Ebili Fu Jisọs Jama

Ubi ki Jisọs che baptism, afu kiafọ f’u nẹ le tefu ajẹtachi. I defu ajẹtachi gbogbo ọjọ ọgbọ meji [40], i j’ujẹñwu duu n, ebi la na kp’ọ nyọnyọ. Ubilẹ, Ebili lewa ji Jisọs ma, i ka ñwu kakini: ‘Ichẹñwu ki ch’Ọma Ọjọ ẹ che, d’ọda ñwu am’okwuta ki jọ-i ku ma mu rida t’ujẹñwu.’ Amaa, Jisọs dohi ñwu dabalu k’Ọtakada Ọla Ọjọ ka kakini: ‘I chẹ kọ tanẹ kakini, i ch’ujẹñwu kate ajẹñwu onẹ deju n. i ch’otila k’ẹ leb’ọla ki kwef alu Jihofa dufu chili chili.’

Ubilẹ, Ebili dabi ñọ wa kobọ Jisọs, i ka ñwu Jisọs kakini: ‘Ichẹñwu ki ch’Ọma Ọjọ ẹ che ochochi, d’ọla-wẹ rọ tanẹ kw’atẹ ochigene unyi Ọjọ ki dẹ. Todu i chẹ kọ tanẹ kakini Ọjọ ajẹñwu amonuchẹ-wñ ku ma m’ẹ du ña.’ Amaa, Jisọs dabi ñọ dohi ñwu dabalu k’Ọtakada Ọla Ọjọ ka kakini: ‘I chẹ kọ tanẹ kakini, uwẹ ki ji Jihofa Ọjọ ma n.’

Ubilẹ, Ebili m’ojanẹ ilẹ-i chakaa kpai anana manyu ojima ki defu-wñ ko ñi Jisọs. Tak i kakini: ‘Na k’amojanẹ-i chakaa kpai ojima ma chakaa ñw’ẹ ichẹñwu k’ẹ m’oji du kanẹ ñwu mi ẹr’onukate.’ Amaa, Jisọs dohi ñwu kakini: ‘Kwemi alo, Setan! Todu i chẹ kọ tanẹ kakini, Jihofa Ọjọ kate uwẹ arẹ.’

Ubilẹ, Ebili kw’ọmọ le, am’onuchẹ Ọjọ la lewa, ma la m’ujẹñwu du ñwu Jisọs jẹ. Akw’ẹgba lẹ alo, Jisọs chanẹ etakoya uchẹnyọ lugbo Ojanẹ Ọjọ. E-lẹ la ch’ukọlọ ki Jihofa kpẹ Jisọs ki wa che-i. Amonẹ añeju ẹñwu ki Jisọs akọ ma-i nyọnyọ, ma la at’ọ ubi t’ugbo duu ki alo.