Ruth
8 Na·o′mi da taman amhẹn imọn nesọle veva yọle: “Bha ha khian, bha fikie diọbhi uwa ọsi inẹn ibha. Jehova dẹ re oyẹẹ nọn ibeghe man bha, beji bha rẹ re ọle man mẹn bi ene ikpea ne yuno. 9 Jehova dẹ nan erọnmhọn nin bha, nin bha veva miẹn ugbega bhi uwa nọnsi ọdọ ibha.” Ọle da mun ele unun fiofio. Ele da gbeviẹ a. 10 Ele da ha taman ọlẹn yọle: “Eye, mhan dẹ rẹkhan uwẹ bu ẹbho nesẹ.” 11 Sokpan Na·o′mi da yọle: “Bha fikie, imọn nesẹmhẹn. Bezẹle nin bha ha da rẹkhan mẹn ha khian? Mẹn dẹ be yẹ sabọ biẹ imọn ne ha kiẹn ọdọ ibha? 12 Bha fikie, imọn nesẹmhẹn. Bha ha khian ranmhude mẹn dọman gbera ọria nọn ha sabọ bọ ọdọ. Aharẹmiẹn ghe mẹn sabọ miẹn ọdọ bọ ọne asọn nan nian yẹ biẹ imọn-ikpea, 13 bha dẹ be sabọ mundia khẹ ele sẹ ẹghe nin ele ha rẹ wanre? Bha dẹ be ha si egbe re ikeke rẹ bọ ọdọ ranmhude ele? Eye, imọn nesẹmhẹn, ọ wo ba mẹn bhi egbe nin bha, ranmhude Jehova re obọ nọnsọle si ikuan-egbe ji mẹn.” 16 Ọkpakinọn Ruth da yọle: “Hẹi yẹ bhii mẹn nin mẹn zẹ uwẹ obọ, ghe nin mẹn hẹi yẹ rẹkhan uwẹ. Eji ọ hi ki rẹ khin nin uwẹ khian, enin mẹn ha yẹ diọ. Eji ọ hi ki rẹ khin nin uwẹ ha da nowẹ, enin mẹn ha da yẹ gbe asọn. Ẹbho nesẹ ki kiẹn ẹbho nesẹmhẹn. Osẹ nọnsẹ ki yẹ kiẹn Osẹ nọnsẹmhẹn. 17 Eji uwẹ ha da yu mẹn ha da yu, enin a ha da yẹ rẹ mẹn tọ. Ahamiẹn ọ iyi uu ha re imẹn zẹ uwẹ obọ, ji Jehova yẹ lu iriọ da mẹn yẹ re ba ọle.” 18 Na·oʹmi ki daghe ọle ghe, Ruth bha guanọ nin ọle zẹ ọle obọ, ọle bha yẹ ha taman ọlẹn nin ọle fikie. 20 Ọle da ha taman ikhuo nekẹle yọle: “Bha hẹi yẹ tie mẹn Na·o′mi. Bha ha tie mẹn iMa′ra, ranmhude, Osẹnobulua Nọn Kpọnọ Nẹ re iẹnlẹn nọnsẹmhẹn ha riala. 21 Obọ mẹn wo vuọn ẹghe nin mẹn rẹ ha khian, sokpan Jehova da re imẹn re obọ khọnkhan fikiere. Bezẹle nin bha ha da ha tie imẹn Na·o′mi? Ọ ibe yi Jehova hi ọnọn re ẹkhọle lu mẹn, sẹyẹ, ọ ibe yi Ọnọn Kpọnọ Nẹ si ọbalọ ji mẹn?” 22 Inian Na′o·mi rẹ na bhi Mo′ab fikie vae. Ruth nin obhokhan Mo′ab, nin okhuo ọmọn nọnsọle da yẹ rẹkhan ọlẹn vae. Ẹghe nan rẹ munhẹn ha rọ barley bhi ugbo, ọle ele rẹ vae bhi Beth′le·hem.