1 Samuel

5 Bhiriọ, Devid da taman Ekish yọle: “Ahamiẹn ghe ẹmhọn mẹn yẹẹ ẹ, ji ele da re otọ nin mẹn dia bhi ọkpa bhi ene agbaẹbho ne bha manman taan ẹlo a. Bezẹle nin ọguọmhandia nọnsẹ ha da deba uwẹ ha nyẹnlẹn bhi ẹguare nọnsẹ?” 6 Bhiriọ, Ekish da mun Ziklag nanlẹn bhi ọne ukpẹdẹ nin. Ọnin zẹle nin Ziklag da yi agbaẹbho ọsi ijie nesi Juda rẹ sẹbhi ẹlẹnan. 7 Ukpe ọkpa bi uki enẹn, ọle Devid gbe bhi agbaẹbho nọn bha manman taan ẹlo a ọsi ibhokhan Filistia. 8 Devid bi ikpea nesọle ki mun okhọn bu ibhokhan Gẹshọ, ene Girzite, bi ibhokhan Amalẹk ne ha nyẹnlẹn bhi otọ nọn nabhi obọ ọsi Tilam ha khian otọ Shọ rẹ dọ sẹbhi otọ Igipt. 9 Devid ha dọ khọn ọne otọ, ọle ki gbono ene ikpea bi ikhuo rebhe ne ribhọ a. Sokpan, ọle ki ne ihuan, ẹmena, kẹtẹkẹtẹ, elanmhẹn natiọle camel bi ikpọn nesele. Bhiriọ, ọle ki fikie bu Ekish. 10 Ekish ki nọọn ọlẹn yọle: “Agbaẹbho nela uwẹ dọ khọnlẹn ẹlẹnan?” Devid ki wanniẹn ọlẹn yọle: “Ene ribhi obọ ọsi South ọsi Juda mẹn dọ ne khọnlẹn” la “Ene ribhi obọ ọsi south osi ene ibhokhan Jiramiẹl mẹn dọ ne khọnlẹn” la “Ene ribhi obọ ọsi south osi ene Kenite mẹn dọ ne khọnlẹn.” 11 Devid bha mun okpea la okhuo soso vae bhi Gat. Ọle da gbono ele rebhe a. Ọle da yọle: “Beji a da miẹn ghe ele bha ha tẹmhọn mhan man ele yọle, ‘Inian Devid lu.’” (Ọnin Devid wo ha lu bhi ene ẹghe rebhe nin ọle rẹ nyẹnlẹn bhi ọne agbaẹbho nọn bha manman taan ẹlo ọsi ibhokhan Filistia.) 12 Bhiriọ, Ekish da rẹọbhi ebi Devid tale. Ọle da ha taman egbe ọle yọle: ‘Ọle wo kiẹn ebe sọnọn rẹji ibhokhan Izrẹl, nin ẹbho nesọle, bhiriọ ọle dẹ wo ha yi ọguọmhandia nọnsẹmhẹn rẹ ha khian.’