Jihofa Jẹñwu Onuchẹ-wñ Ki Gba Hẹzẹkaya Tanẹ

Onu ojanẹ abo Asiria m’ọlọpu mẹgwa [10] ojanẹ Israẹl gba ny’ọwọ. Abajọ-i, Sẹnakẹrib onu abo Asiria atene ki m’ọlọpu meji ki d’ojanẹ Juda gba. I chanẹ egba am’ewo ki d’ojanẹ Juda okoka. Amaa, ewo k’eju-wñ kado jali che Jerusalẹm. Ẹñwu ka ki Sẹnakẹrib ma n’uma-wñ n che kaki Jihofa adide Jerusalẹm.

Hẹzẹkaya onu Juda, r’ọkọ nana ñwu Sẹnakẹrib todu ki ti Jerusalẹm nọ. Amaa, dagba ki Sẹnakẹrib gb’ọkọ-lẹ, i kpẹ abogwu-wñ lo ti Jerusalẹm ku ma k’uja b’uma. Abo ewo lẹ la dọmọ ach’okpo alu k’abogwu Asiria na mẹru ma. Ubilẹ, taki Hẹzẹkaya ka ñwu ma kakini: ‘Mẹ ki ch’okpo n, abogwu Asiria che n’ukpahiu. Amaa, Jihofa ach’atẹko wa k’a neke f’uma du.’

Sẹnakẹrib kp’onuchẹ-wñ ki che Rabshakẹ [Agboji abo ku ma ad’omi ñwu onu ñmọ] ki lo ti Jerusalẹm ki nya ny’amonẹ lẹ anyinacha. Rabshakẹ lẹ dago ọdọda ewo lẹ, tak i d’omu nyatẹ kwa kakini: ‘Jihofa neke gba-mẹ tanẹ n. Mẹ ki jẹñwu Hẹzẹkaya ki gb’umẹ ibe n. I n’ọjọ duu ki neke gba-mẹ tanẹ kwef ọwọ-wa n.’

Hẹzẹkaya tẹ Jihofa ene kaki ẹñwu owñ ache. Jihofa ka ñwu kakini: ‘Ẹ ki ch’okpo todu ọla ki Rabshakẹ lẹ ka n. Sẹnakẹrib neke gb’ewo Jerusalẹm ny’ọwọ n.’ Ubilẹ, Sẹnakẹrib k’ọtakada ru Hẹzẹkaya, i ka efu ọtakada lẹ kakini: ‘Mẹ gb’ọwọ ẹlọ. Jihofa neke gba mẹ tanẹ n.’ Oñ Hẹzẹkaya ch’adua ru Jihofa kakini: ‘O Jihofa na abi k’ẹ m’uwa gbatanẹ kwef ọwọ-wñ, todu k’abo duu ki ma ka k’uwẹ kate ch’Ọjọ ochochi.’ Jihofa ka ñwu kakini: ‘Onu Asiria agwudu w’efewo Jerusalẹm n. Na dide ewo mi-i k’u gb’ọ tanẹ.’

Sẹnakẹrib na kpibe kak i dẹ pẹẹ Jerusalẹm ach’e-wñ. Amaa, odu ọjọ ka, Jihofa kpẹ onuchẹ-wñ ka lo t’uru abogwu Asiria ọdọda ewo Jerusalẹm. Onuchẹ lẹ kpa abogwu Asiria onẹ icham ny’ọgwọkọ ugbo ogwumẹlu ny’ọgbọ mẹlẹ ny’oke mẹlu [185,000]! Onu Sẹnakẹrib ch’ofu abogwu ẹgbiti ki nẹ. E-lẹ la jẹñwu mu dabi t’unyi-wñ oji ẹdalọ. Jihofa dide Hẹzẹkaya kpai ewo Jerusalẹm dabalu k’i gbalu. Ichẹñwu k’ẹ dẹ Jẹrusalẹm iko lẹ, ẹ ma kẹdọno Jihofa kak i agba mẹ tanẹ?