Numbers
6 Jehova da gbo kie taman Mozis yọle: 2 “Ne ibhokhan Izrẹl talọ, uwẹ ha taman ele yọle, ‘Ahamiẹn okpea la okhuo ve ive nin ọle rẹ kiẹn iNaz′i·rite rẹji Jehova, 3 ọle dẹ rẹban anyọn la anyọn nekẹle nọn mun. Ọle ida wọn anyọn nọn khekhe la anyọn nọn mun soso nọn khekhe. Ọle ida wọn amẹn ọsi ikperan anyọn soso, sẹyẹ, ọle ida le ikperan anyọn, aharẹmiẹn ọsọgbọn nọn la ọnọn kale. 4 Bhi ene ikpẹdẹ rebhe nin ọle ha rẹ ha yi Naz′i·rite, ọle ida le emhin soso nọn na bhi eran anyọn vae, rẹ nabhi ọne ikperan nọn bha sẹ bho rẹ sẹbhi ihianmhẹn ọlẹn. 5 “‘Bhi ikpẹdẹ rebhe nin ọle ha rẹ ha yi Naz′i·rite, rezọ ida rẹ so ọle bhi uhọnmhọn. Ọle dẹ ha yi ọria nọn khiale beji ọle ha rẹ ji eto nọn ri ọle bhi uhọnmhọn da wanre, ọkuẹsẹ ene ikpẹdẹ rebhe nin ọle rẹ re egbe guẹ nin Jehova sotọ. 6 Ọle hẹi sikẹ olinmhin bhi ene ikpẹdẹ rebhe nin ọle rẹ re egbe ọle guẹ nin Jehova. 7 Aharẹmiẹn aba ọle la inẹn ọlẹn la obhio ọle nin okpea la obhio ọle nin okhuo yu, ọle ida fa egbe ọle a, ranmhude iyaman nin ọle rẹ re egbe ọle lu iNaz′i·rite ji Osẹnobulua nọnsọle ri ọle bhi uhọnmhọn. 8 Ọria nọn khiale ọle khin rẹji Jehova bhi ene ikpẹdẹ rebhe nin ọle ha rẹ ha yi Nanzirat. 24 “Jehova dẹ nan erọnmhọn nin uwẹ, yẹ gbega uwẹ. 25 Jehova dẹ ji ẹlo nọnsọle ha bhala nyan uwẹ, ọle ki yẹ re ẹlo esili rẹ ghe uwẹ. 26 Jehova dẹ denọ ẹlo nọnsọle da uwẹ, yẹ re ọfure nin uwẹ.”’ 27 Sẹyẹ, ele dẹ tie elin nọnsẹmhẹn mun ibhokhan Izrẹl, beji mẹn ha da nan erọnmhọn nin ele.”