Ի՞նչն է մղում մեզ քարոզելու
1. Ի՞նչ կապ կա սիրո և ծառայության միջև։
1 Աստծու Թագավորության մասին բարի լուրի քարոզչությունը ամենակարևոր գործն է, որ այսօր անում ենք։ Այս մեկ գործն անելով՝ մենք հնազանդվում ենք երկու մեծագույն պատվիրաններին՝ սիրիր Եհովային և սիրիր մերձավորիդ (Մարկ. 12։29–31)։ Սերը զորեղ ուժ է, որը կարող է մղել մեզ լինելու եռանդուն քարոզիչներ (1 Հովհ. 5։3)։
2. Ինչո՞ւ է մեր ծառայությունը սիրո դրսևորում Եհովայի հանդեպ։
2 Սերը Եհովայի հանդեպ։ Մեր թանկագին ընկերոջ՝ Եհովայի հանդեպ սերը մղում է մեզ խոսելու նրա օգտին։ Մոտ 6000 տարի է, ինչ Սատանան չարախոսում է նրան (2 Կորնթ. 4։3, 4)։ Դրա համար էլ մարդիկ հավատում են, թե Աստված տանջում է մեղավորներին կրակե դժոխքում, խորհրդավոր Երրորդություն է, չի հետաքրքրվում մարդկանցով։ Շատերը նույնիսկ եզրակացրել են, թե նա գոյություն չունի։ Մենք շատ ենք ուզում, որ մարդիկ իմանան ճշմարտությունը մեր երկնային Հոր մասին։ Երբ ջանք չենք խնայում Աստծու մասին վկայություն տալու համար, մեծ ուրախություն ենք պատճառում նրան և մեծ հարված հասցնում Սատանային (Առակ. 27։11; Եբր. 13։15, 16)։
3. Ինչո՞ւ է ծառայությունը սիրո դրսևորում մերձավորի հանդեպ։
3 Սերը մերձավորի հանդեպ։ Ամեն անգամ, երբ քարոզում ենք ինչ-որ մեկի, սեր ենք դրսևորում նրա հանդեպ։ Այս ծանր ժամանակներում մարդիկ խիստ կարիք ունեն լսելու բարի լուրը։ Շատերը նման են Հովնանի օրերի նինվեցիներին, «ովքեր իրենց աջ ու ձախ ձեռքը [չէին] տարբերում իրարից» (Հովն. 4։11)։ Մեր ծառայության շնորհիվ մարդիկ սովորում են ապրել երջանիկ կյանքով (Ես. 48։17–19)։ Դա նրանց հույս է տալիս (Հռոմ. 15։4)։ Եթե նրանք լսեն և վարվեն իրենց սովորածի համաձայն, ապա կփրկվեն (Հռոմ. 10։13, 14)։
4. Եհովան ի՞նչը երբեք չի մոռանա։
4 Լավ երեխան սիրում է իր ծնողներին ամեն ժամանակ։ Նմանապես Աստծու և մերձավորի հանդեպ ուժգին սերը կմղի մեզ վկայություն տալու ամեն ժամանակ և ոչ թե միայն այն ժամանակ, երբ պլանավորել ենք ծառայել։ Մենք կքարոզենք առանց դադարի (Գործ. 5։42)։ Եհովան երբեք չի մոռանա այն սերը, որ ցուցաբերում ենք (Եբր. 6։10)։