Baptism Chẹñwu Ogbogaga Ka K’onẹ Neke Kpibe Ki Che!

Jisọs kakini baptism chẹñwu otila ñwu Abo Kraist ku ma che. (Gba Matiu 28:​19, 20.) Ama ẹñwu baptism che? Ẹñwu onẹ la dukpẹ ki che taki neke che baptism?

1. Ẹñwu baptism che?

Ofe ọla Grik ku ma dọ ki “baptism” che “edu tunyu” ef’omi. Iko ki Jisọs ache baptism, Jọn du Jisọs tunyu ef’aji Jordan. Ubilẹ, Jisọs mu “tẹgu kwef omi.” (Mark 1:​9, 10) Abalẹ gẹ, eñini-i ichẹñwu k’Abo Kraist ochochi atene che baptism ma ad’ọla ẹnẹ lẹ gbaa tunyu ef’omi.

2. Ẹñwu ẹnẹ ki ache Baptism adu ña?

Ichẹñwu k’onẹ ache baptism, ẹnẹ lẹ adu ña kaki i f’ọla-wñ datẹ ñwu Jihofa Ọjọ mẹ. Abu onẹ ad’ọla-wñ datẹ ñwu Ọjọ le? Tak’onẹ ki che baptism, ẹnẹ lẹ ach’adua ru Jihofa kp’ọla-wñ kate, i la aka ñwu Jihofa kaki i atene d’ọlai-wñ chaka rẹ Jihofa ogbegbelẹ. I agbalu kaki Jihofa kate i ana rẹ-i, k’ẹñwu k’Ọjọ atene ana chẹñwu ogbogaga tule efu ọlai-wñ. I añọ “f’airẹ ọla-wñ rẹ . . . k’i tu [Jisọs] ubi” lefu elebọ am’ukọ kpai ujiwe-wñ. (Matiu 16:24) Alu ki f’ọla-wñ datẹ ñwu Jihofa ki la fu baptism che, e-lẹ ajẹñwu ade-wñ kpai Jihofa manyu abo ki arẹ Jihofa kp’owñ ki chẹ lonyanẹ.

3. Ẹñwu onẹ dukpẹ ki che taki neke che baptism?

Tak’ẹ che baptism, i chẹñwu ogbogaga k’ẹ kọchẹ lugbo Jihofa k’ẹ la n’ukẹdọno ki gbiti lugbo-wñ. (Gba Abo Hibru 11:6.) Alu k’ẹ m’ọla ẹnẹ ki Jihofa che k’ukẹdọno wẹ na nyọgba, abalẹ ufẹdọ wẹ ñwu Jihofa ana gba nyọgba. Tak e-lẹ ajẹñwu ẹ n’ẹdọ chacha ej’uchẹnyọ kpai echẹñwu ọna ki atene. (2 Timoti 4:2; 1 Jọn 5:3) Ichẹñwu k’onẹ ‘tale nyọnyọ bu [Jihofa] jọ, ki ar’owñ eju chaka,’ e-lẹ neke jẹñwu ki f’ọla-wñ datẹ ñwu Ọjọ ki la che baptism.​—Abo Kọlọse 1:​9, 10.a

N’UMA NYỌGBA

4. A neke kọche kwefu baptism ki Jisọs che

Gba Matiu 3:​13-​17 k’ẹ neke kọche manyu lugbo baptism ki Jisọs che. Ubilẹ, mẹ ch’oluka oji am’ene-i:

• Jisọs ch’ọma ẹkpa i che iko ki che baptism?

• Abu ma che Jisọs baptism le? Ọmi ma gba nyu Jisọs oji?

Jisọs chanẹ ukọlọ ogbogaga ki Jihofa du ñwu ef’ilẹ-i ubi ki che baptism. Gba Luku 3:​21-​23 kpai Jọn 6:​38, ubilẹ mẹ ch’oluka oji ene-i:

• Ubi ki Jisọs che baptism, ukọlọ ẹñwu Jisọs du chẹñwu ogbogaga ef’ọlai-wñ?

5. Ẹ ki chokpo eche baptism n

Ichẹñwu k’ẹ kpibe ef’ọla wẹ datẹ ñwu Ọjọ kpai eche baptism, ẹdọ wẹ neke na ga. Ama, iko awa k’ẹ ma chokpo eche baptism gẹ n. K’ẹ neke li abo ka ki ch’abalẹ, g’IFIDIO-i.

IFIDIO: Ọna K’a Neke Jẹñwu Ade Wa Kpai Jihofa Ki Lonyanẹ (1:​11)

Gba Jọn 17:3 kpai Jemis 1:​5, ubilẹ mẹ ch’oluka oji ene-i:

• Ẹñwu neke ch’atẹko onẹ ki neke mọla tanẹ ñwu baptism?

1. A f’ọla wa datẹ ñwu Jihofa ichẹñwu k’a ka ñwu Jihofa kaki a tene d’ọlai wa chaka r’owñ

2. Iko k’a che baptism, a du ña abo duu ki dọmọ kaki af’ọla wa datẹ ñwu Ọjọ mẹ

6. Ichẹñwu k’onẹ fu baptism che, i mu d’ẹnẹ ka efu akwọra unyi Jihofa

Ichẹñwu k’onẹ che baptism, i mu d’ẹnẹ ka efu akwọra unyi Jihofa ki ch’okate ọgbọ ilẹ-i. Dagba k’a ma wa kwugbo kate n, ku ma ma la nẹ wa ọna kate n, amẹñwu k’a kẹdọno ch’okate. A la achẹñwu ọna k’Ọjọ atene. Gba Eli Ekọ D’Ọjọ 25:14 kpai 1 Pita 2:​17, ubilẹ mẹ ch’oluka oji ene-i:

• Abu baptism ajẹñwu onukwu wa kpai Jihofa manyu amọmaye wa ki chẹ lonyanẹ?

ẸY’ỌLA UKỌ-I

Jisọs k’ukọ kakini Abo Kraist dukpẹ ku ma che baptism. Tak onẹ ki neke ch’e-lẹ, i dukpẹ k’ukẹdọno ki nẹ ñwu Jihofa ki gbiti, ki na chẹñwu ki Jihofa tene ki la f’ọla-wñ datẹ ñwu Ọjọ.

Ẹñwu ẹ kọchẹ?

• Ẹñwu che baptism, ẹñwu la chi ki chẹñwu ogbogaga?

• Ẹñwu ch’ojoji ki dagbade onẹ ef’ọla-wñ datẹ kpai eche baptism?

• Ẹñwu onẹ dukpẹ ki che taki neke f’ọla-wñ datẹ ki la che baptism?

KỌCHẸ MANYU

Kọchẹ ẹñwu ki Baibul ka lugbo baptism.

“Ẹñwu Che Baptism?” (I dẹ jw.org)

G’amẹñwu ki ach’atẹko onẹ ki neke che baptism.

“Ufẹdọ Ñwu Jihofa Ajẹñwu Onẹ Ki Che Baptism” (Ọdọgọ Ide, March 2020)

Gba alu k’ẹnẹkẹlẹ ka tu ki che baptism todu ufẹdọ ki nana ki nẹ ñwu Jihofa.

“Ma Tene Ku Li Kp’ọlami Kaki Ẹñwu Ku Na Kọchẹ Ch’ọgẹcha” ( Ọdọgọ ide, February 1, 2013)

Kọchẹ ẹñwu ki chi ki baptism chẹñwu ogbogaga ka k’onẹ neke kpibe ki che kpai ọna k’ẹ neke mọla tanẹ ñwu.

“I Dukpẹ Ku Che Baptism?” (Questions Young People Ask​—Answers That Work, Volume 2, oji 37)