Գաղտնի միություններ

ԳԱՂՏՆԻ միությունները լայն տարածում ունեն Արևմտյան Աֆրիկայում։ Դրանք ընդգրկում են հասարակության բոլոր շերտերը՝ անկախ ցեղային, մշակութային կամ լեզվական պատկանելությունից։ Այս միությունները կանոնակարգում են իրենց անդամների հասարակական, կրթական և քաղաքական գործունեությունը։ Նրանց գլխավոր դերը, սակայն, կրոնական բնույթ ունի։ Երկու ամենամեծ գաղտնի միություններն են՝ պորոն (տղամարդկանց համար) և սանդեն (կանանց համար)a։ Օրինակ՝ պորոն ձգտում է «վերահսկել ոգիներին և հավաստիանալ, որ մարդկանց գործերին նրանց միջամտությունը բարենպաստ կլինի» (Initiation, 1986)։

Պորոյի նոր անդամները սովորում են ոգեղեն աշխարհի գաղտնիքների և կախարդության զորության մասին։ Նրանց մարմիններին հատուկ կտրվածքներ են անում, որպեսզի խորհրդանշական սպիեր մնան։ Սանդեի նոր անդամներին նույնպես սովորեցնում են ոգեհարցական արարողություններ։ Սովորաբար նրանք ենթարկվում են նաև սեռական օրգանների խեղման, թեև որոշ վայրերում դա այլևս չի արվում։

Այլ գաղտնի միությունները կանոնակարգում են սեռական վարքը և պատրաստում են ոգեհարցական բուժամիջոցներ հոգեկան և այլ հիվանդություններ բուժելու համար։ Սիեռա Լեոնեում քաղաքացիական պատերազմի ժամանակ մի այդպիսի միություն հայտարարեց, որ իր անդամների դեմ հրազենի գնդակներն անզոր են։ Բայց, ավաղ...

Միության անդամներին արգելվում է ուրիշներին պատմել իրենց սովորածի և ծեսերի մասին։ Այն մարդը, որը կխախտեր այդ պահանջը, ըստ միության օրենքների և կանոնադրության, հնարավոր է՝ ենթարկվեր մահապատժի։