Akwu Jerusalẹm

A ki dabi t’ubi pẹẹ. Nihẹmaya ki ch’adu Onu Ataksẹksis ch’ẹnẹ Ju ka ki dodo ewo Susa ojanẹ Pẹrsia. Ọmaye Nihẹmaya ka d’inabali ẹbiẹnẹ ka wa lugbo Jerusalẹm. I kakini: ‘Amonẹ ku ma dabi ti Jerusalẹm def’ihianyi. Ma dabi ne akwu Jerusalẹm kp’alakwu-wñ k’abo Babilọn gwujo banẹ ma ta n.’ Ẹdọ Nihẹmaya chẹ kpabiẹ nyọnyọ oji ọla-i. I atene ki lo ti Jẹrusalẹm ki nya ch’atẹko ma. Tak i ch’adua k’onu ki jẹ ki lo.

Ubilẹ, onu li kaki Nihẹmaya ach’ẹdọdudu. Oñ i t’ọ ene kakini: ‘U li eju-wẹ ki dẹ aba-i mama ta n. Ẹñwu ad’ihianyi ñw’ẹ?’ Taki Nihẹmaya dohi ñwu kakini: ‘Abile k’eju-mi ma kpa ni taa alu ki Jẹrusalẹm ewo-mi chẹ gwulọ banẹ ma?’ Oñ onu t’ọ ene kakini: ‘Ẹñwu ẹ tene k’u che ñw’ẹ?’ Ẹrẹrẹ lẹ, Nihẹmaya f’adua che ef’ẹdọ-wñ. Tak i dohi ñwu onu kakini: ‘Agba, jẹñwu mi k’u lo ti Jerusalẹm k’u dabi f’akwu-wñ ne.’ Taki Onu Ataksẹksis ka ñwu Nihẹmaya kak i neke lo. Onu la che k’ẹnẹ duu ki we kobọ-ma ej’ọna alu ku ma alo. I mu Nihẹmaya du che igọbina ewo Juda, i la ñọ d’amoli ki adu f’ọna alakwu ñwu.

Alu ki Nihẹmaya lewa Jerusalẹm, i f’amakwu lẹ go lale. Tak i f’amatama kp’amagboji ewo lẹ dọ, i la ka ñwu ma kakini: ‘Mẹ li alu k’akwu wa-i kpabiẹ kade? Mẹ lewa k’a dabi chanẹ ene amakwu Jerusalẹm.’ Amonẹ lẹ jẹ, ma la chanẹ ene amakwu lẹ dabi.

Amaa, amẹnọla abo Israẹl chanẹ egw’uma iñmọ jẹ, ma la aka kakini: ‘Ichẹñwu ki ajo mutẹgwu dago oji akwu ku ma ane-i, i af’u gwulọ wanẹ.’ Abo ku ma an’akwu lẹ neti r’ina ku ma abu ma-i n, ma na an’akwu lẹ alo waa. Akwu lẹ na gbiti, i la na gbọgba ny’ọgba.

Amẹnẹbi lẹ f’ibe kpẹ dama ku ma k’uja bọ Jerusalẹm achigili. Alu k’amiJu gb’ọla lẹ, okpo f’uma mu. Amaa, Nihẹmaya ka ñwu ma kakini: ‘Mẹ ki ch’okpo n. Jihofa ach’atẹko wa.’ I m’amadide ko jọ ku ma dide abo ku ma ach’ukọlọ lẹ, e-lẹ la jẹ k’amẹnẹbi ma ki neke k’uja b’uma n.

Ma f’akwu lẹ kp’amalakwu ki bọ ne kpa ubi ọjọ oojẹ nyoke meji [52] ku ma chanẹ-wñ. Nihẹmaya m’abo Lifai chakaa ko wa Jerusalẹm ñw’uyọ edatẹ lẹ. Tak i f’uma chi jọ uchẹ am’akeli meji. Ma tẹgwu nyatẹ kw’Alakwu Ẹbi-Omi taki uchẹ ka le t’ọwọ awọtọ, uchẹ ekeji la le t’ọwọ awohi. Ma f’ọkakachi, ma gw’oke, ma la d’umolo jẹnyu ñw Ọjọ. Ẹzra ko uchẹ ka, Nihẹmaya la ko uchẹ ekeji, taku ma lewa de ef’unyi Ọjọ. Ọchakaa amonẹ lẹ, t’abokẹlẹ, t’abobulẹ kp’amọma kẹkẹ ch’ichẹbọ ñwu Jihofa, ma la gwogwuyọ. Abo ku ma j’ọnajiji la gb’ekwukwu uyọ ma.