Genesis
49 Jacob da tatie imọn nesọle yẹ taman ele yọle: “Bha rebhe vae nin mẹn da taman bha emhin ne ha sunu ji bha bhi ẹghe ọkike. 2 Bha sikoko yẹ ka mẹn ehọ, ibha nin imọn nesi Jacob, ehe, bha kaehọ Izrẹl nin aba bha. 3 Rubẹn, ọmọndiọn nọnsẹmhẹn uwẹ khin, ahu nọnsẹmhẹn, bi ọmọn nin mẹn rẹ munhẹn ha biẹ. A wo manman ha mun ekpẹn nin uwẹ. Sẹyẹ, uwẹ manman wo mhọn ahu. 4 Ọkpakinọn, uwẹ i da kiọnlẹn, ranmhude, bọsi ologho nọn nẹ khian, uwẹ bha sabọ mun egbe uwẹ mhọnlẹn. Uwẹ da fa ibẹd ọsi aba uwẹ a. Iriọ Reubẹn wo gene lu! 5 Ibhio, ọle Simiọn bi Livai khin. Ele re emhin okhọn nọnsele kiẹn ebi a rẹ gbugbele bi ebi a rẹ fuẹn emhin an. 6 Mẹn i da deba ele muobọ. Mẹn i da ji a da tie elin nọnsẹmhẹn mun usun nọnsele, ranmhude, ele re ohu fuẹn ẹbho a, yẹ gheghe khuẹnẹn ẹmena oẹ a. 7 Ele kiẹn eria nan fi ele unun ranmhude ẹkẹkhọmhin nọnsele, ranmhude, ọ da re ele dọ lu emhin nọn bha gba. Mẹn dẹ zagha ibha nẹga ulin-uwa ọsi Jekọp ne ribhi otọ Izrẹl. 8 “Bhi ọsi uwẹ, Judah, ibhio uwẹ dẹ gẹn uwẹ. Obọ nọnsẹ dẹ ha ribhi uru ọsi eghian uwẹ. Imọn nesi aba uwẹ dẹ deuhọnmhọnre nin uwẹ. 9 Obhi oduma Judah khin. Ọmọn nọnsẹmhẹn, bhi uke emhin nin uwẹ gbe uwẹ ha da kpanọ mundia. Ọle sikuẹnre yẹ niẹn egbe a bọsi oduman. Bii oduman, họla ha gbudu riọ ọle? 10 Ọkpọ ọsi ojie i da sibhi obọ ọsi Juda re, sẹyẹ ukpokpo ọsi ọkakulo i da yẹ sibhi adesẹ ẹgẹn nọnsọle re, ọkuẹsẹ Shailo vae; ọle ẹbho rebhe da ha hẹnmhọn nan. 11 Ọle ha diẹn ekẹtẹkẹtẹ nọnsọle mun oran anyọn, yẹ diẹn obhi ekẹtẹkẹtẹ nọnsọle mun oran anyọn nọn mhẹn, ọle ki re anyọn rẹ họ ukpọn nọnsọle, yẹ re aranlẹn ọsi anyọn họ ẹwu nọnsọle. 12 Ẹlo nọnsọle gian ranmhude anyọn, akọn nọnsọle yẹ fua ranmhude miliki. 13 “Zẹbulọn dẹ ha nyẹnlẹn bhi egbe ẹdẹ, egbe ẹdẹ nin okọ da mundia. Otọ nọnsọle dẹ sẹbhi obọ ọsi Saidọn. 14 “Ekẹtẹkẹtẹ nin uguẹ nọnsọle wo, ọle Isʹsa·char khin, ekẹtẹkẹtẹ nọn nowẹ bhi adesẹ ene ẹkpa eva nan rẹ mun ihẹ. 15 Ọle ki kere ghe eji ọle da koahu a mhẹnmhin, ghe ọne otọ wo mhẹn. Ọle ki debhẹre nin ọle da re ijian-abọ nọnsọle mun ihẹ. Ọle ki degbere nan rẹ re ọle miẹn esọn nọn kaka. 16 “Dan dẹ bhohiẹn ẹbho nesọle bii ọkpa bhi ulin uwa nesi Izrẹl. 17 Dan dẹ ha yi ẹnyẹn nọn ribhi egbe odẹ, ẹnyẹn nọn mhọn ukhaẹn, nọn ha sa akasi bhi oẹ, beji a ha da miẹn, ọnọn hẹn ọne akasi ki de re ikeke. 18 Eo Jehova, mẹn dẹ mundia khẹ uwẹ, nin uwẹ miẹn mẹn fan. 19 “Bhi ọsi Gad, ekhẹn igbaza-muaza dẹ vae dọ muno ọle emhin, sokpan, ọle dẹ khu ele re ikeke yẹ muno ele emhin. 20 “Ebale nọnsi Asha dẹ kpọfiara a. Ọle dẹ rọ ebale nin ojie ha sabọ le. 21 “Ẹruẹ amhẹn, ọle Naphʹta·li khin. Ọta esili si ọle bhi unun re. 22 “Ikpabọ-oran ọsi oran nọn mhẹn, ọle Joseph khin, oran nọn ribhi egbe ẹdẹ, oran nin ikpabọ nesọle niẹn an gbera ogbe. 23 Sokpan, ene fi ufẹnmhẹn da ha zuọzuọ ọle, yẹ fi ufẹnmhẹn gbe ọle. Ele da ha mhanmhan emhin ọbe bhi ọkhọle nin ele ha lu da ọle. 24 Ọrẹyiriọ, uhẹn nọnsọle bha lueghe, obọ nọnsọle da sẹyẹ mun zeze. Obọ ọsi ọnọn wolo nọnsi Jacob, ọle ọnan na vae, obọ ọne ọsun-ohuan, ọne udo nọnsi Izrẹl. 25 Obọ Osẹnobulua nọnsi aba uwẹ ọle na vae. Ọle dẹ rẹkpa uwẹ. Ibo ọsi Ọnọn Ke Okhun Nẹ ọle ye. Ọle dẹ re emhin ne ribhi okhun, bi emhin ne ribhi okpẹdẹ rẹ nan erọnmhọn nin uwẹ. Ọle dẹ yẹ nan erọnmhọn inyẹn bi erọnmhọn ẹkpa-ọmọn nin uwẹ. 26 Erọnmhọn nọnsi aba uwẹ dẹ gbera erọnmhọn ọsi oke ne mọn da ribhọ, yẹ gbera emhin ne ghanlẹn ọsi oke ne ribhọ rẹ sẹbhi ighegheghe. Ele ki ha ribhi uke uhọnmhọn ọsi Joseph, uke ukparu ojie nọn ribhi uhọnmhọn ọsi ọne a zẹ ọle egbe dagbare bhi ẹwẹ ibhio ọle. 27 “Benjamin dẹ ha gbe emhin le bọsi obidọn. Ọsewewiẹ, ọle ki le emhin nin ọle gbe. Bhi ọsemuan, ọle ki gha emhin nin ọle gbe.”