Deuteronomy
3 Bha tobọbha re ẹlo bha daghe emhin nin Jehova lu bhi ẹmhọn ọsi Baal nin ẹbho ha ga bhi ukoke ọsi Peor; Jehova nin Osẹnobulua nọnsẹbha da fuẹn ẹbho rebhe ne khian rẹkhan Baal nan ga bhi ukoke ọsi Peor sibhi ẹwẹ bha re. 6 Bha dẹ gbẹlokotọ re obọ rẹkhan ele, ranmhude ọ dẹ rẹman ene ẹbho ne ha họn ẹmhọn ene uhi nan rebhe ghe, bha mhọn ẹwanlẹn bi ilẹn-otọ-emhin, bhiriọ, ele ki yọle, ‘Edandan iribhọ ghe ẹbho bhi ọne agbaẹbho nọn khua nan mhọn ẹwanlẹn bi ilẹnmhin.’ 7 Agbaẹbho nọn khua nela mhọn osẹ nọn sikẹ ele beji Jehova nin Osẹnobulua nọnsẹmhan rẹ sikẹ mhan ẹghe nọn hi ki rẹ khin nin mhan rẹ so tie ọle? 8 Sẹyẹ, agbaẹbho nọn khua nela mhọn adia bi uhi ne khiale ne diabe ọne Uhi nan rebhe nin mẹn gbe nin bha ẹlẹnan? 23 Bha mhọn ẹwanlẹn nin bha hẹi yele a ọne akovẹn ọsi Jehova nin Osẹnobulua nọnsẹbha deba ibha ve. Sẹyẹ, bha hẹi man amanzẹ nọn diabe emhin nọn hi ki rẹ khin nin Jehova nin Osẹnobulua nọnsẹbha yọle nin bha ha nẹ. 24 Inian Jehova nin Osẹnobulua nọnsẹbha diabe eranlẹn nọn manman to, Osẹnobulua nọn guanọ nan ha ga ọle ọkpa.