Exodus
23 “Hẹi ha wewe ẹmhọn nọn iyi ẹmhọanta khian. Hẹi ha sọsali ohoghe rẹ rẹkpa ọria ọbe. 2 Hẹi rẹkhan usun ẹbho ha lu emhin ebe. Hẹi sọsali ohoghe gbe ọria ranmhude uwẹ guanọ nin uwẹ ta ẹmhọn nọn diẹn mun ebi ẹbho ne bunbun tale. 3 Hẹi bhohiẹn eku bhi ẹzọ ọsi obhiogue. 4 “Uwẹ ha miẹn ẹmena la ẹkẹtẹkẹtẹ nọnsi eghian ẹn bibi khian, mun ọlẹn ji ọle. 5 Uwẹ ha miẹn ghe ihẹ de nyan ẹkẹtẹkẹtẹ ọsi ọria nọn bha hoẹmhọn uwẹ, hẹi fi ọle ehọ a kpanọ. Rẹkpa ọle mun ọne elanmhẹn sibhi otọ ọne ihẹ re. 6 “Ahamiẹn a guẹzọ ọsi obhiogue nọn ribhi ẹwẹ ibha, hẹi bhohiẹn eku gbe ọle. 7 “Hẹi re orẹsin sin ọria, sẹyẹ, hẹi gbe ọria nọn khiale bi ọria nọn bha lẹn-ọkpa-lẹn-eva a. Ranmhude, imẹn ida tie ọria ebe ọria nọn khiale. 8 “Hẹi miẹn ọria ẹse bhi ikeke, ranmhude ẹse nan re nin ọria bhi ikeke sabọ ru ọria ẹlo nọn hẹi daghe ẹmhọanta. Ọ yẹ sabọ re ikpea ne mhẹn fi ọta denọ bhi unun. 9 “Hẹi ha re obọ oya mun eriọbhe. Bha lẹn ebi ọ dia yẹ bhi egbe nan rẹ ha yi ọriọbhe, ranmhude, bha ka ha yi eriọbhe bhi otọ Egypt. 10 “Bhi ikpe ehan, uwẹ ki kọ emhin bhi otọ nọnsẹbha yẹ rọ emhin nin uwẹ kọle. 11 Sokpan, bhi ukpe nọnzi ihinlọn, uwẹ ida kọ emhin soso bhi ọne otọ, uwẹ ki zẹ ọle obọ nọn wo. Ene ibhiogue ne ribhi ẹwẹ bha ki rọ emhin ne ribhi ọne otọ. Ene elanmhẹn ne ribhi ẹwẹ ki le emhin nin ele fikẹre. Iriọ uwẹ ha lu sade uwẹ mun ugbo eran anyọn bi eran olive. 12 “Ikpẹdẹ ehan uwẹ ha rẹ ha wẹnna. Bhi ukpẹdẹ nọnzi ihinlọn, uwẹ ida miẹnsọn soso, beji a da miẹn ghe ẹmena nesẹ bi ẹkẹtẹkẹtẹ nesẹ ki hẹn-an. Sẹyẹ, ọmọn nọnsi ọguọmhandia nọnsẹ nin okhuo bi ọriọbhe nọn deba bha nyẹnlẹn ki hẹn-an. 13 “Bha manman gbẹlokotọ bhi egbe bha nin bha rẹ re obọ rẹkhan ene emhin rebhe nin mẹn taman bha. Sẹyẹ, bha hẹi sounun bhi elin ọsi osẹ nekẹle; bha hẹi ji a họn elin nọnsele bhi unun nọnsẹbha. 14 “Igba ea bhi ukpe uwẹ ha rẹ ha lu iluemhin ji mẹn. 15 Uwẹ ki lu iluemhin ọsi Brẹdi Nọn Ihuẹ. Beji mẹn ka taman uwẹ, uwẹ ki le ibrẹdi nọn ihuẹ na bhi ikpẹdẹ ihinlọn, bhi ẹghe nan rẹyi bhi uki nọnsi Aʹbib, ranmhude, ọne ẹghe nin uwẹ rẹ sibhi otọ Egypt re. Ọria soso hẹi re obọ khọnkhan bu mẹn re. 16 Uwẹ ki yẹ lu Iluemhin ọsi Ikhuan-emhin ọsi emhin-ekọnọn ọhẹnhẹn nin uwẹ rọ bhi ugbo nin uwẹ mun, bi ẹsọn nin uwẹ miẹn. Ukpe ha ki sotọ, bhi ẹghe nin uwẹ ha rẹ rọ emhin rebhe nin uwẹ kọ bhi ugbo fo, uwẹ ki lu Iluemhin ọsi Emhin Nan Rọle. Igba ea bhi ukpe, ọle ikpea nesẹ rebhe ha rẹ ha bu iJehova nin Ebealẹn ọsi ẹmhọanta re. 17 Igba ea bhi ukpe, ọle ikpea nesẹ rebhe ha rẹ ha bu iJehova nin Ebealẹn ọsi ẹmhọanta re. 18 “Hẹi ji emhin soso nan re iyist gua deba aranlẹn nin uwẹ ha rẹ zọese ji mẹn. Sẹyẹ, hẹi ji abhii-elanmhẹn nin uwẹ rẹ zọese bhi iluemhin nesẹmhẹn gbe ẹdẹwe. 19 “Ene mhẹn nẹ bhi emhin-ekọnọn ọhẹnhẹn nin uwẹ rọle, uwẹ ki ne ele vae bhi uwa nọnsi Jehova nin Osẹnobulua nọnsẹ. “Hẹi re amẹn-inyẹn ọsi ẹbhe rẹ nyẹn obhi ọle. 20 “Mẹn dẹ je ẹhi kalo nin bha, nọn ha gbega bha bhi uwedẹ yẹ ne bha sẹbhi ọne otọ nin mẹn mhanmhan khẹ bha. 21 Bha ka ọle ehọ yẹ ha lu emhin nin ọle tale. Bha hẹi sọtẹ da ọle, ranmhude imẹn je ọle re. Ọle ida rẹhunmhan olukhọ nọnsẹbha. 32 Hẹi deba ele la osẹ nesele ve akovẹn. 33 Ele ida nyẹnlẹn bhi otọ nọnsẹ, nin ele hẹi dọ re uwẹ gbobọra uhi nesẹmhẹn. Uwẹ ha ga osẹ nọnsele, ele ki ha yi ufi rẹji uwẹ.