Exodus

27 “Uwẹ ki re eran acacia rẹ lu ọne ukhuo-izọese. Utanmhin ọlẹn ki ha yi cubit isẹn, ubhiamhin ọlẹn ki ha yi cubit isẹn. Obọ enẹn ọsi ọne ukhuo-izọese ki ha yi utanmhin ọkpa. Ọ ki yo sẹbhi cubit ea. 2 Uwẹ ki lu ọle nọn ha mhọn ukhaẹn bhi obọ enẹn ne ribhọ. Ene ukhaẹn ki deba ọne ukhuo-izọese. Uwẹ ki re oze rẹ gbo ọle nẹga. 3 Uwẹ ki lu ibọkẹt nan rẹ ha bii ẹmọn kie bhi ọne ukhuo-izọese. Uwẹ ki yẹ lu isọbi, ukpamanku, ukpakẹ-igbẹn, bi emhin nan zẹ eranlẹn fiọ. Oze uwẹ ha rẹ lu emhin rebhe nan ha noo bhi ọne ukhuo-izọese. 4 Uwẹ ki lu igaga ọbhi ọne ukhuo-izọese. Oze uwẹ ha rẹ do ọle. Uwẹ ki yẹ lu ukpoloka enẹn ne bhiabhia ọbhi akhokho enẹn ọsi ọne igaga. 5 Uwẹ ki mun ọlẹn ọbhi otọ ọne emhin nan khan ọbhi ehọ-ehọ ọne ukhuo-izọese. Ọne igaga ida sotọ fo bhi ẹkẹ ọne ukhuo-izọese. 6 Uwẹ ki re eran acacia rẹ lu ukpokpo nan ha rẹ ha mun ọne ukhuo-izọese, yẹ re oze gbo ele nẹga. 7 Uwẹ ki ne ene ukpokpo nabhi ene ukpoloka ne bhiabhia, beji a ha da miẹn ene ukpokpo ki ha ribhi obọ veva ọsi ọne ukhuo-izọese sade a mun ọlẹn. 8 Uwẹ ki lu ọne ukhuo-izọese bọsi ẹkpẹti nan re eran khan. Uwẹ ki lu ọne ukhuo-izọese beji Ọle rẹ re ọle man uwẹ bhi uke oke. 9 “Uwẹ ki lu ẹgodo ọbhi ọne ibọkpọ ọsi oga. Bhi obọ nọn denọ ẹlo ọbhi south, ọne ẹgodo ki ha mhọn ukpọn ilinen nọn gue ọle. Utanmhin ọsi ọne ukpọn bhi obọ ọkpa ki ha yi cubit 100. 10 Ọ ki ha mhọn ikazi uje bi emhin uje nan re oze lu, ne mun ene ikazi mhọn bhi otọ ọle. Siliva a ha rẹ lu emhin nan rẹ gban ene ikazi mun emhin ebhebhe. 11 Utanmhin ọsi ukpọn nan ha rẹ gue obọ nọn denọ ẹlo ọbhi north ki yẹ ha yi cubit 100. Ọ ki yẹ ha mhọn ikazi uje bi emhin uje nan re oze lu, ne mun ene ikazi mhọn bhi otọ ọle. Siliva a ha yẹ rẹ lu emhin nan rẹ gban ene ikazi mun emhin ebhebhe. 12 Utanmhin ọsi ukpọn nan ha rẹ gue obọ nọn denọ ẹlo ọbhi west bhi ikeke ọle ki ha yi cubit 50. Ọ ki ha mhọn ikazi igbe bi emhin igbe nan re oze lu, ne mun ene ikazi mhọn bhi otọ ọle. 13 Utanmhin ọsi ọne ẹgodo bhi obọ nọn denọ ẹlo da eji oẹnlẹn da hẹnre ki ha yi cubit 50. 14 A ki re ukpọn gue obọ ọkpa sẹbhi cubit 15. Ikazi ea bi emhin ea ne mun ene ikazi mhọn ki ha ribhi enin. 15 A ki yẹ re ukpọn gue obọ nin ọzeva sẹbhi cubit 15. Ikazi ea bi emhin ea ne mun ene ikazi mhọn ki yẹ ha ribhi enin. 16 “Utanmhin ọsi eji a da nabhi ọne ẹgodo ki ha yi cubit 20. Olu nọn mhọn alo iblue, olu nọn mhọn alo ipurple, ukpọn nọn gian bi ukpọn ilinen, uwẹ ha rẹ lu ukpọn nan ha rẹ gue ọle. Ọ ki yẹ ha mhọn ikazi enẹn bi emhin enẹn ne mun ene ikazi mhọn bhi otọ ọle. 17 Ikazi rebhe ne ribhi ọne ẹgodo ki ha mhọn emhin siliva nan rẹ gban ele mun emhin ebhebhe. Sokpan, oze a ha rẹ lu ene emhin ne mun ọne ikazi mhọn bhi otọ ọle. 18 Utanmhin ọsi ọne ẹgodo ki ha yi cubit 100, ubhiamhin ọlẹn ki ha yi cubit 50, uyomhin ọlẹn ki ha yi cubit 5, ukpọn ilinen nan do nọnsẹn, a ha rẹ lu ọle nẹga. Ọ ki ha mhọn emhin ne mun ikazi mhọn nan re oze lu. 19 Oze a ha rẹ lu ene emhin rebhe nan ha noo bhi ọne ibọkpọ ọsi oga, rẹ sẹbhi ene ise nan ha rẹ bọn ọne ibọkpọ bi ọne ẹgodo. 20 “Uwẹ ki taman ibhokhan Izrẹl nin ele sa abhii olive nan bha re emhin soso gua re, nan ha sa bhi ene orukpa, beji ele ha da ha bhaa ẹghe rebhe. 21 Aaron bi imọn nesọle ki ha re ọne orukpa nọn ribhi ikeke ukpọn nọn sikẹ ọne Ẹkpẹti Akovẹn bhi ẹkẹ ibọkpọ ọsi oga ru, nọn ha bhala rẹ na bhi emuan rẹ sẹbhi ewewiẹ bhi odalo iJehova. Emhin nin ibhokhan Izrẹl da ha lu khian rẹ na bhi ore rẹ sẹbhi ore khọnan.