle, ghe, ẹbho dẹ lu ene emhin nan da ọle.

17 Ene ẹbho ne ha ribhi enin ẹghe nin ọle re sotie Lazarọs yẹ riọ ọle kpanọ bhi idin da wo ha taman ẹbho khian ebe sunu. 18 Ọnan bhọ deba ebezẹle nin ene usun ẹbho da wo ha bu ọle re, ranmhude, ele họn ọne emhin ọhan-ilo nan nin ọle lu. 19 Ene ibhokhan Farisi da ki ha tale bhi ẹwẹ ele yọle: “Mhan bha miẹn ebi mhan sabọ lu ọne okpea nan le. Ghọle! Ẹbho rebhe wo vẹ rẹkhan ọlẹn.”

20 Ibhokhan Grik eso deba ene vae dọ lu ọne iluemhin. 21 Ene ibhokhan Grik da bu Filip re. Bẹtseada nọn ribhi otọ Galili, ọle Filip na vae. Ele da taman ọlẹn yọle: “Ọwanlẹn, mhan ho nin mhan miẹn Jesu.” 22 Filip da dọ taman Andru. Andru da rẹkhan Filip dọ taman Jesu.

23 Jesu da wanniẹn ele yọle: “Ọne ẹghe sẹle nan ha rẹ re uyi nin Ọmọn nọnsi okpea. 24 Bhi ọsi ẹmhọanta, mẹn taman ibha ghe, ahamiẹn ikpẹ wit bha de fiọbhi otọ, nọn yẹ wea, ọ ida mọn ikpẹ; ọ ha wea, ọle ọ ha da mọn ikpẹ ne bun. 25 Ọria nọn hi ki rẹ khin nin ẹmhọn iẹnlẹn nọnsọle ti ọle bhọ dẹ fuẹn iẹnlẹn nọnsọle a. Ọkpakinọn, ọria nọn hi ki rẹ khin nọn he iẹnlẹn nọnsọle bhi ọne agbọn nan, ki gbega ọle. Ọle ki miẹn iẹnlẹn ọsi ighegheghe. 26 Ahamiẹn ọria soso guanọ nin ọle kiẹn ọguọmhandia nọnsẹmhẹn, ọle ki rẹkhan mẹn. Eji mẹn ye, ọle ọguọmhandia nọnsẹmhẹn ha yẹ ha ye. Ọnọn hi ki rẹ khin nọn ga mẹn, Aba imẹn ki lu ọle nọnsẹn. 27 Emhin wo ha kpokpo imẹn bhi ọkhọle. Be imẹn ha tayẹ nian? Aba, miẹn mẹn fan bhi ọne ẹghe nan. Ọkpakinọn, ọne ẹghe nan bhọ zẹle nin mẹn da vae. 28 Aba re uyi nin elin nọnsẹ.” Bhi ọne ẹghe nin, ukpuru da na bhi okhun yọle: “Mẹn ka re uyi nin elin nọnsẹmhẹn, mẹn dẹ yẹ kie lu ọle.”

29 Usun ẹbho ne mundia bhi enin ki họn ọne ukpuru, ele da munhẹn ha yọle avan de. Eso bhi ẹwẹ ele da yọle: “Ẹhi nanlẹn talọ.” 30 Jesu da taman ele yọle: “Ọ iyi ranmhude imẹn zẹle nan da họn ọne ukpuru nan, ranmhude ibha zẹle. 31 A wo ha bhuohiẹn ọne agbọn nan. A dẹ sun ọnọn re ọne agbọn nan khian fia. 32 Bhi ọsẹmhẹn, ẹghe nan ha rẹ mun mẹn rọ,* imẹn dẹ si unan ẹbho kẹkẹ bu mẹn re.” 33 Nin ọle rẹ rẹman unan uu nin ọle da kẹ yu, ọle zẹle nin ọle da ta ọnan. 34 Ene ẹbho da ki taman ọlẹn yọle: “Ebe Uhi yọle ghe, Kristi dẹ ha ribhọ rẹ sẹbhi ighegheghe. Be ki zẹ nin uwẹ da yọle ghe, a dẹ mun Ọmọn nọnsi okpea rọ?* Họ bhọ hi ọne Ọmọn nọnsi okpea?” 35 Jesu da ki taman ele yọle: “Ọne ẹfua dẹ sẹyẹ ha ribhi ẹwẹ bha bhi obhi ẹghe khere. Bha ha khian bhi ọne ẹfua, beji ọ sẹyẹ ribhi ẹwẹ bha, nin ebiuki hẹi degue bha; ọria nọn khian bhi ẹkẹ ebiuki bha lẹn eji ọle khian. 36 Beji ọne ẹfua sẹyẹ ribhi ẹwẹ ibha, bha mhọn urẹọbhọ da ọne ẹfua, beji a ha da miẹn bha ki kiẹn imọn ọsi ẹfua.”

Jesu ki ta ene emhin nan fo, ọle da kpanọ dọ nẹko. 37 Arẹmiẹn ọle sira ele lu emhin ọhan-ilo ne bunbun, ele bha mhọn urẹọbhọ da ọle. 38 Ọnan da mun ọta nọnsi Ẹzaya nin akhasẹ sẹ, nọn yọle: “Jehova,* ọria be ribhọ nọn rẹọ bhi ẹmhọn nin mhan tale? Sẹyẹ, họ bhọ Jehova* re ahu* nọnsọle man?” 39 Ẹzaya da yẹ ta ebezẹle nin ele bha da sabọ rẹọbhọ. Ọle da yọle: 40 “Ọle gue ele ẹlo, yẹ lu ọle nin ọkhọle nọnsele re zeze a, beji a ha da miẹn ghe, ele bha re ọne ẹlo daghe, yẹ re ọkhọle nọnsele lẹn otọ emhin soso. Bhiriọ, ele ida fidenọ nin Osẹnobulua hinmhin ele.” 41 Ẹzaya ta ene ẹmhọn nan rẹji ọle, ranmhude, ọle daghe uyi nọnsọle. 42 Emhin rẹ dia inian, ene bunbun bhi ene ha gbẹloghe da mhọn urẹọbhọ da ọle. Ọkpakinọn, ele bha gbudu tale dagbare, ranmhude ofẹn ọsi ibhokhan Farisi nọn ha mun ele, nan hẹi dọ sun ele fia bhi sinagọg; 43 Ekpẹn nin ele ha miẹn bhi obọ eria, ọle ti ele bhọ nẹ ekpẹn nin ele ha miẹn bhi obọ Osẹnobulua.

44 Jesu da yọle: “Ọria nọn hi ki rẹ khin nọn mhọn urẹọbhọ da mẹn, ọ iyi mẹn ọkpa ọle mhọn urẹọbhọ da, ọle yẹ mhọn urẹọbhọ da ọnọn je imẹn re; 45 sẹyẹ, ọria nọn hi ki rẹ khin nọn miẹn mẹn yẹ miẹn ọnọn je mẹn re. 46 Imẹn hi ẹfua nọn vae bhi ọne agbọn nan, beji a ha da miẹn, ọrebhe ne mhọn urẹọbhọ da mẹn ki sibhi ebiuki re. 47 Ọkpakinọn, ahamiẹn ọria họn ọta nọnsẹmhẹn nin ọle bha da re obọ rẹkhan ọlẹn, mẹn ida bhuohiẹn ọlẹn; ranmhude, mẹn bha vae dọ bhuohiẹn ọne agbọn nan, mẹn vae nin mẹn dọ miẹn ọne agbọn nan fan. 48 Ọria nọn hi ki rẹ khin nọn re ẹlo gbe imẹn bi ọta nọnsẹmhẹn an, emhin ribhọ nọn ha bhuohiẹn ọlẹn. Ọta nin mẹn tale dẹ bhuohiẹn gbe ọle bhi ukpẹdẹ nọn kike. 49 Ọ iyi ebe ghọn mẹn imẹn tale, ọne Aba nọn je mẹn, ọle taman imẹn ebi mẹn ha ta bi ebi mẹn ha rẹ tale yẹ. 50 Sẹyẹ mẹn lẹnmhin ghe, uhi nesọle sabọ re iẹnlẹn ọsi ighegheghe nin ọria. Bhiriọ, ẹmhọn nin ọne Aba taman imẹn tee, ọle mẹn wo ta.”

13 Ọkuẹsẹ ẹghe iluemhin ọsi Anagbera, Jesu ki ka lẹn fo ghe ọne ẹghe sẹle nin ọle ha rẹ sibhi ọne agbọn nan re ha bu Aba ọle. Bhiriọ, ọle da hoẹmhọn edibo nesọle ne ribhi ọne agbọn nan sẹbhi ọkpẹnlẹn beji ọle ka rẹ hoẹmhọn ele khẹ. 2 Bhi ọne ẹghe nin ele rẹ a le ọne ebale emuan, Esu ki re ọle bhi ọkhọle nọnsi Judas Iskarọt nin ọmọn nọnsi Saimọn fo nin ọle rẹ mun Jesu khiẹn. 3 Jesu lẹnmhin ghe ọne Aba mun emhin rebhe ọle bhi obọ fo. Ọle yẹ lẹn ghe ọle dẹ kẹ fikie bu Osẹnobulua. 4 Bhiriọ, ọle da re obọ sibhi ebale re. Ọle da kuọ ukpọn nin ọle yọ ke okhun ne ọbhi otọ, yẹ re ukpọn nan rẹ ka amẹn bhi egbe diẹn bhi akun. 5 Ọle da ki sa amẹn bhi tasa yẹ munhẹn ha kpe oẹ ọsi edibo nesọle. Ọle da re ọne ukpọn nin ọle diẹn bhi akun ha ka ọle. 6 Ọ ki sẹ Saimọn Pita egbe, ọle da taman Jesu yọle: “Ebeanlẹn imẹn, uwẹ dẹ gene kpe oẹ nọnsẹmhẹn?” 7 Jesu da wanniẹn ọlẹn yọle: “Ebi mẹn lu nan nian, ọ ida sẹ mun uwẹ ẹlo kore. Ọkpakinọn, ọ dẹ mun uwẹ ẹlo kore sade a ki zẹbue.” 8 Pita da taman ọlẹn yọle: “Mẹn ida ji uwẹ da kpe oẹ nọnsẹmhẹn.” Jesu da taman ọlẹn yọle: “Ahamiẹn uwẹ bha ji mẹn da kpe oẹ nọnsẹ, uwẹ ida deba ibo nọnsẹmhẹn.” 9 Saimọn Pita da ki yọle: “Ebeanlẹn imẹn, ọ iyi oẹ nọnsẹmhẹn ọkpa uwẹ da kpe, yẹ kpe obọ nọnsẹmhẹn bi uhọnmhọn nọnsẹmhẹn ba ọle.” 10 Jesu da taman ọlẹn yọle: “Ọria nọn khọ a, oẹ ọkpa a ha gheghe kpe ọle le, ranmhude ọle ka khia. Eria ne khiale bha khin. Ọkpakinọn, ọ iyi bha rebhe khia.” 11 Jesu lẹn ọnọn ho nọn mun ọlẹn khiẹn, ọnan zẹle nin ọle da yọle: “Ọ iyi bha rebhe khiale.”

12 Ọle ki kpe ele oẹ fo, ọle da re awegbe nọnsọle yọ. Ọle da ki dọ dotua bhi eji ọle da ha le ebale. Ọle da nọọn ele yọle: “Emhin nin mẹn lu nan be mun bha ẹlo kore? 13 ‘Ebeanlẹn imhan’ bi ‘Ọman-emhin,’ ọle bha tie mẹn le. Ibha bha bha ohoghe ranmhude ọle mẹn gene khin. 14 Ahamiẹn imẹn nin Ọman-emhin, bi Ebeanlẹn ibha kpe oẹ nọnsẹbha, ọ bha be khẹke nin bha ha kpe oẹ ọsi ibo bha? 15 Imẹn re ijiẹmhin ọbhi otọ nin bha. Beji mẹn rẹ ne bha lu emhin, iriọ bha ha yẹ rẹ ha ne ẹbho lu emhin. 16 Bhi ọsi ẹmhọanta, mẹn taman ibha ghe, igbọn ikpọnọ nẹ ebeanlẹn ọlẹn. Sẹyẹ, ọria nan je ọle uhọnmhọn ikpọnọ nẹ ọnọn je ọle uhọnmhọn. 17 Beji a miẹn bha lẹn ene emhin nan, bha dẹ ha ghọnghọn sade bha lu ele. 18 Ọ iyi bha rebhe mẹn talọ je; mẹn lẹn ene imẹn zẹle. Beji ẹmhọn nan gbẹn ọbhi Ebenọnkhiale ha da munsẹ, ọle zẹle nin emhin da dia inian. Ọne ẹmhọn yọle: ‘Ọria nọn le ebale nọnsẹmhẹn denọ egbe ha ne mẹn suan.’ 19 Mẹn munhẹn ha taman ibha nian ọkuẹsẹ ọ sunu, beji a ha da miẹn ghe ọ ha ki sunu, bha ki rẹọbhọ ghe imẹn hi ọria nan ha tẹmhọnlẹn. 20 Bhi ọsi ẹmhọanta, mẹn taman ibha ghe, ọria nọn hi ki rẹ khin nọn miẹn ọne imẹn je ọbhi gbe, imẹn ọle yẹ miẹn bhi egbe. Sẹyẹ, ọria nọn hi ki rẹ khin nọn miẹn imẹn ọbhi egbe, ọnọn je imẹn re, ọle yẹ miẹn ọbhi egbe.”

21 Jesu ki ta ene ẹmhọn nan fo, emhin da ha kpokpo ọle bhi ọkhọle. Ọle da yọle: “Bhi ọsi ẹmhọanta, mẹn taman ibha ghe, ọkpa bhi ẹwẹ bha dẹ mun mẹn khiẹn.” 22 Edibo nesọle da munhẹn ha ghe egbe ele, ranmhude, ele bha lẹn ọnela bhi ẹwẹ ele ọle ha tẹmhọnlẹn. 23 Ọkpa bhi ene edibo, ọne Jesu manman hoẹmhọnlẹn da dotua sikẹ Jesu bhi eji ele da ha le ebale. 24 Saimọn Pita da ki re ẹlo ne ọne odibo talọ, yẹ nọọn ọlẹn yọle: “Họla ọle tẹmhọnlẹn?” 25 Ọne odibo da ki si egbe re ikeke, re egbe tẹ Jesu udu yẹ nọọn ọlẹn yọle: “Ebeanlẹn imẹn, họla nọn?” 26 Jesu da yọle: “Ọria nin mẹn ha re ibrẹd ra bhi omhọn re nan, ọle nọn.” Ọle ki gene re ọne ibrẹd ra bhi omhọn fo, ọle da re nin Judas, nin ọmọn nọnsi Saimọn Iskarọt. 27 Judas ki miẹn ọlẹn ọne ibrẹd, Esu da munhẹn ha noo ọle. Jesu da ki taman ọlẹn yọle: “Ji okhian ha kẹ uwẹ bhi ebi uwẹ lu.” 28 Ọkpakinọn, ene ele ko dotua ha le ebale bha lẹn ebezẹle nin ọle da ta ọnan man ọlẹn. 29 Eso bhi ẹwẹ ele bhọ da ha riale ghe, ebi Jesu ha taman ọlẹn hi, nin ọle dẹ ebi ele ha noo bhi ẹghe iluemhin, la nọn re igho nin ene ibhioguele, beji a miẹn ghe ọle hi ọnọn mun ẹkpẹti igho mhọnlẹn. 30 Ọle ki miẹn Jesu ọne ibrẹd fo, ọle da jẹje dagbare. Ebi ki wo lo bhi ọne ẹghe nan.

31 Judas ki kpanọ fo, Jesu da yọle: “Bhi ejayenan nian, a re uyi nin Ọmọn nọnsi okpea. A yẹ re uyi ji Osẹnobulua, ranmhude ọle. 32 Osẹnobulua tobọle dẹ re uyi nanlẹn, sẹyẹ ọle dẹ jẹje lu ọle. 33 Imọn nin mẹn hoẹmhọnlẹn, obhi ẹghe khere ki kẹre nin mẹn ha deba bha gbe. Ibha dẹ guanọ imẹn. Ebi mẹn taman ibhokhan Ju nekẹle, ọle mẹn yẹ taman ibha nian, ‘Ibha ida sabọ vae bhi eji mẹn khian.’ 34 Uhi ọsọgbọn khọnan nin mẹn gbe nin bha: Bha hoẹmhọn egbe bha. Beji mẹn rẹ hoẹmhọn ibha, bha yẹ re iriọ hoẹmhọn egbe bha. 35 Ahamiẹn ibha mhọn oyẹẹ bhi ẹwẹ bha, ọrebhe dẹ lẹn ghe, edibo nesẹmhẹn bha khin.”

36 Saimọn Pita da nọọn Jesu yọle: “Ebeanlẹn imẹn, ejela uwẹ khian?” Jesu da wanniẹn ọlẹn yọle: “Uwẹ isẹ da sabọ rẹkhan mẹn ha khian eji mẹn khian nian, ọkpakinọn, uwẹ dẹ rẹkhan mẹn sade ọ zẹbue.” 37 Pita da taman Jesu yọle: “Ebeanlẹn imẹn, bezẹle mẹn ida sabọ rẹkhan uwẹ nian? Mẹn muegbe nin mẹn rẹ yu nin uwẹ.” 38 Jesu da taman ọlẹn yọle: “Uwẹ gene muegbe nin uwẹ rẹ yu nin mẹn? Bhi ọsi ẹmhọanta, mẹn taman uwẹ ghe, ọkuẹsẹ ọkpa viẹ, igba ea uwẹ ha yọle ghe uwẹ bha lẹn mẹn.”

14 “Bha hẹi ji emhin soso ha kpokpo ibha bhi ọkhọle. Bha mhọn urẹọbhọ da Osẹnobulua, bha ha yẹ mhọn urẹọbhọ da mẹn. 2 Otọ wo ribhi uwa ọsi Aba imẹn nin ẹbho ha sabọ dia, sade ọ iyi iriọ, mẹn ha rẹ taman ibha. Mẹn khian nin mẹn dọ mhanmhan otọ khẹ bha. 3 Mẹn ha kpanọ dọ hẹnhẹn otọ khẹ bha, mẹn dẹ kie vae, mẹn ki ne ibha ha khian uwa nọnsẹmhẹn, beji a da miẹn ghe, bha ki ha ribhi eji mẹn ye. 4 Bha lẹn uwedẹ nan rẹkhan sẹbhi eji mẹn khian.”

5 Tọmọs da taman ọlẹn yọle: “Ebeanlẹn imẹn, mhan bha lẹn eji uwẹ khian. Be imhan ha ki rẹ lẹn uwedẹ nan na sẹbhọ yẹ?”

6 Jesu da taman ọlẹn yọle: “Imẹn hi ọne uwedẹ, ọne ẹmhọanta, bi ọne iẹnlẹn. Ọria soso ida sabọ bu ọne Aba re sade ọle bha na obọ mẹn. 7 Ahamiẹn bha lẹn mẹn, bha yẹ lẹn Aba imẹn. Rẹ na ọne ẹghe nan rẹ ha khian, bha lẹn ọlẹn, bha yẹ daghe ọle.”

8 Filip da taman ọlẹn yọle: “Ebeanlẹn imhan, re ọne Aba man mhan, ọnin dẹ sẹ imhan.”

9 Jesu da taman ọle yọle: “Filip, mẹn re deba bha gbe ẹghe nọn bue sẹ inian, uwẹ bha sẹ yẹ lẹn mẹn? Ọria nọn hi ki rẹ khin nọn miẹn mẹn, ọle yẹ miẹn ọne Aba. Be ki zẹ nin uwẹ da yọle, ‘Nin mẹn re ọne Aba man bha’? 10 Uwẹ bha be rẹọbhọ ghe ibo ọsi ọne Aba mẹn ye, sẹyẹ ọne Aba ribhi ibo nọnsẹmhẹn? Ọ iyi ọkhọ mẹn imẹn rẹ ha ta ene ẹmhọn nan nin mẹn wo ha taman ibha, ọne Aba nọn ribhi ibo nọnsẹmhẹn, ọle rẹ mẹn lu ene iwẹnna nan. 11 Bha rẹọ bhi ebi mẹn tale, ghe, ọne Aba ribhi ibo nọnsẹmhẹn, sẹyẹ mẹn ribhi ibo nọnsọle. Aharẹmiẹn ibha bha rẹọbhọ ranmhude imẹn tale, bha ji ene iwẹnna nin imẹn lu re ibha rẹọbhọ. 12 Bhi ọsi ẹmhọanta, mẹn taman bha ghe, ọria nọn ki rẹ khin nọn mhọn urẹọbhọ da mẹn, ọle dẹ lu ene iwẹnna nan nin mẹn lu, ọle bhọ dẹ lu iwẹnna ne gbera ene iwẹnna nan nin mẹn lu, ranmhude mẹn bu Aba imẹn khian. 13 Sẹyẹ, emhin nọn ki rẹ khin nin bha nọọn bhi elin nọnsẹmhẹn, mẹn dẹ lu ọle nin bha, beji ọne Aba ha da miẹn uyi rẹ na obọ Ọmọn nọnsọle. 14 Emhin nọn ki rẹ khin nin bha nọọn bhi elin nọnsẹmhẹn, mẹn dẹ lu ọle.

15 “Ahamiẹn bha hoẹmhọn mẹn, bha ki re obọ rẹkhan uhi nesẹmhẹn. 16 Mẹn dẹ bhii ọne Aba nin ọle re urẹkpa ọbhebhe nin bha, nọn ha ne bha dia rẹ sẹbhi ighegheghe. 17 Ọne urẹkpa nan hi ẹlinmhin ọsi ẹmhọanta. Ene ribhi ọne agbọn nan ida sabọ ha mhọn ọlẹn, ranmhude ele bha miẹn ọlẹn, ele bha yẹ lẹn ọlẹn. Ibha lẹn ọlẹn, ranmhude ọ ne ibha, ọ yẹ ne ibha dia. 18 Mẹn ida zẹ ibha obọ bii imọn ne iyẹ mhọn aba bi inẹn. Mẹn dẹ fikie bu bha re. 19 Bhi obhi ẹghe khere nian, ọne agbọn nan iyẹ da miẹn mẹn. Ọkpakinọn, bha dẹ miẹn mẹn, ranmhude, mẹn dẹ ha nyẹnlẹn, bhiriọ, ibha dẹ yẹ ha nyẹnlẹn. 20 Bhi ọne ukpẹdẹ nin, bha dẹ lẹn ghe ibo ọsi Aba imẹn, ọle imẹn ye, sẹyẹ ibo nọnsẹmhẹn ibha ye, mẹn da yẹ ribhi ibo nọnsẹbha. 21 Ọnọn hi ki rẹ khin nọn miẹn uhi nesẹmhẹn ọbhi egbe yẹ re obọ rẹkhan ele, ọle hi ọnọn hoẹmhọn mẹn. Aba imẹn ki hoẹmhọn ọne ọria nọn hoẹmhọn mẹn, imẹn ki yẹ hoẹmhọn ọlẹn, yẹ re egbe mẹn man ọlẹn nọnsẹn.”

22 Judas (ọ iyi Iskarọt nọn ribhọ) da nọọn ọlẹn yọle: “Ebeanlẹn mhan, bezẹle nin uwẹ da ho nin uwẹ re egbe ẹ man mhan nọnsẹn, nin uwẹ bha da ho nin uwẹ re ọle man ọne agbọn nan?”

23 Jesu da wanniẹn ọlẹn yọle: “Ahamiẹn ọria hoẹmhọn mẹn, ọle ki lu rẹkhan ọta nọnsẹmhẹn, Aba imẹn ki hoẹmhọn ọlẹn. Imẹn bi Aba imẹn ki bu ọle re dọ nanlẹn dia. 24 Ọria nọn bha lu rẹkhan ọta nọnsẹmhẹn, ọle bha hoẹmhọn mẹn. Ọ iyi mẹn nyan ene ọta nan nin mẹn ta, Aba imẹn nọn je imẹn, ọle nyan ene ọta.

25 “Bhi ọne ẹghe nan nin mẹn sẹyẹ rẹ ribhi ẹwẹ bha, ọle mẹn rẹ ha ta ene ọta nan man bha. 26 Ọkpakinọn ọne ẹlinmhin nọn khiale, nọn yi ọne urẹkpa nin Aba imẹn ha na obọ mẹn je re, dẹ man bha ene emhin nan rebhe, yẹ ye bha re ene emhin rebhe nin mẹn taman ibha. 27 Mẹn re ọfure nọnsẹmhẹn nin bha. Ọne ọfure dẹ ne ibha dia. Imẹn bha re ọle nin bha beji ọne agbọn nan rẹ re ọfure nin ọria. Bha hẹi ji emhin ha kpokpo ibha bhi ọkhọle la nin ofẹn ha mun bha. 28 Beji mẹn ka taman ibha, mẹn dẹ kpanọ, yẹ fikie bu bha re. Bha ha hoẹmhọn mẹn, bha ki ha ghọnghọn ghe, mẹn bu ọne Aba, ranmhude ọne Aba kpọnọ nẹ imẹn. 29 Mẹn taman ibha nian ọkuẹsẹ ọ sunu, beji a da miẹn ghe ọ ha sunu, bha ki rẹọbhọ. 30 Mẹn iyẹ da ne ibha talọ bue gbe, ranmhude ọnọn re ọne agbọn khian vade. Ọkpakinọn, ọle imhọn ahu bhi egbe imẹn. 31 Beji ọne agbọn nan ha da lẹn ghe mẹn hoẹmhọn ọne Aba, ọle zẹle nin mẹn da wo ha lu ebi ọne Aba taman imẹn. Bha kpanọ, bha ji mhan sibhi enan re.

15 “Imẹn hi ọne oran ivain ọsaje, Aba mẹn hi ọnọn gbẹloghe ọle. 2 Ikpabọ oran ne bha ka mọn ikpẹ, ọle ki gia ele si mẹn bhi egbe re. Ọkpakinọn, ọle ki re ene mọn ikpẹ ọi nọnsẹn, beji ele ha da manman mọn ikpẹ. 3 Ọta nin mẹn taman bha ki ka rẹ bha khia fo. 4 Bha kugbe deba mẹn, imẹn ki yẹ kugbe deba bha. Ikpabọ eran ida sabọ mọn ikpẹ, sade ọ nyan sibhi eran re. Iriọ yẹ nọn, bha ida sabọ mọn ikpẹ sade ibha bha kugbe deba mẹn. 5 Imẹn hi ọne oran ivain; ibha hi ene ikpabọ oran. Ọria nọn hi ki rẹ khin nọn kugbe deba mẹn, nin mẹn yẹ kugbe deba, ọle dẹ mọn ikpẹ ne bunbun. Ahamiẹn ibha bha kugbe deba mẹn, ibha ida sabọ kiẹn emhin soso. 6 Ọnọn bha kugbe deba mẹn, a dẹ nyan ọlẹn re fia bii ikpabọ eran, ọ ki kaka a. Eria ki koko ene ikpabọ eran yẹ ne ele kpọn bhi eranlẹn, ele ki to a. 7 Emhin nọn hi ki rẹ khin nin bha bhii Osẹnobulua le, ọle dẹ lu ọle nin bha, sade bha kugbe deba mẹn yẹ lu rẹkhan ọta nesẹmhẹn. 8 Ọ wo re uyi ji Aba imẹn, sade bha wo ha mọn ikpẹ ne bunbun, yẹ rẹman ghe edibo nesẹmhẹn bha khin. 9 Beji Aba mẹn rẹ hoẹmhọn mẹn, iriọ mẹn yẹ rẹ hoẹmhọn bha. Bha wo ha lu emhin ne ha re imẹn hoẹmhọn bha. 10 Ahamiẹn bha re obọ rẹkhan uhi nesẹmhẹn, mẹn dẹ wo ha hoẹmhọn bha, beji ọne Aba rẹ wo hoẹmhọn mẹn, ranmhude mẹn re obọ rẹkhan uhi nesọle.

11 “Beji bha ha da sabọ ha ghọnghọn beji mẹn rẹ ghọnghọn, ọle zẹ nin mẹn da ta ene ẹmhọn nan man bha. 12 Ọnan hi uhi nin mẹn gbe nin bha, ghe, nin bha hoẹmhọn egbe bha, beji mẹn rẹ hoẹmhọn bha. 13 Ahoẹmhọn-egbe iribhọ nọn gbera nin ọria rẹ yu nin imọẹ ọle. 14 Bha ha re obọ rẹkhan ebi mẹn taman bha, bha ki ha yi imọẹ mẹn. 15 Mẹn iyẹ tie bha igbọn, ranmhude, igbọn ilẹn ebi ebeanlẹn nọnsọle lu. Imọẹ mẹn bha khin, ranmhude mẹn taman bha emhin rebhe nin mẹn họn bhi unun nọnsi Aba imẹn. 16 Imẹn zẹ ibha, ọ iyi bha zẹ imẹn. Mẹn da yẹ je bha nin bha dọ ha mọn ikpẹ, ikpẹ ne da ha ribhọ, beji a ha da miẹn ghe, emhin nọn ki rẹ khin nin bha bhii Aba mẹn le bhi elin nọnsẹmhẹn, ọle ki rẹ nin bha.

17 “Enan ene uhi nin mẹn gbe nin bha, ghe, nin bha hoẹmhọn egbe. 18 Ọne agbọn nan ha he ibha, bha yere ghe ele ka he imẹn, ọkuẹsẹ ele he ibha. 19 Sade ibo ọsi ọne agbọn nan bha ye nọn, ẹmhọn bha ha rẹ wo ha ti ọne agbọn nan bhọ. Ọkpakinọn bha iribhi ibo ọsi ọne agbọn nan, ranmhude mẹn zẹ bha ne sibhi ẹkẹ ọne agbọn nan re. Ọnin zẹle ọne agbọn nan he bha. 20 Bha hẹi ye ene ọta nan nin mẹn taman bha a: Igbọn ikpọnọ nẹ ebeanlẹn ọlẹn. Ahamiẹn ele kpokpo mẹn, ele dẹ yẹ kpokpo bha. Ahamiẹn ele re obọ rẹkhan ọta nọnsẹmhẹn, ele dẹ yẹ re obọ rẹkhan ọta nọnsẹbha. 21 Ranmhude edibo nesẹmhẹn bha khin, ọle zẹle nin ele ha da lu ene emhin nan rebhe da bha. Ele bha lẹn ọnọn je mẹn re. 22 Sade mẹn bha vae dọ ne ele talọ nọn, ele irẹ ha mhọn olukhọ. Ọkpakinọn, bhi ejayenan nian, ele bha miẹn ebi ele ha yọle ghe, ọ zẹle nin ele da ribhi olukhọ. 23 Ọria nọn hi ki rẹ khin nọn he imẹn, Aba imẹn ọle yẹ he. 24 Sade mẹn bha sira ele lu ene emhin ọhan-ilo nin ọria ọbhebhe bha sabọ lu nọn, ele irẹ ha mhọn olukhọ. Ọkpakinọn bhi ejayenan nian, ele miẹn mẹn, yẹ he mẹn bi Aba mẹn. 25 Ene emhin nan rebhe da sunu, beji ẹmhọn nọn ribhi Ebenọnkhiale ha da munsẹ, nọn yọle: ‘Mẹn bha miẹn ebi mẹn lu nọn re ele he imẹn.’ 26 Ọne urẹkpa nin mẹn ha na bhi obọ ọne Aba je re ha vae, ọnin hi, ọne ẹlinmhin ọsi ẹmhọanta, ọle dẹ sọsali nin mẹn. 27 Bha ki yẹ sọsali nin mẹn, ranmhude rẹ na otọ ha de, ọle imẹn bi bha rẹ ha muobọ.

16 “Nin bha hẹi de, ọle zẹle nin mẹn da ta ene ẹmhọn nan man bha. 2 Ẹbho dẹ sun bha fia bhi sinagọg. Bhi ọsi ẹmhọanta, ọne ẹghe vade nan ha rẹ miẹn ghe, ọnọn hi ki rẹ khin nọn gbe bha a, ki ha riale ghe oga nọn khiale ọle re ji Osẹnobulua. 3 Ranmhude ele bha lẹn imẹn bi Aba imẹn, ọle zẹle nin ele ha da lu ene emhin nan. 4 Mẹn ta ene ẹmhọn nan man bha nian, beji a ha da miẹn ghe, ẹghe nin ele ha rẹ sunu, bha ki yere ghe, mẹn ka taman ibha.

“Ranmhude mẹn sẹyẹ ha ribhi ẹwẹ ibha, ọle zẹle nin mẹn bha da ka ta ene emhin nan man bha bhi ọsi ọhẹnhẹn. 5 Ọkpakinọn, ejayenan nian, mẹn bu Ọnọn je mẹn re; ọrẹyiriọ, a bha miẹn ọsoso bhi ẹwẹ bha nọn nọọn mẹn ejela mẹn khian. 6 Ranmhude mẹn ta ene ẹmhọn nan man ibha, bha wo ha lu akhiẹ. 7 Bhi ọsi ẹmhọanta, ranmhude elele nin bha ha miẹn zẹle nin mẹn ha da kpanọ. Ahamiẹn mẹn bha kpanọ, ibha ida miẹn ọne urẹkpa. Mẹn ha kpanọ, mẹn ki je ọle bu bha re. 8 Ọne urẹkpa ha vae, ọle ki rẹman ọne agbọn nan ebi olukhọ khin, ebi ikhiale khin, bi ebi ibhuohiẹn khin. 9 Ebi olukhọ khin ọle ha ka rẹman ele, ranmhude, ele bha mhọn urẹọbhọ da mẹn. 10 Ọle ki rẹman ele ebi ikhiale khin, ranmhude, imẹn bu ọne Aba khian. Bha iyẹ da kie miẹn mẹn. 11 Ọkike ọle, ọle ki rẹman ele ebi ibhuohiẹn khin, ranmhude a bhuohiẹn gbe ọnọn re ọne agbọn nan khian fo.

12 “Mẹn mhọn emhin ne bunbun nin mẹn sẹyẹ ho nin mẹn taman ibha. Ọkpakinọn, bha isẹ da sabọ lẹn otọle nian. 13 Ẹghe nin ọne ẹlinmhin ọsi ẹmhọanta ha rẹ vae, ọle ki rẹkpa bha rẹ lẹn otọ ẹmhọanta rebhe. Ọle ida ha ta ebe ghọn ọlẹn. Ebi a taman ọlẹn ọle ha ta. Ọle ki taman bha emhin rebhe ne ha sunu. 14 Ọle dẹ re uyi ji mẹn, ranmhude, ọle dẹ taman bha ebi ọle họn bhi unun mẹn. 15 Emhin nesi Aba mẹn rebhe, imẹn nyan ọlẹn. Ọle zẹle nin mẹn da yọle ghe, ebi ọne ẹlinmhin họn bhi unun mẹn, ọle ọ ha taman bha. 16 Bhi obhi ẹghe khere, bha iyẹ da kie miẹn mẹn. Sẹyẹ, bhi obhi ẹghe khere, bha ki miẹn mẹn.”

17 Eso bhi edibo nesọle da ki ha nọọn egbe ele yọle: “Be bhọ ọle re ene ẹmhọn nan ta, ‘Obhi ẹghe khere, bha iyẹ da kie miẹn mẹn, sẹyẹ, bhi obhi ẹghe khere, bha ki miẹn mẹn,’ bi ‘ranmhude mẹn bu ọne Aba khian’?” 18 Ele da ki ha yọle: “Be ọle re ‘obhi ẹghe khere’ ta? Mhan bha lẹn ebi ọle tẹmhọnlẹn.” 19 Jesu lẹnmhin ghe ele ho nin ele nọọn ọlẹn ọta. Bhiriọ, ọle da taman ele yọle: “Ranmhude mẹn yọle ghe: ‘Obhi ẹghe khere, bha iyẹ da kie miẹn mẹn, sẹyẹ, bhi obhi ẹghe khere, bha ki miẹn mẹn’ ọle zẹle nin bha da nọọn egbe bha ọta? 20 Bhi ọsi ẹmhọanta, mẹn taman bha ghe, bha dẹ ha viẹ-egbe, bha dẹ ha gono, ọkpakinọn, ọne agbọn nan ki ha ghọnghọn. Bha dẹ ha lu akhiẹ, ọkpakinọn, ọne akhiẹ dẹ kiẹn eghọnghọn. 21 Ahamiẹn okhuo-ọhanmhan khian la biẹ, ọle ki wo ha ribhi ọbalọ ranmhude ẹghe nọnsọle sẹle. Ọkpakinọn, ọle ha biẹ ọne ọmọn fo, ọle iyẹ da ye ọne ọbalọ re. Ọle ki wo ha ghọnghọn ghe, ọle biẹ ọria vae bhi ọne agbọn nan. 22 Iriọ yẹ nọn rẹji ibha. Ejayenan nian, bha lu akhiẹ; ọkpakinọn, ẹghe nin bha ha rẹ kie miẹn mẹn, bha ki wo manman ha ghọnghọn. Ọria soso ida re eghọnghọn nọnsẹbha kie. 23 Bhi ọne ẹghenin, bha iyẹ da nọọn mẹn ọta soso. Bhi ọsi ẹmhọanta, mẹn taman ibha ghe, emhin nọn hi ki rẹ khin nin bha bhii Aba mẹn ele bhi elin nọnsẹmhẹn, ọle dẹ re nin bha. 24 Rẹ sẹbhi ọne ẹghe nan, ibha bha sẹ re elin nọnsẹmhẹn bhii Osẹnobulua emhin soso. Bha re elin nọnsẹmhẹn bhii ọle emhin, ọle ki re nin ibha, beji a ha da miẹn ghe bha ki manman ha ghọnghọn.

25 “Arẹkhọkhọ mẹn rẹ ha ta ene ẹmhọn nan man bha. Ọne ẹghe vade nin mẹn ha rẹ wo re otọ ọne Aba man bha. Ẹghenin, mẹn iyẹ da ha noo arẹkhọkhọ. 26 Bhi ọne ẹghe nin, bha ki bhii ọne Aba emhin bhi elin nọnsẹmhẹn. Mẹn bha re ọnan yọle ghe mẹn dẹ ha bhii nin bha. 27 Ọne Aba tobọle hoẹmhọn bha, ranmhude, bha hoẹmhọn imẹn yẹ rẹọbhọ ghe, ọle je mẹn re. 28 Ọne Aba, ọle je mẹn re bhi ọne agbọn nan. Ejayenan nian, mẹn dẹ kẹ sibhi ọne agbọn nan re ha bu ọne Aba.”

29 Edibo nesọle da yọle: “Ẹhẹn! Iwannan uwẹ wo ha re otọ emhin man mhan. Uwẹ bha yẹ ha noo arẹkhọkhọ. 30 Ọ ki wo mun mhan ẹlo kore ghe uwẹ lẹn emhin rebhe. Uwẹ ikhẹ nin ọria nọọn uwẹ ọta. Ọnan ki wo re imhan rẹọbhọ ghe Osẹnobulua je ẹ re.” 31 Jesu da nọọn ele yọle: “Bha ki gene rẹọbhọ nian? 32 Ghọle! Ọne ẹghe vade, bhi ọsi ẹmhọanta, ọne ẹghe a bhọ ye nian, nin bha rebhe ha rẹ nẹgbe zẹ mẹn obọ ha khian uwa nọnsẹbha. Ọrẹyiriọ, ọ iyi mẹn ọkpa da ha khian, ranmhude, Aba imẹn ne imẹn dia. 33 Beji ibha ha da ha mhọn ọfure rẹ na obọ mẹn, ọle zẹle nin mẹn da ta ene emhin nan man bha. Bhi ọne agbọn nan, bha dẹ miẹn ekpokpo. Ọkpakinọn, bha ha mhọn izebhudu, ranmhude, mẹn khọn ọne agbọn nan miotọ.”

17 Jesu ki ta ene ẹmhọn nan fo, ọle da khua ẹlo okhun yọle: “Aba, ọne ẹghe sẹle. Re uyi nin ọmọn nọnsẹ, beji ọmọn nọnsẹ ha da yẹ re uyi nin uwẹ. 2 Uwẹ re ahu nanlẹn bhi egbe eria rebhe, beji ọle ha da sabọ re iẹnlẹn ọsi ighegheghe nin ene ẹbho nin uwẹ ne nanlẹn. 3 Ele dẹ miẹn iẹnlẹn ọsi ighegheghe, sade ele dọ lẹn uwẹ,* nin Osẹnobulua ọkpa sẹsẹ ọsi ẹmhọanta, bi Jesu Kristi nin uwẹ je re. 4 Mẹn re uyi ji uwẹ bhi ọne otọ nan, ranmhude, mẹn miẹn ẹsọn nin uwẹ mun nin mẹn fo. 5 Bhi ejayenan nian Aba, re uyi nin mẹn bhi eji uwẹ ye, bọsi uyi nin mẹn ka ha mhọnlẹn bhi eji uwẹ ye khẹ, ọkuẹsẹ a man ọne agbọn nan.

6 “Mẹn rẹkpa ene eria nin uwẹ ne nin mẹn bhi ẹkẹ ọne agbọn nan rẹ lẹn elin nọnsẹ. Uwẹ nyan ele, uwẹ da ne ele nin mẹn, ele da re obọ rẹkhan ọta nọnsẹ. 7 Ejayenan nian, ele ki dọ lẹn ghe, ene emhin rebhe nin uwẹ ne nin mẹn, obọ nọnsẹ ele na vae, 8 ranmhude, mẹn taman ele ene ọta nin uwẹ taman imẹn. Ele da miẹn ọlẹn ọbhi egbe, yẹ dọ lẹn sẹbhọ ghe, uwẹ je mẹn re. Ele da yẹ rẹọbhọ. 9 Mẹn bhii nin ele. Ọ iyi ene ribhi ẹkẹ ọne agbọn nan mẹn bhii nan. Ene uwẹ ne nin mẹn, ele mẹn bhii nan, ranmhude ọsi uwẹ ele khin. 10 Emhin nesẹmhẹn rebhe, ọsi uwẹ nọn, sẹyẹ, emhin nesẹ rebhe, ọsẹmhẹn nọn. Ele da yẹ wo mun ekpẹn nin mẹn.

11 “Imẹn iyẹ ribhi ọne agbọn nan, ranmhude, mẹn bu uwẹ vade. Ọkpakinọn, ele sẹyẹ ribhi ẹkẹ ọne agbọn nan. Aba nọn khiale, gbẹloghe ele ranmhude elin nọnsẹ nin uwẹ tie mun mẹn, beji a ha da miẹn, ele ki kugbe,* beji imẹn bi uwẹ rẹ kugbe.* 12 Ẹghe nin mẹn rẹ ha ribhi ẹwẹ ele, mẹn da wo ha gbẹloghe ele, ranmhude elin nọnsẹ nin uwẹ tie mun mẹn. Mẹn da gbega ele. Ọsoso bhi ẹwẹ ele bha fuẹn an, gbera ọnọn ha fuẹn an, beji ọta nọn ribhi Ebenọnkhiale ha da munsẹ. 13 Ejayenan nian, mẹn bu uwẹ vade. Nin ele manman ha ghọnghọn beji mẹn rẹ ghọnghọn, ọle zẹle nin mẹn da ha ta ene ẹmhọn nan beji mẹn sẹyẹ ribhi ẹkẹ ọne agbọn nan. 14 Mẹn ta ọta nọnsẹ man ele. Ọkpakinọn, ọne agbọn nan da he ele, ranmhude, ele iribhi ibo ọsi ọne agbọn nan, beji imẹn irẹ ribhi ibo ọsi ọne agbọn nan.

15 “Mẹn bha yọle nin uwẹ ne ele sibhi ẹkẹ ọne agbọn nan re, ọkpakinọn, nin uwẹ gbẹloghe ele, ranmhude ọne ọria ọbe. 16 Beji mẹn irẹ ribhi ibo ọsi ọne agbọn nan, ele iyẹ ribhi ibo ọsi ọne agbọn nan. 17 Re ẹmhọanta rẹ kpe ele khia, ọta nọnsẹ hi ọne ẹmhọanta. 18 Beji uwẹ rẹ je mẹn re bhi ọne agbọn nan, iriọ mẹn yẹ rẹ je ele nabhi ẹkẹ agbọn. 19 Imẹn wo ha kpe egbe mẹn khia ranmhude ele, beji a ha da miẹn, ẹmhọanta ki yẹ kpe ele khia.

20 “Ọ iyi ele ọkpa mẹn bhii nan, mẹn yẹ bhii nin ọrebhe ne ha mhọn urẹọbhọ da mẹn, ranmhude ọta nin ele ta. 21 Beji a ha da miẹn ele rebhe ki kugbe beji imẹn bi uwẹ nin Aba rẹ kugbe, nin ele yẹ kugbe deba mhan, beji ọne agbọn nan ha da rẹọbhọ ghe uwẹ je imẹn re. 22 Mẹn re uyi nin uwẹ re nin mẹn nin ele, beji ele ha da kugbe beji imẹn bi uwẹ rẹ kugbe. 23 Imẹn bi ele ki kugbe, uwẹ ki kugbe deba mẹn, beji ele ha da kugbe nọnsẹn. Bhiriọ, ọne agbọn nan ki lẹn ghe uwẹ je mẹn re. Ele ki yẹ lẹn ghe, uwẹ hoẹmhọn ele beji uwẹ rẹ hoẹmhọn mẹn. 24 Aba, mẹn guanọ nin ene uwẹ ne nin mẹn ha ribhi eji mẹn ye, beji ele ha da ha daghe uyi nin uwẹ re nin mẹn, ranmhude, uwẹ hoẹmhọn mẹn, ọ bhọ kuẹ sẹ uwẹ man ọne agbọn nan. 25 Aba mẹn nọn khiale, ọne agbọn nan bha sẹ dọ lẹn uwẹ. Ọkpakinọn, mẹn lẹn uwẹ. Ene eria nan nin uwẹ ne nin mẹn yẹ dọ lẹn ghe uwẹ je mẹn re. 26 Mẹn rẹkpa ele rẹ lẹn elin nọnsẹ. Mẹn dẹ sẹyẹ ha re otọ ọle man ele, beji ele ha da ha re oyẹẹ man beji uwẹ rẹ re oyẹẹ man mẹn, sẹyẹ, mẹn bi ele ki kugbe.”

18 Jesu ki nan erọnmhọn fo, ọle bi edibo nesọle da diọbhi ogba nọn ribhi obọ nọnkẹle bhi iyala ọsi Kidrọn. 2 Judas nọn ho nọn mun ọlẹn khiẹn yẹ lẹn eji ọne ogba ye, ranmhude, Jesu sẹ ka ne edibo nesọle yo enin igba ne bunbun. 3 Bhiriọ, Judas da ne eyokhọnlẹn bi ene unakpa nin ene ohẹn ne khua bi ene ibhokhan Farisi je rẹkhan egbe. Ele da muno orukpa bi emhin okhọnlẹn rẹkhan egbe vae bhi ọne ogba. 4 Ranmhude Jesu lẹn emhin rebhe ne ha sunu ji ọle, ọle da khian bu ele re yẹ nọọn ele yọle: “Họla bha guanọ?” 5 Ele da wanniẹn ọlẹn yọle: “Jesu nin obhi Nazarẹt.” Ọle da taman ele yọle: “Imẹn nọn.” Judas nọn mun ọlẹn khiẹn da yẹ ha ribhi enin.

6 Ẹghe nin Jesu rẹ yọle: “Imẹn nọn,” ene ẹbho da si egbe ri ikeke yẹ de ọbhi otọ. 7 Ọle da kie nọọn ele yọle: “Họla bha guanọ?” Ele da yọle: “Jesu nin obhi Nazarẹt.” 8 Jesu da yọle: “Mẹn yọle imẹn nọn. Sade imẹn bha guanọ, bha zẹ ene ikpea nan obọ.” 9 Ọle da lu ọnan nin ọle rẹ mun ọta nin ọle tale sẹ, nọn yọle: “Ọkpa bha yulua bhi ene uwẹ ne nin mẹn.”

10 Ẹghenin, Saimọn Pita da re agbada nọn ha ne ọle dagbare rẹ hian ehọ* ọsi ọguọmhandia ọsi ọne ojohẹn fia. Makọs a tie ọne ọguọmhandia. 11 Ọkpakinọn, Jesu da taman Pita yọle: “Re agbada nọnsẹ ya. Mẹn ida be yẹ wọn ukpu nin Aba mẹn mun nin mẹn?”

12 Ene eyokhọnlẹn, ene unakpa bi ọne ọwanlẹn ọsi eyokhọnlẹn da mun Jesu yẹ gba ọle obọ. 13 Ele da ka re ọle ha bu Annas, ọle hi aba okhuo Keafas. Keafas ha yi ojohẹn bhi ọne ukpe nin. 14 Keafas hi ọnọn taman ibhokhan Ju ghe, ọ dẹ mhẹn nẹ nin okpea ọkpa rẹ yu nin ene ẹbho.

15 Saimọn Pita bi odibo ọbhebhe da rẹkhan Jesu. Ọne odibo nin bi ọne ojohẹn ko lẹn egbe, bhiriọ, ọle da sabọ rẹkhan Jesu nabhi azagba ọsi ọne ojohẹn. 16 Ọkpakinọn Pita da ha ribhi olele, ọle da mundia bhi egbe odẹ. Bhiriọ ọne odibo nọnkẹle, nin ọle bi ọne ojohẹn ko lẹn egbe, da dọ ne ọnọn khẹ odẹ talọ, nọn ji Pita da nabhi uwa. Ọne odibo da ki re Pita na bhi uwa. 17 Ọne ọmanmhẹn nọn ha khẹ ọne odẹ da ki nọọn Pita yọle: “Uwẹ ibe yi ọkpa bhi edibo ọsi ọne okpea nan?” Pita da yọle: “Eye.” 18 Ranmhude ulinlin nọn ha fi, ene unakpa bi eguọmhandia ne ribhi ọne uwa da fi eranlẹn yẹ ha gha ọle. Pita da yẹ deba ele ha gha ọne eranlẹn.

19 Annas nin ọkpa bhi ene ohẹn ne khua, da ki ha nọọn Jesu ẹmhọn edibo nesọle bi emhin nin ọle man. 20 Jesu da wanniẹn ọlẹn yọle: “Ogbakha mẹn da ha man emhin. Ẹghe rebhe mẹn rẹ ha man emhin bhi sinagọg bi uwa oga. Ibhokhan Ju rebhe, ele vae bhi enin. Emhin iribhọ nin mẹn ta bhi ẹkhokho. 21 Ọ iyi mẹn uwẹ ha nọọn ọlẹn ọta, ẹbho ne họn ebi mẹn tale uwẹ ha nọọn ọlẹn ọta. Ele lẹn ebi mẹn tale.” 22 Jesu ki ta ọnan, ọkpa bhi ene unakpa ne mundia bhi enin da fi ọle ubi. Ọ da nọọn ọlẹn yọle: “Iriọ ọ khẹke nin uwẹ re wanniẹn ohẹn nọn khua?” 23 Jesu da taman ọlẹn yọle: “Ahamiẹn ẹmhọn nọn bha gba mẹn ta, uwẹ ki taman imẹn ebi mẹn tale nọn bha gba. Beji a miẹn ebe gbale mẹn tale, bezẹle nin uwẹ da fi mẹn ubi?” 24 Annas da ki yọle nan mun Jesu bu Keafas nin ojohẹn.

25 Bhi eji Saimọn Pita da sẹyẹ mundia ha gha eranlẹn, ẹbho da nọọn ọlẹn yọle: “Uwẹ ibe yi ọkpa bhi edibo ọsi ọne okpea nan?” Ọle da sin, ọ da yọle: “Eye.” 26 Obhio ọne okpea nin Pita hian ọle ehọ fia bhi ẹkẹ ogba, nọn yẹ yi ọkpa bhi igbọn ọsi ọne ojohẹn, da ki taman Pita yọle: “Ọ ibe yi uwẹ bi Jesu mẹn miẹn bhi ọne ogba ẹlẹ?” 27 Pita da gbo sin. Bhi ọne ẹghe nin tee, ọkpa da viẹ.

28 Ene ẹbho da ki nabhi isi Keafas mun Jesu ha khian uwa ọsi gọvanọ. Bhi ọne ẹghe nan nian, ẹdẹ ki we. Ele tobele bha nabhi uwa ọsi ọne gọvanọ, nan hẹi dọ miẹn ghe, ele bha sabọ lu iluemhin ọsi Anagbera ranmhude ele bha yẹ khia. 29 Pailet da ki bu ele re bhi olele yẹ nọọn ele yọle: “Be bhọ ọne okpea nan lu?” 30 Ele da wanniẹn ọlẹn yọle: “Ọluemhiebe ọne okpea nan khin, ọle zẹle nin mhan da mun ọlẹn ji uwẹ.” 31 Pailet da ki taman ele yọle: “Bha dọ re uhi nọnsẹbha rẹ bhu ọle ohiẹn.” Ene ibhokhan Ju da yọle: “A bha re ọne ahu nin mhan rẹ gbe ọria a.” 32 Ọnan da sunu, beji ẹmhọn nin Jesu tale rẹji ebi a ha rẹ gbe ọle a yẹ ha da munsẹ.

33 Pailet da kie nabhi ẹkẹ uwa yẹ tie Jesu. Ọle da nọọn ọlẹn yọle: “Uwẹ be hi ojie ọsi ibhokhan Ju?” 34 Jesu da nọọn ọlẹn yọle: “Ọkhọ obọ ẹ uwẹ be rẹ ha nọọn mẹn ọne ọta nan, la ẹbho ta ẹmhọn mẹn man ẹn?” 35 Pailet da yọle: “Mẹn iyi obhokhan Ju. Ẹbho nesẹ bi ene ohẹn ne khua, ele mun uwẹ bu imẹn re. Be uwẹ lu?” 36 Jesu da wanniẹn ọle yọle: “Ejele nọnsẹmhẹn bha deba ọsi ọne agbọn nan. Sade Ejele nọnsẹmhẹn deba ọsi ọne agbọn nọn, eguọmhandia nesẹmhẹn ha rẹ khọn nin mẹn, nan hẹi mun mẹn ọbhi obọ ọsi ibhokhan Ju. Ọkpakinọn, ọ iyi obọ eria Ejele nọnsẹmhẹn na vae.” 37 Pailet da ki nọọn ọlẹn yọle: “Bhiriọ, ojie uwẹ be khin?” Jesu da wanniẹn ọlẹn yọle: “Ọle uwẹ ta riọ.* Beji mẹn ha da sọsali ọbhi ẹmhọanta, ọle zẹle nan da biẹ imẹn, yẹ je imẹn nabhi ẹkẹ agbọn. Ọrebhe ne khian bhi uwedẹ ẹmhọanta, ele ka mẹn ehọ.” 38 Pailet da nọọn ọlẹn yọle: “Be bhọ hi ẹmhọanta?”

Ọle ki wo ta ọnan fo, ọle da gbo bu ene ibhokhan Ju bhi olele dọ taman ele yọle: “Ọne okpea nan bha lu ọkpa lu eva. 39 Rẹ deba ọnin, ẹghe Iluemhin Ọsi Anagbera rebhe bha rẹ yọle nin mẹn fan onighan ọkpa fia nin bha. Ibha be guanọ nin imẹn fan ọne Ojie ọsi ibhokhan Ju fia nin ibha?” 40 Ele da reso yọle: “Ọ iyi ọne okpea nan uwẹ ha fan fia, Barabas uwẹ ha fan fia nin mhan!” Oyi Barabas ha khin.

19 Pailet da ki taman ene egbanegbe nin ele dọ re asan gbe Jesu. 2 Ene egbanegbe da re igbẹn do ukparu ojie mun ọle bhi uhọnmhọn, yẹ mun ukpọn nọn mhọn alo ipọpo* hin ọlẹn. 3 Ene egbanegbe ha bu ọle re, ele ki yọle: “Zaiki, uwẹ nin Ojie ọsi ibhokhan Ju.” Ele da yẹ ha gbono ubi ọle bhi ẹlo. 4 Pailet da gbo bu ene ẹbho bhi ole yẹ taman ele yọle: “Ghọle! Mẹn dẹ re ọle dagbare nin mẹn rẹ rẹman bha ghe ọle bha lu ọkpa lu eva.” 5 Jesu da ki dagbare, ọne ukparu nan re igbẹn do da ha ri ọle bhi uhọnmhọn. Ọne ukpọn nọn mhọn alo ipọpo* da yẹ ha ri ọle bhi egbe. Pailet da ki taman ene ẹbho yọle: “Bha ghe ọne okpea!” 6 Ene ohẹn ne khua bi ene unakpa ki daghe ọle, ele da ha so yọle: “Dọ khan ọlẹn ọbhi oran! Dọ khan ọlẹn ọbhi oran!” Pailet da taman ele yọle: “Bha dọ tobọbha gbe ọle a, ranmhude, mẹn bha daghe emhin ebe nin ọle lu.” 7 Ene ibhokhan Ju da wanniẹn ọlẹn yọle: “Beji uhi nọnsẹmhan tale, ọkhẹke nin ọle yu, ranmhude ọle yọle ghe ọle hi ọmọn nọnsi Osẹnobulua.”

8 Pailet ki họn ebi ele ha ta, ofẹn da kie manman ha mun ọlẹn. 9 Bhiriọ, ọle da kie nabhi ẹkẹ uwa yẹ dọ nọọn Jesu yọle: “Ejela uwẹ na vae?” Ọkpakinọn, Jesu bha wanniẹn ọlẹn. 10 Bhiriọ, Pailet da taman ọlẹn yọle: “Uwẹ ida be wanniẹn mẹn? Uwẹ bha be lẹn ghe mẹn mhọn ọne ahu nin mẹn ha rẹ yọle nan fan ẹn fia, la nan gbe ẹ a?”* 11 Jesu da wanniẹn ọlẹn yọle: “Uwẹ ida ha mhọn ahu soso bhi egbe mẹn sade Osẹnobulua bha re ọne ahu nin uwẹ. Ọnan zẹle nan da miẹn ghe ọne okpea nọn mun mẹn uwẹ bhi obọ, ọle olukhọ nọnsọle kpọnọ nẹ.”

12 Ranmhude ọnan, Pailet da kie manman ha guanọ uwedẹ nin ọle ha rẹ fan ọlẹn fia. Ọkpakinọn, ene ibhokhan Ju da ha so yọle: “Uwẹ ha fan ọne okpea nan fia, uwẹ ki kiẹn oghian Siza. Ọria ha yọle ghe ojie ọle khin, Siza ọle ne suan.” 13 Pailet ki họn ebi ele tale, ọle da dọ re Jesu dagbare. Ọle da dotua bhi aga nin ọle da bhuohiẹn, bhi eji a re udo bọn okhun natiọle Gabata bhi urolo Hibru. 14 Ukpẹdẹ nan rẹ muegbe iluemhin ọsi Anagbera,* ọle ene emhin nan rẹ sunu. Egbẹghe agogo igbeva* a ki ha ye bhi ọne ẹghe nan. Pailet da ki taman ibhokhan Ju yọle: “Bha ghe ojie nọnsẹbha!” 15 Ọkpakinọn, ene ẹbho da ha so yọle: “Bha re ọle kpanọ! Bha re ọle kpanọ! Dọ khan ọlẹn ọbhi oran!” Pailet da nọọn ele yọle: “Nin mẹn dọ gbe ojie nọnsẹbha a?” Ene ohẹn ne khua da yọle: “Siza ọkpa hi ojie nin mhan lẹnlẹn.” 16 Pailet da ki yọle nan dọ khan Jesu ọbhi oran.

Ene egbanegbe da mun Jesu kpanọ. 17 Jesu da mun ọne oran* nan ha khan ọlẹn ọi. Ọle da ha mun ọlẹn khian eji a tiọle Uguẹ-uhọnmhọn, nan yẹ tiọle Gọgota bhi urolo Hibru. 18 Bhi enin, ene egbanegbe da khan Jesu ọbhi oran. Ele da yẹ khan ikpea eva ọbhi oran sike ọle. Ọkpa da ribhi obera nọnsọle, ọnọnkẹle da ribhi obọ agobọ. Ọle da ribhi adesẹ 19 Pailet da yẹ gbẹn emhin mun taan ọbhi ọne oran.* Ebi ọle gbẹnlẹn hi: “Jesu nin ọbhi Nazarẹt, nin Ojie ọsi ibhokhan Ju.” 20 Ibhokhan Ju ne bunbun, ele tie emhin nin Pailet gbẹnlẹn, ranmhude, eji a da khan Jesu ọbhi oran bha ree bhi Jerusalẹm. Sẹyẹ, urolo Hibru, urolo Latin, bi urolo Grik, ọle a rẹ gbẹn ọne ẹmhọn. 21 Ọkpakinọn, ene ohẹn ne khua da taman Pailet yọle: “Ọ iyi ‘Ojie ọsi ibhokhan Ju’ uwẹ ha rẹ gbẹn. Uwẹ ha rẹ gbẹn yọle, ‘Ọnọn yọle imẹn hi Ojie ọsi ibhokhan Ju.’” 22 Pailet da wanniẹn ele yọle: “Mẹn gbẹn ọlẹn fo, mẹn ida fi ọle denọ.”

23 Ene egbanegbe ki khan Jesu ọbhi oran fo, ele da re ukpọn nin ọle yọ ke okhun, yẹ sọọ ọle diọbhi ijanlẹn enẹn. Ele da gha ọle ọkpa-ọkpa. Ele da yẹ re ukpọn nin ọle yọ ke otọ. Ọkpakinọn, ọnan imhọn eji a da gban ọlẹn, a wo re olu fi ọle sotọ. 24 Bhiriọ, ele da taman egbe ele yọle: “Mhan ida sọọ ọnan an, mhan dẹ fi onolo ọbhọ nin mhan rẹ lẹn ọnọn ha re.” Ọnan da mun ebi Ebenọnkhiale tale sẹ, nọn yọle: “Ele da gha awegbe nọnsẹmhẹn, yẹ fi onolo ọbhi ukpọn nọnsẹmhẹn.” Enan hi emhin nin ene egbanegbe wo gene lu.

25 Inẹn Jesu, bi obhio inẹn Jesu nin okhuo da ha ribhi eji a da khan Jesu ọbhi oran.* Meri nin okhuo Klopas, bi Meri Madalin da yẹ ha ribhi enin. 26 Jesu ki daghe inẹn ọlẹn bi ọne odibo nin ọle hoẹmhọnlẹn bhi eji ele da mundia sikẹ egbe, ọle da taman inẹn ọlẹn yọle: “Okhuo, ghe ọmọn nọnsẹ!” 27 Ọle da ki taman ọne odibo yọle: “Ghe inẹn ẹn!” Rẹ na bhi ọne ukpẹdẹ nin rẹ ha khian, ọne odibo da re ọle nabhi uwa.

28 Ẹghe nin Jesu ki rẹ lẹn sẹbhọ ghe, ọle lu emhin rebhe nin Aba ọle yọle nin ọle lu fo, ọle da yọle: “Amẹn ghọn mẹn,” beji ọle ha da mun ẹmhọn nọn ribhi Ebenọnkhiale sẹ. 29 Uko nin anyọn nọn khekhe ye da ha ribhi enin. Bhiriọ, ele da mun ihiọn* ruarua bhọ, yẹ mun ọlẹn ọbhi eran hisọp* mun ọle bhi unun. 30 Jesu ki re unun so ọne anyọn nọn muokhe, ọle da yọle: “Mẹn lu emhin rebhe fo!” Ọle da re akhọle fia yẹ yu.

31 Ukpẹdẹ nan rẹ muegbe Sabati ọbhi otọ, ọle ene emhin nan rẹ sunu. Ene ibhokhan Ju bha guanọ nin ene ekuegbe sẹyẹ ha ribhi okhun oran rẹ sẹbhi ukpẹdẹ Sabati (ukpẹdẹ Sabati kpataki nọn). Bhiriọ, ele da taman Pailet nan khuẹnẹn oẹ ọsi ene ikpea a, yẹ muno ele sibhi okhun eran re. 32 Bhiriọ, ene egbanegbe da vae dọ khuẹnẹn oẹ ọsi ene ikpea eva nan khan bhi oran sikẹ Jesu. 33 Ọ ki sẹ Jesu egbe, ele da kere ghe ọle yu fo. Bhiriọ, ele bha yẹ khuẹnẹn ọle oẹ a. 34 Ọkpakinọn, ọkpa bhi ene egbanegbe da ji opolo ọle bhi efẹn, aranlẹn bi amẹn da dagbare. 35 Ọne ẹlo ọle sẹ bhi ene emhin nan, ọle ọnọn tale. Ẹmhọanta ebi ọle tale khin. Ọle lẹnmhin ghe, ẹmhọanta ọle tale, beji ibha ha da yẹ rẹọbhọ. 36 Ene emhin nan da sunu, beji ẹmhọn nan gbẹn ọbhi Ebenọnkhiale ha da munsẹ, nọn yọle: “A ida khuẹn ọle uguẹ bhi egbe.” 37 Ije ebhebhe bhi Ebenọnkhiale da yẹ yọle: “Ele da ha ghe ọne ele re opolo ha.”

38 Ene emhin nan ki sunu fo, Josẹf nin obhi Arimatia da bu Pailet dọ taman ọlẹn nọn ji ọle da mun ekuegbe nọnsi Jesu. Odibo nọnsi Jesu Josẹf ha khin. Ọkpakinọn, ranmhude ofẹn ibhokhan Ju nọn ha mun ọlẹn, ọle bha ji ẹbho lẹn ghe ọle ọle khin. Pailet ki re otọ nanlẹn rẹ dọ mun ekuegbe nọnsi Jesu, ọle da dọ mun. 39 Okpea natiọle Nikodemọs, nọn ka re asọn bu Jesu re ẹghe ọkpa, da yẹ ne emhin ne vin-ohin natiọle mai bi alo re. Emhin nin ọle ne re khua sẹbhi paund* iyisẹn.* 40 Ele da re ene emhin ne vin-ohin bi ukpọn linẹn rẹ gbanọ egbe nọnsi Jesu, beji ibhokhan Ju rẹ mun olinmhin egbe. 41 Ogba ọkpa da ha ribhi egbegbe eji a da gbe Jesu a. Idin nan la hian da ha ribhi ẹkẹ ọne ogba. A bha sẹ ka mun ọria soso tọ bhi enin khẹ. 42 Ranmhude ukpẹdẹ nin ibhokhan Ju rẹ muegbe khẹ iluemhin ọsi Anagbera ọne ukpẹdẹ nan khin, sẹyẹ, ọne idin bha ree gbe bhi enin, ele da re Jesu tọ bhi enin.

20 Ukpẹdẹ ọhẹnhẹn bhi ọne uzana,* Meri Madalin da vae bhi ọne idin bhi ọsewewiẹ bhibhi. Ẹdẹ bhọ bha sẹ gbanọn an. Ọle da kere ghe a wẹnẹ udo sibhi unun ọsi ọne idin re. 2 Ọle da ki runẹ a bu Saimọn Pita bi ọne odibo nin Jesu hoẹmhọn ọlẹn. Ọle da taman ele yọle: “E mun Ebeanlẹn mhan kpanọ. Mhan bha lẹn eji e ki dọ mun ọlẹn fi ọi.”

3 Pita bi ọne odibo nọnkẹle da ki ha khian ọne idin. 4 Ele veva ko munhẹn ha runẹ khian enin, ọkpakinọn, ọne odibo nọnkẹle da runẹ gbera Pita, yẹ ka ọle sẹbhi ọne idin. 5 Ọle da niẹn urulu ghe ẹkẹ eji a da re Jesu tọ, yẹ daghe ukpọn linẹn bhi otọ, ọkpakinọn, ọle bha nabhi ẹkẹ ọle. 6 Saimọn Pita da ki sẹbhi isi ọne idin, yẹ nabhi ẹkẹ ọle. Ọle da yẹ daghe ene ukpọn linẹn bhi otọ. 7 Ukpọn nan rẹ gbanọ Jesu uhọnmhọn bha ha ribhi eji ukpọn nekẹle ye. A da khi ọle re bhi ije kẹ. 8 Ọne odibo nọn ka sẹbhi enin da yẹ nabhi ẹkẹ eji a da re Jesu tọ. Ọle da daghe ọle ghe, ẹmhọanta a taman ele. 9 Arẹmiẹn Ebenọnkhiale yọle ghe a dẹ riọ Jesu kpanọ bhi uu, ọ bha sẹ mun ele ẹlo kore. 10 Bhiriọ, ene edibo da ha khian uwa.

11 Ọkpakinọn, Meri da sẹyẹ debhi egbegbe ọne idin an ha viẹ. Bhi eji ọle da ha viẹ, ọle da niẹn urulu ghe ẹkẹ ọne idin. 12 Ọle da daghe ẹhi eva ne yọ ukpọn nọn fua. Ele dotua bhi eji ekuegbe nọnsi Jesu rẹ ha ye. Ọkpa da dotua bhi eji a denọ ọle uhọnmhọn diọ i, ọnọnkẹle da dotua bhi eji a denọ ọle oẹ diọ i. 13 Ele da nọọn ọlẹn yọle: “Okhuo, bezẹle nin uwẹ da viẹ?” Ọle da taman ele yọle: “E mun Ebeanlẹn mẹn kpanọ, mẹn bha lẹn eji e mun ọlẹn diọ i.” 14 Ọle ki ta ọnan fo, ọle da fiorọ ghe ikeke, ọle da daghe Jesu mundia bhi enin, ọkpakinọn, ọle bha lẹn Jesu nọn. 15 Jesu da nọọn ọlẹn yọle: “Okhuo, bezẹle nin uwẹ da viẹ? Họla uwẹ guanọ?” Meri da ha riale ghe ọnọn gbẹloghe ọne ogba nọn. Bhiriọ, ọle da taman ọlẹn yọle: “Ọwanlẹn, ahamiẹn uwẹ mun ekuegbe nọnsọle kpanọ, taman imẹn eji uwẹ mun ọlẹn fi ọi, beji mẹn ha da dọ mun.” 16 Jesu da datie ọle yọle: “Meri!” Ọle ki wo fiorọ, ọle da re urolo Hibru yọle: “Raboni!” (Ebi a re ọnan ta hi, “Ọman-emhin!”) 17 Jesu da taman ọlẹn yọle: “Hẹi yẹ sigban rẹkhan mẹn, mẹn isẹ bu Aba imẹn bhi okhun nian. Ha bu ibhio mẹn, uwẹ ha taman ele yọle: ‘Mẹn bu Aba imẹn bi Aba bha khian bhi okhun, Osẹnobulua mẹn bi Osẹnobulua bha.’” 18 Meri Madalin da dọ taman ene edibo ebi ọle miẹnlẹn. Ọle da yọle: “Mẹn miẹn Ebeanlẹn mhan.” Ọle da yẹ taman ele ebi Jesu taman ọlẹn.

19 Ẹghe ki ha bu emuan bhi ọne ukpẹdẹ nin, nọn yi ukpẹdẹ ọhẹnhẹn bhi uzana, edibo nesọle da si egbe koko bhi ugha ọkpa, yẹ khue odẹ ranmhude ofẹn ibhokhan Ju nọn ha mun ele. Jesu da vae bhi ẹwẹ ele yẹ taman ele yọle: “Ọfure ne bha dia i.” 20 Ọle ki ta ọnan fo, ọle da re obọ bi efẹn nọnsọle man ele. Ene edibo da wo ha ghọnghọn nin ele rẹ miẹn ọlẹn. 21 Jesu da kie taman ele yọle: “Ọfure ne ibha dia. Beji Aba mẹn rẹ je mẹn vae bhi ọne agbọn nan, iriọ mẹn yẹ rẹ a je bha nabhi ẹkẹ agbọn.” 22 Ọle ki ta ọnan fo, ọle da fi ahoho nyan ele yẹ taman ele yọle: “Bha miẹn ẹlinmhin nọn khiale. 23 Ọria nin bha ki rẹ taman ghe a gbe olukhọ nọnsọle kua, a gene gbe ọle kua; ọria nin bha ki rẹ taman ghe a bha gbe olukhọ nọnsọle kua, a bha gbe ọle kua.”

24 Ẹghe nin Jesu rẹ vae, Tọmọs nin ọkpa bhi ene etuegbe igbeva, nan yẹ tiọle abieva bha ha ribhi enin. 25 Ene edibo nekẹle da ha taman Tọmọs yọle: “Mhan miẹn Ebeanlẹn mhan.” Ọkpakinọn, ọle da taman ele yọle: “Ahamiẹn mẹn bha daghe eji a da re ise khan ọle obọ, yẹ re obọ fẹ ọle ghe, nin mẹn yẹ re obọ so efẹn nọnsọle, mẹn ida rẹọbhọ.”

26 Ikpẹdẹ elẹnlẹn ki gbera, ene edibo da gbo ha ribhi ẹkẹ uwa, Tọmọs da ha ribhi ẹwẹ ele. Arẹmiẹn a khue odẹ, Jesu da vae dọ mundia bhi ẹwẹ ele, yẹ taman ele yọle: “Ọfure ne bha dia i.” 27 Ọle da ki taman Tọmọs yọle: “Fẹ obọ nọnsẹmhẹn ghe, uwẹ ha re obọ so ọle. Yẹ re obọ so efẹn nọnsẹmhẹn, uwẹ ha rẹọbhọ. Hẹi yẹ ha mhọn edandan.” 28 Tọmọs da taman ọlẹn yọle: “Osẹnọbulua mẹn! Ebeanlẹn mẹn!” 29 Jesu da ki taman ọlẹn yọle: “Nin uwẹ rẹ daghe mẹn zẹle uwẹ da ki rẹọbhọ nian? Eghọnghọn hi ọsi ẹbho ne rẹọbhọ arẹmiẹn ele bha daghe mẹn.”

30 Bhi ọsi ẹmhọanta, emhin ọhan-ilo ne bunbun yẹ wo ribhọ nin Jesu lu bhi isira edibo nesọle. A bha gbẹn ele ọbhi ọne ebe nan. 31 Ọkpakinọn, a da gbẹn enan ọbhi otọ, beji ibha ha da rẹọbhọ ghe, Jesu hi Kristi, nin Ọmọn nọnsi Osẹnobulua. Bha ha rẹọbhọ, bha ki ha mhọn iẹnlẹn bhi elin nọnsọle.

21 Akizẹbue Jesu da gbo zegbere man edibo nesọle, bhi Okpẹdẹ ọsi Taiberias. Inian ọ rẹ sunu: 2 Saimọn Pita, Tọmọs nan yẹ tiọle Abieva, Nataniẹ nọn na bhi Kena nọn ribhi Galili vae, imọn nesi Zẹbẹdi bi edibo eva ebhebhe da ko ha ribhi ijanlẹn ọkpa. 3 Saimọn Pita da taman ele yọle: “Mẹn khian dọ gbe ehẹn.” Ele da taman ọlẹn yọle: “Ji a ko ha khian.” Ele da nabhi okọ ha khian. Rẹ na ọne asọn nin rebhe, ele bha miẹn ehẹn gbe.

4 Beji ẹdẹ ki ha we, Jesu da vae dọ mundia bhi egbe ẹdẹ. Ọkpakinọn, ene edibo bha lẹn ghe, ọle nọn. 5 Jesu da ki nọọn ele yọle: “Imọn, bha be mhọn ebale* nin bha ha le?” Ele da wanniẹn ọlẹn yọle: “Eye!” 6 Ọle da taman ele yọle: “Bha fi ọgan diọbhi obera ọsi ọne okọ, bha dẹ miẹn ehẹn eso mun.” Bhiriọ, ele da fi ọle diọ bhọ. Ele da mun ehẹn ne bunbun, rẹ sẹbhọ ghe, ele bha sabọ si ọne ọgan sibhi ẹkẹ ẹdẹ re. 7 Ọne odibo nin Jesu hoẹmhọnlẹn da ki taman Pita yọle: “Ebeanlẹn mhan nọn!” Saimọn Pita ki wo họn ghe Ebeanlẹn nọnsele nọn, ọle da jẹje re awegbe yọ, yẹ san fi ọbhi ẹkẹ okpẹdẹ. 8 Ene edibo nekẹle da ha gua ọne obhi okọ vade, ele da si ọne ọgan nin ehẹn vuọnlẹn rẹkhan egbe. Eje ele ha ye bhi ọne ẹdẹ bha manman ree bhi otọ. Ifiti iyisẹn ea* ọkpa nọn.

9 Ele ki sẹbhi egbe ẹdẹ, ele da kere ghe, a re ehẹn ka bhi eranlẹn, ibrẹd da yẹ ha ribhi enin. 10 Jesu da taman ele yọle: “Bha ne eso re bhi ehẹn nin bha gbe.” 11 Bhiriọ, Saimọn Pita da nabhi ẹkẹ ọne okọ, yẹ dọ si ọne ọgan sibhi ẹkẹ ẹdẹ re. Udede ehẹn ihinlọn iribhi egbọ elẹnlẹn,* ele ha ribhọ. Arẹmiẹn ọne ehẹn bun sẹ iriọ, ọne ọgan bha sọọ a. 12 Jesu da ki taman ele yọle: “Bha vae dọ le ebale.” A bha miẹn ọsoso bhi ẹwẹ ele nọn gbudu nọọn ọlẹn yọle: “Họla uwẹ khin?” ranmhude ele lẹnmhin ghe, Ebeanlẹn nọnsele nọn. 13 Jesu da ne ene ibrẹd nin ele, ọle da yẹ ne ehẹn nin ele. 14 Ugba ọzea khọnan, nin Jesu ki sẹ zegbere man edibo nesọle, rẹ na bhi ẹghe nin ọle rẹ riọkpanọ bhi uu.

15 Ele ki le ebale fo, Jesu da taman Saimọn Pita yọle: “Saimọn nin ọmọn nọnsi Jọni, uwẹ be hoẹmhọn mẹn gbera ene emhin nan?” Pita da wanniẹn ọlẹn yọle: “Ehe Ebeanlẹn mẹn, uwẹ lẹnmhin imẹn hoẹmhọn ẹn.” Jesu da taman ọlẹn yọle: “Re ebale nin ihuan nesẹmhẹn le.” 16 Jesu da gbo nọọn ọlẹn ọsi ugba ọzeva yọle: “Saimọn, ọmon nọnsi Jọni, uwẹ be hoẹmhọn mẹn?” Pita da wanniẹn ọlẹn yọle: “Ehe Ebeanlẹn mẹn, uwẹ lẹnmhin imẹn hoẹmhọn ẹn.” Jesu da taman ọlẹn yọle: “Gbẹloghe ibhi ihuan nesẹmhẹn.” 17 Jesu da nọọn ọlẹn ọsi ugba ọzea yọle: “Saimọn, ọmọn nọnsi Jọni, uwẹ be hoẹmhọn mẹn?” Ọ da wo manman ha ba Pita bhi egbe ghe, Jesu nọọn ọlẹn ọsi ugba ọzea si ọle hoẹmhọn ọlẹn. Bhiriọ, ọle da yọle: “Ebeanlẹn imẹn, uwẹ lẹn emhin rebhe, uwẹ lẹnmhin ghe imẹn hoẹmhọn ẹn.” Jesu da taman ọlẹn yọle: “Re ebale nin ibhi ihuan nesẹmhẹn le. 18 Ẹghe nin uwẹ rẹ ha yi usẹn, uwẹ tobuwẹ re ukpọn yọ egbe ẹ yẹ yo eje ghọn ẹn. Ọkpakinọn, mẹn taman uwẹ ghe, uwẹ ha ki dọmanlẹn, uwẹ ki niẹn obọ a nin ọria ọbhebhe re ukpọn yọ uwẹ. Ọne ọria ki mun uwẹ ha khian eje bha yẹẹ uwẹ.” 19 Jesu da ta ọnan nin ọle re rẹman ebi Pita ha rẹ yu yẹ, rẹ re ogẹn ji Osẹnobulua. Ọle ki ta ọnan fo, ọle da taman ọlẹn yọle: “Wo ha rẹkhan mẹn.”

20 Pita ki fiorọ, ọle da daghe ọne odibo nin Jesu hoẹmhọnlẹn rẹkhan ele. Ọne odibo nan hi odibo nọn re egbe tẹ Jesu udu ẹghe nin ele rẹ ha le ebale emuan, yẹ nọọn ọlẹn yọle: “Ebeanlẹn mhan, họla guanọ nọn mun uwẹ khiẹn?” 21 Pita ki daghe ọle, ọle da nọọn Jesu yọle: “Ebeanlẹn mẹn, ọne okpea nan kii? Be ha sunu ji ọle?” 22 Jesu da taman ọlẹn yọle: “Ahamiẹn iho nọnsẹmhẹn nọn nin ọle rẹ sẹyẹ ha ribhi agbọn rẹ sẹbhi ẹghe nin mẹn ha rẹ vae, ọ bha rẹtẹ uwẹ. Uwẹ wo ha rẹkhan mẹn.” 23 Ranmhude ọnan, ene edibo da munhẹn ha tale bhi ẹwẹ ele ghe, ọne odibo nan ida yu. Ọkpakinọn, Jesu bha taman ọlẹn ghe, ọle ida yu. Ebi Jesu tale hi: “Ahamiẹn iho nọnsẹmhẹn nọn nin ọle rẹ sẹyẹ ha ribhi agbọn rẹ sẹbhi ẹghe nin mẹn ha rẹ vae, ọ bha rẹtẹ uwẹ.”

24 Ọne odibo nan hi odibo nọn sọsali ọbhi ene emhin nan, yẹ gbẹn ele ọbhi otọ. Mhan lẹnmhin ghe, ẹmhọanta ọle tale.

25 Bhi ọsi ẹmhọanta, emhin ne bunbun ebhebhe ribhọ nin Jesu lu. A ha yọle nan gbẹn ele rebhe ọbhi otọ, mẹn bha riale ọne otọ nan rebhe dẹ gua ebe nan ha gbẹn ọlẹn ọi.