Jisọs Mudi Mẹsaya

Jọn d’ọmọ atakoya ñwu amonẹ kakini: ‘Ẹnẹ ki t’omi le dọmọ awa.’ Adiko ẹgba ki Jisọs ch’ọdọ ogwuẹgwa [30], i kwi Galili w’Aji Jọrdan ugbo ki Jọn ach’amonẹ baptism. Jisọs atene ki Jọn ki ch’o baptism, amaa Jọn kakini: ‘I ch’omi dukpẹ ech’uwẹ baptism n. Uwẹ ki ch’omi baptism. Jisọs dohi ñwu Jọn kakini: ‘Jihofa atene k’ẹ che mi baptism.’ Ubilẹ, taku ma le t’efu Aji Jọrdan, Jọn la mu Jisọs du tunyu ef’omi.

Ubi ki Jisọs dufu kwefu aji lẹ, i f’adua che. Ẹrẹrẹ lẹ, ojale mu bi tẹ, afu Ọjọ la gwọru dabu ikede agwugwu oji-wñ. Ubilẹ, Jihofa kọla kwefu ojale kakini: “Uwẹ ch’Ọma-mi k’u na afẹdọ, ẹdọ-mi chẹ bọ r’ẹ.”

Alu k’afu Jihofa w’ọla Jisọs, Jisọs mudi Kraist, ku ma añọ dọ Mẹsaya. Abajọ-i, i achanẹ ukọlọ ki Jihofa kp’ọ ki wa che ef’ilẹ-i.

Ẹrẹrẹ ki Jisọs che baptism, i le t’efu ajẹtachi, i la ch’ọjọ ọgbọ meji [40] ọmọ. Alu ki d’oji kwefu ajẹtachi, i le t’ugbo Jọn. Alu ki Jisọs na mẹru Jọn, Jọn kakini: ‘Ọmala Ọjọ ki ak’ẹbiẹnẹ abo ilẹ chaka kwo lẹ dẹ!’ Ọla ki Jọn ka ki dẹ-i ajẹñwu amonẹ ma kaki Jisọs che Mẹsaya. Ẹ che m’ẹñwu ki kẹrẹbọ Jisọs alu ki defu ajẹtachi? K’a tejanẹ.