Genesis

7 Ọnin ki gbera, Jehova da taman iNoah yọle: “Nabhi ẹkẹ ọne okọ, uwẹ bi azagba-uwa nọnsẹ, ranmhude uwẹ hi ọria nọn khiale bhi ẹlo mẹn bhi ẹwẹ eria rebhe bhi ọne ore nan. 2 Uwẹ ha ne ihinlọn-ihinlọn bhi ene elanmhẹn rebhe ne khiale rẹkhan egbe, ọsi okpea bi ọsi amhẹn; uwẹ ha yẹ ne eva-eva bhi ene elanmhẹn ne bha khia, ọsi okpea bi ọsi amhẹn. 3 Sẹyẹ, ene afianmhẹn ne tin bhi okhun, uwẹ ha ne ihinlọn-ihinlọn bhi ẹwẹ ele, ọsi okpea bi ọsi amhẹn, nin ele miuhọnmhọn yẹ biẹ imọn ne ha vuọn ọne otọ nan rebhe. 4 Ranmhude, ikpẹdẹ ihinlọn ki kẹre nin mẹn ha rẹ si okpamẹn re bhi ọne otọ nan, rẹ na bhi ikpẹdẹ 40 bi asọn 40. Mẹn ki fuẹn emhin ne nyẹnlẹn rebhe a, nin mẹn manlẹn bhi ọne otọ nan.” 5 Noah da wo lu emhin rebhe nin Jehova taman ọlẹn. 6 Ikpe 600 Noah khin bhi ẹghe nin ọne okpamẹn rẹ rọ bhi ọne otọ nan. 7 Bhiriọ, Noah bi imọn nesọle, amhẹn ọlẹn, bi amhẹn imọn nesọle da nabhi ọne okọ, ọne amẹn kuẹ munhẹn ha rọ. 8 Ene elanmhẹn rebhe ne khiale bi ene elanmhẹn rebhe ne bha khia, ene tinọn bhi okhun, deba emhin rebhe ne kọn bhi ọne otọ nan, 9 ele da re eva-eva nabhi ẹkẹ ọne okọ bu Noa, ọsi okpea bi ọsi amhẹn, beji Osẹnobulua rẹ taman Noa. 10 Ọ ki ribhi ikpẹdẹ ihinlọn, ọne okpamẹn da munhẹn ha siẹn bhi ọne otọ nan. 11 Bhi ukpẹdẹ nọnzi 17 bhi uki nọnzi eva bhi ukpe nin Noah ha yi ikpe 600, ene okpamẹn da vẹ a, ene odẹ ọsi amẹn nọn ribhi okhun da tuje a. 12 Ọne amẹn da siẹn ọbhi otọ na bhi ikpẹdẹ 40 bi asọn 40. 13 Bhi ọne ukpẹdẹ nin, Noah bi imọn nesọle, Shem, Ham, bi Jaʹpheth, bi amhẹn ọlẹn, deba amhẹn imọn nesọle ea-ea, da nabhi ẹkẹ ọne okọ. 14 Ele bi agba elanmhẹn ẹwẹ kẹkẹ rebhe da nabhi ẹkẹ ọne okọ, deba agba elanmhẹn uwa kẹkẹ rebhe, bi agba elanmhẹn kẹkẹ rebhe ne lẹnlẹn bhi otọ, bi agba emhin rebhe kẹke nan manlẹn ne tinọn, bi afianmhẹn rebhe, bi elanmhẹn rebhe ne mhọn igẹn. 15 Ele rebhe da re eva-eva ha bu iNoah bhi ẹkẹ ọne okọ, ene efun rebhe ne mhọn ahoho ọsi iẹnlẹn. 16 Unan efun kẹkẹ da nabhi ẹkẹ ọle, ọsi okpea bi ọsi amhẹn, beji Osẹnobulua taman ọlẹn. Ọnan ki gbera, Jehova da khue ọne odẹ gbe ọle bhi ẹkẹ ọle. 17 Ọne okpamẹn da rọ na bhi ikpẹdẹ 40 bhi ọne otọ nan, ọne amẹn da wo ha bun ọbhọ yẹ mun ọne okọ okhun. Ọne okọ da ha ribhi okhun ọne amẹn. 18 Ọne amẹn da gba ije rebhe yẹ wo manman ha bun ọbhọ bhi ọne otọ nan, ọkpakinọn, ọne okọ da ha ribhi okhun ọne amẹn. 19 Ọne amẹn da manman gba ọne otọ nan rẹ sẹbhọ ghe, ọ da gue ene oke ne yoyo rebhe ne ribhi odotọ okhun. 20 Ọne amẹn da re kiubiti 15 rẹ yo gbera ene oke. 21 Bhiriọ, emhin rebhe ne nyẹnlẹn ne ribhi ọne otọ nan da fuẹn an—ene elanmhẹn ne tin, ene elanmhẹn uwa, ene elanmhẹn ẹwẹ, ene elanmhẹn kẹkẹ ne re usun khian, bi eria rebhe. 22 Emhin rebhe bhi otọ ọkhọnkhan, ne mhọn ahoho ọsi iẹnlẹn bhi ihue nọnsele da yuno. 23 Bhiriọ, ọle da fuẹn emhin ne nyẹnlẹn rebhe a bhi ọne otọ nan, rẹ sẹbhi eria, elanmhẹn kẹkẹ ne khian bhi otọ, elanmhẹn ne lẹnlẹn bhi otọ, afianmhẹn bi emhin nekẹle ne tin bhi okhun. A da fuẹn ele rebhe a bhi ọne uke otọ nan; Noah bi ene deba ọle ha ribhi ẹkẹ okọ, ele ọkpa miuhọnmhọn 24 Ọne amẹn da wo lọ ọne otọ na bhi ikpẹdẹ 150.