ILLO ỌSI SOLOMỌN
1 Illo nan bha sẹ ka miẹn egbe ọle khẹ nin Solomọn gbẹn:
2 “Mun mẹn unun fiofio,
Ranmhude oyẹẹ nin uwẹ rẹ man mẹn mhẹn gbera anyọn.
3 Abhii nin uwẹ rẹ gbo wo manman vin-ohin.
Elin nọnsẹ diabe abhii nọn vin-ohin nan rẹ gbo uhọnmhọn.
Ọnan zẹle nin ene imanmhẹn da hoẹmhọn ẹn.
4 Re mẹn rẹkhan egbe; ji mhan nẹgbe.
Ọnojie re mẹn nabhi ẹkẹ ugha nọnsọle!
Ji mẹn bi uwẹ ko ha ghọnghọn yẹ sọnyẹnmhẹn.
Nin mhan rẹ ha tẹmhọn anyọn, ji mhan tẹmhọn oyẹẹ nin uwẹ rẹman.
Ọnan zẹle nin ene imanmhẹn da hoẹmhọn ẹn.
5 Eo imanmhẹn ọsi Jerusalẹm,* arẹmiẹn mẹn bhihi,* mẹn sẹyẹ wo mhọnse,
Inian mẹn diabe ibọkpọ ọsi Kida, sẹyẹ, inian mẹn diabe ukpọn-ibọkpọ ọsi Solomọn.
6 Ibha bha yẹ ka re ẹlo si mẹn bhi egbe re ranmhude nin mẹn rẹ bhihi.*
Ovuẹn re inian bhihi mẹn egbe a.
Ranmhude nin ibhio mẹn nin ikpia rẹ ha khọẹkẹ mẹn,
Ele da je imẹn nin mẹn dọ ha gbẹloghe ugbo eran anyọn,*
Mẹn bhọ bha sabọ gbẹloghe ọsẹmhẹn.
7 Ọsun-ohuan nin mẹn manman hoẹmhọnlẹn,
Taman mẹn eji uwẹ da re ihuan nesẹ kọn,
Bi eji uwẹ da re ele nowẹ sade ovuẹn manman zẹ ọsodanmhẹn.
Bezẹle nin mẹn a ki da dọ ha khian bhi ẹwẹ ihuan ọsi imọẹ ẹ,
Yẹ re ukpọn gue ẹlo bọsi okhuo nin ọria nọnsọle yu?”
8 “Eo, ọmanmhẹn nọn manman mhọnse, ahamiẹn uwẹ bha lẹn eji ọne ọsun-ohuan diọ i,
Dọ rẹkhan eji ene elanmhẹn khian rẹkhan,
Uwẹ ha dọ re ẹbhe* nesẹ kọn sikẹ eji ibọkpọ ọsi ene re ohuan kọn ye.”
9 “Eo ọne imẹn hoẹmhọnlẹn, inian uwẹ diabe akasi nọn mhọnse* bhi ẹwẹ ene akasi ne si awẹnẹwẹnẹ nesi Fero.
10 Ileghe nin uwẹ ne ọbhi ehọ* ne rẹso agban nọnsẹ re uwẹ mhọnse a.
Sẹyẹ ileghe nin uwẹ sẹn ọbhi urulu, re uwẹ mhọnse a.
11 Mhan dẹ re igolu lu ebi a rẹ ho ose* nin uwẹ,
Yẹ re ileghe nan re isiliva lu rẹ gua ọle.”
12 “Beji ọne ojie dotua bhi isi tebu nọnsọle,
Abhii* nin mẹn rẹ gbo da wo ha viohin.
13 Inian ọne mẹn hoẹmhọnlẹn sikẹ mẹn bii ẹkpa mai* nọn viohin,
Nin mẹn mun ọbhi uke udu nowẹ na ẹdẹ we.
15 “Ọne imẹn hoẹmhọnlẹn, ghọle, uwẹ manman mhọnse!
Ghọle, uwẹ mhọnse gbe! Ẹlo nọnsẹ diabe ọsi idulu.”
16 Ọne imẹn hoẹmhọnlẹn, ghọle, uwẹ mhọnse gbe, iriọ ẹmhọn ẹn yẹ rẹ yẹẹ mẹn.
Uke ilunmhun mhan da ko nowẹ.
17 Eran isida mhan rẹ mun okhun uwa mhọn,
Sẹyẹ, eran junipa mhan rẹ khan uwa.
2 “Bọsi aroro nọn jẹre bhi ẹkẹ igbẹn,
Iriọ ọne imẹn hoẹmhọnlẹn dia bhi ẹwẹ imanmhẹn nekẹle.”
3 “Beji eran apo rẹ dikẹ bhi eran nekẹle ne ribhi ẹgbo,
Iriọ ọne imẹn hoẹmhọnlẹn rẹ dikẹ bhi ẹwẹ ene usẹn-ikpia.
Ọ manman wo yẹẹ mẹn rẹ ha ribhi eji ọle ye, beji ọ rẹ yẹẹ ọria rẹ ha ribhi eji ọfu ye,
Sẹyẹ, beji ọ rẹ yẹẹ ọria rẹ ha le ikperan nọn mhẹn bhi unun, iriọ ẹmhọn ọlẹn rẹ yẹẹ mẹn.
4 Ọle da re mẹn re bhi eji a da le ebale yẹ da anyọn,*
Ọle da re oyẹẹ rẹ gugu mẹn.
5 Re keki nan re rezin lu nin mẹn le beji egbe ha da fu mẹn re;
Re apo nin mẹn, nin ahu da do mẹn bhọ,
Ranmhude egbe i yẹ ri mẹn bhọ nin mẹn rẹ ha ria ẹmhọn oyẹẹ nọnsẹ.
6 Ọle kinọ obọ agobọ nọnsọle mẹn bhi urulu,
Yẹ re obera nọnsọle rẹ mun mẹn koko re.
7 Eo, imanmhẹn ọsi Jerusalẹm,*
Bha re uzo bi ẹruẹ ne ribhi ẹwẹ rẹ ve ihẹn ọbhọ ghe,
Ibha i da re imẹn ha ria ẹmhọn okpia sade ọne ẹghe bha sẹ sẹ.
8 Ukpuru ọsi ọne imẹn hoẹmhọnlẹn khọnin!
Ghọle! Ọle vade.
Ọle hẹn ene oke yẹ san ele huẹnre.
9 Inian ọne imẹn hoẹmhọnlẹn mhọnse a bii ẹruẹ,* ehe, ọle diabe obhi ẹruẹ nọn sasa.
Ghe ọle bhi enin, ọle re egbe gọ egbuwa nọnsẹmhan,
Ọle na iwindo ghe ẹkẹ uwa,
Ehe, ọle nabhi uhio iwindo ghe ẹkẹ uwa.
10 Ọne imẹn hoẹmhọnlẹn taman mẹn yọle:
‘Kpanọ mundia, ọne imẹn hoẹmhọnlẹn,
Ọmanmhẹn nọnsẹmhẹn nọn mhọnse, vae nin mhan ha khian.
11 Ghọle! Ẹghe orọ gbera.
Amẹn i yẹ rọlọ.
12 Aroro sọnọ re bhi otọ nọnsẹmhan,
Ẹghe nan rẹ jaja ikpabọ-eran ivain a ki ye,
Sẹyẹ, a họn usomhin ọsi idulu bhi otọ nọnsẹmhan.
13 Ikpẹ ọhẹnhẹn nin eran fig mọn munhẹn ha bholo;
Eran anyọn* gbeghọn, sẹyẹ ene eghọn viohin.
Kpanọ mundia ọne imẹn hoẹmhọnlẹn, uwẹ ha vae.
Ọmanmhẹn nọnsẹmhẹn nọn mhọnse, vae nin mhan ha khian.
14 Eo idulu nọnsẹmhẹn, uwẹ nọn dọ nẹko
bhi ẹkẹ uhio ne ribhi udo,
Ji mẹn daghe uwẹ yẹ ji mẹn họn ukpuru nọnsẹ,
Ukpuru nọnsẹ manman mhẹn mẹn bhi ehọ, iriọ uwẹ yẹ rẹ mhọnse.’”
15 “Ne mhan mun ene alabe,*
Ene ikuẹkuẹ alabe ne riia ugbo eran anyọn* nọnsẹmhan an,
Ranmhude eran anyọn nọnsẹmhan gbeghọn.”
16 “Beji ọne imẹn hoẹmhọnlẹn rẹ yi ọsẹmhẹn, iriọ mẹn yẹ rẹ yi ọsọle.
Ọle re ihuan kọn bhi ẹwẹ nin a da miẹn aroro.*
17 Ọkuẹsẹ ahoho munhẹn ha fi, la, ọkuẹsẹ ẹdẹ gbanọn an,
Jẹje fikiere, eo, ọne imẹn hoẹmhọnlẹn.
Bọsi uzo bi ẹruẹ, fan ene oke* ra ne wa mẹn bi uwẹ a.”
3 “Beji mẹn ha ribhi uke ibẹd bhi ọsasọn,
Mẹn da ha guanọ ọne imẹn hoẹmhọnlẹn.
Mẹn rẹ guanọ ọlẹn, mẹn bha miẹn ọlẹn.
2 Mẹn lẹn ebi mẹn ha lu yẹ;
Mẹn dẹ kpanọ dọ guanọ ọle nẹga bhi ọne agbaẹbho,
Mẹn dẹ guanọ ọne imẹn hoẹmhọnlẹn diọbhi ughe bi ene uwedẹ.
Ọkpakinọn, mẹn rẹ guanọ ọlẹn, imẹn bha miẹn ọlẹn.
3 Ene khẹ ughe ne ha khian nẹga ọne agbaẹbho da miẹn imẹn,
Mẹn da nọọn ele yọle: ‘Ibha be miẹn ọne imẹn hoẹmhọnlẹn?’
4 Beji mẹn wo la gbera ele,
Mẹn da miẹn ọne imẹn hoẹmhọnlẹn;
Mẹn da gba ọle mun mhọn, mẹn bha ka zẹ ọle obọ.
Mẹn da re ọle vae bhi uwa ọsi inẹn mẹn,
Ehe, ẹkẹ ugha ọsi ọnọn biẹ mẹn.
5 Eo, imanmhẹn ọsi Jerusalẹm,*
Bha re uzo bi ẹruẹ ne ribhi ẹwẹ rẹ ve ihẹn ọbhọ ghe,
Ibha i da re imẹn ha ria ẹmhọn okpia sade ọne ẹghe bha sẹ sẹ.”
6 “Be bhọ khọnan nọn na bhi ojẹgbo vade bii ighogho nọn tue,
Nọn viohin bii mai* bi frankisẹns,*
Bi emhin kẹkẹ ne viohin nin ene do ẹki khiẹn?”
7 “Sẹ ghe! Agala nin Solomọn rẹ dotua nọn.
Eyokhọnlẹn egbọ ea* ne ziẹnlẹn ọsi Izrẹl,
Ele nẹga ọle.
8 Ele rebhe muno agbada mhọn,
Ele wo guẹ ebi a rẹ khọnlẹn yẹ.
Ọdeọde bhi ẹwẹ ele re agbada nọnsọle ọbhi ẹkpa-efẹn
Nin ele rẹ gbega ọnojie bhi ọsasọn.”
9 “Agala* ọsi Solomọn nin Ojie nọn.
Eran nan miẹn bhi Lẹbanọn ọle rẹ kanọ ọlẹn nin egbọle.
10 Isiliva a rẹ lu ikazi ọsi ọne aga,
A da re igolu lu eji a da re egbe gọ bhọ.
11 “Eo, ikhuo Zaiyọn,* bha dagbare,
Bha dọ ghe Solomọn nin ojie.
Ọle mun ukparu nan re aroro do ru; ukparu nin inẹn ọlẹn lu nanlẹn
Bhi ọne ukpẹdẹ nin ọle re okhuo,
Bhi ukpẹdẹ nin ọkhọle nọnsọle manman ha ghọnghọn.”
4 “Ọne imẹn hoẹmhọnlẹn, ghọle, uwẹ manman mhọnse!
Ghọle, uwẹ mhọnse gbe!
Ẹlo nọnsẹ diabe ọsi idulu bhi ẹkẹ ukpọn nin uwẹ rẹ gue ẹlo.
Inian eto nọnsẹ na fia bii usun ẹbhe
Ne rẹ gbe usun ha kpono huẹnre bhi oke ọsi Giliẹd.
2 Akọn nesẹ wo fua kua bọsi ihuan
Nan wo la gbẹn ilọn si ele bhi egbe re yẹ khọ a,
Ele rebhe wo sẹn kugbe nọnsẹn,
Sẹyẹ, ọsoso i ribhọ nọn yulu a.
3 Inian ikpabunun nọnsẹ diabe olu nọn gian.
Uwedẹ nin uwẹ rẹ talọ yẹ wo yẹẹ mẹn.
4 Inian urulu nọnsẹ diabe uwa nọn yoyo ọsi Devid,
Nan mhanmhan udo rẹ bọn nọnsẹn,
Yẹ muno ugue ọsi eyokhọnlẹn rọ bhọ,
Ehe, ugue ne dia kholobo ọsi eyokhọnlẹn ne manman mhọn ahu.
5 Inian inyẹn nesẹ veva
Diabe ibhi ẹruẹ nan biẹ ele ibiava,
Ne le ebale bhi ẹwẹ nin a da miẹn aroro.”*
6 “Ọkuẹsẹ ahoho munhẹn ha fi, la, ọkuẹsẹ ẹdẹ gbanọn an,
Mẹn dẹ ha khian oke nin a da miẹn mai*
Bi oke nin a da miẹn frankisẹns.”*
7 “Eo, ọne imẹn hoẹmhọnlẹn, uwẹ mhọnse gbe,
Okan i ri uwẹ bhi egbe.
8 Ji mhan ko sibhi Lẹbanọn re, Eo, okhuo mẹn!
Sẹ rẹkhan mẹn sibhi Lẹbanọn re.
Huẹnre bhi uke oke ọsi Amena*
Huẹnre bhi uke oke ọsi Sinia, ehe, uke oke ọsi Hamọn,
Bhi eji ene oduman bi ene obidọn* dia.
9 Eo, okhuo mẹn nin mẹn hoẹmhọnlẹn, ẹmhọn ẹn ọkpa mẹn ki wo ria ẹmhọn ọlẹn ẹghe rebhe,
Osukpa nin mẹn daghe ẹ, ẹmhọn ẹn da wo vẹ mẹn bhi uhọnmhọn,
Sẹyẹ, ileghe nọn mhọnse nin uwẹ re ọbhi urulu re ẹmhọn ẹn yẹẹ mẹn.
10 Eo, okhuo mẹn nin mẹn hoẹmhọnlẹn, oyẹẹ nin uwẹ rẹman mẹn wo manman ti mẹn bhọ!
Oyẹẹ nin uwẹ rẹman mẹn bhọ mhẹn gbera anyọn,
Sẹyẹ, a bha miẹn abhii nọn viohin sẹ bii abhii nin uwẹ rẹ gbo!
11 Eo, okhuo mẹn, ikpabunun nọnsẹ niẹnniẹnmhin bii amẹn-ẹlọn ọsaje.
Amẹn-ẹlọn bi miliki ri uwẹ bhi olanmhẹn.
Ukpọn nọnsẹ viohin bii ẹgbo nọn ribhi Lẹbanọn.
12 Eo, okhuo mẹn nin mẹn hoẹmhọnlẹn, inian uwẹ diabe ugbo nan gba ogba nẹga,
Sẹyẹ, inian uwẹ diabe amẹn nọn ribhi omin nan guele.
13 Ogba* nọnsẹ mhọnse a bii ogba nin eran pomẹgranet* vuọn,
Nọn mọn ikpẹ nin egbe gba nan, sẹyẹ, nin ilunmhun ọsi hẹna* bi spaiknad* ye.
14 Ilunmhun natiọle spaiknad, keni,* bi aroro natiọle safrọn* ribhi ọne ogba.
Sẹyẹ, sinamọn,* bi unan eran kẹkẹ nan da miẹn frankisẹns, mai, alo,*
Bi ebe bi ilunmhun kẹkẹ ne manman viohin yẹ ribhi ọne ogba.
15 Inian uwẹ diabe amẹn nọn nẹ dagbare bhi ẹkẹ udo nọn ribhi ẹkẹ ogba,
Bi omin nọn mhọn amẹn nọn khiakhia a,
Sẹyẹ, inian uwẹ diabe ẹdẹ nọn nẹ vade bhi Lẹbanọn.
Fẹkẹ fi ku ọbhi emhin nin mẹn kọ bhi ogba nọnsẹmhẹn,
Beji ebi mẹn kọle ha da ha viohin bhi ijerebhe.”
“Ji ọne imẹn hoẹmhọnlẹn vae bhi ẹkẹ ogba nọnsọle
Nin ọle dọ le ikperan nin egbe gba nan.”
5 “Eo okhuo mẹn nin mẹn hoẹmhọnlẹn,
Imẹn nabhi ogba nọnsẹmhẹn.
Imẹn dọ kọnọ ebe mai nọnsẹmhẹn, bi ene ilunmhun kẹkẹ ne viohin.
Imẹn nanọ amẹn-ẹlọn nọnsẹmhẹn yẹ le ihianmhẹn ọlẹn;
Imẹn yẹ wọn anyọn bi miliki nọnsẹmhẹn.”
“Bha le ebale imọẹ nesẹmhẹn!
Bha re oyẹẹ man egbe sẹbhọ ghe ọ ki ha mun bha bọsi ghe bha da anyọn!”
2 “Beji mẹn wẹ, mẹn da ha bhohiẹ.
Bhi ẹkẹ ọne ebhohiẹ mẹn da họn ghe ọne imẹn hoẹmhọnlẹn so obọ bhi odẹ!
Ọle da yọle, ‘Ọne imẹn hoẹmhọnlẹn tuje odẹ a nin mẹn,
Uwẹ nin idulu nọnsẹmhẹn nin okan i ri ọle bhi egbe!
Ranmhude ebhu bhu* nyan mẹn,
Sẹyẹ eto nọnsẹmhẹn fuọfuọ a ranmhude ebhu nọn bhu nyan mẹn bhi ọsasọn.’
3 Ọ kẹ mẹn kuọ ukpọn fo,
Mẹn i yẹ da sabọ ne ele yọ.
Ọ kẹ mẹn kpe oẹ a fo,
Mẹn i yẹ da sabọ muno oẹ ọbhi otọ.
4 Ọne imẹn hoẹmhọnlẹn da ki re obọ sibhi odẹ re,
Bhiriọ mẹn da ki ha ria ẹmhọn ọlẹn.
5 Mẹn da kpanọ dọ tuje odẹ a nin ọne imẹn hoẹmhọnlẹn;
Abhii ọsi mai* da wo vuọn obọ nọnsẹmhẹn, rẹ sẹbhọ ghe,
Ọ da ha nọnọn kua bhi ikpẹn-obọ nesẹmhẹn;
Ọ bhọ da nabhi obọ ọsi ọne odẹ.
6 Mẹn ki tuje odẹ a nin ọne imẹn hoẹmhọnlẹn,
Ọle bha yẹ ha ribhi enin, ranmhude ọle kpanọ.
Ọ da wo ba mẹn bhi egbe ghe ọle kpanọ.*
Mẹn rẹ guanọ ọlẹn, mẹn bha miẹn ọlẹn.
Mẹn rẹ sotie ọle, ọle bha wanniẹn mẹn.
7 Ene khẹ ughe ne nẹga ọne agbaẹbho ọsasọn ki miẹn mẹn,
Ele da fi mẹn emhin, ele da kuan mẹn.
Ene ikpia ne khẹ ogbe ọsi ọne agbaẹbho da re ukpọn nin mẹn rẹ gue uhọnmhọn si mẹn bhi uhọnmhọn re.
8 Eo, imanmhẹn ọsi Jerusalẹm,* bha ve ihẹn ọbhọ ghe,
Bha ha miẹn ọne imẹn hoẹmhọnlẹn,
Ibha dẹ taman ọlẹn ghe ẹmhọn ọlẹn vẹ mẹn bhi uhọnmhọn.”
9 “Uwẹ nin ọmanmhẹn nọn manman mhọnse,
Be ọne uwẹ hoẹmhọnlẹn rẹ mhẹn gbera ikpia nekẹle yẹ?
Be bhọ ọle rẹ gene mhẹn gbera ikpia nekẹle,
Nọn zẹle nin uwẹ da yọle nin mhan ve ihẹn ọbhi emhin nọn sẹriọ?”
10 “Ọne imẹn hoẹmhọnlẹn manman mhọnse, iriọ egbe yẹ rẹ gba nanlẹn;
Bhi ẹwẹ ikpia uli igbe,* a bha miẹn ọnọn diabe ọle.
11 Inian uhọnmhọn nọnsọle diabe igolu, igolu nọn ki sẹ mhẹn nẹ,
Inian eto nọnsọle diabe ikpilanmhẹn nin ahoho mun-yo-mun-re,*
Ehe eto nọnsọle bhihi a bii akhuankhuan.*
12 Ẹlo nesọle diabe idulu ne ribhi egbe ẹdẹ
Bi idulu ne khọ a bhi ẹkẹ miliki,
Ehe, bọsi idulu ne mundia bhi eji amẹn da nẹ koko.
13 Agban* nọnsọle diabe egua nan kọ ilunmhun ne viohin ọi,
Tee, ọ diabe egua nan kọ ebe bi ilunmhun ne viohin ọi
Ikpabunun nọnsọle mhọnse a bii aroro. Abhii nan re mai lu nọnọn kua bhọ.
14 Igolu a rẹ man ikpẹn-obọ nesọle, a da re krisolait* rẹ lu ihiẹn-obọ nesọle.
Ẹkpa-ẹkẹ nọnsọle diabe akọn-enin nan re emhin gbo nọn ha fi wanlan-wanlan, nan yẹ re safaya* rẹ ho ọle ose.
15 Oẹ nesọle diabe ikazi nan re mabo* lu, sẹyẹ, igolu nọn ki sẹ mhẹn nẹ a rẹ lu ayotọ nan muno ene ikazi ọi.
Inian ọle mhọnse a bii otọ ọsi Lẹbanọn, ọle wo tan sibhi otọ re bii eran sida.
16 Unun nọnsọle bhọ niẹnniẹnmhin,
Sẹyẹ, emhin rebhe rẹji ọle ti mẹn bhọ.
Eo, imanmhẹn ọsi Jerusalẹm,* ọnan hi ọne imẹn hoẹmhọnlẹn, nin ẹmhọn ọlẹn ti mẹn bhọ.”
6 “Eo, okhuo nọn manman mhọnse,
Ejela ọne uwẹ hoẹmhọnlẹn diọ i?
Taman mhan obọ nin ọle diọ i
Beji mhan ha da deba uwẹ guanọ ọlẹn?”
2 “Ọne imẹn hoẹmhọnlẹn diọbhi ogba nọnsọle,
Ọle diọbhi ogba nin ilunmhun ne viohin ye,
Nin ọle dọ gbẹloghe ihuan nesọle bhi enin
Yẹ rọ aroro.*
3 Beji ọne imẹn hoẹmhọnlẹn rẹ yi ọsẹmhẹn,
Iriọ mẹn yẹ rẹ yi ọsọle.
Ọle re ihuan kọn bhi ẹwẹ nin a da miẹn aroro.”*
4 “Ọne imẹn hoẹmhọnlẹn, inian uwẹ mhọnse a bii otọ ọsi Tiẹza,
Yẹ mhọnse a bii Jerusalẹm.
Inian uwẹ mhẹn bhi ẹlo a bii usun eyokhọnlẹn ne muegbe okhọnlẹn.
5 Re ẹlo si mẹn bhi egbe re,
Ranmhude, uwẹ re ẹkhọle lo mẹn.
Inian eto nọnsẹ na fia bii usun ẹbhe
Ne rẹ gbe usun ha kpono huẹnre bhi iyala ọsi Giliẹd.
6 Akọn nesẹ wo fua kua bọsi ihuan
Nan wo la khọ a fo,
Ele rebhe wo sẹn kugbe nọnsẹn,
Bọsi ohuan nin ibiava nesọle gba nan.
8 Mẹn sabọ rẹ ha mhọn esọn* egbọ-ea*
Bi ikhuo ebhebhe ne bun sẹbhi egbọ-enẹn,*
Sẹyẹ, mẹn sabọ rẹ yẹ ha mhọn imanmhẹn ne bunbun nin a bha sabọ ka.
9 Ọkpakinọn, ọkpa bhi ẹwẹ ele hi idulu nọnsẹmhẹn; okan i ri ọle bhi egbe.
Ọle ọkpa inẹn ọlẹn mhọn.
Inẹn ọlẹn wo manman hoẹmhọn ọlẹn.
Ene imanmhẹn ha daghe ọle, ele ki ha tiọle, ọne eghọnghọn yi ọsọle;
Sẹyẹ, ene esọn bi ene ikhuo nekẹle ki ha gẹn ọlẹn.
10 ‘Okhuo nela diabe uwẹ nọn wo gbanọn an bọsi ewewiẹ,
Yẹ mhọnse a bii uki nọn bhala, nọn wo ha da avan bii ovuẹnlẹn nọn zẹ,
Yẹ mhẹn bhi ẹlo a bii usun eyokhọnlẹn ne muegbe okhọnlẹn?
Rẹ gbera uwẹ, okhuo soso i ribhọ!’”
11 “Mẹn da diọbhi ogba ọsi eran nọn mọn ikpẹ
Nin mẹn dọ daghe ene eran ne wanre vade bhi iyala,
Yẹ lẹn si eran anyọn* munhẹn ha sọnnọn ebe ọgbọn;
Sẹyẹ, nin mẹn fẹghe si eran pomẹgranet* munhẹn ha gbeghọn.
12 Ranmhude mẹn ho nin mẹn daghe ene emhin nan kẹkẹ,
Mẹn bha lẹn ẹghe nin mẹn rẹ dọ ke egbe mẹn re
Bhi eji awẹnẹwẹnẹ ọsi ọne ojie bi ikpia nesọle ye.”
13 “Vae, obhokhan Shunẹm!
Yẹ uwẹ sẹ vae! Vare!
Vae dọ re ẹlo nin mhan ghe!”
“Bezẹle nin bha da ghe obhokhan Shunẹm?”
“Inian ọle diabe usun eva ne ko gbikhiẹn!”*
7 “Eo, ọmọn nọn mun ekpẹn bhi egbe!
Oẹ nesẹ wo mhọnse a bhi ẹkẹ ibata nin uwẹ ne yọ,
Etagha* nesẹ wo mhọnse a bii ileghe,
Ele diabe ebi ọria nọn re obọ kanọ emhin kanọ nọnsẹn.
2 Ukhọn nọnsẹ diabe tasa nọn dia kholobo.
Mẹn bhii nin anyọn nan re emhin gua wo ha ribhọ ẹghe rebhe.
Ẹkẹ nọnsẹ diabe iwit nan bi koko,
Nin aroro sẹn nẹga.*
3 Inian inyẹn nesẹ veva
Diabe ibhi ẹruẹ nan biẹ ele ibiava.
4 Uru nọnsẹ diabe uwa nọn yoyo nin a re akọn-enin rẹ bọn.
Ẹlo nesẹ kpe a bii amẹn nọn ribhi ugholo ne ribhi Hẹshbọn
Ne ribhi egbegbe igeti ne ribhi Bat-rabim.
Uwẹ lu ihue gọi bii uwa nọn yoyo nọn ribhi Lẹbanọn
Nọn denọ ẹlo da agbaẹbho ọsi Damaskọs.
5 Uhọnmhọn nọnsẹ mhọnse a bii Oke Ọsi Kamẹl,
Sẹyẹ, eto nọn ri uwẹ bhi uhọnmhọn diabe olu nọn mhọn alo pọpo.*
Uwedẹ nin ọne eto rẹ na, wo ha na ọne ojie bhi ẹlo.
6 Eo, ọmanmhẹn nin mẹn hoẹmhọnlẹn, uwẹ mhọnse gbe, ẹmhọn ẹn yẹẹ mẹn gbe,
Uwẹ mhọnse gbe bhi ọria!
8 Mẹn da yọle, ‘Mẹn dẹ hẹn okhun ọne eran udin
Nin mẹn dọ kọnọ ikpẹ ne ribhọ.’
Inyẹn nesẹ dẹ wo diabe okishi ọsi eran anyọn,
Sẹyẹ, ohiẹnhiẹn nọnsẹ dẹ ha viohin bọsi apo.
9 Unun nọnsẹ diabe anyọn nọn ki sẹ mhẹn nẹ.”
“Mẹn guanọ nọn ha niẹniẹn bhi unun ọsi ọne imẹn hoẹmhọnlẹn,
Mẹn guanọ nọn ha niẹniẹn sade ọ ribhi unun ọsi eria ne wẹ.
10 Ọne imẹn hoẹmhọnlẹn nyan mẹn,
Sẹyẹ, imẹn ọle wo guanọ.
11 Eo ọne imẹn hoẹmhọnlẹn, vare,
Ji mhan diọbhi ole;
Ji mhan dọ debhi eji a da miẹn ilunmhun nọn viohin an.*
12 Ji mhan riọ bhi owe ọsewewiẹ ha khian ugbo
Nin mhan dọ fẹghe si eran anyọn*
Munhẹn ha sọnọn re yẹ gbeghọn,
Nin mhan yẹ fẹghe si eran pomẹgranet* munhẹn ha gbeghọn.
Mhan ha sẹ enin, mẹn ki re oyẹẹ man ẹn.
13 Ikpẹ ọsi mandrek* munhẹn ha re ohin fia;
Unan ikpẹ kẹkẹ nin egbe gba nan ribhi ununro nọnsẹmhan.
Ọsi orọ nọn ribhọ bi ọsi okale,
Eo, ọne imẹn hoẹmhọnlẹn, mẹn ne ele ya khẹ uwẹ.”
8 “Sade obhio mẹn nin okpia uwẹ khin,
Nọn yẹ nyẹn inyẹn ọsi inẹn mẹn,
Imẹn a ha rẹ mun uwẹ unun fiofio sade imẹn miẹn uwẹ bhi olele,
Ọria soso i da miẹn ebi ọle ha lu mẹn yẹ.
2 Imẹn ki re uwẹ ukpobọ mhọn;
Imẹn ki re uwẹ re bhi uwa ọsi inẹn mẹn,
Inẹn mẹn nọn man mẹn emhin.
Imẹn ki sa anyọn nan re emhin gua nin uwẹ wọn,
Bi anyọn nan wo la re ikpẹ ọsi pomẹgranet rẹ lu.
3 Ọle ki kinọ obọ agobọ nọnsọle mẹn bhi urulu
Yẹ re obera nọnsọle rẹ mun mẹn koko re.
4 Eo, imanmhẹn ọsi Jerusalẹm,* bha ve ihẹn ọbhọ ghe,
Ibha i da re imẹn ha ria ẹmhọn okpia sade ọne ẹghe bha sẹ sẹ.”
5 “Họla khọnan, nọn na bhi ojẹgbo vade,
Nọn re egbe gọ ọne ọle hoẹmhọnlẹn?”
“Otọ eran apo, ọle mẹn da riọ uwẹ bhi owe.
Ọne otọ eran nan emhin ubiẹmhin da ha lu inẹn ẹn, ọkuẹsẹ ọle biẹ ẹ.
Ehe, enin emhin ubiẹmhin da lu nẹnẹ ẹn nọn biẹ ẹ.
6 Wo ha ye mẹn re ẹghe rebhe bii emhin nin uwẹ re diẹn ọbhi urulu,
Ehe, bọsi ukpolika nin uwẹ re ọbhi obọ,
Ranmhude, ọria i da sabọ mun idobolo ọbhi oyẹẹ ọsaje nin itue eva mhọn da egbe, beji ọria i da rẹ sabọ mun uu mhọnlẹn.
Beji Idin* rẹ mun ọria nọn yu mhọnlẹn, iriọ ọria rẹ sun rẹkhan ọnọn ọle hoẹmhọnlẹn.
Ahoẹmhọn-egbe manman to bii eranlẹn. Obọ ọsi Jah* ọ na vae.
7 Amẹn i ribhọ nọn ha sabọ fuẹn ahoẹmhọn-egbe a,
Ẹdẹ i da sabọ re ọle nẹ.
Ọria ha rẹ yọle nin ọle re afe bi ua nin ọle mhọn rẹ dẹ ahoẹmhọn-egbe,
Ọle i da miẹn ọnọn ha miẹn ọle le.”
8 “Obhokhan khere, ọle obhio mhan nin okhuo sẹyẹ khin,
Ọle i mhọn inyẹn.
Be imhan ha lu nanlẹn bhi ọne ukpẹdẹ
Nin okpia ha vae dọ re ọle bhi amhẹn?”
9 “Ahamiẹn ghe ogbe ọle khin,
Mhan ki re isiliva rẹ lu uke okhun ọlẹn;
Ọkpakinọn, ahamiẹn odẹ ọle khin,
Mhan ki re aseran ọsi sida rẹ khan ọlẹn gbe a.”
10 “Egbuwa mẹn khin,
Sẹyẹ, inian inyẹn nesẹmhẹn diabe uwa ne yoyo ne ziẹnlẹn.
Bhiriọ, ọne imẹn hoẹmhọnlẹn daghe ọle ghe,
Ọkhọle i kpokpo mẹn.
11 Solomọn mhọn ugbo eran anyọn* bhi Be-hemọn.
Ọle da mun nin ẹbho ne nanlẹn ha gbẹloghe ọle.
Ọdeọde bhi ene ẹbho nan ki re isiliva uli* ji ọle bhi ikpẹ nin ọne eran mọn.
12 Eo, Solomọn, uwẹ hi ọnọn nyan ene isiliva uli,*
Sẹyẹ, ẹbho ne ne uwẹ gbẹloghe ọne ugbo da nyan isiliva iyisẹn eva.*
Ọkpakinọn, mẹn mhọn ugbo eran anyọn* nọnsẹmhẹn, sẹyẹ ọ sẹ mẹn.”
13 “Eo, uwẹ nọn ribhi ẹkẹ ene ogba,
Imọẹ mẹn* gbehọkotọ beji ele ha da họn urulu nọnsẹ.
Huẹan, ji mẹn họn urulu nọnsẹ.”
14 “Ọne imẹn hoẹmhọnlẹn, jẹje vae,
Re ẹjẹje runẹ vae bọsi ẹruẹ*
Runẹ vae beji obhi ẹruẹ
Rẹ san ene oke nan da miẹn ilunmhun ne viohin.”
Ọnin hi, “imanmhẹn ne wẹnna bhi ẹgua ọsi ọne ojie.”
La “bhili.”
La “bhili.”
Eran natiọle “vine” bhi urolo ebo.
Bhi Hibru, “ibhi ẹbhe,”
La “inian uwẹ diabe akasi nọnsẹmhẹn nọn mhọnse.”
Ọ sabọ ha yi, “ileghe nin uwẹ fi ọbhi eto.”
Ọnin hi, “ebi a rẹ ho ose nan mun ọbhi uhọnmhọn.”
Ilunmhun natiọle spaiknad, ọle a rẹ lu ọne abhii nan.
Fẹ Ikpọta Nan Re Otọle Man.
Ilunmhun natiọle “henna” bhi urolo ebo.
Eran natiọle “vine” bhi urolo ebo.
Ọnin hi, “Aroro nin ebo tiọle saffron.”
Ọnin hi, “Aroro nin ebo tiọle lily.”
Bhi Hibru, “eji a da da anyọn.”
Ọnin hi, “imanmhẹn ne wẹnna bhi ẹgua ọsi ọne ojie.”
Ẹruẹ natiọle “Gazelle” bhi urolo ebo.
Eran natiọle “vine” bhi urolo ebo.
Elanmhẹn natiọle “fox” bhi urolo ebo.
Eran natiọle “vine” bhi urolo ebo.
Aroro natiọle “lily” bhi urolo ebo.
Ọ sabọ ha yi, “unun ene oke.”
Ọnin hi, “imanmhẹn ne wẹnna bhi ẹgua ọsi ọne ojie.”
Fẹ Ikpọta Nan Re Otọle Man.
Fẹ Ikpọta Nan Re Otọle Man.
60.
A re emhin gugu ọne agala bhi okhun ọlẹn. Okpọria a re ọle mun nẹga.
Ọnin hi, “imanmhẹn ne wẹnna bhi ẹgua ọsi ọne ojie.”
La “ikhuo ne ribhi Jerusalẹm.”
La “agban.”
Emekọnọn natiọle “pomegranate” bhi urolo ebo.
Aroro natiọle “lily” bhi urolo ebo.
Fẹ ikpọta nan re otọle man.
Fẹ ikpọta nan re otọle man.
La “Anti-Lẹbanọn.” Oke nọn denọ ẹlo da oke ọsi Lẹbanọn.
La “oriẹlo.”
Ọ sabọ ha yi, “Egbe.”
Emekọnọn natiọle “pomegranate” bhi urolo ebo.
Ilunmhun nin ebo tiọle “Henna.”
Ilunmhun nin ebo tiọle “Spikenard.”
Eran nọn viohin natiọle “cane” bhi urolo ebo. A noo ọle rẹ lu abhii nọn viohin.
Aroro nin ebo tiọle “Saffron.”
Eran nọn viohin natiọle “cinnamon” bhi urolo ebo.
Eran natiọle Aquilaria agallocha. A miẹn ọdan bhi ọne eran nan nan rẹ lu emhin nọn viohin.
Uwẹ ha denọ ẹlo diọbhi obọ nin oẹnlẹn da hẹnre, obọ agobọ nọnsẹ, ọle hi nọt
Uwẹ ha denọ ẹlo diọbhi obọ nin oẹnlẹn da hẹnre, obera nọnsẹ, ọle hi saot.
La “ruo.”
Fẹ Ikpọta Nan Re Otọle Man.
Ọ sabọ ha yi, “Ahu da fo mẹn bhọ bhi ẹghe nin ọle rẹ talọ.”
Ọnin hi, “imanmhẹn ne wẹnna bhi ẹgua ọsi ọne ojie.”
10,000.
Ọ sabọ ha yi, “Inian eto nọnsọle diabe okishi ọsi ikpẹ det.” Ikpẹ natiọle “date” bhi urolo ebo.
Afianmhẹn nin ebo tiọle raven.
La “Iro.”
Udo nọn ghanlẹn krisolait khin.
Udo nọn ghanlẹn safaya khin.
Udo nọn.
Ọnin hi, “imanmhẹn ne wẹnna bhi ẹgua ọsi ọne ojie.”
Ọnin hi, “aroro nin ebo tiọle lily.”
Ọnin hi, “aroro nin ebo tiọle lily.”
La “agban.”
Emekọnọn natiọle “pomegranate” bhi urolo ebo.
Ọnin hi, “okhuo ọnojie.”
60.
80.
Eran natiọle “vine” bhi urolo ebo.
Emekọnọn natiọle “pomegranate” bhi urolo ebo.
La “Inian ọle diabe ikhiẹn ọsi Mahaneim.”
La “Itagha.”
Aroro natiọle “lily” bhi urolo ebo.
Ọne alo nan diabe alo ọsi alubasa.
Ikpẹ nin ebo tiọle “date,” ọle ọne eran udin nan mọn. Otọ Palistin a da kẹ miẹn ọlẹn.
La “akishi, efi.”
Ikpẹ nin ebo tiọle, “date.”
Bhi Hibru, “ilunmhun natiọle hẹna.” Ọne ilunmhun nan ebo tiọle “henna.”
Eran natiọle “vine” bhi urolo ebo.
Emekọnọn natiọle “pomegranate” bhi urolo ebo.
Ọne ikpẹ nan diabe ikpekho la ekhokho nan le.
Ọnin hi, “imanmhẹn ne wẹnna bhi ẹgua ọsi ọne ojie.”
Bhi Hibru, “Shio.” Fẹ ikpọta nan re otọle man.
Jah, ọle a tie Jehova sade a bha ho nan tie ọne elin sotọ.
Eran natiọle “vine” bhi urolo ebo.
1,000.
1000.
200.
Eran natiọle “vine” bhi urolo ebo.
Ọ sabọ rẹ ha yi imọẹ ọsi ọne obhokhan Shunẹm.
Ẹruẹ nin ebo tiọle “gazelle.”