Numbers
14 Bhiriọ ọne agbaẹbho rebhe da si uru okhun, ene ẹbho da yẹ munhẹn ha so dagbare yẹ viẹ bhi ọne asọn nin rebhe. 2 Ene ibhokhan Izrẹl rebhe da munhẹn ha zaka-zunyọn rẹji Moses bi Aaron, ene agbaẹbho rebhe da ha ta ọta nọn imhẹn da ele, yọle: “Ọ ha rẹ mhẹn nẹ sade mhan yu bhi otọ Egypt, la sade mhan yu bhi ẹkẹ ọne ojẹgbo nan! 3 Bezẹle nin Jehova ha da ne imhan vae bhi ọne otọ nan, nan re agbada rẹ gbono mhan an? Ele ki ne ikhuo mhan bi imọn nesẹmhan kpanọ. Ọ bha be mhẹn nẹ sade mhan fikie ha khian otọ Egypt?” 4 Ele bhọ da ha taman ọdeọde yọle: “Bha ji mhan zẹ ọria nọn ha sun mhan, nin mhan da fikiẹ ha khian otọ Egypt!” 6 Joshua nin ọmọn nọnsi Nun bi Ca′leb nin ọmọn nọnsi Je·phun′neh, ne deba dọ baba ọne otọ fẹghe, da vinọn ukpọn nọnsele a, 7 ele da yẹ taman ọne agbaẹbho rebhe yọle: “Ọne otọ nin mhan na nẹga dọ baba fẹghe, otọ nọn wo manman mhẹn nọn. 8 Ahamiẹn Jehova re ẹlo esili rẹ ghe mhan, ọle dẹ gene mun mhan nabhi ọne otọ yẹ mun ọne otọ nin mhan, otọ nin miliki bi amẹnlọn vuọnlẹn. 9 Sokpan, bha hẹi sotẹ da iJehova, bha hẹi mun ofẹn ene ẹbho ne ribhi ọne otọ, mhan dẹ gbe ele khuelo. Ele iyẹ mhọn ugbega, sẹyẹ, Jehova ne imhan dia. Bha hẹi mun ofẹn ele.” 10 Ọrẹyiriọ, ene ẹbho rebhe da ha tẹmhọn ebi ele ha rẹ re udo-udo gbono ele a yẹ. Ọkpakinọn, uyi nọnsi Jehova da zegbere bhi ọne ibọkpọ ọsi oga beji ibhokhan Izrẹl rebhe ha da daghe ọle. 11 Bhiriọ Jehova da taman iMoses yọle: “Eka ẹghe ọ ha gbe ọkuẹsẹ ene ẹbho nan munhẹn ha mun ekpẹn nin mẹn? Sẹyẹ, eka ẹghe ọ ha gbe ọkuẹsẹ ene ẹbho nan munhẹn ha mhọn urẹọbhọ da mẹn, arẹmiẹn mẹn re iyaman ne bunbun man ele? 24 Ranmhude Kelẹb nin ọguọmhandia nọnsẹmhẹn wo ha mhọn ọkhọle nọn dikẹ, sẹyẹ ọle wo re ọkhọle rebhe ha sun rẹkhan mẹn, Imẹn dẹ re ọle sẹbhi ọne otọ nin ọle diọ i, sẹyẹ imọn nesọle dẹ le ọne otọ bhi uku. 27 “Ẹghela ene ẹbho nan ne imhẹn ha rẹ zobọ bhọ rẹ ha zaka-zunyọn da mẹn? Imẹn họn ebi ibhokhan Izrẹl rẹ zaka-zunyọn da mẹn yẹ. 28 Ọnan hi ebi uwẹ ha taman ele, “Beji mẹn sẹyẹ nyẹnlẹn,” ebi mẹn họn bha tale tee, ọle mẹn ha lu da bha! 29 Ọne ojẹgbo nan bha ha da yuno, ehe, ọrebhe bhi ẹwẹ bha, rẹ na bhi ene ribhi ikpe uje ha khian okhun, nan gbẹn elin nọnsele ọbhi ebe, ibha rebhe ne ha zaka-zunyọn da mẹn. 30 Ọsoso bhi ẹwẹ bha ida nabhi ọne otọ nin mẹn ve nin bha, gbera Kelẹb nin ọmọn nọnsi Jẹfunẹ bi Josua nin ọmọn nọnsi Nọn. 31 “‘“Mẹn ki ne imọn nesẹbha nin bha yọle ghe, ighian bha dẹ ne na bhọ, ele ki dọ lẹn ọne otọ nin bha hele. 33 Imọn nesẹbha dẹ kiẹn osun-ohuan bhi ikpe 40 bhi ojẹgbo. Sẹyẹ, ele dẹ re uhọnmhọn bhọ ranmhude olukhọ nọnsẹbha, rẹ dọ sẹbhọ ghe, ososo bhi ẹwẹ ibha bha yẹ kere bhi ọne ojẹgbo.