Ẹñwu Duu Neke Kpọna Nyu Ma N

I n’ọnẹkẹlẹ ka ki chẹnẹ ọlọ ki ma neke lulẹ n ki abi ebi ejumomi alugbọna unyi Ọjọ ọjọñwa ọjọñwa. Ọrọka ọjọ ka, alu ki li Pita kpai Jọn ku ma awa ef unyi Ọjọ i ka ñwu ma kakini: ‘Agba mẹ d’ẹñwu ka ñwu mi.’ Taki Pita ka ñwu kakini: ‘U n’ẹñwu ki t’ọkọ le ku na adu ñw’ẹ. Ef’odu Jisọs, kwanẹ k’ẹ lulẹ!’ Taki Pita ch’abunẹ ñwu kwanẹ. ẹrẹrẹ lẹ ọnẹkẹlẹ lẹ chanẹ elulẹ! Oñ ọwọ amonẹ ku ma j’ọmọ chakaa chanẹ egwogwuyọ todu ẹñwu awuwu ku ma li, e-lẹ la jẹñwu amonẹ wewe efu ma mu d’amakẹdono.

Amaa, amatama kpai amiSadusi chanẹ ewẹdọ. Ma gwonyu amẹnukpuchẹ, ma la m’uma ko jef’unyi uga. oñ ma t’uma ene kakini: ‘Ẹnẹ d’ukpahiu ñwu mẹ ku mẹ ch’ọga ọnẹkẹlẹ ki dẹ-i kpa?’ Taki Pita dohi ñwu ma kakini: ‘Ukpahiu wa kw’ugbo Jisọs Kraist ku mẹ kpa lẹ.’ Oñ abogijo lẹ chanẹ ekpogwu kakini: ‘Mẹ dabi kọla lugbo Jisọs gẹ n!’ Amaa, amẹnukpuchẹ lẹ kakini: ‘A neke we ekọla lugbo-wñ n. A la ad’ọwọ no n.’

Ẹrẹrẹ ku ma ti Pita kpai Jọn nọ, ma le t’ugbo amẹnukpuchẹ ki bọ nya ka ñwu ma ẹñwu chakaa ki che. Ma ch’adua dama, ma bi Jihofa ebi kakini: ‘Ch’abunẹ wa k’a n’ẹdẹgbo ef’echukọlọ wẹ.’ Jihofa d’afu ki afọ ñwu ma, ma la na j’uchẹnyọ kpai ech’ọga amonẹ kpa alo waa. Tak amonẹ wewe m’ibe rida t’abo ẹdekono. Ẹdọ amiSadusi mu kpabiẹ nyọnyọ, oñ ma m’amẹnukpuchẹ ko rọ jef unyi uga. Amaa, odu ọjọ lẹ, Jihofa kp’onuchẹ-wñ ka uchẹ, i m’ọna unyi uga lẹ bi, i la ka ñwu amẹnukpuchẹ lẹ kakini: ‘Mẹ mu dabi tef’unyi Ọjọ, ku mẹ kọ amonẹ ẹñwu ọmọ lẹ.’

Odudu ọjọñwa-wñ, abo ka ka ñwu abo Unyi Ajọ amiJu kakini: ‘Ọna unyi uga lẹ chẹ re! Amaa, abo ku ma mu lẹ dọmọ lẹ gẹ n! Ma def unyi Ọjọ akamonẹ ẹñwu ọmọ lẹ gẹ!’ Oñ ma dabi f’amẹnukpuchẹ lẹ mu wef’Unyi Ajọ lẹ gẹ. Tak agboji amatama ka ñwu ma kakini: ‘A che d’ọda ñwu mẹ ku mẹ we kọla lugbo Jisọs!’ Amaa, Pita dohi ñwu ma kakini: “I ch’otila k’a gb’omu Ọjọ gbọ t’ọda e-amonẹ le.”

Tak amagboji ọna-Ọjọ-egwa ku ma d’Unyi Ajọ lẹ chanẹ ewẹdọ nana, ma la atene ku ma m’amẹnukpuchẹ lẹ ko kpa. Amaa, ẹnẹ Farisi ka k’odu-wñ kọ Gamaliẹl kpo dago, oñ i ka ñwu ma kakini: ‘Mẹ ki na che yẹẹ! Ọjọ neke dubi abokẹlẹ-i o. Mẹ neke b’Ọjọ juja?’ Oñ ma le b’ibe ki du ñwu ma. Anubi lẹ, ma n’ebije nẹ gwo amẹnukpuchẹ lẹ, ma la dabi d’ọda ñwu ma ku ma we j’uchẹñyọ, taku ma jẹñwu ma lo. Amaa, e-lẹ jẹñwu amẹnukpuchẹ lẹ t’uchẹnyọ ejẹ nọ n. Ma n’ẹdẹgbo na j’uchẹnyọ ef’unyi Ọjọ kpai unyi t’unyi.