Ẹsta F’abo-wñ Jadu

Ẹsta ch’ẹnẹ Ju i che, i la dodo ef’ewo Susa. Ọdọ wewe tak iko-i wa, Nebiukadnẹza k’abo akwọra unyi Ẹsta kwi Jerusalẹm. Ọma efu-wñ k’odu-wñ kọ Mọdẹkai ki ch’adu Ahasuẹrọs ki ch’Onu Pẹrsia nẹ Ẹsta gba-i.

Onu Ahasuẹrọs atene ki n’ọya. Amadu-wñ k’abobulẹ ki nyọ tule ojanẹ lẹ wa ñwu, ma la du Ẹsta onugo w’ugbo-wñ. Ef’abobulẹ chakaa ku ma ko wa, onu che Ẹsta kate oñ i du kwefu ma. Mọdẹkai ka ñwu Ẹsta kak i we d’ọla-wñ tejugede ka k’ẹnẹ Ju i che.

Heman ch’ẹnutọgba amagboji, i la ah’ika ne. I atene k’abo duu ki na dojikanẹ-wñ. Amaa, Mọdẹkai kọ ech’abalẹ, e-lẹ jẹñwu Heman chanẹ ech’ulaka Mọdẹkai nyọnyọ, i la atene ki du kpa. Alu ki Heman lewa ma k’ẹnẹ Ju Mọdẹkai che, i f’ibe kpẹ ki m’abo Ju chakaa ki d’ojanẹ lẹ ko kpa. I ka ñwu onu kakini: ‘Abo Ju ch’abo ẹbiẹnẹ ma che, i dukpẹ k’onu ki mu ma ko kpa rinyọ.’ Tak Ahasuẹrọs dohi ñwu kakini: ‘Che ma alu ki r’ẹ eju,’ i la d’ukpahiu ñwu todu ki ch’ọda. Heman f’ọda che ku ma m’abo Ju chakaa ko kpa ọjọ k’ochu ejodudu [Adar] n’olu mẹgwẹta [13]. Jihofa na g’ẹñwu duu ki Heman ache-i.

Ẹsta n’uma duu lugbo ọda ki dẹ-i n. Taki Mọdẹkai d’ọtakada ọda ki Heman kpẹ ñw’amonẹ lẹ kp’uchẹ ru Ẹsta, i la ka ñwu kakini: ‘Lo k’ẹ nya kọla ñwu onu.’ Oñ Ẹsta dohi kakini: ‘Ichẹñwu ku ma ma d’ọnẹkẹlẹ abẹk onobulẹ duu n ki le t’ugbo onu, ekpa ma akpa-i. Onu la dọ mi ku w’ugbo ñwu akw’ọjọ ogwuẹgwa [30] ta n! Ama, na alo. Ichẹñwu k’onu m’ọkpa-wñ du nadala ñwu mi, na adeju. I ma muda chabalẹ n, ekwu na kwu.’

Ẹsta le t’unyi onu, alu k’onu f’u li, i m’ọkpa-wñ du nadala ñwu Ẹsta. Ẹsta le t’ugbo onu, onu la ka ñwu Ẹsta kakini: ‘Ẹñwu ẹ tene k’u che ñw’ẹ Ẹsta?’ Tak Ẹsta dohi ñwu kakini: ‘Na tene ed’onu kpai Heman ku ma wa oko ujẹñwu k’u na ahi todu ma.’ Oko ujẹñwu lẹ oñ ma dẹ oñ Ẹsta ka ñwu ma ku ma dabi wa ọjọ omunẹ gẹ. Alu ku ma d’oko ujẹñwu k’Ẹsta dọ ma wa onukeji lẹ, onu t’Ẹsta ene kakini: ‘Ẹñwu ẹ tene k’u che ñw’ẹ?’ Tak Ẹsta dohi kakini: ‘Ẹnẹ ka atene m’omi kpai abo mi ko kpa rinyọ. Agba m’uwa gba.’ Tak onu t’Ẹsta ene kakini: ‘Ẹnẹ ch’ẹnẹ lẹ taa?’ Tak Ẹsta dohi ñwu kakini: ‘Heman ẹnẹ bibi ki dẹ-i lẹ.’ Ẹdọ Ahasuẹrọs mu kpabiẹ nyọnyọ, i la jẹñwu ma mu Heman du kpa ẹrẹrẹ.

Amaa, ẹnẹ duu neke kp’ọda ki Heman che lẹ lu n dagba ch’onu. Tak Onu mu Mọdẹkai du ch’ẹnutọgba amagboji, i la m’ukpahiu du ñwu ki ch’ọda etitọ omunẹ. Oñ Mọdẹkai ch’ọda etitọ ki jẹñwu abo Ju ku ma neke dide ọla-ma ichẹñwu ku ma wa k’ogwu bọ ma. Ọjọ k’ochu Adar n’olu mẹgwẹta [13], abo Ju f’amẹnọla ma du. Kw’iko lẹ, ma na ch’uyọ edu ku ma du ki dẹ-i ọdọ-ọdọ.