Magayayya Ka Lagapa Maski nu Ikalussaw Daka

1. Anni i kinagi ni Jesus, anna ngatta kakkadda-kaddag yatun?

KINAGI ni Jesus ta Sermon na ta Vukig: “Magayayya kamu nu ikalussaw kamu na totolay.” (Luc. 6:22, NW) Siguradu nga nakaddag i maggigginna ira kani Jesus tatun nga kinagi na. Awan gare tu tolay nga maya nga mekalussaw. Ngatta gafu ta kinagi yatun ni Jesus? Makasta nga pannonopan yatun nga pakkiavu megafu ta ikala-kalussaw na aru nga totolay sangawe i tumuttuttul ira kani Jesus. Gigiammuattam nu ngatta ikalussaw da ittam anna nu ngatta magayayya ittam lagapa maski nu mekalussaw ittam.

NU NGATTA IKALUSSAW ITTAM NA TOTOLAY

2-3. Anni i tadday nga rason nu ngatta makokkontra i kurug ira nga Cristiano, anna anni i efekto na yatun ta nittam? (Juan 16:2, 3)

² Ikalussaw da ittam megafu ta dayawattam si Jehova. Ammu ni Jesus nga egga noka i totolay nga mangontra anna mamatay paga lagu ta karuan nga disipulo na. Kinagi na meyannung ta nira: “Ariad-da . . . nga amma-ammu i Yama, anna ariad-dà gapa nga amma-ammu.” (Bibbigan i Juan 16:2, 3.) Sinni gafu i rason nu ngatta kokkontran na totolay i kurug ira nga Cristiano? Si Satanas. Yayya “i dios noye na mundo.” (2 Cor. 4:3, 4) Iyarayyu na i totolay ta pangammu ta kinakurug meyannung kani Jehova. Influwensian na gapa ira nga kontran danuri mangaya ta Dios. (Juan 8:42-44) Nilogo gafu ira ni Satanas. Anni i efekto na yatun ta nittam? Megafu ta ammu tam yatun, ariattam ira nga ikalussaw.

³ Maddian si Pavela ta nasion nga megamma i trabahu tam. Megafu ta matalo nga passerbi na kani Jehova, naaresto yayya, nabubbubbug, anna nefuku ta piga nga vulan. Kinagi na: “Ammù nga makokkontra ittam megafu ta ikaya ni Satanas anna na demonio na ira nga pagimmangan ittam ta paddayaw tam kani Jehova. Magaru ta mattrabahu ta affukutan i ari mabba nga mangikalussaw ta nittam. Kukukuadda laman i trabahu da.” Tadday gapa nga brother ta Croatia i kinokkontra na ari nga Saksi nga magana na. Kinagi na: “Nanono ku nga si Satanas i kalaban, ari tu i magana ku.”—Efe. 6:12.

4. Anni i magigiammu tam ta kingngua ni Jesus anna ni Esteban? (Innan gapa i letratu.)

⁴ Ari tam nga ikalussaw i kumokkontra ira ta nittam. Awayya tam paga lagu ira nga ipakimallo. (Mat. 5:44) Kunnatun i kingngua ni Jesus anna ni Esteban. Turi ta nepato si Jesus na suddalu ira nga Romano, nipakimallo na: “Ama, pakomam-mu ira.” (Luc. 23:34) Kiniddaw ni Jesus kani Jehova nga pakoman na i suddalu ira nga nadog tapenu patayan yayya. Awayya na gapa nga agga-nono na i totolay nga nangikulle tu mapatay yayya megafu ta nainfluwensian ira na kumokkontra ta nisa. Ammu ni Jesus nga ari nga ammu natun ira nga totolay i kukukuadda. Kunnatun gapa i kingngua ni Esteban nga nakimallo tu mapakoma i lallaki ira nga mamatay ta nisa. (King. 7:58-60) Sinabbag kari ni Jehova yatun nga pakimallo ni Jesus anna ni Esteban? Wan. Aru ta tolay nga maya nga mapatay si Jesus i nanguli gabbalaman, nangurug ta nisa, anna nappabawtiso. (King. 2:36-41) Si Saulo gapa nga nassuporta ta kapatay ni Esteban ay nabbalin gabbalaman nga Cristiano anna pinabbabawyan na i marake ira nga kingngua na.—1 Tim. 1:13.

5. Anni i magigiammum ta ekspiriensa ni César?

⁵ Tabbagan ni Jehova i pakimallo tam ira para ta kumokkontra ta nittam. Kunnatun i nesimmu kani César nga maddian ta Venezuela. Kinokkontra yayya na yama na turi ta nabbalin yayya nga Saksi ni Jehova. Kinagi na: “Masippo si yenà anna mapia yayya nga atawa. Maski nu kanayun na nga ipoppollu i Pappatulan, ari na nga pinagurayan i yama mi. Sinudduan nà anna i wawwaragì nga irespeto i yama mi. Sinudduan nakami gapa nga tuttulan i yama mi basta ari nga mekontra yatun ta ikaya ni Jehova.” Ta pappasa na piga nga dagun, sisinu nga nanguli i yama ni César. Kinagi na: “Tadday nga aggaw, nakimallo ngà. Tapus niyavu ku ta yamà nu awayyà nga i-Bible study yayya. Turi ta minanugu yayya, fermi i ayayya ku.” Ta pappasa na tiempo, nabawtisowan i yama ni César. Anni i magigiammu tam tatun? Ari tu ngamin nga mangokkontra ta nittam ay manguli. Ngem egga gapa i manguli nu masingadda nga masippo anna marespeto ittam. Magayayya ittam nu manguli ira. Kakayà tam nga masingan nu kunnasi nga iyaranni ni Jehova ta nisa i kunnatun ira nga totolay.—Gen. 18:25.

6. Segun ta Lucas 21:17, anni paga i tadday nga rason nu ngatta ikalussaw da ittam?

⁶ Ikalussaw da ittam megafu ta suportattam si Jesus. Kinagi ni Jesus nga ikalussaw noka na ngamin nga totolay i kurug ira nga Cristiano ‘megafu ta ngagan na.’ (Bibbigan i Lucas 21:17.) Anni kari i irepresenta na ‘ngagan’ ni Jesus? Irepresenta natun i reputasion anna autoridad na bilang Patul na Pappatulan na Dios. Megafu ta suportattam si Jesu-Cristo nga pinili ni Jehova nga mammaguray, ikalussaw ittam na totolay. Mattalo gare ira ta pammaguray na tolay. Nammaguray ngana si Jesus namegafu ta 1914. Aranni ngana gapa nga alsan na i tanakuan ira nga gobiernu.

7-8. Ngatta mauyu-uyaw i karuan nga wawwaragi tam? (Juan 15:18-20) (Innan gapa i letratu ira.)

⁷ Ikalussaw da ittam megafu ta ariattam parigan i totolay ta mundo ni Satanas. Kinagi ni Jesus nga ikalussaw noka na totolay i disipulo na ira megafu ta “ari [ira] nga kukua na mundo.” (Bibbigan i Juan 15:18-20.) Kagitta na Cristiano ira ta ollu nga siglo, ariattam gapa nga parigan i marake nga ugali, annangngua, anna pabbibida na totolay ta mundo. Megafu tatun, aru nga wawwaragi tam i mauyu-uyaw ta pattrabahuan onu ta eskuela. (1 Ped. 4:3, 4) Maski kunnatun, magayayya ittam megafu ta egga ira i dati nga kumokkontra ta nittam nga nanguli anna masippo ngana ta nittam sangawe.

⁸ Kunnatun i nesimmu kani Ignacio nga taga-Central America. Tadday nga mestru na i nanguyu-uyaw ta nisa ta piga nga dagun megafu ta kanayun na nga tuttulan i tuddu na Biblia. Ngem nige nga maggradua si Ignacio, niyavu na mestru na nu ngatta tuttulan na lagapa i tuddu na Biblia maski nu mauyu-uyaw yayya. Nipakanawag ni Ignacio nga proteksion ta nisa i panuttul ta tuddu na Biblia. Tapus inimbita na i mestru na ta study. Nakaddag si Ignacio megafu ta minay yayya. Naappresia na mestru i aya na wawwaragi ta kongregasion yatutta nitulu-tuloy na i magatende. Turi ta nappa-Bible study i mestru na, naekspiriensa na gapa i panguyu-uyaw. Ngem nitulu-tuloy na i napprogreso ta espiritual adde ta nappabawtiso yayya.

9-10. (a) Anni paga i rason nu ngatta neruma i Cristiano ira ta totolay ta mundo ni Satanas? (b) Anni i magigiammu tam kani apostol Pablo?

⁹ Neruma ittam gapa ta totolay ta mundo ni Satanas megafu ta awan tu suportattam ta pulitika anna ta gerra. (Juan 18:36) Tuttuttulattam i tabarang ta Roma 13:1 yatutta tuttulattam i dob ira na gobiernu. Ngem maski kunnatun, awan tu suportattam ta pulitika. Yatun i rason nu ngatta ari ittam makkandidato onu mabboto. Ngatta? Matalo ittam gare kani Jehova anna ta Pappatulan na nga immagurayan ni Jesu-Cristo. Aru nga wawwaragi tam i nefuku megafu ta pangurug da. Ngem maski kunnatun, tulu-tuloy lagapa ira nga mallayyagayya. Paparigadda si apostol Pablo nga nefuku tu piga nga dagun ta balena anna ta affukutan mismu. (King. 24:27; 28:16, 30) Nitulu-tuloy na nga ilayyagayya i mapia nga dumug ta ngamin nga magginna, nelavu ngana i guardia ira ta affukutan, ofisial ira ta korte, gubernador ira, patul ira, anna awayya na nga maski danuri ofisial ira na Emperador na Roma nga si Nero.—King. 9:15.

¹⁰ Maski nu nefuku i wawwaragi tam, layyagayyadda lagapa i ngamin nga magginna nelavu ngana i hues, ofisial ira na gobiernu, anna guardia ira. Tadday nga brother i nefuku ta maturu tu annam nga dagun megafu ta nattalupaddian yayya nga neutral ta pulitika. Kinagi na nga turi ta egga yayya ta affukutan, ari kanu tu pangastigo yatun. Para ta nisa, tadday nga annungan yatun nga naggafu kani Jehova tapenu alegan i totolay nga maya nga magginna ta mapia nga dumug. Magayayya ittam nu usan ittam ni Jehova tapenu layyagayyan i kunnatun ira nga totolay. (Col. 4:3) Innattam nu ngatta magayayya ittam lagapa maski nu ikalussaw ittam na totolay megafu ta passerbi tam kani Jehova.

NU NGATTA MAGAYAYYA ITTAM MASKI NU MEKALUSSAW ITTAM

11. Kunnasi nga massikan i pangurug tam nu makokkontra ittam? Mangiyawa tu angngarigan.

¹¹ Ammu tam nga ketuppalan na profesiya i pangokkontra ta nittam. Ta ollu nga profesiya nga netura ta Biblia, kinagi ni Jehova nga ikalussaw ni Satanas anna na tumuttuttul ira ta nisa i totolay nga mangiddu anna masserbi kani Jehova. (Gen. 3:15) Kanayun gapa nga kagian ni Jesus nga makokkontra i totolay nga masserbi kani Jehova. (Mat. 10:22; Mar. 13:9-12; Luc. 6:22, 23; Juan 15:20) Kunnatun gapa i nitura na karuan paga nga nattura ta Biblia. (2 Tim. 3:12; Sant. 1:2; 1 Ped. 4:12-14; Jud. 3, 17-19) Nu makokkontra ittam gafu, ari ittam nga makaddag. Magayayya ittam lallagu megafu ta matuttuppal i profesiya ta Biblia. Pamakurug yatun nga masserbi ittam ta kurug nga Dios. Yaw i tadday nga angngarigan natun. Maddian i tadday nga sister ta nasion nu sitaw egga i restriksion na trabahu tam. Kinagi na: “Turi ta naddedika ngà kani Jehova, ammù nga meparubang ngà noka ta pangokkontra. Yatutta ari ngà naganassing onu nakaddag turi ta nesimmu yatun niakan.” Tadday i atawa na ta mangokkontra ta nisa. Marake i pattratu na ta nisa. Sinuggi na paga i Biblia anna i publikasion ira. Ngem imbes tu maganassing i sister, mas lallagu nassikan i pangurug na. (Heb. 10:39) Kinagi na: “Neprofesiya i pangokkontra yatutta ammù nga mawag nga mesimmu yatun. Turi ta naekspiriensà mismu yatun, napakurug ku nga yaw i kurug nga relihion.”

12. Anni i nakoffun ta tadday nga brother nga magattam ta pangokkontra?

¹² Maski nu ammu tam nga makokkontra ittam, awayya na nga marigatan ittam lagapa nga magattam. Kunnaw i nitura na tadday nga brother meyannung ta tiempo nga nefuku yayya: “Nu karuan, mavuru-vurung ngà yari tu tumangi ngà.” Anni i nakaduffun ta nisa nga magattam? Kinagi na: “Kanayun ngà nga makimallo. Kanayukku nga igafu i aggaw ta pakimallo. Kada egga gapa i mariga nga situasion nga arubangakku, makimallo ngà mangana. Nu makaporay ngà gapa megafu ta marake i katratù, umay ngà ta banyu tapus makimallo ngà tari.” Pinannonopan na gapa i ehemplo na wawwaragi tam ira nga nagattam ta pangokkontra anna i ehemplo ira ta Biblia. Yatun i nakoffun ta nisa nga attamman i pangokkontra. Natageno na gapa i imammo nga nipromesa ni Jesus nga iyawa na ta tagatuttul na ira.—Juan 14:27; 16:33.

13. Anni i makoffun ta nittam nga maattamman i pangikalussaw?

¹³ Maattammattam i pangikalussaw megafu ta aya. Adde ta patay ni Jesus, iniddu na si Jehova. Iniddu na gapa i kokkofun na ira. (Juan 13:1; 15:13) Nu mapeggan ittam tu kunnatun nga pangaya para kani Jehova anna ta wawwaragi tam, maattammattam i pangikalussaw. Kunnasi? Ikonsidera tam i angngarigan ni apostol Pablo.

14. Anni i nakoffun kani Pablo nga mabbalin tu matalo maski nu matay yayya?

¹⁴ Nige nga matay si Pablo, sinurakkan na i kofun na nga si Timoteo. Kinagi na: ‘I espiritu nga niyawa na Dios nittam ay arian na ittam nga pabbalinan tu minagganassing, nu ari pannuan na ittam ta sikan nga nespirituan anna ta aya.’ (2 Tim. 1:7) Anni i kayà kagian ni Pablo tatun? Kakkagian na nga i aya kani Jehova i makoffun ta Cristiano ira nga maattamman i mariga ira nga situasion. (2 Tim. 1:8) Megafu ta aya ni Pablo kani Jehova, naggutu yayya anna matalo yayya adde ta patena.—King. 20:22-24.

15. Kunnasi nga ipasingan na wawwaragi i pakka-aya-aya? (Innan gapa i letratu.)

¹⁵ Iddeddu tam i wawwaragi tam nga matalo lagapa maski nu makokkontra ira. Pappeligrowan paga lagu na karuan i inango da para ta wawwaragi da. Kunnatun i kingngua ni Akila anna Priscila nga pinappeligro da i inango da para kani Pablo. (Roma 16:3, 4) Sangawe gapa, aru nga wawwaragi tam ta Russia i umay ta korte tapenu pagaramman i naaresto ira nga kapangngurug tam. Tadday ta naaresto nga sister i nakaddag anna ari paga lagu nga nakabida turi ta nasingan na i aru nga wawwaragi ta korte. I pangaya na wawwaragi tam i namasikan ta nisa turi ta kawagan na yatun. Awayya tam gafu nga mabbalin tu magayayya maski nu ikalussaw da ittam. Ngatta? Megafu ta ayatan ittam na wawwaragi.

16. Ngatta kinagi ni Pedro nga magayayya lagapa danuri mauyu-uyaw megafu ta passerbi da ta Dios? (1 Pedro 4:14)

¹⁶ Ammu tam nga magayayya i Dios ta nittam nu attammattam i pangikalussaw. (Bibbigan i 1 Pedro 4:14, NW.) Egga ira i mauyu-uyaw megafu ta passerbi da ta Dios. Ngem kinagi ni Pedro nga awayya da lagapa i mabbalin tu magayayya. Ngatta? Pamakurug gare i panguyu-uyaw nga ‘egga nittam’ i espiritu na Dios. Napagayayya ni Pedro i Dios megafu ta inattamman na i pangokkontra. Kabalin na Pentecostes 33 C.E., inaresto na Judio ira nga guardia na templo si Pedro anna i karuan ira nga apostol megafu ta pallayyagayya da. Ngem magutu nga nidefensa ni Pedro i pangurug na. (King. 5:24-29) Kabalidda paga lagu nga nalatigo, ari ira nga nagimmang nga mallayyagayya. Nagayayya lallagu ira megafu ta “nekwenta ira tu mekunnay nga magattam ta kepasa-pasiran megafu kani Jesus.” Awayya tam gafu gapa nga mabbalin tu magayayya maski nu mekalussaw ittam.—King. 5:40-42.

17. Anni i kinagi ni Jesus ta disipulo na ta gabi nige na nga matay?

¹⁷ Ta gabi nige nga matay si Jesus, kinagi na ta disipulo na ira: “Ayatan na Yamà i sinni laman nga mangaya niakan, ay ayatak-ku gapa yaya.” (Juan 14:21) Ikakaya tam nga duttal i tiempo nga ari ittam ngana nga ikalussaw na totolay anna ayatadda ittam megafu ta passerbi tam kani Jehova. (2 Tes. 1:6-8) Ngem adde ta ari paga nga nesimmu yatun, daddammattam nakuan nga awayya tam lagapa nga mabbalin tu magayayya maski nu ikalussaw da ittam.