Ma Lebọ Ugbalutanẹ Ku Ma Che Ñwu Jihofa N

Jihofa ka ñwu Mosis kakini: ‘Mu tẹgwu w’ugbo-mi oj’uwo. Na akọ am’ọda-mi j’oji okwuta pataka meji, u la adu ñwẹ.’ Mosis mu tẹgwu t’ojuwo, i la gwugwu ọmọ ọjọ ọgbọ meji kpai odu ọgbọ meji [40]. Alu ki dọmọ, Jihofa kọ ọlọda mẹgwa j’oji okwuta pataka meji lẹ, oñ i mu du ñwu Mosis.

Alu ki dẹ pẹẹ, abo Israẹl neju kaki Mosis t’uma nọ mẹ. Taku ma ka ñwu Erọn kakini: ‘A tene ẹnẹ ki anẹ wa le. F’ọjọ che ñwu wa!’ Erọn la kakini: ‘Mẹ m’ọjamalia-mẹ ko wa.’ I f’ọjamalia yọ, i la mu du ch’ojibo ọma okwunọ. Oñ ma kakini: ‘Ọma okwunọ ki dẹ-i ch’Ọjọ wa ki nẹ wa kw’Ijipt!’ Ma chanẹ edojikanẹ ñwu ojibo ọma okwunọ lẹ, ma la chanẹ eyọ. Ẹ neju kaki ẹñwu ẹbiẹnẹ i che? I-i, todu ma gbalutanẹ kaki ma nya dojikanẹ ñwu ọjọ omunẹ n chai Jihofa kate. Ama, ma leb’ugbalutanẹ ku ma che lẹ n.

Jihofa che li ẹñwu ku ma jọ ache lẹ, i la ka ñwu Mosis kakini: ‘Gwọru tanẹ t’ugbo abo Israẹl. Ma dọmọ adu mi re ma la adojikanẹ ñwu ọjọ olemi.’ Mosis mu dabi tanẹ kw’ojuwo kpai okwuta pataka meji lẹ.

Alu ki na mẹr’ugbo k’uru ma dẹ, Mosis chanẹ egbọ eli ku ma akọ. I che li ma alu ku ma jọ atido ku ma la adojikanẹ ñwu ojibo ọma okwunọ lẹ. Ẹdọ Mosis mu kpabiẹ nana nana. I m’okwuta pataka meji lẹ du kpọfọ ranẹ. Ẹrẹrẹ lẹ, i m’ojibo ọma okwunọ lẹ du kpọfọ. Ubilẹ, i t’Erọn ene kakini: ‘Abu abo-i che le ku ma f’ẹ eju gwula k’ẹ ch’ẹbiẹnẹ aba-i taa?’ Oñ Erọn dohi kakini: ‘Ẹ ki wẹdọ n. Ẹ che ma alu k’abo-i dẹ. Ma tene ku ma n’ọjọ omunẹ, oñ u ko am’ọjamalia ma ny’una k’u ch’ojibo ọma okwunọ kwefu-wñ!’ Erọn dukpẹ k’i chẹñwu k’i che lẹ n. Mosis mu dabi t’ojuwo ki chologwu bi Jihofa ki du ba ñwu ma.

Jihofa mu du ba ñwu abo ku ma atene ku ma netir’u. Ẹ li alu ki chẹñwu ogbogaga ñwu abo Israẹl ku ma na lebọ Mosis ki ch’ẹnẹ utọgba ma?