UKỌCHẸ 25

Ma F’unyiabo e-Ọjọ Kọ

Ẹgba ki Mosis d’oji Uwo Sainai, Jihofa ka ñwu ki f’unyi ogbogaga ka kọ ñwu, e-ku ma adọ k’unyiabo ugbo k’amọma Israẹl awa r’Ọjọ. Unyiabo ki dẹ ch’unyi ku ma neke na nẹ t’ugbo duu ku ma alo.

Jihofa kakini: ‘Ka ñwu abo Israẹl ku ma d’ẹñwu duu ku ma nẹ chele ku ma f’unyiabo lẹ kọ.’ Abo Israẹl d’ọjamalia, ajifa, okwuta ekpikpa, okwuta akoko ojoji ojoji kp’amẹñwu ijaga duu chele. Ma ñọ d’edudu amẹla, ukpo linẹn, añọ amẹla ojoji ojoji kp’amẹñwu wewe omunẹ chele gẹ. Ma dọmọ ak’amẹñwu wewe wa taku Mosis ka ñwu ma kakini: ‘E-ku mẹ ko wa-i chẹ bọjọ mẹ! Mẹ ki dabi k’amẹñwu omunẹ wa gẹ n.’

Abo Israẹl k’amẹñwu ele wa du ch’abunẹ unyiabo ku ma akọ

Abokẹlẹ kp’abobulẹ wewe ku ma ach’ukọlọ-ọwọ ch’atẹko ef’ukọlọ unyiabo lẹ ekọ. Jihofa d’ugbeju ñwu ma ku ma neke ch’ukọlọ lẹ. Abo ka ahi owu kp’ukpo. Abomunẹ la chiya ny’ukpo. Abo ki bọ la an’ọdọ, ach’ukọlọ ojoji ojoji kp’ọjamalia, ma la ñọ ach’ọka ny’oli efa.

Ma k’unyiabo ki dẹ lọna ki Jihofa du tejugede ñwu ma. Ma hi ukpo-al’ọna ki ach’utọ ku ma du ch’adaru Uña Kiafọ kp’e-Kiafọ Tule. Ma d’akpati alo ekpẹ ku ma du oli akesia kp’ọjamalia ch’ọna-wñ tefu Uña Kiafọ Tule. Akete agege ọjamalia, itebulu kp’ubọ ku ma agw’otulale jo oji-wñ defu Uña Kiafọ lẹ. Ef’ologbo-wñ igbajo ebije kpikpa kp’ubọ ichẹbọ lile dọmọ. Akpati alo ajẹñwu abo Israẹl na rewa ugbalutanẹ ku ma che ñwu Jihofa kaki ma ana leb’ọda ki Jihofa du ñwu ma. Ẹ che m’ẹñwu k’alo che? Ugbalutanẹ ogbogaga i che.

Jihofa chi Erọn kp’amọma-wñ ku ma mud amatama ki ach’ukọlọ ef’unyiabo-wñ. Ma anya deju t’unyiabo ki dẹ, ma la anya ch’ichẹbọ ñwu Jihofa ọmọ. Erọn kate ki ch’agboji amatama, oñ Jihofa jẹñwu ki tefu Uña Kiafọ Tule. I la ach’alẹ onuka ef’ọdọ todu ki ch’ichẹbọ ñw’ọla-wñ, kp’abo akwọra unyi-wñ manyu ọgbọ amọma Israẹl.

Abo Israẹl f’unyiabo Ọjọ lẹ kọ kpa anubi ọdọ ka ku ma kw’Ijipt. Ma la f’ugbo ku ma arẹ Jihofa nẹ.

Jihofa jẹñwu ojima-wñ ki m’unyiabo lẹ gba ny’ọwọ, i la m’akpa du w’oji unyiabo lẹ. Ẹgba duu k’akpa lẹ d’oji unyiabo, abo Israẹl agwugwu ugbo ku ma dẹ. Ama, ẹgba duu k’akpa lẹ le ny’atẹ, amọma Israẹl onugo am’ẹrẹ ko ny’ulẹ ma. Ma m’unyiabo lẹ ko taku ma leb’akpa alo.

“Tak u gbọ omukọla lile kwo oj’ede kakini, ‘Mẹ go, ebu Ọjọ dugbo amonẹ, I la agẹnẹ kp’ama, oñ ama ach’amonẹ-wñ, Ọjọ onugo la ad’ugbo ma k’i ch’Ọjọ ma.’” —Ọla Ebitẹ 21:3