Judges

16 Ẹdẹ ọkpa, Samson da diọbhi Gaz′a. Ọle da miẹn agbilẹ ọkpa bhi enin, yẹ nabhi ẹkẹ uwa bu ọle. 2 A da taman ibhokhan iGaza yọle: “Samson vae bhi enan.” Bhiriọ, ele da vẹ nẹga eji ọle ye, yẹ nẹhe khẹ ọle bhi ọne ukpasọn nin rebhe, bhi geti ọsi ọne agbaẹbho. Ele da wo rẹ pẹpẹ bhi ọne asọn nin rebhe, yẹ taman egbe ele yọle: “Ẹdẹ ha gbanọn an, mhan ki gbe ọle a.” 3 Ọkpakinọn, Samson da yẹ nowẹ bhi enin rẹ sẹbhi ọsasọn ogiziẹn. Bhiriọ, ọle da kpanọ bhi ọsasọn ogiziẹn, fi obọ mun ene odẹ ne ribhi ọne igeti ọsi ọne agbaẹbho bi ikazi eva ne ribhọ, yẹ banọ ele sibhọre, ele bi asigbe ne ribhọ. Ọle da mun ele ọbhi ijianbọ nesọle yẹ mun ele ha khian okhun oke nọn mun ẹlo da iHeb′ron. 4 Ọnin ki gbera, ọle da zẹ okhuo ọkpa natiọle De·li′lah bhi ọshọ. Iyala ọsi So′rek ọne okhuo da nyẹnlẹn. 5 Bhiriọ, ekhaẹmhọn nesi ibhokhan iPhi·lis′tine da bu ọne okhuo yẹ taman ọlẹn yọle: “Lẹlẹ ọle, uwẹ ha nọọn ọlẹn ebe re ahu nọn kpọnọ sẹ iriọ nanlẹn. Yẹ guanọ otọ ebi mhan ha rẹ sabọ mun ọlẹn yẹ, gba ọle, yẹ khọn ọlẹn miotọ. Uwẹ ha lu ọnan, ọdeọde bhi ẹwẹ mhan ki rẹ isiliva 1,100 nin uwẹ.” 15 Ọle da taman ọlẹn yọle: “Be uwẹ rẹ yọle, ‘Mẹn hoẹmhọn uwẹ’ yẹ? Sokpan, uwẹ bha tan ọkhọle a man mẹn. Igba ea uwẹ sẹ hiẹ imẹn nian, sẹyẹ, uwẹ bha sẹ taman mẹn eji uwẹ da miẹn ọne okpahu nọnsẹ nan.” 16 Ranmhude ghe ukpẹdẹ-ukpẹdẹ ọne okhuo ki rẹ ha guinẹzọ yẹ rẹ sua ọle ọbhọ nọn taman ọlẹn, egbe da lọ ọle, rẹ sẹbhọ ghe ọle khian yu. 17 Bhiriọ, ọle da sha tan ọkhọle a man ọlẹn, yẹ taman ọlẹn yọle: “Urieto bha sẹ rẹso uhọnmhọn nọnsẹmhẹn ghẹdẹ, ranmhude Naz′i·rite ọsi Osẹnobulua mẹn khin rẹ na ẹghe nan rẹ biẹ mẹn. Mẹn ha gbẹn eto nọn ri mẹn bhi uhọnmhọn an, ahu ki wo fo mẹn bhọ, sẹyẹ mẹn ki wo wẹghẹa yẹ diabe ikpea nekẹle rebhe.” 18 De·li′lah ki daghe ọle ghe, ọle tan ọkhọle a man ọlẹn, ọle da jẹje datie ene ekhaẹmhọn nesi Phi·lis′tine yẹ taman ele yọle: “Ejayenan nian bha vae, ranmhude ọle tan ọkhọle a man mẹn.” Bhiriọ, ene ekhaẹmhọn nesi Phi·lis′tine da bu ọle re, yẹ mun ọne igho rẹkhan egbe. 28 Samsin da ki sotie Jehova yọle: “Jehova nin Ebeanlẹn Nọn Ke Okhun Nẹ, huẹan hẹi ye mẹn an. Eo Osẹnobulua, wowo re ahu nin mẹn ọne osukpa nan ọkpa, yẹ ji mẹn da sọikhi da ibhokhan Filistia, bhi ẹlo ọkpa bhi ẹlo nesẹmhẹn veva nin ele ru.” 29 Bhiriọ, Samsin da fiobọ mun ene ikazi eva ne ribhi adesẹ ọne uwa nan rẹ mun ọne uwa mhọn, ọle da tika mundia re obọ agobọ mun ọkpa bhi ene ikazi mhọn yẹ re obera rẹ mun ọnọnkẹle mhọn. 30 Samsin da reso yọle: “Ji mẹn bi ibhokhan Filistia da ko yu!” Ọle da re ahu nọnsọle rebhe rẹ sua ene ikazi, bhiriọ ọne uwa da siẹn nyan ene gbẹloghe bi ene ẹbho rebhe ne ribhọ. Bhiriọ, ẹbho nin ọle gbono a beji ọle yu da bun gbera ẹbho nin ọle gbono a beji ọle ribhi agbọn.