Ma Du Jisọs Kpa Ugbo Ku Ma Adọ Gọlgọta

Amatama ogijo mu Jisọs du lo t’unyi Pailet ki che igọbina. Pailet t’uma ene kakini: ‘Ajọ ẹñwu mẹ agwu nyu ọnẹkẹlẹ-i?’ Ma dohi ñwu kakini: ‘I ka k’owñ ch’onu!’ Oñ Pailet tẹ Jisọs ene kakini: “Uwẹ ch’Onu amiJu?” Oñ Jisọs dohi ñwu kakini: “I ch’ef ilẹ-i u gb’ọda Ọfẹ-mi kwo n.”

Ubilẹ, Pailet du Jisọs kp’uchẹ ru Hẹrọd ki ch’onu anẹ Galili ki tejanẹ ichẹñwu ki n’ẹñwu ẹbiẹnẹ duu ki li ki Jisọs che. Amaa, Hẹrọd onugo li ẹñwu ẹbiẹnẹ duu ki Jisọs che n. Todulẹ i f’u kpẹ dabi t’ugbo Pailet. Taki Pailet ka ñwu amonẹ lẹ kakini: ‘Omi kpai Hẹrọd li ugbo duu ki j’abi ẹñwu duu ku mẹ gw’ajọ ny’u lẹ n, todulẹ na t’ọ nọ ki lo.’ Tak amonẹ lẹ chanẹ ekpogwu kakini: ‘Mu du kpa! Mu du kpa!’ Tak am’isoja chanẹ egwo Jisọs, ma t’itọ ny’ọla-wñ, ma la ar’ọkpọ ñwu. Ma la f’ikeke che dabu ikẹbẹ, oñ ma mu du d’o oji. Ma la ach’o echiya kakini: ‘Agba-oo, Onu amiJu.’ Taki Pailet dabi ka ñwu ọwọ amonẹ lẹ kakini: ‘U muda li ẹñwu ẹbiẹnẹ duu k’ọnẹkẹlẹ-i che no.’ Amaa, amonẹ lẹ kpogwu kakini: “M’u du kamoli!” Taki Pailet mu Jisọs du ñwu ma ku ma mu du kpa.

Ma mu Jisọs du lo t’ugbo ku ma adọ Gọlgọta, ma mu du kamoli ọmọ, ma la m’oli lẹ du dago anẹ. Jisọs ch’adua kakini: ‘Ata, mu du ba ñwu ma todu ma m’ẹñwu ku ma ache-i n.’ Tak amonẹ lẹ chanẹ eche Jisọs echiya kakini: ‘Ichẹñwu ki ch’Ọma Ọjọ ẹ che, kw’oji oli-ukwu lẹ wanẹ ke! F’ọla-wẹ jadu.’

Ẹnẹ ka ef’amajoji meji ku ma kamoli akolo Jisọs lẹ ka ñwu Jisọs kakini: “Rewa mi ẹgba k’ẹ lewa ojanẹ wẹ.” Oñ Jisọs gbalu ñwu kakini: “Uwẹ anya d’ugbo-mi efu Paradais.” Ọrọka ọjọ lẹ, ẹchubi lewa b’ojanẹ lẹ ma, i la dẹ gbogbo awa mẹta. I che n’amakọchẹ Jisọs ku ma dago mẹru ugbo ku ma du kamoli, Meri ki ch’iye Jisọs onugo la dago ọmọ. Taki Jisọs ka ñwu Jọn ki dejutẹ Meri dab iye-wñ.

Ọtitala-wñ, Jisọs kakini: “I takpa mẹ!” tak i m‘oji-wñ dalọ oñ i m’iñmi da. Ẹrẹrẹ lẹ, ane emiejo lile ka chanẹ. Oñ ukpo al’ọna ef’unyi ọjọ ki d’agbade uña Kiafọ kp’uña e-i Kiafọ Tule mu kpana r’eji kw’atẹ gbogbo wanẹ. Tak agboji am’isoja kakini: ‘Ochochi, Ọma Ọjọ ẹnẹ-i che.’