EBE NỌNSI MAK

1 Inian ọne ọta nọn mhẹn rẹji Jesu Kristi nin Ọmọn nọnsi Osẹnobulua rẹ munhẹn: 2 Beji a rẹ gbẹn ọlẹn ọbhi ebe ọsi Ẹzaya nin akhasẹ tee: “(Ghọle! Imẹn je ukọ nọnsẹmhẹn kalo nin uwẹ, nin ọle dọ hẹnhẹn uwedẹ khẹ uwẹ.) 3 Ọria so dagbare bhi ẹkẹ ojẹgbo yọle: ‘Hẹnhẹn uwedẹ nọnsi Jehova!* Dia ukhuo nesọle.’” 4 Jọni nọn re amẹn nin ẹbho da ha ribhi ojẹgbo. Ọle da ha taman ẹbho nin ele mianmẹn, nin ele rẹ rẹman ghe ele fidenọ, beji Osẹnobulua ha da rẹhunmhan olukhọ nọnsele. 5 Ẹbho rebhe ne ribhi otọ Judia bi ẹbho rebhe ne ribhi agbaẹbho ọsi Jerusalẹm da ha bu ọle re. Ọle da ha re amẹn nin ele* bhi ẹdẹ Jọdan. Sẹyẹ, ele da ha ta emhin ebe nin ele lu dagbare. 6 Ukpọn nan re ilọn ọsi kẹtẹkẹtẹ* lu, ọle Jọni yọ, sẹyẹ, ugbakun nan re ohian elanmhẹn lu ọle rẹ gba akun. Iriso bi amẹnlọn, ọle ebale nin ọle ha le. 7 Ọle da ha tẹmhọn Osẹnobulua yọle: “Ọria nọn nẹ mẹn vade. Imẹn bha sẹ ọnọn ha taan iri si ọle bhi ibata re. 8 Amẹn mẹn da gbe bha ruẹ. Ọkpakinọn, ọle dẹ gbe ibha ruẹ bhi ẹlinmhin nọn khiale.”

9 Bhi ene ikpẹdẹ nin, Jesu da na bhi Nazarẹt ọsi Galili bu Jọni re. Bhiriọ, Jọni da re amẹn nanlẹn bhi ẹdẹ Jọdan. 10 Ọle ki wo ha dagbare bhi ẹkẹ amẹn, ọle da daghe okhun tuje a. Ọle da daghe ẹlinmhin nọnsi Osẹnobulua vade uke uhọnmhọn nọnsọle bọsi idulu. 11 Sẹyẹ, ukpurulu da na bhi okhun yọle: “Uwẹ hi Ọmọn nọnsẹmhẹn, ọne imẹn hoẹmhọnlẹn; nin ẹmhọn ọlẹn ti mẹn bhọ.”

12 Bhi ọsi ẹjẹje, ẹlinmhin nọn khiale da dia ọle ha khian ẹkẹ ojẹgbo. 13 Ọle da ha ribhi ọne ojẹgbo bhi ikpẹdẹ egbọ-eva,* bhi ẹwẹ elanmhẹn ẹwẹ. Bhi enin, Esu da dọ dọnmhẹn ọlẹn. Ọkpakinọn, ene ẹhi da dọ ha rẹkpa ọle.

14 Beji a ki mun Jọni khue fo, Jesu da diọbhi Galili dọ ha wewe ọne ọta nọn mhẹn nọnsi Osẹnobulua. 15 Ọle da ha yọle: “Ọne ẹghe nan rẹyi sẹle. Sẹyẹ, Agbejele nọnsi Osẹnobulua sire. Ibha fidenọ, ibha ha yẹ mhọn urẹọbhọ da ọne ọta nọn mhẹn.”

16 Ẹghe nin ọle ki rẹ ha khian na bhi egbegbe okpẹdẹ ọsi Galili, ọle da daghe Saimọn bi obhio ọle nin Andru. Ele da ha fi ọgan nọnsele ọbhi okpẹdẹ, ranmhude, ọgbehẹn ele khin. 17 Bhiriọ, Jesu da taman ele yọle: “Bha rẹkhan mẹn, imẹn dẹ re ibha ha muno eria beji bha rẹ muno ehẹn.” 18 Ele da wo re osukpa zẹ ọgan nọnsele obọ yẹ rẹkhan ọlẹn. 19 Ọle ki gbo khian re odalo, ọle da miẹn Jemis nin ọmọn nọnsi Zẹbẹdi bi obhio ọle nin Jọni. Ele da ha hẹnhẹn ọgan nọnsele bhi ẹkẹ okọ. 20 Ọle da wo re ẹjẹje datie ele. Bhiriọ, ele da zẹ aba ele nin Zẹbẹdi bi ikpea ne wẹnna nin ele obọ bhi ẹkẹ okọ. Ele da rẹkhan Jesu. 21 Ele da ha khian Kapaniọn.

Ukpẹdẹ Sabati ki munhẹn, Jesu da diọbhi sinagọg dọ ha man emhin. 22 Uwedẹ nin ọle rẹ ha man emhin da wo han ene ẹbho ilo. Ranmhude, ọle wo ha man ele emhin bii ọria nan re ahu nan, ọ iyi bọsi ene man uhi. 23 Bhi ọne ẹghe nin, okpea ọkpa nin ẹlinmhin-ebe kpokpo da ha ribhi sinagọg nọnsele. Ọle da reso yọle: 24 “Jesu nin obhi Nazarẹt, be rẹtẹ mhan bi uwẹ? Uwẹ be vae dọ fuẹn mhan an? Imẹn wo lẹn ọria nin uwẹ khin. Uwẹ hi Ọnọn Khiale nin Osẹnobulua jere.” 25 Ọkpakinọn, Jesu da taman ọlẹn yọle: “Gue unun, uwẹ ha si ọle bhi egbe re!” 26 Ọne ẹlinmhin-ebe ki re ilinlẹn mun ọne okpea fo, ọ da manman reso, yẹ dagbare bhi egbe nọnsọle. 27 Ọne emhin nan da wo manman han ene ẹbho rebhe ilo, rẹ sẹbhọ ghe, ele da ha tale bhi ẹwẹ ele yọle: “Be a tie ọnan bhi emhin? Iman-emhin ọsọgbọn khọnan! Ọle ha wo taman ene ẹlinmhin-ebe nin ele dagbare, ele ki wo lu beji ọle tale.” 28 Bhiriọ, ẹmhọn Jesu da vẹ gba ijerebhe bhi otọ Galili.

29 Ele ki sibhi sinagọg re, Jemis bi Jọni da rẹkhan Jesu ha khian uwa ọsi Saimọn bi Andru. 30 Ele ki sẹ uwa, ele da kere ghe, inẹn okhuo Saimọn nowẹ, ranmhude ọle khọnmhọn ifiva. Ẹjẹje, ele da dọ taman Jesu ẹmhọn ọlẹn. 31 Jesu da ki bu ọle re. Ọle da re ọle obọ mhọnlẹn, yẹ mun ọlẹn okhun. Bhiriọ, ọne ifiva da si ọle bhi egbe re. Ọle da dọ ha nyẹn ebale nin ele.

32 Ọsemuan ki re, ẹghe nin ovuẹn rẹ defia fo, ẹbho da ha muno eria nin egbe bha daan, bi eria nin ẹlinmhin-ebe kpokpo bu ọle re; 33 sẹyẹ, ọrebhe bhi ọne agbaẹbho da sikoko bhi ununro ọsi ọne uwa. 34 Ọle da re egbe daan ẹbho ne bunbun ne khọnmhọn unan emianmhẹn kẹkẹ. Sẹyẹ, ọle da khuno ẹlinmhin-ebe ne bunbun si ẹbho bhi egbe re. Ọkpakinọn, ọle iji ene ẹlinmhin-ebe da talọ, ranmhude, ele lẹn ghe ọle hi Kristi.*

35 Bhi ọsewewiẹ, beji ẹdẹ bha sẹ gbanọn an, ọle da kpanọ ha khian olele dọ guanọ eje fi ahiẹ a. Bhi enin, ọle da ha nan erọnmhọn. 36 Ọkpakinọn, Saimọn bi edibo nekẹle da ha guanọ ọle na bhi eje rebhe khian. 37 Ele ki miẹn ọlẹn, ele da taman ọlẹn yọle: “Ọrebhe guanọ uwẹ.” 38 Ọkpakinọn, ọle da taman ele yọle: “Bha ji imhan ha khian ije ebhebhe. Bha ji mhan diọbhi ene idunmhun ne sikẹ mhan, beji imẹn ha da yẹ tẹmhọn Osẹnobulua bhi enin. Ranmhude ọnan zẹle nin imẹn da vae.” 39 Ọle da kpanọ dọ ha tẹmhọn Osẹnobulua bhi ene sinagọg ne ribhi otọ Galili. Sẹyẹ, ọle da ha khu ẹlinmhin-ebe si ẹbho bhi egbe re.

40 Okpea ọkpa nọn ha khọnmhọn emianmhẹn egbekẹn da yẹ bu ọle re. Ọle da de diguẹ ha bhii ọle yọle: “Imẹn lẹnmhin ghe uwẹ dẹ sabọ re egbe daan mẹn* sade ọ yẹẹ uwẹ.” 41 Bhiriọ, ẹkẹ da wo jẹjẹ ọle a. Ọle da niẹn obọ nọnsọle a rẹ so ọle, yẹ yọle: “Ọ yẹẹ mẹn! Ji egbe daan ẹn.” 42 Ọne emianmhẹn egbekẹn da wo re osukpa si ọle bhi egbe re, sẹyẹ, egbe da daan ọlẹn.* 43 Jesu da gbuhi nanlẹn, yẹ re osukpa je ọle kpanọ. 44 Ọle da taman ọlẹn yọle: “Hẹi taman ọria soso ebe sunu. Ọkpakinọn, dọ re egbe ẹ man ene ohẹn, uwẹ ha yẹ lu ọne izọese nin Mozis yọle nan lu, nin uwẹ rẹ rẹman ghe uwẹ kpekhia, beji ọ ha da ha yi ọsali rẹji ele.” 45 Ọne okpea ki sibhi enin re, ọle da manman ha wewe ọle na bhi ijerebhe, rẹ sẹbhọ ghe, Jesu bha yẹ sabọ ha nabhi ẹkẹ ene agbaẹbho. Eje fi ahiẹ a ọle ki ha dia. Ọrẹyiriọ, ẹbho da yẹ ha na bhi ijerebhe bu ọle re.

2 Ọkpakinọn, ikpẹdẹ eso ki gbera, ọle da fikie vae bhi Kapaniọn. Sẹyẹ, ẹbho ne bunbun da lẹn ghe ọle vae bhi uwa. 2 Ẹbho ne bunbun da sikoko bhi ọne uwa, rẹ sẹbhọ ghe, ọ da vuọn sẹbhi ununro. Ọle da munhẹn ha tẹmhọn Osẹnobulua man ele. 3 Ẹbho eso da mun akhun ọkpa bu ọle re. Itue enẹn mun ọlẹn re. 4 Ọkpakinọn, ranmhude ẹbho ne vuọn ijerebhe, ele bha sabọ mun ọne akhun sẹbhi eji Jesu ye. Bhiriọ, ele da zẹ uhio ọbhi okhun ọne uwa, yẹ re ewa rẹ mun ọlẹn huẹnre bu ọle. 5 Jesu ki daghe urẹọbhọ nin ele rẹman, ọle da taman ọne akhun yọle: “Ọmọn, a gbe olukhọ nesẹ kua.” 6 Bhi ọne ẹghe nan, eso bhi ene man uhi ne dotua bhi enin da ha riale bhi ọkhọle nọnsele yọle: 7 “Bezẹle nin ọne okpea nan da re inian ha talọ? Ọle wo ha re unun ji Osẹnobulua. Gbera Osẹnobulua, ọria ọbhebhe iribhọ nọn ha sabọ gbe olukhọ ọsi ọria kua.” 8 Ọkpakinọn, Jesu da wo re osukpa lẹn ebi ele ha zilo ọle. Bhiriọ, ọle da taman ele yọle: “Bezẹle nin ibha da ria emhin ne sẹ inian bhi ọkhọle nọnsẹbha? 9 Ọnela lẹkhẹ nẹ nan rẹ ta? Nan rẹ taman ọne akhun yọle, ‘A gbe olukhọ nesẹ kua,’ la nan rẹ yọle, ‘Kpanọ, re ewa nọnsẹ, uwẹ a ha khian’? 10 Ọkpakinọn, nin bha rẹ lẹn ghe, Ọmọn nọnsi okpea mhọn ahu nin ọle rẹ rẹhunmhan olukhọ bhi ọne otọ nan . . .” ọle da taman ọne akhun yọle: 11 “Imẹn taman uwẹ yọle, Kpanọ, re ewa nọnsẹ, ha khian uwa.” 12 Bhiriọ, ọle da kpanọ. Ọle da jẹje re ewa nọnsọle, yẹ khian dagbare bhi isira ele rebhe. Ọnan da han ele rebhe ilo. Ele da ha re ogẹn ji Osẹnobulua, yẹ yọle: “Mhan bha sẹ ka miẹn ebe sẹ inian khẹ.”

13 Ọle da gbo dagbare diọbhi egbẹdẹ. Ene usun ẹbho rebhe da ha bu ọle re bhi enin. Ọle da munhẹn ha man ele emhin. 14 Beji ọle ki ha gbera, ọle da daghe Livai nin ọmọn nọnsi Afiọs dotua bhi ọfisi nan da koko igho uhọnmhọn. Ọle da taman ọlẹn yọle: “Dọ kiẹn odibo nọnsẹmhẹn.” Bhiriọ, ọle da kpanọ yẹ rẹkhan ọlẹn. 15 Akizẹbue, Jesu da ha le ebale bhi uwa nọnsi Livai. Eria olukhọ bi ẹbho ne bunbun ne koko igho uhọnmhọn da deba ọle bi edibo nesọle ha le ebale,* ranmhude ene bunbun bhi ẹwẹ ele wo ha rẹkhan ọlẹn. 16 Ẹghe nin ene man uhi bhi ẹwẹ ene Farisi rẹ daghe ọle ghe, Jesu deba eria olukhọ bi ene koko igho uhọnmhọn ha le ebale, ele da ha nọọn edibo nesọle yọle: “Bezẹle nin ọle da deba eria olukhọ bi ene koko igho uhọnmhọn le ebale?” 17 Jesu ki họn ọnan, ọle da taman ele yọle: “Eria nin egbe bha daan, ele guanọ dọkitọ, ọ iyi ene egbe daanlẹn. Eria olukhọ imẹn vae dọ tie, ọ iyi ene khiale.”

18 Ẹghe-ẹghe, ọle edibo nesi Jọni bi ibhokhan Farisi rẹ fi azinmin.* Bhiriọ, edibo nesi Jọni da bu ọle re, yẹ nọọn ọlẹn yọle: “Bezẹle nan da miẹn ghe, edibo nesẹ ifi azinmin, arẹmiẹn ghe edibo nesi Jọni bi edibo ọsi ibhokhan Farisi fi azinmin?” 19 Bhiriọ, Jesu da taman ele yọle: “Be ha re imọẹ ọsi okpea nọn ho nọn re okhuo ha fi azinmin,* beji a miẹn ghe ọne okpea sẹyẹ ribhi ẹwẹ ele? Ọ bha khẹke nin ele ha fi azinmin* beji a miẹn ghe ọne okpea nọn ho nọn re okhuo sẹyẹ ribhi ẹwẹ ele. 20 Ọkpakinọn, ọne ẹghe vade nan ha rẹ re ọne okpea nọn ho nọn re okhuo sibhi ẹwẹ ele re. Ẹghenin, ele ki fi azinmin. 21 Ọria iribhọ nọn ha re ukpọn ọsọgbọn rẹ gban awegbe nọn ki yẹyẹ a. Ọle ha lu iriọ, ọne ukpọn ọsọgbọn ki sọọ sibhọre. Ẹghenin, ọne awegbe ki nyanghan gbera ọnikhẹ. 22 Sẹyẹ, ọria iribhọ nọn ha sa anyọn ọsọgbọn ọbhi ẹkpa anyọn nọn ki dọmanlẹn, ọle ha lu iriọ, ọne anyọn ki vẹ ọne ẹkpa a. Bhiriọ, ọne anyọn ki tuekua, ọne ẹkpa anyọn ki yẹ riia. Ẹkpa anyọn ọsọgbọn, ọle a sa anyọn ọsọgbọn ọi.”

23 Ẹghe nin ọle bi edibo nesọle ki rẹ ha na bhi ẹkẹ ugbo gbera bhi ukpẹdẹ Sabati, edibo nesọle da re obọ kọnnọn bhi emhin nan kọle yẹ ha le ọle. 24 Bhiriọ, ibhokhan Farisi da taman ọlẹn yọle: “Ghọle! Bezẹle nin edibo nesẹ da ha lu emhin nọn bha khẹke nan ha lu bhi ukpẹdẹ Sabati?” 25 Ọle da wanniẹn ele yọle: “Ibha bha be sẹ ka tie ọle khẹ, emhin nin Devid lu ẹghe nin ohanmhẹn rẹ ha gbe ọle bi ikpea ne rẹkhan ọlẹn, nin ọle da ha guanọ ebale? 26 Bhi okha ọsi Abaiyata nin ojohẹn, Devid da nabhi uwa oga nọnsi Osẹnobulua, yẹ le ibrẹd nan rẹ zọese. Ọle da rẹ bhọ nin ene rẹkhan ọlẹn, arẹmiẹn ghe ene ohẹn ọkpa ọkhẹke ne le ọle.” 27 Jesu ki da taman ele yọle: “Ọria zẹle nin Osẹnobulua da yọle nan ha lu Sabati, ọ iyi ranmhude Sabati zẹle nin Osẹnobulua da man eria. 28 Ọmọn nọnsi okpea, ọle bhọ hi Ebeanlẹn ọsi Sabati.”

3 Ẹdẹ ọbhebhe, ọle da gbo nabhi ẹkẹ sinagọg. Okpea ọkpa nin obọ nọnsọle nẹghẹ a da ha ribhi enin. 2 Ene ibhokhan Farisi da re ẹlo ọle bhi egbe, nin ele fẹghe si ọle dẹ re egbe daan ọne okpea bhi ukpẹdẹ Sabati, beji ele ha da yọle ghe ọle lu emhin nọn bha khẹke. 3 Ọle da taman ọne okpea nin obọ nọnsọle nẹghẹ a: “Kpanọ vae bhi adesẹ.” 4 Ọle da ki nọọn ele yọle: “Emhin nela ọkheke nan ha lu bhi ukpẹdẹ Sabati, emhin esili la emhin ọbe, nan rẹ hinmhin ọria la nan rẹ gbe ọria a?” Ọkpakinọn, ele bha wanniẹn ọlẹn. 5 Uwedẹ nin ọkhọle nọnsele rẹ gbin da wo manman ba Jesu bhi egbe. Ọle ki re ọgọn ghe ele nẹga fo, ọle da taman ọne okpea yọle: “Niẹn obọ nọnsẹ a.” Ọle ki niẹn ọne obọ a, ọne obọ bha yẹ nẹghẹ a. 6 Ene ibhokhan Farisi da ki dagbare dọ jẹje deba ene rẹkhan Hẹrọd ha do ikolo. Ele da ha mhanmhan ebi ele ha rẹ gbe ọle a yẹ.

7 Jesu bi edibo nesọle da kpanọ ha khian obọ ọsi okpẹdẹ. Usun ẹbho ne bunbun da na bhi Galili bi Judia rẹkhan ọlẹn. 8 Usun ẹbho ne bunbun bhọ da yẹ na bhi Jerusalẹm, Idumia, obọ nọnkẹle bhi ẹdẹ Jọdan bi egbegbe Taya bi Saidọn bu ọle re, ẹghe nin ele rẹ họn emhin ne bunbun nin ọle ha lu. 9 Ọle da taman edibo nesọle nin ele guanọ okọ nọn dia khere nanlẹn, nin ọle ha da dotua, beji a ha da miẹn ghe, ene usun ẹbho bha ha vẹ ruru ọle. 10 Ranmhude ọle wo ha re egbe daan ẹbho ne bunbun, ọrebhe ne ha khọnmhọn emianmhẹn ebe da ha vẹ ruru ọle, beji ele ha da re obọ so ọle. 11 Eria nin ẹlinmhin-ebe kpokpo bhọ ha miẹn ọlẹn, ele ki debhẹre nanlẹn yẹ ha so dagbare yọle: “Uwẹ hi Ọmọn nọnsi Osẹnobulua.” 12 Ọkpakinọn, igba ne bunbun, ọle ki manman gbuhi nin ele, nin ele hẹi yẹ tale nin ẹbho họn.

13 Ọle da hẹn uke oke, yẹ datie ene ọle guanọ ne bu ọle re. Ele da bu ọle re. 14 Ọle da zẹ itue igbeva, yẹ ha tie ele etuegbe nesọle. Enan hi ẹbho ne da ha rẹkhan ọlẹn, nin ọle ha yẹ ha je dagbare ne dọ tẹmhọn Osẹnobulua. 15 Ọle dẹ yẹ re ahu nin ele rẹ ha khu ẹlinmhin-ebe fia.

16 Ene itue igbeva nin ọle zẹ hi, Saimọn nin ọle yẹ ha tiọle Pita, 17 Jemis nin ọmọn nọnsi Zẹbẹdi, bi Jọni nin obhio Jemis (Ọle da yẹ ha tiele Boanẹjis. Ebi ọnan mundia nan hi, “Imọn nesi avan”*), 18 Andru, Filip, Batolomio, Matiu, Tọmọs, Jemis nin ọmọn nọnsi Afiọs, Tadiọs, Saimọn nin Kenanian,* 19 bi Judas Iskarọt, nọn mun ọlẹn khiẹn.

Jesu da nabhi ẹkẹ uwa. 20 Ene usun ẹbho da gbo dọ sikoko bhi eji ọle ye, rẹ sẹbhọ ghe, ọle bi edibo nesọle bhọ bha miẹn ẹghe rẹ le ebale. 21 Ibhio ọle ki họn ebe ha sunu, ele da ha khian nin ele dọ mun ọlẹn. Ranmhude, ele da ha yọle: “Ọ munhẹn ha mhẹnmhẹn.” 22 Ene man uhi ne na bhi Jerusalẹm vae da yẹ ha yọle: “Ahu ọsi Biẹzibọb* ọle noo. Ojie ọsi ene ẹlinmhin-ebe re ahu nanlẹn rẹ ha khu ẹlinmhin-ebe fia.” 23 Ọle da datie ele re, yẹ noo arẹkhọkhọ rẹ ne ele talọ. Ọle da yọle: “Be Esu ha rẹ sabọ khu Esu yẹ? 24 Ahamiẹn okugbe iribhi agbejele, ọ ida sabọ mundia. 25 Sẹyẹ, ahamiẹn okugbe iribhi azagba-uwa, ọ ida sabọ mundia. 26 Iriọ yẹ nọn, ahamiẹn Esu ki ne egbe ọle suan, sẹyẹ, agbejele nọnsọle bha yẹ kugbe, ọle ida sabọ mundia. Ọsọle ki wo fo. 27 Bhi ọsi ẹmhọanta, ọria iribhọ nọn ha sabọ nabhi uwa ọsi okpea nọn wolo yẹ ne ọle emhin, sade ọle bha ka gba ọne okpea re ọbhi otọ fo. Ọle ha lu iriọ, ọle ọkpa ọle ha da sabọ ne emhin nesọle. 28 Bhi ọsi ẹmhọanta, imẹn taman ibha ghe, emhin nọn hi ki rẹ khin nin eria lu, a dẹ rẹhunmhan ele. Emhin ebe nọn hi ki rẹ khin nin ele lu, la ọta ebe nọn hi ki rẹ khin nin ele ta, a dẹ rẹhunmhan ele. 29 Sokpan, ọria nọn hi ki rẹ khin nọn re unun je ẹlinmhin nọn khiale, a ida rẹhunmhan ọlẹn ghee. Ọle ki kiẹn ọnọn lu olukhọ ọsi ighegheghe.” 30 Ranmhude nin ele rẹ ha yọle: “Ẹlinmhin-ebe noo ọle,” ọle zẹle nin ọle da ta ọnan.

31 Inẹn ọlẹn bi ibhio ọle da vae. Ele da mundia bhi ole, yẹ je ọria nọn dọ datie ọle re. 32 Ranmhude ẹbho ne bunbun dotua nẹga ọle, ele da taman ọlẹn yọle: “Ghọle! Inẹn ẹn bi ibhio ẹ nin ikpea ribhi ole. Ele guanọ uwẹ.” 33 Ọkpakinọn, ọle da wanniẹn ele yọle: “Họla inẹn imẹn, hela ibhio imẹn nin ikpea?” 34 Ọle da ki ghe ene dotua nẹga ọle, yẹ yọle: “Ghe inẹn imẹn bi ibhio imẹn nin ikpea! 35 Ọria nọn hi ki rẹ khin nọn lu iho nọnsi Osẹnobulua, ọle hi obhio imẹn nin okpea, ọle hi obhio imẹn nin okhuo, ọle yẹ hi inẹn imẹn.”

4 Ọle da gbo munhẹn ha man ẹbho emhin bhi egbegbe okpẹdẹ. Usun ẹbho ne bunbun da bu ọle re. Bhiriọ, ọle da dọ dotua bhi ẹkẹ okọ. Ọle da si ọle sibhi egbẹdẹ re. Ene ẹbho da mundia bhi egbe ọne okpẹdẹ. 2 Ọle da munhẹn ha re arẹkhọkhọ rẹ man ele emhin ne bunbun. Ẹghe nin ọle rẹ ha man ele emhin, ọle da taman ele yọle: 3 “Ghọle. Bha kaehọ! Okpea ọkpa da dagbare dọ kọ emhin. 4 Ẹghe nin ọle rẹ ha kọ emhin, ikpẹ eso da denọ bhi egbodẹ. Afianmhẹn da vae dọ le ele. 5 Ikpẹ eso da denọ bhi otọ udo-udo bhi eji ekẹn imanman ye. Ele da wo jẹje jẹre, ranmhude, ekẹn nọn ribhi enin bha bun. 6 Ọkpakinọn, ẹghe nin ovuẹn ki rẹ zẹ re, ọ da tuẹ ele a, ele da yuno, ranmhude, ele bha ha mhọn iniẹn. 7 Ikpẹ eso da denọ bhi ẹwẹ igbẹn. Ene igbẹn da wanre, yẹ ru ele nyan otọ. Bhiriọ, ele bha mọn ikpẹ. 8 Ọkpakinọn, ikpẹ eso da denọ bhi otọ nọn mhẹn. Ele da wanre, yẹ ha lu nọnsẹn. Ele da munhẹn ha mọn ikpẹ. Ikpẹ nin ele mọn da re igba ọgban,* igba egbọ ea,* bi igba iyisẹn* rẹ bun gbera ikpẹ nan kọle.” 9 Ọle da ki yọle: “Ọnọn mhọn ehọ, ọ ha rẹ họn.”

10 Ẹghe nin ẹbho ne bunbun ki rẹ kpanọ fo, ene ki kẹre bi ituegbe igbeva nesọle da munhẹn ha nọọn ọlẹn ebi ọle re ene arẹkhọkhọ ta. 11 Ọle da taman ele yọle: “A re ọne isẹhoa nin ibha, nin ibha rẹ lẹn ọne ọta ẹkhokho ọsi Agbejele nọnsi Osẹnobulua. Ọkpakinọn, rẹji enekẹle, arẹkhọkhọ imẹn rẹ ne ele talọ, 12 beji a ha da miẹn ghe, ele ha rẹ ha ghe ughe, ele ida daghe emhin soso, ele ha rẹ ha kaehọ, ele ida lẹn otọ ebi a tẹmhọn ọlẹn; la nin ele fidenọ, beji a ha da rẹhunmhan ele.” 13 Sẹyẹ, ọle da taman ele yọle: “Beji a miẹn ibha bha lẹn otọ ọne arẹkhọkhọ nan, be ibha ha ki rẹ lẹn otọ ene arẹkhọkhọ nekẹle rebhe yẹ?

14 “Ọta nọnsi Osẹnobulua, ọle ikpẹ nin ọne okpea kọ. 15 Enin ikpẹ ne denọ ọbhi egbodẹ, ele a rẹ khọkhọ eria nan kọ ọta nọnsi Osẹnobulua ele bhi ọkhọle. Ọkpakinọn, beji ele wo họn fo, Esu da vae dọ re ọne ọta si ele bhi ọkhọle re. 16 Ene denọ ọbhi otọ udo-udo, ele a rẹ khọkhọ eria ne wo họn ọne ọta yẹ re eghọnghọn miẹn ọlẹn ọbhi egbe. 17 Ọkpakinọn, ele bha ha mhọn iniẹn. Ọrẹyiriọ, ele da rẹtẹ bhi ẹghe eso; sokpan, ekpokpo bi ọnọghọ ki zegbere ranmhude ọne ọta, ele da dere. 18 Eso yẹ ribhọ ne denọ bhi ẹwẹ igbẹn. Enan hi ene họn ọne ọta. 19 Ọkpakinọn, ikpokpegbe ba ẹmhọn iẹnlẹn bhi ọne agbọn nan, bi ahu nin igho mhọn nọn rẹ hiẹ ọria, bi emhin nekẹle rebhe nin ọria guanọ ki na ele bhi ọkhọle, yẹ degue ọne ọta. Bhiriọ, ọ ida mọn ikpẹ. 20 Bhi ọkike ọle, ene a kọ ọbhi otọ nọn mhẹn, enan hi ene họn ọne ọta, ne miẹn ọlẹn ọbhi egbe, yẹ mọn ikpẹ—ikpẹ nin ele mọn da re igba ọgban,* igba egbọ ea,* bi igba iyisẹn* rẹ bun gbera ikpẹ nan rẹ kọ.”

21 Ọle da yẹ nọọn ele yọle: “Ọria ha mun orukpa ru, ọle be re okhuale gue ọle, la mun ọlẹn ọbhi odotọ ibẹd? Ọ ibe yi eji a mun orukpa ọi ọle ha mun ọlẹn ọi? 22 Emhin soso iribhọ nan re nẹhe nọn ida dagbare. Sẹyẹ, emhin iribhọ nan fẹkẹ re nẹko nọn ida dagbare bhi ughele. 23 Ọnọn mhọn ehọ ọ ha rẹ họn.”

24 Ọle da yẹ taman ele yọle: “Bha gbehọkotọ bhi ebi ibha họn. Uwedẹ nin ibha rẹ mhaan emhin nin ẹbho, ọle a ha yẹ rẹ mhaan nin bha. Bhi ọsi ẹmhọanta, a bhọ ki yẹ rẹ ba ibha le. 25 Ọnọn hi ki rẹ khin nọn mhọn, a ki rẹ ba ọle le. Ọkpakinọn, ọnọn hi ki rẹ khin nọn imhọn, a ki miẹn ọlẹn ebi ọle bhọ rẹ ha mhọnlẹn.”

26 Ọle da yẹ yọle: “Inian Agbejele nọnsi Osẹnobulua diabe okpea nọn kọ emhin ọbhi otọ. 27 Ebi ha lo, ọle ki nowẹ, ẹdẹ ha we, ọle ki riọre, ene ikpẹ nin ọle kọle ki tobele jẹre, e ki wanre. Ebi ọnan rẹ sunu yẹ, ọle bha lẹn. 28 Otọ fẹkẹ tobọle biẹ ebale. Bhi ọsi ọhẹnhẹn, ọne ebi a kọle ki jẹre. Ọ ha ki zẹbue, ọ ki gbe ihiagha. Bhi ọkike ọle, ọ ki mọn ikpẹ. 29 Ọne ebi a kọle ha ki wo, ọne okpea ki dọ ne ọle, ranmhude, ẹghe nan rẹ khuan emhin-ugbo sẹle.”

30 Ọle da sẹyẹ yọle: “Be imhan ha sabọ rẹ khọkhọ Agbejele nọnsi Osẹnobulua? Arẹkhọkhọ nela mhan ha sabọ rẹ re otọ ọle man? 31 Inian ọ diabe ikpẹ mọstad, nọn yi ikpẹ nọn khere nẹ bhi ikpẹ rebhe nan rẹ kọ bhi ọne otọ nan. 32 A ha ki re ọle kọ, ọle ki wanre yẹ dọ kiẹn eran nọn kpọnọ nẹ bhi ẹwẹ eran rebhe nan le ikpẹ ọle. Ọle ki jẹ ikpabọ-eran ne huhu, rẹ sẹbhọ ghe, afianmhẹn ne ribhi okhun ki dọ ha nyẹnlẹn bhọ. Ele ki yẹ miẹn ọfu bhi odotọ ọle.”

33 Arẹkhọkhọ ne bunbun ne sẹ inian, ọle Jesu rẹ ha ta ọta nọnsi Osẹnobulua man ele. Eka nin ele ha sabọ lẹn otọ ọle, ọle Jesu taman ele. 34 Bhi ọsi ẹmhọanta, a igbo miẹn ghe ọle bha noo arẹkhọkhọ sade ọle ne ele talọ. Ọkpakinọn, ọle ki gbe otọ ọne ẹmhọn rebhe fanọn an man edibo nesọle bhi ẹkhokho.

35 Bhi ọne ukpẹdẹ nin beji ọsemuan ki re, ọle da taman ele yọle: “Bha ji imhan fan ẹdẹ ra diọbhi obọ nọnkele.” 36 Ele ki je ene usun ẹbho kpanọ fo, ele da nabhi ẹkẹ ọne okọ nin Jesu ha ye, yẹ gua ọle kpanọ. Okọ ebhebhe da yẹ ha ribhi enin. 37 Okpahoho da manman ha fi, amẹn da ha nabhi ẹkẹ ọne okọ, rẹ sẹbhọ ghe, ọ da kẹ khere nin ọne okọ rẹ ruẹ. 38 Ọle da nowẹ bhi uke ebi a rẹ ke uhọnmhọn bhi ikeke ọne okọ. Ele da dọ riọ ọle bhi owe, yẹ taman ọlẹn yọle: “Ọman-emhin, ọ bha be rẹtẹ uwẹ ghe mhan khian la fuẹn an?” 39 Bhiriọ, ọle da kpanọ, yẹ taman ọne okpẹdẹ yọle: “Ọ mhẹn riọ! Dobọ i!” Bhiriọ, ọne okpahoho bha yẹ fi. Ijerebhe da lọre. 40 Bhiriọ, ọle da nọọn ele yọle: “Bezẹle nin ofẹn da ha mun ibha? Ibha ibe sẹyẹ mhọn urẹọbhọ?” 41 Ofẹn da kie manman ha mun ele, ele da ha nọọn egbele yọle: “Họla ọne ọria nan gene khin? Ahoho bi okpẹdẹ bhọ hẹnmhọn nanlẹn.”

5 Ele ki da sẹbhi agbaẹbho ọsi Gẹrasa, bhi obọ nọnkele bhi ọne okpẹdẹ. 2 Jesu ki wo dagbare bhi ọne okọ, okpea ọkpa nin ẹlinmhin-ebe kpokpo da na bhi eji a da re olinmhin tọ bu ọle re. 3 Eji a da re olinmhin tọ ọle da nyẹnlẹn. Rẹ sẹbhi ọne ẹghe nin, emhin soso iribhọ nin ọria soso sẹ rẹ sabọ gba ọle. A bhọ bha sabọ re ighan gba ọle. 4 A sẹka re ighan rẹ gba ọle obọ bi oẹ igba ne bunbun, ọkpakinọn, ọle ki fanọn ene ighan an, yẹ khuẹnẹn ele ne kua; a bha sẹ miẹn ọria soso nọn sẹ sabọ gba ọle re ọbhi ijan ọkpa. 5 Ẹghe-ẹghe, asọn bi odanmhẹn, ọle ki ha so bhi eji a da re olinmhin tọ, bi bhi uke oke. Ọle ki yẹ ha re udo vinọn egbe ọle. 6 Ọle ki daghe Jesu bhi ọwala, ọle da runẹ bu ọle yẹ debhẹre nanlẹn. 7 Ọle da so dagbare yole: “Jesu nin Ọmọn nọnsi Osẹnobulua nọn Ke Okhun Nẹ, be rẹtẹ imẹn bi uwẹ? Re elin nọnsi Osẹnobulua ve ihẹn ọbhọ ghe, uwẹ ida re oya nin imẹn.” 8 Ranmhude, Jesu ka ha taman ọlẹn yọle: “Dagbare bhi egbe ọsi ọne okpea, uwẹ nin ẹlinmhin-ebe.” 9 Ọkpakinọn, Jesu da nọọn ọlẹn yọle: “Be a tie ẹ?” Ọle da wanniẹn ọlẹn yọle: “Usun a tie imẹn, ranmhude, mhan manman bun.” 10 Ọle da ha bhii Jesu nin ọle hẹi khu ene ẹlinmhin-ebe sibhi ọne agbaẹbho re.

11 Bhi ọne ẹghe nan, une ne bunbun da ha le ebale bhi uke oke. 12 Bhiriọ, ene ẹlinmhin da ha bhii ọle yọle: “Ji mhan da nabhi ẹkẹ ene une.” 13 Ọle da ji ele da nabhọ. Bhiriọ, ene ẹlinmhin-ebe da dagbare, yẹ nabhi ẹkẹ ene une. Ene une rebhe da na bhi ukpunun ọne oke kpono nabhi ẹkẹ okpẹdẹ. Ene une rebhe ne bun sẹbhi uli eva* da ruẹ bhi ẹkẹ ọne ẹdẹ. 14 Ene ha re ene une kọn da nẹgbe, yẹ dọ taman ene ribhi ọne agbaẹbho bi idunmhun ne nẹga ọne agbaẹbho ebe sunu. Ẹbho da vae nin ele dọ re ẹlo nọnsele daghe ebe sunu. 15 Ele da bu Jesu re. Ele da daghe ọne okpea nin usun ẹlinmhin-ebe rẹ ha kpokpo dotua. Ọle ne ukpọn yọ, sẹyẹ, egbe daan ọlẹn. Bhiriọ, ofẹn da ha mun ele. 16 Sẹyẹ, ene ẹlo ele sẹbhọ, da taman ene ẹbho ebe sunu ji ọne okpea nin ẹlinmhin-ebe rẹ ha kpokpo, bi ene une. 17 Bhiriọ, ele da ha bhii Jesu, nin ọle sibhi agbaẹbho nọnsele re.

18 Ọle ki ha nabhi okọ, ọne okpea nin ẹlinmhin-ebe rẹ ha kpokpo da ha bhii ọle nin ọle rẹkhan ọlẹn. 19 Ọkpakinọn ọle bha ka. Jesu da taman ọlẹn yọle: “Ha khian uwa. Bu ibhokhan ibha, nin uwẹ dọ taman ele emhin rebhe nin Jehova* lu nin uwẹ, bi itohan nin ọle mhọn da uwẹ.” 20 Ọne okpea da gene kpanọ, ọle da dọ ha tale bhi otọ Dikapolis,* emhin rebhe nin Jesu lu nanlẹn. Ọnan da han ẹbho rebhe ilo.

21 Jesu ki gbo re okọ fan ẹdẹ ra diọbhi obọ nọnzeva, usun ẹbho ne bunbun da bu ọle re. Ọle da ha ribhi egbẹdẹ. 22 Jairọs nin ọkpa bhi ene ewanlẹn ne gbẹloghe sinagọg da vae. Ọle ki daghe Jesu, ọle da debhẹre nanlẹn. 23 Ọle da ha bhii ọle yọle: “Ọmokhuo nin khere nọnsẹmhẹn manman khọnmhọn.* Huẹan, vae dọ re obọ nyan ọlẹn, beji egbe ha da daan ọlẹn nin ọle ha nyẹnlẹn.” 24 Bhiriọ, Jesu da rẹkhan ọlẹn. Usun ẹbho ne bunbun da yẹ rẹkhan Jesu. Ele da ha re egbe piẹnpiẹn ọlẹn.

25 Okhuo ọkpa da ha ribhọ nọn mọn da khọnmhọn emianmhẹn aranlẹn nọn na, rẹ na bhi ikpe igbeva. 26 Ọle sẹ wo manman loya bhi obọ dọkitọ ne bunbun. Ọle zẹ igho nesọle rebhe kua. Ọrẹyiriọ, egbe bha daan ọlẹn. Ọne emianmhẹn bhọ da ha khọ bhọ. 27 Ọle ki hẹnmhọn emhin nin Jesu ha lu, ọle da na bhi ikeke bu ọle re bhi ẹwẹ ene usun ẹbho, yẹ re obọ so ọle ukpọn. 28 Ọle da ha yọle: “Aharẹmiẹn ukpọn nọnsọle ọkpa imẹn re obọ so, egbe dẹ daan mẹn.” 29 Bhi ọne ẹghe nin, ọne aranlẹn nọn ha na da wo re osukpa ka. Ọle da wo lẹn bhi egbe nọnsọle ghe, ọne emianmhẹn ọbe si ọle bhi egbe re.

30 Jesu da wo re osukpa lẹn ghe, ahu si ọle bhi egbe re. Bhiriọ, ọle da fiorọ, yẹ nọọn ene usun ẹbho yọle: “Họla re obọ so mẹn ukpọn?” 31 Edibo nesọle da taman ọlẹn yọle: “Uwẹ daghe ebi ene usun ẹbho nan rẹ ha re egbe piẹnpiẹn uwẹ yẹ, uwẹ sẹyẹ nọọn, ‘Họla re obọ so imẹn?’” 32 Ọkpakinọn, ọle da ha re ẹlo guanọ ọnọn re obọ so ọle. 33 Ofẹn da ha mun ọne okhuo, ọle da yẹ ha guọ, ranmhude, ọle lẹn ebe sunu ji ọle. Bhiriọ, ọle da vae dọ diguẹ bhi odalo Jesu, yẹ ta ẹmhọanta man ọlẹn. 34 Jesu da taman ọlẹn yọle: “Ọmọn, urẹọbhọ nọnsẹ re egbe daan ẹn. Ha khian, egbe fu ẹ re. Ọne emianmhẹn ọbe nan ida yẹ kpokpo ẹ.”

35 Beji Jesu sẹyẹ ha talọ, ikpea eso da na bhi uwa nọnsi Jairọs vae, yẹ taman ọlẹn yọle: “Ọmọn nọnsẹ yu. Hẹi yẹ kpokpo ọne Ọman-emhin.” 36 Ọkpakinọn, Jesu da họn ebi ele ta. Ọle da taman Jairọs yọle: “Hẹi ji ofẹn mun uwẹ.* Wo ha mhọn urẹọbhọ.” 37 Ọle bha ji ọria ebhebhe da rẹkhan ọlẹn, gbera Pita, Jemis bi Jọni nin obhio Jemis.

38 Ele ki sẹbhi uwa nọnsi Jairọs, ọle da ke ẹbho ne bunbun re bhi enin ne ha viẹ yẹ so. 39 Ọle ki nabhi ọne uwa, ọle da nọọn ele yọle: “Bezẹle nin bha da viẹ, nin bha da yẹ so? Ọne ọmọn bha yu. Owe ọle ye.” 40 Ele ki họn ọnan, ele da ha jiẹ ọle. Ọkpakinọn, ọle ki je ele rebhe dagbare fo, ọle da re aba ọne ọmọn, bi inẹn ọne ọmọn, bi edibo ne rẹkhan ọlẹn, yẹ diọbhi eji ọne ọmọn ye. 41 Ọle ki re obọ ọsi ọne obhokhan, ọle da taman ọlẹn yọle: “Talita kumi.” A ha zedu ọle, ebi ọ mundia nan hi: “Ọmanmhẹn, imẹn taman ẹn, kpanọ!” 42 Ẹjẹje, ọne obhokhan da kpanọ bhi otọ yẹ ha khian. (Ikpe igbeva ọle ha khin.) Bhiriọ, ele rebhe da wo manman ha ghọnghọn. 43 Ọkpakinọn, ọle da gbuhi nin ele* igba ne bunbun nin ele hẹi ji ẹbho họn. Ọle da yẹ taman ele nin ele guanọ ebale re nin ọne ọmọn le.

6 Ọle ki sibhi enin re, ọle da vae bhi agbaẹbho nọnsọle. Edibo nesọle da yẹ rẹkhan ọlẹn. 2 Ọ ki sẹ ukpẹdẹ Sabati, ọle da munhẹn ha man emhin bhi sinagọg. Ẹbho ne bunbun ne ha ka ọle ehọ da nyan unun an, yẹ ha yọle: “Ji ọne okpea nan da luẹ ene emhin nan rebhe? Bezẹle nan da re ẹwanlẹn nọn sẹ inian nanlẹn, yẹ re ahu nanlẹn rẹ ha lu ene emhin ọhan-ilo nan? 3 Ọnan ibe yi kabita,* nin ọmọn nọnsi Meri? Ọ iyi ibhio ọle be hi Jemis, Josẹf, Judas, bi Saimọn? Ọ iyi imhan bi ibhio ọle nin ikhuo be ko ribhi enan?” Bhiriọ, ele bha ka miẹn ọlẹn ọbhi egbe. 4 Ọkpakinọn, Jesu da taman ele yọle: “Ijerebhe ẹbho da mun ekpẹn nin akhasẹ. Ene ribhi agbaẹbho nọnsọle, ibhokhan ẹgbẹle nọnsọle, bi ene ribhi azagba-uwa nọnsọle, ele ọkpa re ẹlo gbe ọle a.” 5 Ranmhude ọnan, ọle bha lu emhin ọhan-ilo ne bunbun bhi enin, ikpeta ẹbho ọkpa ọle ne obọ nyan yẹ re egbe daan. 6 Ọ da wo han ọle ilo ghe, ene ẹbho bha ha mhọn urẹọbhọ. Ọle da nẹga ene idunmhun kẹkẹ ne ribhi ọne agbaẹbho, yẹ ha man ele emhin.

7 Ọle da ki datie etuegbe igbeva nesọle, yẹ je ele dagbare eva-eva. Ọle da re ahu nin ele rẹ ha khu ẹlinmhin-ebe si ẹbho bhi egbe re. 8 Ọle da yẹ taman ele ghe, gbera ukpokpo nọnsele, nin ele hẹi mun emhin ọbhebhe rẹkhan egbe, nin ele hẹi mun ibrẹd la ẹkpa ebale rẹkhan egbe, bi nin ele hẹi re igho ọbhi ẹkẹ ọgbẹnẹ nọnsele. 9 Ọle da yẹ yọle nin ele hẹi ne ukpọn eva yọ, sokpan nin ele ne ibata yọ. 10 Sẹyẹ, ọle da taman ele yọle: “Uwa nọn hi ki rẹ khin nin bha na i, bha debhi enin an rẹ sẹ ẹghe nin ibha ha rẹ sibhi enin re. 11 Ahamiẹn agbaẹbho nin bha na i bha miẹn ibha ọbhi egbe, la ka bha ehọ, bha bọnmhẹn ekẹn sibhi oẹ nọnsẹbha re sade ibha sibhi ọne agbaẹbho nin re, beji ọ ha da ha yi ọsali rẹji ele.” 12 Ele da dagbare dọ ha tẹmhọn Osẹnobulua, beji ẹbho ha da fidenọ. 13 Ele da khu ẹlinmhin-ebe si ẹbho ne bunbun bhi egbe re. Ele da re abhili gbo ẹbho ne bunbun ne khọnmhọn, yẹ re egbe daan ele.

14 Hẹrọd nin ojie da họn ebe ha sunu, ranmhude ẹbho wo ha tẹmhọn Jesu bhi ijerebhe. Sẹyẹ, ẹbho da ha yọle: “A riọ Jọni nọn re amẹn nin ẹbho kpanọ bhi uu, ọle zẹle nin ọle da lu ene emhin ọhan-ilo nan.” 15 Ọkpakinọn, ẹbho eso da ha yọle: “Ẹlaija nọn.” Ẹbho ebhebhe da yẹ ha yọle: “Akhasẹ ọle khin bọsi ene akhasẹ ne nyẹnlẹn bhi ẹghe ẹdẹlẹ.” 16 Ọkpakinọn, ẹghe nin Hẹrọd rẹ họn, ọle da yọle: “A riọ Jọni kpanọ, Jọni nin mẹn hian ọle uhọnmhọn an.” 17 Hẹrọd hi ọnọn je ẹbho nin ele dọ mun Jọni khue bhi ighan, ranmhude Hẹrodias nin okhuo Filip nin obhio ọle nin ọle re bhi amhẹn. 18 Ranmhude, Jọni wo ha taman Hẹrọd yọle: “Ọ bha khẹke nin uwẹ re okhuo obhio ẹ.” 19 Bhiriọ, ẹkẹ Jọni da ha khọ Hẹrodias. Ọle da ha guanọ nin ọle gbe ọle a, ọkpakinọn, ọ bha fo ọle. 20 Ofẹn Jọni da wo ha mun Hẹrọd. Ọle lẹnmhin ghe, ọria esili bi ọria nọn khiale, ọle Jọni khin. Bhiriọ, ọle da ha gbega ọle. Ẹghe nọn hi rẹ khin nin ọle rẹ ka Jọni ehọ, ọle iyẹ da lẹn ebi ọle ha lu yẹ. Ọrẹyiriọ, ọle ki sẹyẹ wo re eghọnghọn ha ka ọle ehọ.

21 Ọkpakinọn, Hẹrodias da sha miẹn ọne isẹhoa, bhi ukpẹdẹ nin Hẹrọd tie ẹbho ne dọ le ebale bhi iluemhin ọsi ukpẹdẹ nan biẹ ọle.* Hẹrọd da tie ikpea ne ribhi ihe nọn khua, ekakulo bi ikpea nan manman lẹn bhi agbaẹbho ọsi Galili. 22 Ọmokhuo nọnsi Hẹrodias da vae dọ gbe ikhiẹnlẹn. Uwedẹ nin ọle re gbe ikhiẹnlẹn da ti Hẹrọd bi ene ha le ebale bhọ. Bhiriọ, ọne ojie da taman ọne ọmanmhẹn yọle: “Taman imẹn ebi ọ hi ki rẹ khin nin uwẹ guanọ, imẹn dẹ re ọle nin uwẹ.” 23 Ọle bhọ da ve ihẹn ọbhọ yọle: “Emhin nọn hi ki rẹ khin nin uwẹ guanọ bhi obọ imẹn, imẹn dẹ re nin uwẹ, aharẹmiẹn imẹn dẹ wa agbejele nọnsẹmhẹn an mun obọ ọkpa nin uwẹ.” 24 Bhiriọ, ọle da dagbare dọ nọọn inẹn ọlẹn yọle: “Be imẹn ha yọle nan re nin imẹn?” Inẹn ọlẹn da yọle: “Uhọnmhọn nọnsi Jọni nọn re amẹn nin ẹbho.” 25 Ọne ọmanmhẹn da jẹje bu ọne ojie yẹ taman ọlẹn yọle: “Imẹn guanọ nin uwẹ mun uhọnmhọn ọsi Jọni nọn re amẹn nin ẹbho ọbhi ukpamanku mun nin imẹn nian.” 26 Arẹmiẹn ọnan wo manman ba ọne ojie bhi egbe, ọle bha sabọ yọle eye, ranmhude ihẹn nin ọle ve bi ẹkhọ ẹbho ne ha ribhi enin. 27 Bhiriọ, ọne ojie da jẹje je ọkpa bhi egbanegbe nesọle nọn dọ mun uhọnmhọn nọnsi Jọni re. Ọle da ha khian dọ hian Jọni uhọnmhọn an bhi ighan. 28 Ọle da re ukpamanku mun uhọnmhọn nọnsi Jọni re yẹ mun nin ọne ọmanmhẹn. Ọne ọmanmhẹn da mun ji inẹn ọlẹn. 29 Edibo nesi Jọni ki họn ebe sunu, ele da vae dọ mun ekuegbe nọnsọle, yẹ re ọle tọ.

30 Ene etuegbe da bu Jesu re, yẹ taman ọlẹn emhin rebhe nin ele lu bi ebi ele rẹ man emhin yẹ. 31 Ọle da taman ele yọle: “Ibha vae, nin imhan ha khian eje fi ahiẹ a, beji ibha ha da koahua khere.” Ranmhude uwedẹ nin ẹbho rẹ ha na-yo-na-re bhi enin, ele bhọ bha miẹn ẹghe rẹ le ebale. 32 Bhiriọ, ele da nabhi okọ ha khian eje fi ahiẹ a, beji ele ọkpa ha da fẹkẹ ha ribhi enin. 33 Ọkpakinọn, ẹbho da daghe ele ẹghe nin ele rẹ ha kpanọ, ẹbho ne bunbun da yẹ họn. Bhiriọ, ẹbho da na bhi agbaẹbho kẹkẹ runẹ dọ mundia khẹ ele bhi enin. 34 Jesu ki dagbare bhi ọne okọ, ọle da daghe usun ẹbho. Ọle da wo tohan ele. Ranmhude, inian ele diabe ihuan ne imhọn ọnọn sun ele. Bhiriọ, ọle da munhẹn ha man ele emhin ne bunbun.

35 Ejayenan nian, ebi ki fẹkẹ ha lo. Bhiriọ, edibo nesọle da bu ọle re dọ taman ọlẹn yọle: “Enan rebhe fi ahiẹ a, sẹyẹ, ebi fẹkẹ ha lo. 36 Je ene ẹbho kpanọ, beji ele ha da diọbhi ene idunmhun ne nẹga enan dọ guanọ ebale dẹ.” 37 Ọle da wanniẹn ele yọle: “Ibha guanọ ebale nin ele le.” Ele da ki nọọn ọlẹn yọle: “Mhan be dọ re dinariọs* iyisẹn eva* rẹ dẹ ibrẹd nin ene ẹbho le?” 38 Ọle da ki nọọn ele yọle: “Eka ibrẹd ibha mhọn? Ibha dọ fẹghe!” Ele ki fẹ ọle ghe fo, ele da taman ọlẹn yọle: “Isẹn, bi ehẹn eva.” 39 Ọle da ki taman ene ẹbho rebhe nin ele re usun dotua bhi uke ilunmhun. 40 Ele da ki re usun dotua. Eso, itue iyisẹn,* eso, itue igbe nyan egbọ eva.* 41 Ọle ki ne ene ibrẹd isẹn bi ene ehẹn eva, ọle da khua ẹlo okhun yẹ nan erọnmhọn ọbhọ. Ọle da munhẹn ha khuẹnẹn ene ibrẹd a, yẹ ne nin edibo nesọle, nin edibo nesọle ne nin ene ẹbho. Ọle da yẹ gha ene ehẹn eva nin ọrebhe. 42 Ene ẹbho rebhe da le sẹbhi ọkhọnlẹn. 43 Edibo nesọle da koko ibrẹd bi ehẹn ne kẹre. Ọne ibrẹd ọkpa da vuọn okhuale igbeva. 44 Ikpea ne bun sẹbhi itue uli isẹn,* ele le ọne ibrẹd.

45 Ẹjẹje, ọle da taman edibo nesọle nin ele nabhi okọ ha khian obọ nọnkẹle, bhi obọ ọsi Bẹtseada. Ọkpakinọn, ọle da sẹyẹ debhi enin an ha je ene ẹbho kpanọ. 46 Ọle ki gbe ọkinbue nin ene ẹbho fo, ọle da diọbhi uke oke dọ nan erọnmhọn. 47 Ebi ki lo, ọne okọ da ha ribhi adesẹ okpẹdẹ. Ọkpakinọn, Jesu ọkpa da sẹyẹ ha ribhi enin. 48 Bhi uriẹghe nọnzi enẹn bhi ọsasọn,* ọle da daghe ọle ghe, ọ nọghọ ele rẹ gua ọne okọ, ranmhude okpahoho nọn ha fi. Bhiriọ, ọle da khian bu ele re bhi uke amẹn. Ọkpakinọn, ọle da rẹ ha guanọ nin ọle khian gbera ele. 49 Ele ki daghe ọle ghe ọle khian bhi uke amẹn, ele da so dagbare ha yọle: “Ibha ghe ojemhin o!” 50 Ofẹn da wo ha mun ele rebhe ẹghe nin ele rẹ daghe ọle. Ọkpakinọn, ọle da jẹje ne ele talọ yẹ yọle: “Bha hẹi ji ofẹn mun bha! Imẹn nọn.” 51 Ọle da ki bu ele bhi ẹkẹ ọne okọ. Ọne okpahoho da yẹ lọre. Ọnan da wo manman han ene edibo ilo, 52 ranmhude ele bha sẹyẹ luẹ emhin bhi ibrẹd nan gha nin ẹbho. Ele* bha sẹyẹ lẹn otọle.

53 Ele ki fan ọne ẹdẹ ra, ele da sẹbhi Gẹnẹsarẹt, yẹ mun ọne okọ diẹn bhi egbẹdẹ. 54 Beji ele wo ha dagbare bhi ẹkẹ ọne okọ, ẹbho da wo sẹ ọle ẹlo. 55 Ele da jẹje nẹga ọne agbaẹbho, yẹ re ewa ha munọ ẹbho ne khọnmhọn bu ọle bhi eji ele họn ghe ọle ye. 56 Sẹyẹ, agbaẹbho la idunmhun nọn hi ki rẹ khin nin ọle na i, ẹbho ki muno eria ne khọnmhọn ọbhi eji a da do ẹki. Ele ki ha bhii ọle nin ele bhọ gheghe re obọ so ehọ-ehọ ukpọn nọnsọle. Egbe ki wo daan ọrebhe ne re obọ so ọle.

7 Ejayenan nian, ibhokhan Farisi bi eso bhi ene man uhi, ne na bhi Jerusalẹm vae, da bu Jesu re. 2 Ele da daghe edibo nesọle eso re obọ nọn bha khia rẹ le ebale, ọnin hi, obọ nan bha kpe.* 3 (Ibhokhan Farisi bi ibhokhan Ju ida le ebale sade ele bha ka kpe obọ sẹbhi iguẹn-obọ. Ebi ele kere aba ele nin ẹdẹlẹ ha lu, ọle ele ha lu rẹkhan. 4 Sẹyẹ, ele ha na bhi ẹki vae, nin ele bha da sẹ kpe egbe a, ele ida le ebale. Akerebhotọ ne bunbun ribhọ nin ele re obọ rẹkhan, bọsi ukpu, uko amẹn, bi ukpamanku nan re oze lu nin ele gberuẹ bhi amẹn.) 5 Ene Farisi bi ene man uhi da nọọn ọlẹn yọle: “Bezẹle nin edibo nesẹ ida re obọ rẹkhan akerebhotọ ọsi aba imhan nin ẹdẹlẹ? Bezẹle nin ele da re obọ nọn bha khia rẹ le ebale?” 6 Ọle da taman ele yọle: “Ibha ne re ikpunun ga, Ẹzaya ka kha akhasẹ rẹji ibha, ẹghe nin ọle rẹ yọle, ‘Ikpunun ene ẹbho nan rẹ gẹn imẹn. Ọkhọle nọnsele izẹwẹ ribhi eji imẹn ye. 7 Ẹghe ele gheghe riia nin ele rẹ ha ga imẹn, ranmhude, uhi ọsi eria, ọle ele man.’ 8 Ibha zẹ uhi nọnsi Osẹnobulua obọ, yẹ mun akerebhotọ ọsi eria mhọn kankankan.”

9 Ọle da yẹ taman ele yọle: “Ibha re ẹwan-ẹwan fikekegbe uhi nọnsi Osẹnobulua, beji bha ha da sabọ ha lu rẹkhan akerebhotọ nọnsẹbha. 10 Bhi ọsi ijiẹmhin, Mozis yọle, ‘Mun ekpẹn nin aba ẹ bi inẹn ẹn.’ Sẹyẹ, ‘Ọria nọn hi ki rẹ khin nọn re unun ji* aba ọle bi inẹn ọlẹn, bha gbe ọle a.’ 11 Sokpan, ibha yọle, ‘Ahamiẹn ọria taman aba ọle bi inẹn ọlẹn ghe: “Emhin nin mẹn rẹ ha mhọnlẹn nin mẹn ha rẹ rẹkpa bha, kọban nọn (ebi a re kọban ta hi, emhin nan rẹ guẹ nin Osẹnobulua),”’ 12 ibha iyẹ da ji ọle da lu emhin soso nin aba ọle, la inẹn ọlẹn. 13 Iriọ ibha rẹ re ọta nọnsi Osẹnobulua kiẹn ihoho, ranmhude akerebhotọ nin ibha yọle nan ha re obọ rẹkhan. Emhin ne bunbun ne sẹ inian yẹ ribhọ nin ibha lu.” 14 Ọle da gbo tie ene usun ẹbho re, yẹ taman ele yọle: “Bha rebhe ka imẹn ehọ, ibha ha yẹ lẹn otọ ebi imẹn tẹmhọnlẹn. 15 Emhin nọn na ọria bhi unun ida sabọ riia ọle a. Emhin ne na bhi unun ọsi ọria dagbare, ele ha sabọ riia ọle a.” 16* ——

17 Ẹghe nin ọle ki rẹ sibhi eji ene usun ẹbho ye re, yẹ nabhi ẹkẹ uwa, edibo nesọle da munhẹn ha nọọn ọlẹn ebi ọle re ọne arẹkhọkhọ ta. 18 Ọle da nọọn ele yọle: “Inian ibha be yẹ diabe ene ẹbho nin ne bha lẹn ebi a tẹmhọnlẹn? Ibha bha be lẹn ghe emhin soso iribhọ nọn ha na ọria bhi unun nọn ha sabọ faa ọle a? 19 Ranmhude, ebi ọria re ọbhi unun, ọ iyi ọkhọle ọ na i, ẹkẹ ọ na i, ọle ki yẹ nẹn ọlẹn kua.” Ebi ọle tale da rẹman ghe, ọ bha khẹke na ha waa ebale soso. 20 Ọle da yẹ yọle: “Ebe na bhi unun ọsi ọria dagbare, ele faa ọle a. 21 Ranmhude, ọkhọle ọsi eria, ọle iria-eria ne imhẹn na dagbare: ilọnmhọn oghẹ* kẹkẹ, nan rẹ ha ra, nan rẹ gbugbele, 22 igboghẹ, ẹlobhiamhin, ọkhọlọ, eku, iẹnlẹn okan,* ikhu, ọta-ebe, itẹngbemun, bi ilọnmhọn uuki. 23 Bhi ẹkẹ ọkhọle ọsi eria, ọle ene emhin ebe nan rebhe na dagbare. Enan hi emhin ne faa ọria a.”

24 Ọle ki sibhi enin re, ọle da ha khian agbaẹbho ọsi Taya bi Saidọn. Bhi enin, ọle da nabhi uwa ọkpa. Ọle bha guanọ nin ọria soso lẹn ghe ọle ribhi enin. Ọkpakinọn, ẹbho da sẹyẹ lẹn. 25 Bhi ọne ẹghe nin, okhuo ọkpa nin ẹlinmhin-ebe kpokpo ọmokhuo nọnsọle da hẹnmhọn ọlẹn. Ọne okhuo da vae dọ diguẹ nanlẹn. 26 Obhi Grik, nọn na bhi agbaẹbho ọsi Finishia nọn ribhi Siria vae, ọle ọne okhuo khin. Ọle da wo ha bhii Jesu, nọn khu ẹlinmhin-ebe si ọmọn nọnsọle bhi egbe re. 27 Ọkpakinọn, Jesu da taman ọlẹn yọle: “Ka ji ene ibhokhan da le ebale khọn, ranmhude, ọ iyi emhin nọn gbale nan rẹ miẹn ibhokhan ebale nin ele ha le yẹ fino ọle nin ibhi awa.” 28 Ọne okhuo da wanniẹn ọlẹn yọle: “Ẹmhọanta nọn ọwanlẹn, ọkpakinọn, ene ibhi awa ne ribhi odotọ itebu sẹyẹ le bhi ikuẹkuẹ ebale ne denọ kua bhi obọ ọsi ene ibhokhan.” 29 Ọle da ki taman ọne okhuo yọle: “Ranmhude uwẹ ta ọnan, ha khian; ọne ẹlinmhin-ebe si ọmọn nọnsẹ bhi egbe re.” 30 Bhiriọ, ọne okhuo da ha khian uwa. Ọle da kere ghe ọne ọmọn nowẹ bhi ibẹd, sẹyẹ, ọne ẹlinmhin-ebe si ọle bhi egbe re.

31 Jesu ki sibhi agbaẹbho ọsi Taya re, ọle da rẹkhan agbaẹbho ọsi Saidọn bi agbaẹbho ọsi Dikapolis* ha khian obọ ọsi okpẹdẹ ọsi Galili. 32 Bhi enin, ẹbho da mun okpea ọkpa nọn yehọ, nọn iyẹ sabọ talọ bu ọle re. Ele da ha bhii ọle nin ọle ne obọ nyan ọlẹn. 33 Ọle da re ọne okpea sibhi eji usun ẹbho ye re. Ọle ki ne obọ ọle bhi ehọ, ọle da tuẹsẹn fia, yẹ re obọ so ọle ọlanmhẹn. 34 Ọle da khua ẹlo okhun, hiẹnhiẹn sotọ yẹ yọle: “Ẹfata,” ọnin hi “Tujea.” 35 Bhiriọ, ehọ nọnsọle da tujea. Olanmhẹn nọnsọle da yẹ tanlan. Ọle da munhẹn ha talọ nọnsẹn. 36 Ọle da ki taman ele nin ele hẹi taman ọria soso. Ọkpakinọn, beji ọle rẹ taman ele nin ele hẹi taman ọria, iriọ ele rẹ wewe ọle na bhi ijerebhe. 37 Bhi ọsi ẹmhọanta, ebi ọle lu da wo manman han ele ilo. Ele da yọle: “Ọle wo lu emhin rebhe nọnsẹn. Ọle bhọ lu ọle nin ene yehọ ha hẹnmhọn, yẹ lu ọle nin ene odin ha talọ.”

8 Bhi ọne ẹghe nin, usun ẹbho da gbo sikoko. Ele bha miẹn ebale le. Bhiriọ, ọle da tie edibo nesọle yẹ taman ele yọle: 2 “Ohan ene ẹbho nan wo ha to mẹn, ranmhude, ikpẹdẹ ea ki nọn nian nin ele ne imẹn dia, sẹyẹ, ebale iribhọ nin ele ha le. 3 Imẹn ha ji ele da re ẹkẹ ohanmhẹn kpanọ ha khian uwa, ele dẹ de si ẹlo ru bhi uwedẹ. Eje rele eso bhi ẹwẹ ele na vae.” 4 Ọkpakinọn edibo nesọle da taman ọlẹn yọle: “Ejela ọria ha da miẹn ibrẹd dẹ bhi eje fi ahiẹ a nan, nọn ha khọn ene ẹbho nan rebhe?” 5 Ọle da ki nọọn ele yọle: “Eka ibrẹd ibha mhọn?” Ele da yọle: “Ikpọle ihinlọn.” 6 Ọle da taman ene ẹbho, nin ele dotua bhi otọ. Ọle da ki ne ene ibrẹd ihinlọn, nan erọnmhọn ọbhọ, yẹ khuẹnẹn ele a. Ọle da munhẹn ha ne nin edibo nesọle nin ele gha ọle. Edibo nesọle da gha ọle nin ene ẹbho. 7 Ele da yẹ ha mhọn ikuẹkuẹ ehẹn eso. Ọle da nan erọnmhọn ọbhọ yẹ taman edibo nesọle nin ele gha ọle. 8 Ene ẹbho rebhe da le sẹbhi ọkhọnlẹn. Ene edibo da koko ebale nọn kẹre kugbe. Ọ da vuọn udede okhuale ihinlọn. 9 Ikpea ne ha ribhi enin bun sẹbhi itue uli enẹn.* Ọle da je ene ẹbho kpanọ.

10 Ẹjẹje, Jesu bi edibo nesọle da nabhi okọ ha khian agbaẹbho ọsi Damanuta. 11 Bhi enin, ibhokhan Farisi da bu ọle re, yẹ ha nanlẹn gbugan. Beji ele ha da dọnmhẹn ọlẹn, ele da taman ọlẹn nọn re emhin ọhan-ilo man ele bhi elin nọnsi Osẹnobulua. 12 Ọnan da wo manman ba ọle bhi egbe sẹbhi uguẹ. Ọle da yọle: “Bezẹle nin ọne ore nan da guanọ nan re emhin ọhan-ilo man ele? Bhi ọsi ẹmhọanta, imẹn taman ibha ghe, a ida re emhin ọhan-ilo soso man ọne ore nan.” 13 Bhiriọ, ọle da zẹ ele obọ dọ nabhi okọ ha khian obọ nọnkẹle.

14 Ọkpakinọn, edibo nesọle bha yere rẹ ne ibrẹd rẹkhan egbe. Gbera ibrẹd ọkpa, ele bha ha mhọn ebale soso bhi ẹkẹ ọne okọ. 15 Jesu da manman gbuhi nin ele yọle: “Bha ha babegbe, ibha ha yẹ gbẹlokotọ ranmhude yisti ọsi ene Farisi bi yisti ọsi Hẹrọd.” 16 Bhiriọ, ele da ha ne egbe ele gbugan ba ẹmhọn ibrẹd nin ele bha ne mhọnlẹn. 17 Jesu ki daghe ọnan, ọle da taman ele yọle: “Bezẹle nin ibha da gbugan ba ẹmhọn ibrẹd? Ebi imẹn ta bha sẹyẹ mun bha ẹlọ kore? Ibha bha sẹ sabọ re ọkhọle nọnsẹbha lẹn otọle? 18 ‘Ibha mhọn ẹlo, ọkpakinọn ibha ire ọle daghe; ibha mhọn ehọ, ọkpakinọn ibha ire ọle hẹnmhọn.’ Ibha bha be yẹ yere 19 eka okhuale ibrẹd nin ibha ne koko, ẹghe nin mẹn rẹ re ebale nin ikpea uli isẹn* le?” Ele da yọle: “Okhuale igbeva.” 20 Ẹghe nin imẹn rẹ re ibrẹd ihinlọn rẹ re ebale nin ikpea uli enẹn* le, eka udede okhuale ọsi ebale ibha koko kugbe? Ele da yọle: “Okhuale ihinlọn.” 21 Ọle da ki taman ele yọle: “Ọ bha sẹyẹ mun ibha ẹlo kore?”

22 Ele da ki sẹbhi Bẹtseada. Bhi enin, ẹbho da mun okpea ọkpa nọn ruẹlo bu Jesu re. Ele da ha bhii ọle nin ọle re obọ so ọle. 23 Jesu da ki re ọne okpea obọ mhọnlẹn, yẹ re ọle sibhi ọne idunmhun nin re. Ọle ki tuẹsẹn ọle bhi ẹlo fo, ọle da ne obọ nyan ọlẹn yẹ nọọn ọlẹn yọle: “Uwẹ be daghe emhin soso?” 24 Ọne okpea da khua ẹlo okhun yẹ yọle: “Imẹn daghe ẹbho khian nẹga. Ọkpakinọn, ele diabe eran.” 25 Ọle da kie ne obọ ọne okpea bhi ẹlo. Ọne okpea da munhẹn ha daghe nọnsẹn. Ẹlo nọnsọle da taan, ọle da manman ha daghe emhin rebhe nọnsẹn. 26 Bhiriọ, ọle da je ọle ha khian uwa. Ọle da taman ọlẹn yọle: “Hẹi nabhi ẹkẹ ọne idunmhun nan.”

27 Jesu bi edibo nesọle da ki sibhi enin re ha khian idunmhun ne ribhi agbaẹbho ọsi Sizaria, bhi Filipai. Bhi uwedẹ, Jesu da munhẹn ha nọọn edibo nesọle yọle: “Họla ẹbho yọle ghe imẹn khin?” 28 Ele da taman ọlẹn yọle: “Jọni nọn re amẹn nin ẹbho. Ọkpakinọn, eso yẹ yọle Ẹlaija, eso da yẹ yọle, ọkpa bhi ene akhasẹ.” 29 Ọle da ki nọọn ele yọle: “Ibha kii, họla ibha riale imẹn khin?” Pita da wanniẹn ọlẹn yọle: “Uwẹ hi Kristi.” 30 Ọle da ki manman gbuhi nin ele, nin ele hẹi taman ọria soso ọria nin ọle khin. 31 Sẹyẹ, ọle da munhẹn ha taman ele ghe, Ọmọn nọnsi okpea dẹ manman loya. Ene ewanlẹn, ene ohẹn ne khua, bi ene man uhi dẹ he ọle. A ki yẹ gbe ọle a. Ọkpakinọn, a ki riọ ọle kpanọ bhi ukpẹdẹ nọnzi ea. 32 Ogbakha ọle da wo ha ta ene ẹmhọn nan. Ọkpakinọn, Pita da re ọle diọbhi obọ ọkpa, yẹ dọ ha gbuhi nanlẹn. 33 Ọle ki fikekegbe Pita, ọle da ghe edibo nesọle yẹ manman gbuhi nin Pita yọle: “Gbera diọ imẹn bhi ikeke, Esu! Ranmhude, uwedẹ nin eria rẹ ria eria, ọle uwẹ rẹ ria eria, ọ iyi uwedẹ nin Osẹnobulua rẹ ria eria.”

34 Ọle da ki datie ene usun ẹbho bi edibo nesọle, yẹ taman ele yọle: “Ọria nọn hi ki rẹ khin nọn ho nọn rẹkhan imẹn, ọle dẹ he egbe nọnsọle, sẹyẹ, ọle ki tọn oran-iloya* nọnsọle mun, yẹ wo ha rẹkhan imẹn. 35 Ranmhude, ọnọn hi ki rẹ khin nọn ho nọn hinmhin uhọnmhọn nọnsọle, dẹ re uhọnmhọn nọnsọle fia. Ọkpakinọn, ọnọn hi ki rẹ khin nọn re iẹnlẹn nọnsọle fia ranmhude imẹn bi ọne ọta nọn mhẹn, dẹ miẹn ọlẹn. 36 Elele nela ọria ha gene miẹn bhọ sade ọle re ọne agbọn nan rebhe kiẹn ọsọle, ọkpakinọn, ọle re iẹnlẹn nọnsọle fia? 37 Gene-gene, emhin nela ọria ha rẹ sabọ dẹ iẹnlẹn nọnsọle? 38 Ọria nọn hi ki rẹ khin nin ẹkhọ imẹn bi ọta nọnsẹmhẹn lo bhi ọne agbọn nan nọn imhẹn, nọn yẹ fikekegbe Osẹnobulua, ẹkhọ ọne ọria ki yẹ ha lo Ọmọn nọnsi okpea ẹghe nin ọle ha rẹ re uyi nọnsi Aba ọle vae, ọle bi ene ẹhi.”

9 Ọle da yẹ taman ele yọle: “Bhi ọsi ẹmhọanta, imẹn taman bha ghe, eria eso ribhi ẹwẹ ibha bhi enan, ne ida yu hiehie, sade ele bha ka daghe Ejele nọnsi Osẹnobulua munhẹn ha gbẹloghe.” 2 Ikpẹdẹ ehan ki gbera, Jesu da re Pita, Jemis bi Jọni rẹkhan egbe ha khian uke oke nọn manman yoyo. Ele ọkpa ha ribhi enin. Bhi enin, ọle da fiegbedenọ bhi isira ele. 3 Ukpọn nin ọle yọ ke okhun da wo munhẹn ha fi wanlan-wanlan. Ọ da wo manman ha fua. Ọria iribhi ọne otọ nan, nọn ha sabọ họ ukpọn, nin ọne ukpọn fua sẹ iriọ. 4 Sẹyẹ, Ẹlaija bi Mozis da zegbere man ele, yẹ ha ne Jesu zilo. 5 Pita da ki taman Jesu yọle: “Rabai, ọ wo mhẹn ghe imhan ribhi enan. Bhiriọ, ji mhan bọn ibọkpọ ea nin ibha. Ọkpa ki ha yi ọsi uwẹ, ọkpa ki ha yi ọsi Mozis, ọkpa ki yẹ ha yi ọsi Ẹlaija.” 6 Bhi ọsi ẹmhọanta, Pita bha lẹn ebi ọle ha rẹ lu emhin yẹ, ranmhude, ofẹn wo manman ha mun ele. 7 Adudu amẹn da zegbere, yẹ degue ele. Sẹyẹ, ukpuru da na bhi ẹkẹ ọne adudu amẹn yọle: “Ọmọn nọnsẹmhẹn khọnan. Ọne imẹn hoẹmhọnlẹn. Bha ka ọle ehọ.” 8 Ele ki wo ghe ijerebhe nẹga, ele da kere ghe, gbera Jesu, ọria soso iyẹ ribhi enin.

9 Ele ki ha huẹnre bhi uke ọne oke, Jesus da manman gbuhi nin ele, nin ele hẹi taman ọria soso ebi ẹlo nọnsele miẹn, ọkuẹsẹ Ọmọn nọnsi okpea riọkpanọ bhi uu. 10 Ele da re ọne ẹmhọn bhi ọkhọle.* Ọkpakinọn, ele da ha tale bhi ẹwẹ ele ebi ariọkpanọ nin ọle tẹmhọn ọlẹn mundia nan. 11 Ele da munhẹn ha nọọn ọlẹn yọle: “Bezẹle nin ene man uhi da yọle ghe, Ẹlaija dẹ ka vae ọkuẹsẹ Kristi vae?” 12 Ọle da taman ele yọle: “Ẹlaija dẹ ka gene vae, yẹ dọ hẹnhẹn emhin rebhe. Ọkpakinọn, bezẹle nan da gbẹn ọlẹn ọbhi otọ ghe, a dẹ re ẹlo gbe Ọmọn nọnsi okpea a, sẹyẹ, ọle ki loya emhin ne bunbun? 13 Bhi ọsi ẹmhọanta, imẹn taman ibha ghe, Ẹlaija bhọ vae fo. Ọkpakinọn, ele da lu ọle ebe ghọn ele, beji a gbẹn bhi otọ rẹji ọle.”

14 Ele ki fikie bu edibo nekẹle, ele da kere ghe usun ẹbho wo vẹ nẹga ele, sẹyẹ, ene man uhi wo ha ne ele gbugan. 15 Ọkpakinọn, ene ẹbho rebhe ki daghe Jesu, ọ da wo han ele ilo. Bhiriọ, ele da runẹ bu ọle dọ tuẹ ọle. 16 Ọle ki da nọọn ele yọle: “Be ibha gbugan ọlẹn?” 17 Otuọnkpa bhi ẹwẹ ene usun ẹbho da wanniẹn ọlẹn yọle: “Ọman-emhin, imẹn mun ọmọn nọnsẹmhẹn bu uwẹ re, ranmhude ẹlinmhin-ebe nọn kpokpo ọle re ọle kiẹn odin. 18 Ẹghe nọn hi ki rẹ khin nọn rẹ ha kpokpo ọle, ọ ki mun ọlẹn gbe ọbhi otọ. Ọle ki ha ti kua bhi unun, yẹ re akọn gbe akọn, sẹye, ahu ki fo ọle bhọ. Imẹn taman edibo nesẹ nin ele khu ọne ẹlinmhin-ebe fia, ọkpakinọn, ọ bha fo ele.” 19 Jesu da ki yọle: “Eo, ọne ore nan nọn imhọn urẹọbhọ, ji imẹn ha deba ibha lu ọnan sẹ? Eka ẹghe imẹn ha sabọ ziẹngbe ẹmhọn ibha sẹ? Mun ọlẹn ji imẹn.” 20 Bhiriọ, ele da mun ọne obhokhan ji ọle. Sokpan, ọne ẹlinmhin ki wo daghe ọle, ọ da re ọne obhokhan ha niẹn an.* Ọne obhokhan da degbe ọbhi otọ, yẹ ha bubu bhi otọ. Ọle da ha hu kua bhi unun. 21 Jesu da ki nọọn aba ọle yọle: “Ẹghela ọne emhin nan rẹ munhẹn ha kpokpo ọle?” Ọle da yọle: “Rẹ na egbe obhokhan ha vade. 22 Ẹghe rebhe ọ rẹ mun ọlẹn fi ọbhi ẹkẹ eranlẹn, yẹ mun ọlẹn fi ọbhi ẹkẹ amẹn, beji ọ ha da gbe ọle a. Ahamiẹn uwẹ dẹ sabọ hinmhin ọlẹn, mhọn itohan da mhan, uwẹ ha yẹ rẹkpa mhan.” 23 Jesu da taman ọlẹn yọle: “Bezẹle nin uwẹ da yọle, si imẹn dẹ be sabọ? Emhin soso iribhọ nin ọria nọn mhọn urẹọbhọ ida sabọ lu.” 24 Ẹjẹje, aba ọne ọmọn da so dagbare yọle: “Imẹn mhọn urẹọbhọ! Rẹkpa imẹn bhi eji ọ da kẹ imẹn re!”

25 Jesu ki daghe usun ẹbho tua bu ele vade, ọle da taman ọne ẹlinmhin-ebe yọle: “Uwẹ nin ẹlinmhin nọn re ọria kiẹn odin bi ọyehọ, imẹn taman uwẹ, si ọle bhi egbe re, uwẹ ha yẹ rẹban ọlẹn!” 26 Ọne obhokhan da reso, sẹyẹ, ilinlẹn da mun ọlẹn igba ne bunbun. Ọnin ki fo, ọne ẹlinmhin da si ọle bhi egbe re. Ọne obhokhan da diabe ọria nọn yulu. Ranmhude ọnan, ẹbho ne bunbun da ha yọle: “Ọ yulu!” 27 Ọkpakinọn, Jesu da re ọle ukpobọ yẹ mun ọlẹn kpanọ. Ọne obhokhan da kpanọ mundia. 28 Ọle ki nabhi ẹkẹ uwa, edibo nesọle da nọọn ọlẹn bhi ẹkhokho yọle: “Bezẹle nin imhan bha da sabọ khu ọne ẹlinmhin-ebe fia?” 29 Ọle da taman ele yọle: “Erọnmhọn ọkpa ha sabọ khu ẹlinmhin-ebe nọn sẹ inian dagbare.”

30 Ele da sibhi enin re, yẹ na bhi Galili gbera. Ọkpakinọn, ele bha guanọ nin ọria soso lẹn. 31 Ọle da ha man edibo nesọle emhin, yẹ taman ele yọle: “A dẹ mun Ọmọn nọnsi okpea khiẹn nin eria. Ele ki gbe ọle a. Ọkpakinọn, ele ha rẹ gbe ọle a, ọle ki riọkpanọ bhi ukpẹdẹ nọnzi ea.” 32 Ọkpakinọn, ele bha lẹn otọ ebi ọle ha tẹmhọnlẹn. Sẹyẹ, ofẹn da ha mun ele rẹ nọọn ọlẹn ọta.

33 Ele da sẹbhi Kapaniọn. Ẹghe nin ele rẹ ha ribhi ẹkẹ uwa, ọle da nọọn ele yọle: “Be ibha ha gbugan ọlẹn bhi odẹ?” 34 Ele bha ta emhin soso, ranmhude, ẹmhọn ọnọn lu okpọria nẹ bhi ẹwẹ ele, ọle ele ha gbugan ọlẹn bhi uwedẹ. 35 Bhiriọ, ọle da dotua, yẹ datie ene etuegbe igbeva. Ọle da taman ele yọle: “Ahamiẹn ọria guanọ nin ọle ha yi ọhẹnhẹn, ọkhẹke nin ọle ha yi ọnọn kike, bi ọnọn ga ẹbho nekẹle.” 36 Bhiriọ, ọle da tie obhokhan ọkpa re, yẹ re ọle mundia bhi ẹwẹ ele. Ọle da re obọ ọle bhi ijianbọ yẹ taman ele yọle: 37 “Ọnọn hi ki rẹ khin nọn miẹn obhokhan nọn sẹ inian ọbhi egbe ranmhude elin nọnsẹmhẹn, ọle yẹ miẹn imẹn ọbhi egbe; sẹyẹ, ọnọn hi ki rẹ khin nọn miẹn imẹn ọbhi egbe, yẹ miẹn ọnọn je imẹn re ọbhi egbe.”

38 Jọni ki da taman ọlẹn yọle: “Ọman-emhin, imhan da miẹn ọria nọn ha re elin nọnsẹ rẹ khu ẹlinmhin-ebe si ẹbho bhi egbe re. Ranmhude ọle iribhi usun nọnsẹmhan, imhan da rẹ ha taman ọlẹn nin ọle hẹi yẹ lu iriọ.” 39 Ọkpakinọn, Jesu da taman ọlẹn yọle: “Ibha hẹi yẹ de ọle idobolo. Ranmhude, ọria iribhọ nọn ha re elin nọnsẹmhẹn ha lu emhin ọhan-ilo, nọn ha yẹ wo re ẹjẹje ha ta ọta ebe imẹn bhi egbe. 40 Ranmhude, ọria nọn hi ki rẹ khin nọn bha ne imhan suan, ibo nọnsẹmhan ọle ye. 41 Sẹyẹ, ọria nọn hi ki rẹ khin nọn sa amẹn nin ibha wọn, ranmhude ibo nọnsi Kristi ibha ye, imẹn taman ibha ghe, ọle dẹ wo miẹn ihaosa nọnsọle. 42 Ọkpakinọn, ọria nọn hi ki rẹ khin nọn kiẹn idobolo rẹji ọkpa bhi ene ibhokhan nan ne mhọn urẹọbhọ, ọ dẹ mhẹn ọlẹn bhi egbe nẹ, sade a mun udo nan rẹ nọ emhin ọle bhi urulu, udo nin kẹtẹkẹtẹ* wẹnẹ nẹga, yẹ gbe ọle ruẹ bhi ẹkẹ okpẹdẹ.

43 “Ahamiẹn obọ nọnsẹ ho nọn re uwẹ lu emhin ebe, hian ọlẹn mun fia. Uwẹ mhọn obọ ọkpa, yẹ mhọn iẹnlẹn, ọle mhẹn gbera ghe, a mun uwẹ bi obọ veva nesẹ fiọbhi Gẹhẹna,* bhi ẹkẹ eranlẹn nan ida sabọ fuẹn an. 44* —— 45 Sẹyẹ, ahamiẹn oẹ nọnsẹ ho nọn re uwẹ lu emhin ebe, hian ọlẹn mun fia. Uwẹ mhọn oẹ ọkpa, yẹ mhọn iẹnlẹn, ọle mhẹn gbera ghe, a mun uwẹ bi oẹ veva nesẹ fiọbhi Gẹhẹna.* 46* —— 47 Sẹyẹ, ahamiẹn ẹlo nọnsẹ ho nọn re uwẹ lu emhin ebe, bhọ ọle re fia. Uwẹ re ẹlo ọkpa nabhi Agbejele nọnsi Osẹnobulua, ọle mhẹn gbera ghe, a mun uwẹ bi ẹlo veva nesẹ fiọbhi Gẹhẹna,* 48 bhi eji ekhọe ida yu bi eji eranlẹn ida wẹ a.

49 “Eranlẹn dẹ rọ nyan ẹbho, beji a rẹ khakha umhẹn ọbhi ebale. 50 Umhẹn mhẹnmhin, ọkpakinọn, ahamiẹn umhẹn iyẹ mun, be a ha ki khian ọlẹn yẹ nọn da kie ha mun? Bha ha mhọn umhẹn bhi egbe nọnsẹbha, beji ibha ha da ha mhọn ọfure bhi ẹwẹ ibha.”

10 Ọle da sibhi enin re diọbhi eji otọ ọsi Judia sẹle bhi obọ nọnkẹle bhi ẹdẹ Jọdan. Bhi enin, usun ẹbho da gbo bu ọle re. Beji ọle ka lu khẹ, ọle da munhẹn ha man ele emhin. 2 Ibhokhan Farisi da bu ọle re. Ranmhude ele guanọ nin ele dọnmhẹn ọlẹn, ele da nọọn ọlẹn si ọ be khẹke nin okpea khu okhuo ọle fia. 3 Ọle da wanniẹn ele yọle: “Uhi nela Mozis gbe nin ibha?” 4 Ele da yọle: “Mozis re otọ nin imhan rẹ ha re ebe nan rẹ khu okhuo bhi isi ọdọ nin ọne okhuo, yẹ khu ọle fia.” 5 Ọkpakinọn, Jesu da taman ele yọle: “Ranmhude iwobhuhọnmhọn nọnsẹbha, ọle zẹle nin Mozis da gbe ọne uhi nan nin ibha. 6 Sokpan, rẹ na bhi ẹghe umunhẹn ha vade, ọle Osẹnobulua re man ele okpea bi okhuo. 7 Ranmhude ọnan, okpea ki zẹ aba ọle bi inẹn ọlẹn obọ. 8 Sẹyẹ, ele veva ki kiẹn efun ọkpa. Bhiriọ, ele iyẹ da ha yi eva, efun ọkpa ele ki khin. 9 Bhiriọ, ebi Osẹnobulua gba kugbe, ọria soso hẹi wa ọle a.” 10 Ele ki gbo ha ribhi ẹkẹ uwa, ene edibo da munhẹn ha nọọn ọlẹn ẹmhọn ebi ọle tale. 11 Ọle da taman ele yọle: “Ọnọn hi ki rẹ khin nọn khu okhuo ọle fia, yẹ dọ re okhuo ọbhebhe, oghẹ ọle gbele. Ọle yẹ rahiẹ okhuo ọle. 12 Sẹyẹ, ahamiẹn okhuo nọn sibhi isi ọdọ re dọ bọ ọdọ ọbhebhe, oghẹ ọle gbele.”

13 Ẹbho da munhẹn ha muno imọn nesele ji ọle, beji ọle ha da re obọ so ele. Ọkpakinọn, edibo nesọle da ha ne ele gui. 14 Jesu ki daghe ọnan, ẹkẹ da khọ ọle. Ọle da taman ele yọle: “Ibha ji ene ibhokhan da bu imẹn re; ibha hẹi yẹ de ele idobolo, ranmhude, eria ne diabe ene ibhokhan nan, ele nyan Agbejele nọnsi Osẹnobulua. 15 Bhi ọsi ẹmhọanta, imẹn taman ibha ghe, ọria nọn hi ki rẹ khin, nọn bha miẹn Agbejele nọnsi Osẹnobulua ọbhi egbe bọsi obhokhan, ọle ida sabọ nabhọ.” 16 Ọle da si ene ibhokhan kẹ egbe, yẹ ha nan erọnmhọn nin ele. Ọle da ha ne obọ nyan ele.

17 Ọle ki ha khian, okpea ọkpa da runẹ bu ọle re, yẹ dọ diguẹ bhi odalo ọle. Ọne okpea da nọọn ọlẹn yọle: “Ọman-emhin Nọn Mhẹn, be imẹn ha lu nin imẹn da sabọ miẹn iẹnlẹn ọsi ighegheghe?” 18 Jesu da ki taman ọlẹn yọle: “Bezẹle nin uwẹ da tie imẹn ọnọn mhẹn? Gbera Osẹnobulua, ọria soso iribhọ nọn mhẹn. 19 Uwẹ lẹn ene uhi: ‘Hẹi gbugbele, hẹi gboghẹ, hẹi ra, hẹi sọsali ohoghe, hẹi mun ibo ẹ lu, mun ekpẹn nin aba ẹ bi inẹn ẹn.’” 20 Ọne okpea da taman ọlẹn yọle: “Ọman-emhin, imẹn wo ha re obọ rẹkhan ene uhi nan, rẹ na egbe obhokhan ha vade.” 21 Jesu ki ghe ọle, ẹmhọn ọlẹn da wo yẹẹ ọle a. Bhiriọ, ọle da taman ọlẹn yọle: “Emhin ọkpa kẹ uwẹ re. Ha khian dọ khiẹn emhin nesẹ, uwẹ ha re ọne igho nin ene ibhioguele. Ẹghenin, uwẹ ki ha mhọn emhin ne ghanlẹn bhi okhun. Sẹyẹ, uwẹ ha vae dọ ha rẹkhan imẹn.” 22 Ọkpakinọn, ebi Jesu taman ọlẹn da manman ba ọle bhi egbe. Bhiriọ, ọle da kiẹ-egbe kpanọ, ranmhude, ọle wo manman fe.

23 Jesu ki ghe ijerebhe nẹga, ọle da taman edibo nesọle yọle: “Ọ dẹ wo manman nọghọ nin ẹbho ne mhọn igho rẹ nabhi Agbejele nọnsi Osẹnobulua.” 24 Ọkpakinọn, ebi ọle tale da wo han edibo nesọle ilo. Jesu da ki taman ele yọle: “Imọn, ọ dẹ nọghọ gbe nan rẹ nabhi Agbejele nọnsi Osẹnobulua. 25 Nin kẹtẹkẹtẹ* rẹ na bhi uhio agbede gbera, ọle ha lẹkhẹ nẹ, nin ọria nọn fele rẹ nabhi Agbejele nọnsi Osẹnobulua.” 26 Ọne ẹmhọn da wo kie manman han ele ilo. Bhiriọ, ele da nọọn ọlẹn yọle:* “Họla ha ki sabọ miuhọnmhọn?” 27 Jesu ki da ghe ele ẹlo yẹ yọle: “Rẹji eria, ebe ida sabọ sunu nọn, sokpan, ọ iyi iriọ rẹji Osẹnobulua. Ranmhude, a imiẹn ebi Osẹ isabọ lu.” 28 Pita ki da taman ọlẹn yọle: “Ghọle! Imhan zẹ emhin rebhe obọ yẹ rẹkhan uwẹ.” 29 Jesu da yọle: “Bhi ọsi ẹmhọanta, imẹn taman ibha ghe, ọria nọn hi ki rẹ khin nọn zẹ uwa nọnsọle obọ, la ibhio ọle nin ikpea, la ibhio ọle nin ikhuo, la inẹn ọlẹn, la aba ọle, la imọn nesọle, la ugbo nọnsọle, ranmhude elin nọnsẹmhẹn, bi ranmhude ọne ọta nọn mhẹn, 30 ọle dẹ miẹn elele igba iyisẹn* bhi ọne ore nan nian. Ọle dẹ miẹn uwa, ibhio nin ikpea, ibhio nin ikhuo, inẹn, imọn, ugbo, bhi ẹkẹ ekpokpo. Ọle dẹ yẹ miẹn iẹnlẹn ighegheghe bhi agbọn* nọn vade. 31 Ọkpakinọn, ẹbho ne bunbun ne rẹ mun ọkalo dẹ mun ọkike. Sẹyẹ, ene mun ọkike ki mun ọkalo.”

32 Ejayenan nian, ele ki ha khian Jerusalẹm, Jesu da wo khianmhọn bhi odalo. Ọnan da wo han ele ilo. Ọkpakinọn, ofẹn da ha mun ẹbho eso ne rẹkhan ele. Ọle da gbo ne etuegbe igbeva nesọle diọbhi obọ ọkpa, yẹ ha taman ele emhin ne da kẹ sunu ji ọle. Ọle da yọle: 33 “Ghọle! Jerusalẹm mhan khian riọ, a dẹ mun Ọmọn nọnsi okpea nin ene ohẹn ne khua bi ene man uhi. Ele ki yọle nan gbe ọle a, yẹ mun ọlẹn nin ene ribhi ẹkẹ agbọn. 34 Ene eria nan ki zuọzuọ ọle, tuẹsẹn nyan ọlẹn, re asan gbe ọle, yẹ gbe ọle a. Ọkpakinọn, ukpẹdẹ nọnzi ea, ọle ki riọ kpanọ.”

35 Jemis bi Jọni nin imọn nesi Zẹbẹdi da bu ọle re, yẹ taman ọlẹn yọle: “Ọman-emhin, mhan guanọ nin uwẹ lu emhin nọn hi ki rẹ khin nin imhan bhii uwẹ le nin imhan.” 36 Ọle da nọọn ele yọle: “Be ibha guanọ nin imẹn lu nin ibha?” 37 Ele da yọle: “Re otọ nin mhan rẹ dotua sike ẹ bhi Agbejele nọnsẹ.* Ọkpa bhi ẹwẹ mhan ki ha ribhi obera nọnsẹ, ọnọnkẹle ki ha ribhi obọ agobọ nọnsẹ.” 38 Ọkpakinọn, Jesu da taman ele yọle: “Ibha bha lẹn ebi bha bhii imẹn le. Ibha dẹ sabọ wọn bhi ukpu nin imẹn da ha wọn? La bha dẹ be sabọ re egbe na bhi eji mẹn wo ha re egbe na?”* 39 Ele da wanniẹn ọlẹn yọle: “Ehe, imhan dẹ sabọmhin.” Jesu da ki taman ele yọle: “Gene-gene, bha dẹ wọn bhi ukpu nin imẹn da ha wọn. Sẹyẹ, bha dẹ re egbe na bhi eji mẹn wo ha re egbe na.* 40 Ọrẹyiriọ, ọ iyi imẹn ha tare ọnọn ha dotua bhi obera la obọ agobọ nọnsẹmhẹn. Eria nan mhanmhanlẹn khẹ, ele ha dotua bhọ.”

41 Ẹghe nin edibo igbe nekẹle ki rẹ họn ebe sunu, ẹkẹ Jemis bi Jọni da ha khọ ele. 42 Ọkpakinọn, Jesu da tie ele, yẹ taman ele yọle: “Ibha lẹnmhin ghe, ene gbẹloghe ene agbaẹbho denyẹnyẹn ele, sẹyẹ, ene ribhi ihe le ọba nyan ele. 43 Ọ bha khẹke nin emhin dia inian bhi ẹwẹ ibha. Ọkpakinọn, ọkhẹke nin ọria nọn ho nin ọle ha yi okpọria bhi ẹwẹ ibha ha ga enekẹle. 44 Sẹyẹ, ọkhẹke nin ọria nọn ho nin ọle mun ọkalo bhi ẹwẹ ibha ha yi igbọn nọnsẹbha. 45 Ranmhude, Ọmọn nọnsi okpea bhọ vae, ọ iyi nan dọ ha ga ọle, sokpan nin ọle dọ ga ẹbho, yẹ re iẹnlẹn nọnsọle zọese, nin ọle rẹ dẹ ẹbho ne bunbun kiere.”

46 Ele ki da sẹbhi Jẹriko. Ọkpakinọn, ẹghe nin ọle bi edibo nesọle bi usun ẹbho ne bunbun rẹ ha sibhi Jẹriko re, okpea ọkpa nọn ruẹlo, nọn yẹ bhii emhin, natiọle Batimiọs (ọmọn nọnsi Timiọs), da dotua bhi egbe uwedẹ. 47 Ẹghe nin ọle ki rẹ họn ghe Jesu nin obhi Nazarẹt, ọle gbera, ọle da munhẹn ha so yọle: “Jesu, Ọmọn nọnsi Devid, mhọn itohan da imẹn.” 48 Ẹbho ne bunbun da ha nanlẹn gui. Ele da ha taman ọlẹn nọn gue unun. Ọkpakinọn, ọle da kie manman ha so yọle: “Ọmọn nọnsi Devid, mhọn itohan da mẹn!” 49 Jesu da ki mundia, yẹ yọle: “Ibha tie ọle ji imẹn.” Bhiriọ, ele da tie ọne okpea nọn ruẹlo. Ele da taman ọlẹn yọle: “Hẹi ji ofẹn mun uwẹ! Kpanọ mundia; ọle tie ẹ.” 50 Ọle da ban ukpọn nin ọle yọ ke okhun re fia, yẹ jẹje kpanọ mundia bu Jesu. 51 Jesu da nọọn ọlẹn yọle: “Be uwẹ guanọ nin imẹn lu nin uwẹ?” Ọne okpea nọn ruẹlo da taman ọlẹn yọle: “Raboni,* taan mẹn ẹlo a nin imẹn ha daghe.” 52 Jesu ki da taman ọlẹn yọle: “Ha khian, urẹọbhọ nọnsẹ re egbe daan ẹn.” Bhi ọne ẹghe nin tee, ọle da munhẹn ha daghe. Sẹyẹ, ọle da munhẹn ha rẹkhan ọlẹn.

11 Ẹghe nin ele ki rẹ ha sikẹ Jerusalẹm, ele da mundia bhi Oke ọsi Oliv, eji idunmhun ọsi Bẹtfeji bi Bẹtani ye. Jesu da je eva bhi edibo nesọle uhọnmhọn. 2 Ọle da taman ele yọle: “Ibha ha khian ọne idunmhun nin nọn ribhi odalo ibha. Beji ibha ha wo rẹ ha nabhi ẹkẹ ọle, ibha dẹ miẹn obhi kẹtẹkẹtẹ* nan mun diẹn. Ọria soso bha sẹ ka dotua bhọ khẹ. Bha taan ọlẹn sibhi uri re, ibha ha mun ọlẹn re bhi enan. 3 Ọria soso ha nọọn ibha yọle, ‘Bezẹle nin ibha da taan ọlẹn an?’ ibha taman ọlẹn yọle, ‘Ebeanlẹn imhan guanọ nin ọle noo ọle. Ọle dẹ kẹ mun fikiere.’” 4 Ele da kpanọ ha khian. Ele da kere ghe, a diẹn ọne obhi kẹtẹkẹtẹ mun ẹkhu bhi uwa ọkpa nọn ribhi egbegbe uwedẹ. Ele da taan ọlẹn an. 5 Ọkpakinọn, eso bhi ẹbho ne mundia bhi enin da ha nọọn ele yọle: “Bezẹle nin ibha da ha taan ọne obhi kẹtẹkẹtẹ a?” 6 Ele da taman ene ẹbho ebi Jesu tale. Bhiriọ, ene ẹbho da ji ele da ha khian.

7 Ele da mun ọne obhi kẹtẹkẹtẹ ji Jesu. Ele da waa ukpọn nọnsele ọbhi uke ọle. Jesu da dotua ọbhọ. 8 Sẹyẹ, ẹbho ne bunbun da wa ukpọn nọnsele ọbhi uwedẹ, ene kẹle da ha gbe ebe ọbhi otọ. 9 Ene ke odalo nanlẹn bi ene rẹkhan ọlẹn bhi ikeke da ha so yọle: “Hinmhin ọlẹn, mhan bhii ẹ! Erọnmhọn hi ọsi ọne ọria nọn re elin nọnsi Jehova* vae! 10 Erọnmhọn hi ọsi Ọmọn nọnsi Devid nin aba imhan, nọn vade dọ gbẹloghe. Hinmhin ọlẹn, mhan bhii ẹ, uwẹ nọn ribhi okhun!” 11 Ọle ki sẹbhi Jerusalẹm, ọle da nabhi uwa oga. Ọle da ghe ijerebhe nẹga. Ọkpakinọn, ranmhude ebi fẹkẹ ha lo, ọle da kpanọ ha khian Bẹtani, ọle bi etuegbe igbeva nesọle.

12 Bhi ukpẹdẹ nọn rẹkhan ọlẹn, beji ele ha sibhi Bẹtani re, ohanmhẹn da ha gbe ọle. 13 Bhi odalo vuun, ọle da daghe oran fig nọn họn ebe. Ọle da ha khian nin ọle dọ fẹghe si ọle dẹ miẹn ebale bhọ. Ọkpakinọn, ọle ki sẹbhọ, ọle da kere ghe, ebe ọkpa vuọn ọlẹn. Ọle bha miẹn ebale bhọ, ranmhude, ọ bha sẹ sẹ ẹghe nin fig rẹ mọn. 14 Bhiriọ, ọle da taman ọne oran yọle: “Ọria ida yẹ kie le ikperan nọnsẹ ghee.” Edibo nesọle da ha ka ọle ehọ.

15 Ele da ki sẹbhi Jerusalẹm. Ọle da nabhi ẹkẹ uwa oga yẹ munhẹn ha khu ẹbho ne khiẹn emhin, bi ene dẹ emhin sibhi ọne uwa oga re. Itebu ọsi ene hian igho, bi aga ọsi ene khiẹn idulu, ọle da si ele ẹlo ru. 16 Sẹyẹ, ọle bha ji ọria soso da mun emhin na bhi ẹkẹ uwa oga gbera. 17 Ọle da ha man ele emhin yẹ taman ele yọle: “A bha be gbẹn ọlẹn yọle, ‘A dẹ ha tie uwa nọnsẹmhẹn uwa nin agbaẹbho rebhe ha da ha nan erọnmhọn’? Ọkpakinọn, ibha re ọle kiẹn uwa oyi.” 18 Ene ohẹn ne khua bi ene man uhi ki họn ebe sunu, ele da ha guanọ uwedẹ nin ele ha rẹ gbe ọle a. Ofẹn ọlẹn da ha mun ele, ranmhude, uwedẹ nin ọle rẹ man emhin wo ha ti ene ẹbho rebhe bhọ.

19 Emuan ki re, ele da sibhi ọne agbaẹbho re. 20 Ọsewewiẹ, beji ele ki ha gbera, ele da daghe ghe ọne oran fig yulu. 21 Pita da ye ọne oran re. Ọle da taman Jesu yọle: “Rabai, ghọle! ọne oran fig nin uwẹ fi ọle unun, ọ yu.” 22 Jesu da ki taman ele yọle: “Ibha ha mhọn urẹọbhọ da Osẹnobulua. 23 Bhi ọsi ẹmhọanta, imẹn taman ibha ghe, ọnọn hi ki rẹ khin nọn taman ọne oke nan, ‘Vu sibhi otọ re nabhi ẹkẹ okpẹdẹ,’ nin ọle bha da ha mhọn edandan bhi ọkhọle, ọkpakinọn, ọle mhọn urẹọbhọ ghe ebi ọle tale dẹ sunu, ebi ọle tale ki gene sunu. 24 Ọnan zẹle nin imẹn da taman ibha ghe, emhin rebhe nin ibha bhii bhi erọnmhọn, bha ha mhọn urẹọbhọ ghe ọ sẹ ibha obọ fo, bhiriọ, ele ki gene sẹ ibha obọ. 25 Sẹyẹ, ahamiẹn ibha nan erọnmhọn, ibha rẹhunmhan ọnọn hi ki rẹ khin nọn lu emhin ebe da ibha, beji Aba ibha nọn ribhi okhun ha da yẹ gbe olukhọ nọnsẹbha kua.” 26* ——

27 Jesu bi edibo nesọle da gbo kie vae bhi Jerusalẹm. Beji ọle ha khian bhi ẹkẹ uwa oga, ene ohẹn ne khua, ene man uhi, bi ene ewanlẹn da bu ọle re. 28 Ele da nọọn ọlẹn yọle: “Ji uwẹ da miẹn ahu nin uwẹ rẹ ha lu ene emhin nan? Họla re ahu nin uwẹ rẹ ha lu ene emhin nan?” 29 Jesu da wanniẹn ele yọle: “Imẹn dẹ nọọn bha inọnta ọkpa, ibha ha wanniẹn ọlẹn, imẹn ki yẹ taman ibha ọnọn re ahu nin imẹn rẹ ha lu ene emhin nan. 30 Họla je Jọni nọn ha re amẹn nin ẹbho, Osẹnobulua be nọn, la eria? Ibha wanniẹn imẹn.” 31 Bhiriọ, ele da ha zilo bhi ẹwẹ ele yọle: “Imhan ha yọle Osẹnobulua nọn, ọle ki yọle, ‘Be ki zẹ nin ibha bha da rẹọ ọle bhọ?’ 32 Ọkpakinọn, mhan ida gbudu yọle, ‘Eria.’” Ofẹn ene usun ẹbho da ha mun ele, ranmhude, ele rebhe rẹọbhọ ghe akhasẹ Jọni khin. 33 Bhiriọ, ele da wanniẹn Jesu yọle: “Imhan bha lẹn.” Jesu da taman ele yọle: “Imẹn ida yẹ taman ibha ọnọn re ahu nin imẹn rẹ ha lu ene emhin nan.”

12 Ọle da gbo munhẹn ha noo arẹkhọkhọ rẹ man ele emhin. Ọle da yọle: “Okpea ọkpa da mun ugbo ivain, yẹ gbogba nẹga ọle. Ọle da lu eji a da koko anyọn ọbhọ, yẹ bọn uwa nọn yoyo ọbhọ; ọle da mun ọne ugbo nin ẹbho nin ele ha gbẹloghe ọle, yẹ kpanọ ha khian agbaẹbho ọbhebhe. 2 Ẹghe nan rẹ rọ emhin ugbo ki sẹ, ọle da je ọkpa bhi igbọn nesọle bu ene ẹbho ne gbẹloghe ọne ugbo, nọn dọ miẹn ele ikpẹ ne kọnnọn bhi ọne ugbo. 3 Ọkpakinọn, ele da mun ọlẹn, gbọle yẹ re obọ khọnkhan je ọle kpanọ. 4 Ọle da gbo je igbọn ọbhebhe bu ele. Ele da re emhin gbe ọle bhi uhọnmhọn, yẹ re ekpẹn si ọle bhi egbe re. 5 Ọle da gbo je igbọn ọbhebhe, ele da gbe ọle a. Ọle da sẹyẹ je igbọn ebhebhe ne bunbun. Ele da gbe eso bhọ, ye gbono eso a. 6 Bhi ọkike ọle, ọle da je ukpọmọn ọkpa nin ọle hoẹmhọnlẹn bu ele. Ọle da ha riale, ‘Ele dẹ mun ekpẹn nin ọmọn nọnsẹmhẹn.’ 7 Ọkpakinọn, ene gbẹloghe ọne ugbo da ha tale bhi ẹwẹ ele yọle, ‘Ọnan hi ọne ọmọn nọn ha le uku nọnsọle. Ibha vae, ibha ji imhan gbe ọle a, beji imhan ha da re ọne uku kiẹn ọsẹmhan.’ 8 Bhiriọ, ele da mun ọlẹn, gbe ọle a, yẹ mun ọlẹn sibhi ọne ugbo ivain re. 9 Be ọne okpea nọn nyan ọne ugbo ivain ha ki lu yẹ? Ọle ki vae dọ gbono ene ikpea ne gbẹloghe ọne ugbo a. Ọle ki yẹ mun ọne ugbo nin eria ebhebhe. 10 Ibha bha be sẹ ka tie ọle khẹ bhi Ebenọnkhiale ghe, ‘Ọne udo nin ene bọn uwa hele, ọle ki kiẹn udo kpataki nọn mun ọne uwa mhọnlẹn.* 11 Obọ Jehova* ọnan na vae, emhin ọhan-ilo yẹ nọn bhi ẹlo nọnsẹmhan’?”

12 Ele da rẹ ha guanọ nin ele mun ọlẹn, ranmhude, ele lẹnmhin ghe, ele zẹle nin ọle da noo ọne arẹkhọkhọ. Ọkpakinọn, ranmhude ofẹn ene usun ẹbho nọn ha mun ele, ele da kpanọ zẹ ọle obọ.

13 Ele da gbo je ibhokhan Farisi eso, bi eso bhi ene rẹkhan Hẹrọd bu ọle, beji ele ha da re ọta mun ọlẹn. 14 Ele ki sẹbhi eji ọle ye, ele da taman ọlẹn yọle: “Ọman-emhin, imhan lẹn ghe uwẹ wo ta ẹmhọanta, sẹyẹ, uwẹ ifi abẹdo, ranmhude, uwẹ ighe ẹlo ọsi ọria. Uwedẹ ẹmhọanta uwẹ wo rẹ ta ẹmhọn Osẹnobulua. Ọ be khẹke nin mhan ha ha igho uhọnmhọn ji Siza? 15 Ọ be khẹke la ọ bha khẹke?” Jesu ki daghe ọle ghe ikpunun ọ ye ele le, ọle da taman ele yọle: “Bezẹle nin ibha da dọnmhẹn imẹn? Bha re dinariọs* ji imẹn, nin imẹn fẹ ọle ghe.” 16 Ele ki da re dinariọs ọkpa ji ọle. Ọle da nọọn ele yọle: “Amanzẹ bi elin ọsi ọria nela khọnan?” Ele da yọle: “Ọsi Siza.” 17 Jesu da ki yọle: “Bha ne emhin nesi Siza nin Siza, ibha ha ne emhin nesi Osẹnobulua nin Osẹnobulua.” Ẹmhọn ọlẹn da wo han ele ilo.

18 Ejayenan nian, ibhokhan Sadusi ne yọle ghe ariọkpanọ bhi uu iribhọ, da bu ọle re dọ nọọn ọlẹn yọle: 19 “Ọman-emhin, Mozis gbẹn ọlẹn ọbhi otọ nin imhan ghe, ahamiẹn okpea yu fi okhuo ọle ya, nan da miẹn ọle bha ha mhọn ọmọn, obhio ọle ki re okhuo ọle, yẹ nẹkẹ ọmọn nanlẹn. 20 Ikpea ihinlọn da ha ribhọ ne yi ibhio, ọne ọhẹnhẹn da re okhuo, ọkpakinọn, ọle da yu, ọle bha ha mhọn ọmọn. 21 Ọne ọzeva da yẹ re ọne okhuo, ọkpakinọn, ọle da yẹ yu. Ọle bha ha mhọn ọmọn. Iriọ yẹ nọn rẹji ọne ọzea. 22 Iriọ ene ikpea ihinlọn rẹ yu. Ele soso bha biẹ ọmọn. Bhi ọkike ọle, ọne okhuo da yẹ yu. 23 Ẹghe nin ene yulu ha rẹ riọkpanọ, ọria nela da ha yi ọdọ ọle bhi ẹwẹ ene ikpea ihinlọn? Ranmhude, ele rebhe re ọle bhi amhẹn.” 24 Jesu da taman ele yọle: “Bha wo ha mun ọhan, ranmhude, ibha bha lẹn ẹmhọn nọn ribhi Ebenọnkhiale, la ebi ahu nọnsi Osẹnobulua kpọnọ sẹ yẹ. 25 Ẹghe nin ẹbho ne yulu ha rẹ riọkpanọ bhi uu, ikpea ida ha re okhuo, ikhuo ida yẹ ha bọdọ. Ele ki diabe ẹhi ne ribhi okhun. 26 Rẹji ariọkpanọ bhi uu, ibha bha be sẹ tie ebi Osẹnobulua tale bhi ebe nọnsi Mozis, bhi okha nọn tẹmhọn ẹwẹ igbẹn nọn ha to, ẹghe nin ọle rẹ yọle: ‘Imẹn hi Osẹnobulua ọsi Ebraham, Osẹnobulua ọsi Aiziki, bi Osẹnobulua ọsi Jekọp’? 27 Osẹnobulua ọsi ene nyẹnlẹn ọle khin, ọ iyi ọsi ene yulu. Ibha wo manman mun ọhan.”

28 Ọkpa bhi ene man uhi nọn vae bhi enin, yẹ ha kaehọ ẹghe nin ele rẹ ha gbugan, da kere ghe Jesu wo wanniẹn ele nọnsẹn. Ọle da ki nọọn ọlẹn: “Uhi nela ke okhun nẹ?” 29 Jesu da wanniẹn ọlẹn yọle: “Uhi nọn ke okhun nẹ hi, ‘Bha kaehọ ibhokhan Izrẹl, Jehova* nin Osẹnobulua nọnsẹmhan, Jehova* ọkpa nọn. 30 Re udu nọnsẹ rebhe, egbe* nọnsẹ rebhe, ọkhọle nọnsẹ rebhe, bi ahu nọnsẹ rebhe rẹ hoẹmhọn Jehova* nin Osẹnobulua nọnsẹ.’ 31 Ọne ọzeva hi, ‘Hoẹmhọn ibo ẹ, beji uwẹ rẹ hoẹmhọn egbe nọnsẹ.’ Uhi ọbhebhe iribhọ nọn kpọnọ nẹ ene uhi nan veva.” 32 Ọne okpea nọn man uhi da yọle: “Ọman-emhin, ẹmhọanta uwẹ wo ta. ‘Osẹnobulua ọkpa ọle khin, gbera ọle, Osẹ ọbhebhe iribhọ.’ 33 Nan rẹ re udu rebhe, ẹwanlẹn rebhe bi ahu rebhe rẹ hoẹmhọn ọlẹn, bi nin ọria rẹ hoẹmhọn ibo ọle beji ọle rẹ hoẹmhon egbe nọnsọle, ọle lu uhọnmhọn emhin nẹ izọese rebhe nan tuẹ a, bi izọese nekẹle rebhe.” 34 Jesu ki daghe uwedẹ nin ọle rẹ talọ nọnsẹn, ọle da taman ọlẹn yọle: “Ọ ida nọghọ gbe nin uwẹ rẹ nabhi Agbejele nọnsi Osẹnobulua.” Ọria soso bha yẹ gbudu nọọn ọle ọta.

35 Ọkpakinọn, beji Jesu sẹyẹ ha man emhin bhi uwa oga, ọle da yọle: “Bezẹle nin ene man uhi da yọle ghe, ọmọn nọnsi Devid ọle Kristi khin? 36 Ẹlinmhin nọn khiale bhọ da rẹkpa Devid tobọle rẹ yọle, ‘Jehova* da taman Ebeanlẹn imẹn yọle: “Dotua bhi obera nọnsẹmhẹn, rẹ sẹbhi ẹghe nin imẹn ha rẹ ne eghian nesẹ ọbhi odotọ oẹ nọnsẹ”’ 37 Devid bhọ da tie ọle Ebeanlẹn ọlẹn. Be ọle ki rẹ yi ọmọn nọnsi Devid yẹ?”

Ọta nin ọle ha ta da wo ha mhẹn ene ẹbho bhi ehọ. 38 Beji ọle ha man emhin, ọle da yọle: “Bha mhọn ẹwanlẹn bhi egbe ene man uhi. Ele ki wo muno ọgulọgu* yọ ha khian nẹga, yẹ ha guanọ nin ẹbho ha tuẹ ele bhi eji a da do ẹki. 39 Aga ne ribhi odalo* bhi sinagọg bi aga ne mhẹn nẹ bhi eji a da le ebale emuan, ọle yẹẹ ele da dotua. 40 Ele gbe ikhuo nin ọdọ ele yu miẹn ele emhin. Ele yẹ nan erọnmhọn bue, beji ẹbho ha da daghe ele. Ibhuohiẹn nin ele ha miẹn dẹ kaka gbe.”

41 Jesu da ki dotua yẹ ha ghe ẹkpẹti nan ne igho ọi. Ọle da daghe ebi ene usun ẹbho rẹ ha ne igho ọbhi ẹkẹ ene ẹkpẹti yẹ, bi ebi ẹbho ne bunbun ne fele rẹ ha ne igho nọn bunbun ọbhi ẹkẹ ọle yẹ. 42 Obhioguele ọkpa nin ọdọ ọle yulu da yẹ vae. Ọle da ne ikpigho eva ne bha sẹ emhin soso* ọbhi ẹkẹ ọne ẹkpẹti. 43 Ọle da ki datie edibo nesọle re, yẹ taman ele yọle: “Bhi ọsi ẹmhọanta, imẹn taman ibha ghe, igho nin ọne obhioguele nan nọn iyẹ mhọn ọdọ re ọbhi ẹkẹ ẹkpẹti, ọle kpọnọ gbera igho nin ẹbho nekẹle ne ọbhi ẹkpẹti. 44 Ene ẹbho nekẹle ne re emhin ọbhi ẹkẹ ẹkpẹti manman mhọn emhin. Bhi obọ nọnkẹle, ọne okhuo nan bha miẹn rẹ lu. Ọrẹyiriọ, ọle da re emhin rebhe nin ọle mhọn bhi ẹkẹ ẹkpẹti, ukpọkhere nin ọle rẹ ha mhọnlẹn.”

13 Ẹghe nin ọle ki rẹ ha sibhi ọne uwa oga re, ọkpa bhi edibo nesọle da yọle: “Ọman-emhin, sẹ ghe ebi ọne uwa nan bi ene udo nan rẹ mhọn-ose a yẹ!” 2 Ọkpakinọn, Jesu da taman ọlẹn yọle: “Uwẹ daghe ọne udede uwa nan, a dẹ dunmhun ọlẹn sotọ sẹsẹsẹ. Udo ọkpa ida kẹre bhọ.”

3 Beji ọle dotua bhi uke Oke ọsi Oliv, yẹ ha ghe ọne uwa oga, Pita, Jemis, Jọni bi Andru da fẹkẹ bu ọle re. Ele da taman ọlẹn yọle: 4 “Taman imhan, ẹghela ene emhin nan ha rẹ sunu? Be hi iyaman nọn ha rẹman ghe ọkpẹnlẹn ọsi ene emhin nan rebhe sire?” 5 Jesu da ki taman ele yọle: “Ibha gbẹlokotọ nin ọria soso hẹi hiẹ ibha. 6 Ẹbho ne bunbun dẹ re elin nọnsẹmhẹn vae. Ele ki ha yọle, ‘Imẹn hi Kristi,’ ele ki yẹ hiẹ ẹbho ne bunbun. 7 Ibha ha hẹnmhọn okhọn bhi ije kẹkẹ, ibha hẹi ji ofẹn mun ibha; ene emhin nan dẹ sunu, ọkpakinọn, ọkpẹnlẹn isẹ da vae.

8 “Agbaẹbho ọkpa dẹ mun okhọn bu agbaẹbho ọbhebhe, sẹyẹ agbejele ọkpa dẹ mun okhọn bu agbejele ọbhebhe; otọ ki ha munvẹa bhi ije kẹkẹ; ukhunmhun ki ha fi. Ene emhin nan rebhe ki ha yi umunhẹn ọsi ọbalọ, bọsi okhuo nin ubiẹmhin lu.

9 “Bhi ọsẹbha, ibha gbẹlokotọ bhi egbe ibha. Ẹbho dẹ muno ibha ha khian ikotu, ele dẹ gbe ibha bhi sinagọg, yẹ muno ibha bu gọvanọ bi enijie ranmhude imẹn. Ọnan ki re otọ nin ibha rẹ sọsali man ele. 10 Sẹyẹ, a dẹ ka ta ọne ọta nọn mhẹn na bhi ene agbaẹbho rebhe. 11 Ahamiẹn ele mun ibha khian, ibha hẹi ha kpokpo egbe ba ẹmhọn ebi ibha ha ta; ebi a ha re nin ibha bhi ọne ẹghe nin, ọle ibha ha ta. Ranmhude, ọ iyi ibha da ha talọ. Ẹlinmhin nọn khiale da ha noo ibha rẹ talọ. 12 Rẹ deba ọnin, okpea ki mun obhio ọle re nan gbe ọle a. Aba ki mun ọmọn nọnsọle re nan gbe ọle a. Imọn ki yẹ ne ene biẹ ele ha suan, yẹ mun ele re nan gbe ele a. 13 Ẹbho rebhe ki he ibha ranmhude elin nọnsẹmhẹn. Ọkpakinọn, ọria nọn ziẹngbe sẹ ọkpẹnlẹn dẹ miuhọnmhọn.

14 “Ahamiẹn ibha daghe ọne emhin nọn sọnnọn nọn si ugbekhuelo re mundia bhi eji ọ bha da khẹke nọn da mundia (ji ọria nọn tie ene ẹmhọn nan noo ẹwanlẹn), ji ene ribhi Judia munhẹn ha nẹ diọbhi uke oke. 15 Ọria nọn ribhi okhun uwa hẹi huẹnre, la nabhi ẹkẹ uwa nọnsọle dọ re emhin soso sibhi ẹkẹ uwa re; 16 sẹyẹ, okpea nọn ribhi ugbo hẹi fikie vae bhi uwa dọ re ukpọn nin ọle yọ ke okhun. 17 Ọ dẹ khọ bhi egbe nin ikhuo ne hanmhan bi ikhuo ne mun ọmọn bhi obọ bhi ọne ẹghe nin! 18 Ibha ha bhii nọn hẹi sunu bhi ẹghe ulinlin; 19 ranmhude ọne ẹghe nin dẹ ha yi ẹghe ekpokpo nọn khua. Ọne ekpokpo dẹ ha yi ọne a bha sẹ ka miẹn egbọle khẹ rẹ na bhi ẹghe nin Osẹnobulua rẹ man ọne agbọn nan, rẹ dọ sẹbhi ọne ẹghe nin. Sẹyẹ, a ida kie miẹn egbọle ghẹdẹ. 20 Bhi ọsi ẹmhọanta, ahamiẹn Jehova* bha hian sibhi ene ikpẹdẹ nin re, ọria soso ida miuhọnmhọn. Ọkpakinọn, ranmhude ene ọle zẹle, ọle dẹ hian sibhi ene ikpẹdẹ nin re.

21 “Sẹyẹ, ahamiẹn ọria soso taman ibha ẹghenin yọle, ‘Ghọle! Kristi ribhi enan,’ la, ‘Ghọle! Ọ ribhi enin,’ ibha hẹi rẹọ ọle bhọ. 22 Ranmhude, Kristi ohoghe bi akhasẹ ohoghe dẹ zegbere. Ele ki ha lu emhin ọhan-ilo kẹkẹ, beji ele ha da hiẹ enanzẹle, sade ọ fo ele. 23 Bhiriọ, ibha wo ha babegbe. Imẹn ta emhin rebhe ne ha sunu man ibha fo.

24 “Ọkpakinọn, ekpokpo nọn ha sunu bhi ọne ẹghe nin ha fo, ovuẹn ki so ebiuki a, sẹyẹ, uki ida bhala. 25 Ene ahiẹnhiẹn ki ha de sibhi okhun re. Emhin ne ribhi okhun ki yẹ ha mun lueghe. 26 Ẹghenin, ele ki daghe Ọmọn nọnsi okpea re uyi bi ahu nọn khua vade bhi ẹkẹ adudu amẹn. 27 Ọle ki je ene ẹhi dagbare, nin ele dọ koko enanzẹle nesọle bhi obọ nenẹn ọsi ọne otọ nan, rẹ na bhi eji otọ da munhẹn rẹ sẹbhi eji okhun sẹle.

28 “Ibha luẹ emhin bhi ọne arẹkhọkhọ nan ọsi eran fig: Ọ ha ki jẹ ikpabọ-eran ọsọgbọn, nọn yẹ munhẹn ha sọnnọn ebe re, ibha ki lẹn ghe ẹghe nin eran rẹ mọn ikpẹ sire. 29 Iriọ yẹ nọn rẹji ibha. Ẹghe nin ibha ha rẹ daghe ene emhin nan sunu, ibha lẹn sẹbhọ ghe, Ọmọn nọnsi okpea sire. Ọle ribhi ununro. 30 Bhi ọsi ẹmhọanta, imẹn taman ibha ghe, ọne ore nan ida gbera kie ọkuẹsẹ ene emhin nan rebhe sunu. 31 Otọ bi okhun ha rẹ gbera kie, a ida miẹn ghe ọta nọnsẹmhẹn bha munsẹ.

32 “Ọria soso iribhọ nọn lẹn ọne ukpẹdẹ nin, bi ọne uriagogo nin. Ene ẹhi ne ribhi okhun bha lẹn, ọne Ọmọn bha yẹ lẹn. Ọne Aba ọkpa lẹn ọne ukpẹdẹ. 33 Ibha wo ha babegbe, ibha hẹi wẹ, ranmhude ibha bha lẹn ọne ẹghe nan rẹyi. 34 Inian ọ diabe okpea nọn kpanọ ha khian agbaẹbho ọbhebhe, nọn mun uwa nọnsọle ọbhi obọ ọsi igbọn nesọle. Ọle da gha ẹsọn kẹkẹ nin ele, yẹ taman ọnọn khẹ odẹ nọn wo ha khẹ odẹ. 35 Bhiriọ, ibha wo ha babegbe, ranmhude, ibha bha lẹn ẹghe nin ọne ọwanlẹn nọn nyan uwa rẹ vade. Ibha bha lẹn si ọ dẹ vae sade ebi fẹkẹ ha lo, la bhi ọsasọn ogiziẹn, la sade ẹdẹ fẹkẹ ha we de,* la ọsewewiẹ bhibhi. 36 Beji a ha da miẹn, ẹghe nin ọle ha rẹ re osukpa vae, ọle bha dọ kere ghe ibha wẹ. 37 Ọkpakinọn, ebi imẹn taman ibha, ọle imẹn yẹ taman ọrebhe, ibha ha babegbe.”

14 Ọ ki kẹ ikpẹdẹ eva a kuẹ lu iluemhin ọsi Anagbera bi Iluemhin Ọsi Ibrẹd Nọn Ihuẹ, ene ohẹn ne khua bi ene man uhi da ha guanọ uwedẹ nin ele ha rẹ re eku mun Jesu yẹ gbe ọle a. 2 Sokpan ele da yọle: “Mhan ida lu ọle bhi ẹghe iluemhin; nan hẹi dọ miẹn ghe, ene ẹbho zughu ijerebhe a.”

3 Bhi Bẹtani, ẹghe nin Jesu rẹ ha le ebale bhi uwa ọsi Saimọn nọn rẹ ha khọnmhọn emianmhẹn egbekẹn, okhuo ọkpa da re ọgọ alabasta re, nin abhili nọn manman vin-ohin ye. Nad* ọsaje a rẹ lu ọne abhili. Ọne abhili manman ghanlan. Ọle da tuje ọne ọgọ alabasta a, yẹ munhẹn ha biri ọne abhili Jesu bhi uhọnmhọn. 4 Ẹbho eso ki daghe ọnan, ẹkẹ da ha khọ ele. Ele da yọle: “Bezẹle nan da ha riia ọne abhili nan an? 5 A ha rẹ khiẹn ọne abhili nan gbera dinariọs* iyisẹn ea* yẹ re ọne igho nin ene ibhioguele!” Ele da wo manman ha khọẹkẹ ọne okhuo.* 6 Ọkpakinọn, Jesu da yọle: “Ibha zẹ ọle obọ. Bezẹle nin ibha da guanọ ọle ẹmhọn? Emhin esili ọle lu da imẹn. 7 Ibha bi ene ibhioguele dẹ ko ha ribhi enan. Ibha dẹ sabọ lu emhin esili nin ele bhi ẹghe nọn hi ki rẹ khin nọn ghọn ibha. Ọkpakinọn, imẹn ida ha ribhi ẹwẹ ibha rẹ ha khian. 8 Ebi ahu ọle gbele ọle lu. Ọle da biri ọne abhili nọn vin-ohin imẹn bhi egbe, rẹ mun imẹn egbe khẹ ẹghe nan ha rẹ re imẹn tọ. 9 Bhi ọsi ẹmhọanta, imẹn taman ibha ghe, bhi eji ọ hi ki rẹ khin nan da tẹmhọn ọne ọta nọn mhẹn bhi otọ agbọn nan rebhe, a dẹ yẹ tẹmhọn ebi ọne okhuo nan lu, nan rẹ ha ye ọle re.”

10 Judas Iskarọt nọn yi ọkpa bhi ene etuegbe igbeva, da bu ene ohẹn ne khua, nin ọle dọ khiẹn Jesu nin ele. 11 Ele ki họn ebe re ọle vae, ele da wo manman ha ghọnghọn. Ele da yọle ghe, ele dẹ ne igho isiliva nanlẹn. Bhiriọ, ọle da munhẹn ha guanọ isẹhoa nin ọle ha rẹ mun Jesu khiẹn.

12 Bhi ukpẹdẹ ọhẹnhẹn ọsi Iluemhin Ọsi Ibrẹd Nọn Ihuẹ, bhi ẹghe nan rẹ lu izọese ọsi Anagbera, edibo nesọle da nọọn ọlẹn yọle: “Ji uwẹ guanọ nin imhan hẹnhẹn ọbhi otọ, nin uwẹ da le ebale ọsi Anagbera?” 13 Ọle ki da je edibo eva nesọle, yẹ taman ele yọle: “Ibha ha khian ẹkẹ ọne agbaẹbho. Bha dẹ miẹn okpea ọkpa nọn mun uko amẹn mhọnlẹn. Bha rẹkhan ọlẹn. 14 Sẹyẹ, uwa nọn hi ki rẹ khin nin ọle na i, bha rẹkhan ọlẹn nabhọ, bha ha taman ọnọn nyan ọne uwa, ‘Ọne Ọman-emhin yọle: “Ejela ọne ugha ọsi erumhunyẹn ye, nin imẹn ha da deba edibo nesẹmhẹn lu Iluemhin Ọsi Anagbera?”’ 15 Ọle dẹ re udede ugha man ibha bhi okhun uwa. Emhin rebhe gba bhi ọne ugha. Ibha muegbe ọne iluemhin ọbhi otọ khẹ mhan.” 16 Bhiriọ, ene edibo da kpanọ ha khian ọne agbaẹbho. Emhin rebhe da wo sunu beji Jesu taman ele. Ele da muegbe ọne iluemhin ọsi Anagbera ọbhi otọ.

17 Ọsemuan ki re, ọle bi etuegbe igbeva nesọle da vae bhi enin. 18 Ẹghe nin ele ki rẹ dotua nẹga itebu ha le ebale, Jesu da yọle: “Bhi ọsi ẹmhọanta, imẹn taman ibha ghe, ọkpa bhi ẹwẹ ibha ne deba imẹn ha le ebale dẹ mun imẹn khiẹn.” 19 Ọnan da wo manman ba ele bhi egbe, bhiriọ, ọdeọde bhi ẹwẹ ele da ha nọọn ọlẹn yọle: “Imẹn be nọn?” 20 Ọle da taman ele yọle: “Ọkpa bhi ẹwẹ ibha nọn, ọnọn deba imẹn ha le ebale bhi ukpamanku ọkpa. 21 Ọmọn nọnsi okpea dẹ fi ibha ya, beji a rẹ gbẹn ọlẹn ọbhi otọ rẹji ọle. Ọkpakinọn, ọkhọbhegbe hi ọsi ọne ọria nọn ha mun Ọmọn nọnsi okpea khiẹn! Ọ ha rẹ mhẹn nẹ nanlẹn sade a bha biẹ ọle hiehie.”

22 Beji ele sẹyẹ ha le ebale, ọle da re ibrẹd, nan erọnmhọn ọbhọ, yẹ khuẹnẹn ọlẹn an ne nin ele. Ọle da taman ele yọle: “Ibha miẹn; egbe nọnsẹmhẹn ọnan mundia nan.” 23 Sẹyẹ, ọle da mun ukpu anyọn. Ọle da nan erọnmhọn bhọ yẹ mun nin ele. Ele rebhe da wọn bhi ọne anyọn. 24 Ọle da taman ele yọle: “Ọnan mundia nin aranlẹn nọnsẹmhẹn, nọn yi ‘aranlẹn ọsi ọne akovẹn’ nan ha gbekua nin ẹbho ne bunbun. 25 Bhi ọsi ẹmhọanta, imẹn taman ibha ghe, imẹn iyẹ da wọn anyọn nan re ikperan ivain lu, rẹ sẹbhi ukpẹdẹ nin imẹn ha wọn anyọn ọsọgbọn bhi Agbejele nọnsi Osẹnobulua.” 26 Ele ki so illo* fo, ele da kpanọ ha khian Oke ọsi Oliv.

27 Jesu da taman ele yọle: “Urẹọbhọ nọnsẹbha rebhe dẹ wẹghẹ a,* ranmhude, a gbẹn ọlẹn yọle: ‘Imẹn dẹ gbehẹ ọne ọsun-ohuan, ene ihuan rebhe ki zagha a.’ 28 Ọkpakinọn, a ha riọ mẹn kpanọ bhi uu fo, imẹn ki kalo nin bha ha khian Galili.” 29 Ọkpakinọn, Pita da taman ọlẹn yọle: “Aharẹmiẹn urẹọbhọ ọsi enekẹle rebhe wẹghẹ a, ọsẹmhẹn ida wẹghẹ a.” 30 Jesu ki da taman ọlẹn yọle: “Bhi ọsi ẹmhọanta, imẹn taman uwẹ ghe, ẹlẹnan, ehe, bhi ọne ukpasọn nan, ọkuẹsẹ ọkpa viẹ bhi ọsi ugbazeva, igba ea uwẹ ha yọle ghe uwẹ bha lẹn imẹn.” 31 Ọkpakinọn, ọle da wọ yẹ ha yọle: “Aharẹmiẹn imẹn dẹ yu rẹkhan ẹn, imẹn ida tale ghe imẹn bha lẹn uwẹ.” Enekẹle rebhe da yẹ wo ha ta iriọ.

32 Ele da ki sẹbhi eji a tiọle Gẹtsimani. Ọle da taman edibo nesọle yọle: “Ibha dotua bhi enan nin imẹn dọ nan erọnmhọn.” 33 Ọle da re Pita, Jemis, bi Jọni rẹkhan egbe. Ọle da wo manman ha lu akhiẹ, yẹ manman ha kpokpo egbe. 34 Ọle da taman ele yọle: “Ọbalọ nin imẹn ye khian gbe imẹn an. Ibha debhi enan an, ibha ha yẹ ha babegbe.” 35 Ọle ki khian re odalo khere, ọle da de ọbhi otọ, yẹ ha nan erọnmhọn. Ọle da ha bhii ghe, sade emhin nọn ha ji a lu nọn, nin ọne ẹghe nan gbera ọle. 36 Ọle da yọle: “Aba,* a imiẹn ebi uwẹ isabọ lu; miẹn mẹn ọne ukpu* nan. Ọkpakinọn, ọ iyi iho nọnsẹmhẹn ha munsẹ, ji iho nọnsẹ munsẹ.” 37 Ọle ki fikiere, ọle da kere ghe ele wẹ. Ọle da nọọn Pita yọle: “Saimọn, owe uwẹ ye? Uwẹ bha zẹwẹ miẹn ahu rẹ deba imẹn ganẹdẹ na bhi uriagogo ọkpa? 38 Ibha wo ha babegbe, ibha ha yẹ wo ha nan erọnmhọn ẹghe rebhe, beji a ha da miẹn ghe ibha bha de ọbhi edọnmhẹn. Ẹmhọanta nọn ghe, ibha wo rẹ muegbe nin bha rẹ lu emhin nọn mhẹn, ọkpakinọn, efun nọnsẹbha wẹghẹ a.” 39 Ọle da gbo kpanọ dọ nan erọnmhọn, ọle da sẹyẹ ta ebi ọle ka ta. 40 Ọle ki gbo vae, ọle da kere ghe ele wẹ, ranmhude owe wo manman ha sun ele. Bhiriọ, ele bha lẹn ebi ele ha taman ọlẹn. 41 Ọle ki fikie vae ọsi ugba-ọzea, ọle da taman ele yọle: “Ẹghe nọn sẹ inian ibha rẹ ha wẹ yẹ koahua? Ọ sẹ riọ! Ọne ẹghe sẹle! Ghọle! A ho nan mun Ọmọn nọnsi okpea ọbhi obọ eria ne imhẹn. 42 Bha kpanọ, bha ji mhan ha khian. Ghọle! Ọnọn ha mun imẹn khiẹn dẹ kẹ sẹ enan.”

43 Bhi ọne ẹghe nin tee, beji ọle sẹyẹ ha talọ, Judas nin ọkpa bhi ene etuegbe igbeva da vae. Usun ẹbho ne muno agbada bi ukpokpo mhọnlẹn da rẹkhan ọlẹn vae. Ene ohẹn ne khua, ene man uhi, bi ene ewanlẹn je ele re. 44 Ejayenan nian, Judas nọn mun ọlẹn khiẹn ki ka taman ele yọle: “Ọria nọn hi ki rẹ khin nin imẹn ha re unun fiofio, ọle nọn; ibha mun ọlẹn, ibha ha re egbanegbe re ọle kpanọ.” 45 Ọle da wo khian bu Jesu re, yẹ yọle, “Rabai!” sẹyẹ, ọle da re unun fiofio ọle. 46 Bhiriọ, ele da mun ọlẹn yẹ re ọle kpanọ. 47 Ọkpakinọn, ọkpa bhi eria ne ha ribhi enin, da yo agbada nọnsọle a rẹ hian ehọ ọsi ọguọmhandia ọsi ojohẹn fia. 48 Jesu da nọọn ele yọle: “Imẹn ibha muno agbada bi ukpokpo rẹkhan egbe dọ mun bọsi oyi? 49 Ukpẹdẹ-ukpẹdẹ imẹn rẹ ha man emhin bhi uwa oga bhi eji ibha ye. Ibha bha mun mẹn ẹghenin. Sokpan, beji ẹmhọn nọn ribhi Ebenọnkhiale ha da munsẹ, ọle zẹle nin emhin da re inian sunu.”

50 Edibo nesọle rebhe da nẹgbe zẹ ọle obọ. 51 Ọkpakinọn, usẹn obhokhan ọkpa nọn re ukpọn linẹn ọsaje yọ rẹ gue eban nọnsọle, da fẹkẹ ha rẹkhan ọlẹn. Ele da rẹ ha guanọ nin ele mun ọlẹn. 52 Ọkpakinọn, ọle da zẹ ukpọn linẹn nọnsọle obọ nin ele, yẹ re eban-eban* nẹgbe.

53 Ele ki da mun Jesu ha khian isi ọne ojohẹn. Ene ohẹn ne khua rebhe, ene ewanlẹn bi ene man uhi da sikoko bhi enin. 54 Pita da fẹkẹ gban egbe kie yẹ rẹkhan Jesu bhi ikeke. Ọle da rẹkhan ọlẹn sẹbhi ẹgodo ọsi ọne ojohẹn. Ọle da deba eguọmhandia ne ribhi ọne uwa dotua ha gha eranlẹn. 55 Ejayenan nian, ene ohẹn ne khua, bi ọne ikotu Sanhẹdrin rebhe da ha guanọ ẹbho ne ha sọsali gbe Jesu, beji ele ha da gbe ọle a. Ọkpakinọn, ele bha miẹn emhin soso rẹ mun ọlẹn mhọnlẹn. 56 Ẹbho ne bunbun da gene dọ ha sọsali ohoghe gbe ọle, ọkpakinọn, ebi ele ha ta bha diẹn kugbe. 57 Sẹyẹ, ẹbho eso da kpanọ mundia ha sọsali ohoghe gbe ọle yọle: 58 “Imhan họn ghe ọle yọle, ‘Imẹn dẹ dunmhun ọne uwa oga nan nin eria re obọ bọn sotọ, imẹn ki re ikpẹdẹ ea bọn ọbhebhe nin eria bha re obọ bọn.’” 59 Arẹmiẹn ele ta ene emhin nan, ebi ele tale bha yẹ diẹn kugbe.

60 Bhiriọ, ọne ojohẹn da kpanọ mundia bhi ẹwẹ ele, yẹ ha nọọn Jesu yọle: “Uwẹ bha miẹn ebi uwẹ ha ta ọbhi ebi ele tale? Uwẹ bha be họn ebi ene ikpea nan ha ta uwẹ bhi egbe?” 61 Ọkpakinọn, ọle da huẹan. Ọle bha ta emhin soso. Ọne ojohẹn da gbo munhẹn ha nọọn ọlẹn ọta. Ọle da yọle: “Uwẹ be hi Kristi nin Ọmọn nọnsi Osẹnobulua nọn khiale?” 62 Jesu da wanniẹn ọlẹn yọle: “Ehe; Ibha dẹ daghe Ọmọn nọnsi okpea dotua bhi obera ọsi ọnọn mhọn ahu. Bha dẹ yẹ daghe ọle ghe ọle vade, ọle ki ha ribhi ẹkẹ adudu amẹn.” 63 Ọne ojohẹn ki họn ọnan, ọle da nyanghan ukpọn nọnsọle a, yẹ yọle: “Be imhan ki gbo ha guanọ ọsali ba? 64 Bha re ehọ nọnsẹbha họn ebi ọle rẹ re unun ji Osẹnobulua yẹ. Be a ha khian ọlẹn yẹ?” Ele rebhe da yọle ọ khẹke nan gbe ọle a. 65 Eso da munhẹn ha jiẹsẹn nyan ọlẹn. Ele ha gue ọle ẹlo, ele ki fi ọlẹn etin, yẹ taman ọlẹn yọle: “Taman imhan, họla fi uwẹ emhin!” Ene unakpa ne gbẹloghe ikotu ki fino ọle ubi fo, ele da mun ọlẹn kpanọ.

66 Ẹghe nin Pita rẹ ha ribhi ọne ẹgodo, ọmanmhẹn ọkpa nọn yi ọguọmhandia ọsi ọne ojohẹn da vae bhi enin. 67 Ọle ki daghe Pita bhi eji Pita da ha gha eranlẹn, ọle da ghe ọle ẹlo, yẹ taman ọlẹn yọle: “Ọkpa bhi ene rẹkhan Jesu nin obhi Nazarẹt uwẹ khin.” 68 Ọkpakinọn, ọle da sin. Ọle da yọle: “Imẹn bha lẹn ọlẹn, imẹn bha yẹ lẹn ebi uwẹ tẹmhọn ọlẹn.” Sẹyẹ, ọle da kpanọ ha khian obọ ọsi igeti. 69 Bhi enin, ọne ọmanmhẹn da gbo daghe ọle, yẹ munhẹn ha taman ẹbho ne ribhi enin yọle: “Ọkpa bhi edibo nesọle khọnan.” 70 Ọle da gbo ha sin. Obhi ẹghe khere ki gbera, ene ha ribhi enin da munhẹn ha taman Pita yọle: “Ọkpa bhi edibo nesọle uwẹ gene khin, ranmhude, obhi Galili uwẹ khin.” 71 Ọkpakinọn, ọle da munhẹn ha ve ihẹn yọle: “Imẹn bha lẹn ọne okpea nan nin bha tẹmhọn ọlẹn!” 72 Bhi ọne ẹghe nin tee, ọkpa da viẹ ọsi ugba-ọzeva. Pita da yere ebi Jesu taman ọlẹn, ẹghe nọn rẹ yọle: “Ọkuẹsẹ ọkpa viẹ bhi ọsi ugba-ọzeva, igba ea uwẹ ha yọle ghe uwẹ bha lẹn imẹn.” Bhiriọ, ọle da gbe eviẹ a.

15 Ẹdẹ ki wo we, ene ohẹn ne khua, ene ewanlẹn bi ene man uhi, rẹ sẹbhi ọne ikotu Sanhẹdrin rebhe, da do ikolo. Ele da gba Jesu obọ, yẹ re ọle kpanọ ha bu Pailet. 2 Pailet da ki nọọn ọlẹn yọle: “Uwẹ be hi Ojie ọsi ibhokhan Ju?” Ọle da wanniẹn ọlẹn yọle: “Ọle uwẹ ta riọ.”* 3 Ọkpakinọn, ene ohẹn ne khua da wo ha bha ohoghe kẹkẹ ọle bhi uhọnmhọn. 4 Pailet da gbo munhẹn kie ha nọọn ọlẹn ọta. Ọ da nọọn ọlẹn yọle: “Uwẹ bha miẹn ebi uwẹ ha ta ọbhi ọne ẹmhọn nan? Uwẹ bha be họn emhin ne bunbun nin ele ta uwẹ bhi egbe?” 5 Ọkpakinọn, Jesu bha yẹ wanniẹn ọlẹn. Ọnan da wo han Pailet ilo.

6 Ẹghe rebhe nin ele rẹ lu iluemhin ọsi Anagbera, ọle Pailet rẹ fan onighan ọkpa fia nin ele, ọnọn hi ki rẹ khin nin ele guanọ. 7 Bhi ọne ẹghe nin, okpea ọkpa natiọle Barabas bi eria ebhebhe ne sọtẹ da ene gbẹloghe da ha ribhi ighan. Ele bhọ gbugbele ẹghe nin ele rẹ sọtẹ. 8 Bhiriọ, ene usun ẹbho da vae dọ taman Pailet nin ọle lu ebi ọle ka lu khẹ nin ele. 9 Ọle da nọọn ele yọle: “Ibha be guanọ nin imẹn fan ọne Ojie ọsi ibhokhan Ju fia nin ibha?” 10 Pailet lẹnmhin ghe, ikhu nin ene ohẹn ne khua mhọn da Jesu, ọle zẹle nin ele da mun ọlẹn re. 11 Ọkpakinọn, ene ohẹn ne khua da ha sua ene ẹbho ọbhọ, ne taman ọlẹn nọn fan Barabas fia nin ele. 12 Pailet da ki nọọn ele yọle: “Be ibha ki yọle nin imẹn khian ọne okpea nan yẹ, nin bha yọle ọle hi Ojie ọsi ibhokhan Ju?” 13 Ele da gbo kie reso yọle: “Khan ọlẹn ọbhi oran!” 14 Pailet da ki nọọn ele yọle: “Bezẹle? Emhin ebe nela ọle lu?” Ele da kie manman ha so yọle: “Dọ khan ọlẹn ọbhi oran!” 15 Ranmhude Pailet guanọ nin ọle lu ebe ha ti ene ẹbho bhọ, ọle da fan Barabas fia nin ele. Ọle da yọle nan re asan gbe Jesu. A ki gbe ọle fo, ọle da mun ọlẹn nin egbanegbe nin ele dọ gbe ọle a.

16 Ene egbanegbe da re Jesu nabhi azagba nọn ribhi uwa ọsi ọne gọvanọ. Ele da yẹ tie egbanegbe nekẹle rebhe re. 17 Ele da mun ukpọn nọn mhọn alo ipọpo* yọ ọle, yẹ re igbẹn do ukparu ojie mun ọle bhi uhọnmhọn; 18 Ele da munhẹn ha tuẹ ọle yọle: “Zaiki, uwẹ nin Ojie ọsi ibhokhan Ju!” 19 Ele da yẹ re ukpokpo rẹ ha fi ọle emhin bhi uhọnmhọn, yẹ ha tuẹsẹn nyan ọlẹn. Ele da yẹ diguẹ ha debhẹre nanlẹn. 20 Ele ki re ọle zọojiẹ fo, ele da kuọ ọne ukpọn nọn pọpo* si ọle bhi egbe re, yẹ ne ukpọn nesọle yọ ọle. Ele da yẹ re ọle kpanọ ha khian eji ele ha da khan ọlẹn ọbhi oran. 21 Ele ki miẹn okpea ọkpa nọn ha na okhian vade, ele da taman ọlẹn nọn mun oran* nan ha khan Jesu ọi. Saimọn a tie ọne okpea nan. Obhi agbaẹbho ọsi Sairini ọle khin. Ọle hi aba Alẹzẹnda bi Rufọs.

22 Ele da ki mun Jesu vae bhi eji a tiọle Gọgota. Ebi ọ mundia nan hi, “Isi Uguẹ-uhọnmhọn.” 23 Bhi enan, ele da ha guanọ nin ele mun anyọn nan re ikhunmhun natiọle mai* rẹ gua nanlẹn wọn. Ọkpakinọn, ọle bha ka wọn ọlẹn. 24 Ele da khan ọlẹn mun oran, yẹ gha ukpọn nin ọle yọ ke okhun. Ele da fi onolo ọbhọ rẹ lẹn ebi ele ha rẹ gha ọle yẹ. 25 Egbẹghe agogo isinlin* bhi ọsewewiẹ ọ ha ye, ẹghe nin ele rẹ khan ọlẹn ọbhi oran. 26 Nan rẹ rẹman emhin-ebe nan yọle ghe ọle lu, a da gbẹn yọle: “Ojie ọsi ibhokhan Ju.” 27 Rẹ deba ọnin, a da khan oyi eva ọbhi oran sikẹ ọle. Ọkpa da ha ribhi obera nọnsọle, ọnọnkẹle da ha ribhi obọ agobọ nọnsọle. 28* —— 29 Sẹyẹ, eria ne ha gbera da ha re unun ji ọle yẹ fieghe uhọnmhọn yọle: “Uwẹ nọn yọle uwẹ dẹ dunmhun uwa oga sotọ yẹ re ikpẹdẹ ea bọn ọlẹn, 30 hinmhin egbe ẹ, huẹnre bhi okhun oran* nan khan uwẹ ọi.” 31 Iriọ ene ohẹn ne khua, bi ene man uhi yẹ rẹ ha zuọzuọ ọle. Ele da ha yọle: “Ọle sabọ hinmhin ẹbho ebhebhe, ọkpakinọn, ọle bha sabọ hinmhin egbe ọle! 32 Ahamiẹn ọle hi Kristi, nin Ojie ọsi Izrẹl, ji ọle huẹnre bhi okhun oran* nan khan ọlẹn ọi, beji imhan ha da daghe ọle yẹ rẹọ ọle bhọ.” Ene ikpea nan khan ọbhi oran sikẹ ọle bhọ da yẹ ha re unun ji ọle.

33 Ọ ki ha ribhi agogo igbeva* bhi ọsodanmhẹn, ebiuki da so bhi ọne agbaẹbho rebhe, rẹ dọ sẹbhi agogo ea* bhi ọsodanmhẹn. 34 Ọ ki ha ribhi agogo ea bhi ọsodanmhẹn, Jesu da reso yọle: “Ẹli Ẹli lama sabaktani?” Ebi ọnan mundia nan hi: “Osẹnobulua nọnsẹmhẹn, Osẹnobulua nọnsẹmhẹn, bezẹle nin uwẹ da mun imẹn fia?” 35 Ẹbho eso ne ha ribhi enin ki họn ọnan, ele da ha yọle: “Ghọle! Ọ tie Ẹlaija.” 36 Otuọnkpa da ki runẹ dọ mun ihiọn* ruarua bhi ẹkẹ anyọn nọn muokhe. Ọle da diẹn ọne ihiọn mun ukpokpo yẹ mun nanlẹn wọn. Ọle da yọle: “Ibha zọbọ! Nan fẹghe si Ẹlaija dẹ dọ hinmhin ọlẹn.” 37 Ọkpakinọn, Jesu da manman so dagbare, yẹ hiẹnhiẹn sotọ. 38 Ukpọn nan rẹ wa eje khiale a bhi uwa oga, da sọ yi eva rẹ na bhi okhun ọlẹn rẹ sẹbhi otọ ọle. 39 Ẹghe nin ọwanlẹn ọsi ene eyokhọnlẹn nọn mundia sikẹ enin rẹ daghe ebe sunu beji Jesu yu, ọle da yọle: “Ọmọn nọnsi Osẹnobulua ọne okpea nan gene khin.”

40 Ikhuo eso da yẹ ha ribhi enin ne gban egbe fia ha ghe ebe sunu. Eso bhi ẹwẹ ele hi Meri Madalin, Salomi, bi Meri nin inẹn Josẹs bi Jemis nin Khere. 41 Ene ikhuo nan wo ha rẹkhan ọlẹn yẹ rẹkpa ọle ẹghe nin ọle rẹ ha ribhi Galili. Ikhuo ebhebhe ne bunbun da yẹ ha ribhi enin ne rẹkhan ọlẹn vae bhi Jerusalẹm.

42 Beji a miẹn emuan fẹkẹ ha sire, sẹyẹ ukpẹdẹ nan rẹ muegbe Sabati ọbhi otọ nọn, ranmhude ẹdẹ nọn rẹkhan ọlẹn hi Sabati, 43 Josẹf nin obhi Arimatia da vae. Ọria nan manman mun ekpẹn nan bhi ikotu Sanhẹdrin ọle khin. Ọle tobọle bhọ yẹ wo ha khẹ Agbejele nọnsi Osẹnobulua. Ọle da re izebhudu bu Pailet dọ taman ọlẹn nọn mun ekuegbe nọnsi Jesu nanlẹn. 44 Ọkpakinọn, Pailet da ha riale si Jesu sẹ gene yu. Bhiriọ, ọle da tie ọne ọwanlẹn ọsi ene eyokhọnlẹn, yẹ nọọn ọlẹn si Jesu yu fo. 45 Ọne ọwanlẹn ọsi ene eyokhọnlẹn ki taman ọlẹn ghe Jesu yu fo, ọle da ji Josẹf da dọ mun ọne ekuegbe. 46 Josẹf da dẹ ukpọn linẹn nọn mhọn-ose, yẹ mun ekuegbe nọnsi Jesu huẹnre bhi okhun oran. Ọle da re ọne ukpọn linẹn rẹ gbanọ ọlẹn, yẹ dọ re ọle tọ bhi idin nin ọle hian ọbhi ẹkẹ udo. Ọle da yẹ re udo rẹ gue unun ọsi ọne idin. 47 Ọkpakinọn, Meri Madalin bi Meri nin inẹn Josẹs da sẹyẹ debhi enin an ha ghe eji a da re ọle tọ.

16 A ki lu Sabati fo, Meri Madalin, Meri nin inẹn Jemis, bi Salomi da dọ dẹ emhin nọn vin-ohin, nin ele ha rẹ gbo ekuegbe nọnsi Jesu. 2 Bhi ọsewewiẹ bhi ukpẹdẹ ọhẹnhẹn bhi ọne uzana,* beji oẹnlẹn wo ha hẹnre, ele da sẹbhi ọne idin. 3 Ele da ha nọọn egbe ele yọle: “Họla ha rẹkpa imhan wẹnẹ udo nọn ribhi unun ọsi ọne idin sibhọre?” 4 Ọkpakinọn, ele ki khua ẹlo okhun, ele da daghe ọle ghe, a wẹnẹ ọne udo sibhi enin re fo, arẹmiẹn ọne udo wo manman kpọnọ. 5 Ele ki nabhi ẹkẹ eji a da re ọle tọ, ele da miẹn okpea ọkpa nọn yọ ukpọn nọn fua, nọn dotua bhi obera ọsi ọne idin. Ọnan da wo re iziziko mun ele. 6 Ọne okpea da taman ele yọle: “Bha hẹi ji ofẹn mun bha. Imẹn lẹnmhin ghe Jesu nin obhi Nazarẹt nan gbe a bhi okhun oran ọle ibha guanọ. A riọ ọle kpanọ bhi uu. Ọle iribhi enan. Ghe eji ekuegbe nọnsọle rẹ ha yẹ. 7 Ibha ha khian dọ taman Pita bi edibo nesọle, ‘Ọle khian Galili, ibha dẹ ka ọle re bhi enin beji ọle taman ibha.’” 8 Ele ki dagbare, ele da nẹ sibhi ọne idin re. Oriri da gbe kuọ ele. Ele bha ne ọria soso talọ, ranmhude, ofẹn da wo manman ha mun ele.*