Genesis
34 Ejayenan, Diʹnah, nin ọmọn okhuo nin Leʹah biẹ nin Jacob da ha re ẹnẹ ji imanmhẹn ọsi ọne agbaẹbho. 2 Ẹghe nin Sheʹchem, nin ọmọn nọnsi Haʹmor nin obhi Hiʹvite, ọkpa bhi ekhaẹmhọn ọsi ọne agbaẹbho rẹ daghe ọle, ọle da gua ọle mun yẹ mun ọlẹn ho. Ọ da mun ọlẹn ria a. 3 Ẹmhọn iDiʹnah nin ọmọn nọnsi Jacob da wo manman ha ti ọle bhọ. Ọle da wo manman hoẹmhọn ọne ọmanmhẹn yẹ ha gui nin ọne ọmanmhẹn. 4 Sheʹchem da ki taman iHaʹmor nin aba ọle yọle: “Dọ ne mẹn gui ẹmhọn ọne ọmanmhẹn nan, nọn kiẹn okhuo mẹn.” 5 Imọn ikpea nesi Jacob gbẹloghe emhin-uri nesọle bhi ẹwẹ eghe nin Jacob rẹ họn ghe Sheʹchem mun iDiʹnah nin ọmọn nọnsọle ria a. Bhiriọ, Jacob da fẹkẹ huẹan ha khẹ ele nin ele vae. 6 Ọkizẹbue, Haʹmor nin aba iSheʹchem da dagbare nin ọle dọ ne iJacob talọ. 7 Imọn nesi Jacob ki họn, ele da jẹje na bhi ẹwẹ vae. Ẹkẹ da wo ha khọ ele, ohu da wo manman re ele, ranmhude, Sheʹchem re okan sin Izrẹl nin ọle rẹ ne ọmọn nọnsi Jacob nowẹ. Emhin awaa nọn. 8 Haʹmor da ne ele talọ. Ọle da yọle: “Sheʹchem nin ọmọn nọnsẹmhẹn wo manman hoẹmhọn ọmọn nọnsẹbha. Bha huẹan, bha rẹ nanlẹn nọn kiẹn amhẹn ọlẹn. 9 Bha ji mhan kiẹn oruan egbe. Bha ne imọn ikhuo nesẹbha nin mhan, bha ha ne imọn ikhuo nesẹmhan. 10 Bha deba mhan ha nyẹnlẹn. Ọne otọ ki kiẹn ọsẹbha nin bha rẹ lu emhin nọn ki rẹ khin nọn ghọn bha. Bha nyẹnlẹn bhọ, bha ha do ẹki bhọ, bha ha yẹ re ọle kiẹn isẹbha.” 11 Ẹghenin, Sheʹchem da taman aba iDiʹnah bi ibhio iDiʹnah yọle: “Bha re ẹlo esili ghe mẹn. Emhin nọn ki rẹ khin nin bha nọọn mẹn le, mẹn dẹ re re. 12 Bha hian udede igho nin mẹn, nin mẹn ha mun bhi egbe ọne okhuo, yẹ taman mẹn emhin nin mẹn ha ne re. Ebi ọ ki rẹ khin nin bha taman mẹn, mẹn dẹ lu ọle. Bha huẹan, bha re ọne okhuo nin mẹn.” 13 Imọn nesi Jacob da re eku rẹ wanniẹn Sheʹchem bi Haʹmor nin aba ọle, ranmhude Sheʹchem fa iDiʹnah nin obhio ele a. 14 Ele da taman ele yọle: “Mhan ida sabọ lu emhin nọn sẹriọ. Mhan ida sabọ re obhio mhan nin okpea nọn bha ruẹ. Okan nọn rẹji mhan. 15 Emhin ọkpa nọn ha sabọ rẹ mhan fi ọkhọle denọ hi, sade bha diabe imhan, yẹ ruẹ ikpea nesẹbha rẹbhe. 16 Ẹghenin, mhan ki sabọ ha re ọmọn nin bha. Mhan ki yẹ sabọ ha ne imọn nesẹbha. Mhan ki sabọ deba bha ha nyẹnlẹn, yẹ kiẹn ọkpa. 17 Sokpan, ahakimiẹn bha bha ka mhan ehọ yẹ ruẹ, mhan ki re ọmọn nọnsẹmhan kpanọ.” 18 Ẹmhọn nin ele ta da wo ti Haʹmor bi Sheʹchem nin ọmọn nọnsọle bhọ. 19 Ọne usẹn okpea bha zẹwẹ ria ẹghe a nin ọle rẹ lu emhin nin ele taman ọlẹn nin ọle lu, ranmhude ọle wo hoẹmhọn ọmọn nọnsi Jacob. Sẹyẹ, ọle hi ọne a mun ekpẹn nan nẹ bhi uwa nọnsi aba ọle. 25 Ọkpakinọn, bhi ukpẹdẹ nọnzi ea, ẹghe nin ele sẹyẹ rẹ ha ribhi ọbalọ, imọn eva nesi Jacob, Simʹe·on bi Leʹvi nin ibhio Diʹnah, da ne agbada na bhi ọne agbaẹbho, bhi ẹghe nin ene ẹbho bha rẹ mun ọkhọle ọbhọ, yẹ gbono ene ikpea rebhe a. 30 Jacob da ki taman iSim′e·on bi Le′vi yọle: “Ibha si ọkakale nọn khua ji mẹn, ranmhude ibha rẹ mẹn kiẹn ọria nọn hian ukhan bhi ẹlo ọsi ẹbho ne nyẹnlẹn bhi ọne otọ nan, bhi ẹlo ọsi ene iCa′naan·ite bi ene iPer′iz·zite. Ikpeta ẹbho azagba-uwa nọnsẹmhẹn khin. Ele dẹ wo kugbe mun okhọn bu mẹn, yẹ fuẹn mẹn an, imẹn bi azagba-uwa mẹn.