Rehab M’amatuanẹ Meji Ko Maja

Ẹgba k’abo Israẹl meji lo nya tu anẹ Jẹriko, ma ru ef’unyi onobulẹ ka ku ma dọ Rehab. Alu k’onu Jẹriko gbọ, i f’amisoja kpẹ lo t’unyi Rehab. Rehab m’amatuanẹ lẹ ko maja j’ojokunyi-wñ, tak i la ka ñwu am’isoja lẹ ku ma lo t’ọwọ omunẹ. Rehab ka ñwu amatuanẹ lẹ kakini: ‘Na ch’atẹko mẹ todu k’u che ma kaki Jihofa dugbo mẹ, i la m’anẹ-i du ñwu mẹ mẹ. Mẹ agba, mẹ gbalu ñwu mi kaku mẹ ajadu abo akwọra unyi-mi.’

Amatuanẹ lẹ ka ñwu Rehab kakini: ‘A gbalu ñwẹ kak ẹñwu duu anya kẹrẹb’abo akwọra unyi-wẹ n.’ Ma ñọ ka ñwu kakini: ‘F’ikwu ekpikpa ji t’alu iwido wẹ, iko lẹ oñ abo akwọra unyi-wẹ anya n’ujadu.’

Taki Rehab jẹñwu ma le b’ikwu lẹ wanẹ alu iwido-wñ. Ma le t’ojuwo, ma kpo maja j’ọmọ ọjọ mẹta taku ma dabi t’ugbo Joshua. Ubilẹ, abo Israẹl m’Ohimini Jọrdan gwodaba ma la f’ọla mu ku ma m’anẹ lẹ gba. Jẹriko ch’ewo ejodudu ku ma gba. Jihofa ka ñwu ma ku ma l’ewo lẹ daka onuka ọjọ ka gbogbo ọjọ mẹfa. Ọjọ ẹkebie, ku ma l’ewo lẹ daka onu mebie. Ubi ku ma ch’abalẹ, tak amatama f’ọkakachi fa, am’isoja lẹ la kpogwu taa. Akwu ewo lẹ la chanẹ egwulọ! Ama, unyi e-Rehab ki d’ọla akwu lẹ muda gwulọ n. Rehab kp’abo akwọra unyi-wñ f’ujadu nẹ todu ku ma kẹdọno Jihofa.