Abu A Ch’ukọlọ Uchẹnyọ Ejẹ?

I dẹ pẹẹ, Jihofa ad’Ojanẹ-wñ k’amihianyi duu ki d’ilẹ-i w’ukpoji. Inabali ki dẹ ch’inabali ọmẹmẹlẹ k’ọgbọ amonẹ dukpẹ ku ma gbọ. Jisọs atene k’amakọchẹ-wñ ki kpukpẹ inabali-i ñwu ọgbọ amonẹ! (Matiu 28:​19, 20) Abu Amẹnibenu Jihofa aleb’ọda ki Jisọs du?

1. Abu ẹñwu ki Matiu 24:14 ka achẹ le eñini-i?

Jisọs ka tanẹ kakini: “Ma la atakoya Uchẹnyọ e-Ojanẹ-i ef ọgbọ ilẹ du ugbo k’onẹ tẹ kade.” (Matiu 24:14) Amẹnibenu Jihofa akpukpẹ efu ech’ukọlọ ogbogaga ki dẹ kp’ẹdẹbọ. A dọmọ aj’uchẹnyọ-i ọgbọ ilẹ-i daka alu ichi ki tu 1,000 le! Ukọlọ lile ki dẹ atene ukpahiu nana manyu edẹ arọne arọne. I ma ch’abunẹ kwugbo Jihofa n, onẹ neke che n.

2. Ẹñwu ch’amẹñwu k’a che k’a neke j’uchẹnyọ r’amonẹ?

A j’uchẹnyọ r’amonẹ ugbo du k’a neke li ma. Dabu Abo Kraist ejodudu, a j’uchẹnyọ r’amonẹ “unyi unyi.” (Ẹwñ 5:​42) Ọna ọmẹmẹlẹ ki dẹ-i ajẹñwu wa neke j’uchẹnyọ r’amonẹ wewe ọdọ duu. Todu k’amonẹ ma ch’adunyi iko du n, a ñọ j’uchẹnyọ r’amonẹ ef’ọja. Iko duu, a tene uña k’a neke du k’ọla lugbo Jihofa kpai ibe ki nẹ ñwu amonẹ.

3. Ẹnẹ n’ukọlọ uchẹnyọ ejẹ r’amonẹ?

Abo Kraist ochochi duu n’ukọlọ ej’uchẹnyọ r’amonẹ. A d’ukọlọ k’a nẹ ki dẹ-i ch’iya n. A ch’ukọlọ lẹ kp’ẹdọ wa chaka alu k’ukpahiu wa bọjọ todu k’a ma kaki ukọlọ lẹ ajadu ọlai amonẹ. (Gba 1 Timoti 4:​16.) Ma r’ọkọ ñwu wa oji ukọlọ ki de-i n, todu Baibul kakini: “Ele ofo oñ mẹ gba, ele ofo lẹ mẹ ki d’u ñw onẹ.” (Matiu 10:​7, 8) I ch’ọgbọ amonẹ aneti r’ọla wa n. Ama, a na j’uchẹnyọ alo waa todu ichẹñwu k’a ch’abalẹ, a leb’ọda Jihofa, a la jẹñwu ẹdọ-wñ bọ.

N’UMA NYỌGBA

4. A chẹñwu duu k’a neke che k’a j’uchẹnyọ r’amonẹ duu

IFIDIO: Ọna K’a J’uchẹnyọ “Gbogbo W’ukade Anẹ Ilẹ” (7:​33)

• Ẹñwu ẹ ñeju lugbo ọna k’Amẹnibenu Jihofa achẹñwu duu ku ma neke che ku ma j’uchẹnyọ r’amonẹ?

Gba Matiu 22:39 kpai Abo Rom 10:​13-​15, ubilẹ mẹ ch’oluka oji am’ene-i:

• Abu uchẹnyọ eje wa adu ña kaki a fẹdọ abo omunẹ?

• Eju ẹñwu Jihofa adu g’abo ku ma aj’uchẹnyọ?​—G’ọgba 15.

5. A ch’abo ukọlọ Ọjọ

Amẹñwu wewe k’a che adu tejugede kaki Jihofa an’ukọlọ wa le. G’ujiwe: Efu ojanẹ New Zealand, ọmaye ẹnẹkẹlẹ ka ku ma adọ ki Pọl ch’oluka kp’onobulẹ ka iko ki dufu na j’uchẹnyọ unyi unyi ọrọka ọjọ ka. Odudu ọjọ lẹ, onobulẹ lẹ ch’adua r’Ọjo, i la d’odu Ọjọ, Jihofa, chekwu efu adua-wñ. I ka efu adua-wñ kakini ki ẹnẹ ka ki wa  dejudo owñ. Pọl kakini “Awa mẹta ubilẹ, owñ u w’unyi onobulẹ lẹ.”

Gba 1 Abo Kọrint 3:​9, ubilẹ mẹ ch’oluka oji ene-i:

• Abu ujiwe ki dabu e-ojanẹ New Zealand du ña kaki Jihofa an’ukọlọ wa le?

Gba Ẹwñ 1:​8, ubilẹ mẹ ch’oluka oji ene-i:

• Ẹñwu chi k’a tene abunẹ kwugbo Jihofa ki nẹ wa le k’a neke ch’ukọlọ uchẹnyọ ejẹ wa?

Ẹ che ma?

Efu aladi duu efu ujeju wa, a kọchẹ ẹñwu ki neke ch’atẹko wa k’a neke j’uchẹnyọ. Ichẹñwu k’ẹ w’ujeju wa-i mama mẹ, ẹñwu ch’ibe ẹ lugbo am’ukọchẹ k’a nẹ kw’ọmọ?

6. Ọda Ọjọ owñ a lebọ alu k’a j’uchẹnyọ

Ẹgba Abo Kraist ejodudu, ma kobọ am’akọchẹ Jisọs ku ma f’ọwọ n’uchẹnyọ ejẹ. Abo Kraist lẹ d’ọda chekwu k’uchẹnyọ ejẹ ki lonyanẹ. (Abo Filipai 1:7) Amẹnibenu Jihofa ach’abalẹ eñini-i gẹ.a

IFIDIO: Ed’ọla Ọda Dide Uchẹnyọ Ejẹ (2:​28)

Gba Ẹwñ 5:​27-​42, ubilẹ mẹ ch’oluka oji ene-i:

• Ẹñwu chi k’a ma na d’ọwọ n’ukọlọ uchẹnyọ ejẹ n?​—G’amọgba 29, 38, kpai 39.

ẸY’ỌLA UKỌ-I

Jisos d’ọda ñwu am’akọchẹ-wñ ku ma j’uchẹnyọ ojanẹ duu. Jihofa ach’atẹko amonẹ-wñ ku ma neke ch’ukọlọ-i.

Ẹñwu ẹ kọchẹ?

• Abu Amẹnibenu Jihofa aj’uchẹnyọ ọgbọ ilẹ-i duu?

• Abu uchẹnyọ ejẹ wa adu tejugede kaki a kwula ñwu abomunẹ?

• Ẹ neju kaki ej’uchẹnyọ neke jẹñwu ẹdọ onẹ bọ? Ẹñwu chi k’ẹ kabalẹ?

KỌCHẸ MANYU

G’alu k’Amẹnibenu Jihofa aj’uchẹnyọ r’amonẹ ef’ewo lile.

Egbibenu Ọna Ọkpu Ef’ọja Ef’ewo Paris (5:11)

Ẹñwu Amẹnibenu Jihofa che ku ma neke ch’atẹko abo ku ma rule ogwu kw’ojanẹ omunẹ?

Ọna K’a Ch’atẹko Abo Ki Rule Ogwu Ku Ma Neke Kọchẹ Lugbo Ọjọ (5:59)

Netiru ẹñwu k’onobulẹ ka ka lugbo ọna k’ẹdọ-wñ bọ todu ki ad’ọgbọ duu ọlai-wñ j’uchẹnyọ.

Ẹdọ Mi Chẹ Bọ Todu Ku Tu Ẹñwu Ki Cheju-wñ (6:29)

Kọchẹ lugbo am’ọla k’a du kw’ukọtu ki jẹñwu uchẹnyọ ejẹ ki lọla ñwu wa.

“Am’ajuchẹnyọ Ojanẹ Ọjọ D’ọla Ma Lo T’ukọtu” (God’s Kingdom Rules!, oji 13)