Ukọchẹ 13

Ab’ẹneke li Ọjọ Egwa Ochochi Lẹ?

Ọjọ egwa chakaa b’Ọjọ ẹdọ, abẹk okate? (1)

Ẹwñ chi k’ọjọ egwa wewe ku ma ka ku ma ch’aboKraist jọmọ taa? (2)

Ab’ẹneke ma aboKraist ochochi? (3-7)

1. Jisọs chanẹ ọjọ egwa ẹnẹKraist ochochi oka. Todulẹ eñini añọla abẹk ujọ amadojikanẹ ñwu Jihofa Ọjọ oka dukpẹ ki dọmọ tila. (Jọn 4:23, 24; Abo Ẹfẹsus 4:4, 5) Baibul k’ukọ kakini abo ree al’ejọna ki dẹ fiili lẹ t’ef iñmi-i.—Matiu 7:13, 14.

2. Baibul katanẹ kakini ubi k’amẹnukpuchẹ lẹ lekwu, amukọ ki ma ch’eju-wñ n kpai amuche ki ma ch’e-ẹnẹKraist n aw’ef ujeju abudọ Ondu ẹmẹma. Amonẹ anya f’abo ẹdọ ekono mọla ku ma t’uma ubi koji Kraist. (Matiu 7:15, 21-23; Ẹwñ 20:29, 30) Ẹwñ ki chi k’ali amọjọ egwa wewe wewe ku ma aka k’ama ch’ẹnẹKraist dẹ. Ab’aneke ma aboKraist ochochi taa?

3. Ẹwñ ki ch’uhiukọ aboKraist ochochi kpaka che kakini ma n’ufẹdọ gbolo kpai omunẹ. (Jọn 13:34, 35) Ma kọ ma k’u ma kp’ibe kakini ma nyọ t’abo ọlọpu omumẹ abẹk añọla le n. Ma la kọ ma k’u ma chulaka abo ewo omunẹ n. (Ẹwñ 10:34, 35) Todulẹ ma n’ukpẹ ef ogwu eja du n. AboKraist ochochi ache kpai ọla-ma dabu amọmaye abọkẹlẹ kpai abobulẹ.—1 Jọn 4:20, 21.

4. Uhiukọ ọjọ egwa ochochi omunẹ che kakini abo-wñ adojima ñwu Baibul gbali. Ma m’ugba dab Ọla Ọjọ ma la kẹdọno ẹwñ ki ka. (Jọn 17:17; 2 Timoti 3:16, 17) Ma ache kpai Ọla Ọjọ dab ẹwñ kpaka t’ibe kpai ẹwñ ọgwu on’ilẹ le. (Matiu 15:1-3, 7-9) Ma ch’okikili ku ma dẹ alu ki Baibul ka ef ọlai ma ọjọ du. Todulẹ ma kọ ẹwñ’ka ku ma che ẹwñ omunẹ n.—Taitọs 1:15, 16.

5. Ọjọ egwa ochochi añọ d’ojima ñw odu Ọjọ tila. (Matiu 6:9) Jisọs jẹ ñw ab’omunẹ ma, odu Ọjọ, Jihofa. AboKraist ochochi dukpẹ ku ma che abalẹ tila. (Jọn 17:6, 26; Abo Rom 10:13, 14) Abo nya d’adogbe-wẹ ku ma aka odu Ọjọ ñw ab’omunẹ taa?

6. AboKraist ochochi atakoya Ojanẹ Ọjọ tila. Jisọs ch’abalẹ. I kọla lugbo Ọjanẹ lẹ ẹgbadu. (Luku 8:1) I d’ọda ñw amakọchẹ-wñ ku ma takoya uchẹnyọ lẹ pitii ọgbọ-ilẹ du. (Matiu 24:14; 28:19, 20) AboKraist ochochi kẹdọno kakini Ojanẹ Ọjọ kate anya du urẹdọ kpai egwugwu tọkọọ ochochi w’ef ilẹ-i.—Eli Ekọ d’Ọjọ 146:3-5.

7. Amakọchẹ Jisọs dukpẹ ku ma chabo ilẹ bibi-i n. (Jọn 17:16) Ma d’ọla-ma tuny ẹwñ uja ọfẹ kpai amihianyi agbagba amonẹ ilẹ-i n. Ma che ali bibi, uche, kpai ibe ki kpọr’anẹ efilẹ-i n. (Jemẹs 1:27; 4:4) Ẹneke ma ujọ ọjọ egwa adogbe-wẹ ki nẹ uhiukọ ẹnẹKraist ochochi-i?

[Amifoto ki joji ẹpa 26, 27]

AboKraist ochochi afẹdọ omunẹ, ma adojima ñwu Baibul, ma la atakoya Ojanẹ Ọjọ